Иктисодий ва социал географиянинг асосий принциплари. Худудийлик ва комплекслик - География - Рефераты

Иктисодий ва социал географиянинг асосий принциплари. Худудийлик ва комплекслик

Загружено в:

20.09.2019

Скачано:

0

Размер:

62.5 KB

Иқтисодий ва социал географиянинг асосий принциплари: ҳудудийлик ва комплекслик Режа : 1. Иқтисодий географияда ҳудудийлик 2. Ҳудуднинг иқтисодий ва социал географиядаги аҳамияти. 3. Географияда комплекс ва комплекс ёндошув. 4. Ҳудудийлик ва комплекснинг фойдаланиш меъзони.

Албатта, ҳар қандай фаннинг предмети, таърифи унинг асосий тамойилларини ўзида акс эттириши шарт. Чунки ўзининг методологияси ва методи, мактаби ва йўналиши, тадқиқот предмети ва принципларига эга бўлмаган фан мустақил фан ҳисоблана олмайди. Хўш, география ва шу жумладан, ижтимоий географиянинг бош тамойиллари нималардан иборат? Фикримизча, бу ерда турли даражадаги асослар мавжуд, уларнинг айримлари фақат шу фанга тегишли бўлса, қолганлари умумилмий, фалсафий аҳамиятга эга. Шубҳасиз, география фанининг энг биринчи тамойили унинг ҳудудийлигидир. Зеро, географияни ҳудудий муносабатларсиз, макон тушунчасисиз тасаввур этиб бўлмайди. Аммо, шу билан бирга, ҳудудга ўзига хос борлиқ сифатида турлича ёндашилади. Масалан, муҳандислик (ерсозлик) ҳамда район планировкасида кўпроқ ҳудудни ташкил этишга эътибор берилади. Бунда ер майдонининг ўзи маълум мақсадлар учун тайёрланади. Жумладан, уни барча инфраструктура шахобчалари билан жиҳозланган ҳолда саноатчилар учун ижарага бериш ёки сотиш мумкин. Ижтимоий географияда анъанавий тарзда «ҳудудий ташкил этиш» ибораси қўлланилиб, у одатда мазмун ва шакллари бўйиа ишлаб чиқариш кучларини жойлаштиришга яқинроқ туради. Шу билан бирга оддий жойлаштиришдан фарқ қилиб, ишлаб чиқаришни, аҳоли ёки хўжалик тармоқларини ҳудудий ташкил этиш айни пайтда уни муайян мақсадга йўналтирилиши ва энг муҳими- бошқарилишини ҳам ўз ичига олади-ки, бу ушбу тушунчанинг илмийроқ ва амалийроқлигидан дарак беради. Бу ерда тизим (система) қоидасига мувофиқ маълум бир воқеликни ташкил этиш аваламбор уни бошқариш ниятида амалга оширилади. Маълумки, географлар нигоҳида ҳудуд қиёфаси ўзининг барча мавжудоти билан гавдаланади ва бир қарашда у тўла қамраб олинади. Бироқ, кўриб турилган ҳудудда ундаги бор элементлар(йўл, дарахт, ўй, кишилар, транспорт ва ҳоказо) якка-якка ёки аксарият ҳолда муайян ҳудудиий

бирликда бўлади. Шу жиҳатдан қараганда ижтимоий географиянинг тадқиқот объектига кирувчи барча предметлар турли ҳудудий мажмуа шаклини ташкил этади. Чунончи, қишлоқ хўжалиги тармоқлари - экинзорлар ва чорвачилик яйловлари, рекреация манзилгоҳлари, ўрмонзорлар ва бошқалар ареал (майдон) кўринишига эга. Саноат марказлари ва аҳоли пунктлар нуқта ёки тугун, транспорт йўллари, гидрографик шахобчалар эса тасмасимон (чизиқсимон) шаклида кўзга ташланади ва ҳудди шу тарзда харитада тасвирланадди. Бу ўринда бир сўз билан айтиш мумкинки, ижтимоий география ана шу майдон, чизиқ ва нуқталарнинг жойлашуви, уларнинг ўзаро ва ташқи муҳит билан ҳудудий муносабатларини ўрганади. Бундан ташқари, ишлаб чиқаришни ташкил этишнинг ҳудудий шакли сифатида ҳудудий ишлаб чиқариш мажмуалари (комплекслари, саноат тугунлари ва районларни), аҳолининг бундай ташкил этиш шаклларига эса турли тип ёки йирикликдаги қишлоқ ва катта-кичик шаҳарлар, шаҳар агломерациялари, конурбация ва мегалополисларни кўрсатиш ўринли. Транспортда транспорт тугунлари, аҳолига хизмат кўрсатиш географиясида- маиший комбинатлар ёки фан географиясидаги ҳудудий илмий тадқиқот мажмуалари ҳам ушбу соҳаларнинг ҳудудий ташкил этиш шаклларига киради. Ҳудуд миқёсида ҳар хил катталик ва йўналишдаги муҳит вужудга келади. Жумладан, анча кенг бўлган иқтисодий ва мулкчиликнинг турли шакллари мавжуд бўлган рақобат муҳити, социал-иқтисодий ва нисбатан торроқ доирадаги социал муҳитни ажратиш мумкин. Муҳитларнинг ушбу кўринишлари билан шунга мос рвишда ижтимоий географиянинг асосий қисмлари: иқтисодий, социал-иқтисодий ҳамда социал география шуғулланади(Солиев, 1995). География фанининг иккинчи бир муҳим тамойили комплексдир. Бироқ, бу ерда комплекс ишлаб чиқаришнинг ижтимоий ёки ҳудудий ташкил этиш шаклини эмас, балки масалага, фан объекти ва предметига ёндашув маъносини англатади. Айни пайтда комплекслик география фани учун

алоҳида усул (метод) ҳам эмас, аксинча, у фаннинг принципларидан бири бўлиб, унинг ўзига хос ва туб моҳиятини ифодалайди. Шу билан бирга, баъзан «комплекс географик(ёки иқтисодий географик) тадқиқот» ибораси ишлатилади-ки, назаримизда, бу ҳам ортиқча ёки хатоликдир. Чунки, географик тадқиқот ҳамма вақт комплекс бўлади, бусиз у ўз моҳиятидан ажралиб қолади. Экологик ёндашув асосида ҳам комплекслик ётади ва бу уни географик дунёқарашга жуда ёқинлаштиради. Айрим ҳолларда «мажмуали географик тадқиқот» ҳам дейишади. Бу ҳам унча тўғри бўлмаса керак. Комплекслик ўрганилаётган объектга атрофлича ёндашув, уни алоқадорликда кўришни тақозо этади. Шу маънода у тизимли (системали) қарашга ҳам ёқинлашади. Аммо бу тамойилдан тўғри ва оқилона фойдалана олиш лозим. Акс ҳолда тадқиқот натижаси «ҳар соҳадан бир шингил», саёз, юзаки ва қуруқ бўлиб, баъзан ўзи нимани ўрганилиши кераклиги ҳам сезилмай қолинади. Бинобарин, ушбу тамойил моҳиятини мисли дарахт шаклида тасаввур қилмоқ зарур: дарахт танаси ўрганилаётган асосий ҳодиса бўлса, унинг шох ва шохчалари шу муаммо билан бевосита алоқадор масалалар мажмуасидир. Бунда дарахт танаси ўта йўғонлашиб, шох- шаббасиз ва, аксинча, шохлар катталашиб, унинг танаси кўринмай қолмаслиги керак. Биринчи ҳолда комплексликнинг ўзи бўлмайди, иккинчисида эса ҳаддан ташқари масаладан четга чиқиб кетиш аёндир. Масалан, боғдорчилик географиясида темир йўл транспорти ёки аҳолининг туғилишини чуқур ўрганиш асло талаб қилинмайди. Ҳудди шундай ҳудудийлик тамойилининг ҳам нозик жиҳатлари мавжуд. Бу ерда биз тадқиқот объекти-ҳудудни жуда катталашиб кетмаслигини назарда тутмоқдамиз. Чунки, бундай ҳолда ҳам тадқиқот натижаси юзаки, умуртқасиз бўлиб қолади. Биз шу пайтгача катта ҳудудни «кичрайтириб» ўргандик. Энди эса бунинг акси, кичик жойни катталаштириб, йирик масштабли тадқиқотларни ўтказиш муҳим илмий ва амалий аҳамият касб этади. Дарвоқе, ривожланган

хорижий мамлмкатлар (АҚШ, Япония, Германия ва бошқалар) тажрибаси айнан шундан далолат беради. Бу мамлакатларда, биздан фарқли ўлароқ, асосан микроиқтисодий, микрогеографик ёндашув устувор туради. Эҳтимол, шунинг учун бўлса керак-тадқиқотлар аниқ, пухта ва амалий жиҳатдан юқори бўлади. Тўғри, тадқиқот объекти сифатида каттароқ ҳудудни ҳам олиш мумкин. Лекин бундай ҳолда ҳудуднинг барча қисмини эмас, аксинча, муҳим муаммоларини унинг айрим ва турли нуқталари мисолида чуқурроқ таҳлил қилиш ва шу негизда ўрганилаётган объект ва унга ўхшаш жойларга хос бўлган умумий қонуниятларни асослаб бериш талабга мувофиқдир (рус тилида бундай ёндашувни метод ключей ёки метод глубокого бурения деб ҳам айтишади). Шундай қилиб, ҳудудийлик ва комплекслик география фани учун ўта зарур. Бироқ улар ўз меъёрида бўлиши керак. Бошқача қилиб айтганда, ушбу ёндашувлар ҳамма вақт аниқлик билан бирга олиб борилиши тўғрироқ бўлади. Профессор Э.Б.Алаев аниқликни (конкретликни) географиянинг алоҳида тамойили сифатида кўрсатади. Биз эса уни юқоридаги икки асосий тамойилнинг умумий махражи, мезони ёки «икки плюс бир» шаклида кўришни истар эдик. Сабаби, муаммо қанча кенг ва чуқур, маълум бир мақсад доирасида атрофлича, ҳар тарафлама ва айни пайтда аниқ таҳлил этилса, унинг хулосалари ҳамма вақт юқори бўлади. Комплекслилик система ғоясига ўхшаш. Аммо ўхшашлик айнан бир хиллик эмас. Комплексликда асосий урғу муаммони атрофлича ўрганиш тилаб этилса, системали ёндашувда у ички ва ташқи жиҳатдан, ўзаро алоқадорликда поғонасимон шаклда таҳлил этилади. Комплексликда объект «энига», системада «бўйига» кўриладики, биринчисида асосий мезон кенглик бўлса, иккинчисида чуқурликдир. Албатта, география фани учун системадан кўра комплекс яқинроқ ва анъанавийроқдир. Чунки, географиянинг ўзи комплекс ва комплекслар ҳақидаги фандир. Бинобарин, комплексга комплекс ёндошув шарт ва зарур. Аммо, юқорида таъкидлаганимиздек, комплексликнинг чегараси бўлиши

талаб этилади. Гап шундаки, география ҳудудлар, чегаралар тўғрисидаги фан бўлсада, баъзан унинг ўзини ҳад-ҳудуди, чегараси йўқ; айрим ҳолларда улар размерсиз фанга айланиб қолади-ки, бу албатта ижобий эмас. Шу боис, географиянинг аосий касбий касалликларидан бири бўлмиш аниқсизликка қарши курашиш керак. Бинобарин, системада амалийлик янада юқорироқ, зеро, ҳар қандай система бошқарув билан боғлиқ, бошқарув эса кўрилаётган объектнинг ташкил қилинишини, тик (вертикал) ва горизонтал, ички ва ташқи алоқаларни назарда тутади. Комплексликда энг муҳими масалани (муаммони) тўғри ва аниқ чегаралаш, ва тадқиқот доирасини белгилаш бўлса, системада –бирламчи элементни аниқлашдир. Чунки, комплекс ғоясида таркиб унча аҳамиятли эмас, система эса ҳамма вақт ўзининг ички тузилишига, таркибига, турли босқичдаги «системаларга» бўлинади ва фақат бирламчи элемент бундай хусусиятга эга бўлмайди. Шундай қилиб, иқтисодий ва социал географияда, ҳудудийлик, комплекс ва тизим (система) принцип ёки умумметодологик асосларга тўғри риоя қилиш ҳам муҳим назарий-амалий муаммолар сирасига киради.

Адабиётлар : 1.Бабурин В.Л., Мазуров Ю.Л, Географические основы управления. М, 2000 2.Голубчик М.М., Евдокимов С.П., Максимов, Г.И., История географии- (Смоленск, 1998) 3.Григорьев А.Г. География в современном мире.-М, Просвеҳение, 1999. 4.Каримов И. Ўзбекистон ХХ I аср бўсағасида: хавфсизликка таҳдид, барқарорлик шароитлари ва тараққиёт кафолатлари. –Т:Ўзбекистон, 1997. 5.Машбиц Я.Г. Основы страноведения.-М: Просведение, 1999. 6.Максаковский В.П. Историческая география мира.-М., 1999. 7.Прохоров Б.Б. Прикладная антропоэкология.-М., 1998. 8.Ратанова М.П. Экологические основы обҳественного производства.- Смоленск, 1999 9.Саушкин Ю.Г. Экономическая география: теория, методы, практика.- М:Мысль,1978. 10.Солиев А., Маллабоев Т. Иқтисодий ва социал географияда айрим қонуниятларни ўрганиш методикаси. -Т.,1988. 11.Солиев А. Иқтисодий ва ижтимоий географиянинг долзарб масалалари.- Т., 1995. 12.Солиев А. Маҳамадалиев Р.Й. Иқтисодий география асослари.-Т., 1996 13.Солиев А., Каршибоева Л. Иқтисодий географиянинг назарий ва амалий масалалари.-Т.,1999. 14.Шаригин М.Д. Основные проблемы экономической и социальной географии.-Пермь,1997. 15. г.ф.д., проф. Солиев А.С доц . Жумахонов Ш . Иктисодий ва социал география. Маъруза матни 16. WWW.ZiyoNet.uz

Похожие

Иктисодий ва социал географиянинг хозирги замон мазмуни

Узбекистонда иктисодий ва социал географи фанининг ривожланиши

Иктисодий географияда тарихийлик, экологик ёндашув ва демоцентрик принцип

Иқтисодий географиянинг предмети, объекти, йўналишлари ва вазифалари

Инженерлик географиянинг назарий ва амалий жихатларини урганилиши