O’zbek xalqining etnik shakllanishi - История - Рефераты

O’zbek xalqining etnik shakllanishi

Загружено в:

05.09.2022

Скачано:

0

Размер:

34.0693359375 KB

O’zbek xalqining etnik shakllanishi Reja: 1.O’rta Osiyoning qadimgi aholisi. Turon zaminida turkiy qavmlarning azaliy etnos ekanligi. qadimiy qabilalar va ularning turmush tarzi. 2.O’zbek xalqi etnogenezi ikkinchi davri. O’zbek millati va tilining shakllanishi. Adabiyot, xalq og’zaki ijodi, dostonlar, hikmatlar. 3.XV asr oxiri XVI asr o’zbek xalqi shakllanishida uchinchi davr. “O’zbek” atamasining qo’llanila boshlashi.

Har bir xalqning o’z kelib chiqish va rivojlanish tarixi bor O’zbek xalqining ham uzoq va voqeliklarga boy tarixi mavjud bo’lib, u xalq bo’lib shakllangunga qadar uzoq va murakkab etnik jarayonlarni boshidan kechirdi. Umuman olganda, hozirgi kunda xalqlarning kelib chiqishi-etnogeneziga e’tibor ayniqsa kuchayganki, bu holat millatlar ichida o’z-o’zini anglash jarayonining o’sganligi, o’z tarixi, o’tmishiga qiziqishning oshganligi, yangi mustaqil davlatlar paydo bo’lishi bilan o’z ifodasini topadi. Xalq mustaqillikka erishgach, o’z ildizlari va etnik ajdodlarini bilishga intilishi tabiiydir. Shu bois xalqning kelib chiqish tarixini va shakllanish jarayonini chuqurroq o’rganish muhim ahamiyat kasb etadi. Bu jarayon ijtimoiy fanda “etnos”, “etnik birlik” kabi iboralarda ifodalanadi. Etnos atamasi juda keng va tor ma’noda ishlatiladi: masalan, dunyo xalqi, Amerika, Rossiya xalqi, O’zbekiston xalqi, viloyat xalqi va boshqa kichik bir guruh kishilariga nisbatan ham “xalq” iborasi qo’llaniladi. Shuning uchun ham ma’lum bir ijtimoiy tuzumda vujudga kelgan etnik uyushmaga “etnik birlik” iborasining ishlatilishini bilamiz. Etnik birlik aniq sharoitda, tabiiy–tarixiy taraqqiyot jarayonida vujudga kelgan ijtimoiy uyushmadir. Fanda etnik birlik bosqichining uch turi mavjud: qabila, elat va millat. Bu atamalar turli davrlarda vujudga kelgan va ular o’ziga xos xususiyatlari bilan bir-birlaridan farq qiladilar. qabila-.arabchadan olingan so’z, u etnik guruh, birlik mazmunini anglatgan adi. Bu birlik a’zolari o’rtasida qon–qarindoshlik aloqalari mavjud, ular urug’ va bug’inlarga bo’lingan holda yashagandilar. qabilaning ma’lum bir hududga ega bo’lishi, qabiladoshlarning iqtisodiy birligi, umumiy tili va nomi muhim belgilardir. kadimdan kabila rahnamolari, oqsoqollari saylanib, uning kengashlari, o’z–o’zini boshqaruv tizimlari ham mavjud bo’lgan. Elat-.mug’ulcha, turkiycha so’z bo’lib, u kishilarning til, hudud, iqtisodiy va madaniy jihatdan tarixan tarkib topgan birligidir. Elatning kelib chiqishiga bir–biriga yaqin bir necha qabilalarning uyushuvi asos bo’lgan. Millat-arabcha so’z bo’lib odatda xalq ma’nosini anglatadi. Adabiyotda millat–bu kishilarning yagona tilda so’zlashishi, yaxlit hududda istiqomat qilishi, mushtarak iqtisodiy hayot kechirishi, umumiy madaniyat va

ruhiyatga ega bo’lishi asosida uzoq vaqt davomida shakllangan barqaror birligi, deb ta’riflanadi. Demak, millat ma’lum bir hududda muqim yashagan tarixiy taraqqiyot davomida rivojlanib kelgan odamlarning ma’naviy-ruhiy birligining vujudga kelishi asosida tashkil topar ekan. O’zbeklarning millat sifatida shakllanish jarayoni haqida akademiklar Ya.Fulomov, I.Muminov, B.Axmedov, K.Shoniyozov asarlarida qimmatli ma’lumotlar bor. Rus olimlari V.Bartold, A.Yakubovskiy, L.Gumilyov, xorijiy taqiqotchilar G.Vamberi, X.Xovors, M.Pellio, X.Xukxem, E.Olvort va boshqalar o’zbek xalqining kelib chikishi, uning shakllanish bosqichlari haqida asarlar yaratganlar. Bu taqiqotlardan ko’rinib turibdiki, millatning paydo bulishi, kelib chiqishi, shakllanishi va jahon hamjamiyatida o’zining munosib o’rnini topish yo’lidagi takomillashuvi uzoq va murakkab tarixiy jarayon ekan. O’zbeklar O’rta Osiyoning qadimgi xalqlaridan biri bo’lib, ko’hna va boy tarixga, yuksak madaniyatga ega xalq. Bugungi kunda barcha turkiy xalqlarning umumiy soni 250 mln. kishi atrofida bo’lib, shundan yettidan bir qismini, ya’ni taxminan 32 mln kishini o’zbeklar tashkil qiladi. Dunyodagi barcha o’zbeklarning shundan 20 mln.i mamlakatimizda, 14 ml.ni asosan qo’shni davlatlar– Tojikiston, Afg’oniston, Turkmaniston, qozog’iston va qirg’izistonning bizga tutash viloyatlarida yashaydi. Shuningdek, o’zbeklar dunyoning o’nlab mamlakatlarida, jumladan Xitoy, Turkiya va Saudiya Arabistonida ham yashaydilar. Masalan, Saudiya Arabistonining Jidda, Toif, Makka va Madina shaharlarida yashovchi o’zbeklarning soni 800 mingacha boradi. Ularning ko’pchiligi asosan 20-yillarda o’tkazilgan “Milliy chegaralash”, 20-30 yillardagi qatag’onliklar oqibatida o’zga yurtlarga borib qolishgan. O’rta Osiyo ijtimoiy - siyosiy hayotida turkiy etnik guruhlar juda katta ahamiyatga ega bo’lganligi va bu qatlamning ildizlari juda qadimiy ekanligi arxeologik ma’lumotlar asosida isbotlanmoqda. Tadqiqotchilarning fikriga ko’ra, bronza davriga kelib O’rta Osiyoning janubiy viloyatlarida baland bo’yli, yuzi tor irqning vakillari tarqalgan. Shimoliy dasht va cho’l hududlarida esa janub

aholisidan farq qiluvchi boshi dumaloq, yuzi juda keng va cho’ziq bo’lmagan qabilalar yashaganlar. Fanda janubiy qiyofali odamlar O’rta Yer dengizi irqining vakillari deb ataladi. Ular old Osiyo, Mesapotamiya, Eron, Afg’oniston, O’rta Osiyo, Hindiston kabi katta geografik hududga yoyilganlar. Shimoliy qiyofali odamlar Janubiy Sibir hududidan to qozog’iston, O’rta Osiyoning shimoli sharqiy qismida Ural, Volga bo’yi yerlarigacha tarqalgan. Bronza davriga kelib, O’rta Osiyo hududida qadimgi janubiy va shimoliy qiyofadagi odam vakillarining qo’shilish jarayoni boshlanadi hamda aynan mana shu davrda o’lkamizda yashab o’tgan bronza davri qabilalari O’rta Osiyoning qadimgi xalqlariga asos solganlar. Bu davr o’lkamiz hududlarida murakkab etnik madaniy jarayonlar bo’lib o’tganligi bilan izohlanadi. Xususan, janubiy hududlardagi hosildor vohalar o’troq, dehqonchilik aholisi tomonidan o’zlashtirila boshlagan bo’lsa, shimoliy viloyatlarda ko’chmanchi chorvador qabilalar tarqala boshlaydi. Ko’chmanchi chorvadorlar va o’troq aholining uzviy munosabatlari asosida ijtimoiy-iqtisodiy va madaniy etnik jarayonlar avj oladi. Miloddan avvalgi II ming yillikning o’rtalaridan boshlab O’rta Osiyo hududlariga shimoli-sharqdan chorvachilik bilan shug’ullanuvchi yangi etnik guruhlar kirib kela boshlaydi. Ko’pchilik tadqiqotchilarning e’tirof etishlaricha shu davrlardayoq O’rta Osiyo xalqlari turkiy tilda so’zlashganlar. O’zbekiston O’rta Osiyoning qadimdan o’troq dehqonchilik madaniyati o’choqlari tarkib topgan hududda joylashganligi, uning boy arxeologik va me’morchilik madaniyatlari bilan izohlanadi. O’rta Osiyo aholisi haqidagi ilk ma’lumotlar Sharq va Yunon - Rim manbalarida tilga olinadi. Yunon tarixchilari ma’lumotlariga qaraganda, Yevroosiyoning katta hududlarida yashovchi qabilalar umumiy “skiflar” nomi bilan ataladi. Gerodot “bu xalq qadimiylikda misrliklardan” qolishmaydi deb yuqori baho bergan bo’lsa boshqa bir tarixchi Pliniy esa, O’rta Osiyo hududlarida 20 ga yaqin qabilalar borligini eslatib o’tadi. Yozma manbalarda skiflarning ikkita yirik qabilasi: saklar va massagetlar xususida ko’proq eslatiladi. Axmoniylar mixxat yozuvlarida saklar uchta urug’ga – xoumavarka, tigraxauda, tiya-tara daryyalarga bo’lib ko’rsatiladi.

Massagetlar xususida ham turli fikrlar mavjud bo’lib, ular mahalliy chorvadorharbiy qabilalar bo’lganligi ta’kidlanadi. Miloddan avvalgi birinchi ming yillikda Markaziy va O’rta Osiyoda, Sibir hamda shimoliy va g’arbiy Xitoy yerlarida yashagan elatlarning bir qismi turkiyzabon bo’lganligi tarixiy manbalardan ma’lum. Issiqko’l yaqinidagi miloddan avvalgi III - I asrlarga oid sak qabila oqsoqolining qabridan qadimgi yozuv namunalari topilgan. U oromiy imlosi asosida bitilgan bo’lib, hozir ma’lum bo’lgan eng qadimgi “turkiy yozuv” deb tan olinmoqda. Turkiy yozuv Xorazm, Sug’d, Baxtar yozuvlari qatorida O’rta Osiyoning shimoliy–sharqiy viloyatlarida shu tilli aholi yozuvi sifatida mavjud bo’lgan. Demak, O’rta Osiyoning shimoliy -sharqiy viloyatlarida turkiy qabila va elatlar yashagan, ularning tub aholisi bo’lmish turkiy qabilalar o’z yozuviga ega bo’lganlar. Demak, qadimda skiflar nomi bilan Sirdaryoning o’rta va quyi sohillaridan to Oltoygacha bo’lgan hududda ko’chib yurgan qabilalar turklarning ajdodi bo’lgan. Bular antik davrlarda dehqonchilik va hunarmandchilik bilan shug’ullanib kelgan baqtriyaliklar, xorazmliklar, sug’diylar, farg’onaliklar, shoshliklar va cho’l hududlarida chorvachilik bilan shug’ullangan saklar, massagetlar va boshqa ko’chmanchi qabilalardir. Ular o’zbek elatining asosini tashkil qilgan.Bu jarayonda o’zbek elati vujudga kelgan. Mazkur elat mahalliy aholi ajdodlari qoldirgan boy tarixiy merosni avaylab saqlaydilar, uni to’ldiradilar va barcha an’analari bilan birga keyingi avlodga meros qoldiradilar. Ko’p asrlar davomida o’lkamizda yuz bergan murakkab etnik va madaniy jarayonlar mahalliy tub aholi qiyofasini shakllantirdi. Natijada bu o’lkada azaliy o’troq aholining ko’rinishida fanda tan olingan O’rta Osiyoda ikki daryo oralig’i antropologik tipi belgilari yetakchi bo’lgan. Bu borada professorlar L. Oshanin va T. Xo’jaevlarning taqiqotlari muhimdir. Ularning fikricha, xorijdan kelgan Ahmoniylar, makedoniyaliklar, arablar mahalliy aholi “qonini” yoki genetikasini jiddiy o’zgartira olmaganlar. Uzoq tarix davomida atrof hududlardan, xususan Eron, qashqar, Oltoy, Enasoy, so’ng Mug’uliston, Dashti qipchoq va boshqa joylardan kelgan bir qancha qavmlar iqlimi, tabiati qulay bo’lgan mintaqamizda davr o’tishi

bilan tub joy aholiga qorishib singib ketganlar. Ilk Temur davridan boshlab (mil.av. IX – VII asrlar) o’lkamizning qadimgi dehqonchilik vohalarida yashovchi o’troq aholi o’zlari yashab turgan xudud nomlari bilan atala boshlaganlar. Bular, So’g’diyonadagi-so’g’diylar, qadimgi Xorazmdagi–xorazmiylar, qadimgi Baqtriyadagi – baxtarlar, qadimgi Shoshdagi –chochliklar, Farg’onadagi– parkanaliklardir. Bu tarixiy nomlarning ayrimlarini ilk yozma manbalarda, xususan zardushtiylik dinining muqaddas kitobi “Avesto”da, Ahmoniylar mixxatlarida, yunon–rim mualliflari asarlarida uchratish mumkin. Mil.av III-II asrlarda O’rta Osiyo hududlarida hozirgi o’zbek xalqiga xos antropologik qiyofa shakllana boshlagan. Tadqiqotlar natijasiga ko’ra o’zbeklarga xos antropologik qiyofa, dastavval Sirdaryoning o’rta havzasida, ya’ni Toshkent vohasi, Farg’ona vodiysi, qisman Xorazm va Janubiy qozog’istonning Chimkent viloyatlarida, Yettisuv mintaqasida mil.av. I ming yillik oxirida shakllana boshlaganligi aniqlandi. Bu buyuk Kushon davlati paydo bo’lishi arafalari davriga to’g’ri keladi. Miloddan avvalgi I asr oxirida sak.massaget qabilalarining bir guruhi makedoniyalik Iskandar ta’qibi natijasida Sharqiy Turkistonga borib joylashganlar. Keyingi davrlarda qadimgi Farg’onaga ko’chib kelganlar. Massagetlarning yoki toharlarning bir qismi qadimgi Baqtriyada joylashib, Kushonlar davlatini barpo qildilar. Bu davlatning dastlabki podshohlari o’z nomidan tanga zarb etganlarida turk so’zlarini ishlatganlar. Kushon davlatining asosiy etnik qatlami sharqiy Eron tillarida so’zlashuvchi qadimgi Baqtriya aholisi bo’lsada, ammo sulola asoschilari– Kushonlar turkiy qavm edilar. Kushonlar va eftalitlar davriga oid ellin-baqtriya xatida beshinchi asrda turkiy tilda bitilgan jumlalar saqlanib qolgan. O’rta Osiyoda xalqining shakllanishida ma’lum rol o’ynagan eftalit qabilalar uyushmasi ham etnik jihatdan turkiylar tarkibiga kirgan. Uzoq o’tmishda o’zbek xalqining etnik tarkibini mahalliy xalqlar, shuningdek ma’lum sabablarga ko’ra O’rta Osiyo ning shimoliy sharqidan kelgan turkiy qabilalar tashkil etganlar. Tarixan skif nomi bilan yashagan xalklar milodning I asri o’rtalaridan uzoq davr mobaynida turklar nomi bilan mashhur bo’ldi. Professor N.Rahmonov xitoy manbalariga tayangan holda

“turk” so’zi avvaliga birorta qabila yoki elat nomini anglatmay, turkiyzabon elat va qabilalarning birlashmasini anglatgan, degan xulosaga keladi va o’zbeklarning ajdodlari ham shu guruhga mansub ekanligini ta’kidlaydi. Zardushtiylarning muqaddas kitobi “Avesto”da axmoniylar va sosoniylar asoratiga tushib qolgan mamlakatlar va xalqlar, shular qatori Turkiston xalqlari haqida ma’lumotlar bor. Bu xalqlar orasida tur (xura) deb atalgan xalq ham tilga olinadi. Shu munosabat bilan aytish mumkinki, Amudaryo bilan Sirdaryo oralig’ida, Xorazm va Farg’onada, shuningdek mazkur o’lkalar bilan tutash yerlarda istiqomat qilgan xalqlar Sharq manbalarida umumiy “turk” nomi bilan, ular istiqomat qilgan yerlar esa “Turon” yoki “Turkiston” deb atalib kelingan. Abulqosim Firdavsiyning “Shohnoma”sida ham “Eron” va “Turon” atamalari ko’p bor tilga olinadi, har ikkala mamlakat o’rtasidagi munosabatlar haqida ma’lumotlar keltiriladi. I asr o’rtalarida Oltoyda, Janubiy Sibirda, Yettisuvda, Sharqiy Turkistonda joylashgan qabilalar birlashib, Turk hoqonligini tashkil etadi. qisqa vaqt ichida turk hoqonligi Movarounnahrni ham egallaydi. III asr oxirlarida qadimgi turkiy elatlardan bo’lgan qorluqlar davlati tashkil topadi. Ularning qo’shnilari yag’molar bo’lgan. Turklarning yana bir yangi uyushmasi IX asr oxirida tuzilgan o’g’izlar davlati edi. X asr o’rtalarida bir qancha turkiy qabilalar birlashuvi yuz berdi. Barpo etilgan Koraxoniylar davlatiga turkiylarning yag’mo urug’idan chiqqan Satuk Abdlukarim qoraxon boshchilik qilgan. Demak, etnik tarix–ma’lum bir hududda yashovchi u yoki bu xalqning ilk ajdodlaridan boshlanib, elat shakllanishini, uning taraqqiy etish bosqichlarini va elatning yemirilish yoki rivojlanib, millat darajasiga yetishish davrini o’z ichiga oladi. Shakllanayotgan yangi etnosga ma’lum hududda yashagan tub xalqlar yoki etnik guruhlardan tashqari, boshqa hududlardan kelgan etnik antropologik va madaniy jihatdan bir xilda bo’lmagan etnoslarning yoki etnik guruhlarning aralashib, qorishib ketishidan ham elat vujudga kelishi mumkin. Dunyoda mavjud xalqlarning barchasi turli etnik guruhlarning qo’shilishidan vujudga kelgan. Shunga asoslanib, o’zbek xalqi elat bo’lib, ma’lum tarixiy davrda, ma’lum hududda, mahalliy, tub etnoslar asosida, turli davrlarda kelib qo’shilgan etnik

komponentlarning aralashib borishi natijasida shakllangan, deyish mumkin. Shakllangan har bir elatning o’z nomi (etnonimi) bo’ladi, albatta. Turkiy elatlarning ko’pchiligi qadimdan mavjud bo’lib kelgan qabila yoki qabila ittifoqining nomi bilan atalgan. Masalan: turkman, qozoq, qirg’iz, qoraqalpoq, uyg’ur va boshqalar. Bu xalqlarning nomlari keyinchalik millat nomi ham bo’lib qolgan. O’zbek ajdodlari elat bo’lib shakllangan vaqtda va undan keyin ham umumiy etnik nomga ega bo’lmaganlar. “O’zbek” atamasi elatning umumiy nomi bo’lib qat’iylashguncha hozirgi O’zbekiston hududida yashovchi aholi sart, turk, chig’atoy, ba’zilari esa yashagan hudud yoki viloyat nomi bilan: xorazmlik, toshkentlik, farg’onalik va boshqa nomlar bilan atalib kelingan. Manbalarda turkiy tilli etnoslarga nisbatan “turk” iborasi qo’llanilgan. O’zbek xalqi shakllanishidagi ikkinchi muhim davr IX-XII asrlar hisoblanadi. Bu davrda O’rta Osiyoda, jumladan O’zbekistonda hozirgi o’zbeklarga xos qiyofa, mahalliy aholining asosiy qismini tashkil etadi. Antropolog G.Xo’jaev tadqiqotlariga qaraganda, IX asrga kelib aholining antropologik qiyofasida keskin o’zgarishlar yuz berganligi kuzatiladi. Bu o’zgarishlarni arxeologik tadqiqotlar ham tasdiqlaydi. Jumladan, marhumlarni ostodonlarda ko’mish marosimlari, aholi orasida keng tarqalgan bosh shaklini sun’iy o’zgartirish odatlari yo’qoldi. O’zbek xalqining etnik shakllanishida bu davrlarda bizning hududimizga ko’chib kelgan turli elat va qabilalar ham ma’lum ma’noda ishtirok etganlar. Yuechjilar, xioniylar, kidariylar, eftalitlar shular jumlasidandir. O’rta Osiyo ikki daryo oralig’i tili Sirdaryoning o’rta havzasida aniq antropologik tip bo’lib shakllangan davrda bu xududlarda “qovunchi madaniyati” shakllanadi. So’nggi arxeologik tadqiqotlar natijalariga ko’ra milodiy II-III asarlardan boshlab Farg’ona vodiysi, Samarqand hududlari, IV-V asrda esa Buxoro vohasi, qashqadaryo va Surxon vohalarida qovunchi madaniyatining ta’siri seziladi. IV asrning oxirlaridan boshlab O’rta Osiyoda yirik turkiy etnoslar Xioniylar va eftalitlarning o’troqlashuv jarayonlari kuchayadi. V-VI asrlarga kelib eftalitlar va xioniylarning asosiy qismi turg’un hayotga o’tadilar. Bu qabilalar

o’troq hayot kechirib an’anaviy chorvachilik bilan shug’ullanganliklari haqida yozma va arxeologik manbalar ma’lumotlar beradi. VI asrning o’rtalaridan boshlab O’rta Osiyoda eftalitlar va turkiy hoqonlik o’rtasida kurash boshlanadi. VI asrning o’rtalarida Oltoyda, Janubiy Sibir, Yettisuv, Sharqiy Turkistondagi bir necha qabilalar birlashuvi natijasida yirik Turk hoqonligi tashkil topadi. qisqa vaqt ichida hoqonlik kuchayib O’rta Osiyoning katta qismini bosib oladi. Turkiy hoqonlik davrida (VI-VIII asrlar) Toshkent vohasi, Zarafshon, qashqadaryo vohalari, Surxondaryo va Farg’ona vodiylari, Xorazm hududlariga turkiyzabon guruhlarning kirib kelishi yanada kuchayadi va ularning ko’pchiligi bu hududlarda turg’unlashib qoladi. Umuman, arablar istilosiga qadar o’lkamizda yashagan xalqlar asosan turkiylashib bo’ldi. Ma’lumki, VIII asrning ikkinchi yarmida turkiy qarluq qabilalari kuchaya boshlaydilar. IX asrning o’rtalariga kelib Yettisuv, Chimkent viloyati, Toshkent vohasi, Farg’onaning shimoliy qismlarini o’z ichiga olgan qarluq davlati tashkil topadi. Ko’pchilik tadqiqotchilarning e’tirof etishlaricha, o’zbek elatining shakllanishida qarluq davlatining ahamiyati katta bo’ladi. X asr o’rtalaridan boshlab bu davlat tarixiy manbalarda qoraxoniylar davlati nomi bilan tilga olinadi. Yozma manbalarning ma’lumot berishicha (“Hudud al-olam”) IX-X asrlar qorluqlar egallab turgan hududlarda 20 dan ortiq shahar, ko’plab qishloqlar bo’lgan. qorlkqlar ko’p sonli, nufuzli “xalq” bo’lib, bir qismi chorvachilik bilan shug’ullangan. qorlkqlar yashagan hududlarda yirik etnoslar- chig’illar, yag’molar, xalachlar ham yashagan bo’lib tadqiqotchilarning fikricha, ular bir-biriga qonqarindosh bo’lib turkiy tilda so’zlashganlar. XI asrning birinchi o’n yilligidayoq Movarounnahrning to Balx viloyatigacha bo’lgan yerlari dastlab qoraxoniy turkiylar, so’ng esa g’aznaviylar qo’liga o’tdi. Buning natijasida navbatdagi katta turkiy qatlam So’g’diyona, Xorazm va Toxariston yerlariga kirib boradi. qoraxoniylar davrida Movarounnahrning barcha hududlarida turkiy qatlamlar mavjud edi. Movarounnahr va Xurosonning forsiy-doriy tilida so’zlashuvchi aholisi X asrdan boshlab o’zini “tozik” – ya’ni “tojik” deb yurita boshlaydilar.

Somoniylardan keyin hukmronlik qilgan keyingi sulolalar, qoraxoniylar, g’aznaviylar (997-1187), saljuqiylar (1040-1147), xorazmshox-anushteginiylar (1097-1231)ning barchasi turkiy qavmga tegishli bo’lib, o’z vaqtida nafaqat O’rta Osiyo, balki butun O’rta Sharqda ham hukmronlik qilgan mavqeiga ega bo’lganlar. Mo’g’ullar istilosi garchi aholi boshiga nihoyatda og’ir kulfatlar va yo’qotishlar olib kelgan bo’lsada, tadqiqotchilar fikricha, o’zbek xalqi etnogenezi va irqiga deyarli ta’siri bo’lmadi. Chingizxon qo’shini tarkibida mo’g’ullar bilan bir qatorda juda ko’plab turklar ham bor edi. Jaloyirlar, qurlovutlar, burqutlar, mang’itlar, qo’ng’irotlar, barloslar, sulduslar, boyovutlar, baxrinlar ana shular jumlasidandir. IX-XII asrlarda eski o’zbek tiliga asos bo’lmish qorliq-chigil lahjasi rivoj topdi va yozma adabiyot darajasiga ko’tarildi. qorliq-chigil lahjasi o’zbek xalqining umumiy tili bo’lib qoldi. Bu holni Yusuf Xos Xojibning “qutadg’u bilig”, “Mahmud qoshg’ariyning “Devoni lug’otit turk”, Ahmad Yugnakiyning “Hikmatnoma” asarlari, hamda “O’g’uznoma”, “Alpomish”, “Go’ro’g’li” kabi dostonlar timsolida ochiq oydin ko’ramiz. Jumladan, Mahmud qoshg’ariy turkiy xalqlar tarixi, tili, madaniyati, urfodatlarini o’rganish maqsadida butun Markaziy Osiyoni kezib chiqdi. O’zi to’plagan boy dalillari asosida xalqimizning buyuk olimi “Javohirun nahfi lug’atit turk” (“Turkiy tillarning sintaksisi durdonalari”) va “Devoni lug’otit turk” (“Turk tilning lug’ati”) asarini yozgan. Mahmud qoshg’ariyning birinchi asari bizgacha yetib kelmagan yoki hali topilganicha yo’q. Olimning ikkinchi asari 1074-1075 yillarda yozilgan. Asarda turkiy qavm-urug’lar: qipchoq,. o’g’uz, boshqirt, basmil, qay, yaboku, tatar, qirg’iz, chigil, yag’mo, tuxsi, uyg’ur, tangut, tabg’ochlardan tashqari yana fors, arab, xitoy, rus xalqlari haqida ham ma’lumotlar mavjud. “Devoni lug’otit turk” da turkiy xalqlar og’zaki ijodi va yozma adabiyotiga doir 300 dan ortiq she’riy parchalar, maqollar, hikmatli so’zlar va lavhalar berilgan. Asarda olim turkiy yozuv to’g’risida g’oyatda qimmatli fikrlarni bayon qiladi va 18 harfdan iborat turk alifbosini keltiradi. Asarda imlo masalasida ham muhim ma’lumotlar bor. qoraxoniylar saltanati davrining buyuk siymolaridan biri

ulug’ olim Yusuf Xos Xojib bo’lib, u o’zining hozircha bizga ma’lum bo’lgan yagona didaktik badiiyfalsafiy “qutadg’u bilig” (“Saodatga eltuvchi bilim”) asari bilan jahonga mashhur va ma’lum bo’ldi. Asarda axloq odob, ilm-ma’rifat, bola tarbiyasi, jamoat joylarda o’zini qanday tutish, so’zning ahamiyati va qadri, mehmondorchilik qoidasi, turmush tarzi va inson ma’naviy olamining yana ko’pgina masalalari qalamga olingan. Turkiy adabiyotning yirik va zabardast vakillaridan yana biri Ahmad Yugnakiydir. Uning she’riy usulda yozilgan “Hibatul haqoyiq” (“Haqiqatlar armug’oni”) asari o’zbek adabiy merosining buyuk namunasi sifatida uning keyingi taraqqiyotiga katta hissa qo’shdi. Bu asar hatto she’riyat mulkining sultoni Alisher Navoiy ijodidan ham munosib o’rin oldi. U o’zining “Nasoimul muhabbat” (“Muhabbat sha’badasi”) asarida “Hibatul haqoyiq”dan parcha keltirib, shoirning ko’zi ojiz bo’lganligini qayd etadi. Shuningdek, Alisher Navoiy Xusayn Boyqaroning o’g’li Badiuzzamonga yozgan nomalaridan birida ham asardan parcha keltiradi. Doston dunyo xalqlarining bir necha tillariga tarjima qilingan. Xulosa o’rnida shuni ta’kidlashimiz joizki, bu davrlarda turkiy o’zbek xalqi to’la shakllandi, ijtimoiy iqtisodiy va madaniy jihatdan rivojlandi. O’zbek yozma va adabiy tiliga sos solindi. Ikkinchidan, Ona Vatan tarixining IX-XII asrlardagi ijtimoiy-siyosiy taraqqiyotining yakuniy xulosalaridan biri shu bo’ldiki, bu davrlarda o’zbeklarning etnik jihatdan xalq sifatida shakllanishi o’zining poyoniga yetdi. Xududiy, iqtisodiy, madaniy, til va tip birligiga ega bo’ldi. Uning etnik jihatdan takomillasha borishi va etnik tarixi shundan keyin ham, to ularning millat darajasiga ko’tarilguniga qadar davom etdi. Shunday qilib, o’zbek xalqining etnik shakllanishi uzoq davom etgan murakkab jarayon ekan. Bu jarayonni shartli ravishda davrlarga bo’lish mumkin. kuyida shu tarixiy davrlarga alohida to’xtalib o’tsak. Miloddan avvalgi III - .II asrlarda O’rta Osiyoda dasht mintaqalarida hozirgi o’zbek xalqiga xos antropologik qiyofa shakllana boshlagan. Bu aholi bir necha yo’nalishda Markaziy Osiyoning markaziy va janubiy viloyatlarida o’troqlashib borgan. Bu antropologik taqiqot natijalari hamda yozma manbalarda

ma’lum bo’lgan xalqlarning janubga siljishi va Yunon–Baqtriya davlatining istilo etilishi, Buyuk Kushon saltanatining barpo bulishi davriga to’g’ri keladi. Cho’l aholisi Sirdaryo quyi oqimidan Markaziy qizilqum orqali Samarqand atroflariga, so’ngra qashqadaryoning qarshi shahri atroflari orqali Surxondaryo viloyatidagi ko’hna Termiz, Dalvarzin, Shoxtepa, Ayritom kabi qadimgi shahar va yirik qishloqlarga kelib joylashganlar. Ularning ikkinchi guruhi qadimiy Buxoro vohasi orqali Turkmanistonning janubiy viloyatlariga yetib borgan. Natijada, o’zbeklar va tekisliklarda yashovchi tojiklarga xos Pomir–Farg’ona antropologik unsur Markaziy Osiyoda keng tarqalgan. VIII asrda arablar Movarounnahrda o’z hukmronligini mustahkamlab olgach, sug’d tuprog’iga turklarning kirib kelishi sekinlashdi. Chunki arablar bu o’lkada hukmronlikni turk zodagonlaridan tortib olishgan edi. Arablarga qadar kelib o’rnashib olgan turkiy qabilalarining arablar hukmronligi va Somoniylar davrida tobora o’troq hayot tarziga ko’chishi tezlashdi. Shosh, Farg’ona va Xorazmda turkiy xalqlar mahalliy aholi orasiga tobora singib, o’troqlashgan turklar va til jihatidan turklashgan yerli aholi “sart” deb ataluvchi etnik qatlamga aylanib bordi. O’zbek xalqining shakllanishidagi keyingi muhim davr IX –XII asrlar hisoblanadi. Bu davrda Markaziy Osiyoda, jumladan O’zbekistonda hozirgi o’zbeklarga xos qiyofa mahalliy aholining asosiy qismini tashkil etgan. Shuningdek, X asr oxiri–XI asr boshlarida Movarounnahrga Oltoy, Yettisuv, Sharqiy Turkistondan ko’chib kelgan bir talay qabilalar: turgashlar, tuxsilar, qorluqlar, chigillar, o’guzlar, arg’in va boshqa turkiy qabilalar o’lkaning turk tillarida so’zlashuvchi aholisi tarkibini etnik jihatdan boyitdi. Bu davrga kelib turkiy etnik qatlamning ustunligi bir qadar ta’minlanadi. Shunday qilib, X asr oxiri–XI asr boshlarida tashkil topgan Koraxoniylar davlati davrida turkiy xalq shakllanib, ijtimoiy–iqtisodiy va madaniy jihatdan rivojlandi. Turkiylar tiliga asos bo’lmish qorluq chigil lahjasi rivoj topdi va yozma adabiyot darajasiga ko’tarildi. Bu lahja turk xalqining umumiy tili bo’lib qoldi. Yusuf Xos Xojibning “qutadgu bilik”, Maxmud qoshgariyning “Devonu lug’atit.turk”, Xoja Ahmad Yassaviyning “Hikmatlar” asarlari mana shu davrning mahsulidir. Koraxoniylar zamonida butun

Movarounnahrda aholining turkiy tilda gaplashuvchi qatlami jamiyatning barcha ijtimoiy–iqtisodiy va madaniy hayotida ustun bo’lishiga qaramay, Samarqand va Buxoro kabi shaharlarda fors–tojik tilida so’zlashish va yozish davom etadi. Bu hol faqat adabiy doiralarda emas, balki rasmiy mahkamalarda ham sezilarli darajada bo’lgan. Lekin Farg’ona va Shosh vohalarida, Xorazmda turkiy tilda so’zlashuvchilar qatlami fors qatlamidan ko’p bo’lib, uning ta’siri sug’d shahar muhitiga ham jadal kirib borgan. XIII asr boshlariga, aniqrog’i, 1219 yili Movarounnahr ga Chingizxon katta qo’shin bilan bostirib kiridi. Bu qo’shin tarkibida mug’ullar bilan bir qatorda turklar va turklash mug’ullar ham bor edi. qarluklar, barloslar, totorlar, markitlar, qurlovutlar, burqutlar, qo’ng’irotlar, jaloyirlar, sulduslar, boyovutlar shular jumlasidandir. Tabiiyki bu qabilalar o’zbek xalqining etnik tarkibini yanada boyitdi. Ammo, mug’ul istilosi o’zbek va boshqa xalqlarning tashqi qiyofasiga sezilarli iz qoldirmaligini ta’kidlab o’tish joizdir. Ular O’rta Osiyoga bostirib kelganida qo’shinlarining ko’pchiligi turkiy xalqlardan tashkil topganligi ma’lum. Mug’ul qo’shinlari ko’p sonli yerli (mahalliy) aholi tarkibiga singib ketdi. X asr oxiri XI asr boshlarida Markaziy Osiyoga Dashti qipchoq o’zbeklari kirib keldi. Sharafiddin Ali Yazdiyning “Zafarnoma”sida O’rta Osiyoda va u bilan qo’shni mamlakatlarda X - XI asrning I yarmida istiqomat qilgan 44 ta turkiy qabila va urug’larning nomlari qayd etilgan. Bular orasida Sirdaryo va Amudaryo oralig’idagi o’lkalarga XIII asrda Chingizxon va XVI asr boshida Muhammad Shayboniyxon boshchiligida ko’chib kelib, o’troklashib ketgan qabila va urug’lar orasida uchramaydi o’ndan ortiq qabilalar: mang’itlar, qang’lilar, lochinlar, olchinlar, qatagonlar, besh yuzlilar, qozoqlar va boshqalar bor. Bu qabilalar shubhasiz, mazkur yurtlarda qadimdan istiqomat qilib kelgan turkiyzabon qabilalardir. Yuqorida nomlari zikr etilgan qabilalarning aksariyati X asrga qadar o’zbek nomini olmagan edilar. Ular turk yoki o’z qabilasining nomi bilan atalganlar. O’zbek xalqining shakllanishida uchinchi muhim davr XV asr oxiri va XVI asr hisoblanadi Shayboniylar davlati davrida va undan keyingi asrlarda qipchoq dashtidan Movarounnahr va Xorazmga ko’chib kelgan ko’chmanchi

o’zbeklar o’zbek elatining tarkibiga kirgan navbatdagi etnik guruh bo’ldi. Bular tub joy o’zbek xalqining turmush tarzi, an’analari, madaniyati, xo’jalik faoliyatiga qo’shilib, qorishib ketadi va mahalliy aholiga “o’zbek” etnonimini singdira boshlaydi. Shu vaqtdan boshlab “o’zbek” nomi Movarounnahr va unga qo’shni viloyatlar aholisining ko’pchiligi uchun rasmiy ravishda umumiy nom bo’lib qkoldi. Tadqiqotchilarning fikricha o’zbeklar xalq, millat bo’lib shakllangan hudud hozirgi O’zbekiston Respublikasi hududidan anchagina kattadir. Ma’lumki, xalqning etnik qatlami va etnik tarkibi degan iboralar bor. Bular ma’nosi jihatidan bir-biridan muayyan darajada farqlanadi. Etnik qatlam degani xalqning shakllangan hududi, makoniga tegishlidir. Xalqning etnik tarkibi deyilganda esa uning shakllanishida qatnashgan qabila-urug’lar, elatlar va hattoki xalqlar nazarda tutiladi. O’zbek xalqi asosan ikki etnik qatlamdan tashkil topgan. Birinchi qatlam Turon Turkiston hududlarida shakllangan. Ikkinchi qatlam esa Volga (Itil) daryosi bo’ylaridan tortib, to Xorazmning shimoli, Sirdaryoning o’rta va quyi oqimlarigacha bo’lgan hududlarda shakllangan, bu makon o’tmishda turli nomlar bilan, chunonchi qipchoq dashti, Oltin O’rda, Oq O’rda, o’zbek viloyati, o’zbeklar mamlakati, o’zbek ulusi deb atalgan. Xalqimizning bu qatlamini jo’g’rofiy o’rin jihatidan shartli ravishda shimoliy qatlam deb atash ham mumkin. Birinchi qatlam Turon zaminida juda olis zamonlardan boshlab asosan sug’orma dehqonchilik, hunarmandchilik bilan, qisman chorvachilik bilan shug’ullanib o’troq holda yashagan xorazmlik, farg’onalik, so’g’diyonalik, baqtriyalik, shoshlik va shu kabi ajdodlarimiz shuningdek, sak, massaget, yuechji deb atalgan ajdodlarimizdir. Va keyinchalik bularning safiga barlos, jaloir, kenagas va shu kabi o’nlab turkiy qabilalar kelib qo’shilib ketishgan. Bu qatlam ikkinchi qatlamdan davr nuqtai nazardan qadimiyroqdir. Masalan, ko’proq Afrosiyobnomi bilan tanilgan ajdodimiz Alp Er To’ngani eslab o’taylik. U huddi ajdodi Turkdek birlashtiruvchilik salohiyatiga ega bo’lgan buyuk hoqon sifatida butun Turon hududlarini birlashtirgan. Samarqand shahrini o’ziga poytaxt qilgan, u paytlarda Samarqand–Semizkent deb nomlangan. Mahmud qoshg’ariyning talqinicha,

Semizkentning lug’aviy ma’nosi boy-badavlat, obod, farovon, to’kin-sochin, ma’mur va buyuk shahar demakdir. Dushmanlari Alp Er To’ngani ochiq jangda yenga olmay, aldov yo’li bilan unga zahar berib jismonan mahv etadilar. Uning halok bo’lishi sanasi mil.av. 626 yilning kuzida yuz bergan. Bu raqam ham muhtaram yurtboshimizning o’zbek davlatchiligi 27 asrlik tarixga ega, degan fikrini tasdiqlovchi hujjatlardan biridir. XV asrning oxiri XVI asrning boshlarida xalqimizning birinchi va ikkinchi qatlamlari qo’shiladi. Aniqrog’i ikkinchi qatlamning hammasi emas, muayyan qismi birinchi qatlam bilan birlashadi, jumladan, 1500 yili ikkinchi qatlamdagi qabilalar Muhammad Shayboniyxon boshchiligida Movarounnahrni, 1504-1506 yillarda Xuroson bilan Xorazmni zabt etdilar. Shu vaqtdan boshlab Movarounnahrning turkiyzabon xalqi o’zbek nomini oldi. Kelib qo’shilgan qatlam bu yerdagi yaxlit qatlamdan nufuzi jihatidan oz edi. Shimoliy qatlam shakllangan hududlarda katta-kichik shahar va qishloqlarda, keng yaylovlarda hayot davom etavergan, chunki aholining muayyan qismi o’z joylarida yashab qolgan. Kelib qo’shilgan qatlam bilan shoshlik, farg’onalik, movarounnahrlik, xorazmlik o’zbeklar qon-qardosh, dindosh, mazhabdosh, tildosh edilar. Adabiy til bitta umumiy edi, yozuv ham bitta arab alifbosiga asoslangan yozuv edi. Bu holni Movarounnahr va Xurosonda ijod etgan turkiguy shoirlar deb ataluvchi Lutfiy, Atoiy, Sakkokiylarning asarlarini, o’zbek shoirlari deb atalgan Sayfi Saroyi, Shayboniy, Ubaydiylarning asarlarini chog’ishtirib o’qib chiqib, osongina aniqlash mumkin. Ularning she’riyat tili Ahmad Yassaviy hikmatlariga ayni mos keladi. Atoiy aslini olganda Ahmad Yassaviy avlodlaridan edi. Bu davrda Alisher Navoiyning o’lmas va quyosh nurlari yanglig’ hayotbaxsh asarlari Hirotdan – Xojitarxon (Astraxan) osha Boqchasaroyu qozongacha, Sharqiy Turkistondagi Xo’ton shahridan Rum elidagi Istambulgacha yetib borib, butun Turon elini yakqalam qilib bo’lgan edi. Yana shu narsani ta’kidlash joizki, o’zbek xalqining etnik shakllanishida qatnashgan qabilalarning soni manbalarda ko’rsatilishicha 92 tadir. Bu qabilalarning nomlari ko’pgina tarixiy va badiiy asarlarda, butun Turon,

Turkistonda, bugungi O’zbekistonda joy nomlari tarzida hamon saqlanib kelmoqda. Masalan, Do’rmon qishlog’i, qo’ng’irot tumani, Mang’it shahri, Chimboy mahallasi va h.k. .“ O’zbek” atamasiga kelsak, bu so’z ilk bor X asrga oid arabiy manbalarda qavm sifatida tilga olinadi. XI asrdan boshlab bu nom o’lkamizda va unga yaqin hududlarda kishining nomi sifatida uchraydi. Masalan, Jaloliddin Manguberdi qo’shini tarkibidagi lashkarboshining ismi O’zbektoy deb atalgan. Sharqiy qipchoq cho’llarida XI asrda “o’zbekxon”, “o’zbek ulusi”, “ko’chmanchi o’zbeklar” iboralari bo’lganligi tarixdan ayon. XI asr boshlarida Shayboniylar sulolasi hukmronligi davrida Dashti qipchoqdan ko’chmanchi o’zbeklar o’lkamizga kelib mahalliy aholi bilan aralashib o’troklashadi. Bu holat “o’zbek” etnonimning keng tarkalishiga turtki bo’lgan. XII asrga mansub nasabnomalarda “92 bovli o’zbek kavmi” iborasi bir necha bor tilga olinadi. Zero, o’zbek xalqi 90 dan ortiq urug’, aymoq va qabilalardan tashkil topgan. “O’zbek” etnonimining kelib chiqishi haqida qisqacha fikr yuritadigan bo’lsak, etnonimning kelib chiqishini ayrim guruh tadqiqotchilari Oltin O’rda xoni O’zbekxonning (1312- 1341) nomi bilan bog’laydilar. Tarixiy shaxs O’zbekxonning asli ismi Sulton Muhammad edi, xon saylovi qurultoyida unga O’zbekxon unvoni beriladi, ya’ni o’zbeklarning xoni deb e’lon qilinadi. Bu dalil to Sulton Muhammad xonlik taxtiga chiqquncha uni saylaganlar o’zlarini o’zbeklar deb hisoblaganliklarini bildirib turibdi. Boshqa bir guruh tadqiqotchilar esa bu fikrni inkor etadilar va “o’zbek” nomini O’zbekxongacha Oq O’rda mintaqasida, uning /arbiy Sibir va qozog’iston qismida yashagan turkiy qabilalarga mansub (xon nomi qabilalar nomidan olingan bo’lishi mumkin) degan fikrni ilgari suradilar. Uchinchi bir tadqiqotchilar esa, diqqatga sazovor fikr aytganlar. Ularning fikrlariga qaraganda, Dashti qipchoqda ko’chib yurgan turk qabilalarining bir qismi o’zlarini O’zbeklar deb ataganliklari sababli shu nom — o’zbek, ya’ni “o’z-o’ziga bek”, “erkin”, “mustaqil” deyilib-xalq nomiga aylangan. Xulosa qilib aytadigan bo’lsak, o’zbek xalqining etnik shakllanishi uzoq davom etgan murakkab jarayondir. O’zbek xalqining asosini hozirgi O’zbekiston

hududlarida bir necha ming yillar davomida yashab kelgan mahalliy so’g’diylar, qang’lar, baqtriylar, xorazmiylar, dovonliklar, saklar va massagetlar tashkil etadi. Turli davrlarda bu hududlarga kirib kelgan qabilalar, elatlar va xalqlar davr o’tishi bilan mahalliy aholiga o’z ta’sirini qisman o’tkazgan. O’zbek xalqi shakllanish jarayonining barcha bosqichlarida mahalliy aholi chetdan kelgan aholiga nisbatan ustun bo’lgan. Bu fikrimizni isbotlovchi dalillardan biri, keyingi uch-ikki ming yil davomida O’rta Osiyoda, jumladan, O’zbekistonda mahalliy aholining tili uch marta o’zgardi. Xususan, sharqiy eroniy tillar o’rniga g’arbiy eroniy tillari (fors tili) va eramizning boshlaridan boshlab turkiy tillar keng tarqala boshladi. Ammo mahalliy xalqning “qoni”, ya’ni genetikasi aytarli o’zgarmadi va qadimiy xalqlarga xos ko’pgina antropologik xususiyatlar shu kunlarga qadar saqlanib kelmoqda. O’zbek xalqi kelib chiqishining asosini eng qadimgi davrlardan boshlab o’lkamiz hududlarida yashab kelgan xalqlar va elatlar tashkil etgan. Ikki ming yil davomida mahalliy aholiga kelib qo’shilgan turkiy tilli xalqlar o’zbek xalqining shakllanishida asosiy tarkibiy qism sifatida qatnashgan.

Q F oydalanilgan adabiyotlar : 1. B. Axm е dov. “O`zb е kiston xalqlari tarixi manbalari”. T. O`qituvchi. 1991 yil. 2. A.A. Madraimov. “Manbashunoslikdan ma'ruzalar majmuasi”. T. 2001 yil. 3. A. Habibulla е v. “Adabiy manbashunoslik va matnshunoslik”. T. 2000 yil. 4. O`zbekiston tarixi (qisqacha ma`lumotnoma) T. ”Sharq”, 2000. 5. O`zbekiston tarixi (1-qism), T.”Universitet”, 1997. 6. O`zbekiston tarixi (talabalar uchun qisqacha Ma`ruzalar matni), T., “Universitet”, 1999. 7. www.ziyonet.uz 8. www.arxiv.uz

Похожие

O'zbеk xalqining etnik shakllanishi. Etnogеnеz va uni o'rganish masalalari

O’zbek xalqining shakllanish tarixi

O’zbek davlatchiligining shakllanishi va dastlabki taraqqiyot bosqichlari

Ikkinchi jahon urushi yillarida o’zbek xalqining fashizm ustidan qozonilgan g’alabaga qo’shgan hissasi

Ibtidoiy davrda tillar va etnoslar