Siyosatshunoslik fani uning ob‘ekti va predmeti - Социология - Рефераты

Siyosatshunoslik fani uning ob‘ekti va predmeti

Загружено в:

20.09.2019

Скачано:

0

Размер:

51 KB

Siyosatshunoslik fani uning ob‘ekti va predmeti Reja: 1. Jamiyatning siyosiy sohasi va uni o’rganuvchi siyosiy fanlar. 2. Siyosatshunoslik fanining ob‘ekti va predmeti. 3.Siyosatshunoslik fanining qonunlari va kategoriyalari (tushunchalari).

Dastlabki davlat hokimiyati turlari, ko’rinishlari, shakllari o’z tizimi jihatidan ancha sodda tuzilgan bo’lib, uzoq tarixiy taraqqiyot bosqichlaridan o’tib, hozirgi turlar, ko’rinishlar, shakllar darajasiga ko’tarildi, boy amaliy tajriba ortdirdi. Shu yo’sinda “siyosat bilan shug’ullanish” oddiydan-murakkabga, ozchilik ishidan butun jamiyat faoliyatiga aylandi. Prezidentimiz I.Karimov “Milliy istiqlol mafkurasi – xalq e‘tiqodi va buyuk kelajakka ishonchdir” degan ma‘ruzasida “Ko’p asrlik tariximiz shuni ko’rsatadiki, inson dunyoqarashining shakllanishida ma‘rifatning, xususan, ijtimoiy fanlarning o’rni beqiyos. Bu jamiyatshunoslik bo’ladimi, tarix, falsafa, siyosatshunoslik bo’ladimi, psixologiya yoki iqtisod bo’ladimi – ularning barchasi odamning intellektual kamolotiga erishuvida katta ta‘sir kuchiga ega”, deb ta‘kidlashlari bejiz emas. Jahon siyosiy hayotida sodir bo’layotgan o’zgarishlar va mavjud muammolar o’zini ma‘rifat deb hisoblashgan har bir kishidan siyosatni chuqurror bilishni, u bilan shug’ullanishni talab etmoqda. Politologiya siyosatni ijtimoiy xodisa sifatida jamiyat hayotining barcha sohalarida namoyon bo’lishini ifodalaydi. Jamiyat hayotida biron bir siyosiy o’zgarish, siyosiy voqea hodisalar siyosatning ta‘siridan chetga qolmaydi. Shu bois politologiya siyosiy fan sifatida jamiyat hayotining turli sohalarida bo’ladigan o’zgarishlarda siyosatning o’rni va rolini ilmiy-nazariy jihatdan asoslaydi. Bu xol, shubxasiz, uning boshqa siyosiy fanlar siyosiy falsafa, siyosiy iqtisod, xalqaro munosabatlarning siyosiy nazariyasi, geosiyosat, siyosiy tarix, siyosiy etika, sotsiologiya va boshqalar bilan bog’liqligini o’zaro aloqalarini ifodalaydi. “Falsafa” siyosatning birmuncha umumiy tomonlarini o’rganadi. U siyosatni jahon taraqqiyoti hamda insoniyat ma‘naviy olamining tarkibiy qismi sifatida umumlashtiradi va nazariy jihatdan asoslaydi. Politologiyaning falsafa bilan aloqadorligi ularning jamiyat hayotining ayrim sohalarida bir xil mohiyatga ega bo’lgan masalalarni o’rganish va asoslashga doir o’ziga xos xususiyatlari bilan ham belgilanadi. Masalan, “falsafa” va “Politologiya”da jamiyatning siyosiy

sistemasi, Davlat, ijtimoiy guruhlar, siyosiy ong va siyosiy madaniyat kabi masalalar o’rganiladi. Bu masalalarni o’rganishga ayni bir xilda yondoshilmaydi, xolbuki ularda bu masalalar har bir fanning predmeti doirasida o’rganiladi. Yoki bo’lmasa, politologiya, “iqtisodiy nazariya” fani bilan ham o’zaro aloqada bo’ladi. Agar “iqtisodiy nazariya”fanida jamiyatning ishlab chiqarish kuchlari va ishlab chiqarish munosabatlari, tovar, pul, moliya, kredit, mulkchilik shakllari, xalqaro iqtisodiy aloqalarga doir masalalar nazariy jihatdan o’rganilsa, politologiyada esa, iqtisodiy siyosatni ishlab chiqish va amalga oshirish, iqtisodiy jarayonlarni davlat, siyosiy partiyalar va harakatlar, siyosiy tashkilotlar tomonidan tartibga solib turish tamoyillari ilmiy jihatdan asoslab beriladi. Politologiya bilan chambarchas bog’liq va yaqin aloqada bo’lgan siyosiy fanlardan biri siyosiy sotsiologiyadir. Bu fanlarda jamiyat hayotida bo’ladigan o’zgarishlarda siyosatning roli va ahamiyati turlicha yondoshuv asosida ochib beriladi. Sotsiologiyada siyosatning jamiyatga munosabatini ifodalovchi masalalar asosan empirik –sotsiologik usullar ya‘ni so’rov anketalashtirish, tajriba o’tkazish, statistik tahlil qilish, matematik modillashtirish orqali o’rganilsa, politologiyada ham shu usul orqali jamiyatning siyosiy hayoti va siyosiy munosabatlarida ruy beradigan o’zgarishlarning ayrim jihatlarini ilmiy-nazariy jihatdan asoslab beradi. Politologiya va Sotsiologiyaning birligi ularning bitta fan ekanligini bildirmaydi. Politologiya sof siyosiy fanlarni o’rgansa, Sotsiologiyada asosiy e‘tibor ijtimoiy masalalari qaratiladi. Masalan, sinfiy va milliy munosabatlar, oila va turmush munosabatlari masalalari Sotsiologiya fanida o’rganiladigan masalalardir. Politologiya Sotsiologiyadan farq qilib, bu masalalarni har birini alohida-alohida o’rganmay, balki ularni hal etishda siyosatning kuchini, ta‘sirini, ahamiyatini ko’rsatib berish asosida ish olib boradi. Politologiya tarix fani bilan ham yaqin aloqada bo’ladi. Ularning har ikkalisiga xos bo’lgan umumiylik jamiyatning siyosiy hayoti va siyosiy munosabatdarida ro’y beradigan voqea-hodisalarni ularning kelib chiqish davri bilan bog’liq holda o’rganishdan iborat. Lekin shunga qaramasdan politologiya tarix fanidan o’zining predmetiga ko’ra farq qiladi. Politologiyada jamiyat

hayotida ro’y beradigan siyosiy voqea-hodisalar asosan hozirgi kunning o’zgarishlari bilan bog’liq holda o’rganiladi. Politologiya huquqiy fanlar bilan ham chuqur aloqada bo’ladi. Masalan, agar “Politologiya” fanida davlat siyosatning sub‘ekti sifatida o’rganilsa, “Davlat va huquq nazariyasi”da esa, davlatning tuzilishi, uning turlari, maqsad va vazifalari, funktsiyalari, qisqasi, davlatning jamiyat hayotidagi faoliyati bilan bog’liq masalalar o’rganiladi. SHunday qilib ko’ramizki, politologiya siyosiy fanlar bilan yaqin aloqada bo’ladi va jamiyat hayotining xilma-xil masalalarini o’rganishda ularda ishlab chiqilgan nazariy xulosalarga va amaliy tajribalarga asoslangan holda ish olib boradi. Har bir fanning boshqa fanlardan farqini uni predmeti aniqlab beradi. Mazkur ma‘noda politologiya deganimizda jamiyat hayotining barcha jabhalari bilan uzviy bog’lanib ketgan, ularning hammasiga ta‘sir o’tkaza oladigan siyosiy munosabatlar va siyosiy jarayonlarning mohiyati chuqur talqin etilgan ilm-fan sohasini anglashimiz kerak. Siyosatshunoslikning boshqa ijtimoiy fanlar tarkibidan mustaqil fan sifatida ajralib chiqish jarayoni XIX o’rtalaridan XX asr boshlariga qadar davom etdi. Huddi shu davrda u mustaqil fan sifatida to’liq shakllandi. Bu jarayonda siyosiy tadqiqotlar bilan shug’ullangan ilmiy markazlar muhim rol o’ynadi. Jumladan, 1871 yilda Frantsiyada “Siyosiy fanlarning ozod (erkin) maktabi” ish boshladi (hozir bu maktab Parij universitetining siyosiy tadqiqotlar markaziga aylangan). AQSHning Kolumbiya universitetida 1880 yilda siyosiy fanlar maktabi, Angliyada 1895 yilda iqtisodiy va siyosiy fanlarning London maktabi, 1903 yildan boshlab esa siyosiy fanlarning Amerika assotsiatsiyasi faoliyat yurita boshladi (X. Odilqoriev, D. Razzoqov. Siyosatshunoslik, Darslik, Toshkent 2008 yil, 9-bet). Ikkinchi jahon urushidan keyin Siyosatshunoslikning fan sifatida taraqqiy etishida yangi davr boshlandi. 1948 yilda Parijda BMTning ta‘lim, fan va madaniyat masalalari bo’yicha tashkiloti – YuNYeSKO tashabbusi bilan Siyosatshunoslikning xalqaro konferentsiyasi o’tkazildi va fan sifatida o’qitishni

taklif etdilar. Natijada XX asrning so’nggi choragiga kelib Siyosatshunoslik alohida nufuzga ega bo’lgan fan sifatida shakllandi. Ikkinchi savol. Politologiya yunoncha so’zdan olingan bo’lib (“politika” – davlat yoki ijtimoiy ishlar hamda “logos” – ta‘limot degan so’zlarning bir - kishidan tashkil topgan bo’lib) siyosat haqidagi ta‘limot degan ma‘noni anglatadi. U o’zining tadqiqot ob‘ektiga ko’ra boshqa ijtimoiy fanlardan farq qiladi. Uning tadqiqot ob‘ektini umuman borliq, jamiyatdagi ijtimoiy, iqtisodiy, madaniy, huquqiy, axloqiy, diniy xodisalar va jarayonlar emas, balki siyosiy xodisalar va jarayonlar tashkil etadi. Politologiya umuman ijtimoiy munosabatlarni emas, balki doimiy siyosiy munosabatlarni tadqiq etadi. Politologiyaning tadqiqot ob‘ekti siyosat, jamiyatning siyosiy sohasi hisoblanadi. Uning mohiyati jamiyatning siyosiy hayoti va siyosiy munosabatlarida ruy beradigan voqea-xodisalar, o’zgarishlarni ilmiy-nazariy jihatdan asoslab berish bilan belgilanadi. Politologiya fani siyosiy hokimiyat uni amalga oshirish, o’rnatilgan siyosiy rejim faoliyati, doirasi, shuningdek, muayyan guruhlar mavqei va munosabati, hokimiyat qamrovi, uni boshqarish usullarini aniqlab beradi. Politologiyaning mavzular doirasi siyosatshunoslikka qaraganda keng bo’lib, u siyosat, davlat, siyosiy partiyalar va guruhlarning hokimiyatni tashkil qilish va boshqarishdagi amaliy siyosiy faoliyatlari bilan bir qatorda siyosiy jarayonlar, siyosiy hokimiyat, ijtimoiy-siyosiy tashkilotlar, jahon mamlakatlarining siyosiy hayoti hamda umumbashariy muammolarning siyosiy jihatlari bilan bog’liq bo’lgan jarayonlarni ham o’rgandi. Bundan tashqari bu fan jahonning ko’pchilik mamlakatlarida “Politologiya” nomi bilan qabul qilingan. Fan sifatida politologiya 2, 5-3 ming yillik tarixga ega bo’lib, u qadimgi Yunonistonda ilk bor paydo bo’lgan. Yunonistonda siyosat tafakkurining ilk ko’rinishlari shaklida paydo bo’lgan. Keyinchalik u mustaqil fan sifatida vujudga keldi. Mamlakatimiz sobiq ittifoqi tarkibida bo’lgan yillarda “Politologiya” fanini o’rganish va o’qitish ishlariga o’ta e‘tiborsizlik bilan qarab kelingan edi. “Politologiya”ga burjua fani, ilmga zid ta‘limot sifatida qaralib, uni o’rganish va

o’qitish batamom taqiqlab quyilgan edi. Bu fanda o’rganiladigan masalalarning ayrim tomonlari falsafa, siyosiy iqtisod, siyosiy tarix, sotsializm nazariyasi va ayrim huquqiy fanlarga tikishtirilib, zo’rma-zo’raki tarzda o’rganilgan edi. XX asr 50 yillarining oxiri va 60-yillarning boshlariga qadar sobiq ittifoqda politologiya faniga doir bironta ham kitob nashr qilinmada, darslik yoki o’quv qo’llanmasi yozilmadi. Faqat 60 yillarning o’rtalariga kelib ayrim jamiyatshunos va huquqshunos olimlar bu fanning ba‘zi masalalarini yoritishga doir ilmiy maqolalar bilan chiqa boshlagan edilar. 70-yillarning o’rtalariga kelib sobiq ittifoqning bir qator markaziy oliy o’quv yurtlarida politologiya fani buyicha ma‘ruzalar o’qila boshlangan edi. Ittifoq tarqalib ketganga qadar biror o’quv yurtida o’quv darsi sifatida kiritilmagan edi. Mustaqillikning dastlabki yillaridanoq mamlakatimizda politologiya fani kiritildi va o’qitila boshlandi. Politologiya ijtimoiy fanlarning ilmiy xulosalarini qanday bo’lsa, shundayligicha foydalanmasdan, balki, jamiyat, davlat va fuqarolar hayotida bo’ladigan siyosiy o’zgarishlar va ularning hokimiyatga munosabatlarini hamda bu o’zgarishlarni amalga oshirish usullari, mexanizmlarini talqin qiladi. Mana shu umumiy qoidaga asoslangan holda Politologiya fanining predmetini quyidagicha ta‘riflash mumkin. Politologiya jamiyatning siyosiy hayoti va siyosiy munosabatlarini hamda jahon siyosatining xilma-xil masalalarini va ularda siyosatning namoyon bo’lish yoki ta‘sir etish xususiyatlarini o’rganuvchi fandir. Politologiya fani quyidagi vazifalarni bajaradi: - siyosiy hodisalarni bilish; - siyosiy tuzumni, muassasalarni, hulq-atvorni, voqealarni baholash; - aholining siyosiy madaniyatini shakllantirish; - siyosiy hulq-atvorni tartibga solish; - siyosiy hayotni mukammalllashtirish; - bashorat qilish.

Siyosiy xodisa va jarayonlarni o’rganishda Politologiya fani turli metodlardan foydalanadi: Dealiktik-materialistik; qiyosiy taqqoslash hamda imperik-sotsiologik metodlar eng muhimlari hisoblanadi. Dealiktik-materialistik metod jamiyatning siyosiy hayoti va siyosiy munosabatlarida bo’ladigan o’zgarishlarni umumiy aloqadorlik va o’zaro ta‘sir etish natijalarida asoslangan holda tahlil qilishda asoslanadi. Qiyosiy –taqqoslash metodi esa, siyosiy jarayonlarda ruy beradigan voqea, xodisalarni o’zaro taqqoslash, ularni bir-biriga solishtirish asosida ilmiy xulosalar qilishni ko’zda tutadi. Imperik-sotsiologik metod bu-so’rov, anketalashtirish, tajriba o’tkazish, statistik tahlil qilish, matematik modillashtirishga asoslanadi. Politologiyada bu uslublardan unumli foydalanish asosida mamlakat va xalqaro maydonda siyosat, uning o’ziga xos xususiyatlari, rivojlanish istiqbollari to’g’risida aniq ma‘lumotlarga ega bo’lish mumkin. Siyosatshunoslik o’zining tadqiqot ob‘ekti va predmetiga ko’ra falsafa, iqtisodiy nazariya, sotsiologiya, madaniyatshunoslik, axloqshunoslik, huquqshunoslik, dinshunoslikka o’xshashdir. Siyosatshunoslik faning tadqiqot ob‘ektini tabiat hodisalari va jarayonlari emas, balki ijtimoiy hodisalar va jarayonlar tashkil etadi. Siyosatshunoslik o’zining tadqiqot ob‘ektiga ko’ra boshqa ijtimoiy fanlardan farq qiladi. Uning tadqiqot ob‘ektini umuman borliq, jamiyatdagi ijtimoiy iqtisodiy, madaniy, huquqiy, axloqiy, diniy hodisalar va jarayonlar emas, balki siyosiy hodisalar va jarayonlar tashkil etadi. Siyosatshunoslik o’zining predmetiga ko’ra boshqa ijtimoiy fanlardan farq qiladi. Uning predmetini borliqning, ijtimoiy, iqtisodiy, ma‘naviy, huquqiy, axloqiy, diniy sohalarning mohiyati va o’ziga xos muammolari emas, balki siyosiy sohaning tabiati va o’ziga xos muammolari, siyosiy hokimiyatning amalga oshirilishi bilan bog’liq bo’lgan munosabatlar tashkil etadi. Politologiya fani metodologik, nazariy bilish, dunyoqarash, tarbiyalovchi, bashorat qilish va aksiologik funktsiyalarini bajaradi. Ma‘ruzada ayrim

funktsiyalarni kengroq yoritishga harakat qilamiz. Qolganlarini amaliyot jarayonida ko’rib chiqamiz. Politologiyaning nazariy funktsiyasiga, uning predmetidan kelib chiqqan holda, siyosatni o’rganish asosida asosiy nazariy kontseptsiyalarni, qoidalarni ishlab chiqish nazarda tutiladi. Buni politologiya fan sifatida amalga oshiradi. Politologiya metodologik funktsiyani ham bajaradi. Uning mohiyati siyosiy hayotni to’g’ri anglash, baholash va bilish uslublari bilan qurollantirishdadir. Politologiyaning amaliy funktsiyasi uning amaliy xarakteri bilan hamda hokimiyat bilan bo’lgan munosabatida o’z ifodasini topadi. Unda boshqaruvda ma‘muriy buyruqbozlik uslubidan voz kechish, boshqarishda demokratik tamoyillarga asoslanish, siyosiy institutlar va g’oyalar xilma-xilligiga asoslanish turli manfaatlar uyg’unligini ta‘minlaydi. Xulosa qilib aytish kerakki jamiyat rivojlanib va taraqqiy qilib borgan sari, bu jarayon undagi siyosiy hayot va munosabatlarda ham o’z ifodasini topa boradi. Siyosiy voqea va xodisalarning ko’lami qancha keng bo’lsa, ulargabo’lgan munosabat ham shunchalik xilma-xil bo’ladi. Chunonchi, bir mamlakatda ishlab chiqilgan siyosiy yo’lni boshqa mamlakatlarda aynan tadbiq etib bo’lmaydi, yoki biron bir partiya va tashkilot tomonidan olib boriladigan siyosat boshqalar uchun yagona vosita bo’lolmaydi. Uchinchi savol: Siyosatshunoslik mustaqil bilim sohasi sifatida ma‘naviyyatimizning tarkibiy qismi bo’lib shakllanayotgan hozirgi davrda uning qonunlari, kategoriyalari yaxlit ilmiy sistemasini yaratish vazifasi tobora paykalga solib bo’lmaydigan dolzarb ilmiy muammolardan biri bo’lib qolmoqda. Siyosatshunoslik fanining qonuniyatlari va tushunchalari ham boshqa siyosiy fanlarning qonuniyatlari kabi umumiy qonuniyat hisoblanadi. Ular milliy xususiyatga ega bo’lmay, balki baynalminalchilik mohiyatiga egadir. Bu qonuniyatlar va tushunchalar ob‘ektiv xarakterga ega bo’lib, ularni kishilarning hoxish irodasi bilan o’zgartirish mumkin emas. Aksincha bu qonuniyatlarning harakatidan maqsadga muvofiq tarzda foydalanish zarur. Boshqa fanlarda bo’lgani kabi politologiyaning ham o’ziga xos bo’lgan, uning mohiyati, mazmuni, asosiy ilmiy izlanishlarini yo’naltiradigan qonun,

kategoriya va tushunchalari mavjud bo’lib, ular mazkur fan hamda bilim sohasi samarador va omilkor amal qilishi jarayonlarini aks ettiradi. Jamiyatning siyosiy hayoti va siyosiy munosabatlarida amal qiladigan qonuniyatlarning xususiyatlariga ko’ra ikki guruhga bo’lish mumkin. Birinchisi, davlatlar ichki siyosiy hayotida amal qiladigan qonuniyatlar bo’lib, u o’z ichiga: a) Sotsial-iqtisodiy, madaniy tarbiyaviy ishlarni hal etish; b) jamiyatni rivojlantirishda siyosiy hokimiyat mexanizmidan samarali foydalanish; v) ijtimoiy hayotni demokratlashtirish; g) mamlakat taqdiriga daxldor masalalarni referendum orqali hal etish; d)shaxs, jamiyat va davlat tizimida inson manfaatining ustivorligini ta‘minlash; ye) jamiyatni inqiroz va tenglikka olib kelishi mumkin bo’lgan holatlarni bartaraf qilishda siyosiy vositalardan foydalanish kabi qonuniyatlar kiradi. Ikkinchisi, xalqaro siyosiy munosabatlardan amal qiladigan qonuniyatlar bo’lib, u o’z ichiga: a) xalqlar va davlatlar o’rtasida hamkorlikning turli sohalarini tashkil etish va rivojlantirishda siyosatning kuchini hisobga olish; b) xalqaro nizov a kelishmovchiliklarni bartaraf etishda siyosiy vositalardan foydalanish; v) umumbashariy muammolarni hal etishning siyosiy yo’llarini ishlab chiqish; g) siyosiy hokimiyatlar, siyosiy partiyalar, tashkilotlar va harakatlar, o’rtasidagi siyosiy hamkorlikni yo’lga quyish hamda rivojlantirishda siyosiy yetakchining o’rni va roli kabi qonuniyatlar kiradi. Politologiyaning mohiyati va mazmunini ifodalashda uning kategoriyalari muhim rol o’ynaydi. Kategoriyalar shu fanda o’rganiladigan masalalarni umumiy tarzda ifodalashda qullaniladi. Kategoriya tushunchasi siyosiy fanlarda jamiyat hayotida ruy beradigan xodisalar, o’zgarishlarni umumiy tarzda ifodalashga xizmat qiladi. Politologiyaning kategoriyalariga (tushuncha) quyidagilar kiradi: (ayrimlarini izohlab beramiz): Siyosat – davlat ishlarida ishtirok etish, davlatning yo’nalishini faoliyat mazmunini, shakli va vazifalarini belgilashda ishtirok etish.

Siyosiy hokimiyat – muayyan xalq, sinf, guruh, shaxs-o’zining siyosatida ifodalangan irodasini amalga oshirish imkoniyatidir. Siyosiy tizim – davlat hokimiyati va davlat boshqaruvini shakllantirish hamda amalda ruyobga chiqarish bilan bog’liq munosabatlar, harakatlar, tashkilotlar tizimidir. Siyosiy hayot – siyosiy hokimiyatni joriy qilish bilan bog’liq bo’lgan ijtimoiy hayotning bir qismi, sohasi. Siyosiy munosabatlar – hokimiyatni qo’lga olish va amalga oshirish sohasida turli siyosiy tashkilotlar, ijtimoiy guruhlar hamda shaxslar orasidagi aloqalar. Siyosiy jarayon – jamiyatning siyosiy tizimini shakllantirish va o’zgartirish borasidagi ijtimoiy sub‘ektlarning birgalikda amalga oshiradigan faoliyati. Siyosiy institutlar (muassasalar) – ijtimoiy sub‘ektlar o’rtasida siyosiy munosabatlarni tartibga solib turuvchi, muayyan sub‘ektlarning manfaatini ko’zlab ish kuruvchi davlat, huquqiy siyosiy, ijtimoiy muassasa va tashkilotdir. Siyosiy madaniyat –har bir fuqaroning davlatning ichki va tashqi siyosatini tushuna bilish qobiliyati, tahlil qila bilish darajasi sanaladi. Siyosiy partiyalar – umumiy g’oya va manfaat, ijtimoiy-siyosiy maqsadlar asosida odamlarni ixtiyoriy ravishda uyushtiruvchi turg’un tashkilot, fuqaroviy jamiyat bilan davlatni bir-biriga bog’lovchi eng muhim vositalardan biri. SHunday qilib politologiyaning qonunlari va kategoriyalari hozirgi kunda yaxlit bir sistemaga qarab borayotgan va muayyan bir qolipga tushayotgan bir davrni qamrab oladi. Bu jarayon esa mustaqil O’zbekiston fuqarolari siyosiy tafakkurining vujudga kelishiga, ular kurayotgan jamiyatning ilg’or rivojlangan va jahon hamdo’stligi qatoridan o’ziga munosib o’rin egallab olishga xizmat qiladi. Mustaqillikkacha, chorakkam bir asr davomida, fuqarolarimiz yagona hukmron mafkura tazyiqida tarbiyalanib, loqaydlik, qaramlik, mutiylik va norasolik ruhining ta‘sirida o’sganlar. Bu narsa hozirgi hayotimizda har xil ko’rinishda namoyon bo’ladi. Shu boisdan O’zbekistonning kelajagi, uning istiqboli, birinchi navbatda yoshlarni tarbiyalash, sog’lom qilib o’stirish, ularning

ongini o’tmish ta‘siridan ozod ravishda shakllantirish mustaqil mamlakatning dolzarb vazifalaridandir. Mustaqillik tufayli O’zbekistonda Politologiya fanini o’rganishga va uni rivojlantirishga real imkoniyat paydo bo’ldi. Prezidentimiz I.Karimov o’zining “Yuksak ma‘naviyat – yengilmas kuch” degan risolasida “Istiqlolimizni qo’lga kiritgan ilk kunlardan boshlab, biz milliy g’oyamizning eng asosiy tushuncha va tamoyillarini belgilab olish va ishlab chiqishga harakat qildik,” – degani fikrimizning dalilidir. Bu qo’yidagi holatlarda namoyon bo’lmoqda. Birinchidan, mamlakatimizning siyosiy hayotida sodir bo’layotgan siyosiy jarayonlarni tahlil qilish va uni jahonning rivojlangan mamlakatlari to’plagan tajribalar bilan solishtirish asosida mamlakatimiz, millatimiz xususiyatlariga va manfaatlariga xizmat qiluvchi siyosiy xulosalar berish; ikkinchidan, mamlakatimizning xalqaro hamjamiyatga kirib borishining qulay yo’llarini belgilash; uchinchidan, mamlakatimizda demokratik jarayonlarni rivojlantirishning mexanizmlarini vujudga keltirish va ularning uyg’un holatda faliyat ko’rsatishlariga yordamlashish; to’rtinchidan, fuqarolarning siyosiy ma‘naviyati, saloxiyati va faoliyatini oshirish, ularda mamlakatimiz oldida turgan o’lkan vazifalarni bajarishda yaqinlik ruxiyatini, jahonda va mintaqamizda sodir bo’layotgan turli o’zgarishlarga siyosiy xushyorlik bilan qarash tuyg’ularini shakllantirish; beshinchidan, siyosiy barqarorlik, millatlararo totuvlik va yuksak ilmiy saloxiyat mamlakatimizning mustaqillikni ta‘minlashning asosiy sharti ekanligini yoshlarimizning ongi va qalbiga singdirish bilan bog’liq bo’lgan tadbiq vazifasini amalga oshiradi. Bugungi kunda Respublikamizda politologiya fanining o’sib va rivojlanib borishi quyidagilarga bog’liq. Birinchidan, Respublikamiz Prezidenti I. Karimov ta‘kidlaganidek, jamiyat siyosiy hayotida ikki mafkuraviy tizimning kurashi va bu kurashning xalqaro hayotning hamma sohalariga soya tashlashi ostida o’tgan kuchli qarama-qarshiliklar barham topdi. Ammo shundan keyin ham bizni qurshab turgan dunyo, ko’plar kutganidek, osoyishtaroq bo’lib qolgani yo’q (I. Karimov

O’zbekiston XX!-asr bo’sag’asida xafsizlikka tahdid, barqarorlik shartlari va taraqqiyot kafolatlari. T. 1997 yil, 19 bet). Ikkinchidan, siyosatda, jahon taraqqiyotining muhim omili mamlakatlar va xalqlar manfaatlarini uyg’unlashtirishga erishish bilan bog’liq. Uchinchidan, hozirgi davrda har bir shaxsning siyosat bilan shug’ullanishiga bo’lgan ehtiyojlarning ortishi, mavjud demokratik jarayonlar bilan belgilanadi. To’rtinchidan, hozirgi zamonda siyosiy jarayonlarning tez o’zgarib borayotganligi kuzatilmoqda. Bu o’zgarishlarning dunyo hamjamiyati va inson manfaatlari bilan uyg’un bo’lishi uchun oqilona siyosat olib borish bilan birga ongli siyosiy faoliyat, siyosatda ongli munosabatda bo’lishi zarur. Beshinchidan, Fuqarolarning siyosiy madaniyati va faolligini oshirish, jamiyat iqtisodiy-ijtimoiy, ma‘naviy-ma‘rifiy sohalarda nodemokratik holatning oldini olish uchun uning asosiy kafolatlaridan biri mamlakatimizda fuqarolarning huquqiy, ma‘naviy, siyosiy faoliyatini rivojlantirishni davlat siyosati darajasida uyg’un bo’lishdir. Oltinchidan, siyosiy hayotning barcha sohalarini,- yurtboshimiz ta‘kidlaganidek,-erkinlashtirish jamiyatda demokratiya, fikr va vijdon erkinligi tamoyillarining gumanizm g’oyalari va umuminsoniy qadriyatlarni qaror toptirish (I. Karimov. Donishmand xalqimizning mustahkam irodasiga ishonaman. T. 2000 yil. 8-bet). SHunday qilib, Politologiya fanining ahamiyati va rolining oshib borishi hozirgi zamonda insoniyat taraqqiyotidagi o’zgarishlar, siyosat va siyosiy jarayonlar bilan uzviy bog’liq bo’lgan xodisadir.

Adabiyotlar ro’yxati : 1. O’zbekiston Respublikasi Konstitutsiyasi. T. 20 1 0 yil. 2. I. Karimov O’zbekiston: Milliy istiqlol, iqtisod, siyosat, mafkura. 1-kitob. T., 1996 yil. 3. I. Karimov. Bizdan ozod va obod Vatan qolsin. 2-kitob, T. 1996 yil. 4. I. Karimov. Jamiyatimiz mafkurasi xalqni xalq, millatni millat qilishga xizmat etsin. 7- kitob, T., 1999 yil. 5. I.Karimov. Donishmand xalqimizning mustahkam irodasiga ishonaman. “Fidokor” 2000 yil. 8 iyun. 6. I. Karimov. Yuksak ma‘naviyat - yengilmas kuch. T., 2008 yil 7. Mustaqillik izohli ilmiy-ommabop lug’at. T., 1998 yil 8. S. Otamurodov, I. Ergashev, Sh. Akromov, A. Qodirov. Politologiya (o’quv qo’llanma). T., 1999 yil. 9. Politologiya (o’quv qo’llanma). T., 2002 yil. 10. S. G’afurov, A. Xaydarov, N. To’laganova. Siyosatshunoslik asoslari. O’quv qo’llanma. T., 2006 yil. 11. X. Odilqoriev, D. Razzoqov. Siyosatshunoslik. Darslik T., 2008 yil.

Похожие

Sotsiologiya fanining predmeti, obe‘kti va ijtimoiy fanlar tizimida tutgan o’rni

Sotsiologiyaning predmeti tarkibiy tuzilishi va rivojlanish qonuniyatlari

Sotsiologiyaning ob’ekti va predmeti

O. Kontning pozitivistik katexizis asari

Empirik sotsiologik tadqiqotlarni tashkil etish va umumlashtirish