Geosiyosiy va siyosiy geografik tadqiqotlar - География - Рефераты

Geosiyosiy va siyosiy geografik tadqiqotlar

Загружено в:

20.09.2019

Скачано:

0

Размер:

99 KB

Geosiyosiy va siyosiy geografik tadqiqotlar O`zbekiston Respublikasining mustaqillikka erishuvi mamlakatda demokratik jamiyatni qurish va boshqa jiddiy o`zgarishlar siyosiy tadqiqotlarni ham dolzarb qilib qo`ydi. Bunday izlanishlar, eng avvalo, iqtisodiy masalalar bilan uzviy aloqadorlikda olib borilishi kerak. Zero, har qanday siyosat, ayniqsa, «siyosiy siyosat» iqtisodiyotning davomidir. Binobarin, siyosiy geografiya iqtisodiy geografiya bilan chambarchas bog`liq va ular birgalikda yagona ijtimoiy geografiya fani tizimiga kiradi. Siyosiy geografiya mamlakatning jahon hamjamiyatida, dunyo siyosiy xaritasida tutgan o`rni, siyosiy kuch va markazlarning hududiy tarkibi, davlat tuzumi va uning ma`muriy – hududiy bo`linishi kabi muammolarni o`rganadi. Uning asosiy vazifasi jamiyat siyosiy hayotining tashkil etilishi (ustqurmasi), siyosiy va ma`muriy chegaralarning shakli va xarakteri, mamlakatlararo hududiy – siyosiy va harbiy uyushmalarning vujudga kelishi va rivojlanishini tadqiq qilishdan iboratdir. Chunonchi, Yevropa kengashi, YeXXK, Birlashgan arab mamlakatlar ligasi, Birlashgan Afrika Ittifoqi, Markaziy Osiyo davlatlari, Mustaqil davlatlar hamdo`stligi, NATO, S Е LTO, S Е NTO kabilar siyosiy geografiyaning tadqiqot ob`ekti bo`lib xizmat qilishi mumkin. Alohida mamlakatlarning halqaro munosabatlari, ularning geosiyosiy va ichki hayoti ko`p jihatdan bunday davlatlar hududining tarixiy shakllanishi, etnik va geografik xususiyatlarga bog`liq. Bu borada, ayniqsa, mamlakat hududining yagona va mustahkam geosiyosiy tizim sifatida yaxlitligi, poytaxt va boshqa siyosiy markazlarning joylashuvi katta ahamiyatga ega. Siyosiy geografik tadqiqotlarda davlatlarning ana shunday jihatlariga ham e`tibor beriladi. Siyosiy geografiya bilan bevosita harbiy geografiya bog`liq. Chunki har qanday urush – yurishlar mamlakatlar siyosatidan kelib chiqadi. Siyosat esa iqtisodning davomidir. Faqat kamdan – kam hollarda urushlar noiqtisodiy masalalarni qo`zg`aydi (masalan, boshqa halqlarni u yoki bu dinga kiritish). Aksariyat sharoitda esa

mamlakatlararo harbiy to`qnashuvlar iqtisodiy manfaatlar chegarani o`zgartirish zamirida yuzaga keladi. Harbiy geografiya to`g`risidagi maxsus fan ko`pgina universitetlarda o`qitilgan edi. Harbiy geografiyada faqatgina iqtisodiy va sotsial geografiya masalalari emas, balki tabiiy geografik ma`lumotlarga ham (iqlim, yer usti tuzilishi, gidrografiya va h.k.) ahamiyat beriladi. Shu bilan birga, davlatlar aholisi va shaharlarning joylanishi, qazilma boyliklari va iqtisodiy salohiyati, asosiy markazlarning geostrategik holati va boshqalar o`rganiladi, yirik masshtabli maxsus topografik kartalardan foydalaniladi. Harbiy qo`shinlarni joylashtirishda o`sha joyning meteorologik xususiyatlari inobatga olinadi. Masalan, quruq cho`l iqlimiga va ochiq musaffo osmonga ega bo`lgan AQSHning Arizona shtatida ushbu mamlakatning asosiy aviabazalari (havo qo`shinlari) joylashtirilgan. Rel`efi murakkab, tepalik va do`ngliklardan iborat joylarda tank harakatlari qiyinlashadi va ayni paytda, bunday sharoitda o`zini mudofaa qilish imkoniyatlari kengroq bo`ladi va h.k. Amir Temur ham o`zining harbiy siyosatida joyning – jang maydonining tabiiy geografik sharoitlariga katta e`tibor bergan. CHunonchi, u jang maydoni suvning yaqinligi, joyning tekis va keng bo`lishi, quyosh nurining tik tushishiga o`xshash tabiiy omillarni hisobga olgan holda harakat qilgan va doimo g`alabaga erishar ekan. Harbiy geografiyada shaharlar va yirik markazlarga mamlakatning bosh shahri – poytaxtiga katta e`tibor beriladi. Chunki ular har qanday davlatning geosiyosiy tayanch nuqtalari, ustunlari hisoblanadi. Shu nuqtai nazardan ikkinchi jahon urushida nemis qo`shinlarining Stalingradni egallab olishga jon – jahdlari bilan urinishlari bejiz emas edi. Zero, bu shaharlarning geostrategik mavqei nihoyatda muhim – u Volga daryosi bo`yida, O`rta Osiyo va Qozog`istondan keladigan oziq – ovqat, kiyim – kechak hamda Ozarbayjondan keltiriladigan neft yo`lining kesishgan nuqtasida o`rnashgan. Bu esa harbiy jihatdan katta ma`noga ega edi. Xuddi shunday Belorussiya yoki Smolenskdagi shiddatli janglarni eslatish mumkin (ular mamlakat poytaxti – Moskva yo`lida, ostonalarida joylashgan).

Ta`kidlash lozimki, ilgari siyosiy geografiya bizda bunday nufuz va e`tiborga ega emas edi. Sababi, sobiq Ittifoqda bir Partiyalik va faqat kommunistik g`oya ustun turardi. Shu bois, mamlakatlar siyosiy geografiyasini o`rganishda, asosan, ularning tuzumi, poytaxti, yetakchi partiyalari va chegaralari to`g`risida qisqa axborot berilar edi, xolos. Hozirgi kunda esa siyosiy geografiya va geosiyosatga doir masalalar chuqur va atroflicha tahlil qilinmog`i lozim. Tarixan siyosiy geografiya va geosiyosat bir – biri bilan bog`liq holda vujudga kelgan. Siyosiy geografiyaning vatani Germaniya bo`lgan, bu to`g`risidagi dastlabki kitobni («Siyosiy geografiya») nemis olimi F.F.Rattsel 1897 yilda nashr ettirgan. Ayni paytda u antropogeografiya yo`nalishini ham asoschisi bo`lgan. Albatta, F.Rattselning ushbu g`oyasi o`z – o`zidan paydo bo`lmagan. U avvalambor, o`zining vatandoshlari – I.Kantning (1724 – 1804 y) «Antropologiya»si, K.Ritter, A.Gettner va boshqalarning ilmiy ishlarini chuqur o`rgangan. Mohiyatan siyosiy geografik qarashlarning ildizi o`ta reaktsion ruhda targ`ib qilingan determinizm yo`nalishiga borib taqaladi. Ushbu g`oya va fikrlar avvalroq Frantsiyada – asosan Sh.Monteske (XVIII asr) tomonidan yaratilgan. Keyinchalik Xuddi shunga o`xshash yo`nalish – invayronmentalizm AQSHda E.Xentington (XX asr) faoliyatida shakllangan va rivojlangan. Bu olim ham jamiyat rivojlanishida tabiiy geografik sharoit, xususan, iqlim rolini nihoyatda bo`rttirib yuborgan. Ba`zi ma`lumotlarga qaraganda, o`zimizning vatandoshimiz Beruniy Yevropa olimlaridan bir necha yuz yillar oldin geografik determinizm ma`nosidagi fikrlarni bildirgan va bu muammoga, umuman olganda, u to`g`ri yondashgan. Xo`sh geografik determinizm nima? U chindan ham g`ayriilmiy, yomon g`oyami? Yo`k, albatta. Afsuski, ko`pchilikda bu atama darhol unga nisbatan salbiy his tug`diradi. Aslida esa mutlaqo bunday emas va bu yuksak ilmiy ahamiyatga ega bo`lgan geografik determinizmga nisbatan adolatsizlik va nohaq munosabatdir. Har qanday determinizm («dete» - belgilash, aniqlash) ilmiy dunyoqarashning muhim uslubi bo`lib, bunda sabab – oqibat, hodisa va voqeliklar

o`rtasidagi aloqadorlik tushuniladi. Shu nuqtai nazardan geografik determinizm jamiyat, ishlab chiqarish kuchlarining rivojlanishiga va xatto kishilarning yurish – turishiga, kayfiyat va xarakteriga, yashash tarziga, geografik omillarning – rel`ef, iqlim, geografik o`rin va hokazolarning ta`sirini bildiradi. Chindan ham, bu omillarning ahamiyatini butunlay inkor etib bo`lmaydi va ular bizning hoxishimizdan qat`iy nazar, haqiqatda mavjuddir (Soliev 1995 y). Yo`l qo`yilgan tarixiy xatolik shundan iboratki, ushbu omilga, ayniqsa, geografik o`rin va iqlimga hal qiluvchi, jamiyat va mamlakatlar, shaxsning rivojlanishida birdan – bir asosiy kuch sifatida qaralgan. Natijada geografik determinizm tushunchasi barchada noto`g`ri xulosa qodirgan. Endi esa unga nisbatan haqiqat tiklanishi kerak. Demak, geografik determinizm (shuningdek, tarixiy determinizm, demografik determinizm va h.k.) bu ob`ektiv borliqdir. Faqat unga to`g`ri baho berish lozim. Binobarin, ushbu omilni bo`rttirib ham (geografik fatalizm, vulgar geografizm) va undan batamom voz kechish ham (geografik nigelizm) nojoizdir. Geografik determinizmning siyosiy geografiya va siyosat bilan singdirilishi, uyg`unlashuvi geosiyosatni («geopolitika») vujudga keltirdi. Ushbu yo`nilashdagi dastlabki «ko`prikni» F.Rattsel yaratdi. Uning aynan deterministik g`oyalarga asoslangan antropogeografiyasi shved huquqshunos va sotsiologi Yuxan Chellenga birinchm marta «geopolitika» tushunchasini qo`llashga sababchi bo`ldi. U 1910 yilda «Buyuk mamlakatlar» («Velikie derjavi») to`g`risidagi kitobni yozdi va shunisi muhimki, o`sha paytlardayoq Yevropaning markazi sifatida Germaniya talqin qilingan edi. U o`zining bu va boshqa asarlarida davlatning ham bamisoli odamdek, tirik organizmdek yashashi, mamlakat hududining (yashash muhitning) kengayib turishi to`g`risidagi tajovuzkor fikrlarni oldinga surdi. Qizig`i shundaki, hozirgi kunda ham u shbu geosiyosiy qarash ma`lum darajada saqlanib qolmoqda. Masalan, Germaniya kantsleri G.Kol bir vaqtlar «Men Germaniyani (SHarqiy va g`arbiy Germaniyani) birlashtirdim, Germaniya esa Yevropani birlashtirishi kerak», deb aytgan edi. Bu o`rinda eslatib o`tami, birinchi jahon urushi ham, ikkinchi jahon urushi ham asosan Germaniyadan chiqqan yoki ularga ana shu mamlakat bosh sababchisi bo`lgan. 1944 yilda

geosiyosat tushunchasi amerikalik Spikman «geostrategiya» so`zi balmashtiradiki, bu mohiyatdan harbiy geografik mazmunga egadir. Geosiyosatga ham hozirgi kunda to`g`richa munosabatda bo`lishi kerak. Bu borada har qanday mustaqil mamlakatning geosiyosati (tashqi siyosat) bilan fashizm ruhidagi jangovor geosiyosatni aniq farq qilish zarur. Ma`lumki, harbiy yoki fashistik geosiyosatning asoschisi nemis Karl Xausxofer bo`lgan. U 1932 yilda o`zining «Harbiy geosiyosat» nomli kitobini yozgan va bu asarda muallif yashash muhiti, «millat pokligi» to`g`risidagi o`ta reaktsion, tajovuzkor fikrlarni bayon qilgan. Keyinchalik bu asar A.Gitlerning asosiy siyosiy g`oyasi va maqsadi sifatida e`tirof etilgan, Xausxoffer esa general unvonini olgan va Germaniya akademiyasining prezidenti ham bo`lgan. SHunday qilib, salbiy ma`noda talqin qilinuvchi geosiyosat geografik determinizmning bo`rttirilgan shgakli – fatalizm, so`ngra antropogeografiya va uning siyosat bilan qo`shilishi asosida paydo bo`ldi. Mazkur tushunchaning ana shunday o`zgarishi unga nisbatan noo`g`ri munosabatga olib keldiki, bu borada ham uzil – kesil aniqlik va ravshanlik talab qilinadi. Haqiqiy, beg`araz geosiyosat aslo mamlakatning chegarasiga, uni kengaytirishga aloqador emas. Aksincha, har bir mamlakat o`z hududining daxlsizligini ta`minlagan va saqlagan holda boshqa suveren davlatlar hududining ham daxlsizligi va butunligini tan olishi hamda hurmat qilishi kerak. Ana shu nuqtai nazardan respublikamiz rahbariyatining olib borayotgan geosiyosati diqqatga sazovordir va bunday ishlarni geograflar tomonidan o`rganish katta ilmiy va amaliy ahamiyat kasb etadi. O`zbekiston Respublikasi geografik jihatdan Yevrosiyo va O`rta Osiyoning qoq markazida joylashgan. Tabiiyki, mamlakatning bunday siyosiy geografik o`rni uning ijtimoiy – iqtisodiy rivojlanishi uchun uncha qulay emas. Ayniqsa, respublikamizning dunyo okean iva dengizlaridan uzoqda, materik ichkarisida o`rnashganligi uning boshqa davlatlar bilan aloqa qilishning biroz bo`lsada, qiyinlashtirib qo`yadi. Binobarin, mamlakatimizda olib borilayotgan tashqi siyosat uning geografik mavqeini yaxshilashga qaratilgan.

Hozirgi paytda O`zbekiston Respublikasi jahon okeaniga faqat Qozog`iston va Rossiya Federatsiyasi orqali chiqish imkoniga ega, xolos. Bu yo`l esa ancha olis va qimmatga tushadi (yo`l qancha ko`p mamlakatlar hududidan o`tsa, qiyinchiliklar, boj harakatlari ham odatda shunga muvofiq ko`p bo`ladi). Ushbu tarixiy va an`anaviy yo`lni saqlab qolgan holda (xatto Boltiqbo`yidagi port shaharlar, masalan, Litva respublikasining Klaypeda porti bilan ham rasmiy kelishuvlar bor) yana boshqa, qisqaroq yo`llarni qidirish dolzarb muammo bo`lib qolmoqda. Albatta, geografik jihatdan bizga eng qisqa va dunyo okeaniga chiqish yo`li Pokistonning Qarochi portidir. Bu haqda ham Pokiston rahbariyati bilan maxsus bitmlar imzolangan. Biroq mazkur yo`l ma`lum masofada Afg`oniston hududidan o`tishi kerak, bu mamlakatda esa hozircha tinch – totuvlik, siyosiy barqarorlik mavjud emas. Ma`lumki, halqaro yo`llar qisqa bo`lishi bilan birga ular arzon va ayni paytda bexatar, beminnat va beg`araz bo`lmog`i zarurdir. 1996 yil may oyida Turkmaniston hududidan (Tajan – Seraxs orqali) Eronning mashxad shahriga temir yo`l qurilishi tufayli Osiyo va Yevropa mamlakatlariga, jahon okeaniga chiqish imkoniyati biz uchun ham tug`ildi. Endi Mashxal – Tehron – Anqara orqali Istambulga chiqish mumkin. SHu bilan birga, yana boshqa, bundan ham qulayroq va arzonroq yo`llar axtarilmoqda. Jumladan, Turkmanistondan Turkmanboshi bandargohi (Krasnovodskdan) Kaspiy dengizi orqali Ozarbayjondan va Gruziya davlatlaridan o`tib, Ra dengiz bo`yidagi Poti portiga chiqish mo`ljallanmoqda. Shu maqsadda to`rtta respublikalar o`rtasidagi rasmiy kelishuvlar bor. Hozirgi kunda mamlakatimiz tashabbusi bilan Transkavkaz koridoridan foydalanish Markaziy Osiyoning davlatlari, jumladan, Qozog`iston va Qirg`iziston respublikalarini ham qiziqtirmoqda. Ayni paytda Qora dengiz orqali O`rta dengiz va Atlantika okeaniga chiqish mumkin yoki Dunay daryosidan foydalanib, markaziy Yevropa davlatlari bilan aloqalar o`rnatilsa bo`ladi. Haqiqatan ham Xuddi shunday maqsadlarni amalga oshirish ko`zlanmoqda.

Demak, shimoliy muz, Hind va Atlantika okeanlariga O`zbekiston respublikasidan chiqishning turli imkoniyatlari tug`ilmoqda. Shu bilan birga, Dune okeanining eng katta qismi bo`lgan Tinch okeaniga chiqish imkoniyatlari ham kengaytirilmoqda. Hozircha ushbu okeanga Qozog`iston va Rossiyaning Sibir o`lkasi orqali chiqish mumkin. Kelajakda Xitoy halq renspublikasining Shanxay porti bilan Qashqar (Buyuk ipak yo`lining qayta tiklanishi) orqali bog`lanish sharoitlari ham nazarda tutilmoqda. Yuqoridagi fikr va mulohazalar hozirgi zamon geosiyosatining yaqqol namunalaridir. Ayni paytda O`zbekiston Respublikasining O`rta Osiyo mintaqasidagi qondosh va qardosh qo`shni mamlakatlar bilan aloqalarini o`rganish ham katta ahamiyatga ega. Bu «yaqin xorij» mamlakatlari o`rtasidagi an`anaviy aloqalarni, shuningdek «uzoq xorij» davlatlari bilan tiklanayotgan munosabatlarni tadqiq va tahlil qilish zarur. Geosiyosat faqat geografiya fanining vazifasi emas. Binobarin, bu sohada geografik fikrlashning o`zi yetarli bo`lmaydi. Shu maqsadda tadqiqotchi bevosita siyosatshunoslik (politologiya) fanidan boxabar bo`lmog`i lozim. Chunki boshqa oraliq fan yoki yo`nalishlar kabi geosiyosat ham ikki fan qirrasida, ya`ni geografiya va siyosatshunoslik chegarasida vujudga kelgan. Geosiyosat bilan bir qatorda regional (mintaqaviy) va hududiy siyosat tushunchalari qo`llaniladi. Garchi bu «siyosatlar» shakli bir xil bo`lsada, amaliyot uchun ularni farq qila olish va o`z joyida, har qanday chalkashliklarga o`rin qoldirmaslik maqsadida aniq va ravshanlik kiritilishi talab etiladi. Geosiyosat – bu, eng avvalo, davlatlarning tashqi siyosati, ularning jahon hamjamiyatida o`rin olgan qo`shni (chegaradosh) va uzoq xorijdagi mamlakatlar bilan siyosiy – iqtisodiy, ijtimoiy munosabatlari sifatida e`tirof etilishi ma`qulroqdir. Xuddi shu ma`noda regional siyosat ko`proq mamlakatning ichiga, uning ma`muriy – hududiy bo`limlar ijtimoiy va iqtisodiy rivojlanishiga qaratilgan bo`ladi. Regional va hududiy siyosat to`g`risida ham tadqiqotchi aniq fikrga ega bo`lmog`i lozim. Albatta, region (bu atama inglizcha, aslida u frantsuz tilida «rau» yoki rayon so`zidan olingan) ham hududdir. Ammo, har qanday hudud, masalan,

kichik shaharcha yoki qishloq tumanlarini ham region darajasida qarash odatdan emas. Region ham rayon, biroq an`anaga ko`ra u ancha katta rayondir. Shu bois Bo`ka tumanini ma`muriy rayon yoki tuman sifatida ko`rish mumkin, ammo uni region deb atash nodurustdir. Mavjud chalkashliklarga yo`l qo`ymaslik maqsadida regional siyosatni mintaqaviy siyosat, ya`ni ancha katta ichki hududlar bilan bog`liq davlatning munosabatini anglatuvchi siyosat shaklida qabul qilish to`g`riroqdir. Bracha va turli ko`lamdagi joylarga nisbatan esa «Hududiy siyosat» tushunchasi ishlatilsa katta xatolik bo`lmaydi. Shuningdek, davlatlarning geografik siyosatida Yer yuzidagi yirik mintaqalar (masalan, Janubiy – Sharqiy Osiyo, Yaqin yoki Uzoq Sharq, Afrika, Lotin Amerikasi va h.k.) bilan munosabati ham ularning regional siyosati sifatida baholanadi. Tadqiqotchi mamlakatning regional (mintaqaviy) siyosatini o`rganishda, eng avvalo, ushbu davlatning yirik iqtisodiy rayonlar va viloyatlarning ijtimoiy – iqtisodiy rivojlanishiga nisbatan munosabati, chora – tadbirlari majmuasi mazmunida qaramog`i lozim. Shu nuqtai nazardan bunday ilmiy izlanishlar iqtisodiy rayonlashtirish g`oya va amaliyoti chambarchas bog`liq bo`ladi. Regional siyosat – bu mazmunan murakkab tarkibli majmuaviy siyosatdir. Binobarin, u mazkur hududga doir iqtisodiy, demografik, ekologik, narx – navo, moliya – kredit va boshqa sohalarga tegishli davlatning munosabatlarini qamrab oladi. Ammo bularning ichida eng muhimi va «o`zagi» iqtisodiy masalalar hisoblanadi va shuning uchun ham ushbu muammolarni o`rganish iqtisodiy geografik tadqiqotlar doirasiga kiradi. Mamlakatning regional siyosati poytaxt shaharlarning iqtisodiy rivojlanishini tartibga solish, agrar (qishloq xo`jaligi) mintaqalarida mehnat resurslaridan to`la va samarali foydalanish asosida mazkur rayonlarni faollashtirish, rivojlanishi to`xtab qolgan tog` – kon, yoqilg`i sanoat rayonlari (depressiv rayonlar) taraqqiyotini jonlashtirish va boshqa masalalarning hal etilishini nazarda tutadi. Shuningdek, shaharlar rivojlanishi va urbanizatsiya, tabiiy resurslardan foydalanish va ekologiya kabi muammolar, o`sish qutbi va

markazlarini yaratish, tarmoq va hududlar ichidan ustuvor ahamiyatga ega bo`lganlarini aniqlashga o`xshash masalalar ham mamlakatning regional siyosati orqali hal etilishi kerak. Regional siyosat iqtisodiy rayonlar singari ko`p bosqichli bo`ladi. Chunonchi u mamlakat, yirik iqtisodiy rayon va xatto viloyatlar doirasida amalga oshiriladi. Biroq, turli hududiy darajada ko`zda tutilgan maqsad va vazifalar ko`lami, ahamiyati bir xil emas. Shu bilan birga mintaqaviy (regional) siyosat faqat ma`muriy birliklar rivojlanishiga qaratilgan bo`lmaydi. Aksincha, uning yirik tabiiy va sof holdagi geografik o`lkalarga mo`ljallanganligini ham ko`rish mumkin.. Masalan, Farg`ona yoki Zarafshon vodiysi, Quyi Amudaryo mintaqasi, Qizilqum cho`li va Angren – Olmaliq kon sanoati rayonlarini rivojlantirish haqidagi mamlakatimizning tutgan siyosati shular jumlasidandir. U yoki bu rayonning rivojlanish yo`nalishi va darajasini aniqlash uchun, avvalambor, ana shu hududlarning mavjud imkoniyatlari – hozirgi holati, tabiiy resurslari, yer – suv, mineral xom – ashyo va mehnat resurslari, transport va boshqa infrastruktura tarmoqlari, geografik o`rni va ekologik vaziyati atroflicha o`rganilib, xolisona baholanishi kerak. Shu asosda ustuvor ahamiyatga ega bo`lgan tarmoq, ma`muriy rayon va shaharlar belgilanadi. Demak, rivojlanish darajasi bozor iqtisodiyoti munosabatlariga o`tish davrida faqat zaruriyatdan emas, ko`proq imkoniyatdan kelib chiqadi. Shu bois, hududlar ham ilgarigidek, yuqoridan kutmasdan, boqimandalik kayfiyatlaridan voz kechib o`zlari tashabbuskor va tadbirkor bo`lishlari, yangi texnologiya va xorijiy sarmoyadorlarni jalb qilish uchun sa`y – harakat qilishlari zarur. Boshqacha qilib aytganda hududlar orasida ham erkin va sog`lom raqobat bo`lishi hozirgi davrda muqarrardir. Shu jihatdan mamlakatimizning turli hududlarida barpo etilayotgan qo`shma korxonalar geografiyasini o`rganish nihoyatda dolzarbdir. Bu yerda, ayniqsa, mintaqa yoki viloyat iqtisodiy rivojlanishini, xo`jalikning tarmoq va hududiy tarkibiga keskin o`zgarish kirituvchi yirik korxonalarni tadqiq qilish muhimroq. Masalan, Farg`ona vodiysidagi Asaka shahrida barpo etilgan «O`zDEU» avtokorxonasi yoki Buxoro viloyatida qurilgan Qorovulbozor neftni

qayta ishlash zavodi kabilar qiziqarli diplom va nomzodlik ilmiy ishlarning mavzusi bo`lishi aniq. Shuningdek, mamlakatimizning yo`l mustaqilligini ta`minlovchi yangi qurilishlar (Uchquduq – Sultonavays – Nukus, G`uzor – Boysun – Qumqo`rg`on temir yo`llari, Angren – Namangan avtomobil yo`li) ham iqtisodiy va sotsial geografik nuqtai nazardan o`rganilishi kerak. Kichik va o`rta tadbirkorlik, qo`shma korxonalar geografiyasini tahlil qilishda arzon va sifatli, xaridorgir halq iste`mol mollarini, import tovarlarning o`rnini qoplaydigan, ichki bozorni to`ldiradigan va to`yintiradigan raqobatbardosh mahsulotlarni yaratishga jiddiy e`tibor berish lozim. Ayni paytda mahalliy xomashyo va mineral resurslarni, zamonaviy texnologiyani joriy qilish asosida tayyor mahsulot darajasigacha bo`lgan ishlab chiqarish jarayonining uzluksizligini ta`minlash, chetga mumkin qadar xomashyoning chiqarilishini (eksportni) kamaytirish ham siyosiy va iqtisodiy ahamiyatga molik muammolardir. Biz yuqorida va ushbu bobning avvalgi bandlarida asosan tarmoq yo`nalishidagi geografik tadqiqotlarga e`tibor qaratdik. Shu bilan birga iqtisodiy va sotsial geografiyada an`anaviy bo`lgan rayonlar va mamlakatlarni o`rganish ham aslo o`z ahamiyatini yo`qotgani yo`q. Binobarin, iqtisodiy geografik o`lkashunoslik va mamlakatshunoslik tadqiqot ishlarini ham olib borish zarur. Alohida mamlkatning iqtisodiy geografik ta`rifi va uning geografik o`rni va siyosiy geografik mavqei, tabiiy sharoiti va qazilma boyliklari, aholisi va mehnat resurslariga baho berishni o`z qamroviga oladi. Ammo, unutmaslik lozim – bu ta`rif, avvalambor, iqtisodiy geografik ta`rifdir. Shuning uchun barcha o`rganishlar ana shu bosh maqsadga qaratilishi talab etiladi, ya`ni turli omillarga iqtisodiy va hududiy jihatdan qaraladi. Xuddi shunday metodik yondashuv iqtisodiy rayon va viloyatlarni o`rganishda ham qo`l keladi. Mamlakat va rayonlarning iqtisodiy geografik ta`rifida xo`jalik, uning tarmoqlar va hududiy tarkibini, tarmoqlararo va hududiy ishlab chiqarish majmualarining shakllanishi va rivojlanish muammolarini tahlil va tadqiq qilish markaziy o`rinda turadi. Bunday tadqiqotlardan aniq xulosa, taklif va tavsiyalar chiqarilsa, ishning amaliyligi yanada oshadi.

SHuni ta`kidlash joizki, geografiya kompleks va komplekslar (majmualar) to`g`risidagi fandir. Birinchi holda ushbu fanning murakkab tarkibi, ichki tuzilishi nazarda tutilsa, ikkinchisida esa tadqiqot ob`ektining murakkabligi tushuniladi. Bundan iqtisodiy geografiyaning muhim tamoyili, ya`ni kompleks yondashuv zaruriyati kelib chiqadi. Geografiya fani, shu jumladan, iqtisodiy va sotsial geografiya alohida – alohida elementlarni tahlil va tashhis qilish bilan chegaralanib qolmaydi. Bu elementlar o`rtasidagi aloqadorlik, ularning hududiy majmua shaklidagi birikmalarini o`rganish ham talab etiladi, analiz sintez bilan mushtarak uyg`unlashuvi lozim. SHu o`rinda fanning ob`ekti – hududiy kompleks (majmua) bilan unga kompleks yondashuvni aniq farq qila olish zarur. Birinchi holda «kompleks» - gapning egasi (nima?) shaklida keladi, uni o`zbek tilida «majmua» so`zi bilan almashtirish mumkin. Biroq kompleks yondashuv (qanday?) majmuali yondashuv bo`lmasa kerak – bu yerda kompleks ot emas, balki sifatdir. Fikrimizcha, bu atamani aynan «kompleks» ko`rinishida qondirish mumkin. Chunki u rus yoki boshqa bir xorijiy millat tiligagina tegishli bo`lmay, hozirgi kunda halqaro mazmunga ega. SHu bilan birga, kompleks yoki majmua xo`jalik tuzilmasi shaklida turli hududiy birliklarda aynan bir xil qamrovga ega emas. Masalan, xo`jalikning tuman doirasidagi kompleksligi viloyat xo`jaligining turli – tumanligi yuqoriga ko`tarilgan sari murakkablashib va takomillashib borar ekan. Binobarin, iqtisodiyotni kompleks (majmua) shaklida rivojlantirish hamma vaqt geografik jihatdan aniq mazmunga ega bo`lishi kerak.

Adabiyotlar ro`yxati : 1. Алесеев Л.И., Алаев Э.Б. «Социально – экономическая география». Понятийно – терминологический словарь. М:. 1980. 2. Тойн.П., Ньюби.П. «Методы географических наследований». М:. 1977. 3. Манак.Б.А. «Методика экономико – географических наследований». Минск. «Университетское». 1985. 4. Маергойз.И.М. «Методика мелкомасштабных экономико – географических исследований». М:. 1981. 5. Меркушева.Л.А. «География сферы обслуживания населения (теория и метология)». Красноярск. 1989. 6. Алесеев.А.И., Ковалев.С.А., Ткаченко.А.А. «География сферы обслуживания». Калинин. 1988. 7. Soliev. A.S. «Iqtisodiy geografiyaning nazariy va amaliy masalalari». Toshkent. 1999. 8. Iqtisodiy geografiyaning tadqiqot usullari ma`ruzalar matn. Tuzuvchi: o`qit. X.Jumayev 9. www.ziyonet.uz

Похожие

Tabiiy geografik tadqiqotlar

Amaliy geografik tadqiqotlar

Tarmoqli tabiiy geografik tadqiqotlar. geologik tadqiqot ishlari

Umumiy geografik ma’lumotlar. Dunyo siyosiy xaritasining shakllanishi

Agrogeografik tadqiqotlar