Қорамоллар лейкози Leycosis bovinus - Сельское и лесное хозяйство - Рефераты

Қорамоллар лейкози Leycosis bovinus

Загружено в:

20.09.2019

Скачано:

0

Размер:

88 KB

Қорамоллар лейкози Leycosis bovinus Режа: 1. Иқтисодий зарар. 2. Кечиши ва клиник белгилари. 3. Патологоанатомик ўзгаришлар

Лейкоз ( гемобластоз ) — сурункали кечадиган юқумли касаллик бўлиб , қон ишлаб чиқарувчи тўқималарнинг хавфли ўсмаси , қон элементлари етилишининг бузилиши билан характерланади . Тарихий маълумот . Лейкоз биринчи марта тиббиётда ўтган асрнинг ўрталарида аниқланган . Немис олими Р . Вирхов 1845 йили 55 ёшли аёлнинг жасадини ёриб кўриб , унда талоқ катталашганлиги ва томирларда худди қуюқ ва йирингга ўхшаш масса борлигини кузатган . Қонни микроскопик текшириш шуни кўрсатдики , бу қуюқ масса лейкоцитлардан иборат экан . 1847 йилда Р. Вирхов бу касалликни «лейкемия» (оқ қон) деб атаган. Бир оз кейинроқ бу касаллик уй ҳайвонларида ҳам учраши тўғрисида маълумотлар пайдо бўла бошлади. Йилқилар ва чўчқалар лейкозини 1858 йилда немис олими Лейзиринг, қорамоллар лейкозини О. Сидамгродский, эчкилар лейкозини Авероуз (1896), қўйлар лейкозини Л. Лунд (1926), Ф. Кит (1931) ва бошқалар ёзган. Капарин (1886) лейкоз касаллигининг товуқларда, О. Сидамгродский (1871) мушуклар ва итларда, Эберт (1878) сичқонларда ҳам учрашини биринчи бўлиб аниқлашди. Ҳозирги вақтда кўплаб сут эмизувчиларда, уй ва ёввойи паррандаларда лейкоз касаллиги аниқланган. Немис олими Р. Вирхов лейкоз касаллигини алоҳида касаллик деб ёзиб, 2 та формага ажратган: талоқ формаси (талоқнинг катталашуви ва қонда лейкоцитлар пайдо бўлиши), лимфа формаси (лимфатик тугунларнинг катталашуви ва кичик лимфоид ҳужайралар пайдо бўлиши). Е. Нейман (1870) эса учинчи форма, яъни миелоцитлар формасини топди. Унинг аниқлашича, касалликда айрим ҳолларда қизил кўмик жароҳатланади. 1976 йилда А. Шастний лейкоз касаллигида қизил кўмик, талоқ, лимфатик тугунлар, ўпка ва бошқа аъзоларда хавфли ўсмалар ўсганлигини аниқлади. Л. М. Бирк деган олим (1883) ҳам лейкознинг ўсмаларга алоқаси борлигини аниқлади. Иқтисодий зарар. Қорамоллар лейкози оғир кечиши ва тез-тез учраши билан қишлоқ хўжалиги ҳайвонлари касалликлари ўртасида маълум ўринни

эгаллайди. Касаллик туфайли халқ хўжалигига келадиган иқтисодий зарар катта. Айниқса наслчилик хўжаликларида касал молларни мажбуран йўқ қилиш, гўшт ва ички аъзоларини утилга топшириш, сутини йўқ қилиш ёки уни қайнатиб ҳайвонларга ичириш, бузоқ олишнинг камайиши, наслчилик ишларининг бузилиши ва диагностика, санитария-профилактика тадбирларига ажратиладиган воситаларнинг етишмаслиги туфайли ўлим кўп содир бўлади. Касаллик барча қишлоқ хўжалиги ва уй ҳайвонлари, шунингдек лаборатория ҳайвонларида учрайди. Айниқса, касаллик билан юқори маҳсулдор қизил-чўл, латвия зотлари, қизил-эстон, қизил-литва ва қора-ола зотли қора моллар 4 ёшдан 8 ёшгача бўлган даврда кўпроқ касалланади. Касаллик камдан-кам янги туғилган бузоқларда учрайди. Шу туфайли қишлоқ хўжалигига зарар етади. Қўзғатувчиси. Касалликнинг қўзғатувчиси РНК сақловчи онкоген вирус бўлиб, оncovirus авлодига, Retroviridae оиласига киради. Қорамоллар лейкози вируси морфологик жиҳатдан бошқа турдаги ҳайвонлар лейкози вирусига ўхшашдир. Антиген тузилиши жиҳатидан эса бир-биридан фарқ қилади. Чидамлилиги. Лейкоз вируси ташқи муҳит таъсирига унчалик чидамли эмас. Вирус ҳужайра культураларида 60 °С қиздирилганда бир минутдан кейин ўлади, 2—3% ли ишқорда, формальдегид эритмалари таъсирида зарарсизланади, сутни 74° қиздирилганда 17 секундда ўлади. Лейкоз вируси ҳужайраларда узоқ вақт алоҳида ёки уларнинг геноми билан бирга учрайди. Моллар организмининг умумий иммун чидамлилиги ва моддалар алмашинуви жараёнлари пасайса, вируслар таъсири кўрина бошлайди. Эпизоотологияси. Қорамоллар ва бошқа турдаги ҳайвонлар мойил бўлиб, лейкоз дунёнинг барча мамлакатларида учрайди. Касаллик кўпроқ чорвачилик юқори даражада ривожланган мамлакатлар — АҚШ, Марказий Европа, Скандинавия оролларида, Яқин Шарқ мамлакатлари, Болтиқ бўйи ва Украина мамлакатлари хўжаликларида қайд қилинган. Касаллик ҳар қандай

ёшдаги, асосан 4—8 ёшли қорамолларда учрайди. Қорамолларда лейкознинг тарқалиши ва ўтиш йўллари ҳақида аниқ бир хулоса йўқ. Касалликнинг горизонтал йўл билан юқиши охиригача ечилмаган. Болгария, Руминия, Югославия, Чехия ва Словакия, Туркия, Исроил, собиқ СССР ва бошқа мамлакатларда лейкоз касаллиги асосан Германия, Дания каби касаллик кенгроқ тарқалган мамлакатлардан ёш моллар наслчилик мақсадида олиб келиниши натижасида пайдо бўлган. Ҳозирги вақтда Ўзбекистон Республикаси, Қозоғистон, Тожикистон республикаларида четдан келтирилган қизил-ола, қизил-эстон, қизил-литва зотларида лейкоз учраган ҳоллар аниқланган. Белоруссия Республикасида лимфолейкоз (53 фоиз) ва ретикулёз (36 фоиз), кам ҳолларда миелолейкоз (9 фоиз) ва гемоцитобластоз (2 фоиз) учрайди. Украина республикаси хўжаликларида лимфолейкоз, гемоцитобластоз, миелолейкоз, лимфосаркома, ретикулёз, Ўзбекистон Республикаси хўжаликларида эса лимфолейкоз ва ретикулосаркома кўпроқ учрайди. Ҳозирги вақтда қорамолларда лейкоз касаллиги контакт йўл билан ўтиши мумкинлиги охиригача аниқланмаган. Касалликнинг тарқалишида генетик ирсий омилларнинг роли катта. Касаллик касал ҳайвонлар сути орқали ҳам юқиши мумкинлиги аниқланган. Патогенези. Қорамоллар лейкози патогенези вирус билан ҳужайралар ўртасидаги ўзаро муносабат орқали аниқланади. Касаллик кўпроқ яширин ҳолатда кечади. Турли ташқи ва ички омиллар натижасида қўзғатувчининг фаоллиги ошади. Натижада қон ишлаб чиқарувчи аъзоларнинг бошқарув функцияси айрим ҳолларда молларда аста-секин бузилади. Қон ишлаб чиқарувчи тўқима ҳужайраларининг пролифератив ва дифференциал бузилиши лейкоз касаллигининг асосий белгисидир. Кўп ҳолларда лейкобластик ҳужайраларнинг тез-тез жароҳатланиши қон ишлаб чиқарувчи аъзолар — қизил кўмик, талоқ, лимфатик тугунларда турли типдаги лейкоцитларнинг интенсив пролиферациясига олиб келади. Қонда

ривожланган, кўпайган бу ҳужайралар бутун организмга тарқалиб, турли аъзо ва тўқималарга тушади, ўсмалар ҳосил бўлади, натижада махсус ҳужайраларни атрофияга учратади. Кечиши ва клиник белгилари. Касалликнинг яширин даври ҳайвонларни тажриба йўли билан зарарлаганда 60—750 кун, касаллик ўз- ўзидан пайдо бўлганда эса 2—6 йилгача давом этади. Лейкоз касаллиги кечишига қараб қуйидаги босқичларга бўлинади. 1. Лейкоз олди босқичи , серологик ва вирусологик текширишлар ёрдамида аниқланади, бу вақтда қонда ҳеч қандай ўзгаришлар кузатилмайди. 2. Бошланғич босқич . Касалликнинг бу босқичида периферик қонда сифат ва сон жиҳатдан ўзгаришлар кузатилади. Гематологик ўзгаришлар кўп йиллар турғун ҳолда қолиб, молнинг умумий ҳолати ва маҳсулдорлиги ўзгармайди. Лейкоз билан касалланган молларнинг 50—60 фоизида касалликнинг бошланғич босқичида қонда лейкоцитлар сони 15—40 мингтагача тушиб кетади. 3. Бурилиш босқичи . Бу босқичда молларнинг умумий ҳолати ёмонлашади, озуқани яхши емайди, сути камаяди, ориқлайди, овқат ҳазм қилиш бузилади (ич кетиши, ич қотиши ва қорин дам бўлиши). Юрак фаолияти сусаяди, шиллиқ қаватлар сарғаяди, нафас олиш ёмонлашади, кўкрак ости, қорин, елин соҳаларида шиш пайдо бўлади. Иккала орқа оёғи оқсайди, сийдик ажралиши қийинлашади, бола ташлаш кузатилади. Елиннинг битта ёки бир нечта сўрғичлари катталашади. Бундан ташқари, юза лимфатик тугунлар (курак олди, қулоқ атрофи, жағ ости, елин усти) ва ички (ректал текширишга қулай) лимфатик тугунлар катталашади. Моллар танасининг турли жойларида ўсмасимон шишлар пайдо бўлади, экзофтальмия белгилари кузатилади, талоқ ва жигар катталашади. 4. Терминал — охирги босқич . Бу босқичда патологик жараёнлар тез ривожланади. Айрим ҳолларда қонда лейкоцитлар сони камаяди, бу ерда уларнинг патологик формалари намоён бўлади. Ёш молларда касаллик ўткир кечади. Моллар касалликнинг биринчи белгилари пайдо бўлгандан сўнг бир

неча ҳафта ўтгач ўлади. Катта ёшдаги молларда эса талоқ ёрилиши оқибатида тўсатдан ўлим рўй беради. Патологоанатомик ўзгаришлар. Лейкоз касаллигидан ўлган молнинг танаси ёриб кўрилганда, касалликнинг кечиш босқичи ва формасига қараб қон ишлаб чиқарувчи аъзолар, шиллиқ қаватлар, ичак, юрак, жигар, буйрак, бачадон ва бошқа аъзоларда диффузли ва ўчоқли инфильтрация аниқланади. Лейкоз касаллигининг асосий формаси лейкозлар ва ретикулозлардир. Лейкозларга лимфолейкоз, миелолейкоз ва гемобластозлар киради, Ретикулозларга эса лимфосаркома, ретикулосаркома, системали ретикулёз, лимфогрануломатоз ва плазмацитомалар киради. Бу классификация қонда ҳаракатланувчи шаклли элементларни цитологик ва гематологик текшириш натижаларига асосланган. Гистологик текширишлар учун ўлган ёки мажбуран сўйилган молларнинг ўзгарган аъзоларидан (2x2 см) бўлакча олиб, 10% ли формалин эритмасига солиб лабораторияга юборилади. Диагноз. Қорамоллар лейкоз касаллигига диагноз эпизоотологик, клиник, гематологик ва патологоанатомик текширишлар натижасида қўйилади. Клиник усул. Қорамоллар лейкоз касаллигининг характерли клиник белгиси ташқи (қулоқ атрофи, жағ ости, томоқ, курак олди, елин усти, дум ости) лимфатик тугунларнинг бирмунча катталашувидир. Бош соҳаси, бўйин, бел ва оч биқиндаги катталашган тери ости лимфатик тугунлари соғлом молларда кўринмайди. Айрим касал молларда (3—5 фоиз ҳолларда) экзофталмия белгилари кузатилади. Бирмунча катталашган ички (чов соҳаси, мезентериал) лимфатик тугунларни ректал текшириш орқали аниқланади. Бундан ташқари, лейкоз касаллигида молларда умумий ҳолсизланиш, иштаҳанинг пасайиши, ориқлаш, ошқозон ишининг бузилиши, вақти-вақти билан ич кетиши, юрак фаолиятининг бузилиши каби ҳолатлар кузатилади. Юзадаги лимфатик тугунларни кўз билан кузатиб, пайпаслаб, зарурий ҳолларда биопсия ўтказиб текширилади. Уларнинг катталиги, формаси, консистенцияси, ҳарорати, оғриқ сезувчанлиги ва ҳаракатчанлигига эътибор

берилади. Юрак-қон томир системасини текшираётган пайтда юракнинг катталиги ва уришига эътибор қаратилади. Лейкоз касаллигининг охирги босқичида юрак минутига 120—150 марта уради. Юрак уриши сусаяди, юрак тонлари эшитилмайди, биринчи тон—қисқарган, айрим ҳолларда кенгайган бўлади. Юрак кучсизлиги ва қон босимининг пасайиши туфайли молларда кўкрак ости ва жағ оралиғи бўшлиқларида, тери ости клетчаткасида шиш пайдо бўлади. Перкуссия ўтказиш йўли билан талоқ катталашганлиги аниқланади. Талоқ ёрилиб, ички қон қуйилиш натижасида моллар тўсатдан ўлиб қолиши ҳам мумкин. Касал молларда жигарнинг катталашувини перкуссия йўли билан аниқлаш мумкин. Гематологик усул. Лейкоз касаллигига диагноз қўйиш учун касалликнинг барча ривожланиши босқичларида гематологик усул бўлган «лейкоз калити»дан фойдаланилади. Бу 1 мкл қонда лейкоцитлар (лимфоцитлар)нинг сон ва сифат ўзгаришларини аниқлашга асосланган. Лейкоз касаллиги кўпчилик ҳолларда аста-секин билинмасдан ривожланади. Бир неча йиллар мобайнида молнинг ҳолати, семизлиги, сут маҳсулдорлиги ўзгармасдан қолиб, касалликка ҳеч қандай шубҳа туғилмайди. Бу даврда фақат қоннинг морфологик тузилиши сон ва сифат жиҳатидан ўзгаради. Қорамоллар лейкоз касаллиги бўйича соғлом, касалликка гумон қилинган ва касал молларнинг 1 мкл қонида лейкоцит ва лимфоцитларнинг сони қуйидагича: Моллар ёши Соғлом моллар Касалликка шубҳали моллар Касал моллар Лейкоцитлар сони Лимфоцитларнинг абсолют сони Лимфоцитларнинг абсолют сони 2-4 4-6 6 дан катга 11000 гача 10000 гача 9000 гача 8000 дан 10000 гача 6500 дан - 9000 гача 5500 дан - 8000 гача 10000 дан юқори 9000 дан юқори 8000 дан юқори

Айрим олимлар «лейкоз калити»ни қимматли диагностик усул деб ҳисобласалар, айримлари уни замонавий эмас деб кўрсатмоқдалар. Дифференциал диагноз. Қорамоллар лейкоз касаллигига гематологик усул билан диагноз қўйишда бир қатор касалликлар (сил, бруцеллёз, паратуберкулёз, актиномикоз, эндометрит, гепатит, ретикулит, мастит ва бошқалар)нинг гематологик қон кўрсаткичлари худди лейкоз касаллигига ўхшаш бўлади. Сил, паратуберкулёз, бруцеллёз ва актиномикоз касалликларида қорамолларда лимфатик тугунлар жароҳатланган пайтда лимфоцитоз кузатилади. Актиномикоз касаллигида жағ ости лимфатик тугунлари ҳамда томоқ, бўйиннинг пасти қисми лимфатик тугунлари бирмунча кўпроқ жароҳатланади. Сил касаллигида бирламчи ўчоқ ўпкада ёки ичакларда, бронхиал ва мезентериал лимфатик тугунларда учрайди. Паратуберкулёз касаллигида эса асосан ичаклар, лимфатик тугунлар жароҳатланади. Сил, актиномикоз, бруцеллёз касалликларини лейкоз касаллигидан дифференциация қилиш учун специфик аллергик, бактериологик, серологик, патоморфологик текшириш усулларидан фойдаланилади. Тейлериоз, пироплазмоз ва франсиллёз касалликларида лейкоз касаллиги учун характерли бўлган лейкоцитоз ва абсолют лимфоцитоз учрамайди. Иммунитет. Лейкоз касаллигида иммунитет ва молларни эмлаш масалалари кам ўрганилган. Ҳозиргача ҳеч қандай вакцина яратилмаган. Даволаш. Ишлаб чиқилмаган. Касал моллар гўштга топширилади. Олдини олиш. Қорамоллар лейкоз касаллиги бўйича бизнинг республикамизда профилактик ва соғломлаштириш тадбирлари худди сурункали кечадиган юқумли касалликлардаги каби амалга оширилади. Хўжаликлар касалликнинг эпизоотик ҳолатига қараб соғлом ва носоғлом хўжаликларга ажратилади. Касалликнинг олдини олиш 1984 йил 29 декабрда собиқ СССР ветеринария бош бошқармаси томонидан тасдиқланган, «Қорамоллар лейкоз касаллигига қарши кураш тадбирлари ҳақида» қарор асосида амалга оширилади. Касалликни йўқотиш ва олдини олиш тадбирлари

асосан соғлом хўжаликларни касаллик кириб келишидан сақлаш ҳамда носоғлом хўжаликларда махсус ветеринария-хўжалик тадбирларини ўтказишдан иборат. Соғлом хўжаликларни касалликдан сақлаш учун 1 йилда бир марта, наслдор буқаларни эса бир йилда икки марта, сигир ва ғунажинларни иммунодиффузия (РИД) реакцияси ёрдамида серологик текширилади, наслчилик мақсадларида фойдаланиладиган молларни фақат соғлом хўжаликлардан келтирилади. Агар сўнгги 5 йил давомида клиник, гематологик ва патоморфологик текшириш натижасида ҳеч қандай касал мол рўйхатга олинмаса, бундай хўжаликлар, бўлим, ферма ва подалар соғлом деб ҳисобланади. Қорамоллар лейкоз касаллиги бўйича носоғлом деб эълон қилинган, сут ишлаб чиқариш ва бузоқ боқиш учун мўлжалланган наслчилик-товар хўжаликлари ҳамда саноат комплексларида чеклаш эълон қилинади ва қуйидагилар таъқиқланади: — ветеринария мутахассисларининг рухсатисиз хўжалик ичкарисида молларни бир гуруҳдан иккинчисига ўтказиш; — бир-бирига яқин қариндош бўлган ҳайвонларни урчитиш; — шу хўжаликнинг ўзида профилакгик ва даволаш мақсадларида моллар қони ва қон зардобини ишлатиш; — наслчилик ва фойдаланиш мақсадлари учун молларни сотиш ва чиқариш. Бунда фақат носоғлом хўжаликлардан 12 ойликгача бўлган молларни соғлом сигир ва буқалардан олингандагина хўжаликдан чиқаришга рухсат этилади. Хўжаликларни соғломлаштириш тадбирларига қуйидагилар киради: — касал моллар ва улардан олинган насл гўштга топширилади; — касал ҳайвонлардан туғилган бузоқлар гўшт учун боқиладиган гуруҳга ўтказилади;

— лейкоз билан касалланган ва касалликка гумон қилинган моллар сўйилгач, гўшт ва ички аъзолари гистологик ва ветеринария-санитария экспертиза қоидалари бўйича текширилади. Бундай моллар фақат санитария талабларига жавоб берадиган жойларда сўйилади. Касал моллар сўйилгач, бинолар ва жиҳозлар дезинфекция қилинади; — лейкоз билан касалланган молларнинг гўшти санитария жиҳатидан баҳоланганда ички аъзолар, лимфатик тугунлар ва скелет мускуллари жароҳатланган бўлса, гўшт ва гўшт маҳсулотлари йўқ қилинади; агар фақат алоҳида лимфатик тугунлар жароҳатланган бўлиб, скелет мускулларида ўзгариш бўлмаса, жароҳатланган аъзоларгина йўқотилиб, қолганлари сальмонеллёзга қарши бактериологик текширилади. Сальмонеллёзлар аниқланса, гўшт ва барча аъзолар йўқотилади, сальмонеллалар бўлмаса, қайнатилади. Лейкоз билан касалланган сигирлардан олинган сут қайнатилиб, боқилаётган молларга берилади. Касалликка шубҳа қилинган сигирлардан соғиб олинган сутлар пастеризация қилиниб, одамлар ичишига рухсат этилади. Носоғлом хўжаликларда барча молларни икки гуруҳга ажратадилар: 1. Қон зардобида лейкоз касаллиги вирусига қарши антитело аниқланмаган моллар. 2. Қон зардобида касаллик вирусига қарши антитело аниқланган моллар. Биринчи гуруҳдаги 6 ойликдан катта моллар наслчилик ва бола олиш учун ўстирилаётган моллар сақланадиган махсус фермаларга жойлаштирилади. Иккинчи гуруҳдаги бузоқлар эса ферманинг ўзида, яъни серологик реакцияларга ижобий жавоб берган моллар билан бирга боқилади. Бунда биринчи гуруҳдаги моллар 6 ой оралатиб серологик усулда текширилади. Гематологик усул қўлланилмайди. Серологик реакцияга ижобий натижа берган барча моллар олиб чиқилгандан сўнг, серологик реакцияга икки марта салбий натижа олинса, барча гуруҳлар бўйича ферма соғлом деб

ҳисобланади. Хўжалик ва фермалардан охирги касал ҳайвон олиб чиқилгач ва 3 марта (3 ой оралатиб) серологик реакцияларга салбий натижа олингач, карантин бекор қилинади.

Фойдаланилган адабиётлар: 1. Р.Ф. Сосов. Эпизоотология. М. “Колос” 1974. 2. А.А. Конопаткин . Эпизоотология. М. “Колос” 1984. 3. И.А. Бакулов., А.Д. Третьяков. Руководство по общей эпизоотологии. М. “Колос” 1979. 4. М.С. Ганнушкин. Общая эпизоотология. М. “Сельхозгиз” 1961. 5. М.П. Пармонов ва бошқалар. Эпизоотология. Т. 1996 6. М.П. Пармонов. “Ўта хавфли юқумли касалликлар” маърузалар матни. Сам. 2002 7. Ф.А. Ниёзов. “Паррандалар касалликлари”. Т. 1995 8. М.П. Пармонов., А.А. Қамбаров Эпизоотология. Т. 2006 9. М.П. Пармонов ва бошқалар. Эпизоотология фанидан амалий – лаборатория машғулотлари. Сам. 2007 й 10. А.А. Поляков. Ветеринарная дезинфекция. М. “Колос” 1975 11. В.П. Урбан. Практикум по эпизоотологии. Ленинград. 1987

Похожие

Қорамоллар хламидиози Xlamidiosis bovinus

Қорамоллар ўлати Pestis bovum

Сут йуналишидаги қорамоллар селекцияси

Қорамоллар диареяси Diarrhea viralis bovum

Қорамоллар везикуляр стоматити Stomatitis vesicularis bovum contagiosa