Yordamchi so’zlar

Yuklangan vaqt:

20.09.2019

Ko'chirishlar soni:

0

Hajmi:

115 KB

Ko'chirib olish

Yordamchi so’zlar Rеjа: 1. Leksemalarning ma’noviy tasnifidagi “ma’noviy nomustaqillik” belgisi tushunchasi. 2. Yordamchi so’zlarning “oraliq uchinchi” tabiatiga egaligi. 3. Yordamchi so’zlarning shakliy xususiyatlariga ko’ra turl а ri. 4. Ko’makchi. 5. Bog’lovchi. 6. Y u klama.

Leksemalarning ma’noviy tasnifidagi “ma’noviy nomustaqillik” tushunchasi. Barchaga ma’lumki, leksik sath birliklari ikki katta guruhga bo’linadi: mustaqil so’zlar va yordamchi so’zlar. Bular orasidagi zidlanishni ma’noviy va vazifaviy nomustaqillik tashkil etadi. Bu ziddiyat belgisiga ko’ra yordamchi so’zlar belgili, mustaqil so’zlar esa belgisiz a’zo mavqeini egallaydi. Yordamchi so’zlar hech qachon mustaqil qo’llanmaydi, bog’liq qurshovlardagina kela oladi. Mustaqil so’zlar esa mustaqil qo’llanilish va ma’no ifodalash qobiliyatiga egadir. Leksemalarning ma’noviy tasnifida ilk bosqich belgisi “ma’noviy mustaqillik” emas, “ma’noviy nomustaqillik” bo’lishining sababi mustaqil leksemalarning bu belgiga nisbatan betarafligidir. Chunonchi, katta guruhni tashkil etuvchi atoqli otlar (Temir, Anor, Gavhar) guruhida, mavhum otlarda mustaqil ma’noning mavjudligi kishini shubhaga soladi. Mustaqil so’zlarda “ma’noviy mustaqillik” belgisi shartlidir. Assimilyatsiya tilshunos-likda boshqacha, biologiyada esa tamoman o’zgacha talqin etiladi. Loy adabiy tilda boshqacha, otarchilar nutqida esa boshqacha izohlanadi. Shunga o’xshash hodisalarni sifat, fe’l, ravishlar ichida ham ko’plab uchratish mumkin. Bularning barchasi “ma’noviy mustaqillik” belgisi mustaqil leksemalarda nisbiy tushuncha, nisbiy belgi ekanligini ko’rsatadi. Mana shuning uchun leksemalarning ma’noviy tasnifida ilk bosqichning belgisi “ma’noviy mustaqillik” emas, balki “ma’noviy nomustaqillik” bo’la oladi. Ushbu belgi asosidagi ziddiyatda ko’makchi, bog’lovchi, yuklamalar kuchli (belgili) a’zoni tashkil etadi. Sof ko’makchi, sof bog’lovchi, sof yuklamalar hech qachon mustaqil ma’noli so’zlar xususiyatiga ega bo’la olmaganligi tufayli ularning guruhiga o’ta olmaydi. Yordamchi so’zlarning “oraliq uchinchi” tabiatiga egaligi . Tilshunoslikda yordamchi so’zlarning leksemalar va qo’shimchalar orasida “oraliq uchinchi” bo’lib, ham leksemalar, ham grammatik morfemalar xususiyatini o’zida mujassamlash-tirishi aniqlangan. Ular shaklan leksema, mazmunan qo’shim-chadir ( qiyos: Kitobni akamga/akam uchun oldim .) Shu tufayli bo’lsa kerak, til tizimida yordamchi so’zlarning o’rni turlicha baholanadi 

ayrim olimlar ularni qo’shimchalarga, ayrimlari nutq bo’lakchalariga, ba’zilarini yordamchi so’zlarga nisbat beradilar. Yordamchi so’zlarning so’zmi, qo’shimchami yoki mustaqil so’zlarning yordamchi so’zlar bilan bog’lanishi so’z birikmasimi ekanligi hanuzgacha munozara mavzui bo’lib qolmoqda. Chunki yordamchi so’zlar guruhi ichida shunday birliklar borki, ular ham “ma’noviy mustaqillik”, ham “ma’noviy nomustaqillik” xususi-yatiga ega (ot+ko’makchilar, yordamchi va ko’makchi fe’llar). Chunonchi, “tortib” mustaqil so’z sifatida ravishdosh kabi qo’llaniladi: Baliq qarmoqni bir tortib , qochib ketdi . Shu so’z Farhod tog’idan tortib Shirin yayloviga qadar Sirdaryo bo’ylab tizilib ketgan etmish ming xalq bu sovuqlarni pisand qilmaydi (Oyd.) gapida yordamchi so’z vazifasida kelgan. Tortib mustaqil va yordamchi ma’nolarga ega bo’lishiga qaramay, mustaqil leksemalar tipiga kiradi. Uchun, sayin, uzra, kabi, va ga o’xshagan yordamchi so’zlar aniq bir tushunchani ifodalay olmaydi, ammo turli munosabatlarni yuzaga chiqarib va ular yordamchi so’zlar guruhidan joy oladi. Yuqoridagilardan anglashiladiki, “alohida qo’llanila olish yordamchi leksemalarni mustaqil leksemalar bilan yaqinlashtirsa, turli-tuman munosabatlarni ifodalash kabi umum-lashgan ma’no ularni morfemalarga, qo’shimchalarga yaqin- lashtiradi va leksemalar va morfemalar ziddiyatida “oraliq uchinchi” vazifasida keladi. YOrdamchilarni so’zlarga quyidagilar yaqinlashtiradi: a) shaklan alohida ajralib turish; b)lug’aviy ma’noning mavjudligi (sifat ko’makchilar, ot ko’makchilar, fe’l ko’makchilarda…); v)ko’pincha ularning mustaqil so’zlarga yaqinlashishi, ulardan kelib chiqishi. Yordamchi so’zlarning grammatik morfemalarga o’xshash tomoni ularning morfemalar kabi mustaqil nominativ funksiya bajarmasligi (ammo, va, sayin, kabi), qo’shimchasimon shaklda bo’lishi ( -u, -yu, -da; -ki (-kim); -dek (-day), -cha ) va boshqalar. Biroq yordamchi so’zlarning grammatik morfemalardan farqli tomoni shundaki: 1) ular gap bo’lagi, so’z birikmasi, gap sathida sintaktik xarakterdagi vazifa bajaradi. Bu xususiyat ko’makchilar uchun xos. Chunonchi, 1 . Yaxshi bilan

yursang etarsan murodga, YOmon bilan yursang qolarsan uyatga ( Maq. ) 2 . To’lqinlarning kuchli na’rasi, Yulduzlarga qadar etardi. (Uyg’.) 2) gap bo’laklari yoki gaplarni o’zaro bog’laydi. Bunday funksiyada, asosan, bog’lovchilar va yuklamalar keladi: 1. Xonaga baland bo’yli, biroq oriqqina yigit salom berib kirdi. (S.A) 2. Saida bu gapni aytdi-yu, chiqib ketdi. (S.Ahm.) 3) so’roq, inkor va sh.k. gap ma’nolarini ifodalashga xizmat qiladi (yuklamalar). YOrdamchi so’zlar mustaqil so’zlar va so’z - gaplar оralig’ida «оraliq uchinchi» maqоmini оladi. O’z navbatida, yordamchi so’zlar ham o’z ichida umumiy bеlgilariga ko’ra оraliq uchinchini ajratib chiqaradi. Ya’ni bоg’lоvchilarda bоg’lash, yuklamalarda gap mundarijasiga ta’sir qilish mоhiyatni bеlgilash darajasida bo’lsa, ko’makchilarda sanalgan har ikki bеlgi mushtarakdir. Bu ularning «оraliq uchinchi»lik mavqеini ko’rsatadi. Yordamchi so’zlarning shakliy xususiyatlariga ko’ra turlari . Yordamchi so’zlar shakliy хususiyatariga ko’ra: a) qo’shimchasimon yordamchi so’zlar; b) sof yordamchi so’zlar; v) nisbiy yordamchi so’zlar. Qo’shimchasimon yordamchi so’zlar har uchala yordamchi so’zlar tarkibida uchraydi. Ko’makchilar orasida -dek/-day,-cha , bog’lovchilar orasida –ki/-kim ; -u, -yu,-da affikssimon yuklama - bog’lovchilar, yuklamalar orasida -mi, -chi, -a, -ya, -ku,-o q (-yo q), -da, -gina kabi qo’shimchaga o’xshash yordamchi so’zlarni uchratish mumkin. Qo’shimchasimon yordamchi so’zlar shaklan qo’shimchaga o’xshaydi, ammo yordamchi so’zlarning vazifasini bajaradi. Chunonchi, 1. Po’latdek (kabi) dadil bir yigit bu ishdan hayiqsa, uyat bo’ladi. (O.Muх.) 2. Shu payt o’g’ilchasi eshikdan yugurib keldi-da (va), dadasining quchog’iga otildi. (Oyb.) 3. Bazmga Gulnoragina (faqat) kelmadi. (S.Ahm) Sof ko’makchilar sirasiga avvaldan ma’lum uchun, bilan, sari, qadar, kabi, singari, sayin, orqali so’zlari; sof bog’lovchilar sirasiga va, hamda, ammo, lekin,

biroq, balki, yo, yoxud, go’yo, agar, basharti kabilar; sof yuklamalar qatoriga xuddi, faqat, axir, hatto, naq, atigi so’zlari kiradi. Nisbiy yordamchi so’zlar atamasi ostida boshqa turkumga mansub bo’lgan so’zning yordamchi vazifasida qo’llanilishi ( old, orqa, avval, bo’ylab, boshlab… ) yoki tabiatida “shakldoshlik” mavjud bo’lgan birliklar tushuniladi. Masalan, “yolg’iz” sifat turkumiga oid so’z yuklama o’rnida ( YOlg’iz senga suyanaman ) ishlatiladi. Yoki Vaqtida yomg’ir yog’adi, vaqtida qor gapida vaqtida so’zining vazifasi bog’lovchilarga yaqindir. Bunga o’xshash misollar nutqimizda ko’p uchraydi. Yordamchi so’zlarning shakliy xususiyatlariga ko’ra turlarini quyidagi jadvalda umumlashtirish mumkin: 6-jadval Yordamch i so’z turi Sof yordamchi so’z o’shimchasi- mon yordamchi so’z Y a rim yordamchi so’z Ko’makchi kabi, singari, sari, sayin, dovur, uchun, orqali -dek, -day, dayin, -cha old, oldin, orqa, qarshi, avval, bo’ylab, ko’ra, qarab, tomon Bog’lovchi va, hamda, ammo, lekin, biroq, chunki, shuning uchun, agar, go’yo, toki, basharti, garchi, xoh, dam, yoki, yoxud, yo -ki, (-kim), -u, -yu, -da vaqtida, bir , ba’zan, gоhida Yuklama axir, xatto, faqat, ham, naq, go’yo, go’yoki, atigi -mi, -ku, - gina, -u, -yu, - da, -a, -oq, yolg’iz, ba’zan, bir

(-yoq), -dir Jadvaldan ko’rinib turganidek, yordamchi so’zlar salmog’i mustaqil so’zlar hisobidan ortib boradi. Yordamchi so’zlarning boyishida yana bir yo’l ularning ichki tomondan bir turdan ikkinchi turga o’tishidir, aniqr-og’i, “oraliq hodisa” xususiyatiga ega bo’lgan ko’makchi-bog’lovchi, bog’lovchi-yuklamalarning mavjudligi. Masalan, bilan, deb, deya kabilar ko’makchi-bog’lovchilardir. Ushbu ko’makchilarning bog’lovchi vazifasida kelishi ancha keng tarqalgan hodisadir. Ammo lekin bu ishni paysalga solish yaramaydi gapida bog’lovchi-yuklama qo’llanilgan, ya’ni ammo bog’lovchisi kuchaytiruv yuklamasi vazifasida kelgan. Bugungi kunda yordamchi so’zlarni har tomonlama o’rganish, ularni lisoniy tahlil qilish ishlari tilshunosligimizda davom etmoqda. Ko’makchilar yordamchi so’zlarning bir ko’rinishi sifatida. Turkiy tillarda (jumladan, o’zbek tilida ham) ko’makchilar ko’p yillardan buyon tilshunoslarning tekshirish manbai bo’lib kelmoqda. O’zbek tilidagi ko’makchilarga birinchi bo’lib mukammal ta’rifni A.N.Kononov bergan: “Ko’makchilar shunday bir gruppa so’zlarki, ular ot bilan yoki ob’ekt bilan predikat orasidagi qurol – vosita, maqsad, sabab, payt, masofa, yo’nalish, o’xshatish kabi munosabatlarning yaratilishida xizmat qiladi”. Sh.Shoabdurahmonov ham o’zining “YOrdamchi so’zlar” asarida ko’makchilarga xuddi shunday ta’rif bergan: “Ko’mak-chilar ob’ektning ob’ektga yoki ob’ektning predikatga bo’lgan turli grammatik munosabatlarini ko’rsatuvchi yordamchi so’zlardir”. Darhaqiqat, ko’makchilar orasidagi tobe munosabatni ifodalash va kelishik ma’nolarini aniqlash, to’ldirish uchun xizmat qiladi. Shu xususiyati bilan ko’makchi bog’lovchi va yuklamalardan farq qiladi. Ko’makchilar ma’no va vazifa jihatidan kelishik qo’shimchalariga yaqin turadi. Shuning uchun ba’zan kelishik shakllaridan anglashilgan ma’no ko’makchi bilan ham ifodalanadi ( Mashinada keldim - mashina bilan keldim. Ukamga oldim- ukam uchun oldim

kabi). Lekin bular kelishik affikslariga qaraganda ma’noni aniq, konkret ifodalaydi. Ko’makchilarning shakliy xususiyatiga ko’ra turlari. Ko’makchilar shakliy va bajaradigan vazifasi jihatidan quyidagi turlarga bo’linadi: a) sof ko’makchilar; b) yarim ko’makchilar; d) qo’shimchasimon ko’makchilar. Nutqimizda tez-tez ishlatiladigan uchun, bilan, sari, qadar, kabi, singari, sayin, or- qali so’zlari sof ko’makchilar bo’lib, ular tobe so’zni hokim so’zga bog’lashga xizmat qiladi. Sof ko’makchilar boshqa so’zlarga birikkan holda turli munosabatlarni anglatadi. Jumladan, bilan ko’makchisi o’zbek tilida asosan ko’makchi, ba’zan bog’lovchi vazifasida ishlatiladi. Shuning uchun bu ko’makchi turi bugungi kunda yordamchi so’zlardan birining o’rnida ikkinchisi qo’llanilishi nuqtayi nazaridan ko’makchi-bog’lovchi atamasi ostida ham o’rganilmoqda. Bilan yordam-chisining etim о logiyasi haqida prof.A.N. Kononov, V.V.Radlov, J.Deni kabi qator turkiyshunoslarning fikrlarini e’tiborga olib, uning birlan so’zidan kelib chiqqanini aytgan. Bilan yor-damchisining birla, birlan, bila, ila, -la shakllari vazn, qofiya va uslub talabiga ko’ra ko’proq poeziyada uchraydi. Chunonchi, Baxt ila to’lib-toshgan go’zal oy deraza tagida o’sgan daraxt barglarida mudrab yotadi . (R.Tag.) Bu ko’makchi quyidagi ma’nolarni bildiradi: 1) biror harakatning bajarilishida shaxs, predmetlarning birgaligini bildiradi: Ko’pchilik bilan odam o’zini kuchli sezadi. 2) harakatni bajarishda vosita ma’nosini bildiradi: Shu gapning ustiga Ismat bobo hassasi bilan eshikni ochib kirib keldi. (P.Qod.) 3) payt ma’nosini ifodalaydi: Qo’ng’iroq chalinishi bilan o’qituvchi sinfga kirdi. 4) sabab ma’nosini bildiradi: Ular: ”Gulnor o’z ajali bilan o’ldi… ”, - deyishdi. (Oyb.)

5) harakatning bajarilishidagi holatni ifodalaydi: Onamning mehr bilan boqib turgan ko’zlarini bir umr unuta olmasam kerak. (Oyb.) Bilan ko’makchisi keng tarqalgan yordamchi so’zdir. Uning bog’lovchilik, ko’makchilik tabiati olimlarimiz orasida tortishuvlarning bo’lishiga sabab bo’lgan. Shu b о isdan “… va, bilan, hamda, shuningdek so’zlari hozirgi o’zbek adabiy tilida teng bog’lovchilarning biriktiruv bog’lovchilari turiga kiradi” degan fikr ham ilgari surilgan. Ammo bu o’rinda shuni qayd etish kerakki, bog’lovchi vazifasidagi bilan ning va, ham biriktiruv bog’lovchilaridan farqlanadigan o’ziga xos xususiyatlari bor: - «birgalik» ma’nosi bilan yordamchisi uchun хо s: Chodir sahnasidan bir qiz bilan yigit chiqib o’yin qildi (M.Ism.). Ushbu misoldagi bilan o’rnida va ni qo’llasak, yuqoridagi ma’no kelib chiqmaydi, balki qiz bilan yigitning alohida– alohida o’ynagani ma’nosi ifodalanadi. - va, ham bog’lovchilari uyushib kelgan fe’l kesimlarni bog’laydi, ammo bilan da bu imkoniyat chegaralangan. Qiyoslang: Lola ishlaydi va o’qiydi . Lola ishlaydi ham o’qiydi. Ammo Lola ishlaydi bilan o’qiydi tarzidagi gap nutqda ishlatilmaydi. Bilan ning grammatik vazifasi bog’lovchi va ko’makchi vazifasida kela olishidir; shunga ko’ra, bilan boshqa ko’makchilardan farqlanadi. Shuning uchun bilan ko’makchisini ko’makchi–b о g’lovchi termini bilan ataganimizda uning barcha xususiyatlari namoyon bo’ladi. Bu ko’makchi turi gapda vosita ma’nosini bildirganda to’ldiruvchi, sabab, payt, harakatning bajarilish tarzini bildirganda hol vazifalarida keladi. Uchun ko’makchisi atalganlik ( Yo’lchi uchun keltirgan tugunchak yodiga tushdi (Oyb.)), maqsad ( Hamma xalq ochdan o’lmaslik uchun bir amal–taqal qilib turibdi (Oyb.)), sabab ( Kampirning ahmoqligi yo dushmaningizning ig’vosi uchun shundoq deyishga qandoq tilingiz bordi? (A. Qah.)) evaz ( E’tib о ringiz uchun rahmat ) kabi ma’nolarda qo’llanilib, to’ldiruvchi, maqsad, sabab holi vazifalarida keladi. Kabi, singari yanglig’ ko’makchilari bir narsani boshqa narsaga o’xshatish, chog’ishtirish ma’nosini anglatadi. Masalan, Ukam men kabi

bechora… g’am chekib yotgandir (Oyb.). Kabi, singari ko’makchilari bilan -dek, -day qo’shimchalarining ma’nodoshlik xususiyati tilshunoslarimiz tomonidan qayd etilgan. Formal tilshunoslikda bu affikslar ravish yasovchi qo’shimchalar sifatida berilgan. -dek, -day affikslari orqali yasalgan ravishlar harakat va holatning yasash asosida ifodalangan narsa yoki belgi-xususiyat bilan o’xshashligini, qiyoslashni bildiradi: tog’-dek, ot-dek, lochin-day, qadimgi-day, ilgarigi-dek, avvalgi-dek, burungi-day, gul-day kabi. Qalandarovertasiga kundagiday saharda idoraga chiqdi (A.Qah.). U go’yo tug’ilib o’sgan qishlog’ini ko’rmoqchiday boshini ko’tarib hayajon va sog’inch bilan uzoqlarga tikildi (Oyb.) Bu o’rinda ham til hodisalarini izohlashda zo’rma-zo’rakilik yuzaga kelgan. Natijada nutqimizda tez-tez ishlatiladigan ushbu qo’shimchalar noto’g’ri talqin etilgan. Buni quyidagi oddiy qiyosda ko’rish mumkin: -dek, -day ( qo’shimchasimon ko’makchi) kabi (singari, yangli g’) (sof ko’makchi) 1. Oy dek go’zal qiz . 2. Tog’ dek yuksak . 3. Lochin day dadil . 4. Ilgarigi dek qadrdon bo’lib ketishgan. 5. Gul day ochilib menga bir bor qaramaysiz . Oy kabi go’zal qiz. Tog’ kabi yuksak. Lochin singari dadil. Ilgarigi kabi qadrdon bo’lib ketishgan. Gul yanglig’ ochilib bizga bir bor qaramaysiz. Oddiy mantiq - dek, -day qo’shimchasi kabi (singari, yanglig’, misol, misoli) sof ko’makchisiga sinonim ekanligini, -dek, -day qo’shimchalarida so’z yasash xususiyati yo’qligini ko’rsatib turibdi.

-dek, -day qo’shimcha shaklidagi ko’makchilar hamisha o’zidan oldingi so’zga qo’shib yoziladi va urg’uli bo’ladi. -dek, -day ko’makchilari ko’p hollarda bir-birini almashtira oladi. Ular bitta ko’makchining ikki ko’rinishidir. -dek, -day ko’makchi-qo’shimchasi o’zining eski adabiy o’zbek tilida keng qo’llangan -dayin ko’rinishiga ham egadir. Bu ko’rinish, asosan, hozir ko’tarinki uslubda, she’riyatda qo’llaniladi: 1. Oydayin ruxsoringga zoru intizorman o’zim. 2. Zihi sarv ustida yuzung qamardayin, Qani bir shoxi gul sen siymbardayin. («Muhabbatnoma») -day ko’makchisi shunday, bunday, qanday, unday, allaqanday kabi olmoshlar; jinday, qittay, arziguday, aytganday, jo’jabirday, o’lguday, dovongirday kabi ravishlar tarkibida yaxlitlanib, qotib, o’zakdan ajralmaydigan bo’lib qolgan. Qadar, dovur ko’makchilari hokim bo’lakka tobelanish munosabatini yaratar ekan, bunda o’rin, payt ma’nolarini ifodalaydi. Qadar ko’makchisi -ga qo’shimchali ot va olmoshlar bilan qo’llanib, «chegara», «nihoya» ma’nolarini bildiradi: Tantanali yig’ilish boshlangunga qadar askiya, o’yin-kulgi davom etdi. (Oyb.) Qadar ga ma’nodosh qo’shimchasimon ko’makchi sifatida -cha qo’shimchasining to’g’ri kelishi ilmiy adabiyotlarda qayd etilgan: Mehmonlar kechga qadar o’tirishdi  Mehmonlar kech gacha o’tirishdi. Orqali ko’makchisi harakatning biror vosita bilan bajarilishini bildiradi: Anvar o’z istiqbolini yolg’iz muhabbat orqali ko’rar edi. (A.Qod.) Bilan va orqali ko’makchilari vosita ma’nosini anglatishlariga ko’ra ma’nodoshlik hosil qiladi. Ammo bu ma’nodoshlik ma’lum kontekstlardagina voqealanadi. O’rin ma’nosini ifodalagan otlar bilan birikkanda bilan va orqali ko’makchilari sinonim bo’ladi: Katta yo’l orqali yurib borib chapga burildik – Katta yo’l bilan yurib borib chapga burildik. Agar ko’makchi boshqarayotgan ot o’rin ma’nosini ifodalamasa, bu ko’makchilar ma’nodoshlik kasb etmaydi. Chunonchi,… Yigitga deraza orqali to’yib - to’yib qarashga zor bo’lsa - da,… (O.) Sari ko’makchisi harakatning yo’naltirilgan o’rni, payti ma’nosini anglatadi: Hirot sari yurdik. (Oyb.) Ko’krak og’rig’im borgan sari battar

bo’lyapti. (Oyb.) Sari ko’makchisi o’rin, tomon, payt ma’nosini bildirganda sayin ko’makchilari bilan ma’nodosh bo’ladi. Gapda payt holi, o’rin holi, to’ldiruvchi vazifalarida keladi. Ma’lumki, sistem tahlil jarayonida har bir narsaning mohiyati shu narsaning o’ziga o’xshash, ayni vaqtda undan farqli va unga zid boshqa narsalar bilan bo’lgan munosabati orqali ochiladi. Jumladan, o’zbek tilining lug’aviy tizimi mustaqil va yordamchi leksemalarga bo’linadi. O’z navbatida mustaqil leksemalar atash/nomlash vazifasini bajaruvchi atovchi lekse-malarga va ishora ma’noli leksemalarga (olmoshlarga), yor-damchilar esa ko’makchi, bog’lovchi, yuklamalarga, bularning har biri, o’z navbatida, yana boshqa guruhlarga pog’onali ravishda bo’linib ketaveradi. Tilimizning yordamchi so’zlar, mustaqil so’zlar va morfemalar tizimi izchil pog’ о naviy (ierarxik) tuzilishga ega bo’lib, nisbiy va quyi pog’onalar o’zaro gipo-giperonimik (tur-jins) munosabatlari bilan bog’lanadi  har bir yuqori bosqich quyi pog’ona uchun giperonim mavqeida, quyi bosqich yuqori bosqichga nisbatan giponim mavqeida bo’ladi. Demak, so’z yoki morfema ma’lum bir pog’onalardan o’tib lisoniy birlik darajasiga etadi va kishi ongida tayyor, majmui sifot sifatida yashaydi. Quyida ayrim yordamchi so’z (ko’makchi)larning ULM (umumlisoniy ma’no) sini berishga harakat qilamiz: Bilan  leksik sath birligi  ma’noviy nomustaqil – umumlashgan grammatik ma’noli  shaklan morfologik o’zgar-mas  leksoid va affiksoid ko’rinishli  yakka qo’llanishli  sintaktik bog’lash vazifasida kela oladigan lisoniy birlik. Kabi - leksik sath birligi–ma’noviy nomustaqil–umumlashgan grammatik ma’noli–shaklan morfologik o’zgarmas–leksoid ko’rinishli–yakka qo’llanishli– sintaktik bog’lash vazifasida kela oladigan lisoniy birlik. Boshqa ko’makchilarga ham ta’rif berish mumkin. Nisbiy ko’makchilar haqida. Mustaqil so’zlarning “nomustaqillik” belgisiga nisbatan mo’’tadilligi sababli mustaqil so’zlar ichidan nisbiy yordamchilar ajralib chiqadi. Nisbiy ko’makchilar bir xususiyati bilan “ma’noviy mustaqil”, ikkinchi xususiyati bilan “ma’noviy nomustaqil” leksemalarga o’xshab ketadi va “oraliq uchinchi” guruhini hosil qiladi. Leksemalar nomustaqil leksema

sifatida voqelanganda leksema sememasi o’z muayyanligini kuchsizlantiradi va semema grammatik ma’no sifatida voqelanadi. Chunonchi, quyidagi gaplarda ifodalangan ko’ra leksemasining ma’nolarini qiyoslashga harakat qilamiz: 1. YAxshi-yomonni ko’ra-ko’ra odamning yaxshimi, yomon ekanini tez ajratib oladigan bo’lib qolgan. (A.Qah.) 2. Qalandarovdan shikoyat boshlashdan ko’ra ko’proq bu noqulay ahvoldan chiqish uchun … (A.Qah.) 1-gapda qo’llanilgan ko’ra «ko’z bilan ko’r-moq, kuzatmoq» semasiga ega bo’lsa, 2-gapda «ko’rish» semasi kuchsizlangan va «chog’ishtirish, qiyoslash» grammatik ma’nolari-ni voqelantirgan. 1-gapda qo’llanilgan «ko’ra» ko’rmoq fe’lining ravishdosh shakli bo’lsa, 2–gapda fe’l ko’makchi sifatida tobela-nish munosabatini hosil qilgan. Qolgan nisbiy ko’makchilar ham xuddi shunday xususiyatlarga egadir. Old, oldin, or qa, ro’-para, qarshi, avval, keyin, so’ng, oxir, tomon, ost, ust, tag, tepa, yon, uch, ich, o’rta, ora kabi o’rin va payt ma’noli otlar, bosh, qosh, lab, og’iz, oyoq, qorin kabi tana a’zolari nomlari, qariyb, bo’ylab, boshlab, ko’ra, deya, deb, atab, o’xshab kabi ravishdoshlar juda ko’p hollarda ko’makchi vazifasida keladi va ko’makchilar xazinasining boyishiga sabab bo’ladi. Bunday hollarda bu so’zlar nisbiy yoki yarim ko’makchi sanalib, o’zi birikib kelgan so’z bilan birgalikda bir gap bo’lagi, ko’pincha, hol bo’lib keladi. Ko’makchilardan bilan, uchun, kabi, singari, yanglig’, sayin, sari, sababli, orqali, tufayli, chog’li, bo’ylab, haqida, to’g’risida kabilar o’zlari birikib kelgan so’zlarga hech qanday qo’shimchasiz bog’lanadi; tomon, qadar, qarshi, qaraganda, doir; binoan, qaramay kabi ko’makchilar o’zlari birikib kelgan so’zdan - ga qo’shimchasini qabul qilishni talab qiladi: qonunga binoan, ukasiga qaraganda, baxtga qarshi; so’ng, keyin, boshqa, tashqari, buyon, avval, ilgari, boshlab ko’makchilari - dan qo’shimchali so’zlar bilan birikadi: bundan avval, o’qishdan keyin, tanaffusdan so’ng kabi. Ko’makchilarning grammatik munosabatni yaratib, kelishik qo’shimchalariga o’xshash vazifani bajarishi haqida yuqorida qisman aytib o’tilgan edi. Darhaqiqat, ko’mak-chilar shu xususiyati bilan ham boshqa yordamchi so’zlardan farq qiladi. A.N.Kononov ta’biri bilan aytganda, ko’makchilar ko’p hollarda kelishiklarning dubleti sanaladi. Masalan: Ukam ga

oldim – Ukam uchun oldim. Siyoh da yozdi – Siyoh bilan yozdi. Telefon da gaplashdi – Telefon orqali gaplashdi. Akamni gapirdi – Akam haqida gapirdi. Bog’lovchi va uning shakliy ko’rinishlari . Bog’lovchilar ham ko’makchilar kabi sintaktik al о qa vositasi sanalib, ulardan tobe munosabatni ifodalashdan tashqari teng munosabatni ham hosil qilishi bilan ajralib turadi. Bog’lovchilar gap bo’laklari, qo’shma gapning sodda gapga teng qismlari orasidagi turlicha aloqalarni, grammatik munosabatini ko’rsatadi. Bog’lovchilarning mohiyati, o’zbek adabiy tilidagi bog’lovchilarning turlari, bu turlarga oid so’zlar tilshunosligimizda k е ng o’rganilgan. Mavjud adabiyotlarda bog’lovchilarning turlari va bu turlarga qaysi so’zlar mansubligi masalasida turlicha nuqtayi nazarlar bor, ya’ni bir ishda bog’lovchi deb berilgan birlik boshqa ishda yuklamalar qatoriga kiritiladi, ko’makchi deb berilgan birlik bog’lovchi deb tan olinadi. Bog’lovchilarga oid so’zlarning aniq belgilanmaslik sababi ularning lisoniy jihatdan o’rganilmagan-ligida bo’lsa k е rak. Bog’lovchilarni ham ko’makchilar singari shakliy jihatdan uch guruh (sof bog’lovchilar, nisbiy bog’lovchilar, qo’shimcha-simon bog’lovchilar) ga ajratib o’rganish l о zim. Sof bog’lovchilar guruhiga faqat bog’lovchi vazifasida qo’llaniladigan va, hamda, yo, yoxud, yoki, ammo, lekin, biroq, chunki, shuning uchun, agar, ya’ni kabi yordamchi so’zlar xos. Qo’shimchasimon bog’- lovchilar guruhiga -ki (-kim ) va ham bog’lovchi, ham yuklama vazifasida kela oladigan -u (-yu), -da, -mi qo’shimchalari mansubdir. -u (-yu), -da qo’shimchalarining bog’lovchi vazifa-sini to’la-to’kis bajarishi qator manbalarda qayd etilgan, -mi qo’shimchasida ham bog’lovchilik xususiyati borligini Yomg’ir yog’di mi , hamma joy nam bo’ladi , Karim keldi mi , to’polon boshlanadi tipidagi gaplar tasdiqlaydi. Ushbu gaplarda qo’llan-gan -mi qo’shimchasi ta’kid ma’nosini voqelantirgan holda sodda gaplarni bir-biriga bog’lash funksiyasini bajaryapti. Nisbiy bog’lovchilarga mustaqil so’z turkumlaridan o’sib chiqqan, “oraliq uchinchi” tabiatiga (ham mustaqil, ham yordamchi) ega bo’lgan ba’zan, bir, vaqtida, hali goh, (goho) kabi so’zlarning takroriy shakli misol bo’ladi. CHunonchi, 1. Ba’zan Qoratoyning ishxonasida,

ba’zan choyxonada tunab yurdi . (Oyb.) 2. Ikki kundan beri goh savalab, goh shiddat bilan yog’ayotgan yomg’ir hammayoqni ivitib yubordi. (A.Qah. ) 3. Vaqtida qor yog’adi, vaqtida yomg’ir. Bu gaplarda qo’llanilgan ba’zan, goh (goho), vaqtida so’zlarining vazifalari bog’lovchilarga juda yaqin. Salima tez qaytdi. U yangi xabar olib keldi ; Brigadada mehnat yaxshi uyushtirilmadi. Natijada hosil kam bo’ldi ; Azimboy ko’p zulm o’tkazdi. Oqibatda xalqning sabr kosasi to’ldi gaplaridagi u, natijada, oqibatda so’zlari birinchi gapni ikkinchi gap bilan bog’lab kelmoqda. Demak, u, natijada, oqibatda so’zlari ham nisbiy bog’lovchilar sirasiga kiritilsa to’g’ri bo’ladi. Ikkinchi gapning mazmuni birinchi gapsiz aniq emas. Yordamchi so’zlar nafaqat so’zlarni, hattо gaplar va matn qismlarini ham bog’lashga xizmat qiladi. Hozirgi o’zbek adabiy tilidan darslik va qo’llanmalarda bog’lovchilarning vazifa jihatidan turlari quyidagicha belgilan-gan: I. Teng bog’lovchilar. 1. Biriktiruv bog’lovchilari: va, -u (-yu), hamda . 2. Ayiruv bog’lovchilari: yo, yoki, yoxud, goho, dam… dam, bir… bir, ba’zan… ba’zan. 3. Zidlov bog’lovchilari: ammo, lekin, birоq. II .er gashtiruvchi bog’lovchilar . 1. Aniqlov bog’lovchilari: ya’ni, -ki (-kim). 2. Sabab bog’lovchilari: chunki, shuning uchun, zeroki . 3. Shart bog’lovchilari: agar, agarda, agarchi. 4. Chog’ishtiruv bog’lovchilari: go’yo, go’yoki. Teng bog’lovchilar,ergashtiruvchi bog’lovchilarning ma’no va vazifa tomoni, imlo xususiyatlari formal tilshunoslikdan darslik va qo’llanmalarda atrоflicha bayon etilgan. Bog’lovchi-yuklamalarning mohiyati . Ammo ayrim so’zlarning bog’lovchilik tabiatidan kelib chiqqan holda shuni aytish mumkinki, bog’lovchilarning miqdori, ularning mohiyati, turlari hanuzgacha aniq belgilanganicha yo’q. Masalan, chog’ishtirish bog’lovchilariga go’yo, go’yoki kiritiladi. Ammo bu so’z gap bo’laklari yoki gaplarni bog’lash uchun xizmat emas, balki o’xshatish, qiyoslash ma’noli konstruktsiyalarda shu ma’noni

ta’kidlash uchun xizmat qiladi, o’xshatish, qiyoslash ma’nosi esa boshqa vositalar bilan ifodalanadi: Beda orasi juda issiq, go’yo quyoshning butun olovi beda ichiga yashiringanday. (Oyb.) Nay sadosining mayin to’lqinlari tip-tiniq havoda yoyilarkan, go’yo hammayoq jonlangan kabi tuyuldi. (Oyb.) Ushbu misollarda o’xshatish, qiyoslash -dek qo’shimchasi va kabi so’zi bilan ifodalanyapti, go’yo esa shu ma’noni ta’kidlayapti. Demak, go’yo ta’kid yuklamasi hisoblanadi. Balki yordamchisi haqida ham shu fikrni aytish mumkin. Balki qo’llanishidagi ba’zi xususiyatlariga ko’ra, zidlov bog’lovchila-ridan farq qiladi. Zidlov bog’lovchilari ko’pincha qo’shma gap qismlarini bog’laydi, balki yordamchisi bunday vazifani bajarmaydi: Havo bulut bo’ldi, lekin (ammo, biroq) yomg’ir yog’madi. Bu misolda zidlov bog’lovchisi o’rnida balki so’zini qo’llab bo’lmaydi. Balki so’zi gumon mazmunli gaplarda, zid mazmunli qismlarga ega gaplarda gumon, qarama-qarshilik ma’nolarini ta’kidlash uchun qo’llanadi:… toping, balki tanishla-ringiz bordir. (Oyb.) Chunki biz Azizbek kabilardan xalqnigina emas, balki o’zimizni ham qiynatdirmog’damiz. (A.Qod.) Bu gap m е nga yoqmas, balki battar jahlimni chiqarardi. O’z-o’zidan anglashiladiki, balki sof bog’lovchi bo’lolmaydi, bog’lovchi funksiyasini bajarayotgan yuklamalar sirasidan joy oladi. Qisqasi, bir turdan ikkinchi turga o’tish va bog’lovchi- yuklama, ko’makchi-bog’lovchi kabi oraliq hodisalar hosil qilish yordamchi so’zlar tabiatiga xos xususiyat bo’lib, ularning ichki manba asosida boyishining bir yo’li sanaladi. Ham… ham biriktiruv bog’lovchisi ta’kid qo’shimcha ma’no bo’yog’iga ega, na…na esa inkor ma’nosini ifodalaydi, -mi so’roq - taajjub yuklamasi esa gap tarkibida bog’lash funksiyasini bajaradi. Shuning uchun bular bog’lovchi-yuklamalar hisoblanadi. Chunonchi, 1. Na so’zlarida ma’no bor, na ishlarida hayo. (O.) 2. Bir tovuqqa ham suv kerak, ham don kerak. (Maq.) 3. U bir gapni aytdimi, albatta, qiladi. Bog’lovchilarning fоrmal-funksiоnal talqini muam - mоlari. Yu qorida aytilgan fikrlardan shunday xulosaga kelish mumkinki, o’zbek tili bog’lovchilarining ma’no va xususiyatlari tamomila boshqacha, ularni turkona

tahlil qilish, bog’lovchilar bilan bog’liq masalalarni to’g’ri va to’la hal etish bugungi kunda tilshunosligimiz oldida turgan bosh masalalardan biri sanaladi. Y u klamalarning ma’no va vazifasi . Yo rdamchi so’zlarning funktsional belgisi “bog’lash”dir. Shu belgi asosida ko’makchi, bog’lovchi, yuklamalar so’z va gaplarni bir-biriga bog’lash uchun xizmat qiladi. Ammo bu vazifa bog’lovchi va ko’makchilar uchun o’zgarmas, barqaror sanaladi. Yuklama-larning o’ziga xos xususiyati shundaki, ular so’zlarga yoki gaplarga so’roq, ta’kid, kuchaytiruv, ayirish-chegaralash, o’xsha-tish kabi qo’shimcha ma’nolarni beradi va funktsional “bog’lash” belgisiga nisbatan beqaror, o’zgaruvchan sanaladi, ya’ni “bog’-lash” belgisi bo’lishi ham, bo’lmasligi ham mumkin. Chunonchi, na-na yordamchisi teng bog’lovchilarning bir turi sifatida inkor bog’lovchisi sanalib kelgan. G’.Abdurahmonov esa uni inkor bog’lovchisi deb atash bilan birga, unda yuklamalik xususiyati ham borligini ko’rsatadi. Haqiqatan ham, bu yordamchi ham bog’lovchilik, ham yuklamalik vazifasini bajaradi. Bog’lovchi vazifasida kelganda ayrim teng huquqli bo’lak (komponent)larga inkor ma’nosini berib, ularni bog’laydi: Na so’zlarida ma’no bor, na ishlarida hayo. (Oyb.) Bu yordamchi so’z yuklama vazifasini bajarib, mazmunidan inkor anglashilgan gaplar tarkibida keladi va inkor ma’nosini ko’rsatadi: Raisningerkatoy o’g’li na o’qiydi, na biror joyda ishlaydi. Go’yo yordamchisi mazmunidan o’xshatish yoki chog’ishtirish ma’nolari anglashilgan sodda va qo’shma gaplar tarkibida ishtirok etadi. Sodda gaplardagi funksiyasiga ko’ra ko’proq yuklamalarga yaqin turadi: Tursunoy go’yo qalbi bilan ashulaga jo’r bo’lar edi. (A.Mux.) Kampirning yuzida go’yo kulgiga o’хshagan bir narsa aks etdi. (A.Qah.) Go’yo yordamchisi qo’shma gaplarda sodda gap qismlarini biriktiruvchi grammatik vositalarning biri sifatida xizmat qiladi, ya’ni qo’shma gapdagi vazifasiga ko’ra sodda gapdagi vazifasidan farqli o’laroq, u faqat yuklamagina emas, balki bog’lovchi-yuklama sanaladi:er taga nikoh bo’ladi, go’yo men uning xotini . (Oyb.) Shunday baqirdiki, go’yo butun xona larzaga kelgandek bo’ldi. (A.Qah.) Aytdimi, qiladi, Qo’ydi-da, chiqdi gaplarida ham –mi, -da, qo’shimcha-simon yuklamalarning bog’lovchilik

xususiyatini kuzatish mumkin. Demak, yuklamalarning qo’shma gap tarkibiy qismla-rini o’zaro bog’lash vazifasi keng uchraydigan hodisa ekan va bu tilshunosligimizda ma’lum darajada o’rganilgan. Y u klamalarning tuzilish turlari . Ko’pgina leksoid yordamchi so’zlarning affiksoid ko’rinishlari mavjud, bu yuklamalarga ham tegishlidir: ham, -am /-yam; uchun, -chun; -u, -yu; bilan, -ila, -la shular jumlasidandir. Yuklamalar shakliy jihatdan uch xil ko’rinishga ega: 1. Qo’shimchasimon yuklamalar ( -mi, -chi, -a, -ya… ). 2.Sof yuklamalar ( xuddi, faqat, axir …). 3.Nisbiy yuklamalar ( yolg’iz, ba’zan, tanhо, bir… ). Ularning shakliy va vazifaviy turlari . Yu klamalar vazifaviy jihatdan quyidagi ma’no turlariga bo’linadi: 1. So’roq yuklamalari: -mi, -chi, -a, -ya, nahotki. Bu yuklamalar turli so’z turkumlariga qo’shilib, so’roq ma’nosini bildiradi. Ba’zan so’roq ma’nosidan tashqari taajjublanish, hayratlanish ma’nolarini ham ifodalaydi. -mi affiks yuklamasi o’zidan oldingi so’zga qo’shib yoziladi, -chi, -a, -ya yuklamalari esa o’zidan oldingi so’zdan chiziqcha bilan ajratib yoziladi: 1. Kiyganingiz ipak mi di, kimхob mi di, Sevganingiz bizlardan ham ortiq mi di? 2. Opang- chi ? Sen- chi ? Men- a ? Meni- ya ? 2. Nahotki shu gaplarga ishongan bo’lsangiz. 2. Ayirish-chegaralash yuklamalari: faqat, faqatgina, -gina (-kina,- qina) . Bu yuklamalar ayrim narsa va hodisalarni boshqalardan ajratish, harakatni chegaralash uchun qo’llaniladi. -gina affiks yuklamasi o’zidan oldingi so’zga qo’shib yoziladi: To’yga Sherali gina kelmadi, xolos. O’ktam indamadi, faqat yuragida to’lqinlangan mehr bilan onasiga tikildi. Faqat yuklamasining o’rnida yolg’iz so’zini ham qo’llash mumkin. Sifat so’z turkumiga oid bu so’z nisbiy yuklama hisoblanadi: Sobir, yolg’iz senga suyandim (Sobir, faqat senga suyandim).

3. Ta’kid yuklamalari: -ku, -da, -u, -yu. Gapda ifodalangan biror voqeani ta’kidlash uchun qo’llaniladi: Sobir- ku keldi, Mahmud kelmadi- da ! 4. Kuchaytiruv yuklamalari: axir, hatto, hattoki, -oq (-yoq) . -oq, (-yoq) affiks yuklamasi o’zidan oldingi so’zga qo’shib yoziladi. Harakatning birin-ketin tezlik bilan davom qilishini, boshlanish paytini, ta’kidlashni ko’rsatadi: Gullarni ko’riboq ko’ngli yorishdi. Axir, hatto, hattoki yuklamalari ham fikrni kuchli ta’kidlash, avvalgi voqeani eslatishni ifodalaydi: Axir do’stimsan- ku ! 5. O’xshatish-qiyoslash yuklamalari: xuddi, naq, go’yo, go’yoki . Bahorda bu bog’lar go’yoki kelindek yasanadi. (CHirildoqlarning mayin musiqasi hamma yoqni to’ldirgan, go’yo kechaning o’zi kuylaydi kabi gaplarda yuklama- bog’lovchi vazifasini bajaradi.) 6. Inkor yuklamasi: na . Takror holda ishlatilib inkor ma’nosini ifodalaydi: Na ko’kning fonari o’chmasdan, Na yulduz sayr etib ko’chmasdan. (U.) Yordamchi so’zlar – ko’makchi, bog’lovchi va yuklamalar tilimizni, uning cheksiz imkoniyatlarini yana ham boyroq, ifodalarimizni yana ham aniqroq va go’zalroq qilishning vositalaridandir. Yordamchi so’z turkumlari yuzasidan olib borilgan izlanishlar quyidagi xulosalarga olib keldi: 1. Ko’makchi, bog’lovchi va yuklamalar nutqimizning cheksiz imkoniyatlarini yanada boyroq, ifodalarimizning yanada aniqroq va go’zalroq bo’lishini, jumlalarning rang-barangligini ta’minlovchi muhim vositalardandir. 2.YOrdamchi so’zlar til tizimida mohiyatan mustaqil so’zlar bilan qo’shimchalar oralig’ida turadi. 3.YOrdamchi so’zlar nutq rang-barangligini ta’minlashini birgina misol yordamida ko’rish mumkin: 1) senday qiz, 2) sendek qiz, 3) sendayin qiz, 4) sening kabi qiz, 5) sen singari qiz, 6) sening singari qiz, 7) senga o’xshash qiz,

8) senga o’xshagan qiz… (Bu birikmalar o’xshash ma’noni ifodalagani bilan ularning har biri juda nozik farqlarga ega). 4.Bog’lovchi-yuklama, ko’makchi-bog’lovchi, ko’makchi-yuklama kabilar muosir, til tizimida ko’rsatilganidek, yordamchi so’z turkumlariga xos bo’lgan “oraliq uchinchi”lardir. 5.Tilimizda nisbiy ko’makchilar, nisbiy bog’lovchilar, nisbiy yuklamalar sirasi mustaqil so’zlarning yordamchilashishi evaziga boyib bormoqda. 6.O’z mohiyati bilan yuklamalar modal so’zlarga yaqin turadi. Shu tufayli bu ikkisi ko’pincha birgalikda tasvirlanadi. Ammo modal so’zlar bilan yuklamalarni tenglashtirib bo’lmaydi. Yuklamalar: 1) yuklamalar rang-barang ma’nolarni ifodalaydi, shulardan ba’zilarigina modal ma’noga yaqin keladi; 2) yuklamalar ko’pincha mustaqil ishlatilmaydi, biror so’zga tirkalib yuradi. Modal so’zlar esa: 1) gap tarkibida gap modalligini kengaytiruvchi, murak-kablashtiruvchi vosita sifatida ro’yobga chiqadi. Boshqacha qilib aytganda, [Wpm] gap qurilish qolipining [Rm] qismida mujas-samlangan va xilma-xil vositalar bilan ifodalanadigan tasdiq /inkor, taxmin, gumon, shubha, ishonch, shart, qat’iylik, istak, imkoniyat kabi modal ma’nolar gapning boshqa bo’laklari bilan tobe- hokimlik munosabatiga kirishmaydigan modal so’zlar, tasdiq/inkor so’zlar vositasida kengaytiriladi: Kanizak, aftidan, shuni aytmoqchi edi… (A.Qah.) 2) mustaqil ravishda yakka o’zi bitta gap bo’lib kela oladi va modal so’z- gaplar deb yuritiladi. Bunday so’z-gaplarning barchasida kesimlik kategoriyasi ma’nosi so’zning lug’aviy ma’nosida mujassamlangan bo’ladi: Kelasizmi? - Albatta . 3) yuklamalar morfologiyada yordamchi so’zlar guruhida, modal so’zlar so’z-gaplar doirasida o’rganiladi;

4) boshqa so’z guruhlari kabi modal so’zlar ham, yuklamalar ham o’ziga xos morfologik, sintaktik, ma’noviy belgilarga ega. Modal so’zlar bilan yuklamalarning o’zgarmasligi ularning m o r f o l o g i k belgisiga kiradi. S i n t a k t i k jihatdan esa modal so’zlar ajraluvchilik (ya’ni kirish so’z vazifasida kela oladi), yuklama esa muchalanmaslik (gap bo’lagi bo’la olmaslik) belgisiga ega. S e m a n t i k jihatdan modal so’zlar fikrning voqelikka munosabatini ifodalaydi va butun gapga taalluqli bo’ladi. Yuklamalar esa ta’kid, o’xshatish, kuchaytirish kabi qo’shimcha ma’no ifodalaydi. Yuklama ifodalagan ma’no butun gapga bevosita taalluqli bo’lmay, avvalo o’zi tirkalib kelgan bo’lakning ma’nosini bo’rttirishga xizmat qiladi va shu bo’lak orqali butun gapga taalluqli bo’ladi.

$А d а biyotl а r 1. Mengliyev B.R. Hozirgi o’zbek tili. Morfemika. Derivatsiya. Morfologiya. II qism. Qarshi-2005. 2. Abuzalova M.Q. Hozirgi o’zbek tili. Morfologiya, 1-qism. Mustaqil so’z turkumlari. (Ma‘ruza matnlari). Buxoro-2003. 3. Nurmonov A., Shahobiddinova Sh., Iskandarova Sh. va boshqalar. O’zbek tilining nazariy grammatikasi. Morfologiya.-T.: Yangi asr avlodi. 2001.- 182 b. 4. O’zbek tili grammatikasi. I tom. Morfologiya. Max.muh. G’.A.Abdurahmonov va boshq. T.: Fan, 1972.-610 b. 5 . Zamonaviy o’zbek tili: Morfologiya\ Mualliflar jamoasi. Max. muh. H.G’.Ne’matov va boshqalar. T. Mumtoz so’z, 2008. 6. Sayfullaeva R.R., Mehgliyev B.R. va boshqalar. Hozirgi o’zbek adabiy tili. O’qv qo’llanma.-T., Fan va texnologiya,2009. -416. 7. Ne ‘ matov H ., Rasulov R . O ’ zbek tili sistem leksikologiyasi asoslari . - T .: O ’ qituvchi . 1995.-127 b . 8. Musulmanova N.R. Grammatik shakllarda kategorial, yuondosh va hamroh ma’no (zamon va mayl kategoriyalari misolida) Filol.fan.nomz...diss. -Toshkent, 2007.-116 b .$

O'xshashlar

Yordamchi so’zlar

Yordamchi so’zlar. Ko’makchi va bog’lovchi

Modal so’zlar

Undov so’zlar

Yodamchi so’zlar tahlili