Транспорт-экспедицион хизматлар аудитининг назарий асослари - Транспорт - Рефераты

Транспорт-экспедицион хизматлар аудитининг назарий асослари

Загружено в:

16.02.2024

Скачано:

0

Размер:

576 KB

Транспорт-экспедицион хизматлар аудитининг назарий асослари Режа: 1. Транспорт-экспедицион хизматларнинг аудит объектлари сифатидаги моҳияти, аҳамияти, таснифи ва тавсифи 2. Транспорт-экспедицион хизматларини кўрсатувчи пахта терминалларининг аудит субъектлари сифатидаги хусусиятлари 3. Транспорт-экспедицион хизматларни кўрсатувчи субъектлар фаолияти аудитининг заруратлари, мақсади ва вазифалари

Транспорт-экспедицион хизматларнинг аудит объектлари сифатидаги моҳияти, аҳамияти, таснифи ва тавсифи Транспорт-экспедицион хизматлар ушбу хизматларни кўрсатувчи субъектлар фаолияти негизини ташкил этади. Мос равишда, транспорт- экспедицион хизматлар ушбу хизматларга ихтисослашган субъектларда ўтказиладиган аудиторлик текширувларининг энг асосий ва муҳим объекти бўлиб ҳисобланади. Таъкидлаш жоизки, аудитга доир дарсликлар, ўқув ва амалий қўлланмаларда транспорт-экспедицион хизматларнинг аудит объектлари сифатидаги моҳияти, аҳамияти, уларнинг ҳисоб ва аудитда муҳим аҳамият касб этувчи таснифий ва тавсифий жиҳатлари етарлича ёритилмаган. Бу, ўз навбатида, мазкур соҳа субъектларида аудит ўтказишнинг назарий, ташкилий ва методологик асосларини ҳам тўлиғича ишлаб чиқилмаганлигидан дарак беради. Шу боис ҳам, қуйида транспорт-экспедицион хизматлар моҳияти ва аҳамиятини, шунингдек уларнинг таснифий ва тавсифий хусусиятларини очиб беришга харакат қиламиз. “Транспорт-экспедицион хизматлар” сўз бирикмаси, кўриниб турибдики, учта мустақил сўзлар, яъни “транспорт”, “экспедиция” ва “хизматлар” дан ташкил топган бўлиб, уларнинг ҳар бири алоҳида мазмун- моҳиятга ҳамда аҳамиятга эга. Чунончи, транспорт ( лотинча trans «орқали» ва portare «ташиш»), мазмунан қуйидагиларни англатади: (1) - бу йўловчилар ва юкларни ташишни амалга оширувчи моддий ишлаб чиқаришнинг муҳим тармоқларидан бири; (2) - бу одамлар, юклар ва ахборотларни бир жойдан бошқа жойга кўчиш жараёнини таъминловчи техник тизимлар, йўл транспорт воситалари, техник қурилмалар ва иншоатлар мажмуаси. Транспорт иқтисодиётнинг ажралмас бўғини (тармоғи), унинг таркибий инфратузилмаси ҳисобланади. Транспорт кишилик жамиятини ҳаракатга

келтирувчи куч, унинг аъзолари меҳнат фаолияти воситаси ҳамда натижаси ҳисобланади. Транспорт хизмат кўрсатиш ва сервис соҳасининг энг муҳим тармоғи ҳисобланади. Транспорт хизматлари соҳаси ўзининг алоҳида тармоқларига эга. Бу тармоқларга ҳаво транспорти, темир йўл транспорти, автомобиллар транспорти, сув транспорти, космик транспорт кабилар киради Транспортсиз иқтисодиётнинг бирон бир бошқа тармоқ ва соҳасини ривожлантириб бўлмайди. Чунончи, транспорт кўрсатилаётган транспорт- экспедицион хизматларда асосий ролни ўйнайди. “Транспорт-экспедицион хизматлар” атамасидаги экспедиция сўзи транспортда юкларни олиб келиш, ташиб келтириш, жўнатишда амалга ошириладиган махсус фаолиятни, яъни қўшимча хизмат турларини билдиради. Манбаларда транспорт ва экспедицияни бирлаштирган ҳолда транспорт-экспедицияси атамасига қуйидагича таъриф ҳам берилган: Транспорт экспедицияси - бу юкни етказиб берувчи ташкилотнинг юкни жўнатувчидан юк олувчига транспортнинг қайси бир тури билан етказиб бериш билан боғлиқ фаолиятидир. Транспорт экспедицияси (экспедиторлик хизматлари) билан махсус экспедиторлар- экспедиторлик ташкилотлари шуғулланади 3 . Транспорт экспедицияси, одатда, юкни жўнатувчи омбори эшигидан олувчи омбори эшигигача етказишни ташкил этишни билдиради. Бу хизмат мазмунини очишда «эшикдан эшиккача» термини 4 қўлланилади. Ушбу ҳолда юкни етказиб бериш бўйича кўрсатиладиган комплекс хизматлар ўз ичига қуйидагиларни олади: юкни жўнатувчи омборидан темир йўл станцияси, порт ёки аэропортгача етказиш; . юкни транспорт воситаларига (автомобиль, вагон, корабль, самолёт) га жойлаштириш; . юкни ташиш ҳақини (тарифини) тўлаш; . юкни транспортдан, чунончи вагондан тушириш;

. юкни автомобилда олувчи омборига етказиш. Хизмат - бу маълум воситалар орқали юридик ва жисмоний шахсларга уларнинг моддий ва маънавий талабларини қондиришга қаратилган фаолиятдир. Шундай қилиб, юқоридаги учта сўз бирикмаси ҳисобланган транспорт- экспедицион хизматлар биргаликда олинганда, авваламбор, унинг махсус хизмат тури эканлигини, бинобарин бу хизматнинг транспорт ва экспедиторлик билан боғлиқ фаолият эканлигини англатади. Манбаларда келтирилган таърифларга кўра транспорт-экспедицион хизматлар деганда “юк ташиш шартномаларини тузиш, юк ташишни бевосита ташкил этиш, юкни жўнатиш ва олишни таъминлаш бўйича кўрсатиладиган хизматлар, шунингдек юк ташиш билан боғлиқ бошқа хизматлар тушунилади”. Транспорт-экспедицион хизматларни кўрсатувчи субъектларда транспорт хизматлари ва экспедицион хизматлар уларнинг алоҳида фаолият турлари ҳисобланади. Чунончи, транспорт хизматлари транспорт- экспедицион корхоналарнинг юкни макон ва замонда ташиш, юклаш, тушириш, сақлаш, суғурталаш хизматларини тақдим этиш билан боғлиқ бўлган фаолиятидир. Экспедицион хизматлар эса товарларни ишлаб чиқарувчилардан истеъмолчиларга етказиб бергунча бўлган жараёнда амалга ошириладиган қўшимча ишлардан, чунончи, юкни саралаш, ўраш, сақлаш, тегишли ҳужжатларини тайёрлаш каби ишлардан иборат бўлади Ушбу ишларсиз жўнатувчиларда товарларни ташиш жараёнини бошлаш, шунингдек товарни истеъмолчига етказиб бериш жараёнини якунлаш амри маҳолдир. Барча транспорт-экспедицион хизматларни учта мезон бўйича таснифлаш ва тавсифлаш мумкин. Булар: (1) бажарилиш жойи; (2) бажарилиш вақти ва (3) бажариладиган иш турлари. Бажарилиш жойига кўра транспорт-экспедицион хизматларни қуйидаги турларга ажратиш мумкин (1-расмга қаранг).

Бажариладиган иш турларига кўра транспорт-экспедицион хизматлар қуйидагиларни ўз ичига олади: •мижоз топшириғига кўра юкни бир нечта транспорт турида етказиш бериш маршрутини ишлаб чиқиш (мультимодаль ва интермодаль юк ташиш маршрутлари);

• денгиз ва дарё кемалари, самолётлар, вагонлар ва автомобиллар фрахтаси учун ташиш жараёнининг бошқа экспедиторлар ва иштирокчилари билан шартномаларни тузиш; •юкни мўлжалга етказиб бериш учун керак бўладиган транспорт ҳужжатларини (ТТН, коносамент, инвойс ва бошқалар) тузиш; •юк ташиш таърифлари, тўловлари ва йиғимларини тўлаш; •юкни суғурталаш, уни бузилиши, камомади, шикастланишини хужжатлаштиришда иштирок этиш; •экспорт-импорт юкларни жўнатишда божхона брокери мажбуриятларини бажариш; •юк жўнатувчини юк харакати, уни йўқотилганлиги, изланаётганлиги тўғрисисида хабардор килиш; •керак холларда юкни бошқа манзилга қайта жўнатиш; •хавфли, габарити катта ва оғир юкларни жўнатишга махсус рухсатномани олиш; •бошқа хизматлар Шундай қилиб, юқоридагилардан кўриниб турибдики, транспорт- экспедицион хизматлар сермазмун ва ўзига хос фаолият тури ҳисобланади. Ушбу хизматлар бўйича яна қуйидаги фикр-мулоҳазаларни ҳам қилиш мумкин. Биринчидан, транспорт-экспедицион хизматлар - бу бозор хизматларининг бир туридир. Бу хизматларни махсус бирликлар томонидан юритилаётганлиги уларни бизнеснинг бир тури эканлигидан дарак беради. Иккинчидан, бизнес тури сифатида транспорт-экспедицион хизматлар тўлиқ хўжалик ҳисоби талабларига жавоб бериши, яъни олинган даромад эвазига килинган харажатларни коплаш ва пироварида фойда келтириши лозим. Айнан шу аснода транспорт-экспедицион хизматларни кўрсатувчи субъектлар фаолияти бизнес фаолияти сифатида қаралиши табиийдир. Учинчидан, транспорт-экспедицион хизматларни махсус

ихтисослашган субъектлар томонидан олиб борилиши объектив заруратдир. Чунки, ушбу хизматларни юк жўнатувчи ёки юк олувчи томонидан ташкил этилиши жуда катта миқдордаги ресурларни талаб килади. Бирок, юк жўнатувчи ёки юк олувчи ушбу ресурсларга ҳамма вақт ҳам эга бўла олмаслиги мумкин. Уларда бундай ресурсларга эга бўлишлик зарурати ҳам йўкдир, чунки уларнинг асосий фаолияти бошқа мақсадларни ҳал этишга қаратилгандир. Тўртинчидан, транспорт-экспедицион хизматлардан фойдаланиш чекланмаган. Айниқса, бизнинг кўп тармоқли республикамизда, ушбу хизматлардан саноат ва ишлаб чиқаришга кирувчи барча субъектларда, катта миқдорда қишлоқ хўжалик маҳсулотлари етиштирилаётган аграр тармоқда, савдо ва тайёрлов ташкилотларида, экспорт ва импорт операцияларида кенг кўламда фойдаланиш объектив заруратдир. Бешинчидан , транспорт-экспедицион хизматларнинг макон ва замонда мавжудлиги, уларга бўлган талабларнинг боган сари ошиб бораётганлиги, мазкур соҳа субъектларининг тармоқ хусусиятлари уларнинг ҳар бирини ўзига хос аудит субъектлари сифатида ҳам тавсифлайди. Ушбу хусусиятларни қуйида пахта толасини сотишда махсус транспорт- экспедицион хизматларни кўрсатаётган пахта терминаллари мисолида ҳам кўриш мумкин. Транспорт-экспедицион хизматларини кўрсатувчи пахта терминалларининг аудит субъектлари сифатидаги хусусиятлари Республикамиз дунё мамлакатлари ичида қишлоқ хўжалик маҳсулотларини, чунончи пахта етиштириш ва унинг толасини сотиш борасида ўз ўрнига эга. “Мураккаб об-ҳаво шароитига қарамасдан, - деб таъкилаган эдилар республикамизнинг Биринчи Президенти И.А. Каримов, - фермер ва деҳқонларимизнинг фидокорона меҳнати ва омилкорлиги туфайли

мўл ҳосил этиштирилди - 7 миллион 500 минг тонна ғалла, 3 миллион 350 минг тоннадан ортиқ пахта хирмони барпо этилди”. Асосий маҳсулоти тола хисобланган пахта билан республикамизда кўп сонли субъектлар шуғулланади. Бу иш, авваламбор, пахтани етиштирувчилар - фермер ва деҳқон хўжаликларига юклатилган. Шунингдек, етиштирилган ҳосилни истеъмолчиларга етказиб беришда пахтани қабул қилувчи ва сақловчилар ҳамда пахта тозалаш корхоналари роли бекиёсдир. Ушбу корхоналар ишларини енгиллаштириш максадида 2000-йилларнинг бошида республикамизда яна бир бўғин - транспорт-экспедицион хизматларни кўрсатувчи субъектлар, яъни терминаллар ташкил этилди. Улар сони бугунги кунда республикамиз вилоятлари кесимида жами 21 тани ташкил этади. Пахта терминалларнинг бош мақсади - етиштирилган оқ олтинни юқори сифатда истеъмолчиларга етказиб бериш ҳисобланади. Пахта толасининг истеъмолчилари бўлиб ҳам ички, ҳам ташқи хорижий харидорлар ҳисобланади. Хўш, республикамиз иқтисодиётида муҳим аҳамиятга молик пахта хомашёсини истеъмолчиларга етказиб бериш мақсадида шакллантирилган ва Борган сари равнақ топаётган пахта терминалларнинг моҳияти, уларга бўлган заруратлар, улар томонидан амалга оширилаётган транспорт- экспецион хизматларнинг нималарда намоён бўлади? Ушбу саволга жавоб топиш учун, авваламбор, пахта терминалларининг ҳамда улар томонидан кўрсатилаётган транспорт-экспедицион хизматларнинг моҳиятига қисқача тўхталамиз. Пахта терминаллари - бу пахта толасини пахтани қайта ишловчи корхоналардан қабул қилиб олувчи, уларни сақловчи ҳамда кейинчалик пахта сотувчиси топшириғи билан харидорларга юклаб жўнатишга доир транспорт-экспедицион хизматларни кўрсатувчи хўжалик юритувчи субъектлардир. Юқорида таъкидлаб ўтганимиздек, республикамизда ҳозирги кунда 21 та пахта териминаллари фаолият юритмоқда. Ушбу терминаллар Ўзбекистон Республикаси Вазирлар Маҳкамасининг 2003 йил 3 июндаги 240-

сонли «Ишлаб чикарилган ва сотиладиган пахта толаси учун ҳисоб-китоб қилиш механизмини такомиллаштириш тўғрисида» қарори асосида ташкил этилган. Пахта толасини ишлаб чиқарувчилар бўлиб пахтани қайта ишлаш корхоналари, бошқачасига айтганда, пахта заводлари ҳисобланади. Пахта толасини сотувчиси бўлиб бизнинг республикамизда ягона юридик шахс- «Ўзпахтаэкспорт» АЖ ҳисобланади. Пахта толасининг харидорлари бўлиб ички ва ташқи истеъмолчилар - хўжалик субъектлари ҳисобланади. Пахта терминалларининг асосий фаолият турлари бўлиб пахта маҳсулотларини ишлаб чиқарувчилардан қабул қилиб олиш, тушириш, сақлаш ҳамда уларни сотувчи топшириғи билан харидорларга юклаб жўнатишдан иборат. Пахта толасини қабул қилиб олиш, сақлаш ва юклаб жўнатиш бўйича амалга ошириладиган технологик ҳамда иқтисодий-молиявий жараёнлар кўргазмали тарзда 3-расмда келтирилган. 3-расмдан кўриниб турибдики, пахта терминалларининг пахта толасини сотиш жараёнидаги иштироки қуйидагиларда намоён бўлади. Биринчидан, терминал унга бириктирилган заводлардан келиб тушган пахта толасини тушириб олади ва уларни ўз омборида сотишгача сақлайди. Иккинчидан, сотувчи терминалга пахта толасини харидорларга жўнатиш бўйича топшириқни тақдим этади. Ушбу топшириқномада кимга, қанча пахта толасини қачон ва қандай транспорт орқали юклаб жўнатиш лозимлиги кўрсатилади. Толани транспортировкаси билан шуғулланувчи транспорт ташкилотлари билан шартномалар ҳам сотувчи томонидан олиндан шартнома асосида белгиланади. Учинчидан, терминал пахта толасини тушириб олиш, сақлаш ва харидорларга юклаб жўнатишга оид хизматлари учун сотувчи корхонага тегишли счётларни тақдим этади.

Тўртинчидан, сотувчи корхона терминалга кўрсатган транспорт- экспедицион хизматлари учун тўловларни ўтказиб беради. Шундай қилиб, пахта терминалларининг асосий фаолияти хусусиятлари, асосан, улар томонидан пахтани тушириб олиш, сақлаш ва юклаб жўнатиш хизматларидан иборат бўлади. Шунга мос равишда пахта терминалларининг асосий фаолиятдан оладиган даромадлари учта турга бўлинади:

*пахта толасини терминалларда тушириш олиш хизматларидан олинган даромадлар; *пахта толасини сақлаш хизматларидан олинган даромадлар; *пахта толасини юклаб жўнатиш хизматларидан олинган даромадлар. Юқорида санаб ўтилган хизмат турларидан олинадиган даромадлар қуйидаги арифметик қурилма асосида топилади: Дх = Хм*Тх Бу ерда: Дх- кўрсатилган хизматлардан олинган даромад суммаси; Хм- кўрсатилган хизматлар ҳажмининг натурал миқдори ; Тх- бир бирлик хизмат миқдори учун белгиланган тариф. Бир бирлик хизмат миқдори учун белгиланган тарифлар «Ўзпахтаэкспорт» АЖ томонидан Молия вазирлиги билан келишилган ҳолда белгиланади. Ҳозирги пайтда ушбу таърифлар қуйидагилардан иборат (1- жадвалга қаранг). 1-жадвал Транспорт-экспедицион хизматлари учун белгиланган тарифлар № Хизмат тури Тариф бирлиги Тариф миқдори, АҚШ доллари 1 Пахта толасини тушириш 1 тонна пахта толаси учун 3,17 2 Пахта толасини сақлаш Ҳар бир кун учун 0,10 3 Пахта толасини экспортга ортиш 1 тонна пахта толаси учун 9,38 4 Пахта толасини мамлакат ичи истеъмолчилари учун ортиш 1 тонна пахта толаси учун 6,19 Пахта терминаллари томонидан кўрсатилган транспорт-экспедицион хизматлар хақини тўловчи бўлиб пахта толасини четга ва ички истемолчиларга сотувчи “Ўзпахтаэкспорт” АЖ ҳисобланади. Ушбу ҳисоб- китоблар корхона томонидан мазкур АЖга ҳар ойда тақдим этиладиган счёт- фактуралар ва улар реестрлари асосида амалга оширилади. Транспорт-экспедицион хизматларни кўрсатувчи субъектлар хусусиятлари ушбу хизматлар таннархида ҳам ўз ифодасини топади. Хизмат

турларига қараб, қуйидаги таннарх кўрсаткичлари фарқланади ва уларнинг ҳар бири ўзига хос меърлар ва тартиблар асосида ҳисоб-китоб қилинади: *тушириш хизматлари таннархи; *сақлаш хизматлари таннархи; *юклаб жўнатиш хизматлари таннархи. Тушириш хизматлари таннархи деганда пахта тозалаш заводлари томонидан автомобилларда етказиб берилган пахта толасини терминалларда омборларга тушириб олишга доир хизматга кетган харажатлар мажмуаси тушунилади. Ушбу хизматлар териминалларда автокаралар ёрдамида ва омбор ишчилари орқали кўрсатилади. Шу боис, тушириш хизматлари таннархи автокараларга кетган ёқилғи, уларнинг эскириши, автокаралар хайдовчилари ва омбор ишчиларининг иш ҳақи (ЯИТ билан биргаликда) каби харажатлардан ташкил топади. Сақлаш хизматлари таннархи деганда терминалларга пахта тозалаш заводларидан қабул қилинган пахта толасини омборларда сақлашга кетган харажатлар тушунилади. Ушбу харажатлар таркибига омборларни сақлаш, уларни эскириши, омбор ходимларига ҳисобланган иш ҳақи (ЯИТ билан биргаликда) ва бошқалар киритилади. Келиб тушган пахта толасининг сақлаш харажатлари омборларнинг бир ойлик харажатлари ва ҳисобот ойидаги кунлар сони асосида топилган ўртача бир кунлик харажатларни пахта толасини ҳақиқатда омборларда сақланган кунлари сонига кўпайтириш орқали топилади. Юклаб жўнатиш хизматлари таннархи деганда терминаллар омборларидан “Ўзпахта экспорт” АЖ разнарядкаси асосида буюртмачиларга жўнатилган пахта толасини вагонларга юклашга кетган харажатлар тушунилади. Ушбу хизматлар бўйича таннарх калькуляцияси бирлиги бўлиб 1 та вагон (47-50 тонналик) ҳисобланади. Юклашга кетадиган харажатлар харажат турларининг ўртача миқдори ҳисоб-китоблари асосида белгиланади. Битта вагонни юклаш харажатлари (таннархи)нинг ўртача қийматини калькуляцияси (ҳисоб-китоби) намуна сифатида 2-жадвалда келтирилган.

2-жадвал Пахта терминалларида 1 та вагонни юклаш хизматлари ўртача таннархи калькуляцияси № Харажат моддалари Ҳисоб-китоб тартиби ва унга асос Сумма 1 Самарқанд Тех ПД Вагон бериш, унга юкни жойлаштириш, вагонни ташиб кетишга тахлаш ва қабул қилиб олиш ҳужжатларини тахлаш 457236 2 Экспертиза 1 дона сертификат 21500 3 Карантин хизмати 1 тонна юк*2510 сум 122990 4 Пломба (Хумо) 2 дона Хумо пломбаси (2*10500) 21000 5 Вагон таъмири 1 вагон учун “Когон Ремонтчи” счёти 44995 6 Темир йул ижара хизмати Улгуржи савдо корхонаси темир йўли шахобчасидан фойдаланиш (1 ойга 1150000*12/700 та вагон) 19714 7 Ёкилги маҳсулотлари сарфи Автокара учун 10 литр солярка (4800*10) 48000 8 Логистика бўлими ходимлари иш хаки харажати 7267428*12/ 700 /3 83870 9 Солиқ 6% соф тушумдан 47*9,38*2798,94 74036 10 Солиқ 15% иш хаки фондидан 83870*15% 14801 11 Ёнгин хавфсизлиги хизмати 16700903*12/600 95434 12 Бошка харажатлар (канцелярия товарлари ва материаллар ) Таҳминий ҳисоб-китоб 90000 13 Эскириш харажатлари Омборхоналар эскиришининг 30 % 86900 14 Электроэнергия Омборхоналарга сарфланган электроэнергиянинг 30 % 3903 ЖАМИ: 1184379 Пахта терминалларининг юқорида санаб ўтилган тушириш, сақлаш ва юклаб жўнатишга доир харажатлари уларнинг жами сотиш таннархини ташкил этади. Пахта терминлларида ушбу кўрсаткич жами хизматларга қилинган сарфлардан келиб чиқиб аниқланади. Энди пахта терминалларининг хусусиятлари ва томонидан кўрсатилаётган транспорт-экспедицион хизматларнинг аҳамияти тўғрисида тўлиқ тасаввурга эга бўлиш учун бу хизматларни кўсатаётган субъектлардан бири бўлган “Самарқанд -Тола” қўшма корхонасининг умумий тавсифига ҳамда унинг фаолияти асосий кўрсаткичларига қисқача тўхталамиз.

«Самарканд-тола» МЧЖ Ўзбекистон Республикаси Вазирлар Маҳкамасининг 2003 йил 3 июндаги 240- сонли «Ишлаб чикарилган ва сотиладиган пахта толаси учун ҳисоб-китоб қилиш механизмини такомиллаштириш тўғрисида» қарорини бажариш мақсадида 2003 йил 10 октябрь ойида ташкил этилган, 2004 йил 5 мартда МЧЖ шаклидаги «Самарканд-тола» Ўзбекистон-Латвия қўшма корхонаси сифатида қайта рўйхатдан ўтган. Жамият устав капитали 999.229.441 сўмни ёки 805 773 АҚШ долларини ташкил килади, унинг таъсисчилар ўртасидаги тақсимоти 3- жадвалда ҳамда 1-диаграммада келтирилган. «Самарканд-тола» Ўзбекистон-Латвия қўшма корхонасининг асосий фаолият тури пахта маҳсулотларини тушириш, сақлаш ва юклашдан иборат. Ушбу фаолият турларини юритиш учун корхона жами 2,201 га умумий ер майдонига, ҳажми 1938 кв.м. дан иборат 3 та ёпик омборхона, шунингдек ҳажми 10774 кв.м. дан иборат 8 та усти ёпик омборхоналарга эга. Ушбу

омборхоналар бир вақтнинг ўзида 10 минг тонна пахта толасини сақлаш имконини беради. Пахта толасини тушириш, ташиш ва юклаш ишлари корхонада 9 дона автоюклагичлар (шундан 7 донаси Mytsibishi 2 донаси Hunday ) ёрдамида амалга оширилади. Корхона ихчамлаштирилган солиқ режмида ишловчи кичик бизнес субъекти ҳисобланади, унинг жами ходимлари сони 25 киши бўлиб, шундан 20 киши бевосита хизмат кўрсатиш билан шуғулланувчи ишчилар, қолган 5 киши эса бошқарув ходимларидир. Таҳлил шуни кўрсатмоқдаки, “Самарқанд-Тола” қўшма корхонаси ўтган 4 йилда қуйидаги миқдордаги пахта толасини экспортга ва ички истеъмолчиларга турли миқдорларда жўнатиш хизматларини кўрсатган. *2011 йил ҳосилидан 35408,0 тонна *2012 йил ҳосилидан 32165,6 тонна *2013 йил ҳосилидан 25103,5 тонна *2014 йил ҳосилидан 35965,1 тонна *2015 йил ҳосилидан 31050,0 тонна Пахта толасини жўнатишнинг миқдор кўрсаткичлари 2-диаграммада ҳам келтирилган. юқоридаги

Корхонанинг 2013-2015 йилларда юқорида келтирилган транспорт- экспедицион хизматлардан эришган даромадлари 4-жадвалда келтирилган. 4-жадвал “Самарқанд-Тола” қўшма корхонасида транспорт эспедицион хизматлардан олинган даромадлар № 1 1 .1 1.2 Соф тушум тури 2013 йил 2014 йил 2015 йил Жами соф тушум, минг сўм 1 084 263 1 413 324,00 1 714 060,00 Шу жумладан: Пахта толасини тушириш хизматларидан 359 076,00 420 286,00 368 775,00 Пахта толасини жўнатиш хизматларидан 571 297,00 812 916,00 1 043 560,002-диаграмма

1 .3 2 2 .1 2.2 2 .3 Шундан: Экспортга жўнатиш хизматларидан 367 001,00 532 753,00 736 082,00 Ички жўнатиш хизматларидан 204 296,00 280 163,00 307 478,00 Пахта толасини сақлаш хизматларидан 153 890,00 180 122,00 301 725,00 Алоҳида хизматлар улуши, % 100 100 100 Шу жумладан: Пахта толасини тушириш хизматларидан 33,1 29,7 21,5 Пахта толасини жўнатиш хизматларидан 52,7 57,5 60,9 Шундан: Экспортга жўнатиш хизматларидан 33,8 37,7 42,9 Ички жўнатиш хизматларидан 18,9 19,8 18,0 Пахта толасини сақлаш хизматларидан 14,2 12,7 17,6 4-жадвалдан кўриниб турибдики, “Самарқанд - Тола” қўшма корхонаси томонидан кўрсатилган транспорт-экспедицион хизматларнинг умумий миқдори охирги уч йилда қарийб 1,7 мартага ошган. Чунончи, пахтани сақлаш ва экспортга юклаб жўнатиш хизматлари ҳажми 2 бараварга, пахтани заводлардан тушириб олишга доир хизматлар ҳажми эса 3 %га ошган. Кўрсатилган транспорт-экспедицион хизматларда йилдан йилга экспортга жўнатишга оид хизматлар миқдори ва уларнинг улуши ошиб бормоқда. “Самарқанд - Тола” қўшма корхонаси томонидан кўрсатилган транспорт-экспедицион хизматлар хақини тўловчи бўлиб пахта толасини четга ва ички истемолчиларга сотувчи “Ўзпахтаэкспорт” АЖ ҳисобланади. Ушбу ҳисоб-китоблар корхона томонидан мазкур АЖга ҳар ойда тақдим этиладиган счёт-фактуралар ва улар реестрлари асосида амалга оширилади. “Самарқанд -Тола” қўшма корхонасининг 2013-2015 йиллардаги сотиш таннархини ташкил қилувчи харажатлар улар моддалари кесимида 5- жадвалда келтирилган. 5-жадвал “Самарқанд-Тола” қўшма корхонасида транспорт эспедицион хизматлар таннархига киритилган харажатлар таркиби

№ Харажатлар гуруҳи ва турлари 2013 йил 2014 йил 2015 йил 1 Жами сотиш таннархи, минг сўм 473798 599955 836969 Шу жумладан: 1.1 Иш ҳақи харажатлари 47671 55596 64915 1.2 Ягона ижтимоий тўлов 15891 18532 11455 1.3 Командировка харажатлари 0 0 0 1.4 АВ ва НА эскириши 97374 108919 121213 1.5 Ёқилғи харажатлари 29472 54441 47893 1.3 Материал харажатлари 27653 48860 60446 1.6 Сертификация харажатлари 7332 8879 12427 1.7 Фумигация харажатлари 13165 14620 23060 1.8 Вагонлар таъмири 9242 13394 19798 1.9 Пахта толаси суғуртаси 0 0 61298 1.10 Вагон транспортировка харажатлари 187096 222622 315565 1.11 Ходимлар суғуртаси 0 0 196 1.12 Сув 3839 5526 12134 1.13 Электроэнергия харажатлари 7416 10131 15647 1.14 Табиий газ 1992 1946 40 1.15 Ижара харажатлари 10368 10368 11730 1.16 Транспорт воситаларини таъмирлаш харажатлари 4644 6459 43792 1.17 Автомашиналар суғуртаси 335 362 398 1.18 Фельдьегерлик харажатлари 545 779 736 1.19 Бошқа харажатлар 9763 17521 14227 5-жадвалдан кўриниб турибдики, транспортэкспедицион хизматлар таннархини ташкил қилувчи харажатлар ўзига хос таркибга эга. Улар номлари ва характери бўйича республикамизда харажатлар таркибини белгиловчи меъёрий –ҳуқуқий ҳужжатларга бир томондан мос келса, иккинчи томондан фарқли жиҳатларга ҳам эгадир. Юқорида келтирилган қисқача шархлардан хулоса қилиш мумкинки, тарнспорт-экпедицион хизматлар ва уларни кўрсатувчи субъектлар фаолияти ўзига хос хусусиятларга эга. Ушбу хусусиятлар уларни ҳисоб ва аудитнинг ҳам ўзига хос объектлари эканлигидан дарак беради. Фаолият юритаётган

транспорт-экспедицион хизматларга ихтисослашган корхоналар, чунончи “Самарқанд-Тола” қўшма корхонаси тажрибасидан кўриниб турибдики, ушбу соҳа субъектларида бухгалтерия ҳисоби ва аудитнинг ҳуқуқий асосларини тартибга солиш зарурати мавжуд. Чунончи, транспорт-экспедицион хизматларни кўрсатувчи субъектлар учун республикамизда ҳозирги кунда амалда бўлган “Маҳсулот (иш, хизмат) ларни ишлаб чиқариш ва сотиш харажатлари таркиби ҳамда молиявий натижаларни шакллантириш тартиби тўғрисида Низом” асосида “Транспорт-экспедицион хизматларни кўрсатувчи субъектларда харажатлар таркиби ҳамда молиявий натижаларни шакллантириш тартиби тўғрисида Низом”ни ишлаб чиқиш мақсадга мувофиқдир. Бундай яхлит меъёрий-ҳуқуқий ҳужжатни ишлаб чиқилиши ва уни барча транспорт-экспедицин хизматлар соҳаси субъектларида жорий этилиши амалиётда мазкур хизматлардан олинадиган даромадлар, улар таннархи ва бошқа молиявий натижалар кўрсаткичлари ҳисоби ва аудитидаги муаммоларни ҳал этилишига имкон беради. Транспорт-экспедицион хизматларни кўрсатувчи субъектлар фаолияти аудитининг заруратлари, мақсади ва вазифалари Республикамизда аудиторлик фаолияти, унинг турлари, мақсади, ўтказилиш заруратлари, вазифалари, унинг ташкилий ва бошқа жиҳатлари “Аудиторлик фаолияти тўғрисида қонунимизда ва ушбу қонун асосида қабул қилинган миллий стандартларимизда белгиланган. Республикамизнинг «Аудиторлик фаолияти тўғрисида қонуни» да аудит махсус фаолият сифатида эътироф этилган ва унга қуйидагича таъриф берилган: «Аудиторлик фаолияти деганда аудиторлик ташкилотларининг аудиторлик текширувларини ўтказиш ва бошқа шу билан боғлиқ профессионал хизматлар кўрсатиш борасидаги тадбиркорлик фаолияти тушунилади» 7 .

Ушбу таърифдан кўриниб турибдики, аудит макон ва замонда юз бераётган жараён, амалий фаолият туридир. У, бир томондан, махсус «аудиторлик ташкилоти» мақомидаги хўжалик юритувчи субъектларнинг тадбиркорлик фаолияти, иккинчи томондан эса, махсус касб эгалари бўлган аудиторларнинг амалий иш фаолияти ҳисобланади. Махсус аудиторлик ташкилотлари томонидан бошқа корхона ва ташкилотларга шартномалар асосида кўрсатилаётган аудиторлик фаолияти бевосита пуллик хизматлар сирасига киради. Аудиторлик ташкилотлари бу хизматларни кўрсатишдан даромад кўради, ўз харажатларини тўлиқ қоплайди ва пировардида фойда оладилар. Айнан шу мазмундаги аудиторлик ташкилотлари томонидан амалга оширадиган аудиторлик хизматлари бозор хизматлари сирасига киради. Давлат корхоналарида, устав капиталида давлат улуши бўлган корхоналарда ҳамда бошқа мақомдаги корхоналарда аудиторлик хизматлари уларнинг махсус бўлинмалари томонидан ўзлари учун ҳам амалга оширилади. Бундай аудиторлик хизматлари ички аудит хизмати ҳисобланади, у корхоналар штат жадвалида кўзда тутилган лавозимдаги ички аудиторлар томонидан олиб борилади ҳамда уларнинг функционал вазифаси сифатида қаралади. Бундай аудиторлик хизматлари пуллик хизматларга, яъни тадбиркорлик фаолиятига кирмайди. Республикамизнинг «Аудиторлик фаолияти тўғрисида қонуни» га мувофиқ махсус аудиторлик ташкилотларининг тадбиркорлик фаолият сифатида эътироф этилган аудиторлик хизматлари иккита гуруҳга ажратилади: (1) аудиторлик текширувлари; (2) аудиторлик ташкилотларининг профессионал хизматлар кўрсатиш борасидаги тадбиркорлик фаолияти. Аудиторлик хизматлари бозорининг муҳим элементи бўлган ташқи аудиторлик текширувлари, ўз навбатида, иккита турга, яъни мажбурий аудит ва ташаббусли аудитга бўлинади. Мажбурий аудит - хўжалик юритувчи субъектлар томонидан ҳисобот йили якуни бўйича тузилган молиявий ҳисоботларни реаллигини билиш

мақсадида ўтқазиладиган аудит. Ўзбекистон Республикасининг «Аудиторлик фаолияти тўғрисида Қонуни» га мувофиқ (10-модда) қуйидаги субъектлар ҳар йили мажбурий аудитдан ўтишлари шарт: • акционерлик жамиятлари; • банклар ва бошқа кредит берувчи ташкилотлар; • суғурта ташкилотлари; • юридик ва жисмоний шахслар маблағларини тўпловчи инвестиция ва бошқа фондлар, уларнинг бошқарувчи компаниялари; • маблағлари юридик ва жисмоний шахсларнинг ихтиёрий ажратмалари ҳисобидан шаклланадиган хайрия ва бошқа ижтимомий фондлар; • маблағларининг ташкил топиш манбалари юридик ва жисмоний шахсларнинг қонунларда кўзда тутилган мажбурий ажратмаларидан иборат бўлган бюджетдан ташқари фондлар; • устав фондида давлат улушига эга бўлган хўжалик юритувчи субъектлар. Ташаббусли аудит - хўжалик юритувчи субъектлар, шунингдек ҳуқуқни муҳофаза қилиш органлари ташаббуси билан ўтказиладиган аудитдир. Ушбу аудит хўжалик юритувчи субъектларнинг ўзлари, инвесторлар, таъсисчилар, акционерлар, ҳуқуқни ҳимоя қилиш ва бошқа назорат органлари - прокуратура, суд, ички ишлар органлари, солиқ қонунчилигини бузилишига қарши курашиш депортаментлари буюртмалари асосида ўтказилади. Мажбурий ва ташаббусли аудит, ўз навбатида, комплекс аудит, тематик аудит каби турларга бўлинади. Комплекс аудит - хўжалик юритувчи субъект молиявий хўжалик фаолиятини тўлиқ қа мраб олган аудиторлик текширувидир. Тематик аудит - бу хўжалик юритувчи субъектлар фаолиятига тегишли бўлган у ёки бу жараёнлар ва операцияларни, ҳисобот кўрсаткичлари ёки моддаларини, айрим олинган бўлимлар фаолияти, ҳужжатларни аудиторлик текширувидан ўтказишдир.

Мажбурий ва ташаббусли аудит натижалари бўйича берилган аудиторлик хулосасининг реаллиги, ҳаққонийлиги учун жавобгарлик ва масъулият бир хил ҳисобланади. Республикамизнинг аудиторлик фаолияти тўғрисидаги қонунига кўра аудиторлик ташкилотлари мажбурий ва ташаббусли аудиторлик текширувларидан ташқари корхона ва ташкилотларга турли профессионал аудиторлик хизматларини ҳам кўрсатишлари мумкин. Бундай профессионал хизматлар сирасига республикамизнинг аудиторлик фаолияти тўғрисида қонунига мувофиқ (17-модда) қуйидаги хизматлар киради: * бухгалтерия ҳисобини йўлга қўйиш, қайта тиклаш ва юритиш; *молиявий ҳисоботни тузиш; *миллий молиявий ҳисоботни бухгалтерия ҳисоби халқаро стандартларига ўтказиш; *хўжалик юритувчи субъектларнинг молия-хўжалик фаолиятини таҳлил қилиш; * бухгалтерия ҳисоби, солиқ солиш, режалаштириш, менежмент ва молия-хўжалик фаолиятининг бошқа масалалари юзасидан консалтинг хизмати; *солиқлар ва бошқа мажбурий тўловлар бўйича ҳисоб-китоблар ва декларацияларни тузиш; *корхона ва ташкилотларга бизнес-режа ва бошқа бошқарув дастакларини тузиб бериш; *бошқа хўжалик юритувчи субъектларга аутсорсинг хизматларини кўрсатиш; *қонунга зид бўлмаган бошқа хизмат турлари. Аудиторлик хизматлари бозорининг муҳим қисми ҳисобланган ички аудит хизмати хўжалик юритувчи субъектнинг махсус бўлимлари ёки ходимлари томонидан Ички аудит хизмати тўғрисида Низомда белгиланган тартиб қоидаларга асосан ўтказилади.

Шундай қилиб, юқоридагилардан кўриниб турибдики, аудит, аудиторлик хизматлари ва аудиторлик хизматлари бозори бир-бири билан узвий боғлиқ бўлган тушунчалардир. Макон ва замонда юз бераётган аудит яхлит тарзда аудиторлик хизматлари бозорини ташкил қилади. Аудиторлик хизматлари бозори - бу макон ва замонда юз бераётган, пуллик ва пулсиз асосда кўрсатилаётган аудиторлик текширувлари ва профессионал аудиторлик хизматлари мажмуасидир.

Юқоридаги таърифга асосланган ҳолда аудиторлик хизматлари бозори таркибини қуйидагича кўргазмали тарзда ифодалаш мумкин (4-расмга қаранг). 4-расм. Аудиторлик хизматлари бозори таркиби Аудит, аудиторлик хизматлари, аудиторлик хизматлари бозорига берилган юқоридаги таъриф ва тавсифлардан кўриниб турибдики, улар бошқа хизмат турларидан қуйидаги жиҳатлари билан фарқ қилади: *ушбу хизмат турлари, авваламбор, давлат бошқарув органлари, инвесторлар, мулк эгалари ва бошқа фойдаланувчиларнинг реал ахборотга бўлган талабларини қондиришга йўналтирилган; *улар хўжалик юритувчи субъектларда амалга оширилган ва оширилаётган молиявий-хўжалик операцияларининг республикамизда амалга бўлган қонун ҳужжатлари талабларига мувофиқ келишини холис экспертиза қилишга қаратилган; *аудиторлик хизматлари бизнесни энди йўлга қўйган, хали-бери тегишли штатдаги ва сондаги ҳисоб ходимларини ёллашга имкони бўлмаган кичик бизнес субъектлари учун энг арзон ва қўлай аутсорсинг туридир;

*аудиторлик хизматлари катта миқдорда моддий харажатларни талаб қилмайдиган, шу билан бирга аудиторларнинг меҳнати юқори баҳоланадиган хизмат туридир. Аудиторлик хизматлари бозори иштирокчилари бўлиб асосан қуйидагилар ҳисобланади (5-расмга қаранг). 5-расм. Аудиторлик хизматлари бозори иштирокчилари 5-расмдан кўриниб турибдики, аудиторлик хизматлари бозори иштирокчилари икки гуруҳга ажратилади. Булар: (1) аудиторлик хизматларини кўрсатувчилар; (2) аудиторлик хизматлари буюртмачилари ёки истеъмолчилари. Аудиторлик хизматлари бозори иштирокчиларининг 1-гуруҳига аудиторлик ташкилотлари, аудиторлар ва экспертлар киради, 5-расмда улар 1,2,3-рақамлар билан белгиланган. Аудиторлик хизматлари бозори иштирокчиларининг иккинчи гуруҳига ушбу хизматларнинг истеъмолчилари, чунончи корхона ва ташкилотлар, давлат бошқарув органлари, таъсисчилар, инвесторлар, ҳуқуқни ҳимоя қилиш органлари киради. Республикамизда аудиторлик хизматларини янада ривожлантириш заруратлари негизида, авваламбор, истеъмолчиларда ушбу хизматларга

бўлган талабни мавжудлиги ҳамда бу талабнинг борган сари ошиб бориши ётади. Шунингдек, давлатимизнинг хўжалик юритувчи субъектлар фаолиятига аралашмаслик, улар устидан давлат назоратлари сонини кескин камайтириш борасидаги сиёсати ҳам холис аудиторлик хизматларини янада равнақ топишига муҳим туртки бўлмоқда. Солиқ назоратларининг 3-4 йилларда бир марта ўтказилишигача бўлган даврда ўтказилаётган ҳар йиллик мажбурий ва ташаббусли аудиторлик текширувлари хўжалик юритувчи субъектларда солиқлар ва тўловлардаги четланишларни аниқланиши эвазига уларни ўз вақтида давлат бюджетига тушишига имкон бермоқда. Демак, аудиторлик ташкилотлари ўзларининг ушбу хизматлари билан давлатга катта наф келтиради, шунингдек корхона ва ташкилотларни солиқлар ҳисоб- китобларида йўл қўйилаётган хатоликлар учун катта миқдордаги жарима ва пенялар тўлаш ҳавфидан қутқаради. Республикамизда аудиторлик хизматларини ривожлантириш зарурартлари сирасига қуйидагиларни ҳам киритиш мумкин. *ахборот етказиб берувчилар (маъмурият) билан ахборотлардан фойдаланувчилар (давлат органлари, банклар, акциядорлар, кредиторлар) манфаатларининг мос келмаслиги, натижада, улар ўртасида зиддиятли вазиятлар юзага келганида маъмурият томонидан нотўғри маълумотлар берилиши; *нотўғри ахборотларга асосланган ҳолда хўжалик қарорларининг қабул килиниши натижасида ноқулай иқтисодий аҳволга тушиб қолиниши ёки инқирозга юз тутилиши; *иқтисодий ахборотларнинг ҳакконийлигини тасдиқлаш учун зарур махсус билимларга эҳтиёж; *ахборотлардан фойдаланувчиларда маълумотларни бевосита баҳолаш ва сифатини аниқлаш учун махсус малака, вақт ва материалларнинг етишмаслиги ва бошқалар.

Юқоридагиларнинг барчаси дунё миқиёсида, шу жумладан бизнинг республикамизда ҳам аудиторлик хизматлари бозорининг келажаги борлигидан дарак беради. “Самарқанд-Тола” қўшма корхонаси, юқорида таъкидлаб ўтганимиздек, аралаш мулк шаклидаги хўжалик юритувчи субъект ҳисобланади. Унда давлат улуши 65 %ни ташкил этади. Шу боис ҳам ушбу қўшма корхона мажбурий аудиторлик текшируви ўтказилиши лозим бўлган субъектлардан ҳисобланади. Транспорт-экспедицион хизматларни кўрсатувчи пахта терминалларида, чунончи“Самарқанд-Тола” қўшма корхонасида аудитнинг асосий мақсади бўлиб молиявий-хўжалик фаолиятини қонун ҳужжатларига мувофиқ олиб борилганлиги, шунингдек молиявий ҳисоботни реал тузилганлиги, давлат, корхона раҳбарияти, инвесторларни реал ахборотлар билан таъминлаш учун тегишли исботу-далилларни тўплаш ҳисобланади. Ушбу мақсаддан келиб чиқиб, транспорт-экспедицион хизматларни кўрсатувчи пахта терминалларида, аудиторлик текширувларининг асосий вазифалари бўлиб қуйидагилар ҳисобланади: • пахта толаси сотувчи бош корхона бўлган “Ўзпахтаэкспорт” АЖ билан унга транспорт-экспедицион хизматларни кўрсатиш бўйича тузилган шартномаларни бажарилишини назорат қилиш; • хизматлари буюртмачисидан бўнак суммасини ўз вақтида кеелиб тушганлигини, шартномаларни белгиланган графикларда бажарилганлигини, улар бўйича ҳисоб-китобларни ўз вақтида амалга оширилганлиги назорат қилиш, уларни тўғри ҳужжатлаштирилганлиги ва ҳисобини тўғри олиб борилганлигини текшириш; • хизматлардан олинадиган даромадларни ҳисоблаш тамойилига мувофиқ улар юз берган вақтдан бошлаб тан олиш ва баҳолашни текшириш; • даромадларни тўғри гуруҳлаш ва тегишли счётларда акс эттирилганлигини текшириш; • даромадларни молиявий ҳисоботда тўғри акс эттирилганлигини

текшириш; • харажатларни уларнинг моҳиятини очиб берувчи мезонларига мос равишда ҳисобга олинганлигини текшириш; • корхона харажатларини тўғри туркумланганлиги ва гуруҳларга ажратилганлиги, уларни тўғри, ўз вақтида ва тегишли бошланғич ҳужжатлар билан расмийлаштирилганлигини текшириш; • корхона харажатлари бўйича ҳисоботлар маълумотлари ва ҳисоб маълумотларини тўлиқ уйғунлиги таъминланганлигини текшириш • якуний молиявий натижаларни туғри шакллантирилганлигини текшириш; • корхонада бюджетга тўланадиган солиқлар ва тўловлар реаллигини текшириш; • фойдани таксимланишини тўғри туркумланганлиги ва гуруҳларга ажратилганлигини, таъсисчилар билан ҳисоблашишлар ҳолатини текшириш ва бошқалар.

Адабиётлар: 1. Ўзбекистон Республикаси Конституцияси. - Т: “Ўзбекистон”, 2012 (кейинги ўзгартиришлар ва қўшимчалар билан). 2. Ўзбекистон Республикаси Солик кодекси. 25.12.2007 й. ЎРҚ-136- сон Қонуни билан тасдиқланган) 3. Ўзбекистон Республикаси қонуни “Бухгалтерия ҳисоби тўғрисида”, 2016 йил 13 апрель 4. Ўзбекистон Республикаси қонуни “Аудиторлик фаолияти тўғрисида”, 2000, 25 май 5. « 2017 - 2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегияси» Ўзбекистон Республикаси Президенти Ш.М. Мирзиёевнинг 2017 йил 7 февралдаги «Ўзбекистон Республикасини янада ривожлантириш бўйича ҳаракатлар стратегияси тўғрисида» 4947-сон фармони билан тасдиқланган. 6. “2016-2020 йилларда хизматлар соҳасини ривожлантириш дастури тўғрисида”. Ўзбекистон Республикаси Вазирлар Маҳкамасининг 2016 йил 26 февралдаги 55-сонли қарори. 7. «Ишлаб чикарилган ва сотиладиган пахта толаси учун ҳисоб- китоб қилиш механизмини такомиллаштириш тўғрисида». Ўзбекистон Республикаси Вазирлар Маҳкамасининг 2003 йил 3 июндаги 240- сонли қарори 8. “Маҳсулот (иш, хизмат) ларни ишлаб чиқариш ва сотиш ҳаражатлари таркиби ҳамда молиявий натижаларни шакиллантириш тартиби тўғрисида Низомни тасдиқлаш тўғрисида”. Ўзбекистон Республикаси Вазирлар Маҳкамасининг 1999 5 февралдаги 54-сон қарори

Похожие

Транспорт-экспедицион хизматларни кўрсатувчи субъектлар фаолияти аудитининг ташкилий ва ахборот таъминотининг ҳолати ҳамда уларни такомиллаштириш йўналишлари

Автотранспорт воситалари ишончлилигининг назарий асослари

Транспорт-экспедицион хизматларни кўрсатувчи субъектлар фаолияти асосий кўрсаткичлари реаллигининг аудити ва улар бўйича бизнес режа бажарилишининг таҳлили

Мамлакат ягона транспорт тизими эксплуатациясини такомиллаштириш

Транспорт жараёнларнинг асослари. Ташиш жараёни ва унинг технологик элементлари.