Yunon adabiyotining ibtidoiy davri - Adabiyot - Referatlar

Yunon adabiyotining ibtidoiy davri

Yuklangan vaqt:

11.09.2022

Ko'chirishlar soni:

0

Hajmi:

48.5 KB

Ko'chirib olish

Yunon adabiyotining ibtidoiy davri Reja : 1.Antik adabiyotning tarkibi, uning jo`g’rofiy o`rni va davrlari. 2. Yunoniston adabiyotining taraqqiyot bosqichlari. 3.Homer va Hesiod eposlari.. 4.Mil.av.gi VII – VI asrlar da Yunoniston lirikasi. 5.Antik adabiyotning tarixiy ahamiyati.

“Antik” so`zi lotincha “antiqus” so`zidan olingan bo`lib, “qadimgi” degan ma`noni bildiradi. Antik adabiyot atamasi butun jahon adabiyotining qadimgi davriga nisbatan emas, balki faqat Evropa adabiyotining qadimgi davriga nisbatangina ishlatiladi. Bu adabiyot ikki xalq tomonidan yaratilgan bo`lib, o`z tarkibiga ko`ra ham ikki shoxobchadan tashkil topgan: 1. Yunoniston adabiyoti; 2. Rim adabiyoti. Ulardan dastlabkisi Yunon tilida, keyingisi esa lotin tilida vujudga kelgan. Antik adabiyot urug’-jamoa va quldorlik ijtimoiy-iqtisodiy tuzumida yuzaga kelib, shakllandi va rivojlandi. Qadimgi Yunonlar Bolqon yarim orolining janubi, egey dengizining orollari hamda Kichik Osiyo qirg’oqlarini maskan tutgan edilar. Qadimgi rimliklar esa dastavval Rim tevaragi, shuningdek, O`rta Italiya (Latsium)dagi uncha katta bo`lmagan hududni egallagandilar.Keyinchalik esa butun Italiyani, O`rta Er dengizi mamlakatlarini, chunonchi, Yunonistonni, va nihoyat o`sha davrda ma`lum bo`lgan Evropaning barcha mamlakatlari hamda Old Osiyoning hamma davlatlarini o`zlariga qaram qilib oladilar. Yunon adabiyotining ilk yozma obidalari milod.av.gi VIII asrga, Rim adabiyotining ilk yozma obidalari esa milod.av.gi III asrga mansubdir. Milodiy V asrda Rim imperiyasining qulashi bilan Evropa tarixining qadimgi davri nihoya topadi. Yunoniston va Rim adabiyotining tugallanishi ham aynan mana shu davrga to`g’ri keladi. SHunday qilib, antik adabiyot juda katta davrni,ya`ni 1300 yilni qamrab oladi. Antik adabiyot quyidagi uch davrga bo`lib o`rganiladi: 1. Klassikagacha bo`lgan davr (eng qadimgi zamonlardan mil.av.gi VIII asrgacha); 2. Klassik davr (mil.av.gi VII asrdan IV asrgacha); 3. ellin – Rim davri (mil.av.gi III asrdan milodiy V asrgacha). Yunoniston va Rim adabiyoti ham ijtimoiy-tarixiy taraqqiyot bilan bog’liq tarzda o`z ichida bosqichlarga bo`linadi. Biz Rim adabiyotining bosqichlari haqida keyinchalik ma`lumot berishimiz sababli hozircha Yunoniston adabiyotining bosqichlari haqida to`xtalish bilan kifoyalanamiz. Bu adabiyot quyidagi bosqichlarga bo`linadi: 1. Ibtidoiy davr (eng qadimgi zamonlardan mil.av.gi VI asrgacha); 2. Attika davri (mil.av.gi V-IV asrlar); 3. ellinizm davri (mil.av.gi III-I asrlar); 4. Rim hukmronligi davri (milodiy I-V asrlar).

Ba`zi bir tadqiqotlarda Yunoniston adabiyotining genezisi haqida noto`g’ri fikrlar bildiriladi. CHunonchi, A.Alimuhammedovning “Antik adabiyot tarixi” darsligida: “... Yunon adabiyoti hech bir xalqning adabiyotiga suyanmasdan mustaqil ravishda paydo bo`lgan adabiyotdir” ,-degan qarash ilgari suriladi. Holbuki, Yunoniston madaniyati Krit-Miken madaniyati (mil.av.gi 2 – ming yillik) va u orqali hatto Misr va Mesopotamiya madaniyati (mil.av.gi 3 – ming yillik) bilan bog’langan hamda insoniyatning ungacha bo`lgan 2 ming yillik madaniy merosining vorisi sifatida maydonga chiqqan edi. Demak, Yunoniston adabiyoti katta adabiy tajriba negizida tarkib topdi. Boshqa xalqlarda bo`lgani kabi Yunonlarda ham adabiyot dastlab og’zaki shaklda rivojlandi. Yunon xalq badiiy ijodiyoti (fol’klori) janr nuqtai nazaridan juda boy va rang-barang bo`lib, ular orasida mif (asotir)lar alohida o`rin tutadi. CHunki, ular syujet va obrazlarning chindan ham butun bir xazinasi edi. Mif (asotir) larning majmui va ularni o`rganuvchi fanga nisbatan mifologiya atamasi qo`llaniladi. Mifologiya urug’-jamoa tuzumi sharoitida barcha xalqlarning eng asosiy ijtimoiy ong shakli hisoblanadi. Qadimgi Yunonlarning miflarida tabiat va jamiyat haqidagi xayoliy tasavvurlari obrazli ifodasini topgan. Bu insonlar o`zlari ustidan Olimp tog’ida istiqomat qiluvchi ma`budlar hukmronlik qiladi, deb bilganlar va ma`budlarning munosabatlarini ham o`zlari yashab turgan ijtimoiy- tarixiy sharoitga muvofiqlashtirib, urug’-jamoa tuzumi tamoyillari asosida tasavvur etganlar. Masalan, Zevsning bosh ma`bud sifatidagi roli, unga qon-qarindoshlik ipi bilan bog’langan boshqa ma`budlar Hera,Poseydon, Aid, Demetra, Afina, Afrodita, erot, Hefest, Ares, Apollon ,Artemida, Hermes, Dionis, Satir va hokazolar tabiat va jamiyat hayotining biror bir sohasini bevosita boshqarishi bu fikrni tasdiqlaydi. Mifologiya butun Yunon xalqi tafakkurining mahsuli sifatida u bilan birga taraqqiy etib, o`sib va o`zgarib boradi. 　 Yunon miflari o`z mavzuiga ko`ra turkumlarga birikkan bo`lib, ular orasida “Troya turkumi”, “Fiva turkumi”, “Argonavtlar turkumi” va boshqalarni sanash mumkin. Miflardan tashqari ertak, masal, maqol va topishmoq janrlari ham keng rivojlangan. Masalan, xalq orasida keng tarqalgan va ezop nomi bilan yuritilgan 426 ta masal bizgacha etib kelgan.

Ular orasida hozir bizga juda yaxshi tanish bo`lgan ko`plab syujetlarni uchratamiz. Yunon xalq qo`shiqlari va ularning turli-tuman shakllari ham yozma adabiyotning yuzaga kelishiga juda katta ta`sir ko`rsatdi. Yunon yozma adabiyotining bizga ma`lum bo`lgan ilk asarlari - Homerning “Iliada” va “Odisseya” dostonlari o`z manbaiga ko`ra qahramonlik haqidagi xalq qo`shiqlari bilan eng ko`p darajada bog’langandir. Homer eposlari Yunonistonning Ioniya muzofotida milod.av.gi VIII-VII asrlarda yaratilgan va mustabid Pisistrat davrida milod.av.gi VI asrda yozib olingan. “Iliada” ham, “Odisseya” ham Troya urushi voqealariga bag’ishlanib, bu urush milod.av.gi XIII- XII asrlarda ro`y bergan edi. Aedlar talqinida tarixiy faktlar umumlashtiruvchi va mubolag’ili xarakter kasb etib, ularga mifologik elementlar ham qo`shilgan. SHu tariqa harbiy – qahramonlik eposi “Iliada” va sehrli – maishiy epos “Odisseya” maydonga kelgan. Qadimgi Yunonlar bu asarlarning muallifi Homer ekanligiga hech qanday shubha bildirmaganlar. Biroq uning yashagan davri va yashagan joyi haqida bir-biriga qarama – qarshi ma`lumotlar mavjud. Ularda Homer yashagan davr mil.av.gi XII asrdan tortib to VI asrgacha deb ko`rsatiladi. Homer yashagan shahar nomi uchun esa 7 ta shahar Smirna, Xios, Kolofon, Salamin, Rodos, Argos va Afina da`vo bilan chiqqanlar. Homer masalasi Homer muallifligi haqidagi hamda Homer dostonlarining yaratilishi haqidagi masaladir. XVIII asrning oxirlariga qadar ham “Iliada” va “Odisseya”ning birdan-bir muallifi sifatida Homer so`zsiz qayd etib kelindi. Homer Yunoncha “so`qir” ma`nosini bildirib, uni so`qir mo`ysafid sifatida tasavvur etishgan va haykallardan birida uni ana shunday tasvirlashgan. XVIII asr oxirlariga kelib, nemis olimi F.A.Vol’f (“Homerga kirish” kitobi, 1795 yil) “Iliada” va “Odisseya” dostonlari xalq badiiy ijodi mahsuli, degan qarashni ilgari surib chiqdi. U Homerning o`zini bu asarlarni yaratishda ozmi-ko`pmi ishlagan talay mualliflardan biri, deb hisobladi. Ana shundan buyon o`tgan ikki asr mobaynida bu masala bo`yicha ikki oqim shakllandi: 1. Analitik gipoteza, ya`ni eposlarni mustaqil asarlardan tarkib topgan, deb qarash. 2. U nitar gipoteza, ya`ni eposlarning yaxlitligini e`tirof etish. Ularning

har ikkalasini ham bir-biriga kelishtirishga intilish natijasida yuzaga kelgan nazariyalar ham mavjud. Masalan, “Asosiy yadro” nazariyasi tarafdorlari birlamchi matn sekin – asta boshqa mualliflarning qo`shimcha va kiritmalari bilan boyitib, to`ldirib borilgan, degan qarashni ilgari suradilar. Biroq barcha qarashlar oxir – oqibat ularning individual yoki jamoaviy ijod samarasi ekanligi haqidagi masalaga borib taqaladi. Homer masalasi hozirga qadar ham o`zining bus-butun echimini topgan emas. Homer eposlarida tasvirlangan jamiyat urug’ – jamoa tuzumi bo`lib, unda odamlar qabilalarga birikib yashaydilar. Qabila tepasida podshohlar – qabila oqsoqollari turib, ular harbiy sarkarda, kohin, hakam bo`lib ham hisoblanadilar. Biroq ularning hokimiyati chegaralangan va bu “Iliada”ning birinchi qo`shig’idan ham anglashinib turadi. Unda Xriseidani o`z otasiga qaytarish masalasi xalq majlisida hal etiladi. Bu va boshqa bir qator belgilardan kelib chiqib, jamiyat o`z taraqqiyotida quldorlik tuzumiga o`tib borayotganligini sezib olish mumkin. “Iliada” Yunoncha “Ilionnoma” yoki “Ilion jangnomasi” ma`nolarini bildir ad i. Ilion (yoki Troya) Kichik Osiyoda, Dardanel’ bo`g’ozining janubiy qirg’og’ida joylashgan shaharning nomidir. U mil.av.gi 3 – ming yillikda mislsiz yuksalib, mil.av.gi 2 – ming yillikda turli falokatlar ta`sirida vayronaga aylanadi. “Iliada”da mana shu tarixiy – mifologik materialni mavzu sifatida tanlagan Homer 10 yillik urushning so`nggi 10 – yilidan 51 kunnigina tasvir etadi. Oq she`r shaklida, gekzametr vaznida yozilgan “Iliada” asari 15000 misradan iborat. Bu ulkan eposni III asrda Aleksandriya adabiyotshunoslari 24 kitob –qo`shiqqa bo`lganlar. Bunda Yunon alifbosidagi harflar soni asos qilib olinadi. Homerning o`zi “Iliada” dostonida uning bosh obrazi – Fessaliya podshohi Axill (yoki Axilles)ning g’azabini kuylashni maqsad qilib olgani haqida so`zlaydi. Uning g’azabiga sabab bo`lgan konfliktning ikkinchi tomonida umumYunon qo`shinining yo`lboshchisi Agamemnon turadi va uning Axillga tegishli bo`lgan asira Bresiadani tortib olishi ana shunday oqibatga olib keladi. SHa`ni erga urilgan Axill g’azab alangasida jangda qatnashishdan qat`iyan bosh tortadi va bir orolga bosh olib ketadi. U eng yaqin do`sti Patrokl o`limidan so`nggina yana qo`shin safiga

qaytadi. U Patrokl qasosi uchun Troya lashkarboshisi Hektor bilan yakkama – yakka olishuvga kirishadi va o`z do`stining qotili bo`lgan Hektorni mahv etadi. Homer “Iliada” dostoni orqali Yunoniston va Yunon xalqining harbiy shon- shavkatini madh etdi, uning jangovor qahramonliklarini tarannum qildi. harflar soni asos qilib olinadi. “Iliada” mashhur tarjimon Qodir Mirmuhamedov tomonidan o`zbekchaga o`girildi va alohida kitob holida nashr qilindi. “Odisseya” dostoni esa Troya urushining yana bir qahramoni, Itaka podshohi Odisseyning o`z vataniga qaytish paytida boshdan kechirgan sarguzashtlari tasviriga bag’ishlanadi. Uning ashaddiy g’animiga aylangan dengiz ma`budi Poseydonning urinishlari bilan Odisseyning bu safari 10 yilga cho`zilib ketadi. O`z vataniga qaytib kelgan Odissey Itakada ham bir necha raqiblarini mag’lub etib, mamlakat boshqaruvini o`z qo`liga oladi. Bir so`z bilan aytganda, sehrli elementlarga juda ko`plab murojaat etilgan bu asarda maishiy muammo o`rtaga qo`yiladi. Har ikkala asar tahlili ham shuni ko`rsatadi-ki, bu asarlar yaratilgan paytda badiiy tafakkur ma`lum darajada rivoj topgan edi. Bu, masalan, Homerning badiiy kompozitsiya yaratish mahoratida ham ko`rinadi. U “Odisseya”da jahon adabiy tajribasida birinchi bo`lib transpozitsiya usulini qo`llaydi, ya`ni ilgari bo`lib o`tgan voqea – hodisalarni Odisseyning hikoyasi tarzida bayon etadi. Homer poetikasini uning asarlarida til tasviriyligi nuqtai nazaridan tekshirgan A.Alimuhammedov bir qator diqqatga molik xulosalar chiqaradi. Uning Homer asarlarini chog’ishtirish metodi asosida “Alpomish”dostoni bilan qiyosiy tahlili ham kutilgan samaralar beradi. “Odisseya”dostonidan parchalar ham o`zbek tiliga Qodir Mirmuhamedov tomonidan tarjima qilindi va «Jahon adabiyoti” jurnalida chop etildi. O`sha davrlarda juda katta shon-shuhratga sazovor bo`lgan va V-IV asrlarning fojianavis shoirlari uchun bitmas – tuganmas syujet manbai vazifasini o`tagan Homer asarlaridan keyingi epik dostonlardan birortasi ham bizgacha etib kelgan emas. Biz ularning mazmuni haqida Proklning “Xrestomatiya”, Apollodorning “Kutubxona” asarlari orqaligina bilib olamiz, xolos. Bu epik

dostonlarda Troya va Fiva kabi katta turkumlar mufassal qalamga olingan bo`lib, ular orasidan “Kipriya”, “Efiopiada”, “Ilionning halokati”, “Qaytish”, “Telegoniya” va boshqalarni misol qilib keltirish mumkin. Mil.av.gi VII asrda yashagan Hesiod ijodini ham Homerdan keyingi epos sirasiga kiritish maqsadga muvofiqdir. An`anaga ko`ra uning nomi bilan ikki asarni – “Mehnat va kunlar” hamda “Teogoniya” (“Ma`budlarning yaralishi”) asarlarini bog’laydilar. Bu asarlar Yunoniston adabiyotida VII-VI asrlarda etakchilik qilgan ikki yo`nalish – didaktik va genealogik yo`nalishni boshlab berdi. Ular orasida “Mehnat va kunlar” didaktik eposi o`zining g’oyaviy – badiiy qimmati bilan alohida ajralib turadi. Hesiodning bevosita o`z ukasi Persga o`gitlari shaklida yozilgan bu asar aslida o`sha davrning juda keng auditoriyasiga qaratilgan edi. O`zi ham o`rta hol er egalari qatlamiga mansub bo`lgan Hesiod barcha kasblar ichida dehqonchilikni ma`qul, deb hisoblaydi. Shoir ma`murchilik asosi sifatida mehnatni tavsiflar ekan, o`z fikrlarini rivoyat va masallar bilan bezaydi. Homer o`z dostonlarini jamiyatning zodagon tabaqasini hisobga olib yaratgan bo`lsa, Hesiod esa “Mehnat va kunlar” dostonida xalqqa murojaat etadi. Har qanday chog’da ham beshafqat real voqelik bilan aloqani uzmagan Hesiod pessimizmini tushunish mumkin, albatta. Uning pessimizmi, chunonchi, insoniyatning besh asri haqidagi hikoyada, bulbul va qirg’iy haqidagi masalda ko`zga yaqqol ko`rinadi. Asarning “Mehnat va kunlar” deb nomlanishining o`ziyoq uning kompozitsion jihatdan ikki qismdan tashkil topganligini anglatib turadi. U birinchi qismda dehqon mehnatini ulug’lasa, ikkinchi qismda esa taqvimiy tartibda kunlarga tavsif beradi. Uning talqinicha, xo`jalikni yuritishda ham, oilani tebratishda ham “xayrli” va “xayrsiz” kunlar mavjuddir. Xullas, “Mehnat va kunlar” dostoni mil.av.gi VII-VI asrlar Yunonistonning turmush tarzi, axloqiy me`yorlari haqida bir muncha taassurot beradi. Mil.av.gi VII – VI asrlardagi mafkuraviy kurashlar natijasida jamoa va shaxs o`rtasida keskinlashgan munosabatlar shaxsning o`z – o`zini ifoda etishi uchun imkon beruvchi tur – lirikaning adabiyotda etakchi mavqeini egallashiga olib keladi. Bu davr Yunon lirikasini uch janrga bo`lib o`rganish taomilga kirgan

bo`lib, bular elegiya, yamb va melikadir. Yunonistonda elegiyaning qayg’uli ruh kasb etishi majburiy hisoblanmagan. Ular o`z mazmuniga ko`ra lirik sub`ektning turli-tuman mavzulardagi o`y-mulohazalarini ifodalagan. Bu janrda ijod qilgan shoirlardan Tirtey, Mimnerm, Solon, Feognid asarlari bizgacha etib kelgan bo`lib, ularda harbiy, siyosiy va boshqa mavzular kuylanadi. Hosildorlik ma`budasi Demetra kul’ti bilan bog’liq holda yuzaga kelgan yamblar uchun esa masxara qiluvchi va fosh etuvchi ruh xosdir. Bu janr imkoniyatlari ayniqsa Arxilox lirikasida butun bo`y-basti bilan namoyon bo`ldi. Arxiloxdan tashqari Semonid, Gipponakt kabi yambnavislar ham ijod qilganligi haqida ma`lumotlar mavjud. elegiya va yamb o`zining ilk kezlardagi musiqa bilan aloqasini sekin – asta yo`qotib, sof adabiy janrga aylana borgan bo`lsa, melika esa ulardan farqli o`laroq, faqat musiqa jo`rligidagina ijro etilardi. Yunonistonning VII-VI asrlar melik she`riyatini ikkiga: yakkaxon (monodik) hamda xor turlariga bo`lish qabul qilingan yakkaxon melika asosan Lesbos orolida rivojlangan bo`lib, uning eng yirik vakillari Alkey va Sapfolardir. Alkey ba`zi bir she`rlarida, chunonchi, “Kurash qo`shig’i” asarida Lesbosning bosh shahri bo`lgan Mitilenning siyosiy hayotini qalamga oladi. Uning ziyofat mavzuiga bag’ishlangan she`rlaridan parchalar ham bizgacha etib kelgan. Alkey bulardan tashqari sevgi mavzuida ham bir talay she`rlar ijod etgan, degan ma`lumot mavjud. Sapfo lirikasida esa Alkeydan farqli o`laroq siyosiy motivlar ko`zga tashlanmaydi. Ular asosan sevgi kechinmalarini ifoda etib, aksariyat shoiraning dugonalariga bag’ishlangandir. Sapfo tevarak–atrofdagi barcha narsalarda – tabiatda, odamlarda va hatto liboslarda ham go`zallikni sharaflaydi. Sapfo she`rlarida sevgi, xalq qo`shiqlarida bo`lgani kabi, asosan qayg’uli ruh kasb etadi. Bular ko`pincha javobsiz sevgi yoki beadad ayriliq tufayli yuzaga kelgani iztirobli kechinmalardir. Yakkaxon melikaning uchinchi ulug’ namoyandasi Anakreont asarlarida esa may va sevgi etakchi mavzulardir. Ular aksariyat o`zining qabrga qancha yaqinlashayotganini sezgani sayin hayot lazzatlaridan shunchalik ko`p tortinishga jazm etgan xushchaqchaq qariya tilidan hikoya qilinadi. Xor melikasi diniy bayram va marosimlar bilan juda yaqindan aloqada bo`lib, odatda tantanalar munosabati

bilan yaratilgan. SHu sababli ham ular jimjimador va ko`tarinki uslubi bilan ajralib turgan. Xor lirikasiga ma`budlarni ulug’lovchi gimnlar, shuningdek, sport musobaqasining g’oliblarini sharaflovchi qo`shiqlar kiritilgan. Alkman, Pindar, Simonid, Vakxilid kabi shoirlar bu janrning eng go`zal namunalarini yaratganlar. Ular orasida Pindar alohida o`rin tutgan va uning asarlari, ma`lumot berishlaricha, to`rt mingga yaqinlashib borgan. Pindar asarlari o`zining nutqiy qurilishiga ko`ra juda murakkab bo`lib, bu hodisa uning aristokratiya uchun ijod qilganligi bilan belgilanadi. U bag’oyat did bilan saralangan epitet, metafora, metonimiya, mubolag’a va badiiy-tasviriy vositalarga tez-tez murojaat etadi. Mil.av.gi V asrga kelib, Yunoniston adabiyotining ibtidoiy davri o`rniga Attika davri keladi. Ikki asr davom etgan bu davr qadimgi Yunonistonning umumiy tarixida, chunonchi, uning adabiyoti tarixida ham eng yuksak taraqqiyot pallasi, ya`ni oltin asr bo`lib qoladi.

Adabiyotlar: 1. I.Karimov “Barkamol avlod orzusi”. T.: Sharq, NMK, 1999 , -- 184 bet. 2. Chet el adabiyoti tarixi.Namunaviy dastur va Ishchi dastur.2004, T.: Nizomiy nomidagi TDPU, 2004 3. Alimuhammedov A. Antik adabiyot tarixi. T.: O`qituvchi, 1976 ,-416 bet. 4. Komilov N. Tafakkur karvonlari. T., Ma`naviyat. 1997. 5. Homer. Iliada. T.: G’.G’ulom nomidagi Adabiyot va san`at nashriyoti, 1988. 6. Homer. Odisseya. Ikkinchi qo`shiq g’g’ “Jahon adabiyoti” 2001,№8, 58 – 66 –bet. 7. F.Sulaymonova. Sharq va G’arb. T.: O`zbekiston, 1999. 8. F. Boynazarov. O`rta Osiyoning antik davri. –T.: O` kituvchi , 1991. 9. F.Boynazarov. Qadimgi davr tarixi . Jizzax, “Sangzor”, 2002.

O'xshashlar

Yunon adabiyotining Attika davri

Berdaq – Qoraqalpoq adabiyotining asoschisi

Hozirgi davr adabiyotining taraqqiyot tamoyillari

Rim adabiyoti. Respublika davri Rim adabiyoti

Qozoq adabiyotining yorqin yulduzi –Muxtor Avezov