Sotsiologiya fanining predmeti, obe‘kti va ijtimoiy fanlar tizimida tutgan o’rni - Социология - Рефераты

Sotsiologiya fanining predmeti, obe‘kti va ijtimoiy fanlar tizimida tutgan o’rni

Загружено в:

20.09.2019

Скачано:

0

Размер:

30.8974609375 KB

Sotsiologiya fanining predmeti, obe‘kti va ijtimoiy fanlar tizimida tutgan o’rni Reja 1. Sotsiologiya fanining predmeti va tadqiqot ob‘ekti. 2. Sotsiologiya fanining uslub va qonuniyatlari. 3. Sotsiologiya fanining sohaviy tizimlari va ijtimoiy fanlar tizimidagi o’rni

Sotsiologiya /lotincha ”societas” – jamiyat va yunoncha “logos” – tushuncha, ta‘limot ma‘nosini anglatib/ jamiyatning tarkibiga kiruvchi alohida institutlar, tizimlar, guruhlar va ularning o’zaro aloqadorligini o’rganuvchi fandir. Demak, sotsiologiya umumiy ma‘noda jamiyat to’g’risidagi fandir. Sotsiologiya fan sifatida XIX asrning 30-yillarida shakllanib, bu tushuncha fanga frantsuz faylasufi Ogyust Kont tomonidan kiritilgan. Ma‘lumki, O.Kont falsafasi “pozitivizm” nomi bilan mashhur. U falsafani fan va metodologiya sifatida rad etadi. Uningcha, “pozitiv” falsafaning asosiy maqsadi xususiy fanlar umumiy xulosalarini umumlashtirish vazifasidan iborat bo’lgan. Bu printsipni sotsiologiyaga ham tadbiq qilgan. Uning sotsiologiyasi empirik ma‘lumotlarni to’plash va kuzatishdan iborat bo’lgan. Empirik ma‘lumotlarni falsafiy jihatdan umumlashtirish esa rad etilgan. Ilmiy nazariyasiz va ilmiy metodologiyasiz jamiyat hayoti to’g’risidagi empirik ma‘lumotlarni ilmiy jihatdan umumlashtirib bo’lmaydi. Ular nari borganda, sub‘ektiv xulosalardan iborat bo’lib qolaveradi. Hozirgi kunda “sotsiologiya”, “sotsilog”, “sotsiologik savol-javob” “sotsiologik tadqiqot natijalari” degan iboralar kundalik hayotga kirib kelmoqda. Ularni radio va televidenieda eshitishimiz, turli ro’znoma va oynomalarda o’qishimiz mumkin. Sotsiologik tadqiqotlar ijtimoiy fikrlarni o’rganishning, siyosiy partiyalar, liderlar, programmalarning reytingini, ijtimoiy tashkilotlarning va harakatlarning mavqeini aniqlashning, davlat siyosati ishlab chiqish va boshqa masalalarni yechishning zarur vositasi bo’lib kelmoqda. Lekin sotsiologiyaning fan sifatidagi predmetini aniqlashga yondashish sust bormoqda. Ko’pchilik sotsiologiyani anketa, interv‘yu, savol-javoblar bilan tenglashtirib qo’yadi. To’g’ri, anketa, intervyu, savol-javoblar sotsiologik tadqiqotlarning muhim vositalaridir, lekin ularni sotsiologiya bilan tenglashtirmaslik zarur. U holda sotsiologlarni 2-3 oylik kurslarda yetishtirib chiqarish mumkin bo’lib qoladi. Lekin professional sotsiologni, professional yurist, vrach yoki iqtisodchi kabi kurslarda yetishtirib chiqarish mumkin emas. Unda sotsiologlarni ishlari yuzaki, ilmiy jihatdan past va obe‘ktiv bo’lmay qoladi. Ular u yoki bu baho, prognoz, programmalarni ishlab chiqish uchun noto’g’ri asos bo’lib, oxir-oqibat siyosiy yoki boshqa spekulyatsiyalarni keltirib chiqarishi mumkin. Sotsiologiyaning predmetini aniqlashning murakkab tomoni, ijtimoiy hayotning sotsiologiya o’rganadigan qismini aniq ko’rsatib berish qiyinligidadir. Ba‘zan sotsiologiyani “jamiyat haqidagi fan” deb ataydilar. Amerikalik sotsiolog Neyl Smelzer sotsiologiyani “jamiyat va ijtimoiy munosabatlarni ilmiy jihatdan o’rganuvchi” fan_ sifatida belgilaydi. Ammo, bunday ta‘rif ancha umumiy tarzda bo’lib, sotsiologiyaning fan sifatidagi aniq chegaraviy mazmunini, mohiyatini belgilab bera olmaydi. Chunki ijtimoiy falsafa, iqtisodiyot nazariyasi, siyosatshunoslik, tarix, madaniyatshunoslik kabi ko’plab ijtimoiy va gumanitar fanlar ham jamiyat hayotini ob‘ekt sifatida o’rganadi. Boshqacha qilib aytganda, gap sotsiologiyaning boshqa fanlardan farqli o’laroq o’ziga xos predmeti haqida bormoqda. Agarda, “sotsiologiya” so’zining etimologiyasidan kelib chiqsak,

sotsiologiya “sotsiallik” /jamiyat/ to’g’risidagi fan /ta‘limot/dir, demakki, «sotsial» tushunchasining aniq mohiyatini, uning sohasini aniqlash zarur. Har bir fan o’z o’rganish ob‘ekti va predmetiga ega. Lekin fanning u yoki bu ob‘ekti, boshqa ilmiy fanlarning tadqiqot predmeti bo’lib kelishi mumkin. Konkret fanning predmeti ushbu fanning ob‘ektida o’rganiladigan o’ziga xos tomonidir. Ob‘ekt – bu ob‘ektiv voqelik sifatida tadqiqotchiga qarama-qarshi turgan, uning faoliyati qaratilgan narsalardir. Ob‘ektiv voqelikning har qanday voqea- hodisalari har qanday ijtimoiy fanning tadqiqot ob‘ekti bo’lib kelishi mumkin. Ma‘lum bir fanning tadqiqot predmeti haqida so’z borar ekan, unda ob‘ektiv voqelikning u yoki bu qismi /shahar, qishloq, inson, madaniyat, tashkilot va b./ shu fanga xos bo’lgan tomoni ushbu ob‘ektning ikkilamchi tomoni yok mavjud bo’lishi uchun shart-sharoit bo’lib xizmat qiladi /masalan, iqtisodiyotning sotsial konteksti/. Ilmiy adabiyotlarda “ob‘ekt” va “predmet” tushunchalarining qo’shilib ketish yoki tenglashtirish hollarini ko’rish mumkin. Predmet ham ob‘ekt singari ob‘ektiv voqelikning aniq yoki o’ziga xos xususiyatiga ega qismi yoki elementlari birligidir. Shu bilan birga har bir fan o’z predmeti bilan boshqasidan farq qiladi. Fizika, ximiya, biologiya, iqtisodiyot, sotsiologiya va boshqa fanlar ham o’z predmetiga ega. Bu fanlarning hammasi tabiat va jamiyatni xarakterlovchi turli xil voqea- hodisa va jarayonlarni o’rganadi. Lekin bu fanlarning har biri ob‘ektiv voqelikning: a) o’ziga xos tomoni yoki o’z sohasini; b) shu fanga xos qonun-qoida va qonuniyatlarini; v) shu qonun va qonuniyatlarning o’ziga xos shakllari va mexanizmlarini o’rganadi. Boshqacha qilib aytganda, har bir ijtimoiy fan jamiyatni, ob‘ektiv voqelikni ob‘ekt sifatida o’rgana turib, unda o’z predmetini ajratib oladi. Shuni ham ta‘kidlab o’tish zarurki, ob‘ektiv voqelikning aynan bir tomoni bir necha fanlarning tadqiqot ob‘ekti bo’lib kelishi ham mumkin. SHunday qilib, jismoniy voqelik – ko’pchilik va tabiiy va texnik fanlarning, sotsial voqelik esa - ijtimoiy va gumanitar fanlarning tadqiqot ob‘etidir. G.V.Osipovning ta‘kidlashicha: “fan predmetini faqatgina ob‘ektga qarab aniqlash noto’g’ri, chunki har qanday fanning tadqiqot ob‘ektlari ko’p bo’lishi mumkin, lekin predmeti esa faqatgina shu fanning o’zigagina xos va yagona bo’lishi kerak”. Turli xil fanlarning bir-biridan farqi shundaki, ular birigina ob‘ekt misolida ushbu jamiyatni rivojlantiradigan o’ziga xos qonun va qonuniyatlarni o’rganadilar. Aytaylik, jamiyatning rivojlanishi va harakatlanishi shu fanlarning predmeti bo’lib iqtisodiy, sotsial, siyosiy, ma‘naviy, psixologik ehtiyojlardan kelib chiqadi. Bundan tashqari, ushbu ob‘ektiv voqelikning alohida qismlari ham shu fanlarning tadqiqot ob‘ekti bo’lib kelishi mumkin: masalan, mehnat, kundalik hayot, ta‘lim, oila, shahar, qishloq, siyosiy institutlar va boshqalar iqtisod, sotsiologiya, psixologiya demografiya, huquq va boshqa shu kabi fanlarning tadqiqot obe‘ktidir. Sotsiologiyaning predmet va ob‘ektini aniq ajratib berish hozirda sotsiologlar oldida turgan muhim vazifalardan biridir. Sotsiologiya predmetiga turli adabiyotlarda turlicha ta‘rif berilgan. Masalan, Vesbsterov lug’atida sotsilogiya insonlarning sotsial guruhlarning vakili sifatida, birgalikdagi hayotining tarixi,

rivojlanishi, tashkil topishi va muammolarini o’rganuvchi fan deb berilgan. O.Kont sotsiologiyani jamiyat to’g’risidagi fan deb bilgan. E.Dyurkgeym esa sotsiologiya predmetini ijtimoiy ma‘lumotlar, ya‘ni sotsial faktlardan iborat deb bilgan, nemis sotsiologi G.Zimmel ta‘rifiga ko’ra, - sotsiologiya xususiy ijtimoiy fanlarning bilish nazariyasi, yana bir nemis sotsiologi M.Veberning fikricha, sotsilogiya ijtimoiy xulq to’g’risidagi fandir. Ijtimoiy xulqni M.Veber insoniy munosabatlardan iborat deb bilgan. Insoniy xulq esa o’z navbatida ijtimoiy mohiyatiga egadir. Mashhur rus sotsiologi P.A.Sorokinning fanni predmeti haqidagi fikri umumiy ma‘noga ega bo’lib, u “jamiyat yoki ijtimoiy hodisalardan iborat” deb bilgan. Jamiyat esa ruhiy o’zaro aloqadorlikka ega bo’lgan birliklar majmuidan iborat. Sotsiologiya xuddi shunday o’zaro aloqadoliklardan iborat jamiyat hayotini o’rganadi. Sovet davri sotsiologlardan V.A.Yadovning fikricha, “sotsiologiya- jamiyatning bir butun organizm ekanligi, ijtimoiy munosabatlarning bir butunligi to’g’risidagi fan”. Yana bir sotsiolog G.V.Osipov “Sotsiologiya” o’quv qo’llanmasida, sotsiologiya – ijtimoiy tizimlarning funktsionallashuvi va rivojlanishi to’g’risidagi, umumiy va o’ziga xos ijtiomiy qonun va qoidalari, qonuniyatlari, bu qonun va qonuniyatlarning shaxs, ijtimoiy birliklar, sinflar, xalqlar faoliyatidagi yuzaga kelish va amal qilish shakllari to’g’risidagi fan, deb ta‘riflagan. Yuqorida keltirilgan fikrlardan xulosa qilib aytish mumkinki, sotsiologiya – ijtimoiy birliklar, tashkilotlar, jarayonlar va munosabatlarning yuzaga kelishi, funktsionallashuvi va rivojlanishi qonuniyatlarini o’rganuvchi fandir. Yuqorida biz jamiyatning sotsial sohasi /sotsial guruhlar, institutlar, sotsial munosabatlar va aloqalar, sotsial sistemalar/ sotsiologiyaning, uni o’rganishning o’ziga xos oblasti, sohasi ekanligini ta‘kidlab o’tdik, ya‘ni sotsiologiyani fan sifatida sotsiallikni o’rganadi, deb aytish mumkin ekan. Bundan kelib chiqib sotsiologiyaning fan sifatidagi predmetini quyidagicha ta‘riflash mumkin: Sotsiologiya - sotsial sistemalarning yuzaga kelishi, funktsionallashuvi va rivojlanishini, ularning strukturasini, komponentlarini /sotsial birliklar, sotsial tashkilotlar va institutlar/, shuningdek, ularning jamiyatda tutgan o’rni, ehtiyojlari va qiziqishlarining qondirilishiga muvofiq ular o’rtasida yuzaga keladigan munosabatlarni o’rganuvchi fandir. Ayrim olingan shaxsdan boshlab oila, ijtimoiy guruhlar, sinflar, tabaqalar, tashkilotlar, birliklar va boshqa tizimlar o’rtasidagi ijtimoiy oqibatlari sotsiologik tadqiqot ob‘ekti sifatida o’rganiladi. Boshqa ijtimoiy va gumanitar fanlardan farq qilib, sotsiologiya ijtimoiy hayot jarayonlarini uch bosqichda o’rganadi: Aniq – empirik; Xususiy; Umumiy; SHunga muvofiq ravishda sotsiologiya empirik sotsiologik tadqiqot, maxsus sotsiologik tadqiqot, umumsotsiologik tadqiqot jarayonlarini o’z ichiga oladi. Har bir alohida olingan katta-kichik ijtimoiy tizim tarixiy rivojlanish jarayonida jamiyatning boshqa tizimlari bilan dialektik aloqada, munosabatda

bo’ladi. Shuning uchun, ayrim olingan ijtimoiy tizim tadqiqi jamiyat taraqqiyotning umumiy qonuniyatiga o’zaro mos tushgandagina to’g’ri va ob‘ektiv xarakterga ega bo’ladi. Ijtimoiy voqelik zanjiridagi biron-bir xalqa tadqiqotchining e‘tiboridan chetda qolishi mumkin emas. Ijtimoiy hayot masalalarning o’rganish doirasi tobora kengayib borayotganligi sababli sotsiologiya fani ham tobora kengayib bormoqda. Masalan, hozirgi zamon sotsiologiyasi asosida, “fanlar sotsiologiyasi”, “madaniyat sotsiologiyasi”, “ergonomika”, “boshqaruv sotsiologiyasi”, “mikro- sotsiologiya” kabi sohalar shakllanadi. Ikkinchi tomondan, sotsiologiyaning boshqa ijtimoiy-gumanitar fanlar bilan dialektik aloqadorligi kuchayib bormoqda. Sotsiologiyaning iqtisodiyot, falsafa, huquq, etika, psixologiya, pedagogika, tarix, ekologiya kabi fanlar bilan aloqadorligi bozor munosabatlariga o’tish jarayonida yanada ortmoqda. Keyingi yillarda uning texnika fanlari bilan o’ziga xos aloqadorligi kuchaymoqda. Sotsiologiyada borgan sari matematika fani va usulning ahamiyati ortmoqda. Iqtisod fanlari bilan sotsiologiyaning dialektik aloqadorligi moddiy ne‘matlarni ishlab chiqarish, taqsimot, ayirboshlash, iste‘mol jarayonlarini o’rganishda namoyon bo’ladi. Ayniqsa, hozirda bozor munosabatlariga o’tish, mehnatga yangicha munosabat shakllanishi jarayonida uning ahamiyati juda kattadir. Iqtisodiyot sotsiologiyasi, mehnat sotsiologiyasi kabi sotsiologiyaning maxsus sohalari iqtisodiyotga bog’liq masalalarni o’rganadi va unga bog’liq bo’lgan barcha muammoni hal etishga xizmat qiladi. Shu jihatdan sotsiologiya jamiyatda va uning iqtisodiy hayotida o’ta muhim vazifalarni o’taydi. Sotsiologiya iqtisod fanlari bilan, ularning o’rganish ob‘ekti bilan uzviy bog’liqdir. Iqtisodiy nazariyaning ilmiy g’oyalari yuqorida tilga olingan sotsiologiya sohalari uchun metodologik asos bo’lib xizmat qilsa, o’z navbatida, shu sohalarda olib borilgan ilmiy tadqiqot natijalari iqtisodiyot muammolarini hal etishga xizmat qiladi. Sotsiologiya falsafa fani bilan ham uzviy bog’liqdir. Sotsial falsafa qonun va kategoriyalari bevosita umumsotsiologik nazariya va kontseptsiyalarni o’z ichiga oladi. Maxsus sotsiologik nazariyalar uchun esa nazariy va metodologik asos bo’ladi. Umumsotsiologik va maxsus sotsiologik nazariyalarning rivojlanishi o’z navbatida mazkur davr ijtimoiy fikrini shakllantiradi, unga nazariy va amaliy manba bo’lib xizmat qiladi. Sotsiologik tadqiqot empirik ma‘lumotlar, eksperimentlar yordamida ijtimoiy falsafiy ta‘limotlarning qanchalik to’g’ri, mazkur ijtimoiy davr mazmuniga mos yoki ularning eskirib, ijtimoiy taraqqiyot talabiga javob beraolmay qolganligini aniqlab berish imkoniyatiga ega. Ammo, sotsiologiya har qanday siyosiy va idealogik tizimdan holi bo’lsagina, uning yuqorida ko’rsatilgan ilmiy qimmati saqlanadi. Huquqiy davlatni shakllantirib, uni yanada rivojlantirishda jinoyatchilikka qarshi kurashni kuchaytirish, huquqiy munosabatlarni tartibga solish katta ahamiyatga ega. Huquqiy tashkilotlarga faoliyatini yangi davr talablariga mos ravishda tashkil etish, ularning ijtimoiy munosabatlar sohalaridagi ta‘sirini takomillashtirishga e‘tiborni kuchaytirish maqsadga muvofiqdir. Sir emaski, keyingi vaqtda jinoyatchilik ortdi. Jinoyatga qarshi kurash va uning oldini olish – davlat ahamiyatidagi masala hisoblanadi. Unga qarshi kurash jinoyat sodir

etilgandan so’ng emas, balki unga qadar olib borilmog’i lozim. Jinoyatchilikning oldini olish, uning tub mohiyatini, motivi va keltirib chiqarayotgan sabablarning o’rganishda sotsiologik tadqiqotlar olib borish muhim ahamiyatga ega. Demak, huquq fanlarining rivojlanishida ham sotsiologiyaning o’rni kattadir. Istiqlol sharofati bilan milliy qadriyatlarning qayta tiklanishi, milliy ongning rivojlanishida, hozirgi murakkab iqtisodiy o’tish davrida kishilar, ijtimoiy guruhlar o’rtasidagi ma‘naviy munosabatlar, tamoyil va normalarning ichki mohiyatini, rivojlanish xususiyatlarini o’rganishda sotsiologiya bilan aholishunoslik fanlarining dialektik o’zaro aloqadorligi juda ham zarur. Sotsiologik tadqiqot asosida ahloq fani jamiyat hayotidagi o’z mavqeini yanada oshiradi. O‘zbekiston sharoitaiga moslab sotsiologiyani biz quyidagi o‘rganish bosqichlariga ajratamiz: 1. Ijtimoiy bosqich: 1. Jamiyat, 2.Ijtimoiy qatlam, 3. Ijtimoiy gurux, 4. Maxalla, 5. Oila, 6. Shaxs. 2. Milliy bosqich: 1.Millat, 2. Elat, 3.Etnik gurux, 4. Avlod, 5.Milliy oila, 6.Individ. 3. Tarmoqlar bosqichi: 1.Iqtisodiyot, 2.Siyosat, 3. Madaniyat, 4.Fan, 5.Ta’lim, 6. Ma’naviyat va ma’rifat, 7.Ekalogiya va boshqalar. 4. Xududiy bosqich: 1.Mintaqa, 2.Mamlakat, 3.Viloyat, 4.Shaxar, 5.Tuman, 6.Qishloq, 7.Maxalla. Jamiyat rivojlanishi bilan kishilarning estetik ehtiyojlari ham o’zgarib, yanada rivojlanib boradi. Kishilardagi bu ehtiyojni o ’rganish va ijobiy sifatlarni shakllantirishda, tarbiyalashda sotsiologik tadqiqotlarning natijalari, xulosa va takliflari o’zining ilmiy qimmatiga ega. Shu jihatdan sotsiologiya fani nafosat /estetika/ fani bilan o’zaro bog’liq. Yangi iqtisodiy munosabatlarga o’tish kishilardagi o’zini ko’zlash, o’z shaxsiy manfaatini jamiyat, millat manfaatidan ustun ko’rishlik hollari kuchaymoqda. Kishilarda halovatlik, asabiylik ortmoqda. Odamlardagi asabiylikning ortishi xuddi yuqumli virus kabi tez tarqalib, ijtimoiy muammoga aylanmoqda. Ushbu muammolarni o’rganish va hal etish borishda sotsiologiya bilan psixologiya fanlarining hamkorligi muhimdir. Bozor munosabatlariga o’tishning dastlabki qadamlari, a‘niqsa ta‘lim-tarbiya jarayonida juda katta ta‘sir ko’rsatmoqda. O’quvchi yoshlar dunyoqarashida keskin o’zgarishlar yuz bermoqda. Nafaqat o’quvchi – yoshlarda, balki pedagog- o’qituvchilar tarkibida ham jiddiy muammolar kelib chiqmoqda. O’quvchilar ongida ilmdan qaytish, fanga e‘tiborsizlik, yengil mehnat evaziga yaxshi yashash, ko’p pul topish «instikti» kuchaygan. Yuqoridagi fikrlardan shuni xulosa qilish mumkin: milliy pedagogika hozirda sotsiologik tadqiqotlarga muhtoj. Bu tadqiqotlarning natijalari qanchalik beshafqat bo’lmasin, ulardan to’g’ri xulosalar chiqarish va amaliy tadbirlar ishlab chiqish davlat ahamiyatiga ega bo’lgan masaladir. Sotsiologiya va tarix fanlari jamiyat hayotini izchil, sistemali tarzda o’rganadi. O’tmish tariximizni yaratishda mutafakkirlar sotsiologiya usullaridan keng

foydalanganlar. Chunonchi, tarixiy ma‘lumotlarni, manbalarni to’plash, ularning haqqoniyligini aniqlash, tarixiy shaxslar esdaliklaridan, tarixiy voqealar guvohlarining xotiralaridan keng foydalanilgan. Masalan, At-Termiziy, Imom Al Buxoriy kabi hadisshunoslar, Abu Rayhon Beruniy, Sharofiddin Ali Yazdiy, Xondamir, Xerman Vamberi kabi buyuk mutafakkir olimlar o’zlarining tarixga oid qimmatli asarlarini yaratishda sotsiologiya usullaridan unumli foydalanganlar. Tarixiy voqealarga boy bo’lgan bugungi kunimiz ertangi kelajagimiz uchun o’tmish sahifalariga aylanadi. Shunday ekan, hayotimizning keng qamrovli sohalarining ilmiy sotsiologik tadqiqotlari va tahlili natijalari tarix fani uchun xizmat qilishi tabiiy. Asrimizning keyingi bosqichida jamiyat bilan tabiat o’rtasidagi munosabatning keskinlashuvi – sotsiologiyaning tabiatshunoslik fanlari bilan aloqadorligini kuchaytiradi. Insonning tabiatiga, tabiiy muhitga ta‘siri ortib bormoqda. Ekologik, demografik vaziyatning keskinlashuvi sotsiologiya fanini bevosita ushbu muammolarni hal etishga jalb qiladi. Hozirgi zamon sotsiologiyasini matematikasiz tasavvur etib bo’lmaydi. Matematik usullarsiz sotsiologiya mavhum bir qarash bo’lib qoladi. Ayniqsa, uning empirik darajadagi tadqiqot o’tkazishdagi o’rni katta. Hozirgi zamon g’arb sotsiologiyasi kibernetik usullardan, axborot nazariyasi, uyin nazariyasi bilan muvaffaqiyatli rivojlantirilgan. Ularda maxsus matematik usullardan daraja ko’rsatkichi, omillik, sababli va sirtdan tahlil qo’llanilmoqda. Sotsiologik tadqiqotlarni keng va unumli foydalanilmoqda. Hozirgi zamon ilmiy-texnika taraqqiyoti asrida sotsiologiya va texnika fanlar aloqadorligi tabiiydir. Chunki, “inson – texnika”, “jamiyat-texnika”, “maishiy turmush – texnika” kabi tizimlarni ilmiy o’rganish ular zimmasiga yagona vazifani yuklaydi. Inson yaratgan barcha texnika faqat inson va jamiyatning ijobiy taraqqiyotiga xizmat qilsin. Ammo, doimo kutilgan natija bo’lavermaydi. Ularni o’rganishda esa sotsiologiya fanining roli beqiyosdir. Jamiyat hayoti va inson faoliyatining turli jihatlarini o’rganish jarayonida yuqorida nomi tilga olingan fanlar tarkibida ijtimoiylik yo’nalishi mavjud bo’ladi. Shu jihatdan, o’z navbatida ularning sotsiologiya fani rivojlanishidagi ahamiyati kattadir. Hozirgi zamon sotsiologiyasi murakkab tarkibiy tuzilishiga ega bo’lib, sovet tuzumi davridagi bir tomonlilikdan holi bo’ldi. Tanqidiy ko’z bilan qaralgan va inkor qilingan “burjua sotsiologiyasi” erishgan yutuqlardan foydalanish imkoniyati yuzaga keldi. Ruhiyat, ma‘naviyat masalalarini umuminsoniy, milliy va boshqa qadriyatlarni keng va chuqur o’rganish – muhim masalalardan biri bo’lib qoldi. Jamiyat hayoti ilgari aytib o’tganimizdek sotsiologiya fani doirasida uch bosqichda: 1. Umumsotsiologik 2. Maxsus sotsiologik nazariya; 3. Empirik sotsiologik tadqiqotlar asosida o’rganiladi. 1. Umumsotsiologik nazariyaga misol qilib K.Marks va F.Engels tomonidan ishlab chiqilgan jamiyat ishlab chiqaruvchi kuchlarining ishlab chiqarish munosabatlariga o’zaro muvofiq kelishi qonuni, ijtimoiy borliq ijtimoiy ongni

belgilab berish qonuni; amerikalik T.Parsons va R.Mertonlarning strukturaviy- funktsionalizm ta‘limoti, yangi industrial jamiyat ta‘limoti va boshqa Harbiy Ovrupo va Amerika olimlarining ta‘limotlarini keltirish mumkin. 2. Hozirda sotsiologiyada maxsus sotsiologik nazariyalar sifatida iqtisod sotsiologiyasi, mehnat sotsiologiyasi, turmush tarzi, shahar va qishloq boshqarish va tashkil qilish; siyosat, madaniyat, iml-fan, ta‘lim, shaxs, oila, yoshlar, bo’sh vaqt, tibbiyot, etnosotsiologiya, qiziqishlar, ijtimoiy o’zgarishlar va boshqa sotsiologik sohalarni ko’rsatish mumkin. Umumsotsiologik nazariyalardan farq qilib, maxsus sotsiologik nazariyalar makon va zamon jihatidan tor chegaralangandir. Umumsotsiologik nazariyalarning mazmuni jamiyat rivojlanishining asosiy yo’lini belgilovchi dinamik qonuniyatiga asoslangan bo’ladi. Maxsus sotsiologik nazariyalar esa statistik – muayyan bir ijtimoiy doirasidagi o’zgarishlarni ifodalashi mumkin. Har qanday umumsotsiologik nazariya mohiyat e‘tibori bilan maxsus sotsiologik nazariyalar mazmuniga muvofiq bo’lishi shart. Chunki, maxsus sotsiologik aniq amaliy tadqiqotlar orqali tekshirilib boriladi. O’z navbatida umumsotsiologik nazariyalar maxsus sotsiologik nazariyalar uchun ham nazariy, ham metodologik asos bo’lib xizmat qiladi. Umumsotsiologik va maxsus sotsiologik nazariyalar sotsiologiya fanining nazariy jihatini tashkil qiladi. Hozirda konkret va xususiy sotsiologik tadqiqot sifatida ortib borayotgan amaliy sotsiologiya esa konkret sotsiologik tadqiqot usullari yordamida maxsus sotsiologiya sohalar diorasida olib borilayotgan tadqiqotlardan va ulardan olinadigan xulosalardan iborat bo’lib qoladi. Sotsiologik bilim va usullarning yuqorida ko’rsatib o’tilgan uch darajasi hamda nazariy va amaliy sotsiologiya o’zaro dialetik aloqadorlikda bo’lib, yagona sotsiologiya fanini tashkil qiladi. Nazariy sotsiologiya jamiyat ijtimoiy hayotining umumsotsiologik, hamda umumilmiy darajalardagi funktsional va rivojlanish qonuniyatlarini o’rganadi. Masalan, hozirda O’zbekistonning bozor munosabatlariga bosqichma-boqich o’tish kontseptsiyasi va jamiyat hayotida bozor munosabatlarini tarkib topib borish jarayonini o’rganish nazariy sotsiologiyaning asosiy tadqiqot ob‘ekti hisoblanadi. Shu bilan birga, nazariy sotsiologiyada ijtimoiy hayotning iqtisodiyot, siyosat, maishiy turmush, ma‘naviyat kabi alohida sohalarining funktsional va rivojlanish qonuniyatlari, o’ziga xos xususiyatlari ham ilmiy-nazariy asosda o’rganiladi. Amaliy sotsiologiya inson faoliyatini, jamiyat hayotining turli sohalarini, jarayonlarini bevosita amaliy asosda o’rganadi. 3. Amaliy sotsiologiyada empirik tadqiqotlardan olingan ma‘lumotlar nazariy jihatdan umumlashtiriladi. Faqat shundagina nazariy sotsiologiyada olingan tadqiqot natijalari ijtimoiy hayot voqeligini, uning funktsional va rivojlanish qonuniyatlarini to’g’ri, ob‘ektiv ravishda ochib bera oladi. Amaliy sotsiologiya empirik tadqiqot usullari yordamida olib boriladigan ijtimoiy hayotning har qanday jarayonini o’rganishga qaratilgan tadqiqotni anglatadi. U o’zining ikki jihati bilan xarakterlanadi: birinchidan, komplekslilik xos bo’lib, tadqiqot ob‘ekti bir butun holda olib qaraladi, shu jihatdan sotsiologiya doirasida boshqa ijtimoiy fanlarning usullaridan foydalanish mumkin. Ikkinchidan,

ob‘ektiv va subektiv omillar birligini tashkil qiluvchi inson faoliyatining natijasi bo’lgan ijtimoiy jarayonni o’rganadi. Amaliy sotsiologiya nazariy asosda tadqiq etilgan jamiyat hayotining funktsional va rivojlanish qonuniyatlaridan ilmiy maqsadlarda foydalanish usullarini, vositalarini ishlab chiqish maqsad qilib qo’yiladi. Shu jihatdan amaliy sotsiologiya o’zining empirik xususiyatiga ega va nazariy sotsiologiya bilan uzviy bog’liq. Metod deganda keng ma‘noda u yoki bu masalani yechishda qo’llaniladigan usullar, qoidalar tushuniladi. Metodlar har qanday ilmiy bilishning muhim tashkiliy qismi hisoblanadi. Har qanday olim, hoh u huquqshunos, hoh sotsiolog yoki iqtisodchi bo’lsin, o’z oldiga ma‘lum bir ilmiy muammoni qo’ya turib, uni u yoki bu metodlar yordamida hal qiladi. Odatda metodlarni barcha fanlarda qo’llaniladigan umumilmiy bilish metodlariga /masalan, induktsiya va deduktsiya, analiz va sintez va b./ va konkret fanlarning o’ziga xos masalalarini yechishda foydalaniladigan xususiy-ilmiy metodlarga /masalan, geometriyadagi koordinatalar metodi yoki meditsinadagi diagnostika metodi va h./ bo’linadi. U yoki bu fanda qo’llaniladigan metodlar yig’indisi shu fanning metodologiyasini tashkil etadi. Metodologiya qo’yilgan muammolarni yechish usullarini tanlash, ilmiy yechimning yo’nalishini va etaplarini aniqlab beradi. Sotsiologik metodlar deganda sotsiologik bilimni asoslab berish va ko’rish usuli, sotsial sistemalarni empirik va nazariy o’rganishning usul va amallari tushuniladi. Sotsiologik nazariyalarni tashkil etishda, sotsiologik tadqiqotlar metodologiyasini tuzishda falsafa muhim o’rin egallaydi. Sotsiologning falsafiy dunyoqarashi uning sotsiologik kontseptsiyasining asosi bo’lib xizmat qiladi. Sotsiologiya fan sifatida umumilmiy metodlardan ham, o’zi uchun xarakterli bo’lgan metodlardan foydalanadi. Sotsiologiyada qo’llaniladigan umumilmiy metodlarga matematik, induktiv, deduktiv, analitik, sintetik, tarixiy, modellashtirish va boshqa metodlar kiradi. Ehtimoliy jarayonlarni o’rganadigan fanlar qo’llaydigan metodlar sotsiologiyada ham qo’llaniladi: statistika va ehtimollar nazariyasi metodlari. Ularga faktorli /sotsial ob‘ektlarning belgilari o’rtasidagi o’zaro aloqadorliklarini o’lchash va ularga asoslanib belgilar klassifikatsiyasini o’lchash/, latent /respondentlarning ayrim savollarga bergan javoblaridan kelib chiqib, ularni ma‘lum bir yashirin, ya‘ni latent belgilariga ko’ra ajratish/, korellyatsion analiz /sotsial ob‘ektlar belgilari o’rtasidagi statistik aloqlarni o’rganish/ va shuningdek, shkalalar qurish va analiz qilish, ya‘ni savol-javob, kuzatish yoki hujjatlarni analiz qilishda yig’iladigan sotsial ma‘lumotlarni baholashda foydalaniladigan instrumentlarning o’lchamli qismlarini ko’rish va analiz qilish protsedurasi kiradi. Darajasiga ko’ra sotsiologiya metodlari ikkiga bo’linadi: amaliy (empirik) va nazariy. Sotsiologik tadqiqot bosqichlariga /stadiya/ ko’ra esa muammolar, maqsadlar, vazifalar shakllanishi metodlari, ma‘lumotlarni yig’ish metodlari /savol-javob, kuzatish, hujjatlarni o’rganish/, ma‘lumotni qayta ishlash metodlari /

gruppalash, taqsimlash/, ma‘lumotni analiz qilish metodlariga /umumlashtirish, sifatli analiz, tipologizatsiya/ bo’linadi. SHunday qilib, sotsiologiya metodi tadqiq etilayotgan sotsial muammoga, ko’rilgan nazariyaga va umumiy metodologik yo’nalishga asoslanadi. Sotsiologik tadqiqotning unumdorligi sotsiologning sotsial voqea-hodisa va jarayonlar to’g’ri, yetarli ma‘lumotlar olishda, ularni analiz qilish va umumlashtirishda qanday metodlardan foydalanganligi va vazifani qay darajada bajara olganligiga bog’liq. Sotsiologik qonunlarni aniqlashda sotsial birliklar, tashkilotlar institutlardan tashkil topgan sotsial sistemaning o’ziga xosligini tasavvur qilishdan kelib chiqish kerak, bu komponentlarning yoki sotsial munosabatlarning o’zaro hatti-xarakatini o’rganish sotsiologik qonunning o’ziga xosligini belgilashda asos bo’ladi. Sotsial sistemaning komponentlari o’rtasida, sotsial munosabatlarga kirishayotgan odamlar o’rtasida ularning sotsial sohadagi hayotiy faoliyatining o’ziga xosligidan kelib chiqadigan faoliyatlarining doimiy almashinib turishi ro’y beradi. Bu faoliyat odamlarning mavqeini, ularning jamiyat hayotidagi rolini o’zgartirishga, ularning ehtiyojlari va qiziqishlarini qondirishga qaratilgan bo’ladi. Sotsial soha o’z kelib chiqishi, funktsionalashuvi va rivojlanishida ma‘lum bir qonunlarga bo’ysunadi. Bu qonunlarni butun bir jamiyat doirasida amal qiluvchi qonunlardan ajrata olish zarur. Aynan sotsial sohaga xizmat qilishga qaratilgan qonunlar sotsiologik qonunlar deyiladi. SHunday qilib, sotsiologik qonunlar – sotsial sistemaning turli bosqichlarida namoyon bo’luvchi turli xil sotsial birliklar, tashkilotlar va institutlarga birlashgan odamlar o’rtasidagi mavjud o’ziga xos, muhim, takrorlanib turuvchi aloqlardir. Ijtimoiy hayotning turli sohalarida uchraydigan har qanday aloqalarni ham sotsiologik qonun sifatida qarash mumkin emas, balki faqatgina sotsial sistema ichida yuzaga keladigan aloqalarni sotsial qonunlar sifatida qarash mumkin. Sotsiologik qonunlar sistemalilik xususiyatiga ega, ya‘ni ular faqatgina birgalikda sotsial sistemani bir butunlik sifatida tushuntirib beradi. Sotsiologik qonunlar ikkiga bo’linadi: umumiy va xususiy 1. Umumsotsiologik qonunlar – shunday qonunlarki, ular birinchidan, barcha sotsial sistemalarning rivojlanishi davomida amal qiladi, ikkinchidan, sotsial sistemalarning sotsial muhitda amal qiluvchi boshqa qonuniyatlarini aniqlab beruvchi mohiyatini, fundamental asoslarini aks ettiradi. Sotsial munosabatlarning ishlab chiqarish usullariga tobeligi umumsotsiologik qonundir. Insonlarning jamiyatdagi o’rni, ijtimoiy hayotdagi roli, ularning ehtiyoj va qiziqishlarining qondirilishi oxir-oqibat ishlab chiqarish munosabat bilan aniqlanadi. Inson tomonidan ekspluatatsiya qilinishiga olib keluvchi mulkchilik munosabatlari ustun bo’lgan jamiyatlarda asosiy ishlab chiqarish vositalari egalari hukmron o’rin egallab, ishlab chiqarishda qatnashmay turib o’z ehtiyojlarini qondiradi va jamiyatni boshqaradi, ishlab chiqarish vositalariga egalik qilmaydiganlar esa ular tomondan eziladi, boshqaruvdan yiroqlashadi, kam mehnat haqi oladi, o’z qobiliyatlarini realizatsiya qilishga yetarli imkoniyati bo’lmaydi va hokazo. Mulkchilik munosabatlari insonni inson tomonidan ekspulatatsiya qilinishini keltirib chiqarmaydigan jamiyatda ijtimoiy hayotning barcha sohalarida,

shuningdek, sotsial sohada ham, odamlar bir xil o’rin egallaydilar /hukmronlik qiluvchilar va mazlumlar bo’lmaydi/, ijtimoiy-siyosiy hayotda qatnashishda bir xil imkoniyatga ega bo’ladilar, ehtiyoj va qiziqishlarining qondirilishi esa har birining o’zi qo’shgan hissasiga bog’liq bo’ladi. Sotsial munosabatlarning ishlab chiqarish – iqtisodiy munosabatlariga nisbatan aktiv roli ham muhim qonuniyat bo’lib keladi. Masalan, sotsial birliklarda odamlar munosabatlarining yaxshilanishi, kollektivdagi shunga mos muhit ishlab chiqarish rivojlanishga, umumiy holda jamiyatga ham bevosita ta‘sir qiladi. Ehtiyoj va qiziqishlarning sotsial shartlanganligi ham umumsotsiologik qonundir. Ehtiyojlar barcha shart-sharoitlar yig’indisi, avvalam bor ishlab chiqarish kuchlarining rivojlanish darajasiga va ishlab chiqarish munosabatlari xarakteriga, u yoki bu sotsial birliklarning /sinflar, millatlar va b./ qiziqishlari va ideallarga bog’liq holda ham kelib chiqadi, ya‘ni moddiy va ma‘naviy ishlab chiqarishning turli sohalaridagi aktiv faoliyat, boshqa odamlar bilan muloqot, shaxsning shakllanishi jarayoni shunga mos ehtiyojlarni keltirib chiqaradi. Ehtiyoj va qiziqishlar shartlanganligining o’ziga xosligi ishlab chiqarishning, turli sotsial sistemalarga mansub insonlar moddiy-texnik bazasining bir xil rivojlanish darajasi sharoitida ham turli xil, ba‘zan qarama-qarshi ehtiyojlar va qiziqishlarning yuzaga kelishida namoyon bo’ladi. SHaxs shakllanishida sotsial muhitning muhim roli – yana bir umumsotsiologik qonundir. Insonning boshqa insonlar, kollektivlar, birliklar bilan aloqasi va o’zaro hayoti shart-sharoitlari uning atrofida doimiy, uning jamiyatdagi o’rnini, faoliyatini, xulq-atvorini, hayot tarzini belgilab beruvchi faktorlar kompleksini vujudga keltiradi. Sotsial muhitning holati, uning boyligi yoki nochorligi shaxsning bilimi, malakasi, fikrlari, kayfiyatini, demakki, uning u yoki bu hatti-xarakatini asoslashda sabab bo’lib keladi. Oxir-oqibat sotsial muhit sharoitlarining ma‘lum ta‘siri ostida, faoliyat va muloqot jarayonida shaxsning hayotga ma‘lum bir munosabati, qadriyat va maqsadlari, ahloq-odob qoidalari haqidagi tasavvurlar, ma‘naviyati, madaniyati, ongi shakllanadi. 2. Umumsotsiologik qonunlardan tashqari bir yoki bir necha /bir tipli/ sotsial sistemalar doirasida, shuningdek, sotsial sistemaning alohida strukturaviy sohalarida amal qiluvchi o’ziga xos xususiy qonunlar ham mavjud. Masalan, sotsial birliklar o’ziga xos qonuniyatlarga ega sinfiy, milliy, oilaviy-kundalik va b. munosabatlar. Sotsial rivojlanish qonunlari ob‘ektiv va inson ongi irodasiga bog’liq bo’lmagan holda amal qiladi. Lekin ijtimoiy hayotda hech narsa insonsiz amalga oshmaydi, shuning uchun sotsiologik qonunlar - insonlar faoliyatlarning sotsial faoliyat sub‘ektlarining determinatsiyasi mexanizmidir. Bundan, agarda ijtimoiy jarayonlar insonlarning ongli amaliy faolisiz amalga oshmas ekan, unda sotsial qonunlarning ob‘ektivligi haqida so’z borishi mumkinmi?, degan savol kelib chiqadi. Albatta, sotsial sistemaning butun bir hayoti o’z oldiga ma‘lum bir maqsadlarni qo’yuvchi va ularga erishuvchi ongli mavjudotlar – insonlarning faoliyatidir.

Ularning faoliyatlari bo’ysunadigan qonunlar, ular nimani va qanday bajarayotganligiga, munosabatlari bo’ysunadigan qonunlar esa qanday munosabatlarga kirishilayotganligiga bog’liq holda kelib chiqadi. Jamiyatni yangilash, demokratik huquqiy davlat qurish, sotsial yo’naltirilgan bozor munosabatlariga o’tishda davlat bosh islohotchi bo’lib keladi. Ob‘ektiv qonunlardan maqsadli foydalanish, boshqarish mexanizmlarini ongli ravishda ko’rish asosida, ommaga tayangan holda faoliyatini amalga oshirsagina davlat bu vazifani muvaffaqiyatli bajarish mumkin. Sotsiologiyaning asosiy muammolari uning predmeti sohasidan kelib chiqadi. Turli sotsiologik maktablar va sotsiologik bilimni tashkil etuvchi aniq sistemalarning nazariy yo’nalishlarida kamchiliklarni hisobga olish zarur: 1. Predmet va ob‘ektni tenglashtirish; 2. “Sotsial” tushunchasini aniq ta‘riflab bera olmaslik; Sotsiologiyaning markaziy muammosi – sotsial tizimlarni o’rganishga bog’liq masalalar kompleksidir. Bu birinchi navbatda quyidagilarni tadbiq qilishdan iborat: - sotsial tizimlarning vujudga kelishi va rivojlanishi; - sotsial tizimlar komponentlarining tuzilishi /sotsial birliklar va guruhlar, sotsial tashkilotlar, sotsial institutlar/; - stsial sistemalarning /ular komponentlarining o’zaro aloqa va o’zaro hatti harakati usullari/ strukturasi va sotsial bir butunlilikning barqarorligini saqlab qolish va tartibga keltirishdagi roli; - sotsial tizimlarning, ularning strukturalari va komponentlarini qayta ishlab chiqarishning mexanizmi va shart-sharoitlari; Sotsiologiya tomonidan sotsial tizimning rivojlanish qonuniyatlarini o’rganish uning jamiyat strukturasini tashkil etuvchi komponentlar, u yoki bu sotsial birliklarni, sotsial tashkilotlarni, sotsial institutlarni keltirib chiqarish mexanizmi, shuningdek, sotsial sohadagi sotsial munosabatlar bilan o’zaro aloqada tadqiq etishni talab qiladi. Bundan kelib chiqib, sotsiologiyaning vazifasi sotsial tizimlarning har bir komponentining o’ziga xosligini, ular bajaradigan ma‘lum bir vazifalarni o’rganishdan iborat bo’ladi. Hozirgi davrda, bozor munosabatlariga o’tishda, sotsial tizim strukturasini tadqiq qilish muhim ahamiyat kasb etmoqda. Bu sotsiologdan tadqiqotga ilmiy, ijobiy yondashishni talab qiladi, chunki hozirgi o’tish davrida yuzaga kelayotgan sotsial muammolar yangicha va ilgarilaridan ancha farq qiladi. Masalan, ko’p ukladli iqtisodiyotni yaratish, ishbilarmonlik faoliyatini tashkil etish bilan bir qatorda yangi sotsialguruhlar /masalan, o’rta mulkdorlar sinfi/ vujudga kelmoqdaki, ular jamiyatda sotsial-sinfiy munosabatlarga yangicha kasb etmoqda. Jamiyatning sotsial-sinfiy differentsiyasi kriteriylari haqidagi eski tasavvurlar bu sharoitda yetarli bo’lmay qolmoqda, sotsial guruhlar klassifikatsiyasining yangi asoslarini topish, ularning jamiyatdagi o’rni va ijtimoiy hayotdagi rolini aniqlash zarur bo’lib qoladi. Sotsiologlar uchun faktlar va sotsial vaziyatlarni ularning konkret namoyon bo’lishida o’rganish vazifasi muhim ahamiyatga ega. Odamlarning sotsial

birliklarning sotsial faktlar sifatidagi faoliyati, ularning ma‘lum bir sotsial vaziyatda namoyon bo’lishini o’rganish muhim va aktualdir. Sotsiologiyaning asosiy muammolaridan biri – shaxsning sotsial tizimdagi o’rni, qanday va qay tarzda u yoki bu shaxs jamiyatning hayotiy faoliyatida qatnashishi, bunda u qanday asos va stimullarga asoslanishi haqidagi masalalarni o’rganishdir. Shaxsning ijtimoiylashuvidagi shart-sharoitlarni o’rganish ham muhimdir. Turli sotsial birliklarning tabiati, xususiyati, ehtiyoji va qiziqishlarining namoyon bo’lishini tadqiq qilish vazifasi o’zi bilan sotsial munosabatlarni o’rganish bilan bog’liq bir qator vazifalarni keltirib chiqaradi. Huquqiy demokratik davlat qurish yo’lidan borayotgan jamiyat oldida kolektivizm, sotsial adolat, shuningdek, barcha millatlarning, sotsial guruhlarning umumiy kelishuvi yo’lidagi hamkorliklari, uning barcha a‘zolarining sotsial tengligini ta‘minlash, ularning jamiyatdagi o’rnini yaxshilash, jamiyatni yangilashda va progressida inson faktoridan maksimal darajada foydalanish masalalari bilan bog’liq muammolarni yechish vazifasi turadi. Sotsiologiya fanining vazifasi shu barcha protsesslarning sotsial birliklar, sotsial tashkilotlar va sotsial institutlar doirasida o’zaro harakat qiluvchi odamlar, sotsial guruhlarning sotsial o’rni va sotsial qiyofasidagi o’zgarishlar bilan qonuniy aloqalarini o’rganishda namoyon bo’ladi. Sotsiologiya milliy mafkurani shakllantirish, yaratish jarayonida alohida o’rin tutadi. Eskirib qolgan dunyoqarash, eskicha moddiy va ma‘naviy munosabatlar o’z o’rnini yangisiga osonlikcha bo’shatib bermaydi. Buning uchun ma‘lum vaqt kerak. Sotsiologiya shu vaqt davomida ma‘naviyatda ro’y berayotgan o’zgarishlarni aniqlashga va ilmiy asosga ega bo’lgan tadbirlar ishlab chiqishga xizmat qiladi. SHunday qilib, milliy davlatimiz ijtimoiy tizimdagi mavjud sistemalar tarkibiy-funktsional holatini sotsiologik tadqiqotlar orqali aniqlash va o’rganish muammosi ham hozirgi kunning eng muhim masalalaridan biridir. Ularning ichida milliy tuzilish va turli millatlarning o’zaro ahil yashashini ta‘minlovchi omillarni kuchaytirish yo’llarini aniqlash; oila, yoshlar bilan bog’liq bo’lgan mavjud muammolarni jiddiy tahlil qilib, real tadbirlar ishlab chiqish va hayotga tadbiq qilish; hozirda faoliyat ko’rsatayotgan mavjud salbiy xarakterdagi turli guruhlar: giyohvandlar, ishsizlar, bekorchi sayoqlar, o’zgalar hisobiga kun kechiradigan boshqa tuzilmalarning millatimizga, mamlakat siyosiy vaziyatiga, iqtisodiyotiga, ma‘naviyatiga va kishilarning ijtimoiy turmush tarziga yetkazayotgan katta zarariga va bu guruhlar faoliyatiga chek qo’yish muammolarni o’rganish muhimdir. Turli ijtimoiy-iqtisodiy, siyosiy manfaatlar o’rtasidagi ziddiyatlarni faqat bostirish, zo’ravonlik yo’li bilan hal etib bo’lmaydi. Buni tarix takror va takror isbotlab bergan. Sotsiologiyaning vazifasi esa bu jihatdan ilmiy tahlil asosida davlatni, ijtimoiy munosabatlarni boshqarishga har tomonlama ko’maklashishdir. Sotsiologiyaning jamiyat taraqqiyotidagi ikki muhim funktsiyasini ajratib ko’rsatish zarur: 1/ Bilish funktsiyasi; 2/ Amaliy funktsiya;

1. O’zining bilish funktsiyasi orqali jamiyat taraqqiyotining ob‘ektiv qonunlarini, konkret hayotiy jarayonlarni ilmiy asosda o’rganadi. Mavjud ijtimoiy voqelikdagi jarayonlarni o’rganish bilan jamiyat hayotining kelgusidagi rivojlanish oldindan payqash, tahlil qilish uchun xizmat qilish vazifasini bajaradi. Ijtimoiy bilish ilmiy sotsiologik nazariya va uslubiyotni ishlab chiqish muhim ahamiyatga ega. 2. O’zining empirik bilish darajasi va usullari bilan sotsiologiya amaliy funktsiyaga ham ega. Amaliy funktsiya bilish funktsiyasi bilan uzviy bog’liqdir. Ijtimoiy taraqqiyot qonuniyatlarini, tendentsiyalarini sotsiologik tadqiqot orqali amaliy jihatdan o’rganish jamiyatni ilmiy boshqarish va rejalashtirish, prognoz berish uchun asos bo’ladi. Shuning uchun har bir viloyat va shaharlarda sotsiologik tadqiqotlar o’tkazish, ulardan olingan ilmiy natijalarni respublika miqyosida markazlashgan ilmiy laboratoriyalarda umumlashtirish – davlat ahamiyatiga molik masaladir. Bozor munosabatlariga o’tish jarayonida bunday ilmiy xulosalar amaliy ahamiyatga ega bo’lib, mustaqil O’zbekiston taraqqiyotini ilmiy asosda boshqarishni ta‘minlaydi. Yangi iqtisodiy munosabatlar tarkib topishi va rivojlanishi bilan sotsiologiyaning amaliy funktsiyasining ahamiyati ham ortib boradi. Ayniqsa, hozirgi iqtisodiy qiyinchiliklar davrida mehnatni tashkil qilish, ishsizlikni bartaraf etish, aholi moddiy turmush darajasini ko’tarish kabi dolzarb muammolarni hal etib borishda sotsiologiyaning amaliy vazifasi yaqqol ko’rinmoqda. Fanning ob‘ektiv rivojlanishi ko’p jihatdan mavjud siyosiy tuzumga, rejimga bog’liq bo’ladi. Amaliy va nazariy sotsiologiya esa o’z navbatida jamiyatni ilmiy- rejali boshqarishda davlatga juda katta yordam berish imkoniyatiga ega. Buning uchun: fan sifatida sotsiologiyaning nazariy va amaliy tomonlarini rivojlantirish; shu sohaning malakali mutaxassislarini tayyorlashga e‘tibor berish; viloyatlarda, oliy o’quv yurtlarida sotsiologik ilmiy laboratoriyalar tashkil qilish; ularni davlat tomonidan moddiy jihatdan rag’batlantirish; zamonaviy kompyuter va hisoblash texnikasi bilan ta‘minlash zarur.

Похожие

Sotsiologiya fanining sohaviy tizimi va ijtimoiy fanlar tizimidagi o’rni

Sotsiologiyaning predmeti tarkibiy tuzilishi va rivojlanish qonuniyatlari

Sotsiologiya fanining shakllanishi va taraqqiyot bosqichlari

O. Kontning pozitivistik katexizis asari

Sotsiologiyaning ob’ekti va predmeti