Tonnellarni asrash - Транспорт - Рефераты

Tonnellarni asrash

Загружено в:

25.01.2023

Скачано:

0

Размер:

350.3291015625 KB

Tonnellarni asrash Reja: 1. Tonnel obdelkasining ishlash sharoitlari 2. Texnik nazorat 3. Tonnel obdelkasi konturini tekshirish 4. Tonneldagi temir yo’l izlarini asrash 5. Tonnellar ventilatsiyasi

1. Tonnel obdelkasining ishlash sharoitlari Aloqa yo’llaridagi tonnellar uzoq vaqt ekspluatatsiya qilishga mo’ljallangan inshootlardir. Tonnellar ekspluatatsiyasi tizimli texnik nazoratni tashkil etish, obdelkani, portallarni, temir yo’l izini, yordamchi jihozlarni ishga yaroqli holatda saqlash va poyezdlarni belgilangan tezlikda tonneldan uzluksiz o’tkazish maqsadida aniqlangan shikastlanishlarni tezkor ta’mirlash ishlarini o’z ichiga oladi. Ekspluatatsiya jarayonida turli omillar ta’sirida tonnel obdelkasida ancha katta miqdordagi deformatsiyalar bo’lishi mumkin. Bu deformatsiyalarning kattalashishi tonnel ko’ndalang kesimining o’zgarishiga va obdelkaning buzilishiga olib kelishi mumkin. Tonnel konstruksiyasini loyihada ko’zda tutilgandek ishlashidan chetga chiqishiga olib keluvchi sabablarning o’z vaqtida va to’g’ri tahlili obdelkani samarali ta’miri va avariya holatlarining oldini olish uchun birinchi darajali ahamiyatga egadir. Obdelkaning deformatsiyalari asosan tog’ jinslarining bosimiga bog’liq bo’ladi. Agar tonnel loyihasida qatlamlarning yo’nalishi xato hisoblangan bo’lsa, grunt bosimining yo’nalishi qabul qilinganiga nisbatan o’zgarishi mumkin. Shuning uchun tog’ bosimining o’zgarishlari ustidan tizimli nazorat o’rnatilishi kerak bo’ladi. Obdelkaning deformatsiyalari tog’ massivida ro’y berayotgan dislokatsiya jarayonlari natijasida kelib chiqishi mumkin. Ko’pchilik hollarda bu obdelkaga ta’sir etayotgan yon bosimning oshib ketishiga olib keladi. Gumbaz tepasidagi grunt massivida to’ldirilmagan kavernlarning borligi konstruksiyaning ichki tomonidan katta grunt bo’laklarining ko’chib tushishiga va o’yiq joylarning paydo bo’lishiga sabab bo’lishi mumkin. Tog’ bosimining oshishi yer osti suvlarining rejimi o’zgarganda ham ro’y berishi mumkin. Bu hol tonnel suvli va suv o’tkazuvchi qatlamlarni kesib o’tganda, ayniqsa, yer osti suvlarining kavlangan shaxtalar orqali tonnelga ko’p miqdorda va uzoq vaqt oqib kelishi sababli yuzaga kelishi mumkin.

Yer osti suvlarining birlamchi ta’siri sifatida ularning obdelkadan sizib o’tishi tufayli obdelkaning mustahkamligini kamaytirishini ko’rsatish mumkin. Ikkilamchi ta’sir esa tog’ bosimining anchagina oshib ketishidir, chunki sizib o’tayotgan suv gruntni yuvib uning buzilishiga sabab bo’ladi. Bunda grunt massivida bo’shliqlar paydo bo’ladi va konstruksiyaga ta’sir etayotgan tekis tarqalmagan bosim oshadi. Tonnelning uzoqqa chidamliligi atmosfyera va harorat omillariga ko’p jihatdan bog’liqdir. Tonnel ish sharoitlariga katta ta’sir etuvchi omillar guruhiga seysmik hodisalar kiradi. Odatda, yer osti inshootlari yer usti inshootlariga nisbatan yuqori zilzilabardoshlikka egadir va ularning bu xossasi joylashmaning chuqurligi oshgani sari oshib boradi. Tonnel inshooti majmuasida zilzilabardoshligi eng kichik bo’lganlari portallar va ularga yaqin uchastkalardir. Zilzila paytida yuzaga keluvchi cho’zuvchi kuchlanishlarni qabul qiluvchi samarali vositalardan biri ankerlab mustahkamlashdir. Agar ankerlar oldindan zo’riqtirilgan bo’lsa va torkretbeton bilan qoplangan metall setka bilan birgalikda qo’yilgan bo’lsa, ularning roli yanada ham oshadi. 2. Texnik nazorat Poyezdlarning uzluksiz va avariyasiz harakatini ta’minlash uchun tonnel ustidan texnik nazorat o’rnatiladi. Nazoratning maqsadi obdelkadagi, tonnel jihozlaridagi va temir yo’ldagi barcha shikastlanishlarni o’z vaqtida aniqlash va ularni bartaraf etishdir. Har bir tonnel ekspluatatsiyasi uchun doimiy texnik nazorat, joriy ko’riklar, davriy ko’riklar, maxsus tekshirishlar va doimiy kuzatuvlarni tashkil etish lozimdir. Doimiy texnik nazorat temir yo’llari obxodchiklari, yo’l brigadirlari va yo’l masterlari tomonidan tonnel masteri rahbarligi ostida bajariladi. Bu nazoratning maqsadi-xavfsizlikni va yo’l boshlig’i tomonidan tasdiqlangan jadval bo’yicha muntazam ravishda yo’lni, obdelkani, tonnel jihozlarini, ventilatsiya va suv qochirish moslamalarini ko’rikdan o’tkazib poyezdlarning avariyasiz harakatini ta’minlashdir.

Sanab o’tilgan elementlarning birortasida nosozliklar topilganda ularni zudlik bartaraf etish choralari ko’riladi. Doimiy texnik nazoratda asosiy diqqatni yo’lning rejadagi va profilidagi holatiga, shuningdek yo’l elementlarining yedirilish darajasiga qaratiladi. Tonneldagi temir yo’lning yedirilishi, odatdagi sabablardan tashqari, kuchli korroziya natijasida ham ro’y beradi. Relsning bosh qismida eng katta yedirilish kuzatiladi, undan keyin esa, korroziyaga uchrash darajasi bo’yicha, relsning osti, bo’yin qismi va mahkamlanish joylari keladi. Texnik nazorat paytidagi aniqlangan barcha nosozliklar temir yo’llar obxodchigi jurnalida qayd etiladi. Yo’l masteri kuzatuvi ostida o’tkaziladigan yo’lning yalpi nazorati eng kamida bir oyda ikki marta o’tkazilishi kerak. Tonnel obdelkasi, ayniqsa uning kuchli tog’ bosimi ta’sir etayotgan, muzlashi, ko’pchishi mumkin bo’lgan uchastkalari, doimiy kuzatuv ostida bo’ladi. Tonnelning joriy ko’rigini tonnel masteri har bir oyning oxirida o’tkazadi. Joriy ko’rikning asosiy maqsadi-tonnel obdelkasidagi va tonnelning yordamchi jihozlaridagi nuqsonlarni topish hamda bu nuqsonlarning kelib chiqish sabablarini aniqlashdan iboratdir. Obdelkadagi topilgan darzlar ko’zdan kechiriladi, o’lchanadi va ularning chizmasi tonnel kitobining ichiga chiziladi. Darzlar ustidan tizimli nazorat o’rnatiladi. Agar darz rivojlanmasa, ya’ni darz chizig’i davom etmasa yoki uning kengligi ortmasa, darz sement qorishmasi bilan yopib qo’yiladi. Vaqt davomida o’lchamlari o’zgaradigan darzlar ustidan qat’iy nazorat o’rnatiladi. Darzlarning o’zgarish xarakteri mayaklar va plastinalar ko’rinishidagi oddiy moslamalardan foydalanib o’rganiladi (rasm 1). Tonnelning davriy ko’riklari yiliga kamida ikki marta o’tkaziladi. Davriy ko’rikning maqsadi-tonnel obdelkasini va barcha qurilmalarni batafsil tekshirib chiqishdan iboratdir. Bu tekshirish obdelkaning barcha joylarini ko’rib chiqishga imkon beradigan, maxsus suriladigan ko’prikchalari bor temir yo’l platformalari ustida turib o’tkaziladi. Platforma ustiga projektor yoritgichli gabarit rama o’rnatiladi. Jiddiy deformatsiyalar topilgan tonnel uchastkalarida yo’lning reja va profildagi holatini aniqlash uchun batafsil instrumental s’emka o’tkaziladi. Davriy

ko’rik natijalari tonnel kitobiga yoziladi va bu natijalar maxsus aktlar va hisobotlar bilan rasmiylashtiriladi. a) Rasm 1. Obdelkadagi darzlarni kuzatish uchun moslamalar: a - mayak; b - plastinalar Tonnelning maxsus tekshirishlari obdelkada xavfli deformatsiyalar topilganda o’tkaziladi. Bu deformatsiyalarning yanada rivojlanishini oldini olish uchun ko’tarib turuvchi konstruksiyaning ishlash sharoitini har tomonlama tahlil qilib chiqish kerak bo’ladi. Tonnelni tekshirish komissiyasiga tonnel quruvchilari, geologlar, gidrologlar, seysmologlar va klimatologlar (iqlim mutaxassislari) kiritiladi. Maxsus tekshirishlarning maqsadi-tonnelning umumiy holatini baholash, tonnelning deformatsiyalanayotgan uchastkalari, tog’ massivining gidrogeologik sharoitlari va tog’ bosimining oshishi ustidan doimiy kuzatuvlar dasturi bajarilishining to’g’riligini tekshirishdir. Tekshirishlar natijasida tonnel obdelkasining oshib boradigan deformatsiyalarini keltirib chiqaradigan sabablarni yo’qotish usullari bo’yicha amaliy tavsiyalar ishlab chiqiladi. Maxsus tekshirishlarning natijalari hisobot ko’rinishida rasmiylashtiriladi va u tonnel joylashgan yo’lning “yo’l, binolar va inshootlar hizmati”ga va “O’zbekiston temir yo’llari” АЖ ning “Yo’l va inshootlar Bosh boshqarmasi” ga yuboriladi. 3. Tonnel obdelkasi konturini tekshirish Tonnelning ichki konturini bir boshidan ikkinchi boshigacha tekshirib chiqish uchun yangi yoki kapital ta’mirdan chiqqan platformaga o’rnatilgan gabarit ramadan foydalaniladi. Bu platforma tonnel ichidan b)

3...4 km/soat tezlikda olib o’tiladi. Alohida olingan kesimlarda tonnel ichki konturi s’emkasi qutb koordinatalari tamoyillaridan foydalanishga asoslangan qurilma va asboblar orqali bajariladi. Tonnel kesimi s’emkasining eng oddiy usuli-tonnel o’qi bo’yicha aniq vertikal o’rnatilgan o’lchov reykasi ( 3 ) va tiralgan uzun tayoq ( 1 ) tortib turadigan o’lchov lentasi ( 2 ) dan foydalanishdir (2, a -rasm). Kontur nuqtalarining koordinatalari masofalarni bevosita o’lchash orqali aniqlanadi. Rasm 2. Obdelka ichki konturini o’lchash: a - reyka yordamida; b - transportir yordamida; v - projektorli gabarit o’lchagich yordamida Boshqa bir aniqroq usul transportir ( 4) dan foydalanishga asoslangan (2, b - rasm). Tonnel ichki konturidagi nuqtalar holati o’lchov lentasi ( 5 ) ning transportirlari yordamida aniqlanadi. Bunda o’lchov lentasining uchi tanlab olingan nuqtaga uzun tayoq ( 6 ) bilan bosib turiladi. X va Y nuqtalarining koordinatalari quyidagi formulalar orqali hisoblanadi: X = S cos α Y = S sin α . (1) Bu yerda S - transportir markazidan obdelkadagi nuqtagacha bo’lgan masofa;  - transportirdan olingan markaziy burchak. Ko’rib o’tilgan moslamalar cheklangan qo’llanishga egadir, chunki elektr kuchi bilan tortiladigan tonnellarda bu moslamalardan foydalanish uchun kontakt tizimini tokdan o’chirish kerak bo’ladi. N.M. Korolkovning projektorli gabarit o’lchagichi (2, v -rasm) umumiy asos ( 9 ) ga sharnir orqali mahkamlangan ikki quvur-projektorlar ( 7 ) dan iborat.

Sharnirlar o’lchov transportirlari ( 8 ) ning markaziga joylashtirilgan. Nuqtaning koordinatalarini aniqlash uchun bu nuqtaga projektorlar nuri yo’naltiriladi. Transportirlar shkalalari bo’yicha alfa va beta burchaklarini o’lchab nuqtaning koordinatalari (millimetrlarda) hisoblanadi: X =1000+ b cos α ; Y =2000+ b sin α . (2) Bu yerda b =. (3) Tonnel ko’ndalang kesimini o’lchashning eng mukammal usuli sifatida avtomatik kinokamera s’emkasini ko’rsatish mumkin (muhandislar K.D. Savin va O.S. Shebyakin gabarit o’lchagichi). Bu qurilma tonnel ko’ndalang kesimi tekisligini yoritishni ta’minlovchi yorug’lik manba’idan va kinokameradan iboratdir. Jihoz tonnel bo’yicha 3...5 km/soat tezlikda harakatlanadigan pritsep oxiriga o’rnatiladi. 4. Tonneldagi temir yo’l izlarini asrash Tonnellarda temir yo’l ustqurilmasining kuchaytirilgan, ya’ni har bir kilometrda 2000 dona shpal, rels og’irligi P50 dan kam bo’lmagan va ballast chaqiq toshli ko’rinishi qo’llaniladi. Ta’mir ishlari muddatlarini qisqartirish va yo’l ustqurilmasining ishlash sharoitlarini yaxshilash maqsadida uzunligi 25 metrli, bir-biriga payvandlangan holda 50...100 metrli yoki birikmasiz relslar yotqiziladi, chunki tonneldagi harorat o’zgarishlari ochiq joylardagiga qaraganda ancha kichik bo’ladi. Odatda, ajratilgan turdagi mahkamlash elementlari qo’llaniladi, rels osti va podkladka orasiga, shuningdek podkladka va shpala orasiga ham elastik prokladkalar qo’yiladi. Ballastga yuqori talablar qo’yiladi. Ballast uchun, odatda, qattiq gruntlardan ishlangan, mustahkamlik chegarasi 80MPa dan kam bo’lmagan, donalarining yirikligi 25...70mm bo’lgan chaqiq tosh ishlatiladi. Ballastni tez ifloslanishdan saqlash uchun ballast prizmasining yuqori qismiga mayda fraksiyali chaqiq tosh

yotqiziladi. Shpala ostidagi ballast qatlamining qalinligi 25 sm dan kam bo’lmasligi kerak. Metropolitenlar ekspluatatsiyasidan to’plangan tajribalar chaqiqtoshli ballast prizmasini beton bilan almashtirishning yuqori samaraliligini ko’rsatdi. Yaxlit beton zamin ballastni davriy ravishda tozalashni va shaklini to’g’rilashni talab etmaydi, tonnel suvlarini izlar ostidagi betonda joylashgan drenaj lotoklari orqali chiqarib tashlashga qulay sharoit yaratadi. Poyezdlar harakati xavfsizligini ta’minlash uchun yo’l holatini rejada va profilda nazorat qilib turishni yengillashtiradigan doimiy reperlar o’rnatiladi. Yo’l ustqurilmalarining holati vizual ko’rik va yo’l o’lchovchi vagonlardagi apparaturalar yordamida olingan o’lchovlarga qarab baholanadi. Tashqi ko’rikda shpalalarning, relslarning, mahkamlovchi elementlarning va ballast prizmasining holati aniqlanadi. Yo’l o’lchovchi vagonlar apparaturalari yordamida saqlash me’yorlaridan chetga chiqish, rels koleyasining balandlik va shablon bo’yicha og’ishi, rixtovkaning buzilishi va boshqa nuqsonlar aniqlanadi. Temir yo’l izlari ochiq uchastkalardagiga qaraganda tonnellarda og’irroq sharoitlarda bo’ladi. Yuqori namlik tufayli yo’l ustqurilmalarining, birinchi navbatda metall konstruksiyalarining, tez yeyilishi kuzatiladi. Tonnellardagi yo’l ustqurilmalari metall elementlarining ishlash muddati yo’lning ochiq uchastkalaridagiga qaraganda ikki marta kam ekanligi aniqlangan. Yo’l elementlarining mexanik eyilishi, kimyoviy va elektromexanik korroziyasi bo’lishi mumkin. Yuqori darajadagi mexanik eyilish lokomotiv g’ildiraklarining rels bilan tishlashishini orttirish uchun qo’llaniladigan qumga bog’liqdir. Metall qismlarning kimyoviy korroziyasi yuqori haroratli nam havo va suvning uzoq va davomli ta’siri tufayli yuzaga keladi. Elektrkimyoviy korroziya elektrlashtirilgan tonnellarda rels izlarining tortish toki o’tkazgichi sifatida ishlatilganligi va ularning daydi toklar xosil bo’ladigan manbalar ekanligi oqibatida kelib chiqadi. Odatda, tokning bekorga sarf bo’lishiga yo’l ustqurilmalarining mahkamlovchi elementlari sabab bo’ladi. Ekspluatatsiya

jarayonida xosil bo’ladigan zazorlarga, birikmalarning ochilib qolgan joylariga erigan tuzli, kislotali va yog’li suvlar to’ladi. Bunday muhit elektrolit hisoblanib, relslar va mahkamlovchi elementlar anod va katod rolini o’ynaydi. Elektrkimyoviy korroziyani kamaytirish yoki tamoman yo’q qilish uchun uning sabablarini bartaraf etadigan tadbirlarni o’tkazish kerak. Buning uchun eng samarali vosita-tonnelni yaxshi shamollatish va quritishdir. Elektrkimyoviy korroziya jarayonlarini oldini olishda relslarning ishchi bo’lmagan yuzalarini va mahkamlovchi elementlarni korroziyaga qarshi lak bilan qoplash yaxshi natija beradi. Shunday maqsadlar uchun relslarning yuzalariga natriy nitratning 150% li qorishmasi bilan ishlov beriladi. Buning natijasida korroziya jarayonlarining davom etishiga to’sqinlik qiladigan mustahkam yupqa parda xosil bo’ladi. Tortish toklarining bekorga sarf bo’lishini ancha kamaytirishga birikmasiz izlar qo’llanilib rels zanjirining yaxshi elektr o’tkazuvchanligini ta’minlash orqali erishiladi. Elektrkimyoviy korroziyaga qarshi kurashishda ballast prizmasining va shpala panjarasining holatini yaxshilash ijobiy natija beradi. Bunda chaqiqtoshli ballast, elektrizolyatsiyali qorishma shimdirilgan shpalalar qo’llanilganligi tufayli ularning elektr qarshiligi ancha oshadi. Shu bilan birga, shuruplar teshikchalarini ham yog’li suyuqliklar bilan to’ldirib qo’yishga ham e’tibor qilish kerak bo’ladi. 5. Tonnellar ventilatsiyasi Temir yo’l va avtoyo’l tonnellarining ekspluatatsiyasi jarayonida dvigatellar yonilg’isi yonishi natijasida ko’p miqdordagi zararli gazlar (CO, CO 2 , SO 2 ) xosil bo’ladi. Tonnel atmosferasi uchun ortiqcha namlik va yuqori harorat xarakterlidir. Ventilatsiya qilishdan maqsad tonnel havosi tarkibini maksimal darajada normallashtirish, yo’lovchilar va poyezd personalini toza havo bilan ta’minlash, zararli gazlar va yuqori haroratning yo’l ishchilari va ta’mirlovchi ishchilarning sog’ligiga salbiy ta’sirini imkon boricha kamaytirishdir. Tonnellarning ventilatsiyasini tabiiy yo’l bilan yoki ventilatsiya jihozlari yordamida sun’iy yo’l bilan amalga oshirish mumkin.

Tonnellarning tabiiy ventilatsiyasi ushbu tonnelning rejada bosh shamol yo’nalishlariga nisbatan joylashishiga, portallar balandliklarining farqiga, tonnel uzunligiga, poyezdlar harakatining chastotasi va tezligiga bog’liq bo’lgan tabiiy havo oqimiga asoslanadi. Sun’iy ventilatsiya g’o’rillovchi, so’ruvchi yoki g’o’rillovchi-so’ruvchi bo’lishi mumkin. Tonnelda havo almashish usuli bo’yicha bo’ylama, ko’ndalang va yarim ko’ndalang ventilatsiyalar bo’lishi mumkin. Ventilatsiya bo’ylama tizimli bo’lganda (3, a -rasm) tonnel ( 2 ) havo yuruvchi sifatida ishlatiladi. Tonnelga havo shaxta ( 1 ) yoki portallar yaqinidagi ventilatsiya kameralari orqali beriladi. Uzunligi katta bo’lgan tonnellarda purkovchi ( 3 ) va so’ruvchi ( 4 ) shaxtalarni navbatma-navbat joylashtirish sxemasi qo’llaniladi (rasm 3, b ). Rasm 3. Tonnelning bo’ylama ventilatsiyasi sxemalari: a - bir shaxtali; b - ikki shaxtali; 1, 3 - purkovchi shaxtalar; 2 - tonnel; 4 - so’ruvchi shaxta Ventilatsiyaning ko’ndalang tizimida (4-rasm) ifloslangan havoni chiqarish va toza havoni berish bir vaqtda tonnelning butun uzunligi bo’yicha maxsus kanallar orqali amalga oshiriladi. Yarim ko’ndalang tizimda faqat bir kanal ishlatiladi, ikkinchi kanal tonnelning o’zi bo’ladi. Ventilatsiyaning hisobi talab etiladigan havoning miqdorini aniqlashga va ventilatsion jihozlarni tanlash uchun ma’lumotlar olishga qaratilgandir. Tonnel ichiga beriladigan toza havoning miqdori zararli gazlarning havodagi konsentratsiyasi ruxsat etilgan me’yorlardan oshmasligi shartida ko’ra aniqlanadi.

Rasm 4. Ko’ndalang ventilatsiya o’rnatish sxemasi: 1 - ifloslangan havoni chiqarish; 2 - toza havoni berish Tonnellar ekspluatatsiyasida qo’llanilgan ventilatsiyaning samaradorligini kuzatib borish, havodagi zararli gazlar ( С O, H 2 S, CO 2 ) xavfli konsentratsiyasi darajasini pasaytirish uchun, tadbirlar ishlab chiqish lozim bo’ladi. Havo tarkibini tezkor nazorat qilish uchun portativ gazanalizatorlar qo’llaniladi. Ular zararli gazlarning oniy va o’rtacha konsentratsiyasini aniqlashni ta’minlaydi.

Nazorat savollari Tonnellarning ekspluatatsiyasi qanday ishlarni o’z ichiga oladi?  Tonnel obdelkasining deformatsiyalari qanday ta’sirlar natijasida kelib chiqishi mumkin?  Er osti suvlari tonnel konstruksiyasiga qanday ta’sir ko’rsatadi?  Tonnellarning uzoqqa chidamliligiga qanday omillar ta’sir ko’rsatadi?  Tonnel ustidan texnik nazorat qanday maqsadda o’rnatiladi?  Tonnellarni muvaffaqiyatli ekspluatatsiya qilish uchun qanday nazorat va ko’riklarni o’rnatish lozim?  Tonnelning davriy ko’riklari qanday muddatlarda o’tkaziladi?  Obdelkadagi darzlarni kuzatish uchun qanday moslamalar qo’llaniladi?  Tonnellarning ichki konturini tekshirish uchun qanday moslamadan foydalaniladi?  Obdelkaning ichki konturini qanday asboblardan foydalaniladi? Tonneldagi temir yo’l izlarini asrash ishlari nimalardan iborat bo’lishi mumkin?  Tonnellarning ventilyasiyasi qanday tashkil qilinadi?  Tonnellarning bo’ylama ventilyasiyasi qanday bo’lishi mumkin?  Tonnellarning ko’ndalang ventilyasiyasi qanday bo’lishi mumkin?

Foydalanilgan adabiyotlar 1. Bridge Engineering Handbook, Second Edition: Fundamentals. © 2014 by Taylor & Francis Group, LLC CRC Press is an imprint of Taylor & Francis Group, an Informa business. ISBN-13: 978-1-4398-5234-7. - 574 pp. 2. Bridge Engineering Handbook, Second Edition: Superstructure Design. Edited by Wai-Fah Chen and Lian Duan. © 2014 by Taylor & Francis Group, LLC CRC Press is an imprint of Taylor & Francis Group, an Informa business. International Standard Book Number-13: 978-1-43985229-3 (eBook - PDF). – 734 pp. 3. Bridge Engineering Handbook, Second Edition: Construction and Maintenance. Edited by Wai-Fah Chen and Lian Duan. © 2014 by Taylor & Francis Group, LLC CRC Press is an imprint of Taylor & Francis Group, an Informa business. International Standard Book Number-13: 978-1-4398-5233-0 (eBook - PDF). – 646 pp. 4. Bridge Engineering Handbook, Second Edition: Seismic Design. Edited by Wai-Fah Chen and Lian Duan. © 2014 by Taylor & Francis Group, LLC CRC Press is an imprint of Taylor & Francis Group, an Informa business. International Standard Book Number-13: 978-1-4398-5232-3 (eBook - PDF). Visit the Taylor & Francis 722 pp. 5. Salixanov S.S., Raupov Ch.S. Transport inshootlarini loyihalash va qurish. 3-qism. Temir yollardagi metall ko’priklar. O’quv qo’llanma. – Toshkent, TashIIT, 2016. – 168 b. 6. Salixanov S.S., Raupov Ch.S. Transport inshootlarini loyihalash va qurish. 1-qism. Temir yollardagi tonnellar va quvurlar. O’quv qo’llanma. – Toshkent, TashIIT, 2014. – 137 b. 7. Salixanov S.S., Raupov Ch.S. Transport inshootlarini loyihalash va qurish. 2-qism. Temir yollardagi temirbeton ko’priklar. O’quv qo’llanma. – Toshkent, ToshTYMI, 2015. – 160 b.

Похожие

Tonnellarni tog’ usulida insho etish

Tonnellarni ta’mirlash va rekonstruksiya qilish

Tonnellarni qurishda muhandis-geologik qidiruvlar

Tonnellarni qalqon usulida barpo etish

Tonnellar haqida umumiy ma’lumotlar va ularni loyihalash