Наримон Олимов - San'at - Referatlar

Наримон Олимов

Yuklangan vaqt:

20.09.2019

Ko'chirishlar soni:

0

Hajmi:

45.5 KB

Ko'chirib olish

Наримон Олимов (1928–1963) Наримон Олимов 1928 йил 28 ноябрда Қўқон шахрида, хизматчи оиласида таваллуд топди. У жуда ёшлик чоғидан мусиқа шинавандаси ва ихлосманди сифатида кўзга ташланди. Унинг ўқишга қадам қўйган йиллари урушнинг дахшатли кунларига тўғри келди. Бундай оғир вақтларда ҳамма нарса Ватан, Фронт, Ғалаба учун шиори остида қахрамон халқимиз курашга отланган пайтда хукуматимиз ўсиб келаётган ёш авлодни ватанпарвар рухида тарбиялаш масаласини илгари суриб, янгидан-янги мактаблар, интернатлар ва харбий мусиқа мактаблари очиб, ёшларга кенг йўл очиб берди. Шу муносабат билан Қўқон шахрида ҳам Москванинг биринчи сон харбий мусиқа мактаби очилди. Ана шу мактабда Наримон флейтачи сифатида тахсил олабошлади. Унинг шу вақтдаги ҳаётини журналист Адҳам Олим 1980 йилнинг 7 май куни «Меҳнат байроғи » номли Қўқон шахар рўзномасининг иккинчи сахифасида босилган мақоласида батафсил баён этган: «Наримонни провардида бунчалик моҳир флейтачию, дирижёр бўлиб етишишини на жуда эрта бева қолган онаси, на яккаю-ягона синглиси, хеч ким ҳаёлига ҳам келтирмаган эди. Боиси шуки, ўсмирлигиданоқ ўта камгап, камсуқум, ўйчанроқ табиатли бўлган Наримоннинг бора-бора бу қадар берилиб флейтачи бўлишига аҳд қилишини-ю, кишини сехрлаб қўйгудек даражада равон садолар «ихтиро » қилишини ким ҳам ўйлабди, дейсиз. « 1941 йилнинг охирларида шахримизда очилган мусиқа мактабининг 200 чоғли келадиган рус, украин, латиш миллатларига мансуб 13–15 ёшли ўқувчи ёшлар хар куни икки-уч махал кўчага байрамона тантана бахш этиб, марш куйларини янгратиб ўтишарди. Ўшанда шахарнинг Ғаллабоққоллик гузари ортидаги 1–сон болалар уйидаги Марғилон ва Фарғона шахарларидаги болалар уйларидан ҳам улар сафларига ўзбек ўсмирларидан 11 нафар бола келиб қўшилди. Буларнинг сафида бўлган Наримон болалар уйида тарбияланиб юрганидаёқ моҳир флейтачи сифатида танилиб қолганди. Уруш тугагандан сўнг харбий мусиқа мактаби Москва шахрига кўчирилади.

Наримон бўлса ўқишни давом эттириш мақсадида мактабдошлари билан Москвага йўл олади. Бу ерда у 1948 йилгача тахсил олиб, мактабни муваффақиятли тугаллайди ва шу йили П. Чайковский номидаги Москва Давлат консерваториясига флейта, хамда дирижёрлик синфи бўйича ўқишга киради. Дирижёрлик сирларини у ажойиб ва машхур дирижёр, педагог, профессор Николай Павлович Аносовдан ўрганади. Устоз ўз шогирдига жахонга машхур рус, ғарбий европа классик композиторлари-нинг симфоник асарларини батафсил ва атрофлича ўргатади. Бундан рухланган ёш Наримон консерваториянинг 5–курсида ўқиб юрганида консерватория қошидаги симфоник оркестр билан жуда кўп концертларда фаол қатнашади. Масалан: 1955 йилнинг 21 январида у Москва авиация институти клубида Л. Бетховеннинг 5–симфонияси, П. Чайковскийнинг «Ромео ва Джульетта » увертюра фантазияси, С. Рахманиновнинг 2 фортепиано ва оркестр учун ёзган концерти билан қатнашади. Фортепиано партиясини таниқли созанда, солист Н. Кушнер ижро этади. Шу йилнинг 31 мартида консерваториянинг катта залида улуғ чех композитори Антонин Дворжакнинг 5–симфониясини, П. Чайковскийнинг «Ромео ва Джульетта » увертюра-фантазияси, ҳамда пианиночи Л. Блок иштирокида Д. Кабалевскийнинг 3–фортепиано ва оркестр учун ёзган концертини тигловчиларга тақдим этади. Наримон Олимов Москва Давлат консерваториясининг дирижёрлик факультетини 1955 йилда муваффақиятли тамомлаб Тошкентга қайтади ва ўзбек давлат филармонияси қошидаги симфоник оркестрга дирижёр лавозимига тайинланади. Бу ерда унинг ажойиб дирижёрлик маҳорати «қайноқ булоқ » каби тўлиб тошди, кенг қулоч ёзди. Тез орада бирин-кетин мустақил концертлар бера бошлади. Концерт дастурларида ғарбий европа, рус классик композиторларининг асарлари кенг ўрин эгаллади. Хар бир концерт катта муваффақият билан ўтиб, тингловчиларни мафтун этди: 1956 йилнинг 18 январида ўтган концерт бутунлай улуғ рус композитори П. Чайковский ижодига бағишланган бўлиб, унинг энг йирик ва мураккаб асарлари бўлмиш 6–симфонияси, «Ромео ва Джульетта » увертюра-

фантазияси, фортепиано ва оркестр учун ёзилган 1–концерти ижро этилди. Фортепиано партиясини бутуниттифоқ ва халқаро танловлар ғолиби, москвалик Татьяна Гольфард ижро этди. 22 январда ўтган концерт улуғ рус композитори А. Бородин ижодига бағишланиб, унинг 2–«Баҳодирлик » симфонияси, «Князь Игорь » операсидан парчалар ва романслар ижро этилди. 4 мартда яна П. Чайковский ижодига мурожаат қилиб, бунда композиторнинг 6–симфонияси билан бирга «Евгений Онегин » , «Чародейка » , «Черевички » операларидан парчалар ижро этди. Солистлар — собиқ СССР катта театрининг яккахон хонандалари, халқ артисти А. Ведерников ва Россия халқ артисти М. Максаковалар бўлди. Ёш бўлишига қарамай камолот чўққисига чиққан, табиий истеъдод ва улкан иқтидор соҳиби Наримон Олимов туғма дирижёрлардан бири эди. Бундай туғма истеъдоднинг қанчалик эмоционал таъсир кучига эга бўлиши, дирижёрнинг нечоғлик талант соҳиби эканини, маҳорат даражасининг олий даражадалигини билдирувчи бир қанча фазилатлари бор эди. «Хар йилдагидек бу йил ҳам республикамиз санъат ходимлари қатори миллий кадр билан тўлиб бормоқда, — деб ёзган эди «Правда Востока » газетаси 1956 йил 15 феврал сонидаги мақолада. Бу йил Ўзбек давлат филармониясининг симфоник концертлар афишасида ёш дирижёр Наримон Олимов номи пайдо бўлди. Ўтган йилнинг 29 декабрида собиқ Свердлов номидаги концерт залидаги биринчи концертидаёқ Н. Олимов ўзининг жиддий, чуқур билимли созанда (мусиқачи), яхши дид эгаси, улкан темпераментли санъаткор эканлигини намойиш эта олди. У жуда яхши мусиқавий хотира, ҳис-туйғу эгаси бўлиб, мураккаб мусиқий асарларни аниқ ва мазмунли талқин қилаолишини исботлади. Шундан сўнг тошкентлик мухлислар ёш дирижёр билан тез-тез учрашиб турдилар. Унинг ижросида йирик симфоник полотнолар ҳисобланган П. Чайковскийнинг «6–симфонияси » ва «Ромео ва Жульетта » увертюра-фантазияси,, А. Дворжакнинг 5–симфонияси, А. Бородиннинг 2–«Баходирлик » симфонияси, М. Мусоргский ва бошқа композиторларнинг йирик асарлари мухлисларга таништирилди. Бунга яна

шуни қушимча қилиш керак-ки, санъаткорнинг дирижёрлик маҳорати, шухрати ва улкан муваффақиятлари концертдан-концерт сари ошиб борди. Кейинги концертларда француз композитори Цезарь Франкнинг ре-минор симфонияси, венгер композитори Ференц Листнинг фортепиано ва оркестр учун ёзган 1–концерти, 2 венгер рапсодияси, П. Чайковскийнинг «Франческо да Римини » увертюра-фантазияси, Итальян композитори Джоаккино Россинининг «Семирамида » операсининг увертюраси, Джузеппе Вердининг «Сицилийская вечерня » операсининг увертюраси, немис композитори В. Моцартнинг «Похишение из Сераля » операсининг увертюраси ва ля мажорли фортепиано ва оркестр учун яратган концерти, Рихард Вагнернингт «Риенци » операсининг увертюраси, ҳамда шу опералардан парчалар ижро этиб тингловчилар хукмига ҳавола этди. Шундай қилиб бу рўйхатни яна давом эттириш мумкин. 1957 йили ўзбек халқ чолғу оркестринингт таркибидан 35 ёш истеъдодли созандаларни танлаб олиб, Москвада ўтадиган Жахон ёшлари ва талабалари фестивали танловига тайёргарлик ишларини бошлаб юборди. Оркестрни маҳорат ва бадиий жихатдан пухта тайёрлаш билан бир қаторда репертуарга ҳам катта аҳамият берди. Ижро этиладиган асарлар ичида классик, замонавий ва халқ мусиқалари бўлиши учун хар бир асарнинг бадиий қийматини ҳисобга олиб, қуйидаги репертуарни тузди: 1. С. Бобоев «Байрам увертюраси » 2. Н. Будашкин Рус увертюраси 3. Ж. Бизе «Кармен » операсига Муқаддима 4. Ўзбек халқ куйи «Роқ қашқарча » Габриэлян қайта ишлаган 5. А. Султонов ва Б. Гиенко «Қорақалпоқча сюита » Ш-қисм 6. М. Мирзаев ва Габриэлян қайта ишлаган ўзбек халқ куйи «Роҳат » 7. Э. Шукруллаев ва Ф. Васильев қайта ишлаган ўзбек халқ куйи «Дутор баёти » 8. М. Бурхонов «Мавриги » 9. Э. Григ «Пер Гюнт » сюитасидан Анитра рақси.

Бу турли туман характердаги асарларни бадиий ва маҳорат жихатдан бир-бирига қовуштириб, қисқа вақт ичида уни маромига етказиш учун дирижёрдан катта куч, билим, маҳорат, меҳнат ва чидам кераклигини англаш қийин эмас. Шунинг учун ҳам Н. Олимов раҳбарлик қилган халқ чолғу оркестри Москвада катта муваффақиятни қўлга киритиб, олтин медаль билан тақдирланди. Натижада, 1957 йили у симфоник оркестрга бадиий раҳбар ва бош дирижёр этиб тайинланади. Шундан сўнг смифоник оркестрнинг концертлари сони ва сифати ортиб боради. Репертуарида композиторлар, янги асарлар сони кўпая борди. Бу ажойиб ва бой репертуарда Д. Шостакович, С. Прокофьев, Д. Кабалевский, А. Хачатурян, Кара-Караев, чет эл композиторлари Дж. Гершвин, Бела Барток, Пауль Хиндемит, Поль Дюка, Игорь Стравинский, Артур Онеггер, ўзбек композиторлари С. Бобоевнинг «Сегоҳ » поэмаси, А. Муҳамедовнинг «Ёшлик » симфоник поэмаси, хамда «Вольси » , В. Мейннинг ўзбек термалари асосида яратган рақс сюитаси, Д. Соатқуловнинг симфоник сюитаси, Х. Рахимовнинг рақс сюитаси, А. Козловскийнинг «Тановар » симфоник поэмаси, В. Князьевнинг симфонияси ва бошқа кўплаб асарлар ўрин олган эди. Унинг концертларида дунёга машхур хонандалар, созандалар иштирок этиб қатнашган. Рейзен, Лисициан, Огневцев, Максакова, Нечаев, Л. Коган, Ведерников, Фурьер, Берман, Бахчиев, Любоцкий, Гинзбург, француз пианисти Моника Аз, япон скрипачи Судзи, Мексика пианисти Варило Сит ва бошқалар. Машхур ва тажрибали дирижёрлар хар бир концертга ойлаб тайёргарлик қилса, Н. Олимов бир хафта ичида катта концерт дастурини тайёрлашга, уни мухлисларга тақдим этишга улгурар эди. Хатто бир хафтада икки марта концертлар ўтказишга муваффақ бўлган кунлари ҳам кўп бўлганлигини эслайдилар. 1959 йили Москвада ўтказилган Ўзбекистон адабиёти ва санъати декадаси кунларида Н. Олимов симфоник оркестр билан концертларда иштирок этиб катта ютуқларни қўлга киритиб қайтди. 1960–1962 йилларда у Муқимий номидаги мусиқали драма ва комедия театрида дирижёр бўлиб ишлади. Бу ерда у қатор спектаклларга «Ватан ишқи » , «Нурхон » , «Паранжи сирлари » , «Фарғона

ҳикояси » , «Заравшон қизи » каби пъесаларга дирижёрлик қилди. 1962 йили уни яна симфоник оркестрга дирижёр қилиб тайинлайдилар. Бу ерда у жумхурият танлови лауреатлари билан якунловчи концерт устида тинмай ишлаш, янги мавсумнинг очилишига тайёргарлик кўриш, Тошкент давлат консерваториясида педагоглик фаолияти, машхур санъаткорларга жўр бўлиш ҳаммаси (объектив ва субъектив сабаблар), бақувват кучга эга бўлмаган ёш дирижёрнинг соғлиғига путур етказди. Н. Олимов 1963 йилнинг 22 ноябрида 35 ёшида орамиздан кетди. Бу дахшатли ўлим ўзбек мусиқа маданияти ва мухлислари учун оғир йўқотиш бўлди. Халқимиз ўзининг асл фарзанди Наримон Олимовнинг номини абадийлаштириш ниятида Қўқон кўчаларининг бирига унинг номини берди.

Адабиётлар рўйхати 1. Каримов И.А. Тарихий хотирасиз келажак йўқ.-Т.: Шарқ, 1998 . 2. Каримов И.А.Биз келажагимизни ўз қўлимиз билан қурамиз. Т.7.-Т.: Ўзбекистон, 1999 . 3. Азимов К. Ўзбекистон дирижёрлари.-Т., 2001. 4. Аносов Н. П. Литературное наследие. Изд. Сов. Композитор, 1973. 5. Астров А. Деятель русской музыкальной культуры, С. А. Кусевицкий, Л. Музыка 1981. 6. Ашрафий М. Музыка в моей жизни. Т. 1975. 7. Ансарме Эрнест. Статьи о музыке и воспоминания. М. Сов. Композиор. 1986. 8. Баграновский М. Дирижерская техника рук. М. 1947. 9. Безбородова Л. А. Дирижирование. М. Просвещение 1990. 10. Берлиоз Г. Дирижер оркестра. М. 1912. 11. Бялик М. Евгений Мравинский (творческий портрет) М. Музыка, 1982. 12. Вальтер Бруно. Тема с вариациями. Изд. Музыка. М. 1969. 13. Вейнгартнер Ф. О дирижировании. М. 1927.

O'xshashlar

Оркестр ва хорга дирижёрлик қилганлар

Набижон Халилов (1922–2002)

Зардўзлик санъати

Миллий истиқлол ва профессионал мусиқа тараққиёти

Мустақиллик даври эстрадаси