Ньюкасл касаллиги Pseudo pestis avium - Сельское и лесное хозяйство - Рефераты

Ньюкасл касаллиги Pseudo pestis avium

Загружено в:

20.09.2019

Скачано:

0

Размер:

89.5 KB

Ньюкасл касаллиги Pseudo pestis avium Режа: 1. Тарихий маълумот 2. Эпизоотологияси 3. Кечиши ва клиник белгилари 4. Олдини олиш

Ньюкасл касаллиги вирус қўзғатадиган ўта контагиоз, ўткир кечадиган юқумли касаллик бўлиб, септицемия, марказий нерв системаси, ошқозон- ичак ва нафас аъзоларининг жароҳатланиши билан ифодаланади. Тарихий маълумот . Касаллик биринчи марта 1926 йилда Кроневельд томонидан , сўнгра , 1927 йилда Дойл , 1928 йилда Пикард томонидан Англия яқинида Ньюкаслда аниқланди . 1944-1950 йилларда касаллик дунёнинг қатор мамлакатларида учради . Иккинчи жаҳон уруши йилларида Украина ва Россияда қайд қилинди . Кейинчалик собиқ СССР республикаларига ҳам тарқалди . 1960-1990 йиллар мобайнида Ўзбекистоннинг бир қанча ҳудудларида қайд қилиб келинди . Ҳозир ҳам касаллик мавжуд бўлиб , ҳатто шахсий хўжаликларнинг товуқлари қирилиб туради . Олимлардан П . М . Свинцов , Н . В . Лихачев , А . Я . Фомина , Т . А . Ферминов , С . П . Агапов , В . Н . Сюринлар Ньюкасл касаллигини ўрганиш бўйича самарали иш олиб бордилар . Вирусологлардан Г. А. Сафонов, Г. А. Ивановлар махсус профилактика борасида катта амалий тадбирни амалга оширдилар. Ўзбёкистонда Ньюкасл касаллигини ўрганишда «Ўзпарранда саноати» нинг махсус лабораторияси ҳамда Ф. А. Ниёзов бошқараётган ЎзНИВИ нинг паррандалар касалликларини ўрганиш лабораторияси ходимлари катта амалий тадбирларни ишлаб чиқиб амалиётга тадбиқ этиб келмоқдалар. Иқтисодий зарар. Касаллик ўткир кечганда, иммунизация ўтказиш муддати бузилганда, биринчи марта қайд қилинганда ёш жўжалар 100 фоизгача нобуд бўлади. Она товуқлар ҳам 70-100 фоиз атрофида ўлади. Бундан ташқари, эмлаш ишларини амалга ошириш учун кўп миқдорда вакцина талаб этилади. Карантин чора-тадбирларини ўтказиш учун ҳам катта маблағ зарур. Буларнинг ҳаммаси паррандачилик хўжаликларига жуда катта иқтисодий зарар келтиради. Қўзғатувчиси. Парамиксовирус, полиморф вирионлар ипсимон, таёқчасимон, ракетка шаклидаги вирус. У одам, қорамол, чўчқа ва йилқиларнинг эритроцитларини агглютинация қилади. Ташқи муҳит шароитларига анча чидамли, паст ҳароратда консервация бўлади.

Музлатилган товуқ гўштида 6 ойгача, 20°С да эса бир йилгача яшайди. 65- 70°С да 30 минутда, 100°С да эса бир секунд ичида ўлади. Атроф муҳитнинг 18-20 °С ҳароратида ойлаб яшай олади. Товуқ патларида 18 кун тирик сақланади, тухумда эса музлатгич шароитда йиллаб яшайверади. Вирус 9-10 кунлик товуқ эмбрионида яхши ривожланади. Эпизоотологияси. Ньюкасл касаллигига биринчи ўринда товуқлар мойил бўлади. Куркалар ҳам касалланади. Лекин бу тур паррандаларда ҳар доим ҳам касаллик типик ҳолатда намоён бўлавермайди. Табиий шароитда, ёшидан ва зотидан қатъий назар, ҳамма паррандалар касалланади. Касаллик йилнинг ҳар қандай фаслида ҳам учрайверади. Сунъий касалликка чумчуқ, тўти, еввойи ўрдакларда мойиллик анча кучли. Вирус организмга ҳар хил йўллар билан киради. Асосийлар респиратор ва алиментар йўл ҳисобланади. Вирус организмга тушгач, шиллиқ пардалар орқали қонга ўтиб, сўнгра касаллик қўзғатади. Касаллик асосан ташқаридан келтирилган парранда, пат ёки носоғлом хўжаликлардан келтирилган тухум орқали юқади. Баъзан хўжаликнинг ўзидаги вирус ташувчилар, шунингдек вирус ажратиб турувчи объектлар орқали ҳам юқиши мумкин. Касал парранда касаллик қўзғатувчисининг асосий манбаи ҳисобланади. Касаллик бевосита контакт йўли билан ва зарарланган объектлар орқали ҳам юқади. Касалликнинг тарқалишида зарарланган тухумлар атрофдаги соғлом паррандалар учун ўта хавфлидир. Носоғлом хўжаликда сақланган озуқа маҳсулотлари ҳам касаллик тарқалишига сабаб бўладиган омиллардандир. Касаллик эпизоотия ҳолатида кечиб, биринчи марта қайд қилинган хўжаликка жуда катта талофат келтиради. 2-5 кун ичида 70-100 фоизгача парранда касалланади. Агар шахсий хўжаликларда қайд қилинса, бир қишлоқдан иккинчи қишлоққа ёки ҳовлига ўтиб кетаверади ва товуқлар «қирғинга» учрайди. Патогенези. Вирус организмга тушгач, септицемия пайдо қилади. Аъзоларга тарқалиб, ривожланиш жараёнида токсин ажратади. Бу эса ўз навбатида қон томирлар деворига таъсир этиб, яллиғланиш-некротик

жараённи келтириб чиқаради. Қон сизилиб чиқа бошлайди, гиперемия ва қон қуйилиш рўй беради. Юрак мускуллари дистрофик-дегенератив ўзгаришга учраб, унинг фаолияти бузилади. Бундан ташқари, талоқ, жигар, буйрак, ошқозон-ичак ва бош мияда ҳам жароҳатланиш кузатилади. Кечиши ва клиник белгилари. Касалликнинг яширин даври 1-5 кун, баъзан бир ҳафта давом этиши мумкин. Ньюкасл касаллигида клиник белгиларнинг намоён бўлиши асосан организмда иммунитетнинг мавжудлигига боғлиқ. Иммунитет йўқ паррандаларда касаллик оғир ўтади. Бу ҳолат айниқса ёш жўжаларда кучли намоён бўлади. Улар бутунлай ҳолсизланади, нафас олиш қийинлашади. Нафас олганда оғзини очиб бўйнини чўзади, ўзига хос товуш чиқаради. Касаллик бошлангач, биринчи 4- 5 кунда талофат кучли бўлиб, 80-100 фоизгача етиши мумкин. 8-10 кундан кейин эса камаяди. Асаб системасининг бузилиши кузатилади, бошда тремор ҳолати юзага келиб, қанот ва оёқлар фалажланади. Бўйни орқага қайрилиб қолади, баъзан кўкракга эгилган бўлади (9, 10-расмлар). Катта ёшдаги товуқларда ҳам юқоридагидек ҳолат юзага келиб, иммунизация қилинмаганларда жуда оғир кечади. Тухуми кескин камайиб кетади. Ҳаддан ташқари ҳолсизланиб, кўзини юмиб, чўнқайиб туради, мудроқ босади. Шунинг учун айрим қишлоқларда бу касаллик «чўнқаймиш» деб аталади. Озуқага интилмайди. Эснагандек бўлиб, асаби бузилади ва ичи кетади. Иммунизация қилинмаган паррандаларда диарея ва нафас олишнинг оғирлашиш ҳоллари кузатилади. Ичи яшилсимон, қон аралашган бўлади. Қанот ва оёқлари фалажланиб, ўлим 90-100 фоизгача боради. Патологоанатомик ўзгаришлар. Ўта ўткир кечганда патологоанатомик ўзгаришлар рўй-рост намоён бўлмасдан, шиллиқ пардаларга қон қуйилиши мумкин. Ўткир кечганда эса тож кўкимтир бўлиб, терида қон қуйилиш ҳоллари кўзга ташланади. Шиллиқ пардаларда кучли қон қуйилиш, бошнинг тери ости клетчаткаси, бўйин, кўкракда шиш бўлади. Жиғилдонда ҳаво тўпланиб, озуқа ҳазм бўлмагач, у эскириб, тўхтаб қолиши натижасида, ёқимсиз қўланса ҳид чиқиб туради. Мускул ва ошқозон

безининг чегарасида кучли қон қуйилиш кузатилади. Ичакнинг лимфоид фолликуласида эпикард остида ҳам қон қуйилган бўлади. Талоқ бир оз кичраяди. Ўпка қонга тўлиб, сал шишади ва пневмония ўчоқлари юзага келади. Мия қон томирлари шишиб, мияга қон қуйилиши кузатилади. расм. Ньюкасл касаллигининг асаб ҳолати. расм. Ньюкасл касаллигининг клиник кўриниши. Диагноз. Нъюкасла касаллигига диагноз қўйиш учун касалликнинг эпизоотологияси, клиник белгилари ва патологоанатомик ўзгаришлари ҳисобга олинади. Бундан ташқари, лаборатория шароитида вирус ажратиб олиниб, идентификация қилинади. Бу жараён РТГА ёрдамида махсус гипериммунли қон зардоби билан амалга оширилади. Вирусни ажратиш учун касал ёки ўлган паррандаларнинг талоқ ёки бош миясидан 10% ли суспензия тайёрланади. Минутига 1500 марта айланадиган центрифугада айлантирилиб, бир соат тинитилади. Кейин суспензияга 1000 ТБ пенициллин ва 1000 мг стрептомицин қўшиб, 9-10 кунлик эмбрионга юқтирилади. 72 соатдан кейин РГА билан гемагглютинин борлиги, РТГА билан иммунитетнинг даражаси диагностик антиген билан (Ньюкасл касаллигига қарши ишлатиладиган ҳар қандай вакцина ҳам мумкин) РТГА усулини қўллаб аниқланади. Иммунизация ўтгач, 5-6 ойдан кейин қон зардоби таркибида антителонинг юқори титрда сақланиб туриши организмда вируснинг дала штамми борлигидан дарак беради. Дифференциал диагноз. Юқумли бронхит ва ларинготрахеитдан фарқ қила билиш керак. Юқумли бронхитда диагностик белгидан бири вирусни

нейтрализация қилувчи антителони аниқлашдир. Бунинг учун РН қўйилади. Бронхитдан тузалган товуқлар Ньюкасл касаллиги билан касалланаверади. Айрим ҳолларда Ньюкасл касаллиги бронхит билан бирга келиши мумкин. Ларинготрахеитни ажратиш учун клиник белгиларга эътибор қилиниб, унинг вируси ажратиб олинади ва идентификация қилинади. Пастереллёздан эса микробиологик текшириш усуллари билан дифференциация қилинади. Иммунитет. Касалликнинг олдини олиш учун қуйидаги вакциналар қўлланилади. - Штамм В1 (Б-прим)дан тайёрланган қуруқ вирус вакцина. Соғлом хўжаликларда бу вакцина билан 15-20, 45-60, 140-150 кунликда, кейинчалик ҳар 4 ойда 1 марта эмлаб борилади. Бир ампуласи 50 мл дистилланган сувда эритилиб, интраназал ва аэрозол усуллар билан қўлланилади. Пипетка билан бурунга икки томчи томизилади. - «Ла-Сота» штаммидан тайёрланган қуруқ вирус вакцина. Вакцина интраназал усул билан соғлом ва носоғлом хўжаликларда қўлланилади. Соғлом хўжаликларда 15-20, 45-60, 140-150 кунликда, носоғлом хўжаликларда 10-15, 35-40, 120-140 кунликда, кейинчалик ҳар 6 ойда бир марта эмлаб борилади. Интраназол усулда юборишда бир ампула вакцина (500 назол доза) 50 мл дистилланган сувда эритилади. Бурунга 2 томчи вакцина томизишдан олдин сув ичирилади. Вакцинациядан 1,5 соат кейин товуқларга сув бериш мумкин. Сув билан ичирилганда эса 500 назол доза вакцина 1 л дистилланган сувда эритилиб, 2 кун эрталаб, ҳар бир жўжага 5 мл дан берилади. Вакцинациядан 6 соат олдин озуқа ва сув бериш тақиқланади. Иммунизация ўтгач, 1-1,5 соатдан кейин озуқа ва сув беришга рухсат этилади. Иммунитет 7-8 кундан сўнг пайдо бўлади. - Штамм «Н» дан тайёрланган қуруқ вирус вакцина. Вакцина тирик бўлиб, ампулада чиқарилади. Катта ёшдаги клиник соғлом товуқларга қўлланилади. 1 мл вакцина (0,5 мл вирус массаси) 500 мл стерил физиологик

эритмада эритилади. Эритма кўкрак соҳаси мускули орасига 1 мл миқдорда юборилади. Иммунитет 48 соатдан кейин пайдо бўлиб, бир йил давом этади. Олдини олиш. Паррандачилик хўжаликларига фақат соғлом хўжаликлардан парранда ва тухум келтиришга рухсат этилади. Паррандачилик хўжаликларига кирадиган транспорт воситаларини дезинфекция қилиш зарур. Озуқа цехи ва омборларига ҳар хил ёввойи паррандаларнинг учиб киришига йўл қўймаслик керак. Ҳар бир партия жўжа чиқарилганда дезинфекция ўтказилади. Теварак атрофдаги хўжаликларнинг Ньюкасл касаллиги бўйича эпизоотик ҳолати кузатилиб ва ўрганиб борилади. Режа бўйича вакцинация ўтказиб турилиши шарт. Касаллик чиққач, дарҳол диагнози аниқланиб, карантин эълон қилинади. Карантин шарти бўйича жўжа очириб сотиш, паррандаларни бошқа хўжаликларга бериш, тухум чиқариш қатъий ман этилади. Ҳамма клиник касал паррандалар йўқ қилинади. Паррандачилик фабрикалари, давлат, жамоа ва бошқа хўжаликлар ҳамда давлат ветеринария муассасалари тармоқларидаги ветеринария мутахассислари қуйидаги ишларни бажаришлари шарт: - паррандачилик хўжаликлари, аҳоли пунктларида махсус ветеринария тадбирларини (касалликнинг олдини олиш учун эмлаш, диагностик текширишлар) амалга ошириш ҳамда паррандалар ҳолатини мунтазам равишда текшириб бориш; - Ньюкасл касаллигининг олдини олиш учун эмлаш ўтказилган хўжаликларда, эмланган паррандаларда иммунитет пайдо бўлишини назорат қилиш. Ньюкасл касаллиги пайдо бўлганлигига шубҳа туғилганда хўжалик (паррандачилик фабрикалари, давлат, жамоа хўжаликлари, корхоналари раҳбарлари ва ветеринария мутахассислари ёки шахсий хўжаликлардаги паррандалар эгалари қуйидаги вазифаларни бажаришлари керак: - хўжалик ичкарисига бегона кишиларнинг киришига йўл қўймаслик, паррандаларни хўжалик ичида аралаштирмаслик, ундан паррандалар, тухум

ва бошқа парранда маҳсулотлари ҳамда асбоб-ускуналар, жиҳозлар, гўнгларни олиб чиқмаслик; - касаллик пайдо бўлганлиги ҳақида хўжалик (аҳоли пункти), муассасанинг ветеринария мутахассисига ва туман бош ветеринария врачига зудлик билан хабар қилиш. Хўжалик, давлат ветеринария муассасалари тармоқлари ветеринария мутахассислари касалликни дарҳол аниқлаш чора-тадбирларини кўриб, янги ўлган паррандалар (3-5 бош) ва касал паррандалардан (10-20 бош) олинган қон зардобини ветеринария лабораториясига текшириш учун юборадилар. Ньюкасл касаллигига диагноз эпизоотологик маълумотлар, клиник белгилар, патологоанатомик ўзгаришлар ва лаборатория текшириш натижалари асосида қўйилади. Туман бош ветеринария врачи касаллик пайдо бўлганлиги ҳақидаги хабарни олгандан сўнг: - дарҳол носоғлом хўжалик, аҳоли пунктига бориб, эпизоотологик ўчоқни йўқотиш ва инфекция манбаини аниқлаш билан шуғулланади; - зарур ҳолларда ветеринария врачи (эпизоотолог)ни касаллик ўчоғи бор жойда барча тадбирларни ташкил этиш ва йўқотиш учун жавобгар этиб тайинлайди; - бир сутка муддатда носоғлом хўжалик (аҳоли пункти)да карантин эълон қилинганлиги, касаллик тарқалиб кетишининг олдини олиш ва йўқотиш бўйича махсус комиссия тузилганлиги ҳақида туман ҳокимиятига материаллар юборади; - шу билан бирга қўшни туманлар ветеринария врачлари ва юқори ветеринария ташкилотларига Ньюкасл касаллиги пайдо бўлганлиги ҳақида хабар беради. Агар касаллик шаҳарларда учраса, алоҳида кўчалар, кварталлар ёки бутун шаҳарда карантин эълон қилинади. Ньюкасл касаллиги бўйича карантин ўрнатилган хўжалик ва аҳоли пунктларида қуйидагалар тақиқланади:

- Ньюкасл касаллигига чидамсиз бўлган паррандаларни бинолардан ташқарига чиқариш; - паррандачилик хўжаликларига бегона кишиларнинг кириши; - парранда ва маҳсулотларини сотиш, олиб чиқиш. Ньюкасл касаллиги бўйича носоғлом хўжаликлар (паррандачилик фабрикаси, фермалари)да қуйидагилар ўтказилади: - ёш паррандаларда касаллик учраса, барча касал ва соғлом жўжалар қонсиз усул билан ўлдирилади, йўқотилади ёки утилга юборилади. Қолган клиник соғлом паррандалар гўштга сўйилади ёки касалликка қарши вакцина билан эмланади. Бу паррандалар алоҳида жойда сақланиб, карантин бекор қилинишидан 2 ҳафта олдин гўштга сўйилади; - карантин даврида олинган тухум камида 10 минут қайнатилади ва носоғлом хўжалик ичкарисида озуқа учун ишлаталади. Носоғлом паррандачилик хўжаликлари, фабрикаларида механик тозалаш ва дезинфекция ишлари ўтказилади. Гўнг ва тўшамалар биотермик зарарсизлантирилади. Носоғлом хўжалик, аҳоли пунктида охирги касал парранда йўқ қилингандан, хўжалик майдончалари ва биноларида тўлиқ санация ишлари ўтказилгандан 30 кун кейин карантин бекор қилинади. Паррандаларни гўштга сўйиш ветеринария бўлимининг рухсати билан амалга оширилади ва лозим деб топилса, махсус жойларда бажарилади. Касалликка қарши кураш ва уни йўқотиш тадбирларининг ҳаммаси қўлланма бўйича амалга оширилади.

Фойдаланилган адабиётлар: 1. Р.Ф. Сосов. Эпизоотология. М. “Колос” 1974. 2. А.А. Конопаткин . Эпизоотология. М. “Колос” 1984. 3. И.А. Бакулов., А.Д. Третьяков. Руководство по общей эпизоотологии. М. “Колос” 1979. 4. М.С. Ганнушкин. Общая эпизоотология. М. “Сельхозгиз” 1961. 5. М.П. Пармонов ва бошқалар. Эпизоотология. Т. 1996 6. М.П. Пармонов. “Ўта хавфли юқумли касалликлар” маърузалар матни. Сам. 2002 7. Ф.А. Ниёзов. “Паррандалар касалликлари”. Т. 1995 8. М.П. Пармонов., А.А. Қамбаров Эпизоотология. Т. 2006 9. М.П. Пармонов ва бошқалар. Эпизоотология фанидан амалий – лаборатория машғулотлари. Сам. 2007 й 10. А.А. Поляков. Ветеринарная дезинфекция. М. “Колос” 1975 11. В.П. Урбан. Практикум по эпизоотологии. Ленинград. 1987

Похожие

Паррандалар чечаги Variola avium, epithelioma et diphtheria avium

Паррандалар гриппи Grippia avium

Чўчқалар ўлати Pestis suum

Туялар ўлати Pestis camelorum

Қорамоллар ўлати Pestis bovum