Ilmiy tadqiqot metodologiyasi fanining maqsadi va vazifalari - Pedagogika - Referatlar

Ilmiy tadqiqot metodologiyasi fanining maqsadi va vazifalari

Yuklangan vaqt:

15.09.2023

Ko'chirishlar soni:

0

Hajmi:

326.5 KB

Ko'chirib olish

Ilmiy tadqiqot metodologiyasi fanining maqsadi va vazifalari Reja : 1. Fan-bilim, faoliyat va institut sifatida. 2. Ijodiy jarayonning jamiyat taraqqiyotidagi o’rni. 3. Ilmiy tadqiqot metodologiyasi 4. «Ilmiy tadqiqot metodologiyasi» fanining predmeti, maqsadi va vazifalari

Fan-bilim, faoliyat va institut sifatida Fan - inson faoliyati sohasi bo’lib, uning vazifasi borliq haqidagi obyektiv bilimlarni ishlab chiqish va nazariy tomondan tizimlashtirish hisoblanadi. Fanning asosiy maqsadi –xolis dunyoni ya’ni borliqning nazariy aksini bilish va tabiatga jamiyat uchun foydali natijalar olish maqsadida ta’sir ko’rsatishdan iboratdir. Fan - bu rivojlanuvchi, o’suvchi bilim tizimi, insonning atrof olamni surunkali o’zlashtirishiga, o’zini qurshagan voqyelikning borlig’i haqida aniq va teran axborot olishi, bunday axborotni saqlash, qayta ishlash va undan foydalanishiga yunaltirilgan ijtimoiy ongning alohida shaklidir. Fan ilmiy tushuncha, tamoyil, aksioma, ilmiy qonun, nazariya, faraz, empirik ilmiy fakt, uslub, usul va tadqiqot yo’llari tarzidagi uzluksiz rivojlanib boruvchi bilimlar tizimidir. Shuningdek, uni bilimlarning mazkur tizimlarini yaratish va rivojlantirishga yo’naltirilgan insonlarning ilmiy faoliyati, ijodini ilmiy mehnat obyektlari, vositalari va faoliyat sharoitlari bilan ta’minlovchi muassasa sifatida keng ma’noda tushunish maqsadga muvofiqdir. Bakalavriatni bitirib magistraturaga o’qishga kirgan magistrantlar «Katta fan» deb atalgan dargohga ilk qadam qo’yadilar. Undagi muammolar va bilimlarni o’rganish tarzi ta’lim tizimining quyi bosqichlarida mavjud bo’lgan ilmlarni o’zlashtirish shakllaridan nima bilan farq qiladi? Mazkur savollarni ko’rib chiqishdan maqsad fan va ilmiy tadqiqot to’g’risida konkret tasavvur hosil qilishdir. Ma’lumki, fan sohasida endigina faoliyat ko’rsatayotgan yosh mutaxassis yetarli darajada bilimlar majmuiga ega bo’lishi kerak. Bunday majmuani tashkil qilgan bilimlar banki quyi ta’lim bosqichlarida yaratildi. Xususan, maktabda o’quvchilar tabiat, jamiyat va inson olami, atrofdagi turli hodisalar va qonuniyatlar haqida ilmiylik xislatiga ega bo’lgan dastlabki tayanch tushuncha va tasavvurlarni o’zlashtirib oladilar. Bakalavriat bosqichida talaba tanlab olgan fan yo’nalishiga doir asosiy tushunchalar, g’oyalar va tamoyillarni o’rganib oladi, uning ongida nazariya va ular birligini namoyon etgan tizimli bilim shakllanadi. Bunday bilim nisbatan

sodda struktura va xossalarga ega bo’lgan tuzilmalarni o’rganish va tushunish, hayotimizga kirib kelayotgan yangi buyumlar, texnik vosita va moslamalardan foydalanish imkoniyatini beradi. Shu bilan birga o’quvchi ham, bakalavr ham oldin yaratilgan va darsliklarga kiritilgan tayyor bilimlar bilan ishlaydi, o’qish jarayonida elementar uslubiy qoida va tamoyillarga tayanib u predmetga (fanga) oid savollar ustida mulohaza yuritadi. Magistratura ta’lim tizimida «nima», «nima uchun», «qanday qilib» kabi faktual, nazariy va amaliy-texnologik masalalar ilmiy muammoga aylanadi. Buning ma’nosi shuki, endi izlanishda u yoki bu hodisa qanday sharoitda, nima sabablarga ko’ra sodir bo’ladi, belgilovchi xossalar qanday qiymatlarga ega, olingan natijani texnologiyada tatbiq qilish istiqboli bormi, kabi murakkab nazariy va amaliy muammolar bilan shug’ullanishga to’g’ri keladi. Mana shunday muammolar ustida ishlash fan sohasida amalga oshadi. Agar maktab, kollejda ta’limning bakalavriat bosqichida talabalar oldin ishlab chiqilgan va tayyor shaklga keltirilgan ilmni o’zlashtirsalar, magistraturada hal etilmagan, ya’ni hodisa yoki qonuniyatni ochish, texnologik tuzilma loyihasini ishlab chiqish imkoniyatini beradigan muammolar o’rganiladi. To’g’ri, o’quvchi yoki bakalavr olimpiada va to’garaklarda qatnashish, hamda o’z ustida muntazam ishlash davomida intellektual salohiyati va ijodiy qobiliyatini o’stirishi mumkin. Lekin, bu holat yuqorida bildirilgan mulohazani rad etmaydi, aksincha, fan dargohiga qadam qo’ygan olimpiada sovrindori yoki stipendiant kelajakda iqtidorli tadqiqotchilar safini to’ldiradi. Fan xususida mulohaza yuritadigan bo’lsak, birinchi ko’zga tashlanadigan narsa, bu uning jamoaviy xislatidir. Fanda tadqiqotchilar jamoasi faoliyat ko’rsatadi. Bunday jamoada turli vazifalarni (eksperimentni tayyorlash va va o’tkazish, ma’lumotlarni to’plash va qayta ishlash, natijalarni umumlashtirish va h.k.) bajarishda namoyon bo’ladigan mehnat taqsimoti mavjud. Ilmiy jamoani faoliyati bir qator huquqiy, ijtimoiy, malakaviy va ma’naviy qonun-qoidalar asosida tartibga solinadi. Shularni hisobga olib fan tushunchasini quyidagicha ta’riflash mumkin: fantadqiqotchilar faoliyatini tashkillashtiradigan, yangi ilmiy

bilimlar ishlab chiqaradigan, olingan natijalarni amaliyot va texnologiyaga joriy qiladigan ijtimoiy institutdir (muassasasidir). Fan o’zagini yangi bilimlar ishlab chiqarishga qodir bo’lgan tadqiqotchilar tashkil qiladi. Tadqiqotchilar maxsus til, eksperiment va ilmiy usullardan foydalanish jarayonida innovasiyaga olib keladigan yangi natijalarni qo’lga kiritadilar, kashf qiladilar, voqyelikdagi narsa va hodisalarni tushuntirib beradigan ta’limotlar, g’oyalar va nazariyalarni ishlab chiqaradilar, hosil bo’lgan bilimlarni texnologik loyiha va modellar ko’rinishida amaliyotga tadbiq qiladilar. Fanning muhim tomonini ilmiy axborot ishlab chiqish va iste’mol qilish, tadqiqot vositalari va usullarini yaratish, olingan natijalarni turli darajadagi anjumanlarda muhokama qilish tashkil qiladi. Fanning strukturasi va asosiy xislatlari 1-rasmda ifodalangan. Shunday qilib, fan ko’p strukturali ijtimoiy institut bo’lib, unda jamiyat uchun zarur bo’lgan yangi bilimlar ishlab chiqariladi, olim va mutaxassislar faoliyati tashkil qilinadi, ilmiy axborot ishlab chiqiladi va iste’mol qilinadi, maxsus fan tili, tadqiqot vositalari va usullari yaratiladi, dolzarb ilmiy va amaliy- texnologik muammolar muhokama qilinadigan anjumanlar muntazam tashkil qilinadi. Fan o’zining ijtimoiy vazifalarini bajarish, shu orqali jamiyat taraqqiyotiga munosib hissa qo’shishi uchun ma’lum strukturaga ega bo’lishi, uning strukturasiga kirgan tuzilmalar samarali faoliyat ko’rsatishlari kerak. Shunday strukturalar qatoriga ilmiy-pedagog kadrlar tayyorlash tizimlari, ilmiy-tadqiqot muassasalari, ilmiy-texnik ta’minot bo’limlari, ilmiy axborot kommunikasiyalari va boshqalar kiradi.

Shu bilan birga, yana bir muhim omilni inobatga olishimiz zarur. Ya’ni, fan ma’lum ijtimoiy muhitda rivojlanadi. Bu yerda birinchi navbatda davlatni fanga nisbatan olib borayotgan siyosati, yaratilayotgan sharoitlar, moddiy va ma’naviy ta’minot darajasi ko’zda tutilmoqda. Mamlakatda ijtimoiy-iqtisodiy islohatlar amalga oshirilayotgan sharoitida Respublika Prezidenti, davlat organlari tomonidan fanning tashkiliy strukturasi, oliy malakali ilmiy kadrlar tayyorlash tizimi qanchalik zamon talabiga javob berishiga qarab ularni takomillashtirishga qaratilgan farmonlar va qarorlar qabul qilinmoqda. Fanning tashkiliy strukturasini shakllanishida ichki omillar va jarayonlar katta rol o’ynaydi. Uning strukturasida ilmiy intellektual faoliyat sohasidagi mehnat taqsimoti o’z ifodasini topadi. Xususan, bir sohada amaliy- loyihaviy va 1 - rasm Olimlar va mutaxassislar uyushmasi Ijtimoiy institut Yangi bilimlar ishlab chiqaradigan va kashf qilinadigan muassasa Ilmiy axborot ishlab chiqarish uzatish va iste’mol qilish tizimi Maxsus til vositalari va usullaridan foydalanib ilmiy tadqiqot olib boradigan muassasa - O’z o’zini tashkillashtiruvchi ijtimoiy tizim - Ilmiy va amaliy - texnologik muammolarini hal qilishga qaratilgan anjumanlarni muntazam o‘tkazib turadigan muassasa – fanlar akademiyasi; – ilm - tadqiqot instituti ; – universitet fani; – ilmiy - ishlab chiqarish birlashmasi va boshqalar. FAN Tashkiliy strukturasi

texnologik muammolar birinchi o’rinda turadi. Shunga muvofiq ilmiy-amaliy va texnologiyaga oid izlanishlar loyihaviy tadqiqot institutlarida, yirik korxonalar tasarrufida bo’lib laboratoriyalarda amalga oshiriladi. Fanlar Akademiyasi va universitetlarda ko’proq fundamental nazariy tadqiqotlar olib boriladi. Bunday tarmoqlanish va sohaviy ixtisoslanish ilmiy tadqiqotlar samaradorligini keskin oshirish imkoniyatini beradi. Fanning tashkiliy strukturasiga tarixan yondashsa, unda Platon akademiyasi, Aristotel liseoni, Aleksandriya shahridagi Muzeon (mill.avval. III asrda asos solingan), Ma’mun akademiyasi, Mirzo Ulug’bek akademiyasi, XVII asrdan boshlab Yevropada vujudga kelgan akademiyalar va universitetlardagi bo’limlar, laboratoriyalarni qayd qilish mumkin. Aytib o’tganimizdek, fanning tashkiliy strukturasi bilan olib borilayotgan tadqiqotlarning shakli va turlari o’rtasida aloqadorlik mavjud. Oliy o’quv yurtlarda tadqiqot yo’nalishi va mavzularni tanlash, izlanishlarni olib borish, olingan natijalarni birlamchi baholash kafedralarda, ularga qarashli laboratoriyada amalga oshiriladi. Sohaviy fundamental va maqsadli kompleks ilmiy tadqiqotlar Fanlar akademiyasi, ilmiy-tadqiqot institutlarda olib boriladi. Yirik korporasiya va firmalar qoshida mavjud bo’lgan ilmiytexnik bo’limlarda asosan eksperimental – texnologik izlanishlar amalga oshiriladi. Shunga ko’ra, fanning tashkiliy strukturasi quyidagi institusional tuzilmalarda o’ziga xos tarzda mujassamlangan: 1. Fanlar akademiyasi, undagi institutlar, bo’limlar va sektorlar; 2. Universitet fani; 3. Ilmiy-tadqiqot institutlari; 4. Yirik korxona va firmalarda mavjud bo’lgan ilmiy-texnik bo’limlar, laboratoriyalar; 5. Tarmoqlararo ilmiy-ishlab chiqarish birlashmalari, korxonalari. Shunday qilib, hozirgi zamon fan ilmiy-tadqiqot ishlarini tashkil qiladigan, ichki mehnat taqsimotiga ega bo’lgan, buyurtma, moliyaviy ta’minot va grantlardan foydalanib bilimlar, loyihalar va texnologik tuzilmalarni ishlab

chiqaradigan, o’zo’zini boshqarish va mehnatni tashkil qilish qonun-qoidalarga ega bo’lgan ijtimoiy institutdir. Ijodiy jarayonning jamiyat taraqqiyotidagi o’rni Fan yoki kurs borliqdagi obyektlarni o’rganish uchun harakat qiladi. O’z obyektini, predmetini, muammosini tanlaydi. O’qitiladigan barcha fan va kurslar ushbu jarayonsiz o’z mavqyeiga ega bo’la olmaydi. Ilmiy ijod metodologiyasi ham bundan istisno emas. Boz ustiga shiddat bilan o’tayotgan zamon falsafiy fanlarni qayta-qayta o’rganishga majbur qilayotir. Ayniqsa, uning metodologik va nazariy jihatlariga zamon talablari asosida yondashishga undamoqda. Shu munosabat bilan magistratura ta’limi jarayoniga kiritilgan ilmiy ijodni falsafiy tushunishga, uning mohiyatini, mazmunini chuqur anglashga jalb etadi. Ijod turlari, ayniqsa ilmiy ijod turlari serqirradir. Inson ijod kilmasa, yangi g’oyalarni yaratmasa, jamiyat taraqqiy qilmagan bo’lardi. Inson va jamiyat rivojida ijodning ahamiyati oshib, murakkablashib borgan. Inson ijodiga bo’lgan talab, ehtiyoj ham turli davrlarda har xil bulgan. Uni ichki va tashki omillarga ajratish mumkin: 1. Ichki omillarga: - Bilim rivoji darajasi - Inson tabiatiga xos tadqiqotchilik - Jamiyat va shaxs manfaatdorligi 2.Tashqi omillarga: - Raqobat - Siyosat - Jamiyat ehtiyojlari Jamiyat bir tekis rivojlanayotgan, keskin o’zgarishlar yaqqol ko’rilmagan davrda tadqiqot jarayonining borishida ichki omillar hal qiluvchi rol o’ynaydi. Tarixning keskin nuqtalarida ba’zan tashqi omillar birlamchi ahamiyat kasb etib, ichki omil imkoniyatlarini faollashtirib yuboradi. XIX asr boshlarida Napoleon

mamlakatga olib kelinadigan shakar o’rnini bosadigan mahsulot kashfiyoti uchun bir million frank mukofot berilishini e’lon qiladi. Shakar Yevropaga Sharqdan kelardi. Blokada yillarida shakar olib kelish mumkin bo’lmay qolgan edi. Kashfiyot amalga oshirildi va dunyoda birinchi marta qand lavlagidan shakar olish yo’lga qo’yildi. Biroq amaliy tadqiqotlarni oziqlantirib turuvchi bilimlar tizimi shakllanmasa hayot, siyosatning ko’rsatmalarini, talablarini bajarib bo’lmaydi. Napoleon kimyogarlar oldiga sun’iy bo’yoqlar yaratish vazifasini qo’ygan, katta mukofot e’lon qilingan edi. Biroq, muammo aniq, kimyoviy bilim darajasi yuqori bo’lsa-da, uni hal qilib bo’lmadi. Faqat XIX asrning 60-yillaridagina moddaning strukturasi haqida nazariya yaratilib, bo’yoq molekulalari tuzilishi taxmin qilindi va sun’iy bo’yoqlar ishlab chiqarish yo’lga qo’yiladi. Bundan ko’rinadiki, tadqiqotda hal qiluvchi rolni ichki omillar o’ynaydi, tashqi omillar esa asosan ularni faollashtiradi va yo’naltiradi, ichki omillar rivojini tezlashtiradi, bor imkoniyatini ishga solishga safarbar qiladi. Ayniqsa hozirgi sharoitda inson ijodkorligiga bo’lgan talab nihoyatda dolzarb ahamiyat kasb etdi, XX asrda bu eng ta’sirchan muammolardan biriga aylandi. O’tmishda insoniyat hyech qachon o’z rivojlanishining ko’p yo’nalishlarida bu qadar muammolarga duch kelgan emas edi, ularni hal qilish zarurati esa yangi g’oyalari, original fikrlaydigan kishilarni shakllantirishni talab qilmoqda. Shuning uchun tadqiqot muammosi faylasuflarning, psixologlarning, sosiologlar va pedagoglarning diqqat-e’tiborini tobora ko’proq o’ziga qaratmoqda. Ijod muammosi dolzarblashuvi sabablari: - hayot faoliyatining barcha sohalarida global inqirozning kuchayib borayotganligi; - tabiat resurslarining tugab borayotganligi; - -ta’lim darajasi yuksalishiga zid ravishda ommaviy madaniyatning keng tarqalib, tadqiqot imkoniyatlaming so’nish xavfini vujudga keltirayotganligi (millionlab kishilar tayyor sxema va texnologiyalarga aylantirilib, ko’p nusxada tarqatilayotgan o’zgalar tadqiqoti mahsullarini iste’mol qilib yashash bilan cheklanishlari mumkin).

Shunday qilib, jamiyat va insoniyatni rivojlantirgan ham, halokat bo’sag’asiga olib kelgan ham tadqiqot jarayonidir. Shu bilan birga jamiyat va insoniyat muammolarini samarali hal qilib, uni yuksaltiruvchi kuch ham tadqiqotdir. Shunday ekan, tadqiqotning o’zi nima, uning rivojlanishi xususiyatlari qanday, inson tadqiqotiy salohiyati yuksalishi uchun nima qilish kerak, kabi savollar tug’ilishi tabiiy. Yangi fikr eski fikrlarning yig’indisidan iborat emas, shunday bo’lganda har qanday odam yangi fikrlar yaratgan bo’lardi. Ilmiy tadqiqot metodologiyasi Ilmiy tadqiqotning sifati va natijasi izlanishda qo’llaniladigan vosita va usullarga bog’liq. Shu bois, fanda tadqiqot vositalari, texnologiyasi va usullariga e’tibor har doim katta bo’lgan. O’rganilayotgan obyekt qanchalik murakkab bo’lsa, uning xossalari va qonuniyatlarini ochish uchun qanday vosita, asos yoki usulni ishlatish masalasi dastlab hal qilinishi kerak bo’lgan metodologik muammoga aylanadi. Mazkur muammo xususida mulohaza yuritish metodologiyani, ya’ni, metodologik bilim darajasini (qatlamini) tashkil qiladi. Usul qanday xosil bo’ladi? Usul biron-bir aniqlangan qonuniyatni tadqiqot tamoyiliga aylanishidan, bir hodisaning qiymati, xossasi yoki doimiyligini (masalan, Plank doimiyligi) boshqa obyektni o’rganishga nisbatan qo’llashdan, tafakkurning tahlil qilish va umumlashtirish xislatini mantiqiy qoida sifatida foydalanishdan kelib chiqadi. Tadqiqot yo’li, vositasi va usul masalalarini qo’yish va hal qilish ishlab chiqiladigan va qo’llanilishi mumkin bo’lgan yondashuv va usulni samaradorligini aniqlash imkoniyatini beradi. Busiz fanda aniq va asoslangan natijaga erishib bo’lmaydi. Metodologik fikrlash va uslubiy aniqlik bo’lmasa, bunday holda izlanishda behuda, xaotik, samarasiz xatti-harakatlar ulushi ko’payadi. Shu bois, fanga jiddiy,

aniq maqsad bilan qadam quygan kishi tadqiqot olib borish shakllari, vositalari, yo’llari va metodlari haqida mumkin qadar aniq tasavvurga ega bo’lishi, tadqiqot usulini ishlab chiqishi yoki tashkil qilishi, undan oqilona foydalana bilishi lozim. Faqat shundagina tadqiqotchilik faoliyati izchil, oqilonalik, tejamkorlik va samarali bo’lish xislatlariga ega bo’ladi, izlanish esa kashfiyot yoki ixtiro bilan yakunlanadi. «Ilmiy tadqiqot metodologiyasi» fanining maqsadi, predmeti va vazifalari Tadqiqot olib birish qoida va usullarini bilish fanda samarali ijod qilish imkoniyatini beradi. Murakkab ilmiy muammolar bilan shug’ullanishga kirishgan yosh kuchlarda tadqiqotchilik malakasi hali yetarli bo’lmaydi. Shu bois, ilmiy tadqiqot metodologiyasida ishlab chiqilgan qoidalar, tamoyillar va uslubiy tavsiyalarni o’rganish ilmiy muammoni to’g’ri qo’yish, uni hal qilishga qaratilgan yondashuv va variantlarni oqilona tanlash yo’llarini ko’rsatadi. Shu holatdan kelib chiqib, mazkur fan maqsadini quyidagicha belgilash mumkin: - ilmiy ijod qilish, yangi bilimga erishish yo’llari va usullari; - ilmiy axborotni izlash va qayta ishlash; - ilmiy muammoni ifodalash va baholash; - olingan ma’lumotlarni xolisligi va takrorlash mumkinligini asoslab beradigan me’yoriy talabalardan foydalanish - natija va xulosalarni amaliyotga joriy qilish qoidalari haqidagi bilimlarni berishdir. Fan oldiga qo’yilgan maqsadda uning predmetiga kirgan muammolarni o’rganish, olingan natijalardan nazariy va amaliy yo’nalishlarda foydalanish belgilanadi. Shuning uchun izlanish maqsadini oqilona tavsiflash bilan fan predmeti xususida aniq tasavvurga ega bo’lish o’rtasida ma’lum bog’lanish mavjud.

Fan predmeti aslida unda ko’rib chiqiladigan masalalarni umumlashtirib, qisqa shaklga keltirilgan ta’rifdir. Ilmiy tadqiqot metodologiyasi quyidagi masalalar bilan shug’ullanadi: - ilmiy bilim qanday hosil bo’ladi? - tadqiqot nima? - axborot va faktlar bilan ishlash qanday amalga oshiriladi? - bilimni aniq va ishonchli bo’lishi nimalarga bog’liq? - usul nima? - usuldan foydalanish va uni yangilash qanday tarzda amalga oshiriladi? - tadqiqotning samaradorligi nima bilan belgilanadi? - tadqiqot natijalarini rasmiylashtirish qoidalari va boshqalar. Qayd etilgan savollarni umumlashtirsak fan predmeti kelib chiqadi. Demak, «Ilmiy tadqiqot metodologiyasi» - bu ilmiy bilish mexanizmlari, tadqiqot vositalari va usullari, axborot bilan ishlash va olingan natijalarni rasmiylashtirish, amaliyotga joriy qilish yo’llari va qoidalarini o’rganadigan fandir. «Ilmiy tadqiqot metodologiyasi» fani oldiga quyilgan maqsaddan konkret vazifalar kelib chiqadi. Bular quyidagilardan iboratdir: 1. Magistrantlar va yosh olimlarda nazariy va tajribaviy tadqiqot o ’ tkazish malakasini shakllantirish ; 2. Tadqiqotda axborot va faktlar bilan ishlash texnologiyasini o’zlashtirish; 3. Ilmiy tadqiqotni tashkil qilish, uni amalga oshirish rejalari va bosqichlarini ishlab chiqishni o’rganish; 4. Magistrantlarning intellektual va ijodiy qobiliyatlarini o’stirish yo’llarini bilib olish; 5. Ilmiy ijod qilish yo’llari va mexanizmlarini o’rganish; 6. Ilmiy tadqiqot olib borish sharti bo’lgan tanqidiy fikrlash qobiliyatini shakllartirish. Bu tadqiqotchini o’zi va boshqalar qo’lga kiritgan natijalarni xolisona baholash imkoniyatni beradi.

7. Fan va texnologiyada paydo bo’layotgan innovasion g’oyalar va loyihalarni bilib borish va o’zlashtirish uquvini shakllantirish. 8. Ilmiy tadqiqot natijalarini rasmiylashtirish qoidalari va talablarini bilish, amaliyotga joriy qilish malakasiga ega bo’lish. Qayd etilgan qoidalar, talablar va tavsiyalarni o’rganib borar ekanmiz, natijada bizda tadqiqot olib borish malakasi shakllanadi, tushunchalar, tamoyillar va usullar bilan ishlash ko’nikmasi vujudga keladi. Ilmiy tadqiqot metodologiyasini o’rganishdan olgan bilimlarimizni izlanish amaliyoti bilan bog’lab borish jarayonida esa tadqiqot samaradorligi ortib boradi.

Xulosa : - Fan ijtimoiy institut bo’lib, unda farovonlikka erishish uchun zarur bo’lgan yangi g’oyalar, tushunchalar va nazariyalar ishlab chiqiladi, shular asosida yangi predmetlar, mexanizmlar va texnologiyalar ixtiro qilinadi. - Jamiyatni hozirgi taraqqiyot bosqichini fansiz, unda amalga oshiriladigan ilmiy va texnologik yangilanishlarsiz, kashfiyot va ixtirolarni ishlab chiqarishga tatbig’isiz tasavvur qilib bo’lmaydi. - Fanning harakatlantiruvchi kuchi-bu yangi bilimlar va loyihalar ishlab chiqishga, ixtirolar qilishga qodir bo’lgan tadqiqotchilardir. - Fan poli(ko’p)strukturali ijtimoiy institut (muassasa) bo’lib, uning barcha tashkiliy bo’limlarida faoliyat va mehnat taqsimoti nizomlar va shartnomalar asosida mutanosiblashtiriladi. - Ilmiy tadqiqot metodologiyasini o’rganish yosh tadqiqotchilarda izlanish olib borish malakasi va mahoratni hosil bo’lishiga olib keladi. - Tadqiqot olib borishda metodologik fikrlash va uslubiy aniqlik bo’lmasa, ijobiy natijaga erishish imkoniyati kamayadi. - Ilmiy tadqiqot metodologiyasida ishlab chiqilgan tushunchalar, ko’rsatmalar va tavsiyalarni o’rganish ijod qilish, bilim va amaliyotni uzviy bog’lash uchun mustahkam zamin bo’lib xizmat qiladi.

Adabiyotlar : 1. O’zbekiston Respublikasining Konstitusiyasi. -T.: “O’zbekiston”, 2019 2. Karimov I.A. Yuqori malakali mutaxassislar taraqqiyot omili. T.: 1995. 3. Mirziyoyev Sh.M. Buyuk kelajagimizni mard va olijanob xalqimiz bilan birga quramiz. - Toshkent: ―O’zbekiston, 2017.-491 b. 4. Alemasov V., Mamadaliyev Sh.O. «Ilmiy tadqiqot: metodologiya, metodika, ijodiyot» kursidan katta ilmiy xodimlar-izlanuvchilar va mustaqil izlanuvchilar uchun o’quv qo’llanma. – T.: O’zbekiston Respublikasi IIV Akademiyasi, 2015. – 102 b. 5. Davronov Z., M.Primov “Ilmiy tadqiqot metodologiyasi” fanidan O’quv- uslubiy majmua. – Toshkent: Moliya instituti. – 2014 y. 6. Koxanovsiy V.P. Filosofiya i metodologiya nauki. – Rostov na Donu.: Feniks, 1999. – S 576. 7. Новиков А.М. Как работать над диссертацией / Пособие для аспирантов и соискателей. – М.: Эгвес, 1-е изд. 1994, 2-е изд. 1997, 3-е изд. 1999. 8. Новиков А.М., Новиков Д.А. Методология научного исследования. – М.: Либроком.2010. – 280 с. 9. Peregudov L.V., Saidov M.X., Aliqulov D.Ye. Ilmiy ijod metodologiyasi. – Toshkent: «Moliya» nashriyoti, 2002.

O'xshashlar

Pеdagogika fanining prеdmеti, maqsadi va vazifalari. Pеdagogikaning ilmiy-tadqiqot mеtodlari

Pedagogika fani. Uning maqsadi, vazifalari va ilmiy tadqiqot usullari

Ilmiy tadqiqot mavzularini asoslash metodologiyasi va ilmiy tadqiqotda axborot izlash va qayta ishlash

Husnixat metodikasi fanining maqsadi va vazifalari

Pеdagogika fanining prеdmеti, maqsadi va vazifalari