Jazoni ijro etish muassasalarida rejim - Huquqshunoslik - Referatlar

Jazoni ijro etish muassasalarida rejim

Yuklangan vaqt:

20.09.2019

Ko'chirishlar soni:

0

Hajmi:

38.376953125 KB

Ko'chirib olish

Jazoni ijro etish muassasalarida rejim Reja: 1. Jazoni ijro etish muassasalarida rejim 2. Jazoni ijro etish muassasalarida tezkor-qidiruv faoliyati

Jazoni ijro etish muassasalarida rejim tushunchasi va ahamiyati. Rejimning asosiy talablari. Milliy qonunchilikni erkinlashtirish davrida jazoni ijro etish rejimini yengillashtirish. Jazoni ijro etish muassasalarida mahkumlar kiyimi. Mahkumlarni batamom ajratib qo‘yish va qo‘riqlash. Mahkumlarni nazorat qilish va tekshirishning texnikaviy vositalaridan foydalanish, tintuv va ko‘zdan kechirish. Mahkumlarga nisbatan jismoniy kuch ishlatish, tinchlantirish ko‘ylagini va maxsus vositalarni ishlatish tartibi va shartlari. O‘q-otar qurollarni qo‘llash, foydalanish asoslari tartibi va shartlari. Jazoni ijro etish muassasalarida alohida holat joriy etish tartibi va shartlari. Mahkumlarning oziq ovqat mahsulotlari va eng zarur narsalarni sotib olishi. Mahkumlarning qarindoshlari va boshqa shaxslar bilan uchrashish tartibi va shartlari. Mahkumlarning telefon orqali so‘zlashuvi va yozishmalari. Mahkumlarning posilkalar, yo‘qlovlar, banderollar va pul jo‘natmalari olishi va yuborishi. Mahkumlarning adabiyot va yozuv ashyolarini sotib olishlari tartibi. Mahkumlarning kinofilmlar va teleko‘rsatuvlar ko‘rishi, radio eshitish tartibi. Mahkumlarning alohida hollarda muassasa doirasidan chetga chiqishi. Mahkumlarning belgilangan muddatda joyiga qaytishdan bo‘yin tovlaganlik oqibatlari. Respublikamiz o‘z mustaqilligini qo‘lga qiritgach, jamiyat hayotining barcha sohasi tubdan isloh etilib, demokratik huquqiy davlat, fuqarolik jamiyati qurish yo‘lida ilk sa’yi harakatlar boshlandi. Shu asnoda sud-huquq sohasida olib borilgan islohotlar, liberallashtirish siyosati ayniqsa e’tiborga molik bo‘lgan ijobiy holat sifatida baholanmoqda. Sud-huquq sohasidagi islohotlarni yanada chuqurlashtirish, bu boradagi qonunchilikni liberallashtirish o‘z navbatida jinoyat ijroiya qonunchiligiga qator o‘zgartirishlar kiritilishiga sabab bo‘ldi. Mustaqillik davrida qonun hujjatini demokratiya talablariga moslash yo‘lida erishilgan yutuqlar talaygina. Bu borada Respublikamizda erishilgan yutuqlar haqida Prezidentimiz I. A. Karimov O‘zbekiston Respublikasi Oliy majlisi Qonunchilik palatasi va Senatining qo‘shma majlisidagi 2005 yil 28

yanvardagi ma’ruzalarida ham alohida to‘xtalib o‘tganlar. Xususan, ushbu ma’ruzada Prezidentimiz jinoyat ijroiya sohasiga taalluqli quyidagi fikrlarni bildirganlar. “Jinoyat-ijroiya kodeksiga kiritilgan o‘zgartirishlar jazoni o‘tash sharoitlarini ancha yaxshilash, mahkumlarga muddatdan ilgari ozod bo‘lish huquqini beradigan moddalarni ko‘paytirish, jazoni o‘tash joylarida yashash tartibi va sharoitini sezilarli darajada yengillashtirish imkonini yaratadi. Natijada jazoni manzil koloniyalarda o‘tayotgan shaxslarning ulushi qamoqda saqlanayotganlar soniga nisbatan ancha ko‘paydi. YA’ni 1990 yilda manzil- koloniyalarda jazoni o‘tayotgan shaxslar mahbuslarning umumiy soniga nisbatan 7 foiz bo‘lgan bo‘lsa, bugungi kunda bu raqam 21 foizni tashkil etmoqdi. Hozirgi vaqtda O‘zbekistonda har 100 ming aholiga nisbatan qamoqdagilar soni 158 kishini tashkil etadi. Ayni paytda ushbu ko‘rsatkich, masalan, AQShda-715, Rossiyada-584, Ukrainada-416, Qozog‘istonda-386, Qirg‘izistonda-390, Estoniyada-339 kishidan iborat”. Jazoni ijro etish muassasalarida rejim jazodan ko‘zlangan maqsadga erishish uchun belgilanadi.

Jazoni ijro etish muassasalarida rejim O‘zbekiston Respublikasi Ichki ishlar vazirligi tomonidan tasdiqlangan Ichki tartib qoidalar va boshqa normativ hujjatlar bilan tartibga solinadi. Ichki tartib qoidalari O‘zbekiston Respublikasi ichki ishlar vazirligining barcha jazoni ijro etish muassasalari uchun majburiy. JIKning 86-moddasiga ko‘ra Ozodlikdan mahrum etishga hukm etilgan shaxslar, jazoni manzil-koloniyalarda o‘tayotgan shaxslar bundan mustasno respublika budjeti hisobidan belgilangan namunada kiyim, mavsumga qarab, mahkumning jinsi va iqlim sharoitlarini inobatga olgan holda ichki kiyim va poyabzal bilan ta’minlanadilar. Jazoni ijro etish muaasasalarida, manzil koloniyalarini istisno etganda, mahkumlar belgilangan namunadagi kiyimlar kiyadilar. Kiyimning ko‘rinishi O‘zbekiston Respublikasi Ichki ishlar vazirligi tomonidan belgilanadi. Ichki tartib qoidalarda nazarda tutilgan hollarda mahkumlarga fuqarolik namunasidagi kiyimdan foydalanishga ruxsat etiladi. Ozodlikdan mahrum etishga hukm qilingan shaxslarni batamom ajratib qo‘yish va qo‘riqlash, shuningdek ular saqlnadigan va mehnat qiladigan REJIM QUYIDAGILARNI TA’MINLASH MAQSADIDA QO‘LLANADI mahkumlarni batamom ajratib qo‘yish, ularni qo‘riqlash va nazorat qilib turishni; mahkumlarning huquqlari va qonuniy manfaatlarini ro‘yobga chiqarish, shuningdek ularning o‘z majburiyatlarini ado etishini; muayyan toifadagi mahkumlarni alohida- alohida saqlashni muassasa turiga qarab mahkumlarni har xil sharoitda saqlashni mahkumlarning va muassasa xodimlarining xavfsizligini;

obyektlarni qo‘riqlash O‘zbekiston Respublikasi Ichki ishlar vazirligi tomonidan qonun hujjatlarida belgilangan tartibda amalga oshiriladi. Bunda har bir muassasada qat’iy belgilab qo‘yilgan kun tartibi tuziladi, bu kun tartibi mahkumlarning u yoki bu kontingenti bilan olib boriladigan ishlarning xususiyatiga, tezkor vaziyat holatiga, ishlab chiqarish sharoitiga, yilning fasliga, mahalliy sharoitlar hamda boshqa aniq holatlarga bog‘liq bo‘ladi. Mahkumlar tomonidan kun tartibini bajarishni ta’minlash uchun muassasa boshlig‘ining burug‘i bilan signal va buyruq berish tizimi joriy etiladi. Muassasalarda har kuni ikki marotaba mahkumlarni bor-yo‘qligini umumiy tekshiruvi o‘tkaziladi. Ozodlikdan mahrum etish joylaridan qochish va boshqa jinoyatlarning, jazoni o‘tashning belgilangan tartibini buzishlarning oldini olish, mahkumlar xulq-atvori to‘g‘risida zarur axborot olish uchun jazoni ijro etish muassasalarida nazorat va tekshirishning audiovizual, elektron va boshqa texnikaviyvositalaridan foydalaniladi. Muassasa ma’muriyati mahkumlarni nazorat va tekshirishning texnikaviy vositalari qo‘llanilayotganligidan xabardor etishi shart. Nazorat va tekshirishning texnikaviy vositalari ro‘yxati, ulardan foydalanish tartibi O‘zbekiston Respublikasi Ichki ishlar vazirligi tomonidan belgilanadi. Ozodlikdan mahrum etishga hukm qilingan shaxslarga o‘z yonida saqlashga ruxsat etilgan narsalar va buyumlar ro‘yxati O‘zbekiston Respublikasi Ichki ishlar vazirligi tomonidan belgilanadi. Mahkumlar yonidan topilgan, foydalanishga ruxsat etilmagan narsalar va buyumlar muassasa boshlig‘i qaroriga binoan olib qo‘yiladi hamda mahkum ozod bo‘lgunga qadar saqlash uchun topshiriladi yoki yo‘q qilib tashlanadi yohud davlat foydasiga o‘tkaziladi va bu haqda tegishli hujjat tuziladi. Narsalar va buyumlarni davlat foydasiga o‘tkazish to‘g‘risidagi qaror prokuror tomonidan tasdiqlanadi. Olib qo‘yilgan pullar va qimmatli ashyolar ularni olib qo‘ygan mansabdor shaxsning dalolatnomasi yoki raporti bo‘yicha uzog‘i bilan bir sutkalik muddat ichida muassasa boshlig‘ining navbatchi yordamchisi

tomonidan kassaga yoki buxgalteriyaga topshiriladi. Ularning hisobini yuritish mahkumlardan olib qo‘yilgan pullar va qimmatliklar daftarida qayd etiladi, daftar muassasaning navbatchilik xizmati tomonidan yuritiladi. Nazorat xizmatini o‘tash samaradorligi ustidan nazorat qilish maqsadida bunday daftarlar kontrolerlar harbiy naryadlari boshliqlari tomonidan ham yuritiladi. Jazoni ijro etish muassasalarida foydalanish man etilmagan, lekin mahkumlarning yonida belgilangan tur va miqdordagidan ortiqcha narsa va ashyolar olib qo‘yiladi hamda saqlash uchun omborga topshirilib, bu xususda tegishli dalolatnoma tuziladi. Agar omborda saqlanayotgan narsalar yoki ashyolar mahkumga kerak bo‘lib qolsa va ular belgilangan tur va miqdordagidan ortiqcha bo‘lmasa, ular berilgan ariza asosida egalariga topshiriladi. Mahkumlar saqlashi man etilgan, ulardan olib qo‘yilgan, ammo qimmatli narsa va ashyolar jumlasiga kirmaydigan narsa va ashyolar (spirtli ichimliklar va h.k.), shuningdek, noqonuniy yo‘l bilan olingan oziq-ovqat mahsulotlari mahkumlarning hozirligida yo‘q qilib tashalanadi yoki omborxonaga topshirilib, bu xususda dalolatnoma topshiriladi. Mahkumlarning yonidan saqlash man etilgan narsa va ashyolar, shuningdek noqonuniy yo‘l bilan olingan oziq-ovqat mahsulotlari topilganligi va olib qo‘yilganligi hollari yuzasidan xizmat tekshiruvi o‘tkazilib, ularning natijalari asosida aybdor shaxslarga nisbatan intizomiy ta’sir choralari ko‘riladi. Ozodlikdan mahrum etishga hukm qilingan shaxslar, ularning buyumlari va kiyimlari, shuningdek jazoni ijro etish muassasalarining obyektlari va xonalari tintuv qilinishi hamda ko‘zdan kechirilishi mumkin. Shaxsiy tintuv mahkum bilan bir jinsda bo‘lgan shaxslar tomonidan amalga oshiriladi. Turar joy binolarini ularda mahkumlar bo‘lgan chog‘da tintuv qilishga kechiktirib bo‘lmaydigan hollardagina yo‘l qo‘yiladi. Jazoni ijro etish muassasasi ma’muriyati ushbu muassasaga hamda mahkumlar ishlayotgan obyektlarga kirayotgan va chiqayotgan shaxslarning

transport vositalarini, buyumlari va kiyimini ko‘zdan kechirishga haqli, qonun hujjatlarida nazarda tutilgan hollar bundan mustasno. Tintuv qilish va ko‘zdan kechirish tartibi O‘zbekiston Respublikasi Ichki ishlar vazirligi tomonidan belgilanadi. Jazoni ijro etish muassasalarida tezkor-qidiruv faoliyati: 1. mahkumlar, muassasa xodimlari va boshqa shaxslar xavfsizligini ta’minlash; 2. mahkumlar mazkur muassasaga yetib kelgunga qadar sodir etgan jinoyatlarni aniqlash va fosh etish; jinoyatlarni hamda belgilangan saqlash rejimini buzish hollarini aniqlash va ularning oldini olish; 3. jazoni ijro etish muassasalarida sodir etilgan jinoyatlarni fosh etish; ozodlikdan mahrum etish joylaridan qochgan mahkumlarni qidirish; 4. boshqa jinoyatlarni fosh etishda yordam berish maqsadida amalga oshiriladi. Tezkor-qidiruv faoliyatini jazoni ijro etish muassasalarining tezkor xizmatlar xodimlari, shuningdek boshqa vakolatli organlar qonun hujjatlarida belgilangan tartibda amalga oshiradilar. Ozodlikdan mahrum etishga hukm qilingan shaxslar tomonidan sodir etilayotgan jinoyatlar va huquqbuzarliklarni to‘xtatib qolish maqsadida, shuningdek ularni ushlash chog‘ida, agar boshqa usullar bilan muassasa ma’muriyatining qonuniy talablarini ta’minlashning iloji bo‘lmasa, mahkumlarga nisbatan jismoniy kuch ishlatilishi mumkin. Jismoniy kuch ishlatish natijasida mahkumlar hayoti va sog‘lig‘iga zarar yetkazilgan har bir hodisa haqida prokurorga xabar qilinadi. Mahkumlarga nisbatan, agar ular jazavaga tushsalar, tinchlantirish ko‘ylagini qo‘llashga yo‘l qo‘yiladi. Tinchlantirish ko‘ylagi tibbiy xodim ishtirokida qo‘llaniladi hamda uni qo‘llash muddati ikki soatdan oshmasligi kerak. Tinchlantirish ko‘ylagi voyaga yetmagan mahkumlarga va mahkuma ayollarga nisbatan qo‘llanilmaydi. Tinchlantirish ko‘ylagi batamom ajaritb qo‘yilgan joyda (intizomiy bo‘linmada yoki kontolerning xonasida) faqat

muassasa boshlig‘i yoki uning o‘rnini bosuvchi shaxs ko‘rsatmasi asosida, tibbiyot xodimining ruxsati bilan va uning kuzatuvi ostida qo‘llaniladi. Tibbiyot xodimi tibbiy ko‘rsatmalariga asosan tinchlantirish ko‘ylagi qo‘llab bo‘lmasligi yoki bunday qo‘ylakni qo‘llashni qo‘llashni to‘xtatish to‘g‘risidagi talabi darhol bajarilishi kerak. Tinchlantirish ko‘ylagi qo‘llanilgan har bir hodisa haqida dalolatnoma tuziladi, dalolatnoma muassasa boshlig‘i yoki uning o‘rnini bosuvchi shaxs tomonidan tasdiqlanadi. Mahkumlarning g‘ayrihuquqiy xatti-harakatlarini to‘xtatish, shuningdek o‘ziga o‘zi zarar yetkazishining oldini olish maqsadida ularga nisbatan maxsus vositalar ishlatilishi mumkin. Boshqa usullar bilan muassasa ma’muriyati vakillarining qonuniy talablari mahkumlar tomonidan bajarilishini ta’minlashning iloji bo‘lmagan hollardagina jismoniy kuch va maxsus vositalar ishlatiladi. Maxsus vositalar jumlasiga rezina tayoqlar, qo‘lkishanlar yoki boshqacha bog‘lash vositalari, xizmat itlari, ko‘zdan yosh chiqaruvchi moddalar, chalg‘itma ta’sir ko‘rsatuvchi nur-tovush moslamalari, to‘siq- g‘ovlarni bartaraf etuvchi vositalar, suv bilan zarba beruvchi va zirhli mashinalar, inshootlarni ochish, transportni majburiy to‘xtatish moslamalari hamda qonunda nazarda tutilgan boshqa vositalar kiradi. Maxsus vositalar quyidagi hollarda qo‘llaniladi: 1. mahkumlarning muassasa ma’muriyati vakillariga, boshqa mahkumlarga va o‘zga shaxslarga hujumini daf etish chog‘ida; mahkumlar tomonidan sodir etilgan ommaviy tartibsizliklarni, jamoat tartibini guruh bo‘lib buzishlarni to‘xtatish, muassasa ma’muriyatiga ashaddiy bo‘ysunmayotgan yoki qarshilik ko‘rsatayotgan huquqbuzarlarni ushlash chog‘ida; 2. garovga olinganlarni, mahkumlar egallab olgan binolarni, inshootlarni, xonalarni va transport vositalarini ozod qilish chog‘ida; 3. mahkumlarni qo‘riqlab borish va qo‘riqlab turish chog‘ida - qochishning oldini olish uchun;

4. jazoni ijro etish muassasasidan qochgan mahkumlarni ushlash chog‘ida. 5. Maxsus vositalar qonunda nazarda tutilgan boshqa hollarda ham qo‘llanilishi mumkin. Maxsus vositalar turlari, ularni ishlatish intensivligi yuzaga kelgan vaziyat, huquqbuzarlik xususiyati va huquqbuzarning shaxsini inobatga olgan holda belgilanadi. Maxsus vositalarni qo‘llash mahkumlarga va boshqa shaxslarga mumkin qadar kam zarar keltirishi lozim. Homiladorlik belgilari sezilib turgan ayollarga, nogironlik belgilari aniq ko‘rinib turgan shaxslarga hamda yoshi aniq ko‘rinib turgan yoki ma’lum bo‘lgan voyaga yetmagan shaxslarga nisbatan maxsus vositalar ishlatish taqiqlanadi, ular tomonidan qurolli qarshilik ko‘rsatilgan yoki fuqarolar hayoti va sog‘lig‘iga tahdid etib, guruh bo‘lib hujum qilingan hollar bundan mustasno. Maxsus vositalarni qo‘llash natijasida mahkumlar va boshqa shaxslar hayoti va sog‘lig‘iga zarar yetkazilgan har bir hodisa haqida prokurorga xabar qilinadi. Alohida hollarda, agar jinoyatni boshqa vositalar bilan to‘xtatishning iloji bo‘lmasa, eng so‘nggi chora sifatida o‘qotar qurol qo‘llashga yo‘l qo‘yiladi. O‘qotar qurol quyidagi hollarda qo‘llanilishi mumkin: 1. muassasa ma’muriyati vakillarini, boshqa mahkumlarni va o‘zga shaxslarni ularning hayoti va sog‘lig‘iga aniq tahdid etuvchi hujumdan himoya qilish, shuningdek qurolni qo‘lga kiritish maqsadida qilingan hujumni daf etish chog‘ida; 2. garovga olinganlarni, mahkumlar egallab olgan binolarni, inshootlarni, xonalarni va transport vositalarini ozod qilish chog‘ida; 3. jazoni ijro etish muassasasining qo‘riqlanadigan obyektlariga, transport vositalariga guruh bo‘lib qilingan yoki qurolli hujumni daf etish yoxud mahkumlarni zo‘rlik bilan ozod qilishga urinishlarni to‘xtatish chog‘ida;

4. ozodlikdan mahrum etish joylaridan qochayotgan yoki qurolli qarshilik ko‘rsatayotgan mahkumni ushlash chog‘ida; 5. mahkumlar qochishda foydalanayotgan transport vositasini to‘xtatish chog‘ida. O‘qotar qurol qonunda nazarda tutilgan boshqa hollarda ham qo‘llanilishi mumkin. O‘qotar qurolni qo‘llashdan oldin qurol qo‘llanilishi mumkinligi haqida ogohlantirish va yuqoriga qarab ogohlantiruvchi o‘q otish kerak. Quyidagi hollarda o‘qotar qurol ogohlantirishsiz qo‘llanilishi mumkin:  qo‘qqisdan hujum qilinganda;  qurolli hujumni yoki jangovar texnika, transport vositalari, uchish apparatlari, dengiz va daryo kemalaridan foydalangan holda qilingan hujumni daf etishda;  garovga olinganlarni ozod qilishda;  ozodlikdan mahrum etish joylaridan qurol bilan, transport vositalari yordamida yoki yurib ketayotgan transport vositalarida;  tunda yoki ko‘rish cheklangan sharoitda qochilganda. O‘qotar qurol qo‘llanilganda fuqarolar xavfsizligini ta’minlash, shuningdek jabrlanganlarga tibbiy yordam ko‘rsatish uchun iloji boricha barcha choralar ko‘rilishi zarur. O‘qotar qurol qo‘llanilgan har bir hodisa haqida raport tuziladi va darhol prokurorga xabar qilinadi. Tabiiy ofat ro‘y bergan, jazoni ijro etish muassasasi joylashgan yerda favqulodda yoki harbiy holat joriy etilgan taqdirda, urush davri mobaynida, mahkumlar tomonidan guruh bo‘lib bo‘ysunmaslik, shuningdek ommaviy tartibsizlik sodir etilganda muassasalarda alohida holat joriy etilishi mumkin. Alohida holat O‘zbekiston Respublikasi Ichki ishlar vaziri tomonidan O‘zbekiston Respublikasi Bosh prokurori bilan kelishilgan holda o‘ttiz sutkagacha bo‘lgan muddatga joriy etiladi. Alohida holatning amal qilish vaqti

alohida hollarda qo‘shimcha ravishda yana o‘ttiz sutkagacha uzaytirilishi mumkin. Alohida holat amal qilib turgan davrda muassasalarda qo‘riqlash va nazoratning kuchaytirilgan turi, obyektlarga kirishning alohida tartibi joriy etiladi, kun tartibi o‘zgartirilishi, ayrim xizmatlarning faoliyati cheklanishi mumkin. Ayni vaqtda mahkumlarning ayrim huquqlari cheklanishiga yo‘l qo‘yiladi. Ozodlikdan mahrum etishga hukm qilingan shaxslar o‘z shaxsiy hisobvarag‘idagi pul hisobidan oziq-ovqat mahsulotlari va eng zarur narsalarni pul o‘tkazish yo‘li bilan sotib olishlari mumkin. Sarflashga ruxsat etiladigan pul miqdori jazoni ijro etish muassasasining tartib turiga hamda mahkum saqlanayotgan sharoitga qarab belgilanadi. Mahkumlar yengillashtirilgan saqlash sharoitiga o‘tkazilganda, mehnat normasi va mehnat vazifalarini bajarganda, shuningdek bayram kunlari rag‘batlantirish tarzida, mahkumlarga eng kam ish haqi belgilangan miqdorining o‘n foizigacha bo‘lgan miqdorda qo‘shimcha pul sarflashga ruxsat etiladi. Bir oy davomida sarflashga ruxsat etilgan pulning umumiy summasi quyidagi miqdorlardan oshmasligi lozim: 1) umumiy tartibli koloniyalarda – belgilangan eng kam ish haqi miqdorining uch baravaridan; 2) qattiq tartibli koloniyalarda – belgilangan eng kam ish haqi miqdorining ikki yarim baravaridan; 3) maxsus tartibli koloniyalarda – belgilangan eng kam ish haqi miqdorining ikki baravaridan; 4) turmalarda – belgilangan eng kam ish haqi miqdorining bir yarim baravaridan; 5) tarbiya koloniyalarida, ixtisoslashtirilgan davolash muassasalarida, shuningdek mahkum birinchi va ikkinchi guruh nogironlari, homilador ayollar

va jazoni ijro etish muassasasidagi bolalar uyida bolalari bo‘lgan ayollar uchun – belgilangan eng kam ish haqi miqdorining uch yarim baravaridan. Muassasa boshlig‘i yangi kelgan mahkumga oziq-ovqat mahsulotlari va eng zarur narsalar sotib olish uchun belgilangan eng kam ish haqi miqdorining ellik foizigacha, manzil-koloniyalarda esa - to‘liq miqdorigacha bo‘lgan summada avans berishga haqli. Ozodlikdan mahrum etishga hukm qilingan shaxslarga qisqa muddatli va uzoq muddatli uchrashuv huquqi beriladi. Mahkumlarga qarindoshlari yoki boshqa shaxslar bilan muddati to‘rt soatgacha bo‘lgan qisqa muddatli uchrashuvga ruxsat beriladi. Qisqa muddatli uchrashuvlar muassasa ma’muriyatining vakillari nazorati ostida o‘tadi. Boshqa shaxslar bilan uchrashuvlar, jazoni ijro etish muassasasi ma’muriyatining fikricha, mahkumga salbiy ta’sir ko‘rsata olmaydigan hollardagina beriladi. Mahkumlarga yaqin qarindoshlari (er, xotin, ota-onalar, bolalar, o‘g‘il (qiz) qilib olgan shaxslar, o‘g‘il (qiz) qilib olingan shaxslar, aka-ukalar, opa- singillar, buvalar, buvilar, nevaralar) bilan uzoq muddatli uchrashuv muassasa hududida yoki, Jinoyat-ijroiya kodeksining 114 va 130-moddalarida nazarda tutilgan hollarda, muassasa hududidan tashqarida ular bilan birga yashash huquqi bilan beriladi. Uzoq muddatli uchrashuv muddati quyidagicha belgilanadi:  muassasa hududida - bir sutkadan uch sutkagacha,  muassasa hududidan tashqarida esa - uch sutkadan besh sutkagacha. Qisqa muddatli va uzoq muddatli uchrashuv miqdori jazoni ijro etish muassasasining tartib turiga hamda mahkum saqlanayotgan sharoitga qarab belgilanadi. Yuqumli kasalliklarga chalingan bemorlarga uchrashuvlar shifokor ruxsati asosida beriladi. Uchrashuv uchun berilgan vaqt mobaynida mahkumlar ishdan ozod etib qo‘yiladi, ana shu kunlar uchun ularga ish haqi yozilmaydi.

Uzoq muddatli uchrashuv mahkumning iltimosiga ko‘ra qisqa muddatli uchrashuv yoki telefon orqali so‘zlashuv bilan, qisqa muddatli uchrashuv esa telefon orqali so‘zlashuv bilan almashtirilishi mumkin. Qisqa muddatli yoki uzoq muddatli uchrashuv berish rad etilgan taqdirda mahkumning yoki u bilan uchrashish istagini bildirgan shaxsning arizasiga rad etish sabablari ko‘rsatilgan holda tegishli yozuv yozib qo‘yiladi.Uchrashuvlarni o‘tkazish tartibi O‘zbekiston Respublikasi Ichki ishlar vazirligi tomonidan belgilanadi. O‘zbekiston Respublikasi Ichki ishlar vazirligining 2001 yil 8 maydagi 118-sonli buyrug‘iga ilovaning 40§ ida uchrashuvlarga ruxsat berish va ularni o‘tkazish tartibi bayon etilgan. Unga ko‘ra mahkumlarga uchrashuvlar muassasa boshlig‘ining tarbiyaviy ishlar bo‘yicha o‘rinbosari tomonidan tasdiqlangan har oylik jadvalga muvofiq beriladi. Muassasa bo‘yicha uchrashuvlar o‘tkazish jadvali har bir otryad bo‘yicha turkumlar boshliqlari tomonidan tuziladigan uchrashuvlar jadvallari asosida ishlab chiqiladi. Uchrashuvga ruxsat jazon ijro etish muassining boshlig‘i yoki tarbiyaviy ishla bo‘yicha o‘rinbosari tomonidan beriladi. Mahkum bilan uchrashuvga kelgan shaxs uchrashuvga ruxsat olish uchun muassasa nomiga ariza beradi. Arizaning namunasi uchrashuvga kelgan qarindoshlarga mo‘ljallangan kutish xonasisha osib qo‘yiladi. Uchrashuvga kelgan fuqarolarning shaxsini, shuningdek ularning mahkumlar bilan qarindoshlik aloqasini tasdiqlovchi xujjatlar pasport, shaxsiy guvohnoma, tug‘ilgandik to‘g‘risidagi guvohnoma (voyaga yetmaganlar uchun), nikoh to‘g‘risidagi guvohnomadir. Uchrashuvga kelgan shaxslar muassasa boshlig‘i yoki uning tarbiyaviy ishlar bo‘yicha o‘rinbosari tomondan qabul qilinadi. Mazkur shaxslar uchrashuv vaqtida xulq-atvor qoidalari to‘g‘risida, nolegal yo‘qlovlar berganlik uchun javobgarlik va buning oqibatlari xususida, shu jumladan belgilangan qoidalar buzilgan taqdirda uchrashuv darhol to‘xtatib qo‘yilishi haqida ogohlantiriladilar. Zarurat bo‘lganda qarindosh bilan suhbatlashuvga turkum

boshliqlari jalb etiladi, ular mahkumlarning xulq-atvori to‘g‘risida axborot berib o‘tadilar. Uchrashuvga kelgan shaxslar pul, qimmatbaho buyumlar, shuningdek jazoni ijro etish muassasalarida foydalanish man etilgan narsalarn uchrashuvlar o‘tkazish bo‘yicha tekshiruvchiga saqlash uchun topshirib, undan tilxat oladilar, pul, buyum va narsalar maxsus daftarga qayd etiladi. Uchrashuvga kelgan shaxs jazoni ijro etish muassasasida saqlash man etilgan narsa yoki buyumlarni mahkumga berish yoki mahkumdan yashirin tarzda qandaydir materiallarni olish niyatida deb, mo‘ljallash uchun yetralicha asoslar mavjud bo‘lgan taqdirda, jazoni ijro etish muassasasi boshlig‘i, yoki uning tarbiyaviy ishlar bo‘yicha o‘rinbosari bunday shaxsga uchrashuvga ruxsat uning byuumlari, usti boshi uchrashuvdan oldin va keyin ko‘zdan kechirilishiga rozi bo‘lgan taqdirdagina berilajagini ma’lum qiladi. Agar uchrashuvga kelgan shaxs buyumlari va ust boshi ko‘zdan kechirilishidan bosh tortsa, unga mahkum bilan uchrashuvga ruxsat etilmaydi. Uchrashuv berish rad etilganligi sabablari xususida mahkum xabardor etiladi. Ko‘zdan kechirishda yashirib qo‘yilgan, ta’qiqlangan narsalar va bunday narsalarni mahkumlarga berishga uringan shaxslar aniqlangan taqdirda, muassasa ma’muriyati ma’muriy yoki jinoiy javobgarlik to‘o‘risidagi amaldagi qonun hujjatlariga muvofiq ish tutadi. Mahkumga ikkitadan ko‘p bo‘lmagan katta yoshli shaxslar bilan uchrashuvga ruxsat etiladi, mahkumning voyaga yetmagan farzandlari ular bilan birga bo‘lishi mumkin. Uchrashuvlarning muddati jazoni ijro etish muassasasining ma’muriyati tomonidan belgilanadi. Barcha hollarda qisqa muddatli uchrashuvlar muddati 2 soatdan kam, uzoq muddatli uchrashuvlarning muddati esa 1 sutkadan kam, agar uchrashuv berilayotgan shaxsning o‘zi bundan qisqaroq muddat so‘rab turib olmasa, belgilanishi mumkin emas. Uchrashuvga mahkumlar orasta ko‘rinishda kelishlari lozim. Uzoq muddatli uchrashuvlar vaqtida ularga uchrashuvga kelgan shaxslar keltirgan

fuqarolar kiyadigan kiyim kiyib yurishga ruxsat beriladi, uchrashuv tugagandan keyin bu kiyimlarni ularni olib kelgan shaxslarning o‘zi qaytarib olib ketadilar. Mahkumlar uchrashuvdan oldin va keyin to‘liq tintuv qilinadi. Ularga uzoq muddatli uchrashuvlar o‘tkaziladigan xonaga o‘zlari bilan yuvinish, taranishda ishlatiladigan va chekish uchun zarur bo‘lgan narsalarni olib kirish imkoni beriladi. Uzoq muddatli uchrashuv xonalariga oziq-ovqat mahsulotlarini (vino, aroq mahsulotlari va pivo bundan mustasno), uchrashuv kunlarini hisobga olgan holda, shuningdek, mahkumlarga yonlarida saqlash man etilmagan narsalar, buyumlar va ashyolarni (toza qog‘oz va yozuv ashyolari bundan mustasno) olib kirish mumkin. Mahumlarga uzoq muddatli uchrashuv joylaridan uchrashuv tugaganidan keyin qolgan oziq-ovqat mahsulotlari va ashyolarni yonlarida saqlashga ruxsat etilgan miqdorda va turda olib chiqishga ruxsat etiladi. Uchrashuvlar vaqtida mahkumlarga biron bir hujjat, yozuv, chizma va hokazolarni berish yoki ulardan shunday narsalarni olishga, shuningdek, mahkumlar bilan qisqa muddatli uchrashuvga kelgan shaxslarning biron bir oziq-ovqat mahsuloti yoki ashyolarni olib kirishiga yo‘l qo‘yilmaydi. Qisqa muddatli uchrashuvlarda suhbat so‘zlashuv uchrashuvga kelgan shaxslar tanlagan tilda olib boriladi. Agar jazoni ijro etish muassasasi xodimlaridan yoki qorovul qo‘shinlari bo‘linmalari harbiy xizmatchilaridan birontasi ham so‘zlashuv olib borilayotgan tilni bilmasa, u holda suhbat mazmunini nazorat qilish uchun tarjimon yoki bu tilni biladigan boshqa shaxs (mahkumlar bundan mustasno) taklif etilishi mumkin. Uchrashuvni o‘tkazishning belgilangan tartibi buzilgan taqdirda uchrashuv shu zahoti to‘xtatiladi, bu xususda kontroler uchrashuvga ruxsat etgan shaxsga, uning yo‘qligida esa koloniya (turma) boshlig‘ining navbatchi yordamchisiga axborot beradi, ular uchrashuvni davom ettirish yokim tugatish to‘g‘risida uzil-kesil qaror qabul qiladilar.

Mahkumlar bilan uchrashuvga kelgan shaxslarn joylashtirish uchun jazon ijro etish muassasalari huzurida mehmonxona tipida qurilgan maxsus uylar barpo etiladi. Bu joylardan shuningdek, uzoq muddatli uchrashuvlar xonalaridan foydalanganlik uchun uchrashuvga kelgan shaxslardan yoki mahkumlardan mehmonxonalar uchun belgilangan tegishli tariflar stavkalari bo‘yicha haq olinadi. Uchrashuvlar xonasi ro‘yxatga muvofiq uskuna va inventar bilan jihozlanadi. Muassasa hududi doirasidan tashqaridagi uchrashuvlar qonun hujjatlarida belgilangan hollarda beriladi. shu maqsadda muassasa joylashgan yerda, uning qo‘riqlanadigan hududi chegarasidan tashqarida maxsus joylar jihozlanadi. Bunday uchrashuvlarni o‘tkazish uchun keluvchilarga mo‘ljallangan uylardan ham foydalanish mumkin. Ozodlikdan mahrum etishga hukm qilingan shaxslarga texnikaviy imkoniyatlar mavjud bo‘lgan taqdirda telefon orqali so‘zlashuv huquqi beriladi, bunday so‘zlashuvlar muassasa ma’muriyati nazorati ostida o‘tkaziladi va ularning haqi O‘zbekiston Pochta va telokommunikatsiyalar agentligi tomonidan belgilangan tarif asosida mahkumning shaxsiy hisobvarag‘idagi mablag‘ hisobidan to‘lanadi. Telefon orqali so‘zlashuvlar miqdori jazoni ijro etish muassasasining tartib turiga hamda mahkum saqlanayotgan sharoitga qarab belgilanadi. Mahkumning iltimosiga ko‘ra, mahkum jazoni ijro etish muassasasiga yetib kelganidan keyin, shuningdek alohida hollarda unga qo‘shimcha ravishda telefon orqali so‘zlashuvga ruxsat etilishi mumkin. Intizomiy bo‘linmalarda saqlanayotgan mahkumlarga faqat alohida hollarda telefon orqali so‘zlashuvga ruxsat etilishi mumkin. Mahkumlarga qarindoshlari hamda boshqa shaxslar bilan telefon orqali so‘zlashuvga ruxsat etiladi. Ozodlikdan mahrum etish joylarida saqlanayotgan mahkumlarning telefon orqali o‘zaro so‘zlashuvlari taqiqlanadi. Mahkumlarga telefon orqali so‘zlashuvga ruxsat etish tartibi O‘zbekiston Respublikasi Ichki ishlar vazirligi tomonidan belgilanadi.

Telefon orqali so‘zlashuv chog‘ida muassasaning ichki tartib qoidalariga rioya etilishi lozim. Telefon orqali so‘zlashuvlarni muassasa ma’muriyatining ruxsatisiz va ma’muriyat nazoratisiz olib borish jazoni o‘tash tartibini qo‘pol buzish sifatida baholanadi. Telefon orqali so‘zlashuvlar odatda mahkum ishlamaydigan vaqtda beriladi. Uyali aloqa apparatlarida, kechqurungi yotish chog‘idan ertalab o‘rindan turishgacha bo‘lgan vaqtda telefon so‘zlashuv huquqini berish va shunday so‘zlashuvni amalga oshirish, telefon orqali ikkita yoki bir nechta so‘zlashuvlarni birlashtirish, ikkita yoki undan ortiq miqdordagi mahkumlar guruhining yoki mahkumlar guruhi nomidan telefon orqali so‘zlashuv, shuningdek, telefon orqali so‘zlashuv huquqini boshqa shaxsga berish ta’qiqlanadi. Mahkumlar telefon orqali so‘zlashuv berilishi iltimosi bayon etilgan arizani jadvalda( belgilangan muddatga kamida uch kun qolganda beriladi. Arizaga turma boshlig‘i, shuningdek, mahkumning shaxsiy hisobvarag‘ida mablag‘i borligini ko‘rsatgan holda buxgalteriya xodimi o‘z rizolik belgisini qo‘yadi. tasdiqlangan jadvaldan ko‘chirmalar har bir turkumda osib qo‘yiladi. Agar mahkum telefon orqali so‘zlashuv berilishi iltimosi bayon etilgan arizani vaqtida bermagan bo‘lsa yoki unga shaxsiy hisobvarag‘ida puli yo‘qligi boisidan so‘zlashuv rad etilgan bo‘lsa, uning telefon orqali mazkur so‘zlashuvni o‘tkazish huquqi yo‘qqa chiqadi. Mahkum telefon orqali so‘zlashuvga ruxsat olganda faqat bir abonent bilan bog‘lanish huquqiga ega. Mahkumlar agar abonent javob bermagan bo‘lsa, basharti boshqa abonent bilan ulanib qolingan bo‘lsa yoki so‘zlashuv texnikaviy sabablarga ko‘ra uzilib qolgan bo‘lsa, telefon orqali so‘zlashuv huquqini takroran olish huquqiga ega. Telefon orqali so‘zlashuv muddati IIV tomonidan tasdiqlangan qoidalarga muvofiq, 10 daqiqadan oshmasligi lozim. Telefon orqali so‘zlashuvlar odatda, davlat tilida yoki kontroler yohud muassasa ma’muriyatining boshqa vakili tushunadigan tilda olib borilishi lozim. Mahkumlar telefon orqali so‘zlashuvga muassasa boshlig‘ining

navbatchi yordamchisi tomonidan ovoz kuchaytirgich orqali, besh kishidan ko‘p bo‘lmagan guruh bilan chaqiriladi. Mahkumlarning telefon orqali so‘zlashuvlar hisobini yuritish “Mahkumlarning telefon orqali so‘zlashuvlarini qayd etish daftari” bo‘yicha kontroler yoki muassasa ma’muriyatining bunday so‘zlashuvlarni olib borish tartibi va qoidalariga rioya etilishi ustidan nazorat qiluvchi boshqa vakili tomonidan amalga oshiriladi. Telefon stansiyasidan telefon orqali so‘zlashganlik uchun hisob-kitob varag‘i olingach, so‘zlashuv muddati hamda telefon orqali so‘zlashganlik haqi uchun uning shaxsiy hisob-varag‘idan chiqarilgan pul miqdori mahkumning e’tiboriga yetkaziladi. Mahkum jazoni ijro etuvchi bir muassasadan ikkinchisiga o‘tkazilganda, navbatdagi telefon orqali so‘zlashuv mahkum bu huquqdan oxirgi marotaba qachon foydalanganligiga qarab belgilanadi. Ozodlikdan mahrum etishga hukm qilingan shaxslar jazoni ijro etish muassasasiga yetib kelgan kundan boshlab posilka, yo‘qlov va banderol olishlari hamda jo‘natishlari mumkin. Posilka, yo‘qlov va banderollar ko‘zdan kechiriladi. Bitta posilka yoki banderolning og‘irligi pochta qoidalarida belgilab qo‘yilgan normadan, yo‘qlovning og‘irligi esa posilkaning belgilangan vaznidan oshib ketishi mumkin emas. Olinadigan posilka, yo‘qlov va banderollarning miqdori jazoni ijro etish muassasasining tartib turiga hamda mahkum saqlanayotgan sharoitga qarab belgilanadi. Hukm qilingan homilador ayollarning va jazoni ijro etish muassasasidagi bolalar uyida bolalari bo‘lgan ayollarning, shuningdek vrach xulosasiga ko‘ra davolanish va kuchli taomga muhtoj deb e’tirof etilgan bemorlarning, birinchi yoki ikkinchi guruh nogironlarining tibbiy xulosada belgilanadigan miqdorda va xillarda qo‘shimcha posilkalar, yo‘qlovlar va banderollar olishiga ruxsat etiladi.

Mahkumlar cheklanmagan miqdorda pul jo‘natmalari olishlari va yuborishlari mumkin. Pul jo‘natmalari mahkumning shaxsiy hisobvarag‘iga kelib tushadi. Mahkumlar o‘zlariga yaqin qarindosh bo‘lmagan shaxslarga, shuningdek korxona, muassasa va tashkilotlarga faqat jazoni ijro etish muassasasi ma’muriyatining ruxsati bilan pul jo‘natmalari yuborishlari mumkin. Pul jo‘natmalari pochta orqali o‘tkaziladi yoki muassasas kassasiga kelib tushishi mumkin. Kelib tushgan barcha jo‘natmalar mahkumning shaxsiy hisob varag‘iga o‘tkazilib, bu xususda u xabardor qilinadi. pul jo‘natmalarini yuborish uchun mahkum jo‘natma miqdorini, oluvchining manzili, familyasi, ismi, otasining ismini ko‘rsatgan holda muassasa boshlig‘ining nomiga ariza beradi. Zarur hollarda, jo‘natma nima sababdan yuborilayotganligi tushuntiriladi. Mahkumning arizasi buxgalteriyaga yo‘llanadi, buxgalteriya aytilgan miqdorni belgilangan tartibda ko‘rsatilgan manzilga o‘tkazib, bu xususda ariza beruvchini xabardor etadi. Mahkumlarning posilkalar, yo‘qlovlar, banderollar va pul jo‘natmalarini olishi hamda yuborishi tartibi O‘zbekiston Respublikasi Ichki ishlar vazirligi tomonidan belgilanadi. Ozodlikdan mahrum etishga hukm qilingan shaxslar cheklanmagan miqdorda xat va telegrammalar olishlari hamda jo‘natishlari mumkin. Mahkumlarning xatlari va boshqa jo‘natmalari senzuradan o‘tkaziladi, jazoni manzil-koloniyalarda o‘tayotgan shaxslar bundan mustasno. Mahkumlarga xatlarni topshirish va ularning xatlarini ko‘rsatilgan manzilga jo‘natish muassasa ma’muriyati tomonidan xat kelib tushgan yoki jo‘natish uchun topshirilgan kundan boshlab uch kunlik muddat ichida amalga oshiriladi. Telegrammalar egalariga darhol topshiriladi va jo‘natiladi. Xatlar va boshqa jo‘natmalar olish hamda yuborish, shuningdek ularni senzuradan o‘tkazish tartibi O‘zbekiston Respublikasi Ichki ishlar vazirligi tomonidan belgilanadi. Mahkumlarning xatlarni yuborishi faqat jazoni ijro etish muassasasining ma’muriyati orqali amalga oshiriladi. Shu maqsadda koloniyalar hududida pochta qutilari quyilgan bo‘ladi, ularni shunga vakolat

berilgan mansabdor shaxslar har kuni ochib tekshirib turadilar. Turmalarda va umumiy tartibli, qattiq tartibli koloniyalarning karserlarida, maxsus tartibli koloniyalarning kamera tipidagi joylarida mahkumlar jo‘natish uchun xatlarni ma’muriyat vakillariga beradilar. Xatlar yelimlanmasdan (yopishtirilmagan holda) pochta qutilariga tashlanadi yoki ma’muriyat vakillariga beriladi. Maxfiy belgilar bilan yozilgan, ramziy narsalar ifodalangan, shifr yoki boshqa shartli belgilar qo‘llanilgan, shuningdek beadab, bahayo tusdagi, tahdid, o‘ch olish bilan po‘pisa qilingan yohud oshkor etish mumkin bo‘lmagan ma’lumotlarni aks ettiruvchi xatlar ko‘rsatilgan manzilga yuborilmaydi, bu xususda mahkumga ma’lum qilinib, xatlar yo‘q qilib tashlanadi. Ozodlikdan mahrum etish joylarida saqlanayotgan mahkumlar o‘rtasida yozishma olib borish man etiladi. Ozodlikdan mahrum etish joylarida saqlanayotgan mahkumlar o‘rtasida xat yozishmalari faqat o‘zaro qarindoshlar o‘rtasida va muassasa ma’muriyatining ruxsati bilan amalga oshirilishi mumkin. Prokuror nomiga yo‘llangan taklif, ariza va shikoyatlar ko‘zdan kechirilmaydi hamda bir sutkalik muddat ichida tegishliligi bo‘yicha jo‘natiladi. Jazoni umumiy, qattiq tartibli koloniyalar, tarbiya koloniyalari qabul bo‘linmalarining kameralarida, shuningdek maxsus tartibli koloniyalarning kameralarida o‘tayotgan ozodlikdan mahrum etilgan mahkumlar, agar ular ochiq havoda ishlayotgan bo‘lmasa, har kuni muddati ikki soatlik sayr qilish huquqiga ega. Sayr qilishning muddati jazoni ijro etish koloniyalarining, tergov hibsxonalari va turmalarning intizomiy bo‘linmalarida saqlanayotgan mahkumlar uchun Jinoyat-ijroiya kodeksining 109 va 127-moddalari bilan, jazoni turmalarda o‘tayotgan mahkumlar uchun esa 123-moddasi bilan belgilanadi.

Mahkumlarning sayr qilishi maxsus jihozlangan sayr qilish hovlilarida kunduzgi vaqtda o‘tkaziladi. Sayr qilish, mahkum jazoni ijro etish muassasalarining ichki tartib qoidalarini buzgan taqdirda, muddatidan ilgari tugatilishi mumkin. Mahkumlar posilka, yo‘qlov va banderollarda yozuv ashyolari, adabiyotlar olishlari, shuningdek ularni savdo shoxobchalari orqali sotib olishlari, cheklanmagan miqdorda gazeta va jurnallarga obuna bo‘lishlari mumkin. Mahkumlarga urushni, milliy va diniy adovatni, zo‘rlik va shafqatsizlikni targ‘ib qiluvchi nashrlarni, shuningdek behayo nashrlarni olish, sotib olish, saqlash va tarqatish taqiqlanadi. Mahkum savdo shoxobchalari orqali sotib olgan adabiyot u olishga haqli bo‘lgan posilka va banderollar soniga kirmaydi. Mahkum o‘z yonida ko‘pi bilan o‘n nusxa kitob va jurnal saqlashi mumkin. Mazkur miqdordan ortiqcha adabiyot mahkumning roziligi bilan saqlash uchun topshiriladi, foydalanish uchun kutubxonaga beriladi yoki uning qarindoshlari va boshqa shaxslarga jo‘natiladi. Ozodlikdan mahrum etishga hukm qilingan shaxslarga haftada kamida bir marta kinofilm namoyish etiladi, ular ishdan bo‘sh soatlarida, tungi dam olish vaqtidan tashqari, teleko‘rsatuvlar ko‘rish, radioeshittirishlar eshitish huquqiga ega. Kameralarda jazo o‘tayotgan mahkumlarga kinofilm va teleko‘rsatuvlar ko‘rishga ruxsat etilmaydi. Mahkumlarga alohida hollar (yaqin qarindoshining vafoti yoki hayoti uchun xavfli bo‘lgan og‘ir kasalligi, mahkumga yoki uning oilasiga jiddiy moddiy zarar yetkazgan voqea) munosabati bilan borish-kelish uchun ketadigan vaqtni (to‘rt sutkagacha) hisobga olmagan holda, yetti sutkagacha bo‘lgan muddatga jazoni ijro etish muassasasi doirasidan chetga chiqishga ruxsat etilishi mumkin. Mahkumlarga O‘zbekiston Respublikasi doirasida chetga chiqishga ruxsat etiladi.

Mahkumning chetga chiqishga ruxsat so‘rab yozgan arizasini muassasa ma’muriyati bir sutka ichida ko‘rib chiqadi. Bu haqda mahkumning shaxsi, xulq-atvori, tasdiqlovchi hujjatlar bor-yo‘qligidan kelib chiqib qaror qabul qilinadi. Chetga chiqishga beriladigan ruxsatnoma prokuror tomonidan tasdiqlanadi. Quyidagilarga: 1) o‘ta xavfli retsidivistlar; 2) umrbod ozodlikdan mahrum qilish avf etish tartibida ozodlikdan mahrum qilish jazosi bilan almashtirilgan shaxslar; 3) o‘ta og‘ir jinoyatlar uchun hukm qilingan shaxslar; majburiy davolanishdan o‘tayotgan va yuqumli kasallikka chalingan mahkumlarga chetga chiqishga ruxsat berilmaydi. Chetga chiqish vaqti jazoni o‘tash muddati hisobiga qo‘shiladi. Chetga chiqish bilan bog‘liq xarajatlar mahkum mablag‘lari hisobidan yoki boshqa shaxslar tomonidan to‘lanadi. Mahkumning belgilangan muddatda joyiga qaytib kelishini qiyinlashtiruvchi kutilmagan hollar yuz bergan taqdirda u borgan joydagi ichki ishlar organi boshlig‘ining qaroriga binoan qaytish muddati, jazoni ijro etish muassasasi ma’muriyatini albatta ogohlantirgan holda, besh sutkagacha uzaytirilishi mumkin. Mahkum belgilangan muddatda joyiga qaytishdan bo‘yin tovlagan taqdirda u ichki ishlar organi tomonidan ushlanadi va jazoni o‘tash joyiga jo‘natiladi. Mahkumlarning muassasa doirasidan chetga chiqish tartibi O‘zbekiston Respublikasi Ichki ishlar vazirligi tomonidan belgilanadi.

Foydalanilgan adabiyotlar 1. Jinoyat-ijroiya huquqi. Darslik. Mualliflar jamoasi. Mas’ul muharrir- yu.f.n., dots. B.J.Axrorov. –T.: O‘qituvchi, 2002. – 208b. 2. Jinoyat-ijroiya kodeksiga sharhlar. Rustamboyev M.H., Axrarov B.J. va boshqalar. Ma’sul muharrir: yu.f.d., prof. M.H.Rustamboyev. – T.: TDYUI, 2007. – 574 b. 3. Kommentariy k Ispravitelno-trudovomu kodeksu Respubliki Uzbekistan. –T.: Uzbekistan, 1997.- 345s. 4. Abduxaliqov M.A., Payzullayev Q., Abduqodirov Sh.Y. Jinoyat -ijroiya huquqi (albom sxemalar). –T.: TDYUI, 2005. – 142 b.

O'xshashlar

Jazoni ijro etish muassasalarida rejim

Jazoni ijro etish muassasalarida sodir etiladigan jinoyatlarning kriminologik tavsifi

Qo`shimcha jazolarni ijro etish. Koloniya va turmalarda jazoni o`tash

Mulkiy xususiyatga ega bo’lmagan nizolar bo’yicha ijro hujjatlarini ijro etish

Boshqa jinoiy-huquqiy ta’sir choralarini ijro etish