Boy tariximiz, dinu diyonatimiz, urf-odat va an’analarimizning qayta tiklanishi – ma’naviy yuksalishdir - Основы культурологии - Рефераты

Boy tariximiz, dinu diyonatimiz, urf-odat va an’analarimizning qayta tiklanishi – ma’naviy yuksalishdir

Загружено в:

20.09.2019

Скачано:

0

Размер:

63.5 KB

Boy tariximiz, dinu diyonatimiz, urf-odat va an’analarimizning qayta tiklanishi – ma’naviy yuksalishdir O‘zbekiston davlat mustaqilligini qo‘lga kiritgan kundan boshlaboq xalqimizning boy ma’naviy merosini tiklash va rivojlantirish, jamiyat ma’naviyatini yuksaltirish davlat siyosati darajasiga ko‘tarilib, uni ta’minlovchi madaniy-ma’rifiy islohotlarning yo‘nalishlari belgilab olindi. Chunonchi, agar istiqlolning dastlabki yillarida jamiyat ma’naviy hayotidagi eng bosh vazifa fuqarolarda sobiq sho‘rolar davriga xos tafakkurni eskicha fikrlash sarqitlaridan bartaraf etish bo‘lgan bo‘lsa, ikkinchi muhim vazifa sifatida fuqarolik jamiyatini shakllantirish belgilandi. Zero, istiqlol tufayli mamlakatimizda demokratik jamiyat barpo etish uchun juda katta va muhim ijtimoiy-siyosiy, huquqiy asos yaratildi. Shu bilan birga, mamlakatimiz hukumati, jamiyat a’zolari tomonidan mustaqillikni madaniy-ma’rifiy jabhalarsiz mustahkamlash mumkin emasligi to‘g‘risidagi xulosaga kelinishi istiqlolni real haqiqatga, bajarilishi kafolatlangan muayyan ijtimoiy hodisaga aylantirdi. Jamiyatda ro‘y berayotgan barcha ijtimoiy- iqtisodiy, siyosiy, axloqiy-mafkuraviy islohotlar o‘z takomiliga faqat madaniy yo‘llar tufayli yetishi mumkinligi barchaga ayon bo‘lmoqda. O‘zbekiston Prezidenti Islom Karimov bu haqda: “Barchamiz yaxshi anglab olishimiz kerakki, hayotimizning boshqa sohalaridagi ahvol, amalga oshirilayotgan islohotlarimizning samaradorligi, avvalo, xalq ma’naviyatining tiklanishi, boy tarixiy merosimizning keng o‘rganilishi, an’analarimizning saqlanishi, madaniyat va san’at, fan va ta’lim rivoji bilan uzviy bog‘liqdir” deb ta’kidlab, aynan shu sohalarni rivojlantirishga jiddiy e’tibor qaratdi. O‘zbekiston Respublikasi Prezidentining 2013 yil 12 iyundagi “O‘zbekiston Respublikasi davlat mustaqilligining yigirma ikki yillik bayramiga tayyorgarlik ko‘rish va uni o‘tkazish to‘g‘risida”gi Qarorida ham bu haqda “davlatimiz tomonidan mustaqillikning ilk kunlaridan boshlab aholi, birinchi navbatda,

yoshlarimizning jismonan baquvvat, ma’naviy jihatdan yetuk avlod bo‘lib ulg‘ayishiga berilayotgan yuksak e’tiborning tasdig‘i sifatida mamlakatimizda davlat budjeti xarajatlar qismining 60 foizga yaqini ta’lim, sog‘liqni saqlash, ilm- fan, madaniyat va san’at, sport sohalari rivojiga yo‘naltirilgani dunyo tajribasida kamdan-kam uchrashini, O‘zbekiston ayni sohalarda jahonda yetakchi o‘rinlarni egallab borayotgani nufuzli xalqaro ekspertlar va tahlil markazlari tomonidan e’tirof etilayotgani” qayd etilgan. Mustaqillik yillarida “ozod, o‘z haq-huquqlarini yaxshi taniydigan, boqimandalikning har qanday ko‘rinishlarini o‘zi uchun or deb biladigan, o‘z kuchi va aqliga ishonib yashaydigan, ayni zamonda o‘z shaxsiy manfaatlarini xalq, Vatan manfaatlari bilan uyg‘un holda ko‘radigan komil insonlarni tarbiyalash” ustuvor vazifa etib belgilangan ekan, bu borada, avvalo, xalqimizning tarixiy xotirasini tiklashga jiddiy e’tibor qaratildi. Davlatimiz rahbari Islom Karimov ta’kidlaganidek, “Tarix xotirasi xalqning, jonajon o‘lkaning, davlatimiz hududining xolis va haqqoniy tarixini tiklash milliy o‘zlikni anglashni, ta’bir joiz bo‘lsa, milliy iftixorni tiklash va o‘stirish jarayonida g‘oyat muhim o‘rin tutadi. Buyuk ajdodlarimizning ishlari va jasoratlari tarixiy xotiramizni jonlantirib, yangi fuqarolik ongini shakllantirmoqda. Axloqiy tarbiya va ibrat manbaiga aylanmoqda”. 1998 yil iyun oyida Prezidentimiz Islom Karimovning bir guruh tarixchilar bilan bo‘lgan suhbatida o‘zbek xalqi va o‘zbek davlatchiligi tarixini, tariximizning boshqa sahifalarini xolisona ilmiy asosda yoritish vazifalari belgilab berildi. 1998 yil 27 iyulda esa Vazirlar Mahkamasining “O‘zbekiston Respublikasi Fanlar akademiyasi tarix instituti faoliyatini takomillashtirish to‘g‘risida”gi Qarori qabul qilindi. Mazkur qarorda respublika tarixchilari oldiga o‘zbek xalqining o‘zligini anglash bilan bog‘liq bo‘lgan muhim tarixiy muammolar, xususan, o‘zbek xalqining kelib chiqishi tarixi, o‘zbek davlatchiligi tarixi kabi boshqa ko‘plab masalalarni ilmiy asoslangan holda xalqqa yetkazish vazifasi qo‘yildi. O‘zbekiston Respublikasi Prezidentining 2012 yil 27 yanvardagi “O‘zbekistonning eng yangi tarixi bo‘yicha Jamoatchilik Kengashini tashkil qilish to‘g‘risida”gi Qarori ham ana shu maqsad sari qo‘yilgan yana bir jiddiy qadam

bo‘ldi. Yillar davomida ataylab buzib ko‘rsatilgan tariximiz mustaqillik yillarida xolislik, tarixiylik, haqqoniylik tamoyillari asosida qayta o‘rganila boshlandi. Natijada o‘zbek xalqining boy tarixi va davlatchiligiga bag‘ishlangan qator ilmiy tadqiqotlar, monografiyalar, darsliklar va o‘quv adabiyotlari yaratildi. 1995 yilda Amir Temur xalqaro xayriya jamg‘armasi tashkil etilib, Prezident Farmoni bilan 1996 yil Amir Temur yili deb e’lon qilindi. Shu yili Sohibqironning 660 yilligiga bag‘ishlangan yubiley mamlakatimizda va jahon miqyosida nishonlandi. YUNESKOning Parijdagi bosh qarorgohida Amir Temurga bag‘ishlangan madaniyat haftaligi (1996 yil 20 – 26 aprel), “Temuriylar davrida fan, madaniyat va maorifning gullab-yashnashi” mavzuida ilmiy konferensiya va ko‘rgazma bo‘lib o‘tdi. Amir Temurning shaxsi butun ma’rifiy insoniyatning boyligi ekanligi tan olindi. Amir Temur yubileyi munosabati bilan o‘nlab tarixiy obidalar ta’mirlanib, qayta tiklandi, yangi inshootlar qurildi va bog‘lar yaratildi. 1996 yil 18 oktabrda Samarqand va Shahrisabz shaharlari markazida ko‘rkam Amir Temur maydoni barpo etildi va buyuk ajdodimizga ulug‘vor haykal o‘rnatilib, 28 avgustda har ikki shaharga “Amir Temur” ordeni topshirildi. 1996 yil 18 oktabr – Toshkentda Temuriylar tarixi davlat muzeyi tantanali ravishda ochildi. 1996 yil 23 – 26 oktabrda Toshkent shahrida “Amir Temur va uning jahon tarixidagi o‘rni” mavzuida xalqaro konferensiya bo‘lib o‘tdi. Shuningdek, 1999 yil 5 noyabrda vatanparvar siymo, xalq qahramoni Jaloliddin Manguberdi tavalludining 800 yilligi nishonlandi. Urganch shahrida Jaloliddin Manguberdi xotirasini abadiylashtiruvchi yodgorlik majmui barpo etildi. E’tiborli jihati, 1999 yil 2 martda O‘zbekiston Respublikasi Prezidentining “9 mayni Xotira va qadrlash kuni, deb e’lon qilish to‘g‘risida”gi Farmoni e’lon qilindi. Farmonning ijrosi sifatida 1999 yil 9 mayda mamlakatimizda birinchi bor 9 may – Xotira va qadrlash kuni sifatida nishonlandi. Mazkur tadbirlar xalqimizda milliy ongni yuksaltirishga, tarixiy xotiraning tiklanishiga, yoshlarni milliy istiqlol g‘oyalari ruhida tarbiyalashga xizmat qilmoqda.

Prezidentimiz Islom Karimov tashabbusi bilan Toshkentda mustamlakachilik davri qurbonlari xotirasini abadiylashtirish maqsadida 2000 yil 12 mayda Toshkentning Yunusobod tumanidagi Bo‘zsuv bo‘yida “Shahidlar xotirasi” yodgorlik majmui ochildi. 2001 yil 31 avgust – qatag‘on qurbonlarini yod etish kuni sifatida O‘zbekistonda ilk bor o‘tkazildi. 2002 yil 31 avgust kuni Toshkentning “Shahidlar xotirasi” yodgorlik majmuida “Qatag‘on qurbonlari xotirasi” muzeyi tashkil qilinib, 2008 yil 31 avgustda uning yangi ekspozitsiyasi ochildi. Zamonaviy, mustaqil va erkin o‘zbek xalqining milliy, ma’naviy jihatdan ko‘p qirrali taraqqiyotga erishishida juda qadim zamonlardan beri shakllanib, kamol topib kelayotgan boy madaniy merosi, an’analari, urf-odatlari, qadriyat- udumlarining ahamiyati g‘oyat beqiyosdir. Shu nuqtai nazardan, ushbu bebaho omillar mustaqil O‘zbekistonning kelgusidagi jadal ravnaqini ta’minlashda, jahon hamjamiyatidagi mavqeining yanada yuksalishi uchun xizmat qilishi tabiiy. O‘zbekiston mustaqillik yo‘lidagi dastlabki qadamlarini qo‘yayotgan davrlardayoq milliy rivojlanish tamoyillariga sodiqligini ko‘rsatdi. Bunda xalq an’analari, urf-odatlari, marosimlarini qayta tiklash masalasini matonat va qat’iylik bilan kun tartibiga qo‘ydi hamda bu borada zarur tadbirlarni dadillik bilan amalga oshira bordi. “Biz uchun tarixiy, madaniy, umuman, ma’naviy qadriyatlar, – deb ta’kidlaydi davlatimiz rahbari, – xalqimizning ruhini baland saqlash, yosh avlodni tarbiyalash eng asosiy vazifa bo‘lib qolishi kerak... Biz quradigan jamiyat O‘zbekiston xalqining turmushini, huquqlari va erkinliklarini kafolatlashi, milliy qadriyatlarimiz va madaniyatimiz qayta tiklanishini, insonning ma’naviy-axloqiy barkamolligini ta’minlashi kerak”. Haqiqatan ham, inson ongi va tafakkurida o‘zgarish yasalmaguncha, uning dunyoqarashini yangi ijtimoiy-siyosiy jarayonlarga muvofiqlashtirmaguncha har qanday harakatlar behuda va foydasizdir. Shu sababli mustaqillik davrida xalq an’ana va qadriyatlarini tiklash masalasi davlat siyosati darajasigacha ko‘tarilganligi aslo bejiz emas. Buning natijasida an’ana va qadriyatlarimizning bundan keyingi rivoji hamda ravnaq topishi uchun keng imkoniyatlar yaratildi. Bu esa o‘z navbatida,

xalqimizning o‘zligini anglashga intilishini kuchaytirdi, milliy g‘ururning yuksalishiga samarali ta’sir ko‘rsatdi. Prezidentimizning 1990 yil 2 maydagi Farmoni bilan Navro‘z an’anaviy bayrami qayta tiklanishi natijasida tarixiy o‘zlikni anglashdagi haqiqat qaror topdi. Navro‘z nafaqat o‘zbeklarning, balki diyorimizda yashayotgan jamiki millat va elat vakillarining ham ardoqli va sevimli bayramiga, xalqlar do‘stligi va birodarligini mustahkamlashning muhim vositalaridan biriga aylandi. Zotan, Navro‘z ezgulikning timsolidir. U shunchaki namoyish emas, balki insoniy tuyg‘ularga ma’naviy quvvat beruvchi, ularni yaqinlashtiruvchi, yagona Vatan tuyg‘usini mustahkamlovchi bebaho qadriyatdir. Ayni paytda Mehrjon, Hosil bayrami, Qovun sayli, xalq bayramlari, sportning milliy turlari hamda turli xalq o‘yinlari keng o‘rin oluvchi badiiy sport bayramlarining ulkan ko‘lamda tiklanishi fuqarolarimizning, ayniqsa, yoshlarimiz dunyoqarashi – e’tiqodini shakllantirish va mustahkamlashda, ularda ona zaminga mehr-muhabbat bilan qarash, rizq-ro‘zimiz asosi bo‘lmish suvni tejab-tergab sarflash, tabiatni, yer osti va yer usti boyliklarini asrash, bobodehqon mehnatini e’zozlash, umuman, o‘lkamizdagi jamiki jonzod va tabiatni asrab-avaylash ruhida tarbiyalashda muhim omil hisoblanadi. Davlatimiz rahbari islom diniga, uning rasm-rusumlariga, bayramlariga, diniy tarbiya va ta’limiga alohida e’tiborni qaratar ekan, mustabid sho‘ro tuzumi davrida ham o‘z fikr-mulohazalarini bildirib keldi va ularning yechimini amaliy ravishda topish uchun usul va yo‘l-yo‘riqlarni belgilab bera oldi. “Islom dini bu ota- bobolarimiz dini, u biz uchun ham iymon, ham axloq, ham diyonat, ham ma’rifat ekanligini unutmaylik, – deb uqtiradi Yurtboshimiz, – Ana shu ma’rifatni kishilarimiz jon-jon deb qabul qiladilar va yaxshi o‘gitlarga amal qiladilar. Mehr- oqibatli, nomusli, oriyatli bo‘lishga, izzat-ehtirom tushunchalariga rioya etishga harakat qiladilar”. Istiqlol yillarida islom dini mavqeining tiklanishi, diniy marosimlar, milliy qadriyatlarimiz, asriy bayramlarimizning xalqqa qaytarilishi, musulmonlarning muqaddas Haj va Umra amallarini ado etish imkoniyatiga erishganliklari, diniy-axloqiy masalalar bo‘yicha kitoblarning chop etilishi, diniy

erkinlik va bag‘rikenglikni ta’minlash kabi keng ommaga manzur ko‘p savobli ishlar tezkorlik bilan amalga oshirildi. Mustaqillik sharofati bois mo‘tabar Qur’oni Karim va hadislarni chop etish imkoniyati paydo bo‘ldi. Jumladan, 1991 yilda Qur’oni Karim ilk bor o‘zbek tilida Alouddin Mansur tarjimasi va Imom al-Buxoriyning “Sahihi Buxoriy” – 4 jildlik hadislar to‘plami o‘zbek tiliga tarjima qilinib, nashr etildi. 1991 yil 14 iyulda O‘zbekiston huquqiy tajribasida birinchi bor “Vijdon er kinligi va diniy tashkilotlar to‘g‘risida”gi Qonun qabul qilindi. O‘zbekiston Respublikasining Konstitutsiyasi qabul qilingach, vijdon er kinligi, davlat va din o‘rtasidagi munosabatlar konstitutsion tamoyillar asosida tartibga solindi. 1998 yil 1 may kuni ushbu qonunning yangi tahriri qabul qilindi. E’tiborli tomoni, 1992 yil 27 mart kunida O‘zbekiston Respublikasi Prezidentining “Ro‘za hayiti va Qurbon hayitining birinchi kunlarini dam olish kuni deb e’lon qilish to‘g‘risida”gi Farmoni imzolandi. O‘zbekiston Prezidentining 1990 yil 2 iyundagi “Musulmonlarning Saudiya Arabistoniga Haj qilish to‘g‘risida”gi Farmoniga binoan O‘zbekiston xalqi vakillari tarixida birinchi marta bevosita hukumat homiyligida har yili Haj va Umra amallarini ado etish imkoniyatiga ega bo‘ldi. Mustaqillik yillarida 32 mingdan ortiq o‘zbekistonliklar Makka va Madinada Haj safarida bo‘ldilar. Yuzlab masjidlar musulmonlarga qaytarildi, yangilari barpo etildi. “Islom nuri” gazetasi va “Hidoyat” jurnali nashr etilmoqda. Prezidentimizning 1992 yil 7 martdagi Farmoni bilan islom dini omilidan, uning ma’naviy imkoniyatlaridan keng foydalanish maqsadida Vazirlar Mahkamasi huzurida Din ishlari bo‘yicha qo‘mita tashkil etildi. Uning tasarrufida Xalqaro islom-tadqiqot instituti va 10 ta madrasa faoliyat ko‘rsatmoqda. Ularda 1000 dan ortiq talaba-yoshlar ta’lim olmoqda. Diqqatga sazovor tomoni, davlatimiz rahbari tashabbuslari bilan islom ta’limoti va falsafasini keng o‘rganish, o‘zbek xalqining diniy, tarixiy va madaniy merosini chuqur ilmiy tadqiq etish, yuqori malakali dinshunos va iqtisodchilarni tayyorlash maqsadida 1999 yil 7 aprelda Toshkent islom universiteti tashkil etildi.

2007 yil – Islom konferensiyasi tashkilotining Ta’lim, fan va madaniyat masalalari bo‘yicha muassasasi – AYSESKO (ISESSO) tomonidan Toshkent shahri Islom madaniyatining 2007 yildagi poytaxti deb e’lon qilindi. 2007 yil 14-15 avgust kunlari Toshkent va Samarqand shaharlarida Toshkent shahrining “Islom madaniyati poytaxti” deb e’lon qilinishiga bag‘ishlangan “O‘zbekistonning islom sivilizatsiyasi rivojiga qo‘shgan hissasi” mavzuida xalqaro konferensiya o‘tkazilib, unda 30 dan ortiq davlatlardan kelgan olimlar qatnashdi. Bugungi kunda respublikamizda 17 ta diniy konfessiya ro‘yxatga olingan va rasman faoliyat ko‘rsatmoqda. 170 dan ortiq diniy tashkilotlar ishlab turibdi. Shuningdek, 1,7 mingdan ortiq masjidlar, xristian ibodatxonalari va boshqa diniy markazlar ta’mirlandi va yangidan qurildi. Ma’lumki, sobiq totalitar tuzumi davrida buyuk allomalarimiz, mutafakkirlarimizning adabiy va ilmiy meroslari faqat biryoqlama yondashgan holda e’lon qilinar, mumtoz asarlar esa uzuq-yuluq holda nashr etilardi. Hatto ularning, ayniqsa, dinga aloqador jihatlari umuman olib tashlanar va shu tariqa asarlarning mantiqiy yaxlitligiga putur yetkazilardi. Bunga ulug‘ bobokalonimiz, so‘z mulkining sultoni Alisher Navoiyning g‘azaliyoti, “Xamsa”si va boshqa benazir asarlari misol bo‘la oladi. Endilikda mustaqillik sharofati tufayli ulug‘ allomalar, olimlar, mutafakkirlarning ijodiy merosi chuqur va xolis o‘rganilgan holda, ya’ni to‘laligicha asl holatiga mos ravishda nashr etilayotgani diqqatga sazovordir. Ma’rifatparvar allomalar Beruniy, Ibn Sino, al-Xorazmiy, Ahmad Farg‘oniy, Imom Buxoriy, Imom Termiziy, Xoja Ahmad Yassaviy, Najmiddin Kubro, Bahouddin Naqshband, Mahmud Zamaxshariy, Abu Mansur Moturidiy, Burhoniddin Marg‘inoniy, Nasafiy, Abdulxoliq G‘ijduvoniy, Mahdumi A’zam va boshqa bobokalonlarimizning boy ma’naviy meroslari, ma’rifat va madaniyat ravnaqi borasidagi dunyoqarashi, nazariy qarashlari, jamiyat taraqqiyoti yo‘lidagi xizmatlari hozirda mustaqil O‘zbekistonimizda yashayotgan millat va elat vakillarini ezgu orzular sari yetaklamoqda, xalqlar o‘rtasida birodarlik va hamjihatlik ruhini kuchaytirmoqda.

Mustaqil davlatimizning bu boradagi amaliyoti millatimizning ma’naviy yuksalishi va jamiyat ijtimoiy-iqtisodiy taraqqiyotini ma’rifiy mezonlar, ma’naviy fazilatlar, axloqiy me’yorlar bilan ta’minlash va madaniyatni xalq ruhiga singdirishga qaratilgan bo‘lib, katta tarbiyaviy ahamiyat kasb etmoqda. “O‘tmishdagi allomalarning bebaho merosi, – deb yozadi mamlakatimiz rahbari, – qanchadan-qancha avlodlarning ma’naviy-ruhiy ongini va turmush tarzini shakllantirgan edi va hamon ta’sir ko‘rsatmoqda”. Buyuk mutafakkir alloma Imom Muhammad ibn Ismoil Buxoriy “Al-Jome’ as-sahih” (“Ishonchli to‘plam”), “Al-adab al-Mufrad” (“Adab durdonalari”) deb nomlangan shoh kitoblar, shuningdek, hadis ilmi, fiqhga doir o‘nlab asarlar muallifi hisoblanadi. Allomaning “Al-Jome’ as-sahih” kitobi o‘zbek tiliga tarjima qilinib, “Hadis” (to‘rt jildlik) nomi bilan nashr etildi. Xalqimizning asriy orzusi ushalib, aziz diyorimiz mustaqillik tufayli bobokalonlarimizning bir necha asrlar avval yaratgan boy ilmiy, madaniy-ma’rifiy meroslarida ilgari surilgan insonparvarlik va bunyodkorlik g‘oyalaridan hamyurtlarimizning bahramand bo‘lishi va ayni chog‘da yoshlarimizga ma’naviy oziq berish, demakki, ma’rifiy- madaniy kamolot sari dadil qadam tashlandi, desak aslo mubolag‘a bo‘lmaydi. Ayniqsa, ulardagi halollik, poklik, rostgo‘ylik, adolat, yaxshilik, sahiylik kabi fazilatlarni qaror toptirish va mustahkamlashga doir g‘oyalar xalqimizga hamon xizmat qilmoqda. Uzoq o‘tmishda o‘zlarining fidokorona mehnatlari tufayli bizga ulkan ilmiy va ma’naviy meros qoldirgan ulug‘ bobolarimiz singari, ularga hamnafas bo‘lib, XX asrda yashab, ijod qilgan taniqli adiblarimiz – Mahmudxo‘ja Behbudiy, Abdulla Qodiriy, Abdulhamid Cho‘lpon, Abdurauf Fitrat va ularning boshqa safdoshlari o‘z asarlari bilan xalqimizning madaniy-ma’rifiy va ma’naviy ravnaqiga salmoqli hissa qo‘shdilar. Buyuk zamondosh adiblarimiz o‘zlarining bebaho ijodiy meroslari orqali xalqimizning ma’naviyati, ma’rifatini, milliy qadriyatlari va ongini yuksaltirishga katta hissa qo‘shgan. Muqaddas diyorimizning erkinligi va mustaqilligi, o‘zbek xalqining baxtu saodati yo‘lida o‘z

aziz jonlari va iste’dodlarini fido qilgan bu tabarruk insonlar avlodlar qalbida Vatanga muhabbat va sadoqat tuyg‘ularini hamon tarbiya etib kelmoqda. Ayni chog‘da milliy, ma’naviy qadriyatlarimiz va madaniy merosimizning tiklanishi va uning xalqaro miqyosda e’tirof etilishi borasida buyuk mutafakkir allomalarning tavallud ayyomlari tantanali ravishda o‘tkazildi. Jumladan, Ahmad Farg‘oniyning 1200 yilligi, “Alpomish” dostoni, uning afsonaviy qahramoni Alpomishning 1000 yilligi tantanalari o‘tkazildi. Islom olamining donishmandlari, mutafakkirlari Imom Buxoriy tavaludining 1225 yilligi, Imom Termiziyning 1200 yilligi, Abu Mansur Moturidiyning 1130 yilligi, Mahmud Zamaxshariyning 920 yilligi, Xoja Abdulholiq G‘ijduvoniyning 900 yilligi, Najmiddin Kubroning 850 yilligi, Burhoniddin Marg‘inoniyning 910 yilligi, Bahovuddin Naqshbandning 675 yilligi, Xoja Ahror Valiyning 600 yilligi nishonlangani fikrimiz dalilidir. E’tiborli tomoni, jamiyatda yuksak madaniy fazilatlarni kamol toptirish, yoshlarni boy merosimiz, tarixiy an’analarimiz, umuminsoniy qadriyatlarga hurmat ruhida tarbiyalash maqsadida Respublika Ma’naviyat targ‘ibot markazi tashkil etildi. Atoqli ma’rifatparvar allomalarimizning ijodiy meroslarini tadqiq etish va hozirgi zamon o‘zbek tiliga ko‘chirish uchun zaruriyat tug‘ildi. Tarixiy adolat qaror topib, Xorazmda Ma’mun akademiyasi qayta tiklandi. Zero, buyuk vatandoshlarimiz bo‘lmish olimu fuzalo va mutafakkirlarning boy madaniy merosini o‘rganish va targ‘ib qilishni yo‘lga qo‘yish hozirgi jamiyatimiz uchun g‘oyaviy jihatdan yetuk, ilmli, barkamol milliy kadrlarni yetishtirishni ta’minlashga ko‘mak berishi bilan ham muhim ahamiyat kasb etadi. Tarix uchun yigirma ikki yil deyarli u qadar katta muddat emas, albatta. Shunday bo‘lsada, O‘zbekiston Respublikasi mustaqillikka erishganidan buyon o‘tgan davr mobaynida ijtimoiy hayotning barcha sohalarida ulug‘vor o‘zgarishlar sodir bo‘lmoqda. Ularning konseptual g‘oyasi insonparvarlik bo‘lib, maqsadi mamlakatimizda insonparvar jamiyat qurish hamda barkamol avlodni tarbiyalashdir. Darhaqiqat, istiqlol yillarida xalqimizning ko‘hna tarixi, boy urf- odatlari va an’analari, go‘zal tili, beqiyos va betakror madaniyati, benazir san’ati, xalq hunarmandchiligi qayta tiklanib, yanada rivojlantirildi. Mana shunday

ma’naviy negizlar xalqimizning o‘zligini anglab, diyorimizda erkin va farovon hayot yaratishida bunyodkorlik sari ilhomlantirmoqda.

Foydalanilgan adabiyotlar ro‘yxati: 1. O‘zbekiston Respublikasining Konstitutsiyasi. –T.: “O‘zbekiston”. 2008. 2. Karimov I.A. O‘zbekiston: milliy istiqlol, iqtisod, siyosat, mafkura. 1-jild. - T.: “O‘zbekiston”, 1996. 3. Karimov I.A. Bizdan ozod va obod Vatan qolsin. 2-jild. –T.: “O‘zbekiston”, 1996. 4. Karimov I.A. Vatan sajdagoh kabi muqaddasdir. 3-jild. –T.: “O‘zbekiston”, 1996. 5. Karimov I.A. Bunyodkorlik yo‘lidan. 4-jild. –T.: “O‘zbekiston”, 1996. 6. Karimov I.A. Yangicha fikrlash va ishlash – davr talabi. 5-jild. –T.: O‘zbekiston, 1997. 7. Karimov I.A. Xavfsizlik va barqaror taraqqiyot yo‘lidan. 6-jild. –T.: “O‘zbekiston”, 1998. 8. Karimov I.A. Biz kelajagimizni o‘z qo‘limiz bilan quramiz. 7-jild. –T.: “O‘zbekiston”, 1999. 9. Karimov I.A. Ozod va obod Vatan, erkin va farovon hayot – pirovard maqsadimiz. 8-jild. –T.: “O‘zbekiston”, 2000. 10. Karimov I.A. Vatan ravnaqi uchun har birimiz mas’ulmiz. 9-jild. –T.: “O‘zbekiston”, 2001.Karimov I.A. Xavfsizlik va tinchlik uchun kurashmoq kerak. 10-jild. –T.: “O‘zbekiston”, 2002

Похожие

Ona yurtim tabiati

Inson qalbiga yo’l

Islom Karimovning milliy – ma'naviy tiklanish kontsеptsiyasi va uning milliy mustaqillikni mustahkamlashdagi ahamiyati

Sharqona, o’zbekona ma’naviy fazilatlar

Millatlararo va fuqarolararo ahillik – eng katta boyligimiz