Мактабгача ёшда ўйин фаолиятининг хусусиятлари (Амалий машғулот) - Дошкольное и начальное образование - Рефераты

Мактабгача ёшда ўйин фаолиятининг хусусиятлари (Амалий машғулот)

Загружено в:

20.09.2019

Скачано:

0

Размер:

24.083984375 KB

Мактабгача ёшда ўйин фаолиятининг хусусиятлари (Амалий машғулот) Режа: 1. Ўйин мактабгача ёшдаги болаларнинг асосий фаолияти эканлиги. 2. Мазмунли-ролли ўйинлар ва уларнинг ўзига хос хусусиятлари. 3. Бола психик ривожланишида ўйиннинг аҳамияти. 4. Бола психик тараққиётида ўйинчоқнинг аҳамияти.

Ўйин мактабгача ёшдаги болаларнинг асосий фаолияти эканлиги. Мактабгача ёшдаги болаларнинг етакчи фаолияти бу ўйиндир. Боғча ёшидаги болаларнинг ўйин фаолиятлари масаласи асрлар давомида жуда кўп олимларнинг диққатини ўзига жалб қилиб келмоқда. Боғча ёшидаги болалар ўзларининг ўйин фаолиятларида илдам қадамлар билан билан олға қараб бораётган сермазмун ҳаётимизнинг хамма томонларини акс эттиришга интиладилар. Маълумки, боланинг ёши улгайиб мустақил ҳаракат қилиш имконияти ошган сари унинг атрофдаги нарса ва ҳодисалар бўйича дунёқараши ҳам кенгайиб боради. Боғча ёшидаги бола атрофидаги нарсалар дунёсини билиш жараёнида шу нарсалар билан бевосита амалий муносабатга бўлишига интилади. Бу ўринда шу нарса характерлики бола билишга ташналигидан атрофдаги ўзининг ҳадди сиғадиган нарсалари билангина эмас, балки катталар учун мансуб бўлган ўзининг кучи хам етмайлиган, ҳадди сиғмайдиган нарсалар билан ҳам амалий мунособатда бўлишга интилади. Масалан: бола автомашинани, трамвайни ўзи ҳайдагиси, ростакам отга миниб юргиси,учувчи бўлиб самолётда учгиси ва ростакам милиционер бўлгиси келади. Бироқ табиийки бола ўзидаги бундай эҳтиёжларнинг биронтасини хам хақиқий йўл билан қондира олмайди. Бу ўринда савол туғилади. Болаларнинг тобора ортиб бораётган турли эҳтиёжлари билан уларнинг тор имкониятлари ўртасидаги қарама - қаршилик қандай йўл билан ҳал килинади? Бу қарама-қаршилик фақатгина биргина фаолият орқали, яъни боланинг ўйин фаолияти орқалигина ҳал қилиниши мумкин. Буни шу билан изоҳлаб бериш мумкинки, биринчидан, болаларнинг ўйин фаолияти қандайдир моддий маҳсулот ишлаб чиқаришга қаратилган фаолият эмас. Шунинг учун болаларни ўйинга ундовчи сабаб (мотив) келиб чиқадиган натижа билан эмас балки шу ўйин жараёнидаги турли ҳаракатларнинг мазмуни билан боғлиқдир. Иккинчидан эса, болалар ўйин жараёнида ўз ихтиёрларидаги нарсаларни, ўзларини қизиқтирган, аммо катталаргагина

мансуб бўлган нарсаларга айлантириб хоҳлаганларича эркин фаолиятда бўладилар. Болаларнинг ўйин фаолиятлари уларнинг жисмоний ва психик жиҳатдан гармоник равишда ривожлантириш учун бирдан бир воситадир. Ўйин болалар ҳаётида шундай кўп қиррали фаолиятки, унда катталарга мансуб бўлган меҳнат ҳам, турли нарсалар ҳақида тафаккур қилиш, хом хаёл, дам олиш ва хушчақчақлик манбалари ҳам мужжасамлангандир, яъни мана шу жараёнларнинг барчаси ўйин фаолиятида аниқ бўлади. Шуни хам таъкидлаб ўтиш керакки, ўйин фақат ташқи муҳитдаги нарса ҳодисаларни билиш воситасигина эмас, балки қудратли тарбия воситаси ҳамдир. Ижодий ва сюжетли ўйинларда болаларнинг барча психик жараёнлари билан биргаликда уларнинг индивидуал хислатлари хам шаклланади. Демак, боғчадаги таълим- тарбия ишларининг муваффақияти кўп жиҳатдан болаларнинг ўйин фаолиятларини мақсадга мувофиқ ташкил қила боришга боғлиқдир. Шундай қилиб, ўйин болалар хаёли томонидан яратилган нарса эмас, аксинча болалар хаёлининг ўзи ўйин жараёнида юзага келиб ривожланадиган нарсадир. Шуни ҳам айтиб ўтиш керакки, фан-техника мислсиз ривожланган бизнинг ҳозирги замонамиздаги яратилаётган, ҳайратда қолдирадиган нарсалар болаларга гўё бир мўъжизадек кўринади. Натижада улар ҳам ўзларининг турли ўйинлари жараёнида ўхшатма қилиб (яъни аналогик тарзда) хар хил хаёлий нарсаларни ўйлаб чиқарадилар (учар от, машина одам, гапирадиган дарахт каби). Бундан ташқари, болаларнинг турли хаёлий нарсаларни ўйлаб чиқаришлари яна шуни билдирадики, улар ўзларининг хар турли ўйин фаолиятларида фақат атрофларидаги бор нарсаларни эмас, балки айни чоғда эҳтиёжлари талаб қилаётган нарсаларни ҳам акс эттирадилар. Болаларнинг ўйин фаолиятларида ҳар хил хаёлий ва афсонавий образларни яратишларидан шундай хулоса чиқариш мумкин: одамнинг (шу жумладан болаларнинг ҳам) ташқи муҳитдаги нарса ва ҳодисаларни акс

эттириш жараёнлари пассив жараён эмас, балки фаол ҳамда ижодий яратувчан, ўзгартирувчан жараёндир. Болалар ўйин фаолиятларининг яна бир ажойиб хусусияти шундан иборатки, ўйин жараёнида боланинг қиладиган хатти-ҳаракатлари ва бажарадиган роллари кўпинча умумийлик характерига эга бўлади. Буни шундай тушуниш керакки, бола ўзининг турли-туман ўйинларида фақат ўзига таниш бўлган ёлғиз бир шофёрнинг, шифокорнинг, милиционернинг, тарбиячининг, учувчининг хатти-ҳаракатларигина эмас, балки умуман шофёрларнинг, врачларнинг, тарбиячиларнинг ҳамда учувчиларнинг хаттиҳаракатларини акс эттиради. Албатта, турмуш тажрибалари ва фаолиятлари доираси жуда чекланган кичик ёшдаги болалар (баъзан кичик гуруҳ болалари ҳам) ўзларининг ўйинларида конкрет одамларни ва уларнинг ҳаракатларини акс эттирадилар. (Масалан, ойисини, адасини, акасини, тарбиячисини ва шу каби). Ўрта, катта боғча ёшидаги болаларнинг ўйинларида эса бундай образлар умумийлик характерига эга бўла бошлайди. Боғча ёшидаги болаларнинг ўйинлари атрофдаги нарса ва ҳодисаларни билиш қуроли бўлиш билан бирга юксак ижтимоий аҳамиятга ҳам эга. Бошқачарок қилиб айтганда, ўйин қудратли тарбия қуролидир. Болаларнинг ўйинлари орқали уларда ижтимоий фойдали, яъни юксак инсоний хислатларни тарбиялаш мумкин. Бундан ташқари, агарда биз болаларнинг ўйини фаолиятларини ташқаридан кузатсак, ўйин жараёнида уларнинг барча шахсий хислатлари (кимнинг нимага кўпрок қизиқиши, қобилияти, иродаси темпераменти) яққол намоён бўлишини кўрамиз. Шунинг учун болаларнинг ўйин фаолиятлари уларни индивидуал равишда ўрганиш учун жуда қулай воситадир. Кичик мактабгача ёшдаги болалар одатда ўзлари ёлғиз ўйнайдилар. Предметли ва конструкторли ўйинлар орқали бу ёшдаги болалар ўзларининг идрок, хотира, тассавур, тафаккур ҳамда ҳаракат лаёқатларини ривожлантирадилар. Сюжетли ролли ўйинларда болалар асосан ўзлари ҳар куни кўраётган ва кузатаётган катталарнинг хатти –ҳаракатларини акс

эттирадилар. 4-5 ёшли болаларнинг ўйини аста – секинлик билан жамоа характерини ола бошлайди. Болаларнинг индивидуал хусусиятларини хусусан уларнинг жамоа ўйинлари орқали кузатиш қулайдир. Бу ўйинларда болалар катталарнинг фақат предметларга муносабатини эмас, балки купроқ ўзаро муносабатларини акс эттирадилар. Шунингдек, жамоа уйинларида болалар бир гуруҳ одамларнинг мураккаб ҳаётий фаолиятларини акс эттирадилар. Масалан, «поезд» уйинини олайлик. Бунда машинист, кузатувчилар, назоратчи, кассир, станция ходимлари ва йўловчилар бўлади. Болаларнинг мана шу каби жамоа ўйинлари артистларнинг фаолиятига ўхшайди. Чунки жамоа ўйиндаги ҳар бир бола ўз ролини яхши адо этишга интилиш билан бирга ўйиннинг умумий мазмунидан хам четга чиқиб кетмасликка тиришади. Бу эса, ҳар бир боладан ўзининг бутун қобилиятини ишга солишни талаб этади. Маълум ролларга бўлинган жамоавий ўйин болалардан қатъий қоидаларга бўйсуниши ва айрим вазифаларни ўхшатиб бажаришни талаб этади. Шунинг учун болаларнинг бундай жамоа ўйинлари психологик жиҳатдан катта аҳамиятга эга. Чунки бундай ўйинлар болаларда иродавийлик, муаммолилик ўйин қоидаларига, тартиб- интизомга бўйсуниш ва шу каби ижобий хислатларни тарбиялайди ва ривожлантиради. Катта боғча ёшида сюжетли-ролли ўйинлар ривожланади, лекин энди бу ўйинлар ўз мавзусининг бойлиги ва хилма-хиллиги билан фарқланади. Бу ўйинлар жараёнида болаларда лидерлик юзага кела бошлайди, шунингдек ташкилотчилик кўникма ва малакалари ривожлана бошлайди. Бу мактабгача ёшдаги болалар шуғулланадиган ижодий фаолиятлар орасида тасвирий санъатнинг ҳам аҳамияти жуда катта. Боланинг тасаввур этиш характерига кўра унинг атроф ҳаётни қандай идрок этиши, хотира, тасаввур ва тафаккур хусусиятларига баҳо бериш мумкин. Катта боғча ёшидаги болалар чизган расмлар уларнинг ички кечинмалари руҳий холатлари, орзу, умид ва эхтиёжларини хам акс эттиради. Мактабгача ёшдаги болалар расм чизишга ҳам ниҳоятда қизиқадилар. Расм чизиш болалар учун ўйин фаолиятининг

ўзига хос бир шакли бўлиб ҳисобланади. Бола аввало кўраётган нарсаларини, кейинчалик эса ўзи биладиган, хотирасидаги ва ўзи ўйлаб топган нарсаларни чизади. Катта мактабгача ёшдаги болалар учун мусобақа жуда катта ахамиятга эга бўлиб, айнан шундай ўйинларда мувафаққиятга эришиш шаклланади ва мустаҳкамланади. Бу ёшдаги болалар учун энг ёқимли вакт - ютиш ва муваффақият бўлган мусобақа ўйинларининг ҳам аҳамияти жуда катта. Катта боғча ёшида конструкторлик ўйинлари аста-секинлик билан меҳнат фаолиятига айланиб боради. Ўйинда бола элементар меҳнат кўникма ва малакаларини эгаллай бошлайди, предметларнинг хоссаларини англай бошлайди, амалий тафаккур ривожлана боради. 3-7 ёшли болалар психик ривожида бадиий-ижодий фаолият бўлган мусиқанинг ҳам аҳамияти хам жуда катта. Мусиқа орқали болалар ашула айтишга, мусиқа охангига мос ритмик ҳаракатлар қилишга ўрганадилар. 3-7 ёш даврида болалар асосий фаолияти куйидаги кетма-кетликда келади: - предметларни ўрганиш, - индивидуал предметли уйинлар, жамоавий сюжетли-ролли ўйинлар, - индивидуал ва гурухий ижод, - мусобака ўйинлар, - мулокот ўйинлар, - уй меҳнати. Боғча ёшидаги болаларнинг ўйин фаолиятлари хақида гапирар эканмиз, албатта уларнинг ўйинчоғи масаласига ҳам тўхтаб ўтиш керак. Болаларга ўйинчоқларни беришда уларнинг ёш хусусиятларини, тарққиёт даражаларини ва айни пайтда уларни кўпроқ нималар қизиқтиришини ҳисобга олиш керак. Маълумки, 1-3 ёш болалар ҳали ташқи муҳитни жуда оз ўзлаштирадилар. Шунинг учун уларга кугирчок билан бирга хар хил рангли қийқим, турли мато бўлаклари ҳам бериш керак. Айниқса қиз болалар ўз қўғирчоқларини хар хил рангли матоларга ўраб, рўмол қилиб ўратиб машқ

қиладилар. Ўғил болаларга эса, хар хил рангли, бир-бирининг ичига сиғадиган қутича ўйинчоқларни бериш фойдалидир. Ўйин фаолияти болаларни инсониятнинг ижтимоий тажрибасини эгаллашнинг фаол шакли бўлган таълим фаолиятига тайёрлайди. Одам бирданига ижтимоий тажрибани ўзлаштиришга кириша олмайди. Ижтимоий тажрибаларни фаол эгаллаш учун одам аввало етарли даражада нуткни эгаллаган бўлиши, маълум малакалар, укувлар ва элементар тушунчаларга эга бўлиши керак бўлади. Буларга бола юқорида батафсил кўриб ўтганимиздек ўйин фаолияти орқали эришади. Амалий машғулот “Кичик гуруҳлар билан ишлаш” технологияси ёрдамида давом эттирилади. Тингловчиларга гуруҳларга бўлиниб ишлаш таклиф этилади, бунинг учун улар қуйидаги талабларга амал қилишлари зарур. 1. Гуруҳларга ажратиш ўқитувчи томонидан амалга оширилади. 2. Ҳар бир гуруҳга раҳбар тайинланади. 3. Ҳар бир гуруҳдаги тингловчилдар билим даражасининг тенг бўлишига эришиш керак. 4. Иш жараёнида ҳар бир гуруҳнинг фаолиятига, ғояларига эътибор берилади. Тингловчиларни 4 гуруҳга ажратиб, ҳар бир гуруҳ учун алоҳида, яъни 1 гуруҳ “Ўйин мактабгача ёшдаги болаларнинг асосий фаолияти эканлиги”, 2 гуруҳ “Мазмунли-ролли ўйинлар ва уларнинг ўзига хос хусусиятлари”, 3 гуруҳ “Бола психик ривожланишида ўйиннинг аҳамияти”, 4 гуруҳ “Бола психик тараққиётида ўйинчоқнинг аҳамияти берилади” мавзулари берилади. “Кичик гуруҳлар билан ишлаш” технологиясининг моҳияти тингловчиларнинг ижодкорлигига таяниш ва дарсда эркин баҳс-мунозара шароитини туғдиришдан иборат.

Машғулот қуйидаги босқичларда амалга оширилади. 1. Чақириқ босқичи. Бу босқичда тингловчиларни фаоллаштириш, мавзунинг мазмун-моҳиятига кириб бориш, уни англаб етиш жараёнига тайёрлаш мақсади кўзда тутилади. 2. Ақлий ҳужум. Бу усул дарснинг бошланишида ёки исталган жойида қўлланиши мумкин. Бу босқичда муаммо тингловчиларга ақлий ҳужум йўли билан берилади ва уларнинг фикрлари орқали очилади. 3. Англаш босқичи. Мавзуга оид хулосавий фикрлар эшитилади ва ўқитувчи томонидан янги фикрлар билан тўлдирилади. 4. Фикрлаш босқичи. Мавзу юзасидан ўзлаштирилган билим ва тушунчаларни қисқа жумлаларда айтиб бериш топширилади. Булардан ташқари гуруҳларга аниқ йўл-йўриқ кўрсатиш, топшириқларни бажариш учун етарли вақт ажратиш, кучли гуруҳларни рағбатлантириб бориш ишнинг натижасини баҳолаш кабиларга ҳам аҳамият бериш мумкин ҳисобланади. Дарс жараёнида гуруҳ аъзоларини алмаштириб бориш ҳам мумкин. Ҳар бир гуруҳга мавзунинг қисқача моҳияти ёзилган тарқатма материаллар тарқатилади. Улар мавзулари ҳақида бошланғич билимларга эга бўлганларидан сўнг, мавзуни билимлари билан бойитиб, гуруҳ аъзолари орасидан бир киши танланади ва мавзуларини баён этиб берадилар. Барча гуруҳлар ўз чиқишларини кўрсатиб берганларидан сўнг гуруҳий мунозара бошланади. Машғулот якунида тингловчилар олган билимларини “Кластер” методи ёрдамида бирлаштирадилар. Мактабгача таълим муассасаси тарбиячилари болаларда ўтказишлари учун ўйинлар.

Сайрга чиқамиз ўйини Мақсад: болаларда кийимларни тўғри мослаштириб кийиш, “уст бош”, “пой абзал” каби умумий тушунчаларни мустаҳкамлаш, атроф-муҳитга нисбатан яхши муносабатни шакллантиришга ёрдам беради. Зарур жиҳозлар: қўғирчоқлар, барча фасллар кийимлари, кичик кийим жавони, стулчалар. 3, 4 ёшли болалар. Ўйиннинг бориши: болалар боғчасига янги қўғирчоқ меҳмонга келади. Болалар уни сайрга таклиф қилишади. Лекин қўғирчоқ кийинишни билмаслигини айтади. Сўнг, тарбиячи ёрдамида болалар қўғирчоққа об - ҳавога мос кийимни танлаш, уни кийинтиришга ёрдам берадилар. Кийинтираётганларида қайси кийимни кийгизаётганларини айтиб кийинтиришлари керак. Болалар тарбиячи билан биргаликда сайрга чиқадилар. Сайрдан қайтгач ўз кийимларини ечиб, тахлаб, жойлаштирадилар, сўнгра қўғирчоқни кийимларини ҳам ечиб жавончасига тахлаб қўядилар. Тарбиячига бажарган ишларини бирма- бир сўзлаб беришлари керак. Дўконда ўйини Мақсад: предметларни умумий жиҳатларига кўра гуруҳларга ажратиш, кўмаклашиш сифатларини шакллантириш, болаларнинг сўз бойлигини кенгайтиришдир. Зарур жиҳозлар: дўкондан сотиб олиш мумкин бўлган нусхадаги ўйинчоқлар, ўйинчоқ пуллар. 3, 7 ёшли болалар. Ўйиннинг бориши: тарбиячи болаларга ўйинчоқларини худди дўкондагидек жойлаштиришларини айтади. Озиқ-овқат маҳсулотлари қатори, тозалаш воситалари каби бўлимларга болалар нарсаларни жойлаштирадилар ва ўзаро сотувчи ва харидор ролларини бўлишиб оладилар. Ўйин шу тариқа давом этади, болалар ролларини алмаштириб туришлари мумкин.

Мактабгача ёшдаги болаларда билиш жараёнларини ривожлантириш бўйича машғулотлар 3 ёшли болалар учун. “ Рангли гиламчалар” (ранг) “Доирачалар” (ўлчам) “Фигуралар” (шакл) “Намуна бўйича тузиш” (кўргазмали-ҳаракатли тафаккур) Текшириш психолог томонидан ўтказилиб, битта бола учун 5-7 минут ажратилади. “Рангли гиламчалар”- кўрув идрокининг хусусиятларини аниқлаш, асосий рангларни ажратиш Материаллар: 6 та рангли карточка (қизил, кўк, сариқ, яшил, ҳаворанг, жигарранг. Болага навбат билан рангли (қизил, кўк, сариқ, яшил) карточкаларни танлаш таклиф этилади. Сўнгра тарбиячи карточкаларни болага кўрсатиб уларнинг рангини айтиб беришни сўрайди. 3 ёшли бола учун 3 та ёки 4 та рангни айтиб бериши меъёр ҳисобланади. 4 ёшли бола 4-6 та рангни ажрата билиши керак бўлади. “Доирачалар” - предметларни ўлчамини идрок қилиш хусусиятларини аниқлаш. Болага бир хил рангдаги 3 та доира кўрсатилиб, энг каттаси ва энг кичигини айтиб бериши сўралади. Уч ёшли бола мустақил равишда вазифани бажариши меъёр ҳисобланади. “Фигуралар” предметларнинг шаклини идрок қилиш хусусиятларини аниқлаш Материаллар: бир хил рангдаги геометрик шаклларнинг (доира, квадрат, овал, учбурчак, тўғри тўртбурчак) 2 та комплекти. Боланинг олдига бешта шаклдан ихтиёрий иккитаси қўйилади. Сўнгра иккинчи комплектдан битта шакл кўрсатилиб, унинг қўлидаги шаклнинг қайси бири ўхшашлигини айтиб бериши сўралади. Масалан, боланинг олдига

биринчи комплектдан доира ва квадрат қўйилади, сўнгра иккинчи комплектдан квадрат ва ҳок. Уч ёшли бола овал ва доирани, квадрат ва тўғри тўртбурчакни адаштириши мумкин ҳисобланади. “Намуна бўйича тузиш” фазовий ва кўргазмали-ҳаракатли тафаккурнинг хусусиятларини аниқлаш. Материаллар: 2 та нусхада турли шаклдаги қурилиш деталлари Текширувчи болага қурилиш деталларидан бирор бир нарсани ясаб беради, сўнгра худди шундай ясаб бериши сўралади. Уч ёшли бола мустақил равишда вазифани бажарса қониқарли ҳисобланади. 4 ёшли болалар учун. “Пирамида” -ўлчамни, кўргазмали-ҳаракатли тафаккурни идрок қилиш. Материал: 5-7 та элементдан иборат пирамида. Текширувчи болаларга пирамида кўрсатади ва боланинг диққатини у қандай ясалганига қаратади. Сўнгра бу пирамидани қисмларга ажратади ва болага қайтадан аввалгидек ясаб бериш топшириғи берилади. Агар бола вазифани бажаришга қийналса, ёрдам берилади. Бола вазифани биринчи уринишидаёқ мустақил бажарса, болада ўлчамни идрок қилиш юқори даражада ривожланган. “Шакллар қутиси”- шаклни ва фазовий муносабатларни идрок қилиш. Ушбу вазифа боладан шаклларни идрок қилишнигина талаб этмасдан, шаклларни фазода тўғри ҳаракатлантиришни ҳам талаб этади. Материал: доира, учбурчак, тўғри тўртбурчак, квадрат, кўпбурчак шакллардаги ўйиқчалардан иборат қутича. Боланинг олдига турли шакллар, қутича қўйилади ва қуйидагича топшириқ берилади: “Бизда ғайриоддий почта қутиси ва ўзгача хатлар бор. Ҳар бир хатнинг ўз ўрни бор. Хатларнинг ўрнини топиб уларни жойлаштириб чиқ.” Агар бола шаклларни кўз билан чамалаб ўйиқчаларга жойлаштириб чиқса унда фазовий идрок юқори даражада ривожланган бўлади.

5 ёшли болалар учун. “Маржон ” - асосий ранглар ва уларнинг турларини идрок қилиш хусусиятларини аниқлаш. Боланинг олдига бир хил ўлчамдаги, лекин ҳар хил рангдаги (қизил, тўқ қизил, кўк, сариқ, яшил, оч яшил, бинафша ранг, ҳаво ранг) 9 та доирачалар қўйилади ва улардан “маржон” ясаш сўралади, бунда текширувчи томонидан доирачаларни қандай кетма-кетликда жойлаштирилиши айтиб турилади. Топшириқ бажариб бўлингач боладан “маржонларнинг” рангини айтиб бериш сўралади. Беш ёшли бола томонидан вазифа мустақил ва тўғри бажарилса қониқарли ҳисобланади. «Қисмлардан бутун ясаш». Фазовий идрок, диққатнинг сафарбарлиги ва хаёлнинг ривожланганлик даражасини аниқлаш. Кўрсатма: Боланинг олдига бир нечта (учта ёки тўртта) қирқимларга бўлинган расм тартибсиз ҳолда ёйиб қўйилади ва қуйидагича кўрсатма берилади:. «Қисмларни диққат билан кўриб чиқ. Уларни тўғри йиғиб чиқсанг яхлит расм ҳосил бўлади». Бола мустақил равишда расм қисмларини тўғри йиғса - фазовий идроки, тасаввури яхши ривожланган, диққатининг сафарбарлиги юқори.

Фойдаланилган адабиётлар: 1. Нишонова З.Т., Алимова К.Г. Болалар психологияси ва психодиагностиаси Т.: ТДПУ 2017 – 264 б. 2. Ғозиев Э. Онтогенез психологияси Назарий- экспериментал таҳлил T.: Ношир 2010. – 356 b. 3. Дўстмуҳамедова Ш.А., Нишонова З.Т. ва бошқалар Ёш даврлари ва педагогик психология Т.: Фан ва технологиялар 2013 – 343 б. 4. Шаповаленко И.В. Возрастная психология (Психология развития и возрастная психология): учебник для студентов вузов. – М.: Гардарики, 2007. – 349 с.

Похожие

Мактабгача ёшдаги болаларнинг таълимий машғулотлари (амалий машғулот).docx

Мактабгача ёшдаги болалар меҳнат фаолиятининг хусусиятлари

Мактабгача ёшдаги болаларни расм чизиш фаолиятига ўргатиш (4-амалий машғулот)

Мактабгача таълим муассасаларида лой иши машғулотлари (5 амалий машғулот).docx

Болаларда хотиранинг ривожланиши (Амалий машғулот)