O`zbekistonda mustamlakachilikka asoslangan iqtisodiy siyosatning oqibatlari - Iqtisodiyot - Referatlar

O`zbekistonda mustamlakachilikka asoslangan iqtisodiy siyosatning oqibatlari

Yuklangan vaqt:

20.09.2019

Ko'chirishlar soni:

0

Hajmi:

114 KB

Ko'chirib olish

O`zbekistonda mustamlakachilikka asoslangan iqtisodiy siyosatning oqibatlari Respublika iqtisodiyoti tabiatan agrar tusga ega, sanoati asosan qishloq xo‘jalik mahsulotlarini qayta ishlash korxonalaridan iborat bo‘lib, uning uchdan ikki qismini paxtachilik sanoati tashkil qilar edi. O‘lkaning ishlab chiqarish hayotida kustar-hunarmandchilik ishlab chiqarishi hamon oldingi o‘rinni egallab, aholining poyafzal, kiyim-kechak va uy-ro‘zg‘or buyumlariga bo‘lgan ehtiyojlarini qondirar edi. Hunarmandlar bozorga chiqarilgan poyafzalning 86%ni, oshlangan terining 76%ni, kiyim-kechak va bosh kiyimlarining 85%ni, idish-tovoqlarning 60%ni ishlab chiqarar edilar. 1925 yilning oxiriga kelib sobiq SSSRda xalq xo‘jaligini tiklash ishlari asosan o‘z nihoyasiga yetkazildi. 1925 yilning dekabrida bo‘lib o‘tgan VKP(b) XIV qurultoyi sotsializm g‘alabasining asosiy sharti sifatida sho‘rolar mamlakatida “sotsialistik industrlashtirish”ni avj oldirishga e’tiborini qaratdi. Sanoatlashtirish O‘zbekistonda dastlab sekinlik bilan amalga oshirildi. Chunki kosibu-hunarmandchilik ustivor soha edi. Mamlakatni jadal industrlash uchun mablag‘ masalasi keskin munozaralarga sabab bo‘ldi. Industrlashtirishni jadallashtirish tarafdorlari mablag‘ni qishloq xo‘jaligi hisobidan olish rejasini ilgari surdilar, muxolif taraf esa,sanoatlashtirish siyosatini yoqlagani holda uni aholining moddiy ahvolini, turmush sharoitini yaxshilash va qishloq xo‘jaligida kooperatsiyani asta-sekin ixtiyoriy ravishda amalga oshirish bilan birgalikda olib borishni taklif qildi. Keskin siyosiy bahs munozaralardan keyin mablag‘ni agrar sektordan olishga qaror qilindi. O‘zbekiston iqtisodiyoti agrar xarakterda edi, zero 1927-28 yillarda iqtisodiyotda qishloq xo‘jiligining hissasi 61,6%ni, sanoatniki esa 38,4 %ni tashkil qilardi edi. Respublikadagi mavjud sanoatning 90%i qishloq xo‘jalik xom-ashyosini ishlashga ixtisoslashgan edi, mahsulotlarni qayta ishlash korxonalaridan iborat bo‘lib, uning 2 dan 3 qismini paxtachilik sanoati tashkil qilardi.

Birinchi besh yillik (1928-1932)da 289 ta yangi sanoat korxonasi, jumladan, Toshkent qishloq xo‘jalik mashinasozlik zavodi, Quvasoy sement va ohak zavodlari ishga tushirildi, Chirchiqqurilish, Olmaliqqurilish, Toshkent to‘qimachilik kombinati qurilishi davom etdi. Farg‘onada to‘qimachilik fabrikasi va yog‘ zavodi, Toshkent, Buxoro, Marg‘ilon va boshqa shaharlarda tikuvchilik fabrikalari ishga tushirildi. Sanoatlashtirish yillari respublika paxta tozalash zavodlarining texnik imkoniyatlari oshib, 1927-28 yillarda 3363 tonna paxta tolasi yetishtirdi va paxta tozalash sanoatining yalpi mahsuloti esa 165,7 mln. rublni tashkil etgan edi. Respublikani sanoatlashtirishda elektrlashtirish ham muhim o‘rinlardan birini egallaganligi tufayli, elektrstansiyalar qurilishi avj oldirildi. Masalan, Toshkent yaqinida quvvati 4 ming kilovatni tashkil etgan Bo‘zsuv GESi barpo etildi. 1932 yilga kelib esa, elektr stansiyalarining soni 49 taga yetdi. Shuningdek, respublikada neft sanoati ham jadal sur’atlar bilan o‘sdi, 1925-26 yillarda neft ishlab chiqarish 5,6 tonna bo‘lgan bo‘lsa, 1927-28 yillarda bu ko‘rsatkich 47,7 tonnani tashkil etdi. Ayrim sanoat mahsulotlari bo‘yicha O‘zbekiston sobiq Ittifoqda yetakchi o‘ringa chiqdi. 1932 yilda paxta tolasining 89,7 %, sementning 54,2%, o‘simlik moyining 56,4%, xom ipakning 42% ishlab chiqarildi. Faqatgina birinchi besh yillikning o‘zida yirik sanoatdagi ishchilar soni deyarli 3,5 baravar ko‘paydi. Lekin ular orasida mahalliy millat vakillari ozchilikni tashkil qilganligi bois, ularni tayyorlashga yordam tariqasida

ittifoqdosh respublikalar, asosan Rossiyadan ko‘plab sanoat mutaxassislari kela boshladi. 1926 yildan 1940 yilgacha O‘zbekiston aholisi yangi kelganlar hisobiga 750 ming kishiga yoki 10%dan ortiqroq ko‘paydi. Markazning rusiyzabon aholining ko‘chirib keltirishda milliy o‘lkalarda o‘zining tayanch ijtimoiy qatlamini vujudga keltirish hamda ruslashtirish siyosatini amalga oshirish manfaati yotar edi. Sanoatni jadal rivojlantirish natijasida O‘zbekiston Markazga rangli va nodir metallar, oltingugurt, ozokerit, volfram, molibden, paxta tolasi, xom ipak bilan ta’minlaydigan va sho‘rolar mamlakatini xom ashyo qaramligidan xolos etishga yordam beradigan yirik xom ashyo mintaqasiga aylandi. O‘zbekistonning oltin sanoati butun mamlakatning to‘lov balansini mustahkamlash uchun katta mablag‘lar berib turdi. Biroq, aholining ijtimoiy ehtiyojlari nazar-pisand qilinmadi, uning moddiy farovonligiga e’tibor berilmadi, bu esa turmush darajasining pasayib ketishiga olib keldi. Sho‘rolar davrida shahar va portlarni birlashtiruvchi yangi temir yo‘l liniyalari qurilishiga ham e’tibor berildi. Farg‘ona (Iskobil)-Quvasoy (1922), Qarshi-Kitob(1924), Amudaryo (Samsonovo)- Termiz (1925). 1928-29 yillarda paxtachilikni rivojlantirish maqsadida Asaka –Shahrixon, Sirdaryo-Paxtaorol temir yo‘llari qurildi, shuningdek, Qorasuv-Osh (1935) va boshqa temir yo‘l liniyalari qurilib foydalanishga topishirildi. 1929-1931 yillarda uzunligi 1452 km bo‘lgan Turkiston-Sibir (Turksib) temir yo‘li qurildi. 20-yillardan O‘zbekistonda avtomobil trasporti vujudga keltirildi. 1921 yilda respublika avtomobil transporti ixtiyorida 40 yengil va 15 yuk avtomobili hamda Toshkent avtomobil ta’mirlash ustaxonasi bor edi. 1940 yilgacha Lenin nomidagi katta avtomobil yo‘li (710 km), Farg‘ona avtomobil yo‘li (343 km) qayta ta’mirlandi va bir qancha yangi yo‘llar qurib bitkazildi. Respublika hukumati 1940 yilda uzunligi 708 km bo‘lgan Katta O‘zbek traktini (Toshkent-Termiz avtomobil yo‘li) qurish haqida maxsus qaror qabul qildi. Bu yo‘lning 376 km Toshkent, 222 km Samarqand, 162 km Buxoro viloyatlari mehnatkashlari tomonidan 1941 yilning4 oyida qurib tugallandi.

1924-yilga kelib, respublikadagi avtomobil korxonalarida 223 avtomobil bo‘lib, 145 ming tonna yuk tashildi. 30-yillarda avtomobil transportining rivojlanishi bilan qattiq qoplamali yo‘llar qurilishi boshlandi, ta’mirlash va texnik xizmat ko‘rsatish korxonalari, kadrlar tayyorlaydigan o‘quv yurtlari ochildi. Yangi iqtisodiy siyosat (NEP) tufayli O‘zbekiston qishloqlaridagi ahvol ancha yaxshilandi, dehqonlar o‘z mahsulotini sotish, g‘o‘za va boshqa ekin maydonlarini kengaytirish orqali turmush darajasini yaxshilash imkoniyatiga ega bo‘lishdi. Biroq, 20-yillarning ikkinchi yarmidan YAIS (NEP) o‘z mohiyatini yo‘qotib, erkin savdo va xususiy tadbirkorlikka chek qo‘yila boshladi. Sho‘rolar boylarning yerlarini musodara qilish hisobiga kambag‘al dehqonlarni yer bilan ta’minlash orqali qishloqda “sotsialistik ijtimoiy tuzum” ning asosi bo‘lgan jamoa bo‘lib xo‘jalik yuritishni rivojlantirishni ko‘zlab, keng miqyosli agrar islohoti avj oldirdilar. 1925 yil 2-dekabrdagi O‘zSSR MIQning Favqulodda Sessiyasida qabul qilingan “Yer va suvni natsionalizatsiya qilish” to‘g‘risidagi dekreti qabul qilindi. Yirik yer egalaridan tortib olingan yerlarda 60603 dehqon xo‘jaligi tashkil etiladi. Bulardan tashqari, yangi va tiklangan sug‘orma yerlarida yana 14751 batrak va yersiz dehqonlar xo‘jaliklari tuzildi. Qashqadaryo, Surxondaryo va Xorazm viloyatlaridagi yer-suv islohoti davomida sug‘oriladigan 20 ga va 45 ga ortiq lalmi yerlar, sobiq amir va xon xizmatchilari, ruhoniy hamda savdogar, sudxo‘rlarning xo‘jaliklari musodara qilindi. Umuman, 1925-29 yillardagi yer-suv islohotini o‘tkazish natijasida O‘zbekistonda pomeshchik turidagi 4801 xo‘jaliklar tugatildi, 23036 xo‘jaliklarning ortiqcha yerlari musodara qilindi, yer jamg‘armasi 474893 desyatina yerga ega bo‘ldi, 89729 xo‘jaliklar yer bilan ta’minlandi. Yer bilan birga ko‘pgina xo‘jaliklar mol-mulk, urug‘, asbob-uskunalarga ham ega bo‘ldilar. Biroq islohot o‘tkazishning repressiv-majburiy usullari, boy dehqonlarning davlat tomonidan terror qilinishi o‘z navbatida ularning keskin norozilik chiqishlariga sabab bo‘ldi. Shu tariqa, yer-suv islohoti qishloqda sinfiy kurashning keskinlashuviga olib kelgan edi. Davlat o‘z navbatida “boy-quloq unsurlari”ning

qarshiliklarini bartaraf etish uchun o‘zining bor kuchini ishga soldi. Tortib olingan yerlarning asosiy qismi kolxozlar va sovxozlar ixtiyoriga topshirilgan edi. Islohotning jiddiy salbiy oqibatlaridan qishloq iqtisodiy hayotining qashshoqlashishi, fermerlik kurtaklarining bo‘g‘ib qo‘yilishi va bozor-savdo munosabatlarining rivojlanishining to‘sib qo‘yilishi hamda ijara imkoniyatlarining cheklanishi bo‘ldi. Shunday qilib, 1925-29 yillardagi yer-suv islohoti sho‘ro hukumatining mulkdor sinflarni tugatish, sinfsiz jamiyat qurish uchun qilgan chora-tadbirlaridan biri bo‘ldi. Ushbu jarayon keyingi yillarda qishloq xo‘jaligini majburiy jamoalashtirishga zamin yaratgan edi. 1929 yil tarixga qora belgi ostidagi “buyuk burilish yili” deb nom olgan yil bo‘lib kirib keldi. Bu dehqonlar sinfini ijtimoiy qatlam va mehnatkash omma sifatida maqsadli yo‘q qilishning boshlanish davri edi. Bunda “quloqlar” va “boylar” toifasiga asosan yangi iqtisodiy siyosat sharoitida o‘z xo‘jaliklarini oyoqqa turg‘azib olgan o‘rta hol dehqonlar kiritildi. Chunki birmuncha badavlatroq qatlamlar oldingi yillarda tugatilgan edi. 1929 yilning yozida “quloqlar”ni jamoa xo‘jaliklariga (kolxoz) kiritishini ta’qiqlovchi qaror qabul qilinadi. O‘sha yilning 7 noyabrida “xalqlar otasi” - Stalinning matbuotda bosilib chiqqan “Buyuk burilish yili” nomli maqolasi hamda 27 dekabrda qishloq xo‘jalik xodimlarining ilmiy konferensiyasida so‘zlagan nutqi “quloqlar” ni sinf sifatida tugatish va jadal jamoalashtirish siyosatini boshlab berdi. Yoppasiga jamoalashtirish bu-boy va o‘rta hol dehqonlarga tegishli ishlab chiqarish vositalari, mollar, uy-joy, qishloq xo‘jalik mahsulotlari va urug‘ zahiralarini tortib olinishi hisobiga kolxozlar tuzish degani edi.

O‘zbekistonda jamoalashtirish O‘zKP MQning 1930 yil fevralda qabul qilgan “Kollektivlashtirish va quloq xo‘jaliklarini tugatish” to‘g‘risidagi qarori e’lon qilingandan so‘ng boshlab yuborildi. O‘zbekistonda yoppasiga jamolashtirishni tezlashtirish hamda “quloqlar” bilan kurash olib borishni kuchaytirishga yordam tariqasida Markaz 25 ming tashkiliy– siyosiy tajribaga ega bo‘lgan rus ishchilarni yuboradi. Bu yerga “25 mingchilar” asosan Moskva, Leningrad, Ivanovo-Voznesenk va SSSRning boshqa sanoat markazlaridan O‘zbekistonga 433 ishchi yuborildi. Ulardan tuzilgan brigadalar o‘zbek qishloqlarida kolxozlar tuzish hamda “quloq qilish” kompaniyasida “faol” ishtirok etdilar. 1930-yilning o‘zidayoq respublikada 2648 ta boy va “quloq” xo‘jaliklari tugatilib, qishloq ahlining tadbirkor qismi oyog‘iga bolta urildi. ”Quloq qilish” siyosati dehqonlarda ishonchsizlik va xavotirni kuchaytirdi. Ko‘plab dehqonlar o‘z xo‘jaliklarini tashlab qochdilar. Chorva soni keskin kamayib ketdi. Respublikadagi siyosiy vaziyat keskinlashib bordi. Dehqonlarning noroziligi 1930 yil 25 fevralda Farg‘ona okrugida g‘alayonga aylandi. Norozilik chiqishlari Andijon, Toshkent, Xorazm, Samarqand okruglariga ham yoyildi. Masalan, Chust va Olmosda boy dehqonlar chorva mollarini yoppasiga sotishni avj oldirdilar. Jamoalashtirishga qarshi bu harakat ba’zi joylarda sovet hokimiyatiga qarshi chiqishlarga aylandi. Mana shunday norozilik chiqishlarining oldini olish uchun 1930 yilda O‘z MQ KP(b) qoshida “quloq” va boylarni yo‘q qilish bo‘yicha maxsus respublika komissiyasi tuziladi va “quloq qilish” siyosati yanada shiddatliroq tus oladi.

O‘zbekistonda jamoalashtirish asosan 1932 yilning oxiri 1933 yilning boshlarida tugallandi. Bu davrga kelib respublikaning 79 dan 61 tumanida barcha dehqon xo‘jaliklarini kolxozlarga birlashtirish nihoyasiga yetkazilgan edi. Jami O‘zbekistonda jamolashtirilgan xo‘jaliklar 74,9%ni tashkil etdi. Birinchi besh yillik(1928-1932) oxirlarida respublikada 9734 kolxoz va 94 ta sovxoz tashkil etilgan edi. 1930-33 yillarda O‘zbekistonda 5550 dehqon xo‘jaligi hibsga olinib, quloq qilinadi va Ukraina, Sibir, Qozog‘iston va boshqa joylarga zo‘rlik bilan ko‘chirildi. Lekin shuni ham aytish joizki, bunda nafaqat o‘ziga to‘q, mol-mulkka ega dehqonlar, balki o‘rta hol, ayrim hollarda esa batrak xo‘jaliklarga mansub kishilar ham “quloq” sifatida surgun qilindi. Sovet davlatining bunday g‘ayriinsoniy siyosatini amalga oshirishdan maqsadi, birinchidan, qishloqdagi o‘ziga to‘q kishilarning yer-suvi, mol-mulkini tortib olish, ikkinchidan, tortib olingan boylik va ishlab chiqarish vositalari hisobiga jamoa va davlat xo‘jaliklarining dastlabki moddiy bazasini yaratish, uchinchidan, kambag‘al dehqonlarning bu xo‘jaliklarga “o‘z xohishlari” bilan kirishlariga erishish va ularning arzon mehnatidan foydalanish, to‘rtinchidan, “quloq” bo‘lib surgun qilingan kishilar yordamida masalan, Ukrainaning iqlimi O‘zbekistonga yaqin zonasida paxtachilik sovxozlarini tashkil etish va pirovardida paxta yordamida SSSRning moddiy imkoniyatlarini yaxshilash edi. Sho‘rolar bu maqsadlarga asosan erishdi. Quloqlar hisobiga qaddini tikladi, sotsialistik qurilishning moddiy bazasini yaratdi. Paxta mustaqilligiga erishdi. Barcha xatti- harakatlarga qaramay, Ukrainada paxtachilik xo‘jaligi qaror topmadi. Majburiy jamoalashtirish siyosati qishloqning mustaqil rivojlanishini barbod qildi, qishloq ahli ongiga salbiy ta’sir ko‘rsatdi, dehqonlarning yerga egalik tuyg‘usini yo‘q qildi. O‘zbekiston uchun suv inshootlari qurish muhim edi va shuning uchun 1939 yildan bunday qurilishlar umumxalq hashar yo‘li bilan amalga oshirila boshladi. 1939 yil 1 avgustda boshlangan 270 km uzunlikdagi Katta Farg‘ona kanali

xalqning mashaqqatli mehnati evaziga 45 kunda barpo etildi. Kanal qurilishida 160 ming kishi ishtirok etdi va asosan qo‘l mehnati bilan qurildi. Chorvachilik O‘zbekiston qishloq xo‘jaligining muhim sohalari qatorida sho‘rolar davrida ham muhim o‘rin egalalab keldi. Xususan, 1932 yildan 1937 yilgacha yirik qoramollar soni 150 mingga, qo‘ylar 230 mingga ko‘paydi. Lekin shunga qaramasdan chorvachilik qishloq xo‘jaligining boshqa sohalariga qaraganda orqada edi. Buning asosiy sababi paxtachilikka e’tiborning kuchaytirilganligi va chorvadorlarning moddiy rag‘batlantirilmaganligi bo‘ldi. O‘zbekiston KPning 1934 yilda bo‘lib o‘tgan VI qurultoyidan so‘ng, respublikaga ko‘p miqdorda qoramol keltirila boshladi. Pillachilik respublika qishloq xo‘jaligining asosiy tarmoqlaridan bir edi. 1922 yilda Toshkentda “Turkipak” aksionerlik jamiyatining tashkil etilishi pillachilikni rivojlantirishda muhim bosqich bo‘ldi. 1927 yilda Toshkent ipakchilik stansiyasi negizida O‘rta Osiyo ipakchilik ilmiy-tadqiqot instituti tashkil etildi. 1930 yillarda tut ko‘chati yetishtirishga alohida e’tibor qaratildi. Birinchi va ikkinchi besh yilliklarda O‘zbekiston ipak ishlab chiqarish bo‘yicha birinchi o‘rinda edi. 1932 yilda 5674 tonna pilla yetishtirilgan bo‘lsa, ushbu ko‘rsatkich 1937 yilda 11 422 tonnaga ko‘paydi. Respublika qishloq xo‘jaligida mevalar va uzum yetishtirish qadimgi va oziq-ovqat hamda sanoat xom ashyosi beradigan asosiy tarmoqlar qatoriga kiradi. 20-yillarning 2-yarmidan ixtisoslashtirilgan bog‘dorchilik va tokchilik davlat xo‘jaliklari barpo etila boshladi, tog‘ va tog‘ etaklari zonalarida joylashgan jamoa xo‘jaliklarida ham bu tarmoqqa katta e’tibor berildi. Mevalarning nav tarkibini yaxshilash maqsadida olma, nok, uzum va boshqalarning Yevropa mamlakatlarida yetishtiriladigan navlari keltirilib ekildi. O‘zbekistonning 1937 yilda yetishtirgan meva hosili 800 ming sentnerni tashkil etdi. Shundan uchdan bir qismi sobiq ittifoqning turli viloyatlariga yuborilar edi.

O'xshashlar

O`zbekistonda loyihalarni boshqarish tendensiyalari

Iqtisodiy foyda kontsеptsiyasiga asoslangan baholash va korxona qiymatini boshqarish usullari

Iqtisodiy taraqqiyot, iqtisodiy o`sish va milliy boylik

O`rta asr davridagi iqtisodiy ta’limotlar

Iqtisodiy o`sish nazariyalari va modellari