Хитой цивилизацияси - История - Рефераты

Хитой цивилизацияси

Загружено в:

23.10.2023

Скачано:

0

Размер:

100 KB

Хитой цивилизацияси Режа: 1. Қадимги Хитой цивилицацияси, Шань, Чжоу, Чжоньно даврида Хитой. 2. Ижтимоий-иқтисодий ривожланиш. Юз мактаб рақобати. 3. Цинь ва Хань давлатлари даврида Хитой.

Хитой ҳудудида Ашель даври (700-100 минг йил олдин) дан бошлаб инсонлар яшаб келади. Ланьтян ва Чжоу Коудянь топилмалари Хитойни инсон ойкуменаси ҳудудларидан бири эканлигидан далолат беради. Ишлаб чиқарувчи хўжаликка эса, Яншао ( V - IV минг йилликлар) маданияти мисолида кўриш мумкин. Мил.авв. III минг йиллик 2 ярмидан сунъий суғоришга ўтиш билан мулкий тенгсизлик ва давлат бирлашмалари юзага кела бошлайди. Сима Цяннинг тарихий йилномалар асарида энг қадимги даврда қудратли ва адолатли Яо ҳукмронлик килгани, у ўз ўрнига талантли ва қобилиятли Шун исмли йигитни подшо қилган, унинг даврида худолар инсонларни ўлдириш учун ерга тошқин юборадилар. Шун агар кимки тошқиндан омон қолиш йўриғи топса унга подшоликни беришни ваъда қилади. Юй исмли йигит канал қазиш ва дарё ўзанини чуқурлаштириш орқали тошқинни бартараф қилади ва подшо бўлади. Унинг ўғли Ци биринчи меросхўр бўлиб, илк сулолавий давлат ташкил топади ва бу давлат Ся деб ном олади. Афсонадан кўриниб турибдики, дарё сувларини жиловлаш давлат бирлашмасини вужудга келтиришда катта аҳамиятга эга бўлган. Ся сулоласининг сўнгги вакили ўзининг шафқатсизлиги билан ажралиб турган. Унга қарши шань қабиласи бошлиғи Тан қўзғолон кўтариб, янги шан сулоласини ташкил қилади. Кейинчалик давлат Шан-инь деб ном олади. Шан-инь даври мил. авв. Х VIII -Х IV ва Х IV -Х I асрларни ўз ичига олувчи икки даврдан иборат. Шан-инь даврида бронза қуроллар ишлатила бошланади. Асосий меҳнат қуроли лэй деб аталиб, у иккита айри тишли мотигадан иборат эди. Яна бир характерли хусусияти бу даврда илк шаҳарлар ва ёзув пайдо бўлади. Шан- инь даври шаҳарлари унча катта бўлмасада, атрофи деворлар билан ўраб олина бошланган. Чжоудаги Инь пойтахти 6 метр қалинликдаги девор билан ўраб олинган эди. Лой сувоқли ибодатхоналар, ҳашаматли саройлар тош ёки бронза асосли устунлар билан мустакҳкам ва улуғвор кўриниб, давлатнинг қудратли рамзи бўлган. Шаҳарда ҳунармандчиликнинг турли тармоқлари ривож топган. Ёзувларнинг алоҳида матнлари сақланиб қолинмаган бўлсада, ҳайвон суяклари, тошбақа косасига ёзилган ёзувлар асосан фолбинлик ва худоларга қурбонлик, ҳосилни мўл бўлишини сўрашдан иборат қисқа матнлар ижтимоий ва диний

қарашларни ўрганишда муҳим манба бўлиб хизмат қилади. Инь подшолари саройида Цзоцзе (ёзув учун тахта тайёрлаш) лавозими бўлгани ҳам хўжалик тараққиёти ривожини кўрсатади. Инь даври ёдгорликлари (қабрларни) ўрганиш орқали тўртта асосий табақа шаклланганини кўриш мумкин. Биринчи тоифа қабрлар 400-500 м кв. ни эгаллаб, ички ва ташқи қисмдан иборат. 10 метр ва ундан ҳам чуқурроқ қабрларда подшо ва аристократлар табақаси кўмилган. Ички қисмда марҳум ва унинг хўжалик жиҳозлари от, арава кўмилса, ташқи қисмига хотинлари, хизматкорлари унга хизмат қилиш учун кўмилган. Иккинчи табақа қабрлари 20-25 кв м. ҳажмда бўлиб, қуроллар, хўжалик буюмлари кўмилган. Учинчи категория қабрларида мурдалар зўрға қабрга сиғиб, уларнинг олдидан меҳнат қуроллари топилган. Тўртинчи тоифа қабрларидан эса катта бинолар, иншоотлар фундаменти остидан топилган. Булар бино мустаҳкам бўлиши учун ўлдирилган бўлса керак, деб хулоса қилинади. Мил.авв. Х II асрдан бошлаб Шан-инь давлати Ғарбидаги Чжоу қабилалари кучайиб боради. Шан даврида Инь билан доимий урушлар бўлиб туради. У-Ван (урушқоқ подшо) инь давлати қўшинларини мил. авв. 1027 йил Муе ёнидаги урушда ғалаба қилади. Чжоу даври бошланади. У Вань ислоҳот ўтказиб, давлат чегаралари ва аҳоли яшаш ҳудудларини уларнинг етакчиларини белгилаб беради. Ижтимоий асосларда биринчи ўринда ҳукмдор ва унинг оиласи биринчи табақани ташкил этган. Иккинчи гуруҳларни Чжухоу-яъни, ер мулк эгалари, Аристократлар ташкил этган. Учинчи гуруҳ дафу уруғ-қабилалар етакчилари ва уларнинг қабиладошлари ҳисобланса, тўртинчи гуруҳни ши-яъни уруғ қабилачилик анъаналарининг бузилиши натижасида алоҳида ажралиб чиққан оилалар ташкил қилган. Бешинчи гуруҳни эса, оддий аҳоли ташкил этган. Беш табақанинг уйи, уй жиҳозлари бир-биридан фарқ қилиши, кийиниши ҳатто овқат ейиши ҳам фарқ қилган. Подшо ва оиласи ҳўкиз, қўй, чўчқа гўштини ейиши мумкин бўлган. Иккинчи табақа (чжухоу) фақат мол гўшти еган. Дафу эса, чўчқа гўштини еса, ши тўртинчи табақа балиқ гўштини ейиши мумкин бўлган. Шужэнь (оддий халқ) гўшт ейиши мумкин бўлмаган. Оиладаги катта ўғилдан бошқалари бир поғона паст табақага туширилиб борилган. Чжоу давлати Ю-Ван

(781-771 йй.) даврида жун қабилалари билан илк бора тўқнашув содир бўлганлиги манбаларда қайд этилган. 770 йилда эса, Пин Ван давлат пойтахтини шарққа Лоян атрофларига кўчиради. Шу вақтдан Шарқий Чжоу даври бошланади. Мил.авв. VIII асрда ҳозирги Ордос атрофидаги Ди қабилалари Син ва Вэй вилоятларини босиб олади. Мил.авв. 636 йилда Чжоу ҳукмдори Сян Ван Ди қабиласидан мағлубиятга учрайди. Шу вақтлардан (мил. авв. VIII - VII асрлар) бошлаб хитойликлар варварлар ва ўзларини алоҳида этник бирликлар эканини ёзиб қолдира бошлайдилар. Яъни Хитой халқи ташкил топиш жараёнлари бошланган эди. Мил.авв. VII аср охири- VI аср бошларидан Чжоу ҳукмдорлари мавқеи пасайиб, удел князларининг мавқеи ортиб боради. Улар ўртасида кураш авж олиб Чжоу давлати бўлиниб кетади. Мил.авв. (403 й.) V аср охири-III асрлар Хитой тарихига Чуньцю (баҳор ва куз даври тугаб, Чжаньго (урушқоқ подшоликлар) даври бошланади. Чжанго даврида Цинь давлатида мил. авв. 359 йилда Шан ян ислоҳотлари ўтказилиб, ерни эркин сотиш ва сотиб олиш имкони вужудга келади. Ҳарбий хизмат ва ўлчов бирликлари, ижтимоий муносабатларга оид кўплаб ислоҳотлар ўтказилади. Натижада товар-пул хўжалиги ривожланиб, ижтимоий муносабатлар кескинлашиб, табақаларга бўлиниш жараёни тезлашди. Бу ҳол Хитой фалсафасида юз мактаб курашида ҳам ўз ифодасини топади. Давлатни қандай бошқариш ва бош бўлиш, инсоннинг жамиятдаги мавқеи ҳақида қадимдан Хитой фалсафий мактаблари ўзаро кураш олиб борганлар. Ана шулардан бири Конфуций (аслида Кун Цзю лотинча талаффузда конфуций шаклида ўзгарган) мил. авв. 551-479 йй олийжаноб инсон ғояси Жэнь ғоясини яратди. Унинг фикрича, Жэнь (олийжаноблик), ишонч (чжун), катталарга ҳурмат (Сяо) ўзаро ҳурмат (шу) ғоялари жамият тинчлиги ва фаровонлигини таъминлайди. Унинг ғояларига яна бир хитойлик файласуф Моцзи (Мо Ди мил. авв. V - IV асрлар) қарши чиқди. У ҳукмдорлар нари борса, ўз подшолигини севади. Ўзга подшолик аҳолисини эмас, деб ўргатади. Шунинг учун Мо Ди умумий муҳаббат бўлишигина жамиятни тартибга келтиради деб ҳисоблайди. Мо Ди уруғ-қабила етакчиларини ҳам танқид қилиб, ибтидоий тартибларга қайтишни афзал билади. Унинг фикрича,

уй, кийим, овқат маҳсулотлари бўлса етарли бошқа тараққиётнинг барча шакли инсонлар учун хавфлидир. Жамиятни қонун адолатли бошқаради деб ҳисобловчи легистлар мил. авв. IV - III асрларда шаклланади. Лекин улар ахлоқни бутунлай четга суриб қўядилар. Легистлар фикрича, давлат ҳукмдори аввало ўз халқи устидан ғалаба қозониши ҳаммани итоатда сақлай билиши лозим. Даоцизмни эса, Лао Цзи номли Конфуций замондоши тарғиб қилган. Унинг Дао децзин (дао (йўл) ва Дэ (илоҳий) ҳақида) китобида инсон фикран эркин бўлиши тарғиб қилинади. Илк материалистик қарашларни ўзида мужассамлаштирган Даоцизм давлат бошқарувида хатога йўл қўймаслик лозим, акс ҳолда хатолар занжири ҳосил бўлади деб ҳисоблайди. Хитой тарихчиси Сима Цяннинг маълумотларига кўра, Чжанго даврида Хитойда 100 дан ортиқ фалсафий мактаблар бўлиб, улар ўзаро рақобатда бўлганлар. Фақатгина конфуцийлик, Даоцизмлар кейинги даврларда ҳам яшаб қолганлар. Мил.авв. VII - VI асрлардан эътиборан қишлоқ хўжалигида темир қуроллар ишлатила бошланган. Кўплаб қўриқ ерлар ўзлаштирилган. Темир белкураклар билан ариқ, каналлар қазиш осонлашади. Ижтимоий меҳнат тақсимоти, вилоятларнинг маълум товарларга ихтисослашувини келтириб чиқаради. Қўшни халқлар билан мол айрибошлаш кучайган. Мил.авв. IV асрда чиғаноқ пуллар ўрнига метал пуллар пайдо бўлади. Тангалар тўртбурчак пластинка шаклида бўлган. сақланиб қолган матнларга кўра, подшо олдида учта маслаҳатчилар (олий мураббий, олий муаллим, олий ҳомийдан) олий давлат органи ташкил этилган. Бундан ташқари учта бошқарувчи ҳам бўлиб, биринчиси диний, иккинчиси деҳқончилик ва суғориш ишларини, учинчиси ҳарбий ишларни бошқарган. Чжанго даврида календар системаси тузиб чиқилган. Ўша давр учун бу календар ниҳоят даражада аниқ бўлганлар. Қадимги ва ўрта асрларда Хитой календаридан шарқнинг кўплаб давлатлари фойдаланган. Қадимги Хитой мифологияси табиат кучларини кўпроқ ифодалайди. Дунёнинг яратилиши ҳақида Хаос (йўқлик) бўлгани ва унинг иккига ажралиши орқали ёруғлик Ян ва қоронғулик Инь пайдо бўлганини, одамлар эса, мабуда Нюй Ванинг лойидан

ясалгани ҳақидаги афсоналар кўпроқ тарқалган. Мифларнинг кўпчилигида қаҳрамонлар ё қурғоқчилик ёки тошқинларни бартараф этади. Тошқиндан одамларни Юй қутқарган бўлса, қурғоқчиликда Мерган И қутқарган қаҳрамон ҳисобланади. Суйжэнь одамларга олов ёқишни, Фуси балиқ ва бошқа ҳайвонларни овлашни, Шэньнун одамларга деҳқончилик қуроллари тайёрлаш, экин экишни, Хуанди нон пишириш, уй, қайиқ ясашни ўргатади. Хитой мифологик қаҳрамонлари ярим одам, ярим ҳайвон қиёфасида тавсирланади. Масалан: фуси илон танали, Шэньнун ҳўкиз каллалари бўлиб, улар тотемистик характерга эга бўлиб ҳисобланади. Ҳукмдорларнинг келиб чиқишида Инь ҳукмдорлари қуш тухуми, Чжоу ҳукмдорлари баҳайбат одам, Хань хонадони аждардан тарқалгани ҳақидаги мифлар қадимги хитойликлар матрилокал жойлашувига, матриархат қолдиқлари сақланиб қолганини кўрсатади. Қадимий хитойликлар кўплаб худоларга эътиқод қилганлар олий худо Ди ҳисобланган. Унинг яқин маслаҳатчиси Ван ҳисобланиб, хитойликлар ундан жуда қўрққанлар. Чунки Ван аждодлар руҳи ҳомийси бўлиб, агар улар аждодларга қурбонлик қилмасалар, Ван уларни Дига ёмонлайди. Ди эса уларга ёмонликлар юборади деб ҳисобланган. II - III асрларда Хитойга будда дини кириб кела бошлади. Афсоналарга кўра, будда матнлари оқ отда келтирилгани учун биринчи қурилган ибодатхонага “оқ отлар ибодатхонаси” номи берилган. 148 йили Парфия князларидан бирининг ўғли Ань Шигао илк бор Лоянда будда жамоасини тузади. Буюк ипак йўли орқали буддизмнинг Хитойга тарқалишида Ўрта Осиёликларнинг роли бениҳоя каттадир. Хитой ёзувининг илк намуналари Инь даврига тегишли бўлиб, улар мил. авв. ХIV-ХI асрларга оид иероглифлар маълум бир нарсани, буюмни ёки ҳодисани ифодалаган. Кейинчалик Хань империяси даврида белгиларни ёзиш (лушу) маълум тартибга келтирилиб, ҳозирги ёзувлардан деярли фарқ қилмайдиган ҳолатга келган. Дастлаб бамбук тахтачаларнинг бир қанчаси арқон билан бирлаштирилиб ёзилган бўлса, кейинчалик ипак матоларга, II асрда Цай Лун қоғозни ихтиро қилгандан сўнг эса, қоғозга ёзиш расм бўлган.

Қадимги Хитой адабиёти намуналари Сима Цяннинг Ши Цзун (тарихий йилномалар) асарида қисман сақланиб қолинган. Чжоу даври (мил. авв. Х I - VI асрлар) бронза идишлар ва тахтачалардаги мифлар, шерлар, қўшиқлар тўпланган. Чжаньго даврида яшаган икки шоир Цюй Юан ва Сима Сян шуларнинг ижод намуналари бизгача етиб келган. Қадимги Хитойда мусиқага катта эътибор берилган. Мусиқа ҳақи да хитойликлар: “Сўз алдаши мумкин, одамлар сохтакорлик қилиши мумкин, аммо куй ялтоқланишини билмайди” деган иборани келтирадилар. Қадимги Хитой мусиқа инструментлари торли, зарбли ва пуфлаб чалинадиган турларга бўлинади. Қурилиш ишларида қадимги хитойликларда девор асосий эътиборда бўлмай, асосий эътибор ва мустаҳкамликни талаб қилувчи эътибор устунлар бўлган. Улар асосий оғирликни ва томни кўтариб турган томлар черепицалар билан ёпилган. Деворларга турли мифологик образлар, руҳлар тасвири туширилган. Хань даврида портрет жанри кўпроқ тасвирлана бошланади. Портрет жанрида расм чизишда I аср охирида яшаган Мао Янь Шоу айниқса шуҳрат қозонади. У нафақат инсон тасвирини балки унинг ёши гўзаллигини ҳам кўрсата олишини эшитган. Император унга ҳарамидаги қизларни тасвирини чизишни буюради. У тасвирлаган қизларни гўзал ва ёш эканига ишонади. Бир қанча канизаклар ўзларини ёш, гўзал кўрсатиш учун Мао Янь Шоуни сотиб оладилар. Фақат Чжао Цзюнь номли каниз бу ишни қилмайди. Хун ҳукмдорига совға қилиб юборишдан олдин бу қизга кўзи тушган император алдагани учун рассомни қатл этиб қизни ўзи билан олиб қолади. Аниқ фанлар соҳасида мил. авв. II асрда “тўққиз китобдан иборат математика” асари ёзилган бўлиб, унда алгоритм, Пифагор теоремаси тўғри бурчакли учбурчак ва бошқа кўплаб масалалар уларнинг ечимларига бағишланади. Астрономия соҳасида ҳам хитойликлар катта ютуқларни қўлга киритганлар. Мил.авв. 776 йили илк ой қуёш тутилиши (олимп ўйинларининг бошланиши) қайд этилган. Хань Шу (Хан сулоласи тарихи) муаллифи 118 та юлдуз туркуми (жами 783 юлдуздан иборат) ни ўз асарида келтириб ўтади. II асрда

яшаган астроном ва математик Чжан Хэн 124 юлдуз туркуми (2500 та юлдуз) харитасини тузиши, бу соҳа ривожининг қай даражада бўлганидан далолат беради. Мил.авв. 104 йили Хитой календари янгидан тузилиб бир йил 365,25 кунлиги аниқланади. Мил.авв. IV - III асрлардаёқ Хитой врачлари тўғри овқатланиш, гимнастика, игна билан даволаш ва бошқа илмий соҳалар орқали кенг даволашни йўлга қўядилар. Хань давридаги бирорта трактатларда дуолар, илоҳий кучлар орқали даволаш усуллари учрамайди. Мил.авв. IV - III асрларда Хитойда иқтисодий-ижтимоий ва сиёсий жараёнлар кескинлашиб борди. Иқтисодий жараёнларда танга пуллар кенг қўлланилиб, давлатлар орасидаги божхона ва сиёсий тўсиқлар кучайди. Ижтимоий жараёнларда уруғчилик тартиблари тобора емирилиб, қулчилик тобора жамият ҳаётида катта аҳамиятга эга бўлиб борди. Мамлакатни бирлаштириш ғоялари кучайиб борди. Чжаньго давридаги кўплаб подшоликлар бир бири билан узоқ кураш олиб бордилар. Мил.авв.289 йил Цинь ва Ци шоҳликлари иттифоқ тузиб Цинь Ғарбий ва Ци Шарқий император бўлишликни келишиб оладилар. Ўзаро курашлар натижасида мил. авв. 221 йили Цин подшолиги Чжао, Вэй, Чу, Ци, Лу, Юэ ва бошқа князликларни ягона империяга бирлаштиради. Подшо Ин Чжэн эса, Циньши Хуан Ди (Циннинг биринчи императори) деган номни олади. Мамлакат 36 та йирик округ (Цзюнь)га бўлинди. Округлар эса, Сняь (уездлар)га бўлинди. Уездлар эса, Сян (волост, бўлислар) га бўлинса, ўз навбатида улар Ли (жамоалар)га бўлинган. Императорнинг иккита маслаҳатчиси (Чжьсян) бўлган бўлиб, ҳарбий ишлар етакчиси (Гай Вэй) деб аталувчи шахс билан олий даражадаги мансабни ташкил қилганлар. Мил.авв. 215 йил 300 минг кишилик қўшин Ордос районида сюннуларни қувиб юборади. Шу йили император буюк Хитой девори қуриш ҳақида фармон беради. Мил.авв. 214 йили эса Намвьет, Аулак билан курашлар бошланиб, бир неча йил ичида бу ҳудудлар босиб олинади. Тинимсиз курашлар ва улкан иншоотлар қурилишига аҳолининг катта қисми жалб қилиниб, шафқатсиз эксплуатация қилинади. Халқ норозилиги ошиб боради. Мил.авв. 210 йили Цинши Хуан Ди вафоти билан мамлакатнинг турли рийонларида қўзғолонларнинг бошланишига сабаб бўлади. Мил.авв. 207 йили

Чэнь Шэнь Чу давлати тикланганини ва ўзини подшо деб эълон қилади. Мил.авв. 206 йили қадимий Хань ўлкасида қишлоқ оқсоқоли бўлган Лю Бан мамлакатда ўзини ягона император деб эълон қилади. Чу ва Хань давлатлари ўртасидаги курашда Хань давлати ғалаба қилиб, ягона Хитой империясига айланади. Лю Бян (Гао Цзу) мамлакатдаги аҳволни яхшилаш мақсадида солиқларни кескин камайтиради. Илгари ҳосилнинг 2/3 қисми олинса, эндиликда 1/15 қисми олинадиган бўлади. Лю Бян вафот этгач, Хитой тарихида етти княз қўзғолони бўлиб, марказий ҳокимиятдан ажралиб чиқишга уриниш бўлади. Лекин қўзғолон бостирилиб князларга хусусий қўшин тузиш таъқиқланади (мил. авв. 154 й.). мил. авв. 140-87 йилларда тахтга У Ди номи билан Лючэ ўтиради. Унинг даврида Хань қўшинлари Сюнну (хун)лар билан узоқ урушни бошлайди. Шунингдек, Ҳиндихитой, Корея ва Ўрта Осиёга босқинчилик юришлари амалга оширади. Хань империяси даврида конфуцийликка ягона давлат ғояси сифатида қараш расм бўлиб, бошқа ғоявий мактаблариннг аҳамияти пасайди. Аммо тинимсиз урушлар мамлакатда чуқур инқирозни келтириб чиқаради. Урушлар олиб бориш ва хазинани тўлдириш учун император У-Ди мил. авв. 120 йил туз ва темирга давлат монополиясини ўрнатади. Бундан олдинроқ эса ипак, қоғоз каби маҳсулотлар ҳам давлат монополияси ҳисобланар эди. Ижтимоий ҳаётда мамлакат аҳолиси 20 та ранг (табақа)га бўлинган. 19-20 ранг (даража)ли шахслар ўзларига ўлпон йиғиб олиш ҳуқуқига эга бўлиб, император ва унинг қон-қариндошлари бўлганлар бу даражага эга бўлганлар. Қуллар ҳеч қандай ҳуқуққа эга бўлмасаларда, улар ўз хизматлари эвазига озод бўлишлари ҳамда юқори мартабаларга кўтарилишлари ҳам кузатилган. Масалан: қулнинг болалари ҳам қул ҳисобланган. Жамиятда Хитойнинг машҳур саркардаси Вэйциннинг онаси қул бўлган. У ўз хизматлари эвазига озод қилиниш билан бирга олий рангга ҳам эга бўлган. Унинг уч синглиси бўлиб, У-Ди ҳарамига олинади ва ҳатто кейинчалик малика мақомига кўтарилади. Иккинчи синглиси эса, яна бир Хитойнинг машҳур саркардаси Хо Цюй Биннинг онаси бўлади. Учинчи синглиси ҳам юқори мартабали сарой амалдорларига турмушга чиқади.

Мил.авв. I асрнинг охирида Хань империяси чуқур сиёсий инқирозга учраши натижасида мил. авв. 9 йили императорнинг хотини томонидан қариндош бўлган Ван ман ҳокимиятни босиб олади ва бир қанча ислоҳотлар ўтказишга уринади. Аммо 14 йилда мамлакатда қурғоқчилик, кейинги йиллардаги чигиртка уруши оқибатида халқ оч қолиб 18 йилда Шаньдун ўлкасида қизил қошлилар қўзғолонининг бошланишига сабаб бўлади. Ҳокимият учун курашларда Лю Сюань, Лю Сю каби Хань хонадони аъзолари ҳам қатнашиб, 25 йилда Лю Сю барча рақибларни енгади ва ўзини император деб эълон қилади. Шу вақтдан бошлаб кичик Хань сулоласи даври бошланади. Лю Сю Гуан У-Ди номини олиб, 57 йилгача мамлакатни бошқаради. Унинг даврида ички аҳволни яхшилаш учун каналлар қазилиб, йўллар қурилади. Яқин беш йил ичида қулга айлантирилганлар озод қилинади. Хўжайинларга қулларни сабабсиз қатл этмаслик ҳақида фармон чиқаради. Аммо, кейинги даврларда Хань империяси Хунлар, Сянби, Цян қабилалари билан тинимсиз уруш олиб бориши натижасида ички сиёсий аҳвол ҳам оғирлашади. Мамлакатда диний секталар фаолияти кучаяди. Улар яқин орада яхши замон келишини башорат қила бошлайдилар. Шулардан бири “умумий фаровонлик йўли” номли секта раҳбари Чжоу Цзао бўлиб, унинг таълимотича, кўк осмон ўлиб бўлган, унинг ўрнига сариқ осмон келиши лозим эди. Бу 184 йил император Лин Ди ҳукмронлигининг 17 йилида содир бўлиши керак эди. Хитой календарида ҳар бир эра 60 йил ҳисобланиб янги эра 184 йилдан бошланиши лозим эди. Янги йилда мамлакатнинг турли ҳудудларида қўзғолон кўтарилиб, у тарихда сариқ рўмоллилар қўзғолони номини олади. Узоқ давом этган курашлар 206 йили Хань империясининг Вэй, Шу, У каби уч подшоликка бўлиниб кетиши билан тугайди. Хитойнинг қадимий тарихи тугаб, ўрта асрлар даври бошланади.

Хулоса Жаҳон цивилизациялари ва уларнинг тарихига бағишланган кичкинагина усулий ишланмани яратишимиз бу борадаги тугалланган иш деб бўлмайди. Бу борадаги дебоча ишлардан холос деб ҳисоблаймиз. Шунинг учун ундаги айрим камчиликлар учун муҳтарам ўқувчидан узр сўраймиз. Кўриб чиқилган мавзулар инсоният цивилизациясининг энг қадимги даврларидан янги замон давригача бўлиб, ҳозирги замон цивилизацион жараёнлари хусусида тўхталиб ўтирмадик. Биз бу мавзуни алоҳида ўрганиш зарур ва албатта уни ўрганишда кўпгина воқейликларга танқидий баҳо бериш зарур деб ҳисоблаймиз. Бу борада ғарбдан турли - туман оқим ва “маданият” ларнинг кириб келиши ва уларнинг салбий жиҳатларига алоҳида урғу берилишини истаймиз. Жаҳон цивилизациялари тарихи, уларнинг вужудга келиши, ривожланиши ва инқирози масалаларини бизнинг фикримизча, муҳим ижтимоий - сиёсий аҳамиятга эга бўлган муамо деб қараш ва уни кенг миқиёсда, дунёнинг барча мамлакатлари ва халқлари ҳаётига дахлдор масала сифатида ўрганиш, таҳлил қилиш ва баҳолаш мақсадга мувофиқдир. Ушбу ишланма ана шундай саволларнинг айримларига жавоб беради деб ҳисоблаймиз.

Адабиётлар : 1. Каримов И.А. Тарихий хотирасиз келажак йўқ. Т., 1998. 2. 2017-2021 йилларда Ўзбекистон Республикасини ривожлантиришнинг бешта устивор йўналишлари бўйича ҳаракатлар стратегияси. 2017 йил 7-Февраль. ПФ 4947-сонли фармон. //Халқ сўзи, 28-сон, 2017 йил, 8 февраль. 3. Мирзиёев Ш.М. Таныидий таҳлил, қатъий тартиб-интизом ва шахсий жавобгарлик-ҳар бир раҳбар фаолиятининг кундалик қоидаси бўлиши керак. - Т.: Ўзбекистон, 2017. - 104 б. 4. Эшов Б. Цивилизация тизимида илк шаҳарлар. Тошкент, 2005. 5. Островский А.В. История цивилизаций. Санкт-Петербург. 2000 6. Яковец Ю.В. История цивилизаций. М., 1997. 7. “Древние цивилизации”. Под общей редакцией Бангарда-Левина Г. М. М., 1989. 8. “Древнеиндийская философия. Начальный период” М., 1963. 9. “Мифология древнего мира”. М., 1977. 10. Крамер С. “История начинается в Шумере”. М., 1991. 11. Ғуломов Х.Ғ., Татибоев А.С. “Ўрта Осиё ва жахон тарихи”. Т., 1993.

Похожие

Ислом цивилизацияси

Рим цивилизацияси

Ҳиндистон цивилизацияси

Япон цивилизацияси

Қадимги Юнонистон цивилизацияси