Нодавлат иш билан бандлик хизмати ривожланишининг асосий йўналишлари - Iqtisodiyot - Referatlar

Нодавлат иш билан бандлик хизмати ривожланишининг асосий йўналишлари

Yuklangan vaqt:

16.03.2024

Ko'chirishlar soni:

0

Hajmi:

154 KB

Ko'chirib olish

Нодавлат иш билан бандлик хизмати ривожланишининг асосий йўналишлари Режа : 1. Нодавлат иш билан бандлик хизматини шаклланиш мезонлари бўйича таснифлаш 2. Ҳудудий даражада нодавлат иш билан бандлик хизматлари шаклланиши 3. Меҳнат бозорида вертуал агентликлар хизматининг асосий йўналишлари 4. Давлат ва нодавлат иш билан бандлик хизматлари фаолиятларининг ўзаро алоқадорлиги 5. Нодавлат иш билан бандлик хизматини шаклланиш мезонлари бўйича таснифлаш

Иқтисодиётдаги таркибий ўзгаришлар даврида талаб қилинган даражада инсон ресурсларининг замонавий ишлаб чиқаришдаги таъминоти - иш билан бандлик хизмати олдида турган асосий масалалардан бири ҳисобланади. Республикамизда бозор муносабатларининг шаклланиб бориши меҳнат бозорининг ташкилий тузилмалари сифатида давлат иш билан бандлик хизмати органлари билан бирга турли ихтисослашган ва универсал тижорат иш билан бандлик органлари, меҳнат биржалари, ўқув марказлари, кадрларни танлаш бўйича агентликлар меҳнат бозорида аҳамиятли рол ўйнай бошладилар. Корхона ва фирмаларга меҳнат бозорида иш билан бандликка кўмаклашиш ва ишга жойлаштириш мақсадида ишчи кучи ёллашнинг ташқи манбаларидан бири сифатида касбий меҳнат воситачилигидан фойдаланиш ҳисобланади. Шундай экан, давлат меҳнат воситачилиги фаолиятини қонуний жиҳатдан тартибга солиш ва ижросини назорат қилиши зарур. Нодавлат иш билан бандлик хизмати меҳнат воситачилиги билан шуғулланишда давлат иш билан бандлик хизмати сингари ўзининг фаолиятида бир қанча йўналишларга эга. Нодавлат иш билан бандлик хизматини бир неча мезонлар бўйича таснифлаш мумкин. Меҳнат воситачилигининг кўринишлари бўйича улар қуйидагиларга бўлинади: - Тижорат иш билан бандлик хизмати; - Нотижорат иш билан бандлик хизмати. - Нодавлат иш билан бандлик хизмати орасида иш берувчиларни ўзларининг мижозлари сифатида фаолият юритишни мақул кўрадилар.

Шунинг учун меҳнат бозорида функцияларнинг тақсимланиши бўйича иш билан бандлик хизматлари қуйидагиларга бўлинади: - ходимларни танлаш бўйича агентлик (рекрут агентликлари); - фуқароларни ишга жойлаштириш бўйича агентлик, меҳнат биржаси. Иш билан бандликка кўмаклашишда фуқароларни танлаш ва ишга жойлаштириш билан шуғулланувчи агентликларнинг алоҳида фаолият юритишлари қоида тариқасида йўқ. Ўз фаолиятининг бошланғич босқичида агарда қандайдир агентлик икки йўналишдаги фаолият билан шуғулланса, кейинчалик битта йўналишдаги фаолиятга ихтисослашади. Ходимларни танлаш агентликлари, яъни рекрут агентликлари ёлланма ходимларни танлашда қуйидаги мезонлардан фойдаланишлари мумкин: - вақтинчалик иш билан бандлик; - доимий иш билан бандлик. Меҳнат бозорида фаолият юритувчи нодавлат иш билан бандлик хизмати органлари конкрет тармоқлардаги корхоналар учун ходимларни танлашда ихтисослашиши ёки барча касбий-малака белгилари бўйича хизматлар кўрсатиши мумкин. Шунингдек, маълум бир тармоққа тегишли иш жойларида фуқароларни ишга жойлаштириш бўйича ҳам хизматлар кўрсатиши мумкин. Шундай экан, ишга жойлаштириш бўйича агентликлар қуйидагиларга бўлинади: - универсал; - ихтисослашган. Ўз навбатида, ихтисослашган кадрлар агентлиги, тижорат меҳнат биржаларини қуйидаги мезонлар бўйича ажратиш мумкин: фирма ичидаги вертикал босқичлар бўйича раҳбарлик лавозимларига ходимларни танлаш; бошқарув лавозимларига ходимларни танлаш; ўрта даражадаги мутахассисликлар бўйича, юқори малакали ишчи мутахассисларни танлаш; малака ва тармоқ хусусиятлари бўйича иш жойларига ходимларни танлаш. Шундай қилиб, иш билан бандлик хизматини фаолият доирасига қараб қуйидаги турларга бўлиш мумкин:

- касбий белгилари бўйича ходимларни танлаш; - малака белгилари бўйича ходимларни танлаш. Меҳнат бозорида барча иш билан бандлик хизматлари турли хил корхоналар ва фирмалар билан қандайдир малака белгилари бўйича фаолият олиб борадилар. Иш берувчилар ва ёлланма ишчилар ўртасида кадрлар агентлиги воситачи сифатида меҳнат бозорида муҳим аҳамиятга эга. Хорижий манбаларнинг билдиришича, чет элда (хусусан, АҚШда) кадрлар агентлиги орқали ишга жойлашган ишсизлар 5% ни ташкил қилади. Бизнингча, Ўзбекистонда бу кўрсаткич (хусусан, Самарқанд вилоятида) ҳали ривожланган мамлакатлардаги каби аҳамиятли салмоққа эга эмас. Ҳудудий даражада нодавлат иш билан бандлик хизматлари шаклланиши Ҳудудий даражада Самарқанд вилоятида кадрлар агентлиги яқин даврлардан бошлаб шаклланиб бормоқда. Вилоятда Самарқанд вилоят социологлар ва Психологлар Ассоциацияси (СВСПА) мутақил нодавлат нотижорат ташкилот сифатида ташкил топди. Унинг таркибида ташкилий тузилмалар сифатида, imtc & Metropolis (Самарқанд) Кадрлар Агентлиги, Самарқанд Кадрлар Клуби ва бошқа тузилмалар мавжуд бўлиб, кадрлар агентлиги 1999 йил октябр ойидан фаолият юритмоқда. imtc & Metropolis Кадрлар агентлиги ҳудудимиздаги биринчи ва ягона ҳисобланиб, Самарқанддаги ва Ўзбекистондаги маҳаллий ва чет эл компаниялари учун персонал танлаб бориш, шунингдек ўз мижозлари ва ҳамкорларига касбий хизматлар кўрсатиш билан шуғулланади. Агентлик иш берувчилар билан берилган буюртмаларга мувофиқ тузилган ёзма шартномалар асосида иш олиб боради. Социо логик таҳлил натижалари шуни кўрсатадики, респондентларнинг 79,5% и кадрлар агентлиги тўғрисида тўлиқ маълумотга эга эмаслар.

Агентлик олий ўқув юртлари, ўрта махсус таълим муассасалари, лицей ва колледж талабаларининг кенг маълумотли базасига эга. Агентлик иқтидорли талабаларнинг амалиёт ўтиши тўғрисида иш берувчилар билан музокаралар олиб бориш билан бирга, ҳар йили битирувчилар ярмаркасини ташкил этади. Агентлик номзодларни излаҳда кенг миқиёсдаги усулларни қўллайди: • ойда 500-300 кишига кўпайиб борувчи 5 мингга яқин қисқача хулосалардан (резюме) иборат бўлган шахсий маълумотлар базасидан излаш; • газеталарда ва телевиденияда эълонлар бериш, тақдимотлар ва агентлар тармоғи орқали излаш; • ўқув юртлари орқали излаш; • Москва, Тошкент, Ўзбекистон ва Россия ҳудудларидаги ҳамкор агентликлар орқали излаш; • Раҳбарлар ва “эксклюзив” мутахассисларни тўғридан-тўғри излаш; • Интернет тармоғи орқали излаш. Агентликда номзодларни танлаш ва баҳолашнинг асосий усуллари: ҳужжатларни таҳлил қилиш; шахсий ва телефонлар орқали суҳбатлар ўтказиш; тавсифномаларни текшириш; психологик ва касбий тест синовларини ўтказишдан иборат. Агентлик орқали ишга қабул қилинган номзодлар ўрнига бир ойдан бир йилгача бўлган муҳлатларда бепул алмаштириш кафолатланади. Митрополис Кадрлар Агентлигининг иш берувчи мижозлари бўлиб «ЎзБАТ» қўшма корхонаси, «Тонг» бирлашмаси, «Шердор ЛТД» бирлашмаси, «Ориён» қўшма корхонаси, «Пульсар» концерни ва бошқалар ҳисобланади. Агентлик ушбу корхоналар билан турли касблардаги малакали ходимларни танлаш ва ишга жойлаштириш масалаларида ҳамкорлик қилади. Агентликда номзодларнинг малакасини ошириш ва касбга тайёрлаш бўйича таълим бериш тизими ҳам кенг йўлга қўйилган. Агентлик ўзининг мижоз корхоналарига ходимларни танлаш ва ишга жойлаштириш бўйича бир ойда ўртача 6-7 та талабномани бажаради.

Шунингдек, давлат ташкилотлари ва корхоналарига ходимларни танлаш ва ишга жойлаштиришда бепул хизматлар бажарилади. Самарқанд Кадрлар Агентлиги давлат иш билан бандлик хизмати органлари билан бўш иш ўринлари банки бўйича кенг миқёсда ҳамкорлик ўрнатилган бўлиб, вилоят иш билан бандлик хизмати бу масалада кадрлар агентлигига яқиндан кўмаклашиб келмоқда. Бу эса, вилоят иш билан бандлик хизмати билан кадрлар агентлигининг меҳнат бозоридаги фаолиятлари асосида иш берувчилар ва ишлашни хоҳловчилар ҳамда ахборотлар алмашиши ҳақида маълумотлар банкининг тузилиши икки томонга ҳам самарали маълумотлар олиш имконини беради. Агентликда ходимларни ишга жойлаштириш кафолат муддати 6 ойдан 1 йилгачадир. Масалан, «УзБАТ» қўшма корхонасига малакали ходимларни ишга жойлаштириш кафолати 1 йилгача. Алоҳида “эксклюзив” мутахассисларни танлаш ва ишга жойлаштириш бир йилда ўртача 6-7 та талабномани бажаради. Ўтказилган тадқиқотлар шуни кўрсатдики, Самарқанд Кадрлар агентлигининг меҳнат бозори сегментидаги талаб тузилмаси асосан малакали ходимларга қаратилган ва бу кўрсаткич 70- 80%ни ташкил этади. Ҳозирги кунда агентлик номзодларни излаш усули сифатида ўзининг маълумотлар базасидан фойдаланади. Вилоятда Самарқанд кадрлар клуби Самарқанд шаҳар кадрлар хизмати ишчиларининг ижтимоий бирлашмаси бўлиб, у 1999 йил 9 декабрда ташкил этилган. Бу ҳамкорлик инсон заҳираларини бошқариш соҳасидаги икки томонлама тажриба алмашинувига ва клубнинг кейинги ривожланишига олиб келади. Кадрлар клуби бугунги кунда Ўзбекистондаги персонал бўйича ишловчи менежерлар билан иш олиб борувчи ягона клуб бўлиб, вилоятдаги 365 кадрлар билан ишловчи ходимларни ўз ичига олади. Кадрлар технологиясини ривожлантириш бўйича тадбирлар ўтказиш меҳнат бозорида сифат кўрсаткичларнинг ривожланиши учун муҳим аҳамиятга эга.

Кадрлар клубининг асосий мақсади касбга доир қизиқишлари умумий бўлган кишиларни касбий ўсишга ва ривожланишлари учун хизмат юзасидаги мулоқотларни ташкил этиш, меҳнат бозорида меҳнат муомаласи маданиятини ривожлантириш ва персонални бошқариш институтини такомиллаштиришдан иборат. Маълумки, меҳнат бозори инфратузилмаси таркибий қисмлари ўртасидаги соғлом рақобатчилик муҳитининг шаклланиб бориши меҳнат бозори самарали шаклланишининг муҳим асоси ҳисобланади. Шундай экан, кадрлар агентлигининг яқин келажакдаги рақобатчиси сифатида, интернет тармоғидаги вертуал рекрут агентликлари бўлиши мумкин. Кейинги йилларда интернет тармоғида пайдо бўлган кўпчилик меҳнат биржалари (ёки вертуал агентликлар) ўзларининг маълумотлар базаларига эга бўлиб, касбий белгилар бўйича аниқ ахборотлар олиш имкониятини беради. Вертуал агентликлардаги, «ишчи» сайтларнинг асосий устунлиги шундаки, ахборотлар олиш тез, ҳаммабоп ва бепул амалга оширилади. Вертуал агентликлар иш берувчилар учун қулай шарт-шароитларни юзага келтиради. Чунки, газеталардаги иш билан бандликни таъминлаш бўйича эълонларга нисбатан интернетдаги ишчи сайтлар орқали номзодларга тўлиқ ва аниқ маълумотлар асосида талабни мукаммал равишда шакллантириш имкониятлари яратилади. Бу ҳолат иш излаш сифатини оширади ва иш изловчиларнинг бундан фаол фойдаланиш имкониятларини юзага келтиради. Тажрибанинг кўрсатишича, кадрлар агентликларининг ўзлари ҳам маълумотлар базасини тўлдириш мақсадида интернетдан фойдаланадилар. imtc & Metropolis Самарқанд Кадрлар Агентлигининг 40% га яқин резюме (номзодлар тўғрисида қисқача хулоса) ларини интернет орқали жўнатадилар. Кўпчилик иш берувчилар учун вертуал агентликларидан фойдаланиш имкониятларининг яратилиши иш билан бандликнинг самарадорлигини оширади. Лекин иш изловчилар учун бир мунча имкониятлар чегаралангандир. Агар иш изловчи мутахассиснинг иш тажрибаси етишмаса иш билан бандликни таъминлаш бўйича уларнинг интернетдаги имкониятлари кўтарилмайди.

Меҳнат бозорида вертуал агентликлар хизматининг асосий йўналишлари Ривожланган мамлакатларнинг иш билан бандлик соҳасидаги тажрибасидан маълумки, Интернет тармоғидаги Вертуал агентликлар хизматидан бепул фойдаланиш билан бирга пуллик маълумотлар базасидан фойдаланиш ҳам кенг йўлга қўйилган. Бизда ҳали Интернет орқали иш билан бандликка кўмаклашиш бўйича маълумотлар базасидан фойдаланишда пуллик хизматлар амалда йўқ, шунингдек, МДҲ давлатларида ҳам. Интернетнинг маълумотлар базасида иш изловчилар тўғрисидаги тўлиқ қимматга эга бўлган ва етарлича ахборотлар ҳамда кенг миқиёсдаги кўп омилли излаш имкониятлари жойлаштирилади. Иш берувчи пуллик хизматлар учун ҳақ тўлаш асосида ўзини қизиқтирган номзоднинг адресини интернетнинг «ишчи сайтлари» даги маълумотлар базасидан излаши орқали топиши мумкин. Давлат иш билан бандлик хизмати ходимлари, кадрлар агентлиги раҳбарлари билан ўтказилган оғзаки сўровлар натижалари шуни кўрсатдики, интернет тармоғидаги маълумотлар базасидан фойдаланиш бўйича пуллик хизматлар тўғрисида қуйидаги хулосаларни чиқариш мумкин. Қарши фикрни билдирганлар бўйича: - номзодлар тўғрисида тўлиқ маълумотлар ва ишга ёллашдаги кафолатларнинг йўқлиги; - кўпчилик иш берувчилар қандайдир маълумотлар базасидаги номзодларга эмас, балки кадрлар агентлиги орқали малакали мутахассисни ёллаш бўйича мурожаат қилишни маъқул кўрадилар. Интернетнинг маълумотлар базасидан фойдаланишни тўловли хусусиятга эга эканлигини қўллаб қувватловчилар фикрига кўра: - ўнлаб хорижий пуллик вертуал агентликларнинг самарали фаолиятларининг таъминланишини мисол сифатида келтириш мумкин; - бепул Интернет хизматлари чегараланган, чунки малакали мутахассислар

ҳеч қачон бепул Интернетга ўзларининг резюмеларини жойлаштирмайдилар; - пуллик вертуал агентликлари хизмати кадрлар агентлиги хизматига нисбатан анча арзондир, шундай экан талаб вертуал агентликларга ошади. Шундай қилиб, пуллик вертуал агентликлар мижозларнинг вақтини ва пулини тежаш имкониятини яратади. Яқин келажакда вертуал агентликлар фаолият ҳажмининг кенгайиб бориши натижасида Интернет тармоғида турли хил тестлар ва видеокамералар орқали иш билан бандлик бўйича тўғридан - тўғри мулоқотларнинг ўтказилиши меҳнат бозори инфратузилмасида сифат кўрсаткичлар ошишига шароит яратади. Тадқиқотлар натижалари бўйича тижорат бандлик хизматлари ҳақидаги ахборот таҳлиллари шуни кўрсатдики, нодавлат иш билан бандлик хизмати фаолиятининг устун йўналишлари қуйидагилардан иборат: 1. Ташкилотлар ва корхоналар учун ходимларни танлаш. Бу йўналишда ходимларни танлаш бўйича имтc & Метрополис Самарқанд Кадрлар Агентлиги ўз фаолиятини ривожлантирмоқда. Агентлик ходимларни танлаш хизматидан ташқари маслаҳат хизматларини ҳам кўрсатади. Ҳар бир агентлик тижорат меҳнат биржалари сингари малака ёки касбий танлашга боғлиқ ҳолда ихтисослашган ва универсал бўлиши мумкин. Тижорат меҳнат биржалари ҳам шундай хизматларни кўрсатади ва уларнинг мижозлари бўлиб фуқаролар, иш изловчилар, иш берувчилар ҳисобланишади. 2. Иш изловчи фуқароларни ишга жойлаштиришга кўмаклашиш. Бу йўналишда ихтисослашган ва универсал тижорат меҳнат биржалари фаолият юритадилар. Биржаларнинг ихтисослашиши аниқ аҳоли гуруҳлари билан ёки бирорта касбий гуруҳлар билан ишлашдан иборат. 3. Иш билан бандлик соҳасида маслаҳат хизматлари кўрсатиш. Муаллиф кадрлар агентликлари фаолиятининг таҳлили асосида қуйидаги хулосага келди, кўпчилик иш берувчилар агентлик мутахассисларига маслаҳат хизматлари бўйича мурожаат қилишадилар. Иш берувчилар меҳнат қонунчилигининг баъзи юридик жиҳатларига қизиқадилар. Ҳар бир ташкилот тўқнаш келадиган

ходимларни танлаш бўйича масалаларга ва меҳнат бозоридаги вазият тўғрисида ахборотлар олишни ҳохлайдилар. Бундай хизматларни асосан вилоятда ягона ҳисобланган Самарқанд Кадрлар Агентлиги кўрсатади. Юридик масалалар бўйича вақти-вақти билан ўтказиладиган илмий семинарларга вилоят давлат иш билан бандлик хизматидан мутахассислар таклиф этилиши мумкин. 4. Касбга тайёрлаш. Иш билан банд бўлмаган фуқароларни касбга тайёрлаш ва қайта тайёрлаш тижорат биржалари ва агентликлар ўқув марказларида ўтказилади. Биржалар кадрларни ўқитишда ўқув юртлари билан шартнома тузишлари мумкин. Шунингдек, тижорат меҳнат биржалари ўзларининг мижозларига касбий тайёргарликни ўтказиш учун давлат иш билан бандлик хизмати ўқув марказлари ёрдамига мурожаат қиладилар. 5. Меҳнат бозоридаги маркетинг хизматлари. Меҳнат бозори инфратузилмаси таркибий қисмлари ўртасида меҳнат воситачилиги соҳасида ўзаро ҳамкорликнинг ўрнатилиши муҳим аҳамиятга эгадир. Давлат ва нодавлат иш билан бандлик хизматлари фаолиятларининг ўзаро алоқадорлиги Давлат ва нодавлат иш билан бандлик хизматларининг муносабатлари бўйича қўшма фаолият қуйидаги масалаларни назарда тутиши зарур: 1) Конкрет бўш иш ўринларига ходимларни танлаш . Кўпинча кадрлар агентлиги иш берувчиларнинг конкрет бўш иш ўринларига ходимларни танлаш таклифи билан давлат иш билан бандлик хизматига мурожаат қиладилар. Давлат ва нодавлат иш билан бандлик хизматлари ўртасида конкрет бўш иш ўринлари бўйича ўзаро ҳамкорликнинг таъминланиши, мутахассисларни танлаш бўйича қийинчиликларни юзага келтирмайди.

Давлат иш билан бандлик хизмати қанча бепул хизматларни кўрсатса, ишга жойлаштириш бўйича агентлик ҳам ишсизларни ишга жойлаштиришга кўмаклашиши бепул амалга оширилади. 2) Ходимларни мақсадли танлаш. Турли вариантлар бўйича ходимларни танлаш мақсадли бўлиши мумкин, агарда иш берувчиларнинг иш кучига талаби кенг кўламда (иш ҳақи юқори, қаттиқ шартлар асосида, танлаш вақти чегараланган) ва агентлик уни мустақил бажариш кучига эга бўлмаса, давлат иш билан бандлик хизмати кўмагига таяниши мумкин. 3) Конкрет мутахассислар учун бўш иш жойларини излаш. Баъзида шундай ҳолатлар келадики, нодавлат ташкилотларнинг ишга жойлаштириш бўйича маълумотлар банкида юқори малакали мутахассислар ва кам учрайдиган касбдагиларни ишга жойлаштириш уддасидан чиқа олмайдилар. Бу ҳолатда давлат иш билан бандлик хизмати иш берувчилар билан олдин ишлаган даврлардаги алоқалари бўйича кўрсатилган фуқароларни ишга жойлаштиришга кўмаклашади. Бунда ишга жойлаштириш хизматлари бепул кўрсатилади. 4) Ижтимоий ҳимояга ва иш билан бандлик хизматидан фойдаланишга муҳтож фуқароларни ишга жойлаштириш бўйича ҳамкорлик. Фуқароларни ишга жойлаштиришга кўмаклашиш бўйича давлат иш билан бандлик хизмати кадрлар агентликлари ва тижорат меҳнат биржалари билан ўзаро алоқадорликда фуқароларга хизмат кўрсатиш, ижтимоий ҳимояга муҳтожларга ижтимоий ҳимояни таъминлаши зарур. Бироқ, Самарқанд вилоятида турли йўналишларга асосланган ихтисослашган меҳнат биржаларининг шаклланмаганлиги, бу масала бўйича давлат ва нодавлат иш билан бандлик хизмати ўртасида ўзаро ҳамкорлик таъминланмаганлигини ифодалайди. Шундай қилиб турли йўналишларга ихтисослашган меҳнат биржаларини шакллантириш ва улар ўртасидаги эркин рақобатчилик муҳитини юзага келтириш, меҳнат соҳасида ижтимоий-иқтисодий муносабатлар ривожланишига асос яратади.

Хулоса: Республикамизда бозор муносабатларининг шаклланиб бориши меҳнат бозорининг ташкилий тузилмалари сифатида давлат иш билан бандлик хизмати органлари билан бирга турли ихтисослашган ва универсал тижорат иш билан бандлик органлари, меҳнат биржалари, ўқув марказлари, кадрларни танлаш бўйича агентликлар меҳнат бозорида аҳамиятли рол ўйнай бошладилар. Нодавлат иш билан бандлик хизмати меҳнат воситачилиги билан шуғулланишда давлат иш билан бандлик хизмати сингари ўзининг фаолиятида бир қанча йўналишларга эга. Нодавлат иш билан бандлик хизматини бир неча мезонлар бўйича таснифлаш мумкин. Маълумки, меҳнат бозори инфратузилмаси таркибий қисмлари ўртасидаги соғлом рақобатчилик муҳитининг шаклланиб бориши меҳнат бозори самарали шаклланишининг муҳим асоси ҳисобланади. Шундай экан, кадрлар агентлигининг яқин келажакдаги рақобатчиси сифатида, интернет тармоғидаги вертуал рекрут агентликлари бўлиши мумкин. Кейинги йилларда интернет тармоғида пайдо бўлган кўпчилик меҳнат биржалари (ёки вертуал агентликлар) ўзларининг маълумотлар базаларига эга бўлиб, касбий белгилар бўйича аниқ ахборотлар олиш имкониятини беради. Вертуал агентликлардаги, «ишчи» сайтларнинг асосий устунлиги шундаки, ахборотлар олиш тез, ҳаммабоп ва бепул амалга оширилади. Вертуал агентликлар иш берувчилар учун қулай шарт-шароитларни юзага келтиради. Чунки, газеталардаги иш билан бандликни таъминлаш бўйича эълонларга нисбатан интернетдаги ишчи сайтлар орқали номзодларга тўлиқ ва аниқ маълумотлар асосида талабни мукаммал равишда шакллантириш имкониятлари яратилади. Бу ҳолат иш излаш сифатини оширади ва иш изловчиларнинг бундан фаол фойдаланиш имкониятларини юзага келтиради.

O'xshashlar

Давлат иш билан бандлик хизмати фаолиятининг асосий йўналишлари

Давлат иш билан бандлик хизмати фаолиятининг самарадорлигини баҳолаш усуллари

Меҳнат бозори, иш билан бандлик, ишсизлик

Иш билан бандликка кўмаклашиш марказлари хизмати

Меҳнат бозори инфратузилмаси ташкилий таркиблари фаолиятларининг истиқболлари