Ғишт деворли биноларни барпо этиш - Arxitektura - Referatlar

Ғишт деворли биноларни барпо этиш

Yuklangan vaqt:

21.05.2023

Ko'chirishlar soni:

0

Hajmi:

332 KB

Ko'chirib olish

Ғишт деворли биноларни барпо этиш Режа: 1. Умумий қоидалар 2. Ғиштли деворларни барпо этишни ташкил этиш 3. Монтаж ва ғишт – тош ишларини оқим усулида бажариш 4. Қиш мавсумида ғишт-тошли конструкцияларни барпо этиш

Умумий қоидалар Тўсувчи девор сифатида сунъий ва табиий тошлар кенг қўлланилади. Бу хом ашёлар захирасини кўплиги ва тош конструкцияларни бир қатор қуйидаги ижобий эксплуатацион хусусиятлари билан боғлиқдир: чидамлилик, мустахкамлик тавсифи, об-хаво таъсирига ва оловга чидамлилиги, амалда турли кўринишдаги бино ва иншоотларни барпо эта олиш мумкинлиги. Ғиштли деворлар хоналарнинг юқори даражада герметизациясини иссиқдан асраш ва товушдан изоляция қилишни таъминлайди. Ғишт меъморий нуқтаи назардан шаҳар массивларини умумий кўринишини янада кўркамлаштиради. Бундан ташқари, ғиштли уйлар иссиқ, ёзда эса энг шинамдир. Ғиштлар, ички ва ташқи юк кўтарувчи деворларни ва пардеворларни, лифт шахталари, устунларни, зина хона деворлари ва ҳоказоларни барпо этишда кенг фойдаланилади. Кўп қаватли каркасли биноларда ғиштли ташқи деворлар юк кўтарувчи – ора ёпмалардан горизонтал кучланишларни қабул қиладиган; ўзини-ўзи кўтарадиган(тўсувчи) – темир ёки темирбетон каркасга махкамланган ва фақат ўзини массасини кўтарадиган ва осма – ўрама тўсинга ёки лентали ойналарни устига таянадиган бўлиши мумкин. Осма деворларда ғишт терими фақат меъморий мақсадга эга бўлиб, оригинал ва кўримлили фасад яратишга қаратилган. Ғиштли деворларнинг конструктив ўзига хослиги . Ғишт теримининг мустахкамлиги ғишт – тош ишларини сифатига, ғишт – тош конструкцияларни ўзига хослиги, ишлаш шароитига, ғишт ва қоришма хусусиятларига боғлиқ. Ғишт ва керамик тошлар, пластик ва ярим қуруқ прессланган ҳолатда тўлиқ (бутун) ва ичи кавак қилиб чиқарилади. Ўлчами бўйича миллиметрда ғишт махсулотлари қуйидагиларга бўлинади: оддий ғишт (250 × 120 × 65), қалинлаштирилган ғишт (250 × 120 × 88), модуль ўлчамли ғишт

(288×138×138), тош (250 × 120 × 138), модуль ўлчамдаги тош (288 × 138 × 138), йирик тош (250 × 250 × 138), бўшлиқлари горизонтал бўйича жойлашган тош (250 × 250 × 120) ва (250 × 200 × 80). Ғишт тўлиқ ва ичи кавак ҳолда, тошлар эса фақат ичи кавак ҳолда чиқарилади. Пардозли ғишт ва керамик тошлар теришга ва бир вақтни ўзида бино деворларини пардоз қопламаси учун мўлжалланган бўлиб, уларнинг юз тарафи текис, бўртма ва фактурали бўлиши мумкин. Ғишт ва керамик тошлар мустахкамлиги бўйича етти маркага бўлинади, кг/см2 да: 300, 250, 200, 150, 125, 100 ва 75. Ғиштли конструкцияларда қуйдаги маркадаги қоришмаларни қўллаш назарда тутилган, кг/см2: 4, 10, 25, 50, 75, 100, 150 ва 200. Қоришма тайёрлаш учун қўлланиладиган боғловчилар, тўлдиргичлар, қўшимчалар ва сув меъёрий хужжат талабларига жавоб бериши керак. Қоришмалар асосан автоматлаштирилган қоришма тайёрлайдиган узелларда қоришмани хамма ташкил этувчилари аниқ ўлчамларда тортилиши таъминланган ҳолда тайёрланиши керак. Ишлаш шароитига қараб алохида элементларни (устунлар, деворлар ва ора деворларни) турғунлигини ва юк кўтариш қобилиятини ошириш учун арматуралар билан кучайтирилади. Теримда арматура горизонтал чокларда ўрнатилади. Алохида стерженлар ёки тўрлар ўрнатилганда пастдаги ва юқоридаги химоя қатлами 4 мм кам бўлмаслиги керак. Ташқи деворлар уч асосий конструктив схема бўйича бажарилади: йирик ёки яхлит деворни бутун қалинлиги бўйича ғишт териш (1 а- расм); девор орасига иссиқликни сақлайдиган материаллар жойлаб териш (1, б-расм); девор юзасида иссиқни сақлайдиган материал билан териш.

1 –расм. Ташқи ғишт деворларнинг конструктив схемалари: 1− ғишт терими; 2 – иссиқлик асрагич(сақлагич); 3 – сўвоқ; 4 – гипсокартон. Охирги йилларда иссиқни сақловчи сифатида, янги материаллар пайдо бўлиши муносабати билан, иккинчи ва учинчи конструктив схемалар қўлланилиши кенг ривож топди. Иккинчи схемада (1б - расм) иситгич девор орасига жойлаштирилади. Биринчи босқичда деворни асосий қисми терилади (1,5 – 2 ғиштли деворларда). Қоришма чокига хар икки қатордан кейин қадами 50 см да, диаметри (5 – 8 мм) ва узунлиги иссиқлик сақлагич қалинлигидан 50 мм узунроқ чиқиб турган зангламайдиган темирдан ясалган стерженлар ўрнатилади. Шу стерженларга листли иссиқни сақловчи (пенополистирол кабилар) бир стандарт лист баландлигида ўрнатилади (киргизилади). Шундан сўнг ўрнатилган зангламайдиган стерженларга бириктирилиб деворни иккинчи қисми (0.5 – 1 ғишт) терилади. Учинчи схема, иссиқни сақловчи материални ўрнатишни икки имконини назарда тўтади: ғиштли деворни ичкарисидан ва ташқарисидан. Ташқаридан иссиқ сақлагич фасадни пардозлаш элементи сифатида қўлланилади, унга пардозлаш тўри монтаж қилинади, фактура қатлами сувалади ва бўялади. Фасадларни тош, витраж, декоратив панеллар билан пардоз қилганда иссиқ сақлагич осма ташқи конструкциялар системасининг ички тарафида бўлади. Иссиқ сақлагич ичкаридан ўрнатилганда металл каркасга ўрнатилган гипсокартон листлари билан пардозланади ёки камроқ ҳолларда металл сетка бўйлаб сувоқланади ва бўялади.

Ғишт териш ва йиғма конструкцияларни монтаж қилишдаги ўзаро боғлиқлик. Ташқи деворлари ғиштли кўп қаватли биноларни барпо этишдаги етакчи жараён бу каркасининг йиғма конструкцияларини лойиҳа ҳолатига ўрнатишдир. Бу жараённи бажариш ритм- маромига барча бирга бажариладиган жараёнлар ва шунингдек ғишт терими ҳам бўйинсуниши керак. Барча бу жараёнлар бир-бири билан фазо ва вақт миқёсида боғланган бўлиши керак. Ташқи ва ички деворлари ва пардадеворлари ғиштли биноларда монтаж ишлари хажми кўп бўлмаганда (перемичка-тепадон, алохида йиғма элементлар, ёпма панеллар) етакчи жараён ғишт теришдир. Айрим жараёнларни бажариш кетма-кетлигига қараб, бинолар дифференциал (алоҳида), мажмуали ёки аралаш усулда барпо этилади. Дифференциал (алохида) усулда бинодаги хамма ишлар кетма-кет олиб борилади: олдин бутун баландлик бўйича бино каркаснинг ички конструкциялари барпо этилади, сўнг барча ташқи ва ички деворлар ғиштдан терилади ва шундан сўнг пардозлаш ишлари бажарилади. Бу усул кенг фронт билан айрим ишларни олиб бориш имконини беради, уларни давомийлигини қисқаришига имкон беради, аммо ишларни бир вақтда биргаликда бажарилмасдан кетма-кет бажарилиши бинони барпо этилишини умумий давомийлигини узайишига олиб келади. Мажмуали (биргаликдаги) усулда монтаж ва ғишт териш ишларини қўшни қамровларда параллел олиб борилишини таъминлайди, баъзи пайтларда бинони пастки қаватларида пардозлаш ишларини бошлаш мумкин. Монтаж ва ғишт териш ишларини биргаликда олиб бориш усули қурилиш муддатини кескин қисқартириш имконини беради. Аралаш (комбинациялашган) усулда – каркасни маълум баландликкача монтаж қилиш мумкин, сўнг ғишт териш ишлари шу баландликгача бажарилади, иш шу кетма-кетликда давом эттирилади. Бу усулни устунлари 2...3 қаватга мулжалланган каркасли биноларда қўллаш мумкин.

Ғиштли деворларни барпо этишни ташкил этиш Кўп қаватли каркасли биноларда ғишт теришнинг асосий усули – оқим усулидир, уни асосига қуйидаги принциплар қўйилади: • ҳамма ишлар мажмуасини қамров-ярус системаси бўйича бажариш; • ғишт теришдаги мажмуали жараённи ўзининг ихтисослашган звеноларига эга ташкил этувчи жараёнларга бўлиш; • доимий таркибли ихтисослашган звеноларнинг жараёнларни қамров ва ярус бўйича кетма-кет бажариши; • звеноларни қамровдан қамровга оқим қадами деб аталмиш бир хил • оралиқдаги вақтда ўтишлари; • қамровдаги монтаж ва ғишт ишларни давомийлигини мажбурий боғлаш. Кўп қаватли биноларни барпо этиш жараёнини одатда мажмуали (комплекс) бригада амалга оширади. Бригададаги ишчилар сони ва малакавий таркиби− иш фронти, қурилиш муддати, қабул қилинган ишларни бажариш усулига, ишчи ва машиналарни мехнат унумдорлигига қараб аниқланади. Мажмуали бригада монтажчилар, ғишт терувчилар, дурадгорлар, такелажчилар, транспорт ишчиларидан ташкил топади. Монтажчи ёки ғишт терувчи звенолар бригадада етакчи бўлиб, бошқа ихтисослик звенолари таркиби етакчи звенони нормал ишини таъминлаш нуқтаи назаридан комплектлаштирилади. Мажмуали бригада сони бинонинг конструктив хусусияти ва айниқса теримга қараб 20 дан 40 одам гача ўзгаради. Ғишт теришни оқим усулида бажарганда ишлар технологиясининг асосий тушунчалари ўзига хос таърифларга эга. Қамров – намунавий, бинонинг режада (планда) такрорланувчи бир қисми бўлиб, мазкур ёки кейинги участкаларда (ярим секция, секция, икки секция) ғишт терувчилар бригадаси ишни оқим усулида ва бутун сменаларда бажаради ва ғишт терими ҳажми тахминан тенг бўлади.

Бўлинма - қамровни каррали қисми, ғишт терувчи звенога бир неча смена давомида иш жойини ўзгартирмасдан ишлаши учун ажратилган иш жойи. Ярус – бинони баландлиги бўйича шартли чегараланган бир қисми бўлиб, у ерда бир смена давомида ораёпмага нисбатан ўзгармас баландликда ишчилар ғишт териш жараёнини бажарадилар. Бўлинма қават баландлигига ва девор қалинлигига қараб, баландлиги бўйича 2…3 ярусга бўлинади. Бўлинмалар сони ва уларнинг ўлчамлари звеноларнинг мехнат унумдорлиги ва ғишт теришдаги мехнат сарфига қараб белгиланади. Қалинлиги икки ғиштли оддий девор теришда “иккилик” звено билан бўлинма узунлиги 12-17 м, “учлик” звено учун 19-25 м ва “бешлик” звено учун – 24-40 м ни ташкил этади. Ғишт теришда энг юқори мехнат унумдорлиги 60-80 см баландликда ғишт терилганда бўлади, нол сатҳида ёки баландлик 1.1...1.2 м бўлганда меҳнат унумдорлиги 50% ларгача тушади, шунинг учун шу чегараларда ярус баландлиги белгиланади. Қават баландлиги 2,8 м девор қалинлиги 2 ғишт бўлса, ярус баландлиги 1,5 м деб қабул қилинади, яъни қаватда 2 та ярус қабул қилинади. Агарда девор қалинлиги 2 ғиштдан кўп бўлса ва қават баландлиги 3 м ортиқ бўлса қават уч ярусга бўлинади. Ғишт териш бир қаторли ёки кўп қаторли боғланиш билан терилади, оралиқ деворлар ва устунлар тўрт қаторли боғланиш билан терилади. Биринчи ярусни ғишт терувчилар ердан ёки қаватлар ора ёпмасида туриб терадилар, иккинчи ва учинчи ярусларни очиладиган ёки икки ярусга ўрнатиладиган сўрилардан туриб терадилар. 4 м ва ундан баланд деворларни ғишт терувчилар қувурсимон хавозалардан туриб терадилар. Ғишт терувчи звеноларни (комплектлаш) жамлаш теримнинг конструкцияси, қалинлиги ва мураккаблигига, ишларнинг умумий ҳажми ва мехнат сарфига, ишлатилаётган монтаж механизмларини сонига боғлиқдир.

Монтаж ва ғишт – тош ишларини оқим усулида бажариш Ғишт деворли кўп қаватли биноларни барпо этишни ўзига хослиги шундан иборатки, монтаж ва ғишт териш ишларини қўшиб олиб борили- шидадир. Бу иккала жараён бир-бири билан ўзаро боғланган ва бу ишлар параллел ёки озгина вақт оралиғида фарқ билан бажарилади. Бу ишларни бажаришни ўзига хослиги шундаки, уларни бажариш керакли технологик танаффусларга амал қилиш билан боғлиқ. Навбатдаги қават каркасларини монтаж қилишга туташув жойлардаги, тугунлардаги ва қаватлар ора ёпмалар чокларидаги бетон қоришмаси энг камида 70%, ғишт теримида 50% лойиҳадаги мустахкамликка эришгандан сўнг рухсат этилади. Ғиштли биноларни барпо этишни фақат оқим усулида, яъни бинони мехнат унумдорлиги бўйича бир хил бўлган қамровларга бўлинишини назарда тутадиган бир-, икки- ва учқамровли системаларда олиб бориш керак. Ишларни ташкил этишнинг бир қамровли системаси билан асосан режада кичикроқ бир секцияли ва бир қаватли бинолар қурилишларда, бутун қават уч ярусга бўлиниб ғишт терилганида қўлланилади. Бу системада ғишт теришни ва монтажни, монтажчи касбини ўзлаштирган ғишт терувчилар бажарадилар. Ғишт териш ишлари бинони периметри бўйича ярус баландлигида смена охиригача тугатилиши керак. Шу куни иккинчи сменада ёрдамчи ишлар бажарилади: сўриларни ўрнатиш, сўриларга ғишт келтириш ва бошқа ишлар. Уч кундан сўнг, яъни учинчи ярус ғиштлари териб бўлингандан сўнг, бригада 4...5 одамдан иборат монтаж звеноларга бўлинадилар, звенолар сонига қараб йиғма элементлар икки ёки уч смена давомида монтаж қилинади. Хавфсизлик техникаси қоидаларига биноан монтаж ишлари олиб борилаётган қамровларда (ишчи участкаларда) бир вақтнинг ўзида ғишт терувчилар ишлаши ёки тескариси бўлиши мумкин эмас.

Қишлоқ қурилишидаги ёйилган кичик объектларни барпо этишда, ғиштли коттеджлар қурилишидаги хамма мажмуа ишларни звенолар ичида ихтисосларга бўлинган битта мажмуали бригада олиб боргани мақсадга мувофиқдир. Бундай бригада таркибига ғишт терувчилар, монтажчилар, такелажчилар, дурадгорлар звенолари ва транспорт ишчилари кириш керак. Бригадада ғишт терувчи звено етакчи бўлиб, бошқа звенолар ғишт терувчи ва монтажчи звеноларни иш билан таъминланишини эътиборга олган ҳолда жамланади. Меҳнатни ташкил этиш ва тақсимотини бу шаклида бригада ичидаги бекор туриб қолишларни қисқартириш, ёрдамчи ишлар хажмини камайтириш мумкин. Оқим усули билан ишлар ташкил қилинганда, ўз ишини аниқ ва бир маромда бажариб бир объектдан иккинчи объектга кетма-кет ўтувчи, нолинчи циклни барпо этадиган, ғишт терадиган, йиғма конструкцияларни монтаж қиладиган, том ёпувчилар ва пардозчилардан иборат тўртта бригада (звено) бўлиши мақсадга мувофиқдир. Икки қамровли система энг кенг тарқалган бўлиб, у икки, уч ва тўртта секцияли бинолар қурилишида қўлланилади. Барпо этилаётган бинони тархи бўйича, мехнат сарфи тенг бўлган икки қисмга бўлинади: биринчи қамровда ғишт териш ишлари олиб борилади, иккинчи қамровда қават каркаслари монтаж қилинади, пардадеворлар ва бошқа конструкциялар монтажи, сўрилар ўрнатилади. Звенодаги ишчиларни таркиби шундай танланиши керакким, иккала звено қамровлардаги ишларни бир вақтни ўзида тугатишлари керак, ва қамровларни алмаштиришлари керак. Бундай кетма- кетлик бинонинг хамма қаватларни барпо этишда сақланиб қолади. Ишлар бир, икки ва уч сменада ташкил этилиши мумкин. Икки қамровли система одатда кўплаб икки ярусли ғишт терими қабул қилинган, қават баландлиги 3 м гача бўлган биноларда қўлланилади. Турар жой биноси намунавий қаватининг ғишт терими ва йиғма конструкциялар монтажини икки қамровли системада ва ғишт теримини фақат биринчи сменада бажарилганда ташкил этиш 1-жадвалда келтирилган.

Асосий ишчи жараёнлар 4 мажмуага йиғилган – ғишт териш, қоришма ва ғиштни иш ўрнига узатиш, сўриларни алмаштириш, монтаж ва бир вақтда бажариладиган жараёнлардан иборат бўлади. Қаватдаги ишларни энг маъқул давомийлиги кранни ва ғишт териш давомийлигини ўзаро боғлаш билан аниқланади. Қамровлар сони қаватдаги ғишт териш ишларини хажми ва бинодаги секциялар сонига қараб бирдан учгача қабул қилинади, ишчи участкалар сони қамровда – 2...4 гача, яруслар сони – икки қават баландлиги 2,8 м гача бўлса ва уч 2,8 м дан баланд бўлса. Ғишт териш ишларини қаватдаги давомийлилиги (кунда), ғишт терувчилар фақат биринчи сменада ишлаганларида қўйидаги боғлиқликка бўйинсунади. Tter = Nq Nu Nya бунда, T ter – ғишт териш ишларини давомийлиги; N q – қамровлар сони; N u – ишчи участкалар сони; N ya – қават баландлиги бўйича қабул қилинган яруслар сони. Қаватдаги ғишт териш ишларини бажарилишини давомийлигини крандан икки сменада фойдаланилгандаги ишлаган вақти билан боғланган бўлиши керак. Кўрилаётган жадвал 14.1. да режалаштирилган вақт 16 смена ёки 8 иш куни. Бу ҳолатда: T ter = 2•2•2 = 8 kun. Икки қамровли система бўйича бино барпо этилганда, бино бўйлама ўқи бўйича икки қамровга бўлиниши мумкин ва иккала қамровда ишлар бир вақтни ўзида олиб борилади. Биринчисида уч ярусли қават баландлиги бўйича девор терилади, иккинчисида – йиғма конструкциялар, пардадеворлар монтаж қилинади ва ғишт теримига ҳамроҳ ишлар бажарилади. Қаватдаги ғишт теришни биринчи қамровдаги монтаж кранидан узоқда жойлашган бўйлама ўқидан бошлайдилар.

Уч қамровли система – катта узунликдаги (асосан беш ва олти секцияли уйлар) бинолар қурилишида қўлланилади. Бино режада мехнат сарфи бир хил бўлган учта бир-бирига тенг қамровларга бўлинади. Биттасида терувчилар ғишт теришади, иккинчисида, дурадгорлар сўрилар ўрнатишади, транспорт ишчилари эса материалларни тайёрлайдилар, учинчи қамровда монтажчилар каркас-каркас конструкцияларини монтаж қиладилар. Секциялар сони олтидан кўп бўлган биноларни барпо этишда, ишни ташкил этиш ўрнатилган минорали кран сони бўйича бино иккита мустақил зоналарга бўлиниб икки ёки уч қамровли системада ташкил этилади. Ишни мақбул ташкил этишда қуйидагилар назарда тутилиши керак: • етакчи жараён – ғишт териш 1-чи сменада бажарилади, сўриларни қайта ўрнатиш, материалларни узатиш, бир вақтда бажариладиган ишлар – 2- чи сменада, монтаж – 3-чи сменада олиб борилади.

• қамровдаги ишларни давомийлиги кран 2...3 смена ишлаганда кран билан боғлиқ жараёнларни мехнат сарфига боғлиқ. • ғишт терувчиларни сони ғишт териш бўйича умумий мехнат сарфини қабул қилинган ишларни давомийлигига бўлиб аниқланади. Икки қамровли система уч қамровлига нисбатан ишларни бажариш 1,5 марта тезлаштиради ва иқтисодий жиҳатдан фойдалироқдир. Икки қамровли системада, 22...26 ишчидан иборат бригада икки сменада ишлаганида бир қаватни 12 кунда бапро этади. 40...46 ишчидан иборат бригада уч сменада ишлаганда шу ишларни 6 кунда бажаради. Оқим усулининг бошқа бир кўриниши – оқим-халқали (оқим-конвейер) усули, девордаги тешиклар (эшик, дераза ва ш.к. нинг ўрни) сони кам бўлган саноат ва жамоат биноларининг узун деворларини теришда қўлланилади. Бу усулда бино қамровларга бўлиниши мумкин, аммо бўлинмалар бўлмайди, ғишт терувчиларнинг звенолари қамровнинг периметри бўйича кетма-кет жойларини ўзгартириб ва битта “олтилик” звено билан умумий қаторни терадилар, бунда биринчи иккилик ташқи верста (чет қисми) ни, иккинчи иккилик ички верстани, учинчи иккилик забутка (оралиқ)ни теради. Пардозли қалин деворлар теримини ёки мураккаб теримни учта “учлик” дан иборат “тўққизлик” звеноси бажаради. Оқим-халқали усул меҳнатни аниқ бўлиниши ва ишчиларнинг иш фронти бўйлаб кетма-кет ҳаракатига асосланган бўлиб, уларнинг ҳар бири ўзининг ишини маълум тезликда бажариб, ҳаммага баробар иш тартибини яратади. Звено бир қамровни бутун девори узунлиги бўйлаб бир қаторни тугатиб, иккинчи қаторни теришга ўтади. Ички деворлар мавжуд бўлганда, ташқи деворларни 1.8...2 м гача тергандан сўнг, бутун ғишт теримини бикирлигини таъминлаш учун ички деворларни теришга ўтган маъқул. Ғишт терувчилар бригадасидаги звенолар “иккилик” ва “учлик” ларга бўлиниб ишлайди. Иншоотда иш фронти катта бўлганда уни ўзининг ғишт терувчи звеноларига ёки мустақил комплекс бригадасига эга икки ва ундан ортиқ қамровларга бўлиш мумкин.

Қиш мавсумида ғишт-тошли конструкцияларни барпо этиш Қиш мавсумида ғишт териш ишларини бир қатор ўзига хослиги бор, яъни улар териш жараёнларига ва қоришмани қотишига манфий ҳароратни салбий таъсири билан боғлиқ. Ҳароратни пасайиши натижасида қоришмалар қотиши секинлашади: 5 0С ҳароратда 3-4 мартага, 0 0С ҳароратда амалда умуман қотмайди. Бундан паст ҳароратларда қоришма таркибидаги сув музга айланиб қолади ва боғловчилар билан бирикмайди. Агар қоришмани қотиши музлашдан олдин бошланган бўлса, эркин сув музга айланганда қотиш жараёни хам тўхтаб қолади. Бундан ташқари музлаган сувни ҳажми 9% га кўпаяди, буни натижасида қоришма структураси бузилади ва у музлагунга қадар эришган мустахкамлигини йўқотади. Янги терилган ғишт терими музлаганда, чоклардаги қоришма ёйилувчанлигини тез йўқотади, горизонтал чоклар етарли даражада зичланмайди, эриган чоғда эса юқоридаги ғиштлар оғирлиги натижасида сиқилади ва нотекис чўкади, бунинг натижасида ғишт терими ва бутун бинони мустахкамлигига ва турғунлигига хавф туғилади. Қиш шароитда ҳарорати + 20 0С дан паст бўлмаган қоришма қўлланилиб ғишт терилганда қуйидаги асосий усуллар қўлланилади: • музлатиш усули, яъни қоришма музлагунга қадар критик мустахкамликни эгаллайди; • музлашга қарши қўшимчалар қўшиш; • глинозём цемент асосидаги тез қотадиган қоришмани қўллаш; • терилган ғиштни электр ёрдамида иситиш; • теримни арматуралаш; • иссиқ хоналарда териш. Қиш мавсумида ғишт теришни фарқ қилувчи ўзига хослиги: • бўлинмаларни ўлчами камаяди, ғишт терувчиларни сони кўпайтирилади, қамровда бутун баландлик бўйича ғишт териш тез бажарилади;

• кўп қаторли боғлаш системасида вертикал бўйлама чоклар камида ҳар уч қаторда боғланади; • иш жойларда қоришма захираси фақат 20...30 мин иш олиб боришга етарли бўлишга рухсат этилади ва қоришма солинадиган ящик иситиладиган бўлиши керак; • сувга тўйинган ва музлаган ғиштларни конструкцияни теришда қўллаш мумкин эмас, уни эритиш ва қуритиш зарур; • ишдаги танаффусларда, терилаётган девор қаторини устида қоришмани қолдириш мумкин эмас.

Адабиётлар: 1. Бозорбойев Н. Бино ва иншоотларни барпо этиш технологияси. И-қисм. ўқув қўлланма Тошкент, 2000. 2. Бозорбойев Н., Собиров М. Бино ва иншоотларни барпо этиш технологияси. ИИ-қисм. ўқув қўлланма Тошкент, 2000. 3. Технология возведения зданий и сооружений: Учеб. для строит, вузов/В.И. Теличенко, О.М. Терентьев, А.А. Лапидус— 2-е изд., перераб. и доп.— М.: Высш. шк., 2004. — 446 с; ил. 4. Технология строительного производства. Учебник, (С.С. Атаев, Н.Н. Данилов, Б.В.Прыкин и др.) М., Стройиздат, 1994. 5. Технология строительного производства (О.О.Литвинов и др.) Киев, Высшая школа. 1995. 6. Хамзин С. К., Карасев А. К. Технология строительного производства. Курсовое и дипломное проектирование. Учеб. пособие для строит, спец. 7. вузов. — М.: ООО ≪ БАСТЕТ ≫ , 2006. - 216 с.: ил 8. Бозорбоев Н., Бозорбоев Ф. Бино ва иншоотларнинг ер остки қисмини барпо этиш технологияси. Ўқув қўлланма. Тошкент, 2003. 9. Швиденко В.И. Монтаж строительных конструкций. Уч. пос. М., Выс. школа, 1987. 10. Матвеев Е.П. Реконструкция жилых и гражданских зданий.— М.: 11. ГУЛ ЦПП, 1999. 12. Справочник строителя. Бетонные и железобетонные работы.— М.: Стройиздат, 1987.

O'xshashlar

Йирик панелли биноларни барпо этиш

Ўта баланд биноларни барпо этиш

Йигма конструкцияли биноларни барпо этиш технологияси

Биноларни вертикал кўчириладиган қолипларда барпо этиш

Биноларни горизонтал кўчириладиган қолипларда барпо этиш