Markaziy Osiyo va qadimgi Sharq mamlakatlarida maktab va pedagogik fikr rivoji - Педагогиka - Рефераты

Markaziy Osiyo va qadimgi Sharq mamlakatlarida maktab va pedagogik fikr rivoji

Загружено в:

20.09.2019

Скачано:

0

Размер:

75.5 KB

Markaziy Osiyo va qadimgi Sharq mamlakatlarida maktab va pedagogik fikr rivoji Reja: 1. Qadimgi Xitoy va Hindistonda ilm-fan, madaniyat, tarbiya, maktab, pedagogik fikr. Yozuv, qog’oz va siyohining kashf etilishi. 2. Zardo‘shtiylik ta’limotida ta‘limiy-axloqiy qarashlar 3. Turonzaminida VII asrgacha ilm-fan, madaniyat, tarbiya, pedagogik fikr.

1. Qadimgi Xitoy va Hindistonda ilm-fan, madaniyat, tarbiya, maktab, pedagogik fikr. Yozuv, qog’oz va siyohining kashf etilishi . Misr, Messopotamiya, Hindiston, Xitoy mamlakatlarida insoniyat madaniyatining murakkab formalarini boshqa joylardagiga qaraganda oldinroq vujudga keltirdi. Bu mamlakatlarda katta davlatlar oldinroq paydo bo’ldi. Xo’jaliklarda kalendar bo’lishi lozim edi, astronomiya ilmi ana shundan boshlandi: erni o’lchash, hosilni hisobga olish, inshoatlar qurish hisobini olish zarur edi, shu tariqa geometriya va arifmetika vujudga keldi. Meditsina fanining boshlang’ich elementi vujudga keldi. Tabiat to’g’risidagi bilimlar qadimgi zamonlardan beri suratlarda aks ettirilar edi. Suratlar yordamida yozish-piktografiya yozuvi rivojlandi. Misr va Xitoyda piktografiya yozuvidan ieroglif yozuvi kelib chiqdi. Ieroglif yozuvidan yozuvning yangi printsipi-tovushlarni ifodolovchi harflar bilan yozish yoki alfavit kelib chiqdi. Alfavit yozuvi dastlab xo’jalik ishlari va boshqa shu kabi ishlarning borishini qayd qilish uchun xizmat etadi. Podsholar saroylarida kotiblar tayyorlaydigan maktablar ochilgan. Folklor-kattalarni va yoshlarni tarbiyalash vositasi bo’lib xizmat qilgan. Sinflar kurashida din katta rol o’ynaydi. Davlat dinlari vujudga keltirildi. Yangi dinlar-buddizm, xristian, yaxudiy. Bu dinlar dastlab mazlum xalqlarning istak-orzularini ifodaladilar. Din dastlab og’zaki targ’ib qilingan. Xalq orasida yozuv tarqala boshlagandan so’ng nasihathomuz fikrlar yozuvda ifodalangan. Maktablarda o’qitish quyidagicha bo’lgan: 1. Tekst ohangdor qilib o’qilar. 2. Tekstning boshida yodlab olinishi kerak bo’lgan qancha aqida borligi ko’rsatilib o’qilar. 3. Katta tekst qismlarga bo’linib o’qilar. 4. Ko’p martalab takrorlash usuli qo’llanilar edi.

Turli mamlakatlar va xalqlar jahon madaniyatiga turlicha hissa qo’shdilar. Xitoyda qog’oz ixtiro qilindi. Hindistonda hisoblashning o’nlik sistemasi kashf etildi. Mesopotamiya er kurrasini graduslarga, sutkani soatga, soatni minutga, minutni sekundga bo’lish kashf etildi. Eramiz boshlarida O’rta dengiz bilan Hindistonni birlashtiruvchi karvon yo’li, so’ngra O’rta Osiyo orqali Xitoydan O’rta dengiz tomon «Buyuk ipak yo’li» ochildi. O’rta Osiyo savdo-sotiq markazi bo’lib qoldi. Bu esa O’rta Osiyo vohalarida madaniyatni o’stiradi, yozuvning tarqalishiga yordam beradi. Eramizdan bir necha yil muqaddam Sharqda yirik davlatlar va katta shaharlar bunyod bo’lgan. Qadimgi Xitoyda eramizdan uch ming yil muqaddam qo’yi va oliy maktablar bo’lgan. Maktablarda bolalar murakkab «Ieroglif» (belgi) xatlarini o’qishni va yozishni o’rgangan, falsafa va axloq, atoqli shoir va yozuvchilarning asarlari o’rgatilgan. Bu maktablarda astranomiyaga doir ba’zi ma’lumotlar ham berib borilgan. Xitoyning yuksak madaniyati qo’shni xalqlarga o’z ta’sirini o’tkazdi. Hindistonda juda qadim zamonda maktab paydo bo’ldi va mutahkamlandi. Hindistonda dehqonlar jamoasi tashkil qilgan «Jamoa» maktabi ming yillar davomida saqlanib va davom etib keldi. U bilan bir qatorda shaharlardagi, ibodatxonalar huzuridagi va boshqa joydagi maktablar madaniyat tarqatishda katta ahamiyatga ega bo’ldi. Kichik Osiyo va Afrikada (Misr) ham maktab rivojlanib bordi. Bu erlarda sun’iy sug’orish asosida dehqonchilik ishlari olib borilgan. Odamlar tabiat hodisalarini kuzatib borganlar va suv toshqini qachon bo’lishini oldindan aytib berishni o’rganganlar, natijada to’g’onlar qurish va boshqa inshoatlar qurish tajribalari ortib borgan. Boshlang’ich fanlar: astranomiya, geometriya, arifmetika, meditsina paydo bo’ldi. Imoratlar qurish uchun oddiy mashinalar (zambil, g’altak va hokazo) yasaydigan bo’ldilar. Mana shu ma’lumotlarning hammasi aholi qo’liga to’plana bordi.

Sharqda kohinlar maktabi, davlat va xo’jalikni boshqarish ehtiyojlar uchun zarur maktablar ham paydo bo’ldi. Mirzalar, xizmatchilar tayyorlaydigan kitoblar paydo bo’ldi. Yozuv va hisoblashni o’rgatish chog’ida turli usullardan foydalanilgan (masalan: rang-barang mayda toshlardan). Eng qadimiy qo’l yozmalarda (Xitoy, Hindiston, Misr va boshqa) tarbiya to’g’risida, tarbiyachi va o’qituvchilar oldiga quyiladigan talablar to’g’risida turli fikrlar uchraydi. 2. Zardo‘shtiylik ta’limotida ta‘limiy-axloqiy qarashlar O’rta Osiyoning islomgacha bo’lgan davrdagi umumiy tarixini, xususan axloq- odobga doir qarashlar tarixini o’rganish uchun qadimiy forsiy yozuvlar, zardushtiylik dinining «Avesto» (asli «Ovasto») nomli muqaddas kitobi hamda bir qator manbalar katta ahamiyatga ega. Avesto O’rta Osiyo xalqlarining axloq-odobi qaror topishi va rivojlanishi tarixini o’rganish uchun bebaho manbadir. U diniy mazmunda bo’lishi bilan bir qatorda falsafa, siyosat, axloq, turmush, adabiyot masalalarini ham o’z ichiga oladi. O’rta Osiyo, Ozarbayjon, Eron hamda butun Yaqin va O’rta Sharq xalqlaridagi ilk tabiiy-ilmiy tasavvurlarini o’rganish uchun boy material beradi. Avesto muayyan tarixiy davrdagi konkret shaxslar ijodining yakunidan iborat bo’lganligi sababli, shubhasiz, ma’naviy madaniyatni tadqiq etish, xususan, asosiy axloqiy g’oyalarni aniqlash uchun anchagina murakkab asardir. Uni bir qator xalqlar yaratgan. Biror ma’lum davrga mansub .... deb aytib bo’lmaydi. Tadqiqotlarga ko’ra Avesto taxminan meloddan oldingi IX dan IV asrga qadar tuzilgan, uning ayrim qismlari nafaqat san’at balki geografik jihatdan ham bir- biridan farq qiladi. Ular zardushtiylik hukmronlik qilgan turli mamlakatlarida yaratilgan. Bu din urug’chilik tuzumi davrida paydo bo’ldi, keyin qadimiy Sharqda quldorlik davrida rivojlandi va nihoyat, arshaxiylar, sosoniylar zamonida (ilk

feodalizm davrida) tubdan o’zgardi. Shu bois Avesto keng yoyilgan mamlakatlardagi mahalliy xususiyatlar unga ta’sir etmay qolmadi. Bir qarashda Avesto sof diniy kitobdek tuyuladi. Darvoqe, ko’p xorijiy tadqiqotchilar ayniqsa o’tgan asrda yashab o’tganlari xuddi shunday o’ylashgan ham. Ammo bunday emas. Avestoda ikki jihatni: diniy-mifologik va falsafiy jihatlarni bir-biridan farq qilmoq zarur. Tadqiqotchilar fikricha, «Gata», «Yasva» shuningdek «Yashtalarning» (gimnlar) ayrim qismlari Avestoning eng qadimiy qismlaridir. Shu bois asardagi axloqiy qarashlarni «Gata»ni taxlil qilishdan boshlash maqsadga muvofiq, chunki unda zardushtiylikning insonga munosabati, mana shu insoniy jamiyatdagi o’rni va roli to’laroq ochiladi. Avesto ta’limotiga ko’ra ikkita kuch: yaxshilik va yomonlik mavjud bo’lib, ular bir-biri bilan abadiy murosasiz, dushmanlik holatida bo’lib keladi. Yaxshilik kuchlariga Axura Mazda, yomonlik kuchlariga Angra Man’yu boshchilik qiladi. Inson hayotini uning baxti yoki baxtsizligini ana shu kurashning natijasi belgilab beradi. Bir qatordan zardushtiylik adabiyotida inson sub’ekt sifatida emas, balki Xudo tasvir ko’rsatadigan ob’ekt sifatida ish tutadi, ya’ni insondan yo’lboshchilar, podsholar va kohinlarning «o’ta insoniy» obrazlari keltirib chiqariladi. (Bu jihatdan zardushtiylikning nassorolik va yahudiylik bilan g’oyaviy o’xshashligini ko’rish qiyin emas, keyingi bu ikki din ham, insonni Xudo «o’z tani va joniga» o’xshatib yaratgan va Xudo bilan inson aynan bir xil deydi). Ikkinchi tomondan inson Xudolarning xizmatkorlari, samoviy va dunyoviy hokimlar xohish-irodasini bajo keltiruvchilardir. Shunday bo’lishiga qaramay, zardushtiylik adabiyoti xohish- iroda va tanlash erkinligini inkor etmaydi. Uni faqat insonga nisbatangina emas, balki hatto hayvonot dunyosiga nisbatan ham birinchi o’ringa qo’yadi. «Sen molga tanlab olish, mol boqarga yoki mol boqar bo’lmagan kishiga qaram bo’lishni tanlab olish imkoniyatingni berib qo’yding» deb murojaat qiladi Zarartushtra Axura Mazdaga («Yasna»). Kishilar o’z amaliy ishlari, ijobiy axloqiy fazilatlari bilan yaxshilikka moyil ekanliklari, ko’rsatishlari va bu bilan yovuz kuchlarga qarshi kurashda yaxshilik

ruhiga ko’maklashishlari lozim, aks holda nomunosib hatti-harakat qiluvchi kishiga osongina yoionlik qopqoniga ilinib qolishi mumkin. Zardusht: «yolg’onchilikka ixlos qo’yganlar uchun abadul-abad azob-uqubatlar tayyorlab qo’yilgan», deydi. Shu bois inson hayot maqsadini tanlab, o’z zimmasiga muayyan majburiyat olar ekan, uni ado etish uchun javobgar bo’lishi lozim. Asarda Axura Mazdaning erdagi ko’makchisi sifatida ish tutuvchi o’troq chorvadorning dunyoqarashi o’z aksini topadi. Taqvodor chorvador «o’z turish- turmushida odil, oqil va hurmatga sazovor bo’lsa», katta podaga ega bo’lishi mumkin. Ko’rinib turibdiki, shaxsning axloqiy xislatlari birinchi o’ringa qo’yilmoqda, bu xislatlarsiz inson intilayotgan maqsadiga erishishining iloji yo’q. «Kimki yaxshi niyat yo’lidagina chorvador jamoasida bo’lsa», mehnati uchun uni Xudo yarlaqaydi. O’troq, chorvadorlar nazarida ko’manchilar eng ashaddiy dushmandir, ular odamlarni talaydi, chorvani haydab ketadi, kishilar boshiga kulfat va nadomatlar keltiradi, ular «chorvaga nisbatan va Olloh chorvasining egalari bo’lgan kishilarga nisbatan zo’rlik ishlatmasdan turib kunlarini ko’rolmaydilar». Bu axloqsiz mahluqlar azob-uqubatga loyiq, chunki yaylovlarni er bilan yakson qilishga chaqiradi, qullariga qurol olib yaxshilik homiylariga hamla qiladi, merosga qolgan mol-mulkni talon-taroj qilishga, «qiyqiriqlar bilan chorvani haydab ketishga» urinadi. Ko’rib turibmizki, qadimiy zamon xalqlarining axloqiy qarashlari «biz» va «ular» tushunchalarini ijtimoiy-ruhiy jihatdan albatta bir-biriga qarama-qarshi qo’yish vaziyatida shakllanadi. (Biz-yaxshi, ular yovuz kishilar), «CHorvador yaxshi niyat uchun kurashadi, chorvador bo’lmagan kishi bunday niyatdan yiroqdir». (Yasna), Axura Mazdaning ta’lim berishicha o’z baxt saodatini ko’zlashdan ham ko’ra ko’proq ilohiy qudratni mustahkamlashni ko’zda tutib harakat qiladigan odam birinchi navbatda shu dunyoning va samoning qudratli kishilariga xizmat qilish kerak. Barcha diniy rasm-rusumlariga rioya qilish Zardushtning barcha axloqiy yo’l-yo’riqlarini bajo keltirish har bir kishining muqaddas burchidir. Biroq Zardushtiylik ayni paytda

dunyoviy ishlarga faol munosabatda bo’lishiga: uy-joy qurishga, chorva, xotin va bola-chaqaga ega bo’lishga, ekin-tekin va daraxt ekishga, erlarni sug’orishga, mol- xol boqishga va boshqalarga da’vat etadi. Dunyoda qanday joy eng sevimli joy degan savolga Axura Mazda bunday javob beradi: «Taqvodor kishi o’t-olovi va sut-qatig’i va ichida xotini, bolalari bo’lgan uy qurgan joy chindan ham eng yaxshi joydir». Ko’rib turibmizki, Avestoda mehnat noz-ne’matlar manbai bo’lganligi uchungina emas, balki axloqiy sog’lomlik, ezgulik manbai sifatida ulug’lanadi. «Don ekkan kishi taqvodorlik urug’ini ekadi, u Mazdaga ixlosmandlik e’tiqodini olg’a so’radi, u iymonni oziqlantirib turadi». Bu qonunni bajarish 10 ming marta ibodat qilish bilan barobar yuzlab qurbonlik qilishga teng. «Ekin ekish demak erdagi yovuzlikni yo’qotishdir. Chunki don etilganda devlarni ter bosadi, tegirmon paydo bo’lganda devlar gangib qoladilar, uni chiqqanda devlar sarosimaga tusha boshlaydilar, non paydo bo’lgan paytda devlar qo’rqqanidan zo’r berib dod soladilar». Zardushtiylik adabiyotining xos xususiyatlaridan biri shundan iboratki, Avestoda ko’pgina axloqiy tushunchalari insoniy tus berilgan mavhumotli obrazlar shaklida bayon etiladi. Angra Man’yuning atributi bo’lgan, Angra Man’yu tevaragidagi boshqa yozuv iblislar orasida birinchi o’rinda turuvchi Ako Mana alohida mahluq sifatida talqin qilinadi. Yovuz ruhlar-dev, jin, iblis va boshqalar gunohlar, adashishlar, millatlar va hokazolarning obrazli shaklda berilishidir. Bu hol hayot haqidagi kishilar tasavvurini butun koinotga ko’chirish bilan aloqador bo’lib, kuchlar muttasil ravishda qutblarga ajralib turadi, ya’ni ezgulik tangrilari va ruhlari, yovuzlik tangrilari va ruhlari bilan ziddiyatli munosabatda bo’ladi. Avestoda Gumata (ezgu-fikr) Gutka (ezgu-so’z) va Gvarshta (ezgu-ish) da ifodalanadi. «Men ezgu-fikr, ezgu-so’z, ezgu-ishga shon-shavkat baxsh» etaman. Men egulikdan iborat Mazda qonuniga shon-shavkat baxsh etaman. Insonning fikri, so’zi va ishiga bir-biriga qarama-qarshi ikki kuch «Vohu Mana» (ezgu-fikr) va Akomana (yovuz-fikr) ta’sir ko’rsatadi. Bundan buyon barcha fikrlar, so’zlar va ishlar mazmunida ezgulik va yovuzlik yotadi.

«Yaxshi fikr» deganda, deb yozadi Avestoshunos A. Makavelskiy, ilohiy qonuniyat ruhidagi yaqin kishisiga mehribon bo’lish, muhtojlik va xavf-hatar ostida qolganda ko’maklashishga shaylik, yovuzlikka qarshi kishilar baxt-saodati uchun faol kurashishga tayyorgarlik, hamma bilan ahil va totuvlikda, o’z maslakdosh birodarlari bilan do’stlik va hamjihatlikda yashashga intilish ruhidagi pok niyat va fikrlar tushuniladi. Inson o’z fikri, hayolida hasad qilmasligi lozim, ezgu niyatli kishi darg’azab bo’lmaydi va boshqa jaholatlarga berilmaydi, chunki bunday holatga tushsa, ezgu niyatini yo’qotadi, burch va adolat haqida unutadi va nojo’ya harakatlar qiladi. Fikr, so’z va ishning birligi ibtidoiy insonning ajralmas fazilati edi. Uning ongi, axloqi va o’zgalar xususidagi tasavvurlari o’zi mansub bo’lgan jamoa bilan uzviy bog’langan bo’lgan. Jamoaning fikri uning ham fikri, jamoaning so’zi ham ishi edi. Shaxsiyat ibtidoiy insonga yod bo’lgan. Ijtimoiy va umumiy manfaatlarining uyg’unligi urug’chilik jamiyatining xos belgilaridandir. Jamoaning har qanday, hatto juda ham mushkul topshirig’ini bajarish uning a’zolari uchun muqaddas qonun edi. Ana shularning hammasi kishilarning moddiy turmush ehtiyojlaridan, qudratli va noayon tabiat kuchlari ta’sirotidan kelib chiqqanki, bu kuchlar oldida kishilar hali ojiz edi. Vaqt o’ta borishi bilan ilgari axloqiy tushunchalar shaxsiy kasb eta boradi. Masalan, ancha keyingi davrdagi zardushtiylikda «ezgu-so’z» deganda ahd- va’daga rioya qilish, qarzlarni to’lash, o’g’rilik va talonchilik qilmaslik, o’zgalarning molini o’zlashtirib olmaslik, buzuqlikdan o’zini tuta bilish va hokazolar tushunilgan. Shubhasiz, bular urug’chilik tuzumining emirilish davriga xosdir. Inson nafaqat ezgu kuchlar, balki yovuz kuchlar ta’siriga ham berilib turadi: ezgulik ruhlari to’dasiga yovuzlik ruhlari, lashkari qarama-qarshidir. Zardusht yovuzlik kuchlariga ko’maklashuvchi kishiga g’azab bilan hamla qiladi, chorvachilikning gullab-yashnashiga halal beruvchi yolg’onchilik islohmandlariga qarshi kurashdan shavqatsiz bo’ladi.

«Kimki menga sodiq bo’lsa,-deyiladi «Gata» da eng yaxshi narsaga musharraf bo’ladi, kimki sodiq bo’lmasa, unga eng yomon narsa nasib etadi, mening aql- idrokim va fikrimning ahd-qarori ana shunday. Kimki, meni Zardushtni qo’llasa, buning evaziga istalgan barcha narsalari bilan birgalikda bir juft sog’in sigir ham oladi». Zardushtiylik ta’lisotiga ko’ra, 15 yosh balog’at yoshi hisoblangan. Balog’atga etgan yigitni zardusht qonunlariga, falsafa, axloq-odobga o’rgatishgan, Xudojo’y, mehnatsevar, odil, o’y-niyati, so’zi, ishni ezgu bo’lishi va hokazolarga e’tibor berilgan. Zardushtiylik ta’lim berishicha, burchning eng birinchi da’vatlaridan biri faqat sihat-salomatlik va jismoniy kuch haqidagina emas, balki ma’naviy soflik haqida ham g’amxo’rlik qilishdir. Shuningdek, ayollar sihat-salomatligi haqida, ularning homiladorlik paytidan ayniqsa ko’proq g’amxo’rlik qilish zarur. Dindorlar tozalikka (badan tozaligidan tashqari suv manbalari va hokazolar tozaligiga) rioya qilishi, Avestoda zararli Druj Masuposhsha obrazida tasvirlangan markazlaridan o’zini ehtiyot qilishi lozim. Mazkur din o’z vaqtida ovqatlanishni qat’iy belgilab qo’yadi. Insonning ma’naviy hayoti Avestoda uning moddiy ta’minlanganligi bilan bevosita aloqador qilib qo’yilgan. «Eb-ichmaydigan insonning toat-ibodat qilishga kuchi bo’lmaydi, er-xotinlik vazifasini ado etishga quvvati etmaydi ...». Och qolish va yaxshi ovqat emaslik kishilarning axloq-odobiga ham salbiy ta’sir ko’rsatadi: «Oziq-ovqat yaxshilanishi bilan xalqning axloq-odobi ham ko’chayadi. Ovqat mo’l-ko’l bo’lsa, ilohiy so’zlar yaxshiroq idrok etiladi». Zardushtiylik ta’limoti jonzotlarga beshavqat bo’lishni qat’iyan man etadi. Hayvonlarni kaltaklash, qiynash, diniy va axloqiy nuqtai-nazaridan katta gunohdir. Kishilar uy hayvonlari jon ko’ydirishiga, ularga o’z vaqtida ovqat berib turishga, yirtqich hayvonlardan qo’riqlashga da’vat etadi. «CHorvadorlik to’q bo’lishi uchun, chorvani mo’ttasil parvarish qilmoq lozim». Avesto paxlaviy tilidagi «Bundixeshn» kitobi bilan tugaydi. Unda odob-axloq muammolari ilohiyot ta’sirida bo’lganligi yaqqol ko’rinadi. Xayrli ishlar uchun

kelgusi hayotda taqdirlanishi yoki yovuz hatti-harakatlar uchun jazolanish kutadi kishini. Hozir yomonlik va yaxshilik o’rtasida ikkilanib turgan kishi qiyomat kunida yaxshilik uchun ham, yomonlik uchun ham javob beradi. Bordi-yu, inson hayoti ezgu fikr, ezgu so’z, ezgu ishlar bilan o’tgan bo’lsa, uning iymon-e’tiqodli joni zardushtiylikka ko’ra abadul-abad, rohat-farog’atda o’tadi, bunday kishi tanasi ulkan qiyomat ayyomida joni bilan qo’shilishini kutadi. Mabodo u ana shu uchlikka qarshi yursa, unda gunohkorning joni o’limdan keyin, qiyomat kunida haqqoniy ravishda jazo oladi. Avesto gunohkorning azob-uqubatda qolgan jonini shu tariqa talqin etadi. Gunohkorning joni: «Sizlar kim, men yorug’ jahonda hech qachon ko’rmagan yaramas va manfur kishilarmisizlar?-deb so’raydi». Yovuz devlar javob qiladi: «Biz devlar emasmiz, sen o’ylagan, gapirgan va qilgan yovuz fikrlar, yovuz so’zlar, yovuz ishlarimiz. Or-nomussiz bo’lgan bizlar sen tufayli yanada ko’proq or-nomussiz bo’ldik, manfur bo’ldik, sen tufayli bizlar tavqi la’nat bobida yanada ko’proq sharmandai sharmisor bo’ldik». Avestodagi axloqiy qarashlarning qisqacha manzarasi shundan iboratki, u O’rta Osiyo xalqlari tarixining eng qadimiy zamonlardan to Islom davrigacha bo’lgan davrni qamrab oladi. Shuningdek, bu asarni bir qator Sharq mamlakatlarining ham eng qadimiy madaniy yodgorligi deb bilmoq zarur. Binobarin bu xalqlar siyosiy, iqtisodiy va madaniy munosabatlardan o’zaro chambarchas aloqada bo’lgan. 3. Turonzaminida VII asrgacha ilm-fan, madaniyat, tarbiya, pedagogik fikr . Turkiy xalqlarining yozm а ma’rifiy yodgorliklari o’ziga xos xususiyatga ega bo’lib, ular yangi davr kishisini tarbiyalashda muhimdir. Bular «Urxun-Enisey yodgorliklari», «Irq yozuvlari» kabilardir. Eng qadimgi turkiy tilda yaratilgan va turk-runiy yozuvda bitilgan Urxun- Enisey bitiklari VI-VIII asrlarda yozib qoldirilgan bo’lib, ular ta’lim-tarbiyaga oid qimmatli ma’lumotlar beradi.

Toshga o’yib yozilgan Urxun-Enisey yodgorliklari dastlab Enisey havzasida, so’ngra Mo’g’ilistonning Urxun daryosi bo’yida topilib, Daniyalik olim Vilgelm Tomson 1893 yilda bu yozuvni birinchi bo’lib o’qigan. Bu yozuvni o’rganish uchun bir qator olimlar O’zbekistondan Oybek, O. Sharofuddinov, N. Mallaev, A. Qayumov, A. Rahmonovlar tadqiqod ishlari olib borganlar. Ma’lumki, VI asr o’rtalarida Oltoy, Ettisuv va Markaziy Osiyo hududlarida turk hoqonligi tashkil topdi. Bu hoqonlik g’arbda Vizantiya, janubda Eron, Hindiston, sharqda Xitoy bilan chegaradosh bo’lgan. Turk hoqonligi Turkyut hoqonligi davlati deb ham atalgan. Turk hoqonligi asosan 3 kishi: Bilga hoqon (Mo’g’ilyon) sarkarda Kul tegin va vazir Tunyukuklar qo’lida markazlashgan edi. Bitik toshlarda turk hoqonlarining yurishlari, jasoratlari, ularning bilimli, mard, xalqparvar, alp yigitlar ekanligi bayon etiladi. O’z vatani mustaqilligi uchun kurash, xalqni asoratdan olib chiqish, ularning birligini ta’minlash hoqonlar Bo’min, Istami, Eltarash, Eltarishining o’g’illari Bilga hoqon, lashkarboshi Kul tegin, ma’naviy otalari Tunyukuklarning zimmasiga tushgani hikoya qilinadi. Kul tegin bitigida u xalqparvar, tadbirkor, xalqning kelajagini o’ylaydigan jonko’yar sarkarda, o’z manfaatidan Vatan manfaatini yuqori qo’yuvchi shaxs sifatida ta’riflanadi. Kul tegin Eltarosh hoqonning kichik o’g’li u 731 yil 27 fevralda 47 yoshida vafot etadi. Bitiktosh 732 o’rnatilgan. Bu bitiktoshda barcha voqealar Kul teginning akasi Bilga hoqon tilidan hikoya qilinadi. Uning haqiqiy ismi Mug’ilyon bo’lgan. Bitigini muallifi Kul teginning jiyani yo’llug’ tegindir. Kul tegin bitigida Bilga hoqonning og’a-inlariga, qarindosh-urug’lariga murojaati, ularning xatolari tufayli turk elida falokatlar sodir bo’lgani ifodalanadi. Turklarning harbiy yurishlari, ularga qo’shni bo’lgan tabgachlarning bosqinchiligi tufayli xalq boshiga kulfatlar tushgani, ularning yolg’onchilik, firibgarlik qurboni bo’lganligi ta’kidlangan. «Oltin, kumush, ichkilik, ipakni shuncha hisobsiz berayotgan Tabgach xalqi so’zi shirin, ipak kiyimi nafis ekan.

Shirin so’zi, ipak kiyimi bilan aldab, yiroq xalqni shu xilda yaqinlashtirar ekan. Yaxshi qo’shni bo’lgandan keyin yovuz ilmni u erda o’rgatar ekan». Yaxshi dono kishini, yaxshi asl kishini yo’latmas ekan. Biror kishi adashsa, urug’i, xalqi, uyi, yoping’ichigacha qo’ymas ekan. Shirin, so’ziga, nafis ipagiga aldanib, ko’p turk xalqi, o’lding. Turk xalqining ayrimini u erda yovuz kishi shunday pishiqlar ekan. Yiroq bo’lsa, yomon ipak beradi.Yaqin bo’lsa, yaxshi debo beradi,deb shu xilda pishiqlar ekan. Ilmsiz kishi u so’zga ishonib, unga yaqinlashib ko’p kishi o’ldi. Kul tegin bitigida bilga hoqon eng muhim insoniy xislatlar, hayotiy zaruriyatlar haqida pand-nasihat bayon etadi. Turk xalqi birlashmagani, bir-biriga ishonmagani uchun, hiyla va firib qurboni bo’lib, tabgachlar ularni qul va cho’ri etgani, qashshoq, erksiz, mute bo’lganligini kuyunib so’zlaydi. «Tangri yorlaqasin, baxtim bor uchun, nasibam bor uchun o’layotgan xalqni tiriltirib tarbiya qildim, yalong’och xalqni ko’p qildim. To’rt jihatdan xalqni butunlay el qildim, bir-biriga do’st qildim, butunlay menga qaradi. Mehnatni, kuchni beruvchi shunday hokimiyatni qozonib inim Kul tegin vafot etdi,»-deydi. Ikkinchi bitik Bilga hoqon haqida. Bilga hoqon Turk eli o’rtasida elparvar hoqon deb tanilgan edi. U Turk xalqining vatani bo’lishi uchun kurashdi. Xalqqa qarata shunday o’git qilar edi: Vatanni saqlab qolmoq faqat hoqonga emas, xalqqa ham bog’liq. Xalq hoqonning yo’l-yo’riqlarini amalga oshirmasa, boshiga ko’p kulfatlar tushadi. Hoqon uncha ishonuvchan bo’lmasligi, boshqalarning gapini o’ylab, mulohaza qilib amalga oshirishi lozim. Samimiy so’z bilan yolg’onni farqlay olish kerak. U xalqqa shunday murojaat etadi: «Men yashadim, Turk beklari, Turk xalqim. Bu hoqoningdan, bu beklaringdan, eringdan, suvingdan ayrilmasang, Turk xalqi, o’zing ezgulik ko’rajaksan, betashvish bo’lajaksan». Uchinchi bitik Tunyukukka bag’ishlangan. Yuqoridagi yozuvlardan tashqari, Alplarning jangovorligiga, axloq-odobi va bilimiga bag’ishlangan ham ko’plab topilgan.

Eng qadimgi ma’rifiy yodgorliklarimizdan «Irq bitigi» (Ta’birnoma) ham Urxun-Enisey yozuvlari qatorida ta’lim-tarbiya tarixida o’z o’rniga ega. Adabiyotlar: 1. Karimov I.A. Olloh- qalbimizda va yuragimizda. T .: «O‘zbekiston» 1998 2. Barkamol avlod orzusi. Sh. Karimov va b. tah. ost. T.: «Sharq» 1999 3. Barkamol avlod- O‘zbekiston tarqqiyotining poydevori. T.O‘zbekiston»1997 4. Hoshimov K.,.Inomova M. Pedagogika tarixi. T.: «O‘qituvchi», 1996 . 5. Hasanboev J va b. Pedagogika tarixi. T.: «O‘qituvchi», 1996 6. O’zbek pedagogikasi antologiyasi. Toshkent, 1995

7 . Avesto. Dushanbe. 1990

Похожие

XI-XII аsrlаr Sharq adabiyotida pedagogik fikr rivoji

XVII-XIX asrlarda markaziy osiyoda maktab va pedagogik fikr

Qadimgi Markaziy Osiyoda pedagogik fikr taraqqiyosh tarixi

Turkistonda uyg’onish davrida maktab va pedagogik fikr

Markaziy Osiyoda islom ta’limotining yoyilishi va uning tarbiya, maktab, pedagogik fikr taraqqiyotiga ta’siri