Иктисодий географияда тарихийлик, экологик ёндашув ва демоцентрик принцип - География - Рефераты

Иктисодий географияда тарихийлик, экологик ёндашув ва демоцентрик принцип

Загружено в:

20.09.2019

Скачано:

0

Размер:

74 KB

Иқтисодий географияда тарихийлик, экологик ёндашув ва демоцентрик принцип Режа: 1. Тарихийлик ёндошув ва географияда тарихий метод. 2. География тарихи ва тарихий география. 3. Экологик ва географик ёндашув. 4. Демоцентрик принцип.

Географиянинг икки асосий тамойили-ҳудудийлик ва мажмуалиликдан сўнг тарихийлик туради. Бу принцип макон ва замон, замину замон бирлигидан келиб чиқади. Зеро, ҳар қандай ҳодиса маълум бир вақтда ва муайян бир жойда содир бўлади. Шунинг учун географияга тарих керак. Сабаби-ҳозирги мавжуд воқелик ўз-ўзича, бирданига вужудга келмаган. Бинобарин, бу воқелик қачон ва қандай шароитда пайдо бўлган ва у қандай ривожланиш босқичларини босиб ўтган-буларнинг ҳаммасини ҳозирги борлиқдан келиб чиққан ҳолда аниқлаб олмасдан туриб асосий масалани ҳал этиб бўлмайди. Фақат ўтмишни таҳлил этиш орқали ҳозиргини баҳолаб бўлади, бу эса ўз навбатида келажакни, истиқболни илмий башорат этишга йўл очади. Тарихийлик тамойилининг муҳимлигини Н.Н.Баранский ҳам таъкидлаган. Бу олим: «Мамлакат ва районлар иқтисодий таърифини шундай берингки, у оёғи билан ерга–геология, геоморфология ва тупроқ-шуносликка, танаси билан тарих орқали ўтиши (биз чиздик – А. С.), боши билан эса сиёсат ва мафкурага таяниши, тақалиши керак», деб ўқтирган эди. Кўриниб турибдики, тарихийлик иқтисодий географик таъриф ва тавсифнинг асосий қисмини ташкил этади. Айтиш лозимки, географияга қанчалик тарих керак бўлса, тарих учун ҳам география шунчалик зарур. Бироқ география тарихга, тарих эса географига айланмасин. Шу боис географияда тарихий ёндашув ўтмишнинг барча майда-чуйдасини эмас, балки ҳозирги ҳолатнинг юзага келишида айнан қайси тарихий воқеа ва босқичлар сабаб бўлганини аниқлаши етарлидир. Масалан, агар республикамиз пойтахти Тошкент шаҳрини иқтисодий географик таърифламоқчи бўлсак, унинг илк бор вужудга келганидан кейин, сўнгги муҳим тарихий воқеалар инобатга олинса кифоя. Улар: ўтган асрнинг иккинчи ярмида (1865 й.) Туркистоннинг Россия томонидан босиб олиниши ва Тошкентнинг Туркистон генерал губернатор- лигининг пойтахти вазифасини бажариши, 1917 йил «Социалистик инқилоб» йили, 1924 йил Ўрта Осиё республикаларининг ташкил этилиши, 1930 йил

Ўзбекистон республикаси пойтахтининг Самарқанддан Тошкентга кўчирилиши, Иккинчи жаҳон уруши йиллари, 1966 йил Тошкентда ер қимирлаши ва, ниҳоят, 1991 йил Ўзбекистоннинг мустақилликка эришган йили. Ана шу бурилиш ёки тарихий воқеалар бугунги Тошкентга, унинг ҳудуди, хўжалиги ва аҳолиси, шаҳар қурилишига озми-кўпми ўз таъсирини ўтказган, из қолдирган. қолган оралиқ воқеалар эса бизга айни пайтда унча зарур эмас. Бинобарин, уларни тарих фани учун қолдириш керак. Географияда тарихийлик тамойили тарихий географиянинг ўрнини олмаслиги лозим. Бу ерда тарихий ёндашув ўрганилаётган ҳодисанинг ўтмишига қисқача сафар қилинишини англатади, тарихий география эса ўтмишнинг алоҳида поғоналарида табиат ва, хусусан, хўжалик тармоқлари, аҳоли ва бошқалар қай даражада ривожланган ва қандай жойлашган каби масалаларни таҳлил этади ёки кўз ўнгимизда гавдалантиради. Шу билан бирга, тарихийлик географиянинг тарихи ҳам эмас. Чунки географиянинг тарихи деганда сўз кўпроқ географик кашфиётлар тўғрисида боради. Шундай қилиб, тарихийлик тамойили, тарихий география ва география тарихидан фарқ қилади, у бу ерда қўйилган мақсадга тўлароқ қандай эришиш асосларидан бирини ифодалайди, ўтмишга бугунги кун нуқтаи назаридан эмас, балки унга ўша давр ва муҳитдан келиб чиқиб баҳо бериш, мавжуд воқеликка тарихий қарашни талаб этади. Аслини олганда, тарихсиз география ( географиясиз тарих) бўлмайди. Демак, улар бир-бирларини тўлдиради. Аммо уларни алоҳида-алоҳида қараш ҳам нотўғридир. Чунончи, немис олими А.Геттнер географияда тарихийликни инкор этган, у хронологияни рад этиб, хорологияни тан олган. Бу жиҳатдан у немис олими, файласуф И.Кант ғояларига асосланган. Албатта, бундай бир томонламалик ножоиздир. Ҳатто анъана бўлиб қолган «ишлаб чиқариш кучларнинг ривожланиши ва жойланиши» ибораси ҳам бу иккиликнинг чамбарчас боғлиқлигини билдиради. Бу ерда агар ривожланиш тарих бўлса, жойланиш география демакдир. Ҳар қандай ривожланиш

маълум бир ҳудуд доирасида амалга ошади, жойлашув эса ривожланишнинг ҳудуддаги аксидан бошқа нарса эмас. География фанининг тамойилларидан яна бири экологик ёндашувдир. Экология ўзининг туб моҳиятига кўра организмларнинг ички, ўзаро ва ташқи муҳит билан алоқадорлигини англатади. У бу жиҳатдан географик дунёқарашнинг мазмунига ҳам анча мос келади. Сабаби географияда барча воқеа ва ҳодисалар ўзаро ҳамда ташқи муҳит билан ҳудудий муносабатда кўрилади. Шу боис, экология маълум маънода географияга жуда яқиндир. Шунинг учун бўлса керак, баъзи олимлар бу икки тушунчани маънодош сифатида ишлатганлар. Масалан, чикаголик Х.Бэрроуз «Инсон экологияси ёҳуд география» номли мақоласини (1923 й) ёзган эди. Дарҳақиқат, географиядаги комплекслик тамойили экологик дунёқарашга ўхшаб кетади. Аммо географик дунёқараш экологик ёндошувга кўра кексароқ ва мазмунан бойроқдир. Сабаби, атроф-муҳит масалалари, унинг мусаффолиги ва аҳоли саломатлигига таъсири географияда ҳали экология вужудга келмаган вақтда ҳам мавжуд эди. Маълумки, географиянинг бош фалсафий масаласи табиат ва инсон (жамият) мунасабатларидир. Табиатнинг жамият ривожланишига таъсири классик бўлса, жамият, ишлаб чиқаришнинг табиатга, атроф-муҳитга таъсири ҳозирги замон экологиясидир. Демак, ҳар иккисида ҳам ўзаро уйғунликда қараш, мушоҳада юритиш талаб этилади. Бироқ, экологик принцип айни пайтда фақат алоқадорликни эмас, балки пастдан юқорига томон, занжирсимон боғлиқликни, асосан инсон атрофидаги муносабатларни назарда тутади. Чунончи, иқтисодий ва социал географияда ишлаб чиқаришни ва ривожлантириш, хом ашёни қазиб олиш, уни қайта ишлаш, тайёр маҳсулот яратишга қадар бўлган жараёнга экология ҳамроҳ бўлади; у айниқса ушбу жараённинг бош ва сўнгги ва (охирги) нуқталари, яъни табиатдан хом ашёни олиш ва тайёр маҳсулотни яратишда кўпроқ эътиборга моликдир.

Айнан шу мазмунда қараганда, экологик тамойилга Н.Н. Колосовскийнинг энергия ишлаб чиқариш цикллари ва И. В. Комарнинг ресурс цикллари тўғрисидаги ғоялари жуда қўл келади. Чунки, бу ғоялар заминида ишлаб чиқариш жараёнининг аввалги ва охирги нуқтасигача «бошдан оёқ» экологик ёндашув ётади. Экологик тамойил, айниқса ишлаб чиқаришни ижтимоий ва ҳудудий ташкил этиш шакллари, хусусан, мужассамлашув билан уйғунлашиб кетади. Масалан, қанча ишлаб чиқариш мужассамлашуви юқори бўлса (корхона йирик ёки корхоналар мажмуи бир жойда кўп бўлса), экологик вазият, одатда, бунинг акси бўлади. Демак, бу ерда «ривожланган» тушунчаси кўп ҳолларда экологик носоғлом маъноси билан ёнма-ён туради. Бир неча мисоллар келтирайлик: Бошқирдистон пойтахти Уфа шаҳрининг ўзида 3 та йирик нефтни қайта ишлаш заводлари мавжуд; Украинанинг Мариуполь (Жданов) шаҳрида ёки Россиянинг Новокузнецк шаҳрида ҳам 3 тадан металлургия корхоналари ишлаб турибди. Бу жиҳатдан айтиш мумкинки, ушбу шаҳарлар ривожланган йирик саноат марказлари ҳисобланади. Лекин, айни пайтда бу шаҳарларнинг бир неча минглаб аҳолиси экологик ночор аҳволда бўлиши ҳам аёндир. Худди шундай, ўзимизнинг Чирчиқ шаҳарини олайлик. У ўлкамиздаги дастлабки «социалистик шаҳар», чинакам саноат марказига айланган эди. Ўттизинчи йиллардан бошлаб бу ерда турли йирик саноат корхоналари бирин-кетин қурилган эди. Айниқса, бу ерда кимё заводлари кўпроқ жой олди. Устига-устак Чирчиқдан, собиқ СССРда «энг йирик» капролактам корхонаси ҳам жой олди. Шундай қилиб, бу шаҳар республиканинг йирик индустриал марказига, ривожланган районига айлантирилди. Аммо, шу билан бирга, бу ерда яшайдиган 150 минглик аҳоли учун экологик муҳит ҳам бузилди. Афсуски, юзага келган ночор экологик вазияти фақатгина Чирчиқнигина эмас, балки у билан деярли туташиб кетган қарийб 2,5 миллионли азим шаҳар – Тошкент аҳволига ҳам салбий таъсир кўрсатади.

Агар биз Чирчиқ саноат марказининг географик жойлашганлигини, пойтахт Тошкент ва унинг агломерациясига сувнинг ҳам, ҳавонинг ҳам Чирчиқ томонидан (тоғ минтақасидан) келишини эътиборга олсак, у ҳолда географик кўрликнинг, ҳудудий саводсизлик ёки маданиятсизликнинг гувоҳи бўламиз. Демак, экологик тамойил ҳам география учун ўта муҳимдир. Бироқ у асло ишлаб чиқариш кучларини ривожлантиришга қарши турмайди. Аксинча, бу ерда жойлаштириш масалаларини кўпроқ барча омил ва шароитларни атрофлича инобатга олган ҳолда «етти ўлчаб бир кес» маносида, географик экспертиза асосида амалга ошириш ҳамда замонавий, чиқиндисиз, экология нуқтаи назаридан мақбул ва тоза технологияни жорий қилишни ҳисобга олиб ҳал этиш лозим. Шубҳасиз, мустақил мамлакат, унинг мустаҳкам миллий иқтисодиёти учун барча саноат тармоқлари, шу жумладан, кимё, металлургия ва бошқа корхоналар ҳам зарур. Аммо улар мумкин қадар тўғри ва ҳозирги замон технологияси билан жойлаштирилиши лозим. Шу билан бирга экологик масалалар фақат саноат географиясидагина эмас, балки улар қишлоқ хўжалик, аҳоли ва шаҳарлар, транспорт, рекреация, тиббиёт географияси каби йўналишларни ўрганишда ҳам асосий ўринда туриши керак. Бошқача қилиб ақтганда, географик дунёқараш экологик фикрлаши билан сингдирилмоғи шарт. Бинобарин, ҳудудийлик, комплекслик ва экологик тамойиллар асло бир-бирига зид бўлмай, аксинча, ёнма-ён туришлари талаб этилади (руслар бу ўринда «не вместо, а вместе» дейишади.) Ижтимоий географиянинг яна бир принципи демоцентризм ёки антропоцентризмдир. Чунки, барча ҳудудий иқтисодий муносабатлар асосида энг аввало инсон-моддий ва маънавий бойликларни яратувчиси ва айни пайтда уларнинг истеъмолчиси жой олади. қолаверса, тарих, жамият тарихи ҳам инсонсиз бўлмайди. Бундан ташқари, даставвал соф табиий маънога эга бўлган экология тушунчаси ҳам индустириялаштириш ва урбанизация туфайли социал ёки инсон экологиясига айланмоқда.

Н. Н. Баранский инсонсиз географияга бор вужуди билан қарши ва «Инсонни унутибсиз!» деб хитоб қилар эди. Чиндан ҳам ижтимоий ишлаб чиқариш жараёнининг марказида инсон туради. Бироқ, инсон аввалгидек, фақат ишлаб чиқариш кучи, унинг субъекти, ишчи кучи бўлмай, балки у ўз номи билан Буюк Инсондир. Шунинг учун инсон табиати, биогеографияси, яшаш тарзи, урф-одати каби соф ижтимоий масалаларнинг ҳудудий жиҳатлари ҳам ўрганилиши лозим. Ишлаб чиқариш кучларини жойлаштиришда, илмий-техника тарққиёти ва бошқаларда инсон омили, унинг талаб ва эҳтиёжи, дунёқараши муҳим ўрин тутади. Шу нуқтаи назардан демоцентрик тамойил ишлаб чиқаришни ҳудудий ташкил этишда эътиборга олиниши билан бир қаторда инсоннинг ўзи ҳам ўрганилиши аҳамиятдан холи эмас. Чунончи, унинг ўқиши, дам олиши, даволанишига ўхшаш бевосита ишлаб чиқариш жараёнидан ташқарида ётган ва киши яшаши билан боғлиқ барча масалалар социология, этнография, психология фанлари қиррасида тадқиқ этилиши керак. Шундай қилиб, ҳудудийлик, комплекслик, тарихийлик, экология ҳамда демоцентрик ёндашувлар ижтимоий географиянинг мустақиллиги ва мустаҳкамлигини, барқарор ва қатъийлигини таъминлайди. Шу билан бирга бу асосий принциплар алоҳида-алоҳида эмас, балки биргаликда кучли, таъсирчан бўлади. Улар ушбу фанни ижтимоийлаштириш, сиёсийлаштириш, иқтисодийлаштириш ва маҳалийлаштириш каби йўналишлар ёрдамида амалиётга татбиқ этилса, у янада самаралироқ натижа беради. Барча фанларда бўлганидек, география,шу жумладан, ижтимоий географияда дифференциация (турланиш) жараёни кетмоқда. Шу боис, мамлакатимизда жаҳоннинг илғор давлатларидаги бой тажрибалар, янги илмий йўналишлар ҳам жорий этилса, бўлажак ёш мутахассислар замон талаби даражасида тайёрланган бўлади. География фанининг яна бир ажойиб ва бетакрор имтиёзи бор. Бу ҳам бўлса унинг интеграцион салоҳиятининг кучлилигидир. қамрови кенг бўлган география жуда кўп фанлар билан «қўшничилик» қилади ва туташ мавқега

эга. Улар жумласига тарих, биология, геология, социология, демография, иқтисодиёт, экология, психология, ҳуқуқшунослик, шаҳарсозлик, тиббиёт ва бошқалар киради. Демак, география бу фанлар билан алоқада ва унинг кучи ҳам ана шунда. Бошқача қилиб айтганда, география учун турли фанлар қиррасида янги-янги йўналишлар ва ютуқларга эришиш имконияти мавжуд. Чунки география фани барча фанлар тизимида қулай «географик ўринга» эга, у марказда (махражда) ва шунинг учун қолган фанларнинг кўпчилиги истаса- истамаса географияга тўқнашади.

А Д А Б И Ё Т Л А Р 1. Бабурин В.Л., Мазуров Ю.Л, Географические основы управления. М, 2000 2. Голубчик М.М., Евдокимов С.П., Максимов, Г.И., История географии- (Смоленск, 1998) 3. Григорьев А.Г. География в современном мире.-М, Просвеҳение, 1999. 4. Каримов И. Ўзбекистон ХХ I аср бўсағасида: хавфсизликка таҳдид, барқарорлик шароитлари ва тараққиёт кафолатлари. –Т:Ўзбекистон, 1997. 5. Машбиц Я.Г. Основы страноведения.-М: Просведение, 1999. 6. Максаковский В.П. Историческая география мира.-М., 1999. 7. Прохоров Б.Б. Прикладная антропоэкология.-М., 1998. 8. Ратанова М.П. Экологические основы обҳественного производства.- Смоленск, 1999 9. Саушкин Ю.Г. Экономическая география: теория, методы, практика.- М:Мысль,1978. 10. Солиев А., Маллабоев Т. Иқтисодий ва социал географияда айрим қонуниятларни ўрганиш методикаси. -Т.,1988. 11. Солиев А. Иқтисодий ва ижтимоий географиянинг долзарб масалалари.- Т., 1995. 12. Солиев А. Маҳамадалиев Р.Й. Иқтисодий география асослари.-Т., 1996 13. Солиев А., Каршибоева Л. Иқтисодий географиянинг назарий ва амалий масалалари.-Т.,1999. 14. Шаригин М.Д. Основные проблемы экономической и социальной географии.-Пермь,1997. 15. г.ф.д., проф. Солиев А.С доц. Жумахонов Ш. Иктисодий ва социал география. Маъруза матни 16. WWW.ZiyoNet.uz

Похожие

Иктисодий ва социал географиянинг асосий принциплари. Худудийлик ва комплекслик

Ахолининг географик урганилиши

Кичик худудларни иктисодий географик урганишнинг назарий - услубий асослари

Xалк хужалигининг иктисодий потенциали иктисодий ва ижтимоий прогнозлашнинг базаси

Демографик жараёнлар ва ижтимоий - иктисодий муаммолар Урта Осиё Республкиалари материаллари асосида