Форуқ Содиқов - Искусство - Рефераты

Форуқ Содиқов

Загружено в:

20.09.2019

Скачано:

0

Размер:

48.5 KB

Форуқ Содиқов Ф. Содиқов 1946 йилнинг 31 декабрида Тошкентда зиелилар оиласида таваллуд топди. Отаси Тожихужа ака машхур хирург ўз касбининг устаси бўлган, етук мутахассис сифатида бир неча йил чет элда ишлаб келган, онаси Азиза ая кўп йиллар бошлангич синф ўкитувчиси бўлиб ишлаган. Ёш Форуқ Глиэр номидаги Республика ўрта махсус мусиқа мактабида қашқар рубобида Б. Мирзаахмедов, дирижёрликдан Ўзбекистонда хизмат кўрсатган артист Э. Тошматов синфида тахсил олди. Ўзбекистон давлат консерваториясида (1965–1970) у қашқар рубобида доцент Ф. Васильев, дирижёрликдан давлат мукофоти лауреати, профессор А. И. Петросянц синфида сабоқ олди. Ўз касбининг билимдонлари бўлган бу устозлардан илм олиш Ф. Содиқов келажагини мусиқа билан чамбарчас боғлашига замин яратди. Талабалик давридаёқ севган касбига ўзини ва бошқаларни ҳам жалб қилаолганлиги учун ўқитувчилик амалиёти бўйича у Тошкент шахар 73–умумтаълим мактабида қизлардан дуторчилар оркестри тузиб, консерватория залида чиқишлар хилди. Фаоллигига ишонган А. Петросянц 4–курсда ўқиётган Ф. Содиқовга талабалар оркестрига раҳбарликни топширди, 5–курсдан эса ўқитувчи сифатида ишга таклиф этиб, қашқар рубобидан ва оркестр дирижёрлигидан дарс берди. 1970–йили ўқишни битирган Ф. Содиқов фақат дирижёрликдан дарс беришни лозим топди. Ўқиш даврида қашқар рубоби билан бирга афғон рубобида ҳам изчил шуғулланганлиги учун у 1971–йили афғон рубоби чолғусида ижрочи созандаларнинг 1–Республика танловида қатнашиб ғолибликни қўлга киритди. Дирижёрлик касбини янада чуқурроқ ўрганишга бўлган интилиш Ф. Содиқовни 1971–йили опера-симфоник дирижёрлиги факультетида ўқишга ундади. У 1976–йили моҳир устоз, композитор ва дирижёр, жамоат арбоби, халқаро мукофотлар лауреати, халқ артисти, профессор М. Ашрафий синфини муваффақият билан битирди. Шу йили Ўзбекистон республикаси маданият ишлари вазирлиги Ф. Содиқовни Т. Жалилов номидаги ўзбек халқ чолғулари оркестрига бадиий раҳбар ва бош

дирижёр этиб тайинлади. Ф. Содиқов келишидан олдин 1975 йилда давлат аттестациясидан ўта олмаган бу оркестр чуқур инқирозни бошидан кечирмоқда эди. Оркестрнинг ижрочилик даражасини ошириш мақсадида Ф. Содиқов жамоага бир қатор иқтидорли созандаларни, республика танловлари ғолибларини таклиф этди. Жамоа ҳаётида янги ижодий давр бошланди. 1978–йили кенг миқёсдаги ижодий сафарлар қайта тикланди. Украина бўйлаб гастрол сафаридан бир лавха: Қрим вилоятининг Евпатория шахридаги А. С. Пушкин номидаги залда биринчи концерт режалаштирилган. Ўзига хос чиройли қурилган бу ажойиб зал тамошабинга тўлган. Тасодифни қаранг-ки, биринчи асарнинг бирнеча такти чалиниши билан залда чироқ ўчди, хаммаёқ зим-зиё қоронғи. Бир неча лахза ҳамма жим, саросимада, шунда жамоа раҳбари Ф. Содиқов созанда Ш. Ахмеджоновга (най) «Чўли ироқ » куйини бошланг деди. Шундан сўнг доира, кейин оркестр аста-секин жўр бўлабошлади. Томошабинлар билан лиқ тўла залда ёқимли куй таралди, куй тугаганда зал гулдурос қарсакларга тўлди. Кейин чанг, ғижжак, қашқар рубоби ва дуторда қатор куйлар ижро этилиб концерт дастур бўйича давом этди. Чироқ ёнганда залдаги биронта ҳам томошабин чиқиб кетмаганлиги маълум бўлди ва ижродан мамнун бўлиб бизни гулдурос қарсаклар билан олқишлаб узоқ вақт сахнадан қўйиб юборишмади. Ф. Содиқов харқандай муаммо туғилганда ҳам иродасини ишга солиб, уддабуронлик билан уларни ечишга одатланганлиги учун бу синовдан ўта олди. Қаттиқ ҳаяжонда ўтказилган бу ажойиб биринчи концерт раҳбардан қанчалар ирода, топқирликни талаб қилганини тасаввур қилиш қийин. Бу концерт ҳаммамизда ўчмас из қолдирди. Ф. Содиқов раҳбарлигидаги оркестрнинг ижодий сафарлари анча кенгайди. Булар: Марказий Осиё давлатлари. Марказий Россия ва Сибирь, Узоқ Шарқ, Украина, Белоруссия ва Кавказ орти республикаларидир. Ф. Содиков рахбарлигидаги оркестрнинг ижодий фаолиятида халқ куй ва қўшиқлари, Ўзбекистон композиторларининг қайта ишлаган ва махсус ёзилган оригинал асарлари мухим ўринга эга. Булар қайта ишлаб оркестр

учун мослаштирган М. Ашрафийнинг — «Баёт » , Б. Гиенконинг — «Фарғонача хусайн » , М. Бафоевнинг — «Фарғонача шахноз » , Т. Қурбоновнинг — «Ушшоқи Содирхон » , «Гиря » , «Феруз!» каби кўплаб асарлар. Махсус оркестр учун ёзилган кекса авлод композиторлари С. Бобоев, М. Ашрафий. М. Бурхонов, М. Левиев, С. Юдаков, В. Зудов, С. Жалил билан бирга янги ёш авлод композиторлари ижоди бошланди. Булар Т. Қурбонов. М. Тожиев, М. Махмудов, И. Акбаров, А. Мансуров, Х. Рахимов. Р. Абдуллаев, Н. Гиёсов, С. Карим-Хожи, М. Отажонов ва бошқалар. Улар ёзган оригинал асарларнинг илк бор ижрочиси Ф. Содиқов хаётга йулланма берди ва кейинчалик радио тасмаларига туширди, хамда пластинкаларга ёзди. Айниқса композитор Т. Қурбонов билан Ф. Содиқовнинг бир-бирига бўлган самимий хурмати туфайли ижодий мулоқот унумли бўлди. Унинг А. Петросянц хотирасига багишланган 2 Рапсодия » си, бешта поэмадан ташкил топган «Хамса » монументал асари ва Ф. Содиқовга миннатдорлик рамзи сифатида бағишланган халқ чолғулари учун яратилган «Биринчи симфония » си (умумий 7) оркестрнинг ижро махоратини юқори погонага кўтариб репертуаридан мустахкам ўрин олди. Оркестрнинг ижодий фаолиятида хамдўстлик мамлакатлари композиторларининг асарлари хам муносиб ўрин олган. Жумладан: И. Лученок (Белоруссия); К. Кумисбеков (Қозогистон); У. Гаджибеков (Озарбайжон); Ш. Сайфуддинов (Тожикистон); К. Багренин (Россия) ва бошқалар. Ф. Содиқов жахон мумтоз композиторлари И. Бах, И. Гайдн, В. Моцарт, Л. Бетховен, Ф. Шуберт, М. Глинка, Ж. Бизе, П. Чайковский. Й. Штраус. П. Сарасате. К. Сен-Санс, Д. Шостакович, Г. Свиридов, А. Хачатурян ва У. Хожибеков каби мусиқа дахолари асарларини ижро этиш созандаларда чуқур мусиқий хиссиёт ва нозик дид тарбиялашга хизмат қилиб келмоқда. Ф. Содиқов раҳбарлигидаги оркестрнинг фаолияти бошқа хорижий мамлакатлари оркестрлари ижоди билан ҳам бевосита боглиқдир. Хусусан Қурмонғози номидаги Қозоғистон Давлат академик халқ чолғу оркестри билан алмашув гастрол сафари, Н. Осипов номидаги Давлат академик Россия

миллий оркестри билан ўзбек оркестрининг биргаликда чиқишлари тингловчиларда катта қизиқиш уйғотди. Шунингдек, Ўзбекистон Давлат академик оркестри билан халқ артисти, Қозоғистон Давлат мукофоти лауреати, профессор Ш. Қашгалиев, Россия халқ артисти, Давлат мукофоти лауреати, профессор Н. Калинин ва Тожикистонда хизмат кўрсатган артист Н. Абдуллаевларнинг концертлари диққитга сазовордир. Бинобарин турли миллат оркестрларининг дирижёрларини ўзбек оркестри билан концертлари бадиий жамоанинг хаётида катта воқеа бўлиб, унинг профессионал ижро махоратини белгиловчи омиллардан хисобланади. Шунингдек оркестрнинг бадиий рахбари ва бош дирижёри Ф. Содиқовни Россия, Қозоғистон ва бошқа хамдўстлик давлатлари оркестрлари билан сахнавий чиқишлари, хамда турли Халқаро конкурс ва фестиваллар хайъати таркибига мунтазам таклиф этилиши, Т. Жалилов номидаги оркестрни кейинги даврда Республика ташқарисида хам машхурлиги, нуфузи ошганлиги, салохияти баландлигидан далолат беради. Оркестр рахбари ёш авлоднинг бадиий- эстетик тарбиясига жисмоний ва маънавий соғлом, комил инсон бўлиб шаклланишига ўзининг салмоқли ҳиссасини қўшиб келмоқда. 2004 –йилдан бери Ўзбекистон Давлат консерваториясининг орган залида ёш томошабинлар учун режалаштирилган «Маънавият чашмалари » рукни остида ўзбек ва рус тилларида ўтказилаётган суҳбатли концертларнинг Ф. Содиқов томонидан дирижёр ва лектор сифатида юқори савияда олиб борилиши тахсинга лойиқдир. Бу оркестрнинг юксак ижрочилик маҳорати ранг-баранг мусиқий дастурлари шунингдек республикамиз ва унинг ташқарисидаги таниқли хонанда, созанда, дирижёрлар билан ижодий мулоқоти натижасида грампластинкаларга ёзиш имконияти яратилди. Натижада 18 та улкан диск дунё юзини кўрди. Хусусан, хонандалар халқ артисти С. Қобулова, Ўзбекистон халқ артистлари О. Алимақсумов, Н. Абдуллаева, Тожикистон халқ артистлари Б. Исҳоқова, Ш. Муллажонова, М. Эргашевалар созандалардан Т. Собиров, Ўзбекситонда хизмат кўрсатган артистлар, профессор М. Тоиров, Ш. Ахмеджонов, Тожикистонда хизмат

кўрсатган артист Н. Абдуллаев дирижёрлигида ёзилган «Субҳидам » , «Кўнгил навоси » , «Дил ноласи » , «Помир садоси » оркестрнинг 50 йиллигига бағишланган «Муборакбод » номли икки пластинкадан иборат мусиқий гулдасталар ўзининг профессионал жихати, сержилолиги ва табиийлиги билан бугунги кунда ноёб мусиқали хазинага айланди. Ф. Содиқов раҳбарлигидаги оркестр Ўзбекситон телевидениеси ва радиосининг олтин фондига ўзининг энг ноёб дастурларини мунтазам равишда ёзиб келмоқда. Шунингдек, хамдўстлик давлатларидан Украина, Тожикистон, Россия ва Қозоғистон радиолари олтин фондларига ҳам ўз дастурларини ёздирган. Ушбу оркестр ижросида «Мусиқали палитра » (1986) фильм-концерти суратга олинди. Ф. Содиқов моҳир дирижёр, жамоат арбоби бўлиши билан бирга меҳрибон устоз ва севимли мураббий ҳамдир. У 20 йилдан ортиқ мобайнида М. Ашрафий номидаги Тошкент Давлат консерваториясида талабаларга халқ чолғулари оркестри дирижёрлиги сирларини ўргатди. У 1985 йилдан доцент, бугунги кунда А. Қодирий номидаги Тошкент Давлат маданият институти профессоридир. Унинг кўп йиллик ижрочилик, концерт ва педагогик фаолиятининг махсули сифатида оркестрнинг 50 йиллик ижодий фаолиятини ёритувчи «Государственний оркестр народних инструментов Узбекистана имени Т. Жалилова » номли монография (мусиқашунос Г. Кузнецова билан ҳамкорликда) чоп этилди (1990, Тошкент). Ф. Содиқов томонидан Ўрта Осиё ва Қозоғистон халқ чолғу оркестрлари репертуаридан тузилган иккита партитура тўпламлари (1988, 1991 йй. М.). консерватория, маданият институти талабалари ва профессионал дирижёрларга мўлжалланган «Ўзбек халқ чолғулари оркестри ижросида Т. Қурбонов асарлари талқини » (1999, Тошкент) ўқув қўлланмаси босмадан чиқарилди. Ф. Содиқов раҳбарлигида оркестр турли халқаро мусиқа фестивалларида қатнашган, жумладан: «Киев баҳори-80 » , «Сочи-84 » , ХП-жаҳон ёшлари фестивали, «Москва-85 » , «Белоруссия кузи-87 » , Кореяда ўтказилган «Мусиқали олтин чўл » (2002) фестивалларининг лауреатидир.

Ф. Содиқов раҳбарлигида оркестрнинг сўнгги йиллардаги ижоди сермахсулдир: 2001 йили Республикамизнинг энг нуфузли мусиқа ўчоғи –А. Навои номидаги Давлат академик катта опера ва балет театри сахнасида биринчи марта икки бўлимдан иборат бўлган Дж. Верди вафотининг 100 йиллигига бағишланган «Италия мусиқаси оқшоми » , 2003 йили яна шу театрда Санкт-Петербург шахрининг 300 йиллигига бағишланган «Рус мусиқаси оқшоми » , 2004 йил И. Штраус таваллудининг 200 йиллигига бағишланган «Вальс оқшоми » . 2004 йил шу театрнинг солисти Н. Султоновнинг иштирокида «Неаполитан қўшиқлари оқшоми » , 2005 йил рус мусиқасига бағишланган «Широкая масленница » номи билан ўтказилган мусиқа кечалари жамоатчиликда катта қизиқиш уйғотди ва республикамиз мусиқа ҳаётида муҳим воқеага айланди. Оркестрнинг профессионал ижрочилик соҳасидаги эришган улкан ютуқлари ва кенг оммани мусиқий эстетик тарбиясидаги муваффақиятлари учун «Давлат оркестри » (1980), « Академик оркестр » (1991) юксак унвонлари билан тақдирланилди. Ушбу ютуқлардаги хизматлари учун Ф. Содиқов «Ўзбекистонда хизмат кўрсатган артист » (1980), «Ўзбекистон халқ артисти » (1999) фахрий унвонларига сазовор бўлди. Шу жумладан артистлар А. Мубораков (2002) ва Ш. Ахмеджонов (2003) «Ўзбекистон Республикасида хизмат кўрсатган артист фахрий унвонига, К. Базоров, Е. Каримов, У Махмудовлар халқаро конкурс лауреатлари даражасига кўтарилди. 1976 йилдан оркестрнинг бадиий раҳбари ва бош дирижёри сифатида фаол ижод қилиб келаётган Ўзбекистон халқ артисти, профессор Ф. Содиқов шу жамоада самарали ишлаб. маҳоратини янада юқори даражага кўтаришга эришди. Илк бор оркестрда ижро этилган М. Глинканинг «Руслан ва Людмила » операсига «Муқаддима » , Ж. Россинининг «Ўғри хакка » операсига «Муқаддима » . К. Сен-Санснинг виолончел ва оркестр учун ёзилган «Концерт » и (якканавоз Ш. Толипов), ҳамда «Самсон ва Далила » операсидан Вакханалия «Муқаддима » си, И. Штрауснинг вальслари ва полькалари, П.

Сарасатенинг «Наварра » ва «Хота наварра » асарлари, П. Чайковскийнинг скрипка ва оркестр учун «Концерт » и, А. Хачатуряннинг скрипка ва оркестр учун «Концерти » и, А. Бородиннинг «Князь Игорь » операсидан «Половецкие пляски » ва кўплаб бошқа асарлар шулар жумласидандир. Бу асарларни тўғри талқин қилиш, муаллиф кўрсатганидек темп ва динамикалари, штрихларини ўз ўрнида ижро этилиши Ф. Содиқовнинг катта дирижёрлик маҳоратини намоён этади. Ф. Содиқовнинг ижоди халқ чолғулари оркестрининг ривожига муносиб ҳисса қўшиб ижрочилик маҳорати чўққиларига кўтарилишида беназир хизмат қилмоқда.

Адабиётлар рўйхати 1. Каримов И.А. Тарихий хотирасиз келажак йўқ.-Т.: Шарқ, 1998 . 2. Каримов И.А.Биз келажагимизни ўз қўлимиз билан қурамиз. Т.7.-Т.: Ўзбекистон, 1999 . 3. Азимов К. Ўзбекистон дирижёрлари.-Т., 2001. 4. Аносов Н. П. Литературное наследие. Изд. Сов. Композитор, 1973. 5. Астров А. Деятель русской музыкальной культуры, С. А. Кусевицкий, Л. Музыка 1981.

Похожие

Бастакор Толибжон Содиқов ҳаёти ва ижодий йули.(1907-1957)

Оркестр ва хорга дирижёрлик қилганлар

Мухтор Ашрафий (1912–1975)

Бастакор Ф. Содиқовнинг ҳаёти ва ижоди (1914-1977)

Фазлиддин Шамсутдинов (1916–1980)