Чакана ва улгуржи олди-сотди шартномаси - Huquqshunoslik - Referatlar

Чакана ва улгуржи олди-сотди шартномаси

Yuklangan vaqt:

20.09.2019

Ko'chirishlar soni:

0

Hajmi:

76.5 KB

Ko'chirib olish

Режа: 1.Чакана савдо 2. Ким ошди савдоси, товар биржаларида савдо-сотиқ шартномалари

Чакана савдо Фуқароларга савдо хизмати кўрсатишнинг асосий фуқаролик-ҳуқуқий шакли чакана олди-сотди шартномаси ҳисобланади. Чакана олди-сотди олди- сотди шартномасининг бир тури сифатида эътироф этилади. Чакана савдо муносабатларида бир томонда сотувчи сифатида тадбиркорлик фаолиятини амалга оширувчи фуқаролар ва юридик шахслар қатнашса, иккинчи томонда истеъмолчи фуқаролар қатнашадилар. Чакана савдо муносабатларини одатдаги оддий товар айирбошлаш ҳаракати сифатида баҳолаб бўлмайди. Бу ўринда шартнома муносабатларини бошлашдан асосий мақсад фуқароларнинг маиший эҳтиёжларини қондириш ҳисобланади. Шартноманинг охир-оқибат натижаси савдо хизмати сифати бўлиб, унинг таркибига сотилаётган товарларнинг сифатигина эмас, балки яна истеъмолчига товарларни сотиб олишда маълум қулайликлар яратиш мақсадидаги қўшимча хизматлар, шунингдек юқори даражадаги хизмат кўрсатиш мадания ти ҳам киради. Юқорида айтиб ўтилганидеқ чакана олди-сотди шартномасида қатнашувчи тарафлар ўзига хос мақомга эга: сотувчи сифатида юридик шахслар (мулк шаклидан қатьи назар) ва фуқаролар (юридик шахс ташкил этмасдан тадбиркорлик билан шуғулланувчи) ҳамда сотиб олувчи сифатида фуқаролар - истеъмолчилар иштирок этади. «Истеъмолчиларнинг ҳуқуқарини ҳимоя қилиш тўғрисида»ги қонунда истеъмолчи фойда чиқариб олиш билан боғлиқ бўлмаган ҳолда шахсий истеъмол ёки хусусий хўжаликда фойдаланиш мақсадида товар сотиб олувчи, иш, хизматга буюртма берувчи ёхуд шу ниятда бўлган фуқаро (жисмоний шахс) деб таъриф берилган. Барча ривожланган мамлакатлар фуқаролик ва савдо қонунларида истеъмолчининг алоҳида ўзига хос имтиёзли мавқеи мустаҳкамлаб қўйилган бўлиб, бу «истеъмолчи ҳар доим ҳақ» деган тамойилда ўз ифодасини топган. Ҳақиқатан ҳам, ҳар қандай ишлаб чиқариш, бозор муносабатларининг пировард мақсади истеъмолчиларнинг эҳтиёжини қондиришга қаратилиши

лозим. Истеъмолчи бўлмаса ишлаб чиқариш ҳам, бозор ҳам мавжуд бўлмайди. Бошқа томондан олганда, истеъмолчининг манфаатлари инсон манфаатларининг айнан ўзидир. Инсон – истеъмолчи фуқаро ўз ҳаётида жуда кўп ва хилма-хил товарларга ва хизматларга мухтож. Айни вақтда, у товарларнинг барчаси ҳақида уларнинг барча тафсилотлари бўйича маълумотлар ва билимларга ҳар доим эга эмас ва зотан, бунга зарурат ҳам йўқ. Бинобарин, инсон ўзи сотиб оладиган товарларнинг хусусиятлари ҳақида махсус билимга эга эмас деб тан олинар экан (бу ҳолат ривожланган мамлакатлар қонунларида ва иш муомаласи одатларида мустаҳкамлаб қўйилган), бу ҳолда заиф томон - истеъмолчи қўшимча ҳуқуқларга эга бўлмоги, сотувчи зиммасига эса қўшимча мажбуриятлар юкланмоғи лозим бўлади. Чакана олди-сотди шартномасининг муҳим ўзига хос хусусиятларидан бири - тарафларнинг шартнома олдидан ўзаро алоқалари, мулоқотлари ва муносабатларнинг ҳуқуқий ифодаси ҳисобланади. Бу мулоқотдан асосий мақсад истеъмолчини қизиқтирувчи барча маълумотларни унга билдириш, истеъмолчининг ахборотлар олишга бўлган ҳуқуқларини таъминлашдир. Истеъмолчи нафақат товар ҳақида, балки ушбу товарни тайёрловчи, сотувчи ҳақида ҳам тўғри ва тўлиқ маълумотларга эга бўлиши лозим. «Истеъмолчиларнинг ҳуқуқларини ҳимоя қилиш тўғрисида»ги Қонуннинг 5-моддасига асосан, товарни ишлаб чиқарувчи ва сотувчи ўз корхонасининг номи, жойлашган (юридик) манзили ҳақида, шунингдек сотувчи иш тартиби ва савдо қоидалари ҳақида ҳам тўлиқ маълумот бериши шарт. Айни вақтда ишлаб чиқарувчи (сотувчи) истеъмолчига ўзи реализация қилаётган товар ҳақида ўз вақтида зарур, тўғри ва тушунарли маълумот бериши шарт. Товар ҳақидаги маълумотларда қуйидагилар кўрсатилиши шарт: товар мажбурий талабларга мувофиқ келиши шарт бўлган норматив ҳужжатнинг номи;

товарнинг асосий истеъмол хусусиятлари, шу жумладан, ўзига хос хусусиятлари рўйхати; баҳоси ва сотиб олиш шартлари; айрим турдаги товарларнинг (масалан, озик-овқат маҳсулоти) ишлаб чиқарилган санаси; ишлаб чиқарувчининг кафолат мажбуриятлари; товардан самарали ва хавфсиз фойдаланиш қоидалари ва шартлари; товарнинг хизмат (яроқлилик) муддати ва ушбу муддат ўтиши оқибатлари; ишлаб чиқарувчининг номи, мулкчилик шакли, руйхатга олиш ва лицензия гувоҳномасининг номери; ишлаб чиқарувчининг ҳамда улар истеъмолчидан даъво қабул қилишга ваколат берган, шунингдек, таъмирлаш ишларини бажарадиган ва техникавий хизмат кўрсатадиган корхоналарнинг манзиллари; товарларни сақлаш, хавфсиз утилизация қилиш усуллари ҳамда қоидалари. Агар товар сертификатлаштирилиши лозим бўлса, сертификатга доир маълумотлар. Товар ҳақида нотўғри маълумот берилган тақдирда ёки бу маълумотлар етарли даражада тўлиқ бўлмаса ва бунинг оқибатида истеъмолчи зарур истеъмол хоссаларига эга бўлмаган товар сотиб олишига сабаб бўлса, харидор шартномани бекор қилишга ва ўзига етказилган зарарларнинг қопланишини талаб қилишга ҳақли. Сотиб олинган товар ундан кўзланган мақсадда фойдалана олмасликка сабаб бўлса, истеъмолчи бундай маълумотларнинг кўпи билан уч кун ичида берилишини талаб қилишга ҳақли. Агар бу шарт бажарилмаса, истеъмолчи шартномани бекор қилиб, зарарнинг қопланишини (товар учун тўланган ҳақни, товарни уйга келтириш бўйича транспорт харажатлари ва ш.к) талаб қилишга ҳақли.

Истеъмолчининг товар ҳақидаги нотўғри ёки етарли даражада тўлиқ бўлмаган маълумот туфайли етказилган зарарни қоплаш ҳақидаги талаблари сотиб олинган товарнинг хоссалари ва жихатлари ҳақида истеъмолчи махсус билимга эга эмас, деган қоидага асосланиб қараб чиқилади. Чакана олди-сотди шартномаси оммавий шартнома ҳисобланади (ФК 425- моддаси). Бунинг маъноси шуки, сотувчи сотиш учун таклиф этган товарни бунинг учун тегишли ҳақни тўлашга рози бўлган ҳар қандай шахс сотиб олишга ҳақли (агарда қонунга зид бўлмаса, масалан, спиртли ичимликлар ёш болаларга сотилиши мумкин эмас ва ҳ.к.). Маълумки, сотувчи харидорларни жалб этиш учун товарларини кенг реклама қилади. Реклама қилиш сотувчи учун муайян оқибатларни вужудга келтиради. ФКнинг 426-моддасига асосан чакана олди-сотди шартномасининг барча муҳим шартларини ўз ичига олган ҳолда, товар рекламаси, каталоглар, шунингдек товарни номуайян шахслар доирасига қаратилган бошқа таърифлари орқали товар таклиф қилиш оммавий оферта ҳисобланади. Товарларни кўргазмага қўйиш, уларнинг намуналарини намойиш қилиш ёки савдо бўлаётган жойда сотилаётган товарлар ҳақида маълумотлар (таърифлар, каталоглар, фотосуратлар ва ҳ.к.) бериш, сотувчи товарни сотишга мўлжалланмаганлигини аниқ белгилаган ҳоллардан ташқари, нархи ва олди-сотди шартномасининг бошқа муҳим шартлари кўрсатилган, кўрсатилмаганидан қатъи назар, оммавий оферта ҳисобланади. Бинобарин, сотувчи пештахтага (витринага) қўйилган товарни сотишдан бош тортишга ҳақли эмас. Харидор чакана олди-сотди шартномаси тузилгунга қадар товарни кўздан кечириш, ўз олдида товарнинг хоссаларини текширишни ёки товардан қандай фойдаланишни кўрсатишни талаб қилишга ҳақли. Айни вақтда, харидор товарнинг сифатини, бутлигини, вазни ва нархини текшириш ҳуқуқига эга. Сотувчи бунинг учун назорат ўлчов асбоблари, нархга доир ҳужжатларни тақдим этиши лозим.

Тузилган заҳоти бажариладиган чакана олди-сотди шартномаси, қоида тариқасида оғзаки тузилади (қонун ҳужжатларида белгилаб қўйилган ҳоллар бундан мустасно). Тузилган вақтдан бошлаб (олдиндан бериладиган буюртмалар бўйича, жўнатма-савдо ва бошқа ҳолларда) бажариладиган шартнома ёзма шаклда тузилади (Қонуннинг 8-моддаси). Олди-сотди амалга оширилганда, истеъмолчига касса ёки товар чеки берилади. Товарни касса ёки товар чеки бермасдан сотиш тақиқланади (Қонуннинг 1-моддаси). Чакана олди-сотди шартномасининг хусусиятларидан бири шуки, истеъмолчи ўзи танлаган товарни сотиб олишдан унинг ҳақини тўлагунга қадар хоҳлаган вақтда воз кечишга ҳақли. Хатто товар учун ҳақ тўланиб, товар мақбул сифатли бўлса (камчилик ва нуксонлари йўқ бўлса) ҳам, бироқ товар ўзининг шакли, фасони, ранги, хажми ёки бошқа сабабларга кўра истеъмолчига ёқмаса ёки истеъмолчи ундан фойдалана олмаса, харидор харид килган кундан эътиборан ўн кун ичида сотувчидан уни айни шундай товарга алмаштириб олишга, агар бундай товар бўлмаса, пулини қайтариб олишга ҳақли. Товарни бундай тартибда алмаштиришда унинг товар кўриниши, сифати, пломбаси, фабрика ёрлиғи бус-бутун бўлиши, касса (товар) чеки ҳам сақланган бўлиши шарт. Озиқ-овкат маҳсулотлари, заргарлик буюмлари, дори-дармонлар, ички кийимлар, пайпоқлар, чойшаб-ёстиқ жилдлари алмаштириб берилмайди. Қонун истеъмолчини сифатсиз товар сотиб олишга ёки бир товарга бошқа товарни қўшиб сотиб олишга мажбурлашни тақиқлайди. Бошқача айтганда, шартноманинг истеъмолчи ҳуқуқларини чеклаб қўядиган ва қонунга зид бўлган талаблари ҳақиқий ҳисобланмайди (Қонуннинг 2-моддаси). Сотувчи томонидан истеъмолчига сифати лозим даражада бўлган товар топширилиши шарт. Товарни ишлаб чиқарувчи ушбу товарнинг яроқлилик муддати давомида фойдаланиш имкониятини таъминлаши лозим.

Ишлаб чиқарувчи товардан кафолат муддати ва хизмат муддати мобайнида товарнинг таъмирланиши, унга техник хизмат кўрсатишни ташкил этиши лозим. ФКда ҳам, “Истеъмолчиларнинг ҳуқуқларини ҳимоя қилиш тўғрисида” қонунда ҳам истеъмолчига сифати лозим. даражада бўлмаган товар сотилиши оқибатлари ва бунинг учун сотувчининг жавобгарлиги аниқ-равшан белгилаб қўйилган. Бундай ҳолатда сотувчи билан биргаликда товарни ишлаб чиқарган корхона ҳам солидар жавобгар бўлади. Истеъмолчи ўзига қулай бўлишига қараб, сотувчига ёки корхонага ўз талабларини қўя олади. Харидорга сифати лозим даражада бўлмаган товар сотилганда сотиб олувчининг ҳуқуқлари олди-сотди шартномаси ҳақидаги параграфда баён қилинган. Бунга қўшимча равишда шуни ҳам таъкидлаб ўтиш ўринлики, сотувчи (товар ишлаб чиқарувчи) товарнинг хавфсиз бўлиши учун ҳам масъулдир. Ишлаб чиқарувчи товар хизмат муддати ёки яроқлилик муддати давомида, агарда бундай муддат белгиланмаган бўлса, товар истеъмолчига сотилган кундан эътиборан ўн йил мобайнида унинг хавфсиз бўлишини таъминлаши шарт. Товар тузилишига, ишлаб чиқарилишига, таркибига боғлиқ бўлган ёки бошқа нуқсонларни, шунингдек, истеъмолчининг ҳаёти, соғлиғи ёки мол-мулкининг хавфсизлигини таъмин эта олмайдиган воситалар қўлланиши оқибатида истеъмолчининг ҳаёти, соғлиғи ёки мол-мулкига етказилган зарар сотувчи (ишлаб чиқарувчи) томонидан қопланиши лозим. Истеъмолчининг ҳуқуқлари бузилиши туфайли унга етказилган маънавий зарарни, уни етказган шахс, башарти у айбдор бўлса, тўлаши лозим. Маънавий зарар учун тўланадиган ҳақ миқдорини суд белгилайди. Маънавий зарар мулкий зарардан қатъи назар, қопланиши лозим. Масалан, Д. исмли фуқаро скрипка сотиб олди. Скрипканинг сифати лозим даражада бўлмаганлиги сабабли Д. иштирок этган халқаро конкурсда муваффақиятсизликка учради. Бинобарин, Д.га ўзига хос маънавий зарар етди. Д.нинг талаби билан суд мусиқа асбоблари сотувчи фирмадан Д.

фойдасига маънавий зарар учун маълум пул суммаси ундириш ҳақида адолатли ва қонуний қарор чиқарди. Чакана олди-сотди шартномасининг турларига товарларни насияга сотиш, аввалдан буюртма бўйича сотиш, товарни намуна бўйича сотиш, ўз- ўзига хизмат кўрсатиш савдоси, автоматдан фойдаланган ҳолда товар сотиш ва ш.к. киради. Товарлар насияга сотилганда харидор доимий, барқарор ва белгилаб қўйилган суммадан кам бўлмаган даромад манбаига эга бўлиши шарт. Товар ҳақини белгиланган муддатларда тўламаган сотиб олувчи мулкий жавобгар бўлади. Харидор сотувчи билан тўлиқ ҳисоб-китоб қилгунга қадар ўз доимий яшаш жойини ўзгартирса, бу ҳақда сотувчини огоҳлантириши лозим. Аввалдан буюртма бериш бўйича олди-сотди озиқ-овқат товарларига, шунингдек транспорт воситаларининг олди-сотдисида қўлланилади. Буюртма берган харидор кейинчалик буюртмани бекор қилганда сотувчига тегишли зиёнларни тўлаши лозим. Буюртма оғзаки (асосан, озиқ-овкат товарларига), ёзма булиши мумкин. Шартномада белгиланган муддатда харидорнинг товарни кдбул қилиб олиш учун келмаслиги ёки бошқа зарур ҳаракатларни амалга оширмаслиги шартномадан бир томонлама воз кечиш деб каралиши мумкин. Товар автоматдан фойдаланиб сотилган ҳолларда автомат эгаси сотувчининг номи (фирма номи), у жойлашган манзил, иш тартиби, шунингдек харидорнинг товарни олиш учун амалга ошириши зарур бўлган ҳаракатлари ҳақида маълумотларни автоматга жойлаштириши ёки бошқача усулда харидорга тақдим этиши лозим. Бундан асосий мақсад харидор сотувчининг кимлигини аниқ билиши ва зарур ҳолларда унга талаб қўя олишини таъминлашдир. Ўз-ўзига хизмат кўрсатиш савдосида товар харидор томонидан танланиб, савдо дўкони идишига (аравачасига) солинади. Харидор пулини тўлагандан кейин унда мулк ҳуқуқи вужудга келади. Савдо дукони ходимлари

харидорларнинг шахсий буюмларини текширишга, бундай буюмларни савдо залига киришда қолдириб кетишни талаб қилишга ҳақли эмас. (Харидор ўз хоҳишига кўра қолдирганда, сотувчи унинг сақланиши учун жавобгардир). Ким ошди савдоси, товар биржаларида савдо-сотиқ шартномалари Товар мулкдори ёки мулкий ҳуқуқ эгаси ёхуд ихтисослашган ташкилот ким ошди савдосининг ташкилотчиси бўлиши мумкин. Ким ошди савдосининг ташкилотчиси суд қарорларини ижро этиш учун (мусодара қилинган, мажбурий тартибда ҳақ ундиришга қаратилган ашёларга, гаров ашёлари ва ҳ.к) ҳам ким ошди савдоси ташкил этади. Ким ошди савдоси бўйича ихтисослашган ташкилот товар мулкдори (мулкий ҳуқуқ эгаси билан шартнома тузиш асосида иш олиб боради, улар номидан ёхуд ўз номидан ҳаракат қилади. Ким ошди савдоси аукцион ёки танлов шаклида ўтказилади. Ким ошди савдосининг шакли, агарда қонунда бошқача тартиб белгиланган бўлмаса, сотиладиган ашёнинг мулк ёхуд мулкий ҳуқуқ эгаси томонидан белгиланади. Харидор сифатида фақат бир иштирокчи қатнашган аукцион ёки танлов ўтказилмаган ҳисобланади. Аукционлар ва танловлар очиқ ёки ёпиқ бўлиши мумкин. Очиқ аукцион ёки танловда ҳамма қатнашиши мумкин. Ёпиқ аукцион ва ёпиқ танловда шу мақсад учун махсус таклиф этилган шахсларгина қатнашадилар. Агар қонунда бошқача тартиб белгиланган бўлмаса, ташкилотчи ким ошди савдоси ўтказилиши ҳақида камида ўттиз кун олдин хабар қилиши керак Хабарда ким ошди савдосининг жойи, вақти ва шакли, ким ошди савдосига нима қўйилгани, шу жумладан, ким ошди савдосида қатнашишни расмийлаштириш тартиби, бошланғич нарх ҳақида маълумотлар мавжуд бўлиши шарт.

Умумий қоидага кўра, ким ошди савдоси ташкилотчиси аукцион ўтказишдан хоҳлаган вақтда, лекин у ўтказиладиган кундан камида уч кун олдин бош тортишга ҳақли. Ким ошди савдосининг ташкилотчиси уни ўтказишдан бош тортиш ҳақида муддатларга риоя қилмаган ҳолларда иштирокчиларнинг ҳақиқий (реал) кўрган зарарини тўлаши лозим. Ёпиқ аукцион ёки ёпиқ танловда ташкилотчи ким ошди савдосидан қайси муддатда бош тортганлигидан қатьи назар, ўзи таклиф этган иштирокчиларнинг реал зарарини тўлаши лозим. Ким ошди савдосининг қатнашчилари ким ошди савдоси ҳақида хабарда кўрсатилган миқдорда, муддатларда ва тартибда закалат пули тўлайдилар. Ким ошди савдосида қатнашган, лекин ғолиб чиқмаган иштирокчиларга закалат пули қайтарилади. Ғолиб чиққан шахснинг пули товар баҳоси учун тўланадиган ҳақ тартибига киритилади. Ким ошди савдосида энг юқори нарх таклиф қилган қатнашчи ғолиб ҳисобланади ва у билан олди-сотди шартномаси тузилади. Ғолиб билан ташкилотчи ўртасида ким ошди савдоси натижалари ҳақида баённома имзоланади. Агар ғолиб баённомани имзолашдан бош тортса, берган закалатидан маҳрум бўлади. Агар ташкилотчи баённомани имзолашдан бош тортса, закалат суммасини икки баробар қилиб қайтаради. Қонунда белгиланган қоидалар бузиб ўтказилган ким ошди савдоси манфаатдор шахс талаби билан суд томонидан ҳақиқий эмас деб топилиши мумкин. Масалан, ким ошди савдоси ҳақида нотўғри маълумот берилса ёки қатнашчилар олдиндан тил бириктириб олган бўлсалар ва ҳ.к. Ким ошди савдосини ҳақиқий эмас деб топиш ғолиб билан тузилган шартноманинг ҳақиқий эмаслигига сабаб бўлади (ФКнинг 381-моддаси). Биржалар ҳам олди-сотди шартномаларини тузадиган махсус тузилма ҳисобланади.

Фонд биржаларида қимматли қоғозлар олди-сотдиси амалга оширилади. Фонд биржаларининг фаолияти «Қимматли қоғозлар бозорининг фаолият кўрсатиш механизми тўғрисида»ги қонун билан тартибга солинади. Товар биржаларида эса мол-мулк сотилади. Биржаларда олди-сотди шартномаларининг хусусиятлари, энг аввало, биржа фаолиятининг ўзига хосликлари билан белгиланади (ким ошди савдоси, битимларни маклер ёзувлар орқали расмийлаштиради, биржа сотишга қўйиладиган мол-мулклар савдоси ва ҳ.к). Биржаларга олди-сотди шартномаларига нисбатан ФКнинг тегишли нормалари, “Биржалар ва биржа фаолияти тўғрисида”ги қонун қўлланилади. Муайян биржада тақдим этилган товарлар олди-сотдиси бўйича биржа воситачилари ўртасида тузилган биржа савдо-сотиғи қоидаларига мувофиқ амалга оширилган ва белгиланган тартибда биржа рўйхатидан ўтган битимлар, суммасидан қатьи назар, нотариал идорадан тасдиқланмайди (кўчмас мол-мулк корхоналар олди-сотдиси бундан мустасно). Биржа битимининг мазмуни (товарнинг номи, нархи, ижро ўрни ва муддатидан бўлак) ошкор этилиши мумкин эмас. Битимларда: бор (мавжуд) товарларнинг олди-сотди битимлари, шу жумладан, товарларни дарҳол бериб юбориш ёки етказиб бериш ёхуд товарга эгалик ҳуқуқини берувчи ҳужжатлар топширишни ҳам кўзда тутувчи олди-сотди битимлари; форвард битимлар, яъни бор (мавжуд) товарни етказиб бериш муддатларини кечиктирган ҳолда харид қилиш ва сотишга доир битимлар; фьючерс битимлар, яъни стандарт контрактларга доир битимлар; опцион битимлар, яъни товарларни ёки товарлар етказиб бериш контрактларини белгиланган нархлар бўйича келгусида харид қилиб олиш ёки сотиш ҳуқуқларига доир олди-сотди битимлари ва ш.к. тузиш мумкин.

Форвард, фьючерс, опцион битимлар тузилганда биржа ўзининг ҳисоб-китоб марказлари орқали битимлар ижросини кафолатлаши шарт.

O'xshashlar

Олди-сотди шартномаси

Тадбиркорлар иштирокида олди-сотди шартномаси

Махсулот етказиб бериш сохасидаги тадбиркорлик

Маҳсулот етказиб бериш шартномаси

Банк омонати ва банк ҳисобварағи шартномаси. Ҳисоб-китоблар. Қарз шартномаси ва кредит шартномаси