Тадбиркорлик фаолиятининг давлат томонидан тартибга солиниши - Юриспруденция - Рефераты

Тадбиркорлик фаолиятининг давлат томонидан тартибга солиниши

Загружено в:

20.09.2019

Скачано:

0

Размер:

174 KB

Тадбиркорлик фаолиятининг давлат томонидан тартибга солиниши Режа: 1. Тадбиркорлик фаолиятини давлат томонидан тартибга солиш заруриятининг асослари. 2. Тадбиркорлик фаолиятини давлат томонидан тартибга солиш турларининг таснифи. 3. Тадбиркорлик фаолиятини давлат томонидан тартибга солишнинг шакллари ва услублари. 4. Тадбиркорлик фаолиятини давлат томонидан қўллаб-қувватлаш ва рағбатлантириш. 5. Тадбиркорлик фаолиятининг айрим турларини лицензиялаш. 6. Ишлаб чиқариладиган маҳсулот (иш, хизмат) таннархини шакллантиришни ҳуқуқий тартибга солиш. 7. Молиявий натижани шакллантиришни ҳуқуқий тартибга солиш. 8. Атроф-табиий муҳитни муҳофаза қилишнинг ҳуқуқий асослари. 9. Ёнғин хавфсизлигини таъминлаш соҳасида тадбиркорларга қўйиладиган ҳуқуқий талаблар.

1. Тадбиркорлик фаолиятини давлат томонидан тартибга солиш заруриятининг асослари. Тадбиркорлик фаолиятини ривожлантириш жараёнида бозор иқтисодий жиҳатдан ўзининг талаб ва таклиф қонуниятлари асосида ижтимоий зарурий ишлаб-чиқариш ривожини, товар баҳосини, унинг сифатини, маҳсулотларнинг истеъмолбоп хусусиятларини белгилайди, илмий-техник тараққиётга туртки беради ва шунинг билан бирга кераксиз, самарасиз, рақобатга бардошсиз бўлган ишлаб-чиқаришни четга суриб ташлайди. Ана шу тариқа бозор тадбиркорлар манфаатларига таъсир кўрсатади, бу соҳада ишлаб-чиқаришни ва товарлар (ишлар, хизматлар) сифатини яхшилашга хизмат қилади. Бозор иқтисодиётининг ривожлантирувчи мезони бўлган рақобат тадбиркорларнинг ишлаб-чиқариш харажатларини камайтиришга ва баҳоларни пасайтиришга мажбур этади. Бироқ, ҳар қандай жамиятда унинг иқтисоди қандай бозор моделига мослаштирилган бўлишидан қатъи назар, унинг иқтисоди ва хусусан тадбиркорлик соҳасида давлатнинг тутган ўрни алоҳида аҳамиятга эга бўлиб, тадбиркорлар фаолиятини давлат томонидан тартибга солиш зарурияти юзага келиши табиий. Чунки бозор иқтисоди шароитида тадбиркорлар фаолиятини эркин ривожланишини давлат-ҳуқуқий механизмининг ёрдамисиз тасаввур этиб бўлмайди. Тадбиркорлик фаолиятини давлат томонидан тартибга солиш, унга таъсир кўрсатиш заруриятини жамият манфаатларини муҳофаза қилишнинг қуйидаги талаблари билан асослаш мумкин: 1. Иқтисодий-ижтимоий тараққиётда устувор бўлган давлат ва жамият эҳтиёжларини таъминлаш; 2. Давлат бюджетини шакллантириш; 3. Атроф-муҳитни ҳимоя қилиш ва табиат ресурсларидан оқилона фойдаланиш; 4. Аҳоли бандлигини таъминлаш ва ишсизликни олдини олиш; 5. Мамлакат мудофааси ва хавфсизлигини таъминлаш; 6. Тадбиркорлик фаолиятининг эркинлигини ва рақобатни амалга ошириш ҳамда монополиядан ҳимоя қилиш;

7. Тадбиркорларнинг ташқи иқтисодий фаолиятида ҳуқуқ- тартиботни сақлаш, қонунийликни таъминлаш; 8. Чет эл инвестицияси фаолиятининг эркинлигини кафолатлаш. Юқорида келтирилган давлат томонидан ҳал этилиши лозим бўлган вазифалар рўйхатидан кўриниб турибдики, тадбиркорлик фаолиятини давлат томонидан тартибга солиш заруриятининг асослари жамият оммавий манфаатларидан келиб чиқади. Айтиш керакки, бозор шароитида хусусий манфаатлар одил судлов йўли билан, агарда қачон ва қандай даражада оммавий (жамоат) манфаатлар билан қўшилиб келса, мумкин қадар давлат аралашуви йўли билан ҳимоя қилинади. Тадбиркорлик фаолиятига ва хусусан, тадбиркор ишига давлат аралашувининг чегараси, бошқача қилиб айтганда, тадбиркорлик фаолиятини давлат томонидан тартибга солиш қамрови жамият учун керак бўлган йўналишда, иқтисодий ривожланишни инобатга олган ҳолда бозор муносабатларининг муҳим элементларини сақлаб қолиш зарурияти билан белгиланади. 2 §. Тадбиркорлик фаолиятини давлат томонидан тартибга солиш турларининг таснифи. 1. Тадбиркорлик соҳасини тартибга солишда давлат фаолияти кўп қиррали бўлиб, бунда давлат (унинг органлари) қуйидаги даражаларда ҳаракат қилади: - бутун жамият (мамлакат) манфаатлари вакили сифатида Ўзбекистон Республикаси ҳудуди миқёсида; - Қорақалпоғистон Республикаси, вилоятлар, Тошкент шаҳар аҳолиси манфаатларининг вакили сифатида мазкур ҳудудлар миқёсида; - туманлар ва шаҳарлар аҳолиси манфаатларининг вакили сифатида мазкур ҳудудлар миқёсида. Ўзбекистон Республикаси Конституциясига мувофиқ юқорида кўрсатиб ўтилган барча маъмурий-худудий тузилмалар Ўзбекистон Республикасининг субъектлари ҳисобланиб, мамлакатимизда тадбиркорлик фаолиятини давлат томонидан тартибга солишда ўзларининг қонунда белгиланган ваколатлари доирасига ҳаракат қиладилар. 2. Тадбиркорлик фаолиятини давлат томонидан тартибга солишнинг аҳамияти ва юзага келиш асосларига кўра, тартибга солишни икки турга:

умумий ва алоҳида турларга бўлиш мумкин. Умумий тартибга солишда давлат ва унинг органлари ҳалқ номидан ва жамият манфаатлари учун тадбиркорлик фаолиятига таъсир кўрсатса, унинг алоҳида турида давлат (унинг органлари) маъмурий-ҳудудий тузилма доирасида унинг ўзига хос хусусиятларини эътиборга олган ҳолда аҳоли манфаатлари учун тадбиркорлик фаолиятини тартибга солади. Бунда ҳар доим алоҳида тартибга солиш тадбиркорлик фаолияти умумий тартибга солиш йўналишидан чиқиб кетмаслиги керак. Тадбиркорлик фаолиятини давлат томонидан тартибга солишни бундай турларга ажратишга сабаб шуки, бу соҳада давлат фаолияти маълум даражада алоҳидалаштирилган бўлиб, умумийдан ташқари, ҳудудий тусдаги ҳуқуқий ҳужжатлар ҳам ҳаракатда бўлади. Умумий тартибга солиш тадбиркорлик фаолиятининг турли томонларини бутун мамлакат миқёсида бирдек қамраб олади ва барча учун умуммажбурий аҳамият касб этади. Масалан, тадбиркорлар фаолиятининг эркинлиги «Тадбиркорлик фаолиятини эркинлигининг кафолатлари тўғрисида»ги Қонун, тадбиркорларни солиққа тортиш масаласи эса солиқ, таннархни шакллантириш тартиби тўғрисидаги қонунлар билан ҳал қилинади. Тадбиркорлик фаолиятини давлат томонидан тартибга солишнинг алоҳида турида, масалан маҳаллий давлат ҳокимияти органлари тадбиркорлик фаолияти субъектлари учун маҳаллий солиқлар ва йиғимлар бўйича имтиёзлар бериши ёки тадбиркорлар учун қўшимча кафолатлар белгилаши мумкин. 3. Тадбиркорлик фаолиятини давлат томонидан тартибга солишнинг мазмунига кўра, уни қуйидаги турларга ажратиш мумкин: а) тадбиркорлик фаолияти субъектларини ташкил қилиш ва тугатиш; б) режалаштириш; в) тадбиркорларнинг хўжалик юритиш фаолиятини тартибга солиш ва назорат қилиш. Режалаштириш тадбиркорлик фаолиятига давлат томонидан таъсир этишнинг шакли сифатида Ўзбекистон Республикаси ҳудудида тадбиркорлик фаолиятини мамлакат комплекс иқтисодий ривожланиши йўналишида амалга оширилишини таъминлайди. Режалаштирилган фаолият мамлакат миқёсидаги муҳим иқтисодий вазифаларни ҳал этиш учун мўлжалланиб, вилоят, туман ва бошқа маъмурий-ҳудудий бўлинмалар ёки айрим тармоқ, соҳа тадбиркорларига йўналтирилади. Бундан мақсад мамлакат ва ҳалқ манфаатларининг устунлигини таъминлашдан, тадбиркорлик фаолиятининг эркинлигини кафолатлаш ва рағбатлантириш асосида жамият фаровонлиги учун хизмат қилишдан иборат.

Режалаштирилган фаолият кўрсаткичларига эришишда давлат иқтисодий чораларидан, хусусан, молиялаштириш, субвенция, кредит, солиқ имтиёзларини бериш кабилардан фойдаланади. Тадбиркорлик фаолиятини давлат томонидан режалаштириш асосида давлат эҳтиёжлари учун товар ва маҳсулотлар сотиб олиш давлат бюджети ва давлат эҳтиёжини қондириш учун мўлжалланган бошқа ҳил маблағлар ҳисобидан қопланади. Тадбиркорларнинг хўжалик юритиш фаолиятини тартибга солиш хўжалик фаолиятини юритишга йўл қўймаслик, уни ўзгартириш ёки бекор қилиш, ёки аксинча ушбу фаолиятни мувофиқ ҳолатини қўллаб-қувватлаш мақсадида тадбиркорлик фаолияти субъекти (субъектлари)га нисбатан давлат томонидан таъсир этишдан иборат. Тадбиркорлик фаолиятининг айрим турларини юритишга йўл қўймаслик (тақиқлаш) атроф-муҳитни, табиатни муҳофаза қилиш тартибида учраши мумкин. Масалан, экология зарар етказиши мумкин бўлган объектлар қурилишини давлат қонун йўли билан таъқиқлайди. Хўжалик юритиш фаолиятини ўзгартириш атроф-муҳитга, табиатга зарарли фаолият турини чеклаш ёки уни бутунлай тўхтатиш ҳақида қарор қабул қилиш натижасида содир бўлади. Тадбиркорларнинг хўжалик юритиш фаолиятини тартибга солиш масалани бевосита (директив) ечиш (таъқиқлаш, рухсат этиш) ва билвосита, яъни иқтисодий рағбатлантириш ёрдамида ҳал қилиш йўллари билан амалга оширилади. Хўжалик юритиш фаолиятини тартибга солиш имкониятлари фақат қонунга таянмоғи лозим. Айтиш керакки, бундай нормалар (қоидалар) бир қанча норматив актлардан жой олган. Масалан, тадбиркорларнинг хўжалик юритиш фаолияти ҳақидаги асосий қоидалар Ўзбекистон Республикаси «Тадбиркорлик фаолияти эркинлигининг кафолатлари тўғрисида»ги Қонунда назарда тутилган бўлса, унинг айрим соҳалари ва жиҳатлари тегишли қонунларда, жумладан, «Инвестициялар тўғрисида»ги, «Атроф-муҳитни муҳофаза қилиш тўғрисида»ги, «Табиатдан фойдаланиш тўғрисидаги»ги, «Истеъмолчилар ҳуқуқларини ҳимоя қилиш тўғрисида»ги ва бошқа қатор қонун ҳужжатларида белгиланади. Хўжалик юритиш фаолиятининг назорати деганда, давлат органлари учун тадбиркорнинг хўжалик (иш) ҳолатини кузатиш ва белгиланган тартибда текшириш, қонунда назарда тутилган ҳолларда тегишли чоралар қўллаш бўйича қонуний имкониятлари тушунилади. «Тадбиркорлик фаолияти эркинлигининг кафолатлари тўғрисида»ги, «Хўжалик юритувчи субъектлар фаолиятини давлат томонидан назорат қилиш тўғрисида»ги Қонунларда тадбиркорлик фаолияти субъектлари учун

назорат қилинувчи соҳалар ва назорат қилиш тартиби: бухгалтерия ва статистика ҳисоботи юритиш, солиққа тортиш учун зарур бўлган ахборотлар бериш, текшириш асослари ва бошқа муносабатларни тартибга солувчи нормалар белгиланган. Қонун ҳужжатларида тадбиркорлик фаолиятининг айрим субъектлари учун хўжалик юритиш фаолиятининг махсус назорат қилинувчи соҳалари назарда тутилиши мумкин. Масалан, «Табиий монополиялар тўғрисида»ги (№ 815-1), «Ўсимлик дунёсини муҳофаза қилиш ва ундан фойдаланиш тўғрисида»ги (№ 543-1), «Атмосфера ҳавосини муҳофаза қилиш тўғрисида»ги (№ 353-1) Қонунларда махсус назорат қилиш белгиланган. 3 §. Тадбиркорлик фаолиятини давлат томонидан тартибга солишнинг шакллари ва услублари. Бозор муносабатларига ўтиш даврида ижтимоий табақаланиш жараёнининг енгилроқ ўтишини таъминлаш, қолаверса, иқтисодий барқарорликни сақлаш мақсадида тадбиркорлик фаолияти давлат томонидан тартибга солиб турилади. Тадбиркорлик фаолиятини давлат томонидан тартибга солиш бир неча йўналишда олиб борилади. Тадбиркорлик фаолиятини давлат томонидан тартибга солиш шундан иборатки, бундай фаолиятни олиб бориш жараёнида тадбиркорларнинг шахсий манфаатлари ва жамиятнинг оммавий манфаатлари ўзаро тўқнашади. Бу манфаатлар ўзаро мутаносиб бўлиши ва бир-бири билан қарама-қарши келмасликлари учун турли йўллар ва услублар ёрдамида ушбу манфаатлар уйғунлашувига эришилади. Тадбиркорлик фаолиятини давлат томонидан тартибга солишнинг барча турлари актнинг ҳуқуқий шаклига эга бўлади. Тартибга солиш бўйича ҳокимият ёки бошқарув органининг ҳаракатлари актнинг турли номдаги ҳуқуқий шаклида (режа-акт, дастур, рухсатнома, квота, лицензия, фармойиш) маълум мақсад (вазифа)ни амалга оширишга қаратилади. Тадбиркорлик фаолиятини тартибга солувчи бундай актлар (қандай номланишидан қатъи- назар) давлат хоҳиш-иродасини ифода этганлиги сабабли фақат ёзма шаклда бўлиши мумкин. Давлат томонидан тартибга солиш актнинг ҳуқуқий шаклларидан бошқача тарзда (шаклда) амалга оширилмайди. Режа-акт (дастур) – бу субъектлар ўзида кўрсатилган норматив ёки конкрет (аниқ) тусдаги топшириқ бўлиб, унга кўра субъектлар зиммаларига юкланган талабларга риоя қилишлари ёки ушбу талабларни белгиланган муддатда бажаришлари лозим ва бунинг учун моддий-молиявий таъминот талаб қилиш ҳуқуқига эгадир.

Масалан, тадбиркор давлат буюртмачиси сифатида давлат эҳтиёжи учун зарур бўлган товарни дастурда белгиланган тартиб ва муддатда етказиб беришга мажбур ва айни пайтда бунинг учун ажратилган молия маблағларини талаб қилиб олишга ҳақли. Режа-актлар (дастурлар) турли вазифани бажариш учун мўлжалланади ва турли даражадаги ҳокимият ва бошқарув органлари томонидан қабул қилинади. Масалан, дастурлар республика, маълум бир вилоят ёки туман миқёсида қабул қилиниши мумкин. Дастурлар асосида тадбиркорлик фаолиятининг уларда кўрсатилган субъектлари ўзларининг режаларини тузадилар ва амалга оширадилар. Режа-акт (дастурлар) давлат эҳтиёжлари учун товар етказиб бериш, умуммиллий муаммолар, ижтимоий-иқтисодий, мудофаа, илмий-техникавий, табиатни муҳофаза қилиш борасида ва бошқа аниқ мақсадга йўналтирилган вазифаларни ҳал қилишга қаратилади. Тадбиркорлик фаолиятини давлат томонидан тартибга солиш акти – бу ваколатли давлат органининг белгиланган шаклга келтирилган кўрсатмаси бўлиб, у тадбиркорлик фаолияти субъектлари ёки аниқ бир субъект учун мўлжалланади ва йўналтирилади. У белгиланган тартибда тадбиркорлик фаолиятини юритиш ёки уни белгиланган ҳолатга келтириш тўғрисидаги талабни қўяди. Агар бундай акт бир қанча (ноаниқ) тадбиркорлар доираси учун йўналтирилган бўлса, демак норматив тартибга солиш ҳисобланади. Аксинча, давлат органининг аниқ бир тадбиркорлар учун қабул қилган кўрсатмаси (акти) бўлса, унда бундай тартибга солиш конкрет (аниқ) тартибга солиш ҳақида сўз юритилади. Норматив тартибга солиш актлари қаторига, масалан, эркин тасарруф қилиш тақиқланган маҳсулотлар рўйхатини ёки махсус рухсатнома (лицензия)лар асосидагина шуғулланиши мумкин бўлган фаолият турларининг рўйхатини киритиш мумкин. Тартибга солишнинг бу тури ўзининг тезкор таъсир этиш табиати билан ажралиб туради. Булар қонуности тусга эга бўлиб, одатда аниқ вазифаларни зудлик билан ҳал этиш учун қабул қилинади. Конкрет (аниқ) тартибга солиш деганда давлат органи томонидан тадбиркорлик соҳасидаги хўжалик ҳуқуқий муносабатларни юзага келтириш, ўзгартириш ёки бекор қилиш тўғрисидаги актни қабул қилиш тушунилади. Демак, аниқ тартибга солиш акти ҳар вақт юридик факт бўлади. Бу турдаги актлар турли мақсадни ҳал қилиш учун мўлжалланиши ва айни пайтда ҳар турли ҳуқуқий шаклда бўлиши мумкин. Бундай актларни келтириб чиқариши мумкин бўлган ҳуқуқий оқибатларига кўра уч турга,

яъни: ҳуқуқ пайдо қилувчи, ҳуқуқни ўзгартирувчи ва ҳуқуқни бекор қилувчи турларга ажратиш мумкин. Ҳуқуқ пайдо қилувчи актлар жумласига рухсат этувчи актларнии ёки имтиёзлар, лимитлар, квоталар ва тақдим этиш ҳуқуқларини, ҳуқуқни ўзгартирувчи актлар қаторига эса, тадбиркорлик фаолиятини худудий ёки тармоқ бўйича ривожлантириш учун дотация, субсидия, субвенция, ссуда ва шунга ўхшаш шаклдаги ёрдамни назарда тутган давлат инвестиция дастурларига мувофиқ қабул қилинган давлат молиявий ёрдами тўғрисидаги актларни киритиш мақсадга мувофиқ келади. Ҳуқуқни бекор қилувчи актлар бўлиб, тадбиркорларнинг хўжалик фаолиятини таъқиқловчи актлар ҳисобланади ва улар қаторига, масалан давлат бош санитар врачининг санитария қоидаларига мувофиқ келмайдиган хом-ашёдан тайёрланган ва улар билан алоқада бўлган озиқ-овқат маҳсулотларини ишлаб-чиқаришдан олиб ташлаш ҳақидаги қарорини киритиш мумкин. Тадбиркорлик фаолиятини давлат томонидан тартибга солишнинг ҳуқуқий шаклларидан яна бири – бу давлат назорати актидир. Давлат назорати акти ўз мазмун-моҳиятига кўра тадбиркорларнинг хўжалик юритиш фаолиятини қонунга мувофиқ амалга ошириш асосини ўзида ифода этган, уларнинг ҳуқуқий мақомини белгилашга қаратилган ваколатли давлат органининг ҳаракатидан иборат. Бу актлар хўжалик юритувчи тадбиркорлар фаолиятини давлат томонидан назорат қилиш билан боғлиқ муносабатларни тартибга солиш учун мўлжалланади. Тадбиркорларнинг хўжалик юритиш фаолиятини назорат қилиш Ўзбекистон Республикаси «Хўжалик юритувчи субъектлар фаолиятини давлат томонидан назорат қилиш тўғрисида»ги Қонуни ва бошқа қонун ҳужжатлари асосида амалга оширилади ва асосий мақсад қонун устуворлигини таъминлашга қаратилади. Қонуннинг устуворлик тамойили иқтисодий соҳа ва тадбиркорликнинг бошқаруви аҳамиятининг ошишида ўз аксини топади. Иқтисодиёт бошқаруви соҳасида қабул қилинган меъёрий-ҳуқуқий ҳужжатларнинг аксарияти тадбиркорлик фаолиятини тартибга солишга, уни ривожлантиришга қаратилади. Шунга қарамай, ҳуқуқий актларда директив қоидалар тўплами тадбиркорлик фаолиятининг турли аспектларига ўз муносабатини сақлаб қолади. Тадбиркорларнинг рўйхатдан ўтиш мажбурияти, алоҳида фаолият тури билан шуғулланиш учун лицензия олиш, маҳсулотлар (товарлар, хизматлар)ни мажбурий сертификациялаш талаб қилинадиган ҳолларда сертификатга эга бўлиш ва бошқалар шулар жумласидандир. Бу табиий ҳол, албатта. Лекин, шу билан бирга хўжалик юритишнинг бозор шароитида турли ҳил воситалар ва услубларни қўллаш ёрдамида аста-секин

тадбиркорлик фаолиятини билвосита тартибга солишга ўтилади. Бундай воситалар ва услублар жумласига имтиёзли қарзлар бериш, дотация ва ёрдам пули тақдим этиш, имтиёзли солиқ жорий этиш ва бошқалар киради. Тадбиркорлик фаолиятини тартибга солишда давлат қуйидаги услублардан фойдаланади: а) тадбиркорлик фаолияти асосларини норматив тартибга солиш (фаолият турлари, йўналиши, мазмуни ва ҳоказо); б) тадбиркорлик субъектлари мақомини ва улар амалга ошираётган фаолият турларини тасдиқлаш, расмий тан олиш (рўйхатга олиш, лицензия бериш ва ҳоказо); в) тадбиркорларнинг хўжалик юритиш фаолияти тартибини аниқлаш; г) тадбиркорлик фаолиятининг моҳияти ва сифатига меъёрий талаблар белгилаш; д) тадбиркорларни қўллаб-қувватлашни ташкил қилиш; е) қонунга риоя қилишни назорат остига олиш; ж) тадбиркорлик фаолиятини амалга оширишда белгиланган меъёрлардан оғишмасликни таъминлаш мақсадида тақиқ ва санкциялар киритиш. Бу услублар иқтисодий вазиятга мосланувчан ва моҳиятан ўзгарувчан хусусиятга эга бўлиб, уларни шартли равишда уч турга ажратиш мумкин: нисбатан барқарор (масалан, тадбиркорларни рўйхатга олиш); бирмунча ўзгарувчан (масалан, солиқлар, лицензиялар турлари) ва тез ўзгарувчан. Жамият иқтисодий негизини сақлашга хизмат қилувчи банк, биржа, ахборот марказлари, суғурта компаниялари каби шаклланган бозорга тааллуқли тузилмалар фаолиятини таъминлаш, тадбиркорларнинг хўжалик юритишдаги ташаббуси ва мустақиллигини рағбатлантириш бу услубларнинг муҳим хусусияти ҳисобланади. Демак, давлат тадбиркорлик фаолиятини тартибга солишни қонун актларида давлат органларининг ушбу фаолиятни назорат қилиш ҳуқуқини мустаҳкамлаш орқали амалга оширади. 4 §. Тадбиркорлик фаолиятини давлат томонидан қўллаб-қувватлаш ва рағбатлантириш.

Тадбиркорлик фаолиятини давлат томонидан қўллаб-қувватлаш ва рағбатлантириш мулкдорлар синфини шакллантириш ҳамда бозор иқтисодиётига асосланган фуқаролик жамиятини қуришнинг асосий йўлларидан бири ҳисобланади. Ҳар қандай юксак тараққий этган жамият ўз тадбиркорини ҳимоя қилади ва қонуний рақобатни таъминлайди. Тадбиркорликнинг муҳим аҳамияти унинг мамлакатимизда олиб борилаётган иқтисодий ислоҳотларда тутган ўрни билан белгиланади. Давлат ва тадбиркорлик мақсадларининг уйғунлиги (умумийлиги) қуйидаги йўналишларнинг бирлигида намоён бўлади: 1. Давлат учун вазифаларни мувафаққиятли амалга ошириш, тадбиркорлик учун эса даромад (фойда) олиш имкониятини яратувчи жамиятдаги сиёсий ва иқтисодий барқарорликни таъминлаш; 2. Аҳолининг товар (хизмат)га бўлган эҳтиёжини имкон қадар тўлароқ қондириш. Бунда тадбиркор ўз товарларини сотиш (реализация қилиш) орқали даромад (фойда) олса, давлат ишлаб-чиқаришини ривожлантириш, янги технологияларни жорий қилиш, солиқ ундириш орқали миллий иқтисодиётни тараққиётига эришади; 3. Рақобатбардош товар (хизмат)ларни кўпайтириш, уларни экспорт қилиш, жаҳон бозоридан муносиб жой олиш. Бунда тадбиркор янги сотув бозорларидан жой олса, давлатнинг халқаро майдонда нуфузи ошади. Демак, давлат ва тадбиркорлик бир-бирига муҳтож ва бир-бирини қўллаб-қувватлаши бозори иқтисодий муносабатларини ривожлантиришнинг муҳим омилидир. АҚШ тажрибаси шуни кўрсатадики, тадбиркорликни ривожлантиришни мамлакат иқтисодий тараққиётининг умумий йўналишларидан ажратиб бўлмайди. Шунинг учун тадбиркорларнинг мамлакат иқтисодий тараққиётига доир асосий йўналишлардан келиб чиққан ҳолда, иқтисодий ривожланиш дастурлари доирасида ўз фаолиятларини белгилашлари ҳамда юритишлари мақсадга мувофиқ бўлади. Тадбиркорлик фаолиятини давлат томонидан қўллаб-қувватлаш, авваламбор, унинг мустаҳкам ва жамият билан чамчарчас боғлаб турувчи ҳуқуқий тизимини яратишдан иборат. Бунда ҳуқуқий тизимнинг, қонунларнинг республикамиз иқтисодиётининг бозор шароитига мос келадиган ва сиёсий, ижтимоий-иқтисодий, маънавий-аҳлоқий талабларига жавоб берадиган ҳуқуқий асосининг шаклланишини таъминлаш муҳим аҳамиятга эга.

Давлат истеъмолчиларининг ҳуқуқи устунлигини инобатга олиб, иқтисодий фаолият, тадбиркорлик эркинлигини кафолатлайди. Барча хўжалик юритувчи субъектлар учун тадбиркорлик фаолияти билан шуғулланиш ҳуқуқини беради. Айтиш лозимки, хўжалик юритувчи субъект сифатида тадбиркорларнинг ҳуқуқий мақомини белгилашда ва улар ўртасидаги мулкий муносабатларни тартибга солишда Ўзбекистон Республикаси Фуқаролик кодекси алоҳида ўрин тутади. Тадбиркорликнинг ҳуқуқий тизимини мукаммаллаштириш мақсадида 2000 йил 25 майда Ўзбекистон Республикасининг «Тадбиркорлик фаолияти эркинлигининг кафолатлари тўғрисида»ги Қонуни қабул қилинди. Ушбу Қонун хўжалик юритувчи субъектларнинг ҳуқуқий мақомини мустаҳкамлашга хизмат қилди, унда давлатнинг тадбиркорликни қўллаб- қувватлашга йўналтирилган хоҳиш-иродаси яна бир карра ўзининг амалий ифодасини топди. Қонунда умумий қоидалар, тадбиркорлик фаолиятини амалга ошириш асослари белгиланган бўлиб, тадбиркорларнинг қатор ҳуқуқлари ҳар томонлама кафолатланди. Тадбиркорлик фаолияти, тадбиркорлик субъектларининг ўз маҳсулоти (иш хизмати) ва даромадларини тасарруф қилиш, тадбиркорларнинг ташқи иқтисодий фаолият, уларнинг мулк ҳуқуқи ва бошқа ашёвий ҳуқуқлари, хом ашё, товарлар ва хизматлар бозорларига эркин кириш, кредит ресурсларидан эркин фойдаланиш, ахборот олиш, тадбиркорлик фаолиятига аралашмаслик, улар эркинликларининг кафолатлари шулар жумласидандир. Кўриниб турибдики, юқорида қайд этилган Қонунларда тадбиркорлик фаолиятини давлат томонидан қўллаб-қувватлаш элементлари бир бутунликда яққол акс эттирилган бўлиб, уларнинг мазмуни қуйидагича: а) давлат тадбиркорларнинг қонуний манфаатлари ва ҳуқуқларининг амалга ошишини кафолатлайди; б) тадбиркор хўжалик фаолиятини амалга оширишда қонунга зид бўлмаган барча турдаги хатти-ҳаракатларни қилишга ҳақли; в) тадбиркорнинг хўжалик ва бошқа фаолиятига давлат, жамоат ёки бошқа органларнинг ноқонуний аралашувига йўл қўйилмайди; г) давлат ваколатли органлари ва уларнинг мансабдор шахслари тадбиркорлар ва улар фаолиятига алоқадор масалалар юзасидан фақат қонун асосидагина қарор қабул қилишлари лозим ва ўз хатти-ҳаракатлари учун қонун олдида жавобгардирлар. Муҳими, давлат органлари ва мансабдор шахслар тадбиркорларга қонунда белгиланган ваколатлари доирасидагина кўрсатма (фармойиш) беришлари мумкин. Агарда давлат ёки бошқа ваколатли орган томонидан қонунчилик талабларига зид бўлган акт қабул

қилинса, тадбиркор бундай актни ҳақиқий эмас деб топиш ҳақида судга ариза билан мурожаат қилиш ҳуқуқига эга; д) давлат тадбиркорларни мулк шаклларидан қатъи-назар хўжалик юритишнинг бир ҳил ҳуқуқий ва иқтисодий шарт-шароитлари билан таъминлайди; е) давлат бозорни ривожлантиришга имкон яратади, яккаҳокимликка қарши курашади, истеъмолчиларни ижтимоий ҳимоя қилади; ж) давлат янги технология жорий этиш, товар, (иш, хизмат) сифатини яхшилаш ва миқдорини кўпайтириш орқали ишлаб-чиқаришни ривожлантирган тадбиркорларга имтиёзли шароитлар яратади; з) давлат ва бошқарув органлари тадбиркор билан узаро муносабатларини билвосита иқтисодий воситалар ва услублар асосида шакллантиради. Тадбиркорлик фаолиятини давлат томонидан қўллаб-қувватлаш мақсадида қабул қилинган ва амалда бўлган қонун ҳужжатлари нормаларини тадбиркорлик соҳасидаги муносабатларнинг вужудга келиш доираси ҳамда тартибга солиш йўналишига кўра, шартли равишда тўрт гуруҳга ажратиш мумкин: - тадбиркорлик фаолияти субъектларнинг ички муносабатларини белгиловчи нормалар; - тадбиркорлик фаолияти субъектларининг давлат ва бошқарув органлари билан муносабатларини тартибга солувчи нормалар; - тадбиркорлик фаолияти субъектларининг бошқа ташкилотлар, хусусан банк, суғурта ташкилотлари, жамғармалар билан муносабатларини тартибга солувчи нормалар; - тадбиркорлик фаолияти субъектларининг ўзаро муносабатларини белгиловчи нормалар. Қонунда тадбиркорлик фаолиятини давлат томонидан қўллаб-қувватлаш назарда тутилган бўлиб, давлат бошқарув органлари ва маҳаллий давлат ҳокимияти органлари белгиланган ваколатлари доирасида қатор ишларни амалга оширишлари мумкин. Масалан, давлат тадбиркорлик фаолияти субъектлари кадрларини тайёрлаш, қайта тайёрлаш ва малакасини ошириш тизимининг ривожлантирилишини таъминлайди (Қонуннинг 47-моддаси).

Бундан ташқари, Қонунда тадбиркорликни ривожлантиришни давлат томонидан рағбатлантириш йўллари, хусусан, инвестицияларни, замонавий технология ва ускуналарни жалб этиш учун шароитлар яратиш, солиқлар, йиғимлар ва тарифлар бўйича имтиёзлар белгилаш ва бошқалар назарда тутилган. Айниқса, кичик ва хусусий тадбиркорликнинг қонуний асосини мустаҳкамлаш ва уни қўллаб-қувватлашга алоҳида эътибор қаратилган. Масалан, кичик ва хусусий тадбиркорлик субъектларига энергия таъминоти манбаи истеъмолидаги имтиёзлар, асосий фондларнинг тезлаштирилган амортизацияси бўйича имтиёзлар бериш кўзда тутилган. Бу соҳадаги ишларни амалга оширишда Ўзбекистон Республикаси Президентининг 1995 йил 26 июлдаги Фармонига кўра ташкил қилинган хусусий тадбиркорлик ва кичик бизнесни қўллаб-қувватлаш Фонди (Бизнес- Фонд) етакчи аҳамият касб этади. Ушбу жамғарма тадбиркорликни ҳар тарафлама ривожлантириш, илғор иш услубларини кенг жорий қилишни ўз олдига мақсад қилиб қўйди. Республикамиздаги энг яхши уч тадбиркорга ҳар йили «Ўзбекистон тадбиркори» деган унвон берилиши белгиланди. Кичик ва хусусий тадбиркорларни қўллаб-қувватлаш фондлари: - кредитлар бериш асосида тадбиркорларни молиявий таъминлаш; - устав сармоясида иштирок этиш; - маслаҳат ва ахборот хизматлари кўрсатиш шаклида техник жиҳатдан кўмаклашиш; - инфратузилмани ривожлантиришга кўмаклашиш; - кредиторлар учун кафолатлар ва кафилликлар бериш йўли ҳамда қўллаб-қувватлашнинг бошқа шакллари билан кичик ва хусусий тадбиркорлик субъектларини рағбатлантириш мақсадида ташкил қилинади. Хусусий тадбиркорлик ва кичик бизнесни ривожлантириш, тадбиркорликни давлат томонидан қўллаб-қувватлашни ҳамда кредиторларга қарз эвазига кафолатлар берилишини кўзда тутувчи дастурларни рўёбга чиқариш учун қулай шарт-шароитларни вужудга келтириш мақсадида «Хусусий тадбиркорлик ва кичик бизнесни суғурта йўли билан ҳимоя қилувчи агентликни ташкил этиш тўғрисида»ги Фармон эълон қилинди. Мазкур Фармонга мувофиқ «Мадад» суғурта агентлиги ташкил қилиниб, унинг асосий йўналишлари этиб, хусусий тадбиркорлик ва кичик бизнесни имтиёзли шартлар асосида суғурта қилиш, кредиторлар қопланмаганлиги учун қарзларнинг масъулиятини суғурталаш, хорижий сармояларнинг суғурта йўли билан ҳимоя қилинишини таъминлаш белгилаб берилди.

5 §. Тадбиркорлик фаолиятининг айрим турларини лицензиялаш. Лицензиялаш мазмун-моҳияти билан давлат хавфсизлиги ва мамлакат мудофаасини таъминлаш, фуқаролар саломатлиги ва маънавияти, уларнинг қонуний манфаатлари ҳамда ҳақ-ҳуқуқларини ҳимоя қилиш сари йўналтирилган бўлиб, тадбиркорлик фаолиятини давлат томонидан назорат қилишнинг бир тури ҳисобланади. Тадбиркорлик фаолиятини амалга ошириш учун лицензиялаш талаб қилинадиган фаолият турлари белгиланганки, улар жумласига амалга оширилиши фуқароларнинг ҳуқуқлари ва қонуний манфаатларига, соғлиғига, жамоат хавфсизлигига зарар етказиши мумкин бўлган ҳамда тартибга солиб турилиши лицензиялашдан ташқари усуллар билан амалга оширилиши мумкин бўлмаган фаолият турлари киради. Лицензиялаш талаб қилинадиган фаолият турлари қонун билан белгиланади. Фаолиятнинг айрим турларини лицензиялаш билан боғлиқ муносабатлар Ўзбекистон Республикаси Фуқаролик кодексининг 49-моддаси, Ўзбекистон Республикаси «Тадбиркорлик фаолияти эркинлигининг кафолатлари тўғрисида»ги Қонуннинг 13-моддаси, Ўзбекистон Республикаси «Фаолиятнинг айрим турларини лицензиялаш тўғрисида»ги Қонуни кейинги ўринларда Қонун деб юритилади ва бошқа қонун ҳужжатлари ҳамда фаолиятнинг аниқ турлари лицензияш тартиби тўғрисидаги Низомлар билан тартибга солинади. Бундан ташқари, тадбиркорлик фаолиятининг айрим турларини лицензиялаш тартиби Ўзбекистон Республикаси Вазирлар Маҳкамаси томонидан белгиланади. Лицензиялаш соҳасини лицензияловчи органлар амалга оширади. Қонунга кўра, лицензиялаш деганда, лицензия бериш тўғрисидаги аризани топшириш ва кўриб чиқиш, лицензияни қайта расмийлаштириш, лицензиянинг амал қилишини тўхтатиб туриш, тугатиш ва бекор қилиш жараёни билан боғлиқ тадбирлар комплекси тушунилади. Қонун ҳужжатларига мувофиқ лицензиялашни амалга оширувчи махсус ваколатли органлар – лицензияловчи органларга қонун уларнинг фаолияти билан бевосита боғлиқ бўлган қатор ваколатларини белгилаб беради. Масалан, лицензия талаблари ва шартларига лиценциаторлар қатъий риоя этишини назорат қилиш, лицензияларни қайта расмийлаштириш, уларнинг амал қилишини тўхтатиб туриш ва қайта тиклаш, лицензияларнинг амал қилишини тугатиш ёки бекор қилиш ва бошқалар. Шу билан бирга лицензияловчи органларнинг шу органлар лицензиялайдиган фаолият турлари билан шуғулланаётган корхоналар, ташкилотлар ва муассасалар тузиши ёки улар фаолиятида муассислар сифатида иштирок этиши

тақиқланади. Лицензияловчи органларни ва лицензиялаш тартибини белгилаш, Ўзбекистон Республикаси ҳудудида лицензиялар реестрини юритиш тартибини белгилаш, лицензияловчи органларнинг қонун ҳужжатларига риоя этган ҳолда иш юритишни назорат қилиш ҳамда лицензиялашнинг айрим турларини амалга ошириш Ўзбекистон Республикаси Вазирлар Маҳкамаси ваколатлари доирасига киради. Бундан ташқари, Ўзбекистон Республикаси Вазирлар Маҳкамаси юридик шахс ташкил этмаган ҳолда тадбиркорлик фаолияти билан шуғулланаётган жисмоний шахслар (якка тартибдаги тадбиркорлар) фаолиятнинг лицензиялаётган айрим турларини амалга оширишини таъқиқлаб қўйиш ҳуқуқига эга. Қонуннинг 3-моддаси 1-қисми 1-бандида келтирилган таърифга кўра, лицензияловчи орган томонидан юридик ёки жисмоний шахсга берилган, лицензия талаблари ва шартларига сўзсиз риоя этилгани ҳолда фаолиятнинг лицензияланаётган турини амалга ошириш учун рухсатнома (ҳуқуқ) лицензия бўлиб ҳисобланади. Лицензияларни икки турга ажратиш мумкин: намунавий (оддий) ва якка тартибдаги (махсус) лицензиялар. Чекланмаган доирадаги юридик ва жисмоний шахсларга бериладиган лицензиялар намунавий лицензиялар турига киради. Юридик ва жисмоний шахсларга алоҳида талаблар ва шартлар асосида бериладиган, лицензиатларга фаолиятнинг мазкур турини амалга оширишда мутлақ ҳуқуқлар берувчи, миқдорий чекланган лицензиялар якка тартибдаги лицензиялар ҳисобланади. Айтиш керакки, якка тартибдаги лицензияларни бериш Ўзбекистон Республикаси Вазирлар Маҳкамаси томонидан белгиланган тартиб ва қоидалар асосида танлов (тендер) ўтказиш йўли билан амалга оширилади. Лицензия ҳар бир лицензияланадиган фаолият тури ёки унинг бир қисми (қисмлари) учун алоҳида берилиши мумкин. Лицензиядан фақат лицензияни олган юридик ёки жисмоний шахсгина фойдаланади. Лицензияни ёки унга доир ҳуқуқларини лицензиат бошқа шахсларга бериши тақиқланади. Агар лицензияда бошқача ҳол кўзда тутилган бўлмаса, у Ўзбекистон Республикаси ҳудуди бўйича амалда бўлади. Лицензия одатда лицензия даъвогарнинг аризасида сўралган муддатга берилади ва амал қилиш муддати чекланмайди. Қонун ҳужжатларида лицензиянинг амал қилиш муддати чекланиши мумкин, лекин бу муддат беш йилдан кам бўлмаслиги керак. Айрим ҳолларда лицензия даъвогарнинг хоҳишига ёки Ўзбекистон Республикаси Вазирлар Маҳкамаси кўрсатмасига кўра бу муддат камайтирилиши мумкин. Айтиш лозимки, Қонунда лицензиянинг амал қилиш муддати тугаганда, лицензиат лицензияловчи органга муддат тугашидан камида икки ой олдин ариза билан мурожаат

қилиши ва умумий тартибда лицензиянинг амал қилиш муддатини узайтириш тартиби назарда тутилган. Қонун ҳужжатларида, шунингдек фаолиятнинг айрим турларини лицензиялаш тўғрисидаги Низомларда фаолиятнинг лицензияланаётган турини амалга ошираётганда лицензиат томонидан бажарилиши мажбурий бўлган лицензия талаблари ва шартлари белгиланганки, улар лицензиатнинг қонунга риоя этиши шартлиги, лицензия даъвогарларига қўйиладиган махсус билим ва тегишли малакага эга бўлиши лозимлиги, фойдаланиладиган моддий-техника базаси, асбоб-ускуналар, техник воситалар ва бошқалар талабга жавоб бериши зарурлиги тўғрисидаги нормаларни ўз ичига олади. Лицензиат, яъни, фаолиятнинг лицензияланадиган турини амалга ошириш лицензияси бўлган юридик ёки жисмоний шахс бўлиш учун лицензия даъвогари лицензияловчи органга қуйидаги ҳужжатларни тақдим этиши керак: 1) лицензия бериш ҳақидаги ариза; 2) юридик шахслар учун – давлат рўйхатидан ўтказилганлиги тўғрисидаги гувоҳноманинг нотариал тасдиқланган нусхаси; жисмоний шахслар учун – якка тартибдаги тадбиркор сифатида давлат рўйхатидан ўтказилганлиги тўғрисидаги гувоҳноманинг нотариал тасдиқланган нусхаси; 3) аризани кўриб чиқиш учун лицензия даъвогари томонидан йиғим тўланганлигини тасдиқловчи ҳужжат; 4) фаолиятнинг айрим турига лицензия олиш учун қўйиладиган талаблар ва шартларни лицензия даъвогари бажаришга қодир эканлигини тасдиқловчи ҳамда қонун ҳужжатларида белгилаб қўйиладиган бошқа ҳужжатлар. Лицензияловчи орган ҳисоб варағига лицензия даъвогарининг аризасини кўриб чиққанлиги учун йиғим ундирилади. Йиғим миқдори ҳар бир лицензияланадиган фаолият тури бўйича Ўзбекистон Республикаси Вазирлар Маҳкамаси томонидан белгиланади. Бунда йиғимнинг энг кўп миқдори энг кам ойлик иш ҳақининг беш баробаридан ошиб кетмаслиги керак. Лицензияловчи орган лицензия даъвогарининг аризасини қабул қилиб олинган кундан эътиборан ўттиз кундан ошмаган муддат ичида намунавий лицензия бериш ёки беришни рад этиш тўғрисида қарор қабул қилиши ва тегишли қарор қабул қилинганлиги ҳақида лицензия даъвогарини уч кун ичида хабардор қилиши шарт. Лицензия бериш тўғрисида ёзма шаклдаги хабарномани олгандан кейин лицензия даъвогари уч ой муддат ичида давлат божини тўлаб, лицензия шартномасини имзолаган тақдирдагина лицензияни

олиши мумкин бўлади. Лицензия шартномаси лицензияловчи орган ва лицензиатнинг ўзаро ҳуқуқлари ва мажбуриятларини белгиловчи ҳужжат сифатида алоҳида ўрин тутади. Шартнома икки нусҳада ёзма шаклда тузилади. Агар ушбу муддат ичида лицензиат лицензия учун давлат божини тўламаса ёхуд давлат божи тўланганлигини тасдиқловчи ҳужжатни тақдим этмаса ёки лицензия шартномасини имзоламаган бўлса, лицензияловчи орган мазкур лицензияни бекор қилишга ҳақли. Лицензия беришни рад этиш ҳақидаги хабарнома ёзма шаклда рад этиш сабаблари, уларни бартараф этиш ва ҳужжатларни такроран кўриб чиқиш учун мумкин бўлган муддат кўрсатилган ҳолда лицензия даъвогарига юборилади. Лицензия даъвогари томонидан ҳужжатлар қайтадан тақдим қилинган тақдирда, лицензияловчи орган аризани аввалги тўланган йиғим ҳисобидан ўн кун муддат ичида кўриб чиқади. Лицензия беришни рад этиш ҳақидаги хабарномада кўрсатилган муддат ўтгач, қайтадан берилган ариза янгитдан берилган ариза деб ҳисобланади ва уни кўриб чиқиш учун қайтадан йиғим ундирилади. Лицензия беришни рад этишга Қонуннинг 17-моддасида санаб ўтилган асослар мавжуд бўлгандагина йўл қўйилади. Бошқа асосларга кўра, лицензия беришни рад этиш мумкин эмас. Акс ҳолда, лицензия даъвогари лицензияловчи органнинг лицензия беришни асоссиз рад этилганлиги ва ноқонуний хатти-ҳаракатлари устидан шикоят қилишга ҳақли. Лицензияларни расмийлаштириш Ўзбекистон Республикаси Вазирлар Маҳкамаси томонидан белгиланган лицензиялар бланкаларининг намуналари ва уларни тайёрлаш тартиби асосида амалга оширилади. Лицензиялар қатъи ҳисобот ҳужжати ҳисобланган, ҳисобга олиш сериясига, тартиб рақамига ва ҳимояланганлик даражасига эга бўлган бланкалардаа расмийлаштирилади. Юридик шахс бўлмиш лицензиат қайта тузилган, унинг номи ёки манзили ўзгарган тақдирда, шунингдек, жисмоний шахс бўлмиш лицензиат фамилияси, исми, отасини исми ёки турар жойи ўзгарган тақдирда, лицензияни қайта расмийлаштирилмагунча лицензиат унда кўрсатилган фаолият тури билан шуғулланишга ҳақли эмас. Лицензияловчи орган лицензиатдан лицензияни қайта расмийлаштириш тўғрисидаги аризани қабул қилиб олган кундан эътиборан беш кун ичида лицензиялар реестрига тегишли ўзгартиришлар киритиб, янги лицензия бериши лозим. Фаолиятнинг аниқ турлари учун лицензиялар реестри лицензияловчи органлар томонидан олиб борилади. Уларда қуйидагилар қайд қилинади: - лицензиатлар тўғрисида маълумотлар; - лицензияни беришга масъул лицензияловчи орган ҳақида маълумотлар;

- амалга ошириш учун лицензия берилган фаолият турлари; - лицензиянинг тартиб рақами ва бериш санаси; - лицензиянинг амал қилиш муддати; - лицензиянинг реестрда қайд этилганлиги тўғрисида маълумот, лицензия фаолиятини тўхтатиш ва қайта расмийлаштириш учун асос ҳамда амалга оширилган сана; - лицензияни бекор қилиш учун асослар ва сана; - бошқа маълумотлар. Қонунда лицензиянинг амал қилишини тўхтатиш ёки амал қилишини тугатиш лицензиянинг мавжудлигини тасдиқловчи ҳужжатни қайта расмийлаштириш тартиби ва асослари назарда тутилган. Лицензияловчи органлар қуйидаги ҳолатларда лицензиянинг амал қилишини тўхтатиб туриш ҳуқуқига эгадирлар: - лицензиат лицензия шартномасида назарда тутилган лицензия талаблари ва шартларини бузганлиги аниқланганда; - лицензияловчи органларнинг лицензиат зиммасига аниқланган қоидабузарликларни бартараф этиш мажбуриятини юкловчи қарорлари лицензиат томонидан бажарилмаганда; - лицензияни қайта расмийлаштириш учун зарур бўлган муддат давомида. Лицензияловчи орган лицензиянинг амал қилишини тўхтатиб туриш ҳақида чиқарган қарорида бундай ҳолатни бартараф этиш учун муддат белгилаши шарт бўлиб, кўрсатилган муддат олти ойдан ошиб кетмаслиги лозим. Лицензиянинг амал қилишини тўхтатиб туришга олиб келган ҳолатлар бартараф этилиши билан лицензияловчи орган ўн кун муддат ичида лицензиянинг амал қилишини тиклаш тўғрисида қарор қабул қилиши шарт. Лицензиянинг амал қилишини тугатиш қуйидаги ҳолларда амалга оширилади: - лицензиат ариза билан мурожаат қилганда; - юридик шахс тугатилганда;

- якка тартибдаги тадбиркорлик гувоҳномасининг амал қилиши тугатилганда; - якка тартибдаги тадбиркорнинг муомала лаёқати чекланганда ёки муомалага лаёқатсиз деб топилганда; - лицензиат лицензия талаблари ва шартларини мунтазам равишда ёки бир марта кўпол равишда бузганда; - лицензиат лицензиянинг амал қилишини тўхтатиб турган ҳолатларни кўрсатилган муддатда бартараф этмаганда; - лицензияловчи органнинг лицензия бериш тўғрисидаги қарорининг қонунга ҳилофлиги аниқланганда; - лицензиянинг амал қилиш муддати тугаганда. Лицензиянинг амал қилишини тугатиш суд қарорига биноан ҳам амалга оширилиши мумкин. Лицензиат лицензияловчи органнинг лицензиянинг амал қилишини тўхтатиб туриш ёки тугатиш тўғрисидаги қарори устидан судга шикоят қилишга ҳақли. Агар суд мазкур қарор юзасидан чиқарилган қарорни асоссиз деб топса, лицензияловчи орган лицензиатга етказилган зарар миқдорида жавоб беради. Маъмурий тартибда лицензияни қуйидаги ҳолларда бекор қилиш мумкин: - лицензия бериш ҳақида қарор қабул қилинган кундан эътиборан уч ой мобайнида лицензиат томонидан давлат божи тўланмаган ёки лицензия шартномаси имзоланмаганда; - лицензиат лицензияни бекор қилиш тўғрисида ариза берганида; - лицензия соҳта ҳужжатлардан фойдаланилган ҳолда олинганлиги факти аниқланганда. Бундан ташқари, лицензия суд тартибида ҳам бекор қилинади: - лицензия олиш учун тақдим этилган ҳужжатларда ноаниқ ва янглиш маълумотлар қайд этилганда;

- лицензиат лицензия талаблари ва шартларини бир мартадан ортиқ ёки кўпол равишда бузган тақдирда; - лицензия бериш ҳақида қарорнинг ноқонунийлиги фош этилган шароитда. Лицензияловчи орган ёки давлат ҳокимияти органи ўз ваколати доирасида ариза билан судга мурожаат қилиши мумкин. Судга мурожаат қилган вақтдан бошлаб лицензияловчи орган лицензиянинг амал қилишини тўхтатиш ҳуқуқига эга. Лицензиялаш шарт бўлган фаолият турини лицензиясиз ёки лицензия шартларига зид ҳолда амалга ошириш ҳуқуқбузарлик ҳисобланади. Агар бу фаолият фуқароларга, ташкилотларга ёки давлатга йирик ҳажмда моддий зарар етказса, жиноят саналиб Ўзбекистон Республикаси Жиноят кодексининг 190-моддаси билан жиноий иш қўзғатилишига асос бўлади. 6 §. Ишлаб чиқариладиган маҳсулот (иш, хизмат) таннархини шакллантиришни ҳуқуқий тартибга солиш. “Маҳсулот (иш, хизмат) ишлаб-чиқариш ва реализация қилиш юзасидан қилинадиган, маҳсулот (иш, хизмат) таннархига киритиладиган ҳаражатлар таркиби ва молиявий натижаларни шакллантириш тартиби тўғрисида”ги 1995 йил 27 январда қабул қилинган Низом ҳозирда тадбиркорлик соҳасида ишлаб чиқилаётган маҳсулот (иш, хизмат) таннархини шакллантириш жараёнини тартибга солувчи асосий норматив акт бўлиб ҳисобланади. Мазкур Низомга кўра, маҳсулот (иш, хизмат) таннархи маҳсулот (иш, хизмат) ишлаб чиқаришда фойдаланиладиган табиий ресурслар, хом ашё, материаллар, ёнилғи, энергия, асосий жамғармалар, меҳнат ресурслари, шунингдек, уни ишлаб чиқариш ва сотишда сарфланадиган ҳаражатларнинг қийматий баҳосини қамраб олади. Маҳсулот таннархини шакллантирадиган ҳаражатлар иқтисодий мазмунига кўра қуйидаги қисмлари бўйича гуруҳларга бўлинади: -материал харажатлар; -меҳнатга ҳақ тўлаш харажатлари; -ижтимоий манфаатлар учун ажратмалар ажратиш; - асосий жамғармаларни амортизациялаш;

-бошқа харажатлар. «Материал чиқимлар» қисмида муомаладаги жамғармаларнинг ишлаб чиқариш жараёнида сарфланадиган харажатлари ўз ифодасини топади. Булар асосан маҳсулот тайёрлаш, транспортировка қилиш ва сотиш жараёнида сарфланадиган материал ресурслар қийматидир. Улардан муҳими хом ашё ва материаллардан фойдаланиш ҳисобланади, негаки улар ишлаб чиқарилган маҳсулот сирасига киради ва унинг асосини шакллантиради ҳамда ишлаб чиқаришнинг зарурий қисмларини ташкил этади. Шунингдек, нормал технологик жараённи таъминлаш учун харид қилинадиган материаллар ёки ишлаб чиқариш ва хўжалик манфаатлари учун сарфланадиган бошқа маблағлар, бошқа ташкилотлар томонидан амалга ошириладиган иш ва хизмат кўрсатиш турлари, хусусан, транспорт хизмати, технологик мақсадлар учун фойдаланиладиган ёнилғининг барча турлари ва бошқа ресурслар шулар жумласиндандир. Асосий эътибор материал ресурсларнинг қийматини аниқлаш тартибига қаратилади. Уларнинг қиймати, ишлаб чиқариш баҳоси, (ҚҚС ҳисобисиз), нарх, қўшимча қиймат, комиссион мукофотлар, товар биржалари хизмат ҳақи, бунда брокерлик хизмати ҳам ҳисобга олинади, божхона солиқлари, транспорт хизмати учун ҳақ тўлаш, бошқа ташкилотлар томонидан маҳсулотларни сақлаш ва етказиб бериш ҳақлари асосида шаклланади. Материал ресурслар қийматига яна таралар учун кетган маблағлар ва тарани ўрашнинг фойдаланиш имконияти шундай ҳолатда ҳисобга олинадики, унга кўра бу ресурсларга жуда юқори нарх қўйилади. Маҳсулотнинг таннархини шакллантириш учун кетган маблағнинг қийматини аниқлашда материал ресурслар маблағидан қайтарилган чиқиндилар қиймати чиқариб ташланади. Шуни таъкидлаш лозимки, бу элементнинг таннархини ҳисоблаб чиқишда арзон нархга эга ва тез эскиришга мойил меҳнат воситалари ҳам эътиборга олиниши керак, бироқ улар асосий воситаларга кирмайди. Қонунчиликда материал чиқимлар қийматининг ҳисобга олиш тартибининг тўла ёритилиши бежиз эмас. Чунки мулкчилик шакли, ташкилий-ҳуқуқий шакли, фаолият туридан қатъи назар, тадбиркорларнинг бу чиқимлар қийматининг ягона ҳолга келишига эришиши жуда муҳимдир. Материал ресурслар орасида хўжалик юритувчи субъектларнинг табиий хом ашё учун ажратган маблағлари ҳисобга олинади. Бунга материал хом- ашё базаларини қайта ишлаш, ерни такрор культивация қилиш, сув учун тўлов, ўрмон жамғармасидан фойдаланганлик учун пул тўлови киради.

«Меҳнатга ҳақ тўлаш харажатлари» қисмида гуруҳланган маҳсулотлар таннархи, ўзининг иқтисодий моҳиятига кўра ишлаб чиқаришда иштирок этган ишчи кучи қийматини, яъни, нормал сифатга эришиш учун лозим бўлган ҳаётий воситаларнинг қийматини ифода этади. «Меҳнатга ҳақ тўлаш ҳаражатлари» қисмида ўз ифодасини топган тадбиркорларнинг чиқимларини шартли равишда қуйидагича таснифлаш мумкин: а) ҳақиқатда бажарилган иш учун тўланадиган тўловлар; б) рағбатлантирувчи характердаги тўловлар. Бу тўловлар ҳақ тўлашнинг асосий тизими ҳисобга олинмаган ҳолда, меҳнат шаклларини моддий рағбатлантириш сифатида меҳнат қонунчилигида белгиланган тарзда амалга оширилади; в) компенсация характеридаги тўловлар, масалан, ташкилот билан меҳнат муносабатида бўлган оналарга болани уч ёшгача парвариш қилиш таътилида тўланадиган тўловлар ёки амалдаги қонунга мувофиқ иш тартиби ва меҳнат шароити юзасидан тўланадиган тўловлар; г) кафолатланган характердаги тўловлар. Буларга жумладан, йиллар давомида хизмат кўрсатганлиги учун тўланадиган мукофот пули, навбатдаги ва қўшимча таътилларга тўланадиган ҳақ киради; д) корхона штатида турмайдиган ишчилар меҳнатига тўланадиган ҳақ, жумладан: -улар томонидан фуқаровий-ҳуқуқий характерда тузилган шартномадаги ишларни бажариши, агар ишчилар билан ҳисоб-китобни корхонанинг ўзи юргизса; -уларнинг бир маротабалик ишларини бажариши (инвентарни таъмирлаш, экспертиза ўтказиш ва бошқалар); -штатдан ташқари ишчиларга бериладиган гонорарлар (маъруза ўқиганлик учун, радио ва телевидениеда чиқишлар учун, таржималар учун ва бошқалар). Низом булардан қайсилари корхонанинг жорий йил учун меҳнатга ҳақ тўлаш харажатлари таннархига киритилишини, қайсилари даромад ҳисобидан амалга оширилишини аниқ белгилаб беради. Амалдаги қонунчиликда хўжалик юритувчи субъектларнинг бюджетдан ташқари ижтимоий жамғармаларга мажбурий маблағ ажратишлари кўриб

чиқилган. Низомга мувофиқ, бу маблағлар «ижтимоий манфаатлар учун маблағлар ажратиш» қисми сифатида маҳсулот таннархига киритилади. Бу қисмда давлат ижтимоий таъминот, нафақа жамғармаси, тиббий суғурта ва бандлик тўғрисидаги давлат жамғармаларига маблағ ўтказиш мажбуриятлари ўз ифодасини топган. Бадалларни ҳисоблаш ишчиларга меҳнат ҳақи тўлаш ҳаражатларидан келиб чиққан ҳолда амалга оширилади, бунда бу харажатлар («Меҳнатга ҳақ тўлаш харажатлари») қисмига (суғурта бадаллари олинмайди) мувофиқ маҳсулот таннархи таркибига киритилади. Суғурта бадаллари ҳисобланмайдиган меҳнатга ҳақ тўлаш турларини рўйхатга олиш ва суғурта бадаллари суммасини ҳисобга олиш тартиби тегишли йўриқномалар билан белгиланади. «Асосий жамғармаларни амортизациялаш» қисмида асосий ишлаб чиқариш жамғармаларини тўла қайта тиклаш, тезкор амортизацияни киритган ҳолда амортизацион ҳисоблаш миқдори ўз ифодасини топган. Бешта қисмдан охиргиси, яъни, «бошқа ҳаражат»ни Низомда табиатидан келиб чиққан ҳолда турли кўринишдаги иқтисодий моҳиятга эга харажатлар сифатида баҳолаб, корхонага маҳсулот (иш, хизмат) таннархига уларни юклаш йўли билан молиялаштиришни амалга ошириш ҳуқуқи берилди. Бу қисмга киритилган харажатлар рўйхати бир чизиқда эмас, чунки, бундай ҳисобга олиш амалий режанинг ноқулайлигини келтириб чиқаради. «Бошқа чиқимлар» қисмига масалан, ихтиро учун мукофотлар, кредит олишда фоиз тўлаш харажатлари, маҳсулотни мажбурий сертификация қилиш ишларига ҳақ тўлаш, хизмат сафарига ажратиладиган маблағлар, ёнғиндан сақлаш ва ҳуқуқни ҳимоя қилиш органлари, кадрларни тайёрлаш ва қайта тайёрлаш учун ҳақ тўлаш, алоқа ва ҳисоблаш марказлари хизмати учун ҳақ тўлаш ва бошқа харажатларни амортизация қилишлар киради. Таҳлил этилаётган қисмга, шунингдек солиқлар, йиғимлар, махсус бюджетдан ташқари жамғармалар ҳисобига ажратмалар киради. Амалдаги қонунчиликка мувофиқ маҳсулотнинг таннархига қуйидагилар ҳам киради: ер солиғи, транспорт солиғи, йўл жамғармалари ташкил этишда манбаи бўлиб хизмат қиладиган солиқлар, герб йиғими, давлат божи, табиий муҳитга зарарли чиқиндиларни ташлаганлик учун тўловлар, (ушбу тўловлар табиатдан фойдаланувчилар ихтиёрида қоладиган фойда ҳисобидан қопланади). Эътиборни шунга қаратиш муҳимки, таннарх таркибига хўжалик фаолиятига тўғридан-тўғри боғлиқ бўлган бевосита ҳаражатлар билан бирга билвосита ҳаражатлар ҳам киритилади.

Солиққа тортиш мақсадида ишлаб чиқариш ташкилотининг харажатлари белгиланган тартибда тасдиқланган лимит, норма ва нормативларни ҳисобга олган ҳолда текширилади. Масалан, хизмат сафари чиқимлари учун харажат нормалари, кадрларни тайёрлаш ва қайта тайёрлаш, тақдим этилган чиқимларнинг чегараланган миқдори, шахсий енгил автомобилларнинг хизмат сафари учун компенсация тўлаш нормалари, йилига бир марта реклама қилишнинг чегараланган ҳисоб-китоблари учун нормативлар мавжуд. 7 . Молиявий натижани шакллантиришни ҳуқуқий тартибга солиш. Молиявий натижани шакллантириш тартиби Ўзбекистон Республикаси Солиқ кодексининг II-III бўлимлари, «Маҳсулот (иш, хизмат) ишлаб чиқариш ва реализация қилиш юзасидан қилинадиган, маҳсулот (иш, хизмат) таннархига киритиладиган ҳаражатлар таркиби ва молиявий натижаларни шакллантириш тартиби тўғрисида»ги Низом ҳақида «Бухгалтерлик ҳисоби бўйича ташкилотлар даромади ва харажати тўғрисида»ги Низомлар билан тартибга солинади. Якуний молиявий натижа (кирим ёки чиқим) ташкилот фаолиятининг оддий турлари, тадбирлар юзасидан кетадиган харажатлар миқдорига камайтирилиши операцион ва амалга оширилмаган (фойдаланилмаган) даромадлардан ташкил топади. Хизмат кўрсатиш, иш бажариш билан маблағлар маҳсулот ва товар сотишдан тушган тушум фаолият оддий турларининг даромади ҳисобланади, маблағлар ҳажми ташкилот ва харидор (буюртмачи) ўртасида тузилган шартномада белгиланади, агар ижара шартномаси бўйича бўлса, ташкилот активидан фойдаланувчи томонидан аниқланади. Агар маҳсулот нархи шартномада қайд этилмаган бўлса ва шартнома талабларидан келиб чиққан ҳолда ҳақ белгилаш имкони бўлмаса, унда ташкилот мутаносиблик асосида тушган маблағнинг ўхшаш маҳсулотлар (товар, иш, хизмат, кўрсатиш)га қиёслаш орқали маблағ ҳажмини аниқлайди. Агар мажбуриятни амалга ошириш пулсиз воситалар билан белгиланса, унда маблағлар ҳажми ташкилот томонидан олинган ёки олиниши лозим бўлган товар (қимматбаҳо қоғозлар) қиймати бўйича бухгалтерия ҳисобига қабул қилинади. Маҳсулот тайёрлаш, товар харид қилиш ва сотиш, иш бажариш, хизмат кўрсатиш билан боғлиқ харажатлар фаолиятининг оддий турлари бўйича харажатлар ҳисобланади. Бунга хом ашё, материал, товар, бошқа моддий ишлаб чиқариш билан боғлиқ харажатлар, таъмирлаш, қайта ишлаш ва сотиш жараёнида юзага келадиган харажатлар, тижорат ва бошқарув харажатлари

киради. Фаолиятнинг оддий туридан ташкилотнинг молиявий натижасини шакллантириш учун товар, иш, хизмат кўрсатишнинг таннархи аниқланади. Операцион даромадлар қаторига асосий воситалар ва бошқа активларни сотиш билан боғлиқ даромадлар, ташкилотнинг ҳамкорликдаги фаолиятидан олинадиган фойда, фойдаланиш учун берилган пул маблағлари фоизи ва бошқалар киради. Асосий воситалар ва бошқа активларнинг чиқарилиши, турли бошқа ташкилотларнинг устав сармояларида иштирок этиши билан боғлиқ ҳаражатлар, шунингдек кредит берувчи ташкилотлар томонидан кўрсатилган хизмати эвазига тўланган ҳақ операцион харажатлар ҳисобланади. Фойдаланилмаган даромадлар таркибига қарздор томонидан тан олинган ёки қарздор зиммасига юклатилган жарималар, пеня, неустойка ва хўжалик шартномалари талабларини бузганлик учун қўлланиладиган санкциянинг бошқа турлари, текинга олинган активлар, ҳисобот жорий йилда аниқланган ўтган йил фойдаси, ташкилотнинг келтирган зарарини қоплаш учун зарур маблағ ва бошқалар киради. Фойдаланилмаган харажатга суд харажатлари, хўжалик шартномаларини бузганлик учун жарималар пеня, неустойка, қўшимча солиқлар, етказилган зарар учун харажатлар, шубҳали қарзлар суммаси, дебиторлик қарзини ҳисобдан чиқаришдаги харажатлар, ёнғин, авария, табиий офатлар ва бошқа фавқулодда вазиятлар, экстремал шароитлар, етказилган зарарлар суд қарори билан аниқланмаган ўғрилик чиқимлари киради. Хўжалик юритувчи субъектларнинг ҳисоблаб чиқилган даромадлари солиқ тўлашда солиққа тортиш манбаи ҳисобланади. Шунинг билан бирга, турли солиқ турларини тўлаш учун объектни аниқлашнинг махсус қоидалари ҳам мавжуд. Ташкилотнинг солиқ тўлангандан сўнг қоладиган даромади хўжалик манфаатлари учун қонунга мувофиқ ёки муассислик ҳужжатлари асосида жамғармалар тузиш, шунингдек, бошқа мақсадларда ишлатилиши мумкин. Масалан, даромад ҳисобига истеъмол жамғармасини очиш мумкин. Ташкилот ҳисобидаги даромад хўжалик юритувчи субъектнинг давлат олдидаги мулкий масъулиятидан фойдаланишнинг манбаи ҳисобланади. 8 §. Атроф-табиий муҳитни муҳофаза қилишнинг ҳуқуқий асослари. Ишлаб чиқаришнинг зарарли оқибатларини олдини олиш имкон қадар камайтириш давлат олдида турган асосий вазифалардан биридир. Бу соҳада

ҳам қонунчилик фаолиятининг мақсади ҳуқуқбузарликларни олдини олиш ва ҳуқуқларни бузилишдан ҳимоя қилиш сари йўналтирилган. Экологик қонунчилик талабларини иккига: умумий (барча тадбиркорларга тааллуқли) ва махсус (табиатан фойдаланиш турига боғлиқ ҳолда) турларга ажратиш мумкин. Умумий талаблар Ўзбекистон Республикасининг «Табиатни муҳофаза қилиш тўғрисида»ги Қонунида акс эттирилган. Қонунда барча тадбиркорлар риоя қилиши лозим бўлган табиатни муҳофаза қилиш принциплари белгилаб берилган. Асосий принципларга қуйидагилар киради: - инсон саломатлиги ва ҳаёти муҳофазасининг устуворлиги; - жамиятнинг иқтисодий ва экологик манфаатларининг илмий асосланган бирлиги; - табиий ресурслардан тўғри фойдаланиш; - табиатни муҳофаза қилишга қаратилган қонунларга риоя қилиш; - қонунбузганлик учун жавобгарликнинг муқаррарлиги; - фаолиятда ошкоралик, халқаро ҳамкорлик. Табиатни муҳофаза қилишнинг умумий талаблари ишлаб чиқаришнинг барча босқичларида: жойлаштириш, лойиҳалаштириш, фойдаланишга топшириш ва объектлардан фойдаланишда амалга оширилади. Демак, техник-иқтисодий асосланганликда илмий-техник тараққиётнинг ҳозирги даражаси ва атроф-муҳитга салбий таъсир қилувчи мураккабликларни инобатга олиш, атроф-муҳитнинг зарарли чиқиндилар билан ифлосланишини бартараф этиш учун огоҳлантиришнинг ишончли ва мақбул чораларни кўриб чиқиш, уларни зарарсизлантириш ва утилизация қилиш, ресурсларни сақлаб қолувчи, кам чиқинди чиқарадиган ва чиқиндисиз технология ва ишлаб чиқаришни жорий этиш, табиий ресурслардан тўғри фойдаланиш ва қайта ишлаб чиқариш, атроф-муҳитни соғломлаштириш ҳисобга олиниши лозим. Қурилиш ўрнини аниқлаш, хўжалик фаолиятининг экологик талабларга мувофиқлигини белгилаш, фойдаланишга рухсат бериш экологик экспертиза ўтказиш йўли билан амалга оширилади. Экологик экспертиза соҳасидаги муносабатлар Ўзбекистон Республикаси «Экологик экспертиза тўғрисида»ги Қонуни билан тартибга солинади. Экологик экспертизада режалаштирилаётган ҳар қандай фаолиятнинг эҳтимол тутилган экологик хавфлилик презумпцияси, экологик хавфсизлик талабларини ҳисобга олишнинг мажбурийлиги, холислик, қонунийлик, асослилик ўз ваколатларини амалга оширишда ва атроф табиий муҳитга ва фуқаро

соғлиғига таъсирини баҳолашнинг комплекслилиги принципларига асосланади. Экологик экспертиза давлат ва жамоат, шунингдек экологик аудит тарзида амалга оширилади. Давлат экологик экспертизаси амалдаги Қонуннинг 2- моддасида белгиланган объектларда мажбурий тартибда амалга оширилади. Барча тарзда экспертиза ўтказилгандан сўнг текширув натижасига кўра хулоса чиқарилади. Хўжалик фаолиятининг объектнинг табиий муҳитига таъсири ўрганиб чиқилгач, давлат экологик экспертизаси объектидан фойдаланиш мумкинлиги ёки мумкин эмаслиги тўғрисидаги якунлари давлат экологик экспертиза хулосаси ҳисобланади. Салбий маънодаги хулосанинг ҳуқуқий натижаси бундай фаолиятни таъқиқлаш билан якунланади, масалан, шартномалар тузиш бекор қилинади. Мажбурий экологик экспертиза ўтказиш талабларига риоя қилмаслик халқаро шартнома лойҳасини ҳақиқий эмас деб ҳисоблаш учун асос бўлади. Экспертиза хулосаси буюртмачига ва шунга мувофиқ амалга ошишини назорат қилиш учун атроф табиий муҳитни муҳофаза қилиш соҳасида махсус ваколатга эга ташкилотга юборилади. Давлат экологик экспертизаси салбий хулоса чиқарган ҳолатда буюртмачи хулосада қайд этилган камчиликларни қайта ишлаган ҳолда материалларни такрорий экспертизага бериш ҳуқуқига эга. Давлат экспертиза комиссиясининг хулосасига эътироз суд тартибида ҳам амалга оширилиши мумкин. Объектни фойдаланишга топширишда ҳам экологик қонунчилик талабларига риоя этиш шарт. Зарарли чиқиндиларни йиғиш ва ташлаш, чиқиндиларни кўмиб ташлаш рухсат асосида амалга оширилади, бунда чиқиндиларни йиғиш ва ташлаш доирасига рухсат нормативлари белгиланади. Ўзбекистон Республикаси Вазирлар Маҳкамаси тўловни аниқлаш тартиби ва атроф муҳитни ифлослантиришнинг мувофиқлаштирилган миқдори, чиқиндиларни жойлаштириш, зарарли таъсирининг бошқа турлари учун тўловларни тасдиқлайди. Белгиланган лимитлар доирасидаги табиий муҳитни ифлослантириш учун тўлов ишлаб чиқариш таннархига киради. Лимитдан ташқари даромад, ташкилот ихтиёрида қолади. Чиқинди чиқариш тўғрисида расмийлаштирилган рухсатнома мавжуд эмаслиги ташкилотни тўловдан озод қилмайди. Бундай ҳолатда ифлослантиришнинг бутун ҳажми лимитдан ташқари ҳисобланади. Табиатдан фойдаланувчилар учун махсус мажбуриятлар мавжуд. Ўзбекистон Республикаси «Табиатни муҳофаза қилиш тўғрисида»ги Қонунида табиатдан комплекс фойдаланиш ҳақида шартнома тузиш лозимлиги белгиланган. Табиатдан комплекс фойдаланиш – бу турли табиий ресурсларни ишлатиш ва табиатдан фойдаланувчи томонидан табиатнинг муайян ҳудудига таъсир ўтказиш ҳисобланади. Тавсия этилаётган хўжалик

фаолияти тўғрисида табиадан комплекс фойдаланиш шартномаси экологик экспертиза хулосаси ва лицензияси (рухсатномаси)га асосан табиатдан фойдаланувчи ва давлат ваколатли органи ўртасида тузилади. Шартнома табиий ресурслардан фойдаланиш шартлари ва тартиби, табиий ресурслардан фойдаланиш учун тўлов миқдори, томонлар масъулияти, зарарни бартараф этиш, келишмовчиликларни ҳал қилиш каби масалаларни ўзида акс эттиради. Табиатдан фойдаланиш пулли мақсадли ҳисобланади. Табиатдан фойдаланиш тўлови табиий ресурслардан фойдаланганлик атроф табий муҳитни ифлослантирганлик, ишлаб чиқариш чиқиндиларини жойлаштирганлик учун жорий этилади. Бундан ташқари, тадбиркорлар бюджетдан ташқари экологик жамғармаларга маблағ ажратишга мажбурдирлар. Махсус ваколатга эга давлат органлари томонидан бериладиган лицензияда (рухсатномада) табиий ресурслардан фойдаланувчи хўжалик фаолиятининг тури, ҳажми ва лимити, уларга қўйиладиган экологик талаблар, объектлардан фойдаланишда бу талабларга риоя қилмаслик оқибатлари кўрсатилади. Табиатдан фойдаланиш тўғрисидаги маълумотни тадбиркорлар экологик мониторинг ўтказувчи ташкилотга тақдим этиши лозим, хўжалик юритувчи субъектлар экологик ҳуқуқбузарлик оқибатида келиб чиққан зарарларни бартараф этишлари шарт. Зарарни қоплаш пул тўлаш йўли билан амалга оширилиши мумкин. Табиатдаги зарар ўрнини тўлдириш фақат икки томоннинг розилиги бўлсагина, амалга оширилади. Агар тарафлар келишмовчилиги натижасида низо келиб чиқса, у суд тартибида кўриб чиқилади. Бунда суд ўз қарорида табиий муҳитни асл холига келтиришнинг аниқ чора-тадбирлари ва муддатини белгилаши лозим. Тадбиркор табиий муҳитга етказган зарари ўрнини тўла қоплаши керак. Йўқотишларнинг ҳажмини белгилаш учун экспертиза тайинланиши мумкин. Бир неча ташкилотлар томонидан зарар етказилганда (лойиҳада камчиликлар, биноларни тозалаш билан боғлиқ қурилиш ишларини сифатсиз бажарилиши) суд ҳар бир ташкилотга тегишли зарарни қоплаш ҳажмини белгилаб беради. Атроф-табиий муҳитни муҳофаза қилиш соҳасида тадбиркорларга қўйиладиган талаблар табиатнинг муайян бир туридан фойдаланиш билан боғлиқ равишда амалга оширилади: ердан фойдаланиш, сувдан фойдаланиш, ер ости қазилмаларидан фойдаланиш, ўрмондан фойдаланиш ва бошқалар. Бу талаблар Ўзбекистон Республикасининг «Ўсимлик дунёсини муҳофаза қилиш ва ундан фойдаланиш тўғрисида»ги, «Ҳайвонот дунёсини муҳофаза қилиш ва ундан фойдаланиш тўғрисида»ги Қонунлари, Ер кодекси ва бошқа экологик қонун ҳужжатларида белгиланган. Тадбиркорларнинг хўжалик юритиш фаолияти давомида юзага келадиган ишлаб чиқариш ва истеъмол чиқиндилари айланишининг давлат

томонидан тартибга солиниши муҳим аҳамиятга эга. Чиқиндилар айланиши билан боғлиқ муносабатларни тартибга солишдан мақсад, инсон саломатлиги ва табиий чиқиндиларнинг зарарли таъсиридан сақлашдан иборатдир. Бундан ташқари, чиқиндиларни хўжалик фойдасига хом ашёнинг қўшимча манбаи сифатида жалб қилиш ҳозирги давр талабига тўлиқ жавоб беради. Ишлаб чиқариш ва истеъмол чиқиндилари – бу хом ашё қолдиқлари, материал, полуфабрикат ва бошқа ашё ҳамда маҳсулотлар йиғиндиларидан иборат бўлиб, улар ишлаб чиқариш ёки фойдаланиш жараёнида юзага келади. Чиқиндилар айланиши – бу чиқиндилар юзага келадиган жараён билан боғлиқ фаолият бўлиб, у ўз ичига чиқиндиларни тўплаш, фойдаланиш, зарарсизлантириш, транспортда ташиш ва жойлаштириш билан боғлиқ муносабатларни қамраб олади. Тадбиркорлик фаолиятини амалга ошириш ва хўжалик юритиш жараёнида чиқинди айланиши соҳасидаги талабларни бажармаслик қонунларга риоя қилмаслик маъмурий, фуқаролик-ҳуқуқий ва жиноий жавогарликни келтириб чиқаради. Тадбиркорлар томонидан санитария ва гигиена талаблари таъминланишининг ҳуқуқий асослари. Аҳолининг санитария-эпидемиологик саломатлигини таъминлаш мақсадида давлат тадбиркорлик фаолияти субъектлари учун санитария қоидалари ва эпидемиологик нормативлар соҳасида кўплаб талаблар қўяди. Санитария эпидемиологик саломатлик – бу ижтимоий соғломлик ва яшаш муҳитининг шундай ҳолатики, унда инсон организмига хавфли ва зарарли одимлар бўлмайди ва инсон ҳаёти учун яхши шароит мавжуд бўлади. Ана шу маънода яшаш муҳити омилларини хавфсизлантириш ва зарарсизлантириш мезонлари ҳамда шундай хавфсизликни таъминлаш чоралари, тадбиркорларнинг ишлаб чиқаришда, ташишда, хом ашёларини сотишда, истеъмол моллари, хорижий давлатлардан маҳсулот харид қилишда, аҳолини хўжалик моллари билан таъминлашда, радиоактив моддалар билан боғлиқ фаолиятни амалга оширишда риоя қиладиган махсус санитария қоидалари ва нормативлари белгиланиши муҳим аҳамият касб этади. Ўзбекистон Республикасининг «Ветеринария тўғрисида»ги Қонуни мезонларини ҳаётга татбиқ этиш аҳолининг санитария-эпидемиологик саломатлиги муваффақиятларига ҳуқуқий асос бўлиб хизмат қилади. Амалдаги Қонунга мувофиқ, чорва эгалари ва чорвачилик маҳсулотларини ишлаб чиқарувчилари қуйидагиларни амалга оширишга:

- чорва кассалликларидан огоҳлантириш ва чорвачилик маҳсулотларининг ветиринар-гигиена муносабатлари хавфсизлигини таъминлаш мақсадида хўжалик ва ветеринар тадбирларни амалга оширишга, чорвачилик маҳсулотларини қайта ишлаш ҳамда ем-озуқаларни сақлаш учун чорвачиликка мўлжалланган бино ва иншоотларни яхши ҳолатда сақлашга, чорва чиқиндиларининг табиий муҳитни ифлослантиришга йўл қўймасликка; - чорвачилик маҳсулотларини қайта ишлаш, сақлаш ва сотиш, чорва молларини боқишга мўлжалланган жой, қурилиш, объектларда зоогигиеник, ветеринар-санитария талабларига риоя қилишга; - ветеринария соҳасидаги мутахассисларнинг талабларига биноан чорва молларини текшириш учун тақдим этишга, тўсатдан содир бўлган ёки бир пайтда чорванинг оммавий касалликка чалиниши, шунингдек, уларнинг ғалати аҳволи тўғрисида тезда хабар беришга, ветеринария соҳасидаги мутахассислар келгунга қадар касалликка чалинишда гумон қилинган чорва молларини ажратиб олиш чораларини кўришга; - чорва молларини ташиш ва жўнатишда, чорвачилик маҳсулотларини қайта ишлаш, сақлаш ва сотишда белгиланган санитария- гигиена талабларига риоя этиш, ветеринария-санитария текшируви ўтказиш учун мутахассисни таклиф этишга; - ветеринария соҳасидаги мутахассиснинг чорва касалликлари профилактикаси ва унинг олдини олиш чоралари юзасидан берган топшириқларини бажаришга мажбурдирлар. Ветеринария назорати давлат ваколатли органлари томонидан амалга оширилади. 9 §. Ёнғин хавфсизлигини таъминлаш соҳасида тадбиркорларга қўйиладиган ҳуқуқий талаблар. Тадбиркорларнинг ёнғин хавфсизлиги талабларига риоя қилиш мажбуриятлари «Ёнғин хавфсизлиги тўғрисида»ги Қонунда баён этилган бўлиб, унга мувофиқ модда, материал, маҳсулот ва асбоб-ускуна ишлаб чиқарувчилар (етказиб берувчилар) техник ҳужжатларда бу маҳсулотларнинг ёнғин хавфсизлиги кўрсаткичларини шунингдек, бу маҳсулотлардан фойдаланишда ёнғин хавфсизлиги чораларини қайд этишлари шарт. Бундан ташқари, ёнғин хавфсизлиги бўйича тадбиркорлар зиммасига қуйидаги мажбуриятлар юклатилган:

- ёнғин хавфсизлиги талабларига қатъи риоя қилиш; - ёнғинга қарши ҳимоя воситаси ва тизимини тайёр ҳолатда асраш (сақлаш); - содир бўлган ёнғинни ўчиришда ёнғиндан сақлаш органи билан ҳамкорлик қилиш, ёнғинни келиб чиқиш сабаб ва шароитларини аниқлаш ҳамда олдини олиш; - ёнғин хавфсизлиги мансабдор шахсларининг бино, иншоот ва ташкилотнинг бошқа объектларига киришлари учун имконият яратиш, уларнинг талабларига мувофиқ ташкилотда ёнғин хавфсизлиги ҳолати бўйича ҳужжат ва маълумотларни тақдим этиш; - ёнғин юзага келганда тезда ёнғин хавфсизлиги идорасига мурожаат қилиш. Тадбиркорлар ёнғин хавфсизлиги тартибини бузган шароитда маъмурий ва жиноий жавобгарликка тортиладилар.

Похожие

Mаҳсулот, бажарилган иш, кўрсатилган хизмат сифатининг давлат томонидан тартибга солиниши

Товарлар, ишлар ва хизматларга баҳоларнинг ўрнатилиши ва қўлланилишининг давлат томонидан тартибга солиниши

Қишлоқ хўжалигини давлат томонидан тартибга солиш

Тадбиркорлик фаолиятининг субъектлари

Ўзбекистонда никоҳ муносабатларининг ҳуқуқий тартибга солиниши