O’tkir va surunkali glomerulonefrit - Tibbiyot - Referatlar

O’tkir va surunkali glomerulonefrit

Yuklangan vaqt:

20.09.2019

Ko'chirishlar soni:

0

Hajmi:

45.361328125 KB

Ko'chirib olish

O’tkir va surunkali glomerulonefrit Reja: 1. O’tkir glomerulonefrit 2. Surunkali yalpi glomerulonefrit

Buyrakning vazifasi organizmdan uning hayot faoliyati davomida hosil bo’ladigan shlaklarni chiqarib yuborishdan iborat. Ingliz shifokori R.Brayt 1827- yilda siydikdagi oqsil bilan umumiy istisqo buyraklarning diffuz kasalliklariga aloqadorligini aniqladi. U bu kasalliklarning klinikasini va buyraklardagi morfologik o’zgarishlarni tasvirlab bergan. Folgard va Far (1914) patogenetik prinsiplarga asoslanib, buyrak kasalliklarni uchta guruhga bo’lganlar: yallig’lanish, degenerativ, tomir sklerotik kasalliklari. Hozirgi vaqtda statistik ma’lumotlarga ko’ra buyraklardagi asosiy kasalliklarning pasayishga moyilligi ko’rinmayapti. Buyraklar patologiyasi juda turli-tuman: ularning rivojlanish nuqsonlari, buyrakning infeksion, zamburug’li va immun kasalliklari, metabolik nefropatiyalar, ximiyaviy, nurdan va tomirdan zararlanishlari, siydik-tosh kasalligi, buyrakning kollagenozlarda va turli endogen va ekzogen intoksikatsiyalarda zararlanishi, buyrak o’smalari va boshqa turdagi qator kasalliklar shular jumlasidandir. So’nggi yillar statistikasi bo’yicha 10000 aholiga glomerulonefritlar — 13%, sistitlar — 64%, siydik-tosh kasalligi — 18% ni tashkil qiladi. Glomerulonefritli bemorlar terapevtik bo’limlarga yotqizilgan hamma bemorlarning 1—2% ini tashkil etadi. Mustaqil fan sifatida nefrologiyaning rivojlanishida eng yangi diagnostik va birmuncha ta’sirchan terapevtik usullarni ishlab chiqishning hal qiluvchi ahamiyati bor. Eng yangi diagnostika usullariga buyraklar biopsiyasi, radioizotop renografiya va buyrakni skanirlash, seriyali nefroangiografiya, kompyuterli tomografiya, ekskretor urografiya, ultratovush bilan diagnostika qilish va boshqalar kiritiladi. Shuning uchun har bir hamshira diagnostik usullarni yaxshi bilishi va bemorni bu tekshiruvlarga sifatli tayyorlashi zarur. Biz bilamizki, har bir hamshiraning asosiy vazifasi kasallikning oldini olish va bemorlarni parvarish qilishda faol ishtiroq etishdir. Lekin shu bilan birgalikda, bizning fikrimizcha, har bir hamshira bemorga kerak bo’lganda shoshilinch yordam ham ko’rsatishi zarur, masalan, buyrak sanchig’ida. Hamshiralarning vazifasi quyidagilardan iborat bo’lishi kerak:

— har bir hamshira kasallikning oldini olish uchun shu kasallikni keltirib chiqaradigan asosiy sabablarni, klinik belgilarini; — bemorlarni tekshirish usullarini; — davolash va parvarish qilish prinsiplarini; — shoshilinch yordam ko’rsatishni bilishi va bajara olishi kerak. O’tkir glomerulonefrit Glomerulonefrit — buyraklar koptokcha apparati tomirlarining yallig’lanishi bilan ifodalanuvchi immunoallergik kasallikdir. Buyrak koptokchalarining hammasi yallig’lansa, yalpi, kichik bir qismi yallig’lansa, o’choqli glomerulonefrit deb ataladi. Glomerulonefrit ko’pincha anginadan, yuqori nafas yo’llari, murtak bezi yallig’langandan so’ng, ba’zan difteriya, o’pka yallig’lanishi, toshmali terlama, ich terlama va, asosan, streptokokklar qo’zg’atadigan ko’pgina kasalliklardan so’ng, shuningdek, virusli kasalliklar, o’ta sovuq ob-havo ta’siri, namgarchilik va boshqa omillar sababli ham kelib chiqishi mumkin. O’tkir glomerulonefritning rivojlanish jarayonini immunoallergik angina yoki boshqa streptokokkli kasallik bilan og’rigan odamning qonidagi streptokokk antigenlari bilan unga qarshi paydo bo’lgan antitanalar o’zaro birikmalar hosil qiladi. Bu birikmalar qon orqali borib, buyrak koptokchalarining bazal membranasi yuzasiga tushadi, uni zararlantiradi va xemotaksis hodisasini keltirib chiqaradi; polinuklearlar, biologik faol moddalar, gistamin va serotonin ajratib chiqaradi va oqibatda koptokchalarda o’zgarish, giperergik yallig’lanish paydo bo’ladi. Immun birikmalar hosil qilishda faqat bakteriya antigenlari emas, balki boshqa xil antigenlar (oqsil antigenlar, dori moddalarining antigenlari va boshqalar) ham ishtirok etadi. Immun komplekslar tarkibidagi komplementning parchalanishidan hosil bo’lgan moddalar kapillar tomirlari devorlarining o’tkazuvchanlik qobiliyatini kuchaytiradi. Koptokchalar zararlanishida koagulatsiya tizimining buzilishi ham katta ahamiyatga ega. Immun guruhlar ta’sirida trombotsitlar jipslashuvi kuchayadi, qon ivishida ishtirok etuvchi XII omil faollashadi, natijada zardob kallikrinogeni faollashadi, kininlar miqdori ko’payadi, bundan tashqari,

trombotsitning III va IV omillari trombotsitdan ajralib chiqadi. Natijada kapillarlar devoriga fibrin o’tirib oladi. Bunga javoban mezotelial va endotelial hujayralar ko’payib, fibrinni qoplab oladi. Shu tariqa gialin substansiyasining tomir devoriga cho’kishi tezlashadi. Fibrinning hajmi xastalikning kechish darajasiga ta’sir qiluvchi omil hisoblanadi. Tabiiyki, bunda bemorning baquvvatligi va tashqi muhitning ta’siri ham katta rol o’ynaydi. Koptokchalar kapillarlarining bazal membranasi o’tkazuvchanligining ortishi natijasida siydikdagi o’zgarishlar yuzaga chiqadi. Patologik anatomiyasi. Yalpi glomerulonefritning o’tkir kechadigan xilida buyrak o’lchovlari o’zgarmaydi, buyrakni qoplovchi parda oson ko’chadi. Buyrak yuzasida va kesmasida nuqtasimon dog’lar (bo’rtib turadigan qizil dog’lar) paydo bo’ladi. Bu dog’lar yallig’lanish natijasida kattalashgan malpigi tanachalari (buyrak koptokchalari) dir. Mikroskopda kuzatilganda kasallikning dastlabki kunlarida buyrak koptokchalarining kattalashgani, qizargani, qizil va oq qon tanachalari shu yerda to’planib, to’xtab qolgani ko’rinadi. Keyinchalik koptokchalar qonsirab ketgani, oqarib, tomirlari yorilib ketgani kuzatiladi. Klinik manzarasi. O’tkir glomerulonefritda 3 guruh o’zgarishlar kuzatiladi: tanada shish paydo bo’lishi; qon bosimining oshishi, siydikdagi o’zgarishlar. O’tkir nefrit har xil boshlanadi, keskin boshlanishi ham mumkin. Kasallikning boshlanishida bilinar-bilinmas belgilar bilan bir qatorda, bemorning yuz-ko’zlari shishadi, tana harorati ko’tariladi, bosh og’rig’i, kamquvvatlik, siydik kamayishi kuzatiladi. Kasallik 80 — 90% bemorlarda qovoqlar, yuzlarda shishlar, yuzda rangparlik paydo bo’lishi bilan boshlanadi. Bemor ertalab ko’zguda o’z aksini tanimay qolish darajasida shishadi, ko’zlari qisilib, yuzi mo’g’illar yuzidek yapasqilashadi. Teri ostida, o’pka, yurak pardalari orasida, qornida to’plangan suyuqlik (15—20 kg gacha) tana og’irligini oshiradi va 2—3 hafta davomida asta- sekin qaytadi. Shish sindromiga quyidagilar sabab bo’ladi: 1) koptokchalarning shikastlanishi, ularning filtrlash faoliyatining pasayishi, natriy chiqarishning kamayib, reabsorbsiyaning (qayta so’rilish) kuchayishi; 2) tanada suyuqlik tutilib qolishi, aylanib yuradigan qon miqdori ko’payishi; 3) ikkilamchi

giperaldosteronizm va antidiuretik (ADG) gormon ko’payishi; 4) aldosteronga to’qimalar sezuvchanligi, ADG ga nefron distal bo’limlari sezuvchanligining kuchayishi va suyuqlikning tanada yanada ko’proq tutilishi; 5) gialuronidaza tizmasida o’zgarish paydo bo’lishi, kapillarlar devori o’tkazuvchanligining o’zgarishi; 6) qonning suyuq qismi qon tomirlaridan chiqib, g’ovak hujayrali joylarda to’planadi. Nefrotik sindromda plazmaning onkotik bosimi pasayadi .Gipoonkiya va shishlar ko’p hamda tez paydo bo’ladi. O’tkir yalpi glomerulonefritning asosiy belgilaridan biri — qon bosimining oshishidir. Qon bosimi 70—90% bemorlarda o’rtacha oshadi va bu buyrakda qon aylanishining buzilishi natijasida kelib chiqadi. Natriy tuzi bilan suvning badanda to’planishi gipervolemiyaga olib keladi. Qon bosimining oshishi va koptokchalar zararlanishi natijasida renin- angiotenzin-aldosteron zanjirining ta’sir doirasi kuchayadi, buyrakning depressor (tomir tarangligini kamaytirish) faoliyati pasayishi oqibatida kasallik yuzaga chiqadi. Bu hodisani quyidagicha tushuntirish mumkin (3- jadval). 3- jadval Glomerulonefritda gipertoniya patogenezi Sistolik bosim 180 mm, diastolik bosim simob ustuni hisobida 100 — 110 mm ko’tariladi. Arterial qon tomirlarida bosimning keskin ortib ketishi yurak faoliyatini qiyinlashtiradi, bu o’tkir yurak yetishmovchiligi sifatida (ko’p hollarda chap qorincha yetishmovchiligi) ko’rinadi. Bu o’tkir yurak yetishmovchiligi hansirash, yo’tal va yurak astmasi kabi ko’rinishlarda aks etadi. Chap qorincha kengayishi yuz beradi. Yurakning nisbiy chegarasi chapga kengayganligi aniqlanadi. Ko’p hollarda yurak cho’qqisida funksional xarakterdagi sistolik Angiotenzin II Angiotenzin I+oqsil Renin+angiotenzinogen Giperald oster onizm Na + va suvni ng to‘qimada tut ilishi Tomir torayishi Gipertenziya

shovqin eshitiladi, o’pka arteriyasida II ton aksenti eshitiladi, kamroq hollarda „galop“ ritmi kuzatiladi. O’pkalarda quruq va nam xirillashlar eshitiladi. EKG da I, II va III uslubda R va T tishlari o’zgarishi, ba’zi hollarda chuqur Q tishi va QRS kompleksining voltaji kamayishi kuzatiladi. O’tkir nefritning dastlabki simptomlaridan biri sutkalik siydikning kamayishidir (400—700 ml), ba’zi hollarda anuriya kuzatiladi. Siydikning kamayishi, yallig’lanishdan so’ng koptokchalarda bo’ladigan o’zgarishlar oqibatidir, chunki yallig’lanish koptokchalarda filtratsiyaning susayishiga olib keladi. Siydikning solishtirma og’irligi va uning nisbiy zichligi pasaymaydi. O’tkir nefritda siydik sindromi — proteinuriya, silindruriya, makro va mikrogematuriya bilan xarakterlanadi. Jarohatlangan koptokchalar kapillarlari devorlari orqali mayda dispers albuminlargina emas, globulinlar va fibrinogen ham ajralib chiqadi. Siydikda oqsillar soni 1 dan 10 %gacha bo’ladi, ba’zi hollarda 20 %gacha ko’payadi. Lekin siydikda oqsillar faqat dastlabki 7—10 kun mobaynida ko’payib ketadi. Shuning uchun kech tekshirishlarda siydikda albuminlar miqdori uncha baland bo’lmaydi (1 %dan kam). Uncha katta bo’lmagan proteinuriya ayrim hollarda kasallikning boshlanishidanoq yuzaga chiqadi, boshqa hollarda esa, umuman, bo’lmasligi ham mumkin. Siydikda oqsillarning kam miqdori o’tkir nefritda ko’p vaqt saqlanishi mumkin. Bu holat 3—4—6, ba’zida 9—12 oyda umuman yo’qoladi. Gematuriya — o’tkir glomerulonefritning doimiy va albatta yuz beradigan belgisidir. 13— 15 foiz hollarda makrogematuriya, boshqa hollarda mikrogematuriya aniqlanadi, bunda siydik cho’kmasida eritrotsitlar miqdori ko’rish maydonida 10—15 tadan ko’p bo’lmaydi. O’tkir glomerulonefritda silindruriya kuzatilmasligi mumkin. Faqat 75% bemorda gialin, donali, ba’zan epitelial silindrlar topiladi. Oq qon tanachalari — leykotsitlar glomerulonefritda kamdan kam uchraydigan belgi bo’lib, leykotsitlarning soni eritrotsitlarnikidan kam bo’ladi. Leykotsitlarning eritrotsitdan kamligi siydik cho’kmasini Kakovskiy — Addis, Nechiporenko usullarida tekshirib aniqlanadi.

Buyrak faoliyati pasaygani tufayli ba’zan qonda oz miqdorda azot qoldig’i, mochevina miqdori ko’payishi mumkin. Azotemiya uzoq davom etmaydi. O’tkir nefritda qon tarkibida gemoglobin va eritrotsitlar kamayishi kuzatiladi. Anemiyaga gidremiya (qon shishi, boshqacha aytganda qon suyulishi) va nefrit rivojlanishiga sabab bo’lgan infeksiya (masalan, septik endokardit) olib keladi. Eritrotsitlarning cho’kish tezligi keskin boshlanib, shish, hansirash, bosh og’rig’i, bel og’rig’i, siydik miqdorining kamayishi, siydikda oqsil va qon paydo bo’lishi, arterial qon bosimining ko’tarilishi bilan ifodalanadi. Shish 2—3 hafta mobaynida kuzatiladi, so’ngra siydik miqdori ko’paya borib (poliuriya), arterial qon bosimi pasayadi, siydikning solishtirma og’irligi kamayadi, lekin proteinuriya, mikrogematuriya uzoq davom etishi mumkin. O’tkir nefritning ikkinchi — yashirin o’tuvchi turi ko’pincha surunkali nefrit turiga o’tadi. Bu turida kasallik asta-sekin boshlanadi, sezilar-sezilmas hansirash, oyoqlarda shish paydo bo’lishi bilan kechadi. Izchillik bilan o’tkazilgan tekshiruvlarda siydik tarkibida o’zgarishlar topiladi, bu o’zgarishlar 2—3 oy davom etishi mumkin. O’tkir nefrit buyrak eklampsiyasiga olib kelishi mumkin. Eklampsiya arterial qon bosimi balandligi va haddan tashqari shish ko’payganda rivojlanadi. Buyrak eklampsiyasida bemorning ko’zi zaiflashadi, tez-tez mushaklari tirishib, tomir tortishadi, hushidan ketadi, u tilini tishlab olishi, beixtiyor axlat va siydigini tuta olmasligi mumkin. Bu ahvol dori-darmondan keyin tuzaladi. O’tkir glomerulonefritning yana bir og’ir asorati nefrotik sindrom bo’lib, u ko’p oqsil yo’qotish, nihoyatda og’ir shishlar, qon tarkibida oqsilning kamayishi, disproteinemiya bo’lishi, xolesterinning ko’payishi (giperxolesterinemiya) bilan ifodalanadi. Nefrotik sindromning patogenezi ko’pchilik tomonidan tan olingan immunologik konsepsiyaga asoslangan. Nefrotik sindromni eksperimentda hosil qilish uchun nefrotoksin zardobini yuborib chaqirilgan. Nefrotik sindrom rivojlanishida buyrak bazal membranasining buzilishi ahamiyatga ega. Bazal membranada buyrak oqsillariga qarshi antitanalar o’tirib oladi va doimiy ravishda

komplementar reaksiya sodir bo’lishiga olib keladi. Nefrotik sindrom avjga chiqqanda qonda komplement kamayadi. Buyrakka qarshi antitanalar ko’payadi. Immunitetga ta’sir qiluvchi dorilar, steroid gormonning nefritga ijobiy ta’siri bu kasallikning immunoallergik xususiyatga ega ekanligini tasdiqlaydi. Nefrotik sindrom rivojlanishini izohlovchi ikkinchi taxmin modda almashinuvining buzilishi (metabolizm) konsepsiyasidir. Bu konsepsiya bo’yicha oqsilning siydik bilan qo’shilib chiqishi, buyrak koptokchalarining filtrlash xususiyati buzilishi oqibatidir. Zamonaviy tekshiruvlarning ko’rsatishicha, nefrotik sindromda buyraklarda va siydikda eruvchan oqsillarning aktivligi oshishi, qonda gistamin ko’payishi, buyraklarda lizosom fermentlarning yuqori konsentratsiyasi, ularning yallig’lanish reaksiyasini keltirib chiqarishi aniqlangan. Zardobda oqsil balansining buzilishi, ularning mayda dispers oqsil fraksiyalarning chiqishiga hamda organizmda immunologik siljishga olib keladi. Boshqa ma’lumotlar shuni tasdiqlaydiki, oqsil sintezining buzilishi nefrotik sindromda retikulo-endotelial tizimning ish qobiliyati o’zgarishi natijasida vujudga keladi. Nefrotik sindromda hosil bo’ladigan qon tarkibidagi yog’larning ko’payishi kompensator xarakterda bo’lib, bu qon tarkibidagi oqsillarning kamayishiga teskari proporsionaldir. Patogenezda shishlarning paydo bo’lishini qon tarkibidagi oqsilning kamayishi va plazmadagi kolloid-osmotik bosimning kamayishi bilan bog’lamaslik kerak. Nefrotik sindromda organizmda natriyning ushlanib qolishi, uning qayta so’rilishi (reabsorbsiya) kuchayishi, ikkilamchi (giperaldosteronizm) aldosteronning qayta ko’p ishlab chiqarilishi bilan bog’liq va bu, o’z navbatida, qon aylanishining buzilishiga olib keladi. Nafaqat buyrak kapillarlari o’tkazuvchanligining kuchayishi, balki boshqa to’qimalarda kapillar to’rlarning immunologik zararlanishi ham nefrotik sindromga olib keluvchi omildir. Klinik nuqtayi nazardan patogenezda eng muhimi oqsilning siydik orqali chiqishi bo’lib, bu nefrotik sindromda 3 g/sutkagacha va undan ko’p kuzatiladi. Siydikda oqsilning paydo bo’lishi, asosan, koptokchalar bazal membranasining zararlanishi va o’tkazuvchanligining kuchayishiga, shu bilan birga, koptokchalarning filtri orqali yirik oqsil molekulalarning kirishiga bog’liq. Yana

shuni ham ko’rsatib o’tish kerakki, fagotsitlarning normal funksiyasi bazal membranalarda oqsil molekulalarning kirishiga to’sqinlik qiladi. Podotsitlar funksiyasining buzilishi natijasida oqsillar ushlanib qololmaydi va ular bazal membrana orqali kiradi. Yil davomida izsiz kechadigan har qanday o’tkir nefritning kechishi xronik nefritga olib keladi. Shuni ham ko’rsatib o’tish kerakki, o’tkir boshlangan diffuz glomerulonefrit ba’zan o’rtacha o’tkir ekstrakapillar nefritga olib keladi va uning yomon progressiv kechishi yaqin oylarda surunkali buyrak yetishmovchiligiga sabab bo’ladi. Tashxisi. O’tkir diffuz glomerulonefritga diagnoz qo’yish unchalik qiyin emas, chunki kasallik yoshlarda uchraydi va yaqqol ko’zga tashlanadigan klinik belgilardan boshlanadi. O’tkir nefrit bilan surunkali nefritning qaytalanishi orasidagi taqqoslash tashxisi qiyinchilik tug’diradi. Bunda kasallikning boshlanishi, infeksiya bilan bog’liqlik (tonzillit, angina, rinit va hokazo) dan boshlab o’tkir nefrit holatigacha 1—2 hafta o’tadi. Surunkali glomerulonefritga qon bosimining yuqori bo’lishi, yurakning chap qorinchasi gipertrofiyasi, ko’z tubining yaqqol shikastlanishi xosdir. Siydikdagi o’zgarishlar har xil bo’lishi mumkin, lekin surunkali nefrit uchun siydik zichligi va filtrlash vazifasi pasayishi xosdir (gipo-, izostenuriya), o’tkir nefrit uchun yurak faoliyatining yetishmasligi (hansirash, shishlar, yurak astmasi, bradikardiya), kasallikning o’tkir kelib chiqishi (makro- va mikrogematuriya) xos. O’tkir nefritning yashirin turi va piyelonefritning solishtirma tashxisi qiyinchilik tug’diradi. Bunda siydik cho’kmasida eritrotsitlarning leykotsitlardan ustunligi, oqsillarning yo’qligi, anamnestik ko’rsatmalar yo’qligi, rentgenourologik, ultratovush, skanir, radioizotop, biopsiya tekshirishlari yordam beradi. O’tkir nefrit bilan buyrak sili va boshqa buyrak kasalliklari orasida solishtirma tashxis o’tkazish lozim. Davolash. Bu kasallikni davolashda bemorni diqqat bilan to’g’ri parvarish qilish, davo rejimini saqlash va diyetoterapiyaga amal qilish kerak. Bu jarayonda hamshiraning roli katta. Teri parvarishiga katta e’tibor berish (ya’ni shish, yotoq yaralar kelib chiqishiga), ichaklar funksiyasi va yurak ishini doimo nazorat qilish

kerak. Diurezni ichilgan suyuqlikka nisbatan siydikdan tashqari organizmdan chiqib ketayotgan (ter, qusish, ich ketish) suyuqlikka nisbatan har kuni hisoblash, faqat siydik miqdorinigina emas, balki uning rangi, tiniqligini ham nazorat qilish lozim. Shishlar yo’qolguncha va arterial bosim normal holatga tushguncha (3—4 hafta) o’rinda qimirlamay yotish, parhez tutish, dorilarni qabul qilish, asoratlarni, infeksion kasalliklarni bartaraf etish zarur. Bemorga tuzi kam parhez taomlar (7- stol), antibiotiklar (penitsillin, ampitsillin) 10—14 kun; sulfanilamidlardan: nitroksolin, polin gramurin va boshqalar buyuriladi. Antiallergik, desensibilizatsiyalovchi dori-darmonlar foydalidir (dimedrol, kalsiy xlor), qon bosimi yuqori bo’lsa, gipotenziv vositalardan dibazol, papaverin, adelfan, klofelin, raunatin, rauvazan, apressin tavsiya qilinadi. Siydik haydaydigan diuretiklar laziks, furosemid, gipotiazid, veroshpiron, antikoagulant va antiagregantlar ham buyuriladi. O’tkir glomerulonefritning nefrotik sindromida va uning uzoq cho’zilib ketgan holatlarida kortikosteroid gormonlardan prednizolon 60—100 mg dan sutkasiga 4 —8 hafta davomida, keyin sekin-asta kamaytirib boriladi, fizioterapevtik muolajalardan diatermiya arterial bosimni pasaytiradi va beldagi og’riqlarni, shishni kamaytiradi. Shifoxonadan chiqarilgan bemorlar 4 oygacha to’liq davolangungacha ambulatoriya nazoratida turadilar (o’tkir glomerulonefrit yaxshi kechganda ham). Oqibati. O’tkir nefritda butunlay sog’ayish kuzatiladi. O’tkir nefrit kasalligidan odam o’ladi. U faqat miyaga qon quyilishi, yurak funksiyasining yetishmasligi, o’pka yallig’lanishida yuz beradi. O’tkir nefrit 1/3 hollarda surunkali turga o’tadi. O’tkir nefritning oqibati ma’lum darajada kasallikning erta aniqlanishi va to’g’ri davolanishiga bog’liq. Hozirgi vaqtda kortikosteroidlar qo’llanilishi tufayli kasallik ancha kamaydi. O’tkir davrda kasallar ish qobiliyatini yo’qotadilar va kasalxonalarda yotishlari kerak. Tipik kechishida 2—3 oydan keyin to’la tuzaladi. Kasallar ishga qaytishlari mumkin. Siydik sindromi va albumin qoldig’i bo’lsa ham o’tkir nefrit kasalligi bilan og’rigan bemorlarni dispanserda kuzatib turish kerak. Bu, asosan, siydik sindromi bilan og’rigan bemorlar uchun juda muhim.

Kasallik qaytarilmasligi uchun organizmdagi infeksion zararlanishlarning oldini olish kerak. Kasal yil davomida sovqotish, ayniqsa nam, sovuq ta’siri bilan bog’liq ishlardan o’zini asrashi kerak. Profilaktikasi. O’tkir glomerulonefrit bilan og’rigan bemorlar ro’yxatga olinib, shifoxonadan chiqqandan so’ng har 10 kunda, keyinchalik 1 oyda bir marotaba, so’ng 2—3 oyda bir marotaba hamshira tomonidan nazoratga chaqirilib, tekshirilib turiladi. Bu kasallik bilan og’rigan bemorlar sovuq va namgarchiligi yuqori bo’lgan xonalarda ishlamasliklari, og’ir mehnat bilan shug’ullanmasliklari kerak. Bu kasallik bilan og’rigan bemor ayolga 3 yilgacha homilador bo’lish mumkin emas. Bemor quruq va issiq iqlimli kurortlarga yuboriladi. Infeksion kasalliklar va infeksiya o’choqlarini davolash, og’iz bo’shlig’ini sanatsiya qilish va sovqotishdan saqlanish kerak. Surunkali yalpi glomerulonefrit Surunkali glomerulonefrit — buyrak koptokchalarining uzoq davom etadigan immunoallergik yallig’lanishidir. Bu kasallik buyrak koptokchalarining asta-sekin shikastlanishi hisobiga buyrak faoliyatining susayishi, arterial qon bosimining oshishi va buyrak yetishmovchiligining rivojlanishi bilan ifodalanadi. Sabablari. Surunkali nefrit o’tkir glomerulonefritdan so’ng va birlamchi surunkali glomerulonefrit sifatida ham rivojlanadi. Surunkali glomerulonefrit aksari immun tabiatli bo’lib, zardoblar, vaksinalar, antigenlar, zaharli moddalar, ba’zi dorilar, sovuq ta’sirida rivojlanadi. Ba’zi dorilar „o’tkir“ zaharli buyrak kasalliginigina emas, balki yalpi glomerulonefrit rivojlanishiga ham olib kelishi mumkin. Surunkali glomerulonefrit sil, zahm, bakterial endokardit, gemorragik vaskulit, tugunli periarterit va boshqa kasalliklarda ham rivojlanadi. Patogenezi. Nefritning surunkali ko’rinishi makroorganizmdagi immunologik, ayniqsa, autoimmun o’zgarishlar darajasiga bog’liq. Patologik anatomiyasi. Surunkali glomerulonefritning klinik ko’rinishi va buyrakdagi anatomik o’zgarishlar bir-biri bilan sindrom ustun bo’lsa, buyrak hajmi katta, ustki pardasi oson ajraydigan, yuzasi silliq, och kulrang bo’ladi (katta oq buyrak). Po’stloq qismi kengaygan och kulrang bo’lib, qizg’ish miya qismidan

ajralib turadi. Mikroskopda buyrakning ilonizisimon naychalari kengayganligini, epiteliy to’qimasida shish, bujmayish, donachali yoki vakuolali distrofiya hodisalarini ko’rish mumkin. Buyrakni punksion biopsiya usuli bilan tekshirish natijasida surunkali glomerulonefritning quyidagi gistologik turlari farq qilinadi: 1) pardali (membranali) glomerulonefrit — buyrak koptokchalarining bazal pardasida to’qimalarning birlashuvi va qalinlashuvi bilan kechadi; 2) to’qimalar ko’payib zichlashuvi bilan kechuvchi (mezangial) glomerulonefritda koptokchalar to’qima elementlarining o’zgarishi kuzatiladi; 3) koptokchalarda biriktiruvchi to’qima paydo bo’ladi (fibroplastik glomerulonefrit). Glomerulonefritning so’nggi bosqichida buyrak bujmayadi, o’lchamlari kichrayadi, miya qismi donachalari bilan qoplanib, po’stoq qismi yupqalashadi. Koptokchalar bo’shab, o’rnida biriktiruvchi to’qima paydo bo’ladi, buyrak bujmayadi, buyrakning ikkilamchi bujmayishi paydo bo’ladi. Klinik manzarasi. Surunkali glomerulonefritning klinik manzarasi uning turlariga bog’liq. Xastalik, asosan, uch guruh sindromlar ko’rinishida namoyon bo’ladi. 1. Siydikdagi o’zgarishlar: proteinuriya, gematuriya, silindruriyadan iborat. 2. Qon bosimi ko’tarilishi natijasida paydo bo’lgan o’zgarishlar. 3. Badanda shish paydo bo’lishi sababli paydo bo’lgan o’zgarishlar. Surunkali glomerulonefritning quyidagi klinik turlari farq qilinadi. 1. Yashirin kechuvchi (latent) glomerulonefrit eng ko’p uchraydigan turi bo’lib, 44% ni tashkil qiladi. Bu turdagi glomerulonefrit siydikda biroz o’zgarishlar borligi bilan ifodalanadi, qon bosimi oshmaydi, shish ham ko’rinarli darajada bilinmaydi. Xastalik, yashirin davr 30—40 yil o’tgach ham yana yuzaga chiqishi mumkin. Bemorlar uzoq yillar davomida ish qobiliyatlarini yo’qotmaydilar, xastaliklarini sezmaydilar. Ko’pincha surunkali glomerulonefritning yashirin turi yo favqulodda boshqa xastalik bo’yicha shifokorga murojaat qilish yoki dispanserizatsiya vaqtida siydikdagi o’zgarishlar (solishtirma og’irlik pasayganligi, qizil qon tanachalari ko’proq ajralayotgani, tunda siydikning ko’proq ajralishi), qon bosimining biroz oshganligi, ECHT ning

tezlashgani, qonda oqsil moddasi kamaygani, xolesterin ko’payganligi asosida aniqlanadi. Aksariyat yashirin kechuvchi surunkali glomerulonefrit buyrak faoliyati buzilib, yetishmovchilik rivojlanganda aniqlanadi. Buyrak yetishmovchiligi esa qonda qoldiq azot, mochevinaning miqdori oshishi bilan yuzaga chiqadi. 2. Surunkali glomerulonefritning nefrotik ko’rinishi. Siydik orqali katta miqdorda oqsil ajralishi (sutkada 3,5 g dan ko’p), qonda oqsil moddasi (gipoproteinemiya), ayniqsa albumin/globulin koeffitsiyentining kamayishi (disproteinemiya), xolesterin moddasining ko’payishi (giperxolesterinemiya — 600 — 800 mg%) bilan ifodalanadi. Bemorlarning badanida gipoproteinemik (oqsil kamayishi natijasida) shishlar paydo bo’ladi. Bunday shishlar boshqa shishlardan farqli bo’lib, yuz-ko’z qovoqlaridan boshlanadi va asta-sekin butun badanga tarqaladi. Ular doimiy xususiyatga ega bo’ladi, hatto ichki a’zolarga, yurak, o’pka va qorin pardalariga, bo’shliqlarga tarqaydi. Teri shilliq pardalari quriydi, mushaklar kichrayadi (atrofiya), oqibat natijada teri bujmayadi. Siydik orqali oqsil chiqishi bilan birga, qon tarkibida uchglitserid va ozod xolesterin ko’payadi. Surunkali glomerulonefritning nefrotik ko’rinishi nefrotik sindrom va buyrak yallig’lanishi belgilari (siydik bilan qon chiqishi, buyrak filtrlash xususiyatining pasayishi) bilan birga namoyon bo’ladi. Xastalikning boshlang’ich davrida qon bosimi oshmasligi mumkin, lekin so’nggi davrida balandlashadi. 3. Surunkali glomerulonefritning gipertonik ko’rinishi. Ko’pincha yashirin kechuvchi glomerulonefritga xosdir. Bemorlarni tekshirishda, asosan, qon bosimi ko’tarilganligi aniqlanadi. Qon bosimi xastalikning boshlanishida doimiy bo’lmaydi, aksariyat sovuq va asab buzilishi ta’sirida kechga tomon ortadi. Buyrak faoliyati pasaygach, sistolik va diastolik bosim muntazam oshib borib, 200/120 mm simob ustuniga yetadi, asta-sekin yurak faoliyati ham buziladi, yurak cho’qqisining turtkisi kuchayadi, cho’qqi sohasida I ton susayib, sistolik shovqin paydo bo’ladi, aortada II ton kuchayadi, ot chopganda eshitilgani kabi yurak

tovushlari tez va baland gupirlab eshitiladi, so’ngra yurak faoliyati yetishmovchiligi qo’shiladi, yurak astmasi xuruji va hatto o’pka shishi paydo bo’lishi mumkin. Surunkali glomerulonefritda qon bosimi asta-sekin oshadi, yurakning ishemik kasalligi, stenokardiya rivojlanadi. Ko’z tubidagi tomirlarda o’zgarishlar paydo bo’ladi, ko’z tubida qon quyilish hodisasi ham uchraydi. Kasallikning oxirgi davridagina ko’z to’r pardasida davolab bo’lmaydigan jiddiy o’zgarishlar paydo bo’lishi mumkin. Qon bosimi buyrakning qonsirashi va renin faolligining ko’payishi natijasida oshadi. Arterial qon bosimi buyrak yetishmovchiligi davrida va kasallik shiddatli kechganda juda baland va turg’un bo’ladi. Bemorda miokard infarkti, bosh miyaga qon quyilish hollari ro’y berishi mumkin. Surunkali glomerulonefritning aralash ko’rinishi. Bu ko’rinish uchun qon bosimi oshishi va nefrotik sindrom borligi xosdir. Ammo bu sindromlarning belgilari bir xil darajada yuzaga chiqmasligi mumkin. Aksariyat kasallik avj olgan davrda 1 yoki 2 sindrom yuzaga chiqadi. Masalan, siydikdagi o’zgarishlar sindromi (proteinuriya, gematuriya, silindruriya), bemorning umumiy ahvoli 2—5 yil o’zgarmay, qoniqarli bo’ladi, so’ngra buyrak faoliyatida yetishmovchilik rivojlanadi. Surunkali glomerulonefritning klinik kechishi 2 bosqichdan iborat: 1. Buyrakning azot ajratish faoliyati saqlanadi. Bu bosqich uzoq davom etib, yashirin o’tadi va faqat siydikda paydo bo’ladigan o’zgarishlar orqali namoyon bo’ladi. 2. Buyrak faoliyatining buzilish bosqichi. Bu bosqich xastalik boshlangandan so’ng 1 oydan 30 yilgacha davr ichida boshlanishi mumkin. Xastalikning shiddatli turida tezroq, yashirin o’tuvchi turida kechroq boshlanadi. Bu bosqichda buyrak faoliyati pasayadi. Azot ajratish, siydikni quyuqlashtirish faoliyati pasayadi. Siydikdagi o’zgarishlar kamayadi, solishtirma og’irligi kamayib, 1007—1008 atrofida bo’ladi. Siydik bilan oqsil moddasi muttasil ajralib turadi. Qon bosimi muntazam baland bo’ladi. Badanda shish paydo bo’ladi, qon tarkibidagi mochevina, kreatinin, indikan ko’payadi, oqsil esa kamayadi.

Tashxisi va solishtirma tashxisi. Agar bemor ilgari o’tkir nefrit o’tkazgan hamda surunkali nefritning hamma klinik manzarasi yaqqol bo’lsa, tashxis qo’yish qiyin bo’lmaydi. Lekin surunkali nefrit yashirin kechsa yoki gipertoniyali surunkali nefrit bo’lsa, tashxis qo’yish mushkullashadi. Bemor o’tkir nefrit o’tkazmagan bo’lsa, lekin siydigida biroz oqsil hamda gematuriya aniqlansa, unda buyrakning boshqa kasalliklari haqida (piyelonefrit, buyrak tomirining qisilib qolishi, buyrakning anomaliyasi) o’ylash kerak va shu kasalliklardan farqlash lozim. Surunkali nefritning gipertonik xilini gipertoniya kasalligi bilan taqqoslash qiyin bo’ladi. Surunkali nefritda siydikdagi o’zgarishlar gipertoniyagacha, yurakning chap qorinchasi gipertrofiyasi gipertoniya kasalligiga nisbatan kamroq bo’ladi. Gipertoniya xuruji „krizi“ surunkali nefritda kamroq uchraydi. Surunkali nefritda gipertoniya kasalligiga nisbatan yurak toj tomirining aterosklerozi sekin va kam rivojlanadi. Surunkali nefritni surunkali piyelonefrit bilan taqqoslash tashxisi o’tkazilganda siydik cho’kmasidagi eritrotsitlar, leykotsitlar soniga ahamiyat beriladi. Leykotsitlar sonining ko’pligi, aktiv leykotsitlar bo’lishi, buyrakni rentgenourologik tekshirganda buyrak jomlari strukturasining o’zgarganligi surunkali piyelonefrit borligidan dalolat beradi. Surunkali nefritning nefrotik xilini buyrak amiloidozi, diabetik glomeruloskleroz, jigar sirrozi bilan taqqoslash lozim. Surunkali nefritning nefrotik xilida buyrakning yallig’lanish belgilari (gematuriya, gipertoniya), buyrak koptokchalari filtratsiyasining kamayishi va buyrakning konsentratsiya qilish faoliyatining pasayishi diagnoz qo’yishda asosiy rol o’ynaydi. Buyrakni biopsiya qilib tekshirish tashxisini aniqlaydi. Amiloidozdan farqlash uchun og’iz shilliq pardasi gistologik usulda tekshiriladi. Rentgen nuri yordamida buyrak va siydik ajralish yo’llarini ko’zdan kechirish, izotop va kontrast modda yordamida buyrakning rentgen suratini olish, UZD yordamida tekshirish, buyrak tomirlarini tekshirish (angiografiya) kerak.

Buyrak to’qimasini tekshirish — punksion biopsiya usulini qo’llash xastalikni aniqlashga yordam beradi. Surunkali glomerulonefritning oqibatlari. Surunkali glomerulonefritda buyrak bujmayishi va buyrak faoliyatining pasayishi, buyrak yetishmovchiligi — surunkali uremiya rivojlanishi kuzatiladi. Bunday noxush oqibat xastalik boshlangandan so’ng 1 yildan 30 yilgacha davr ichida yuzaga chiqadi. Oxirgi 10— 15 yil mobaynida buyrak kasalliklarini aniqlash va davolash sohasida erishilgan yangiliklar, jumladan, davolash jarayonida kortikosteroidlar va immunodepressiv moddalarning qo’llanishi noxush oqibatlarni kamaytiradi, bemorlarning mehnat qobiliyati uzoqroq saqlanishiga va hatto 14—18% bemorning butunlay sog’ayib ketishiga yordam beradi. Lozim bo’lsa (o’tkir yallig’lanishlar qo’shilib qolsa), shifoxonada davolanish buyuriladi. Surunkali glomerulonefritni davolashda parhezga katta ahamiyat beriladi. Nefrotik va kasallikning aralash turida osh tuzi kam beriladi (sutkasiga 1,5—2,5 g gacha). Siydik ajratish xususiyati buzilmagan bo’lsa, oqsil chegaralanmaydi, o’rtacha 1 kg vaznga 2 — 2,1 g oqsil berish kerak. Bemorning qon bosimi ortiq bo’lsa, osh tuzi kam beriladi (5 g), oqsil va uglevodlar me’yori o’zgarmaydi. Surunkali glomerulonefritning shish bilan kechuvchi mezangioproliferativ va mezangiomembranoz turlarida glukokortikosteroidlar ijobiy ta’sir ko’rsatadi. Diffuz fibroplastik va o’choqli-segmentar glomerulosklerozli nefritda glukokortikosteroidlar buyurish maqsadga muvofiq emas. Xastalik xuruj qilganda, ayniqsa, kasallikning nefrotik turida kortikosteroidlar, masalan, prednizolon buyuriladi. Prednizolon tana og’irligiga nisbatan 1 mg/kg hisobida 3—8 hafta davomida buyuriladi, so’ngra asta-sekin doza kamaytirib boriladi va sutkasiga 7,5 —10 mg ga tushgach, shu dozada uzoq vaqt davomida beriladi. Agar nefrotik sindrom (orqaga qaytmasa) kamaymasa, prednizolon puls-terapiya usulida davolash buyuriladi. Surunkali glomerulonefritning nefrotik turiga glukokortikoidlar yordam qilmasa, prednizolon bilan birga, azatioprin yoki siklofosfamid sutkasiga 150—200 mg buyuriladi. Dorilar dozasi 6—8 haftadan so’ng pasaytiraladi va uzoq vaqt davomida bemorga beriladi (6 oygacha). Agar

kortikosteroidlar buyurish mumkin bo’lmasa (qandli diabet, oshqozon yarasi va hokazo), sitostatiklarning o’zi buyuriladi. Sitostatiklar bilan davolanayotgan bemorlar qonida leykotsitlar va neytrofillar soni tekshirib turiladi. Buyrak parenximasidagi yallig’lanishni kamaytirish maqsadida indometatsin sutkasiga 50 mg dan 150 mg gacha beriladi. Indometatsin mediatorlarda immunologik jarayonlarni kamaytiradi. Gipertoniya bilan va buyrak yetishmovchiligi bilan kechuvchi glomerulonefritda indometatsin buyurilmaydi. Srunkali glomerulonefrit uning klinik ko’rinishi, kasallik holati va asoratiga qarab davolanadi: — ma’lum davo rejimini saqlash; — parhezning chegaralanishi; — dori moddalari bilan davolash. Bemorlar sovuq qotishdan, fizik va psixik zo’riqishdan saqlanishlari kerak. Ularga kechki vaqtda, sovuq ochiq havoda, issiq sexlar va nam sharoitda ishlash taqiqlanadi. Bemorlarga kunduzi 1—2 soat yotib dam olish tavsiya etiladi. Bir yilda bir marotaba shifoxonada davolanishlari zarur. Kasallikning ozgina qaytalanish belgilari paydo bo’lishi bilanoq, bemorni darhol shifoxonaga yotqizib davolash lozim. Parhez surunkali glomerulonefritning klinik ko’rinishlariga asoslangan holda belgilanadi. Osh tuzi cheklangan stol tayinlanadi (7- stol). Patogenetik davo sifatida kortikosteroidlar qo’llaniladi. Shishlarda gormonlar bilan birga, diuretiklar: furosemid, veroshpiron, aldakton belgilanadi. Diurez oshishi uchun poliglukindan foydalaniladi. Gipertoniyaga qarshi gipotenziv vositalar, antibiotiklar, allergiyaga qarshi vositalar (dimedrol, suprastin), vitamin buyuriladi. Buyrak koptokchalari va arteriolalari devorlarida fibrin cho’kishini va qon zardobidagi fibrin miqdorini kamaytirish maqsadida teri ostiga yoki vena tomiriga geparin yuboriladi. Geparin teri ostiga kuniga 4 mahal 5—10 ming o’lchov birligida yuboriladi. Odatda, geparin kindikdan 4 sm pastroqqa, teri orasiga yuboriladi. Qon ivish vaqti Moravits usuli bilan tekshiriladi. Agar trombin qon ivish vaqti va antitrombin III nazorat qilinmasa, geparin 10—15 ming o’lchov

birligida faqat 3 kun beriladi. Geparin bilan davolash vaqtida kurantil, trental buyurish maqsadga muvofiq. Kasallikning oldini olish. Shu maqsadda o’tkir glomerulonefritli bemorlarni tuzalguncha davolash, bemor badanidagi infeksiya o’choqlarini bartaraf qilish, bemorlarga uzoq vaqt parhez tutish maslahat qilinadi. Surunkali nefrit bilan og’rigan bemorlar sovuq va nam havo ta’siridan o’zlarini ehtiyot qilishlari, sanatoriya va kurortlarda dam olib turishlari lozim. Bemor badanida shish paydo bo’lsa, to’shakda yotib, badanini issiq tutish, ayniqsa, belbog’ bilan o’rash tavsiya etiladi. Profilaktikasi quyidagilardan iborat: infeksion o’choqlarni yo’qotish (angina, tonzillit, tish kariyesi), og’iz bo’shlig’ini sanatsiya qilish, bemor asab buzilishi va jismoniy zo’riqishdan saqlanishi zarur. Parvarishi. Kasallikning o’tkir davrida hamshira bemorlarni, ayniqsa, yaxshi parvarish qilib turadi, badan terisiga, yurak tomirlar sistemasiga, ahvoliga, qancha siyishiga qarab boradi, sutkalik diurezni o’lchab turadi. Barcha klinik va laboratoriya ko’rsatkichlarining asliga kelib qolishi bemorning sog’ayganidan darak beradigan mezon bo’lib xizmat qiladi. O’tkir glomerulonefritni boshdan kechirgan bemor jismoniy nagruzkalar, sovqotishdan ehtiyot bo’lishi, quruq, iliq binoda ishlashi kerak. Spirtli ichimliklar ichish qat’iyan taqiqlanadi. Tibbiyot hamshirasi yotoq yaralarni profilaktika qilish uchun har kuni choralar ko’rishi: o’rinni bir necha marta yig’ib, qayta solishi, terini dezinfeksiya qiladigan eritmalar bilan artishi, bemorni yonboshi bilan yotqizib turishi va dumg’azasi tagiga rezina chambar qo’yishi lozim.

Adabiyotlar : 1. O’. B. Sharapov. Ichki kasalliklar. Abu Ali ibn Sino. T., 1994. 2. K. Bahodirov. Ichki kasalliklarda tashxis va diagnostika. T., 1993. 3. L.S. Zalikina. Bemorlarning umumiy parvarishi. T., 1995. 4. N.M. Kamolov. Ichki kasalliklar. T., 1996. 5. V.A. Galkin. Ichki kasalliklar. T., 1989. 6. E.Y. Qosimov. Ichki kasalliklar propedevtikasi. T., 1998. 7. „Hamshira“ jurnali, T. 2000. 8. V.M. Majidov. Yuqumli kasalliklar. T., 1993.

O'xshashlar

Surunkali xolesistet

O’tkir allergozlar

Piyelonefrit

Bolalarda uchraydigan o’tkir gerpetik stomatit (O’GS)

Buyrak tosh kasalligi