Марказий Осиёга христианликнинг кириб келиши - Основы культурологии - Рефераты

Марказий Осиёга христианликнинг кириб келиши

Загружено в:

20.09.2019

Скачано:

0

Размер:

69 KB

Марказий Осиёга христианликнинг кириб келиши Режа : 1. Марказий Осиёдаги биринчи христиан миссионерлари 2. Шарқда христианликнинг тарқалишига қўл келган омиллар 3. Ўзбекистон ҳудудида христианлик; 4. Минтақада несторианлик.

Марказий Осиёдаги биринчи христиан миссионерлари Марказий Осиёда христианликнинг тарқалиш жараёни кўпгина мутахассисларнинг тадқиқот мавзуи бўлган. Улардан бири йирик рус шарқшуноси В.В.Бартольд бўлиб, унинг тадқиқотларидан бири Еттисойда топилган сурёний қабртош ёзувларига бағишланган. В.В.Бартольд бу мавзуга бир неча марта Мовароуннаҳрнинг мўғулларгача бўлган давр тарихига оид тадқиқотларида қайтган. Мазкур мавзу Г.И. Богомолов, Ю.Ф. Буряков, Л.И.Жукова, А.А. Мусакаева, Г.В. Шишкина, 3.И. Усмонова, Л.И. Альбаум, И.Д. Иваницкий, Т.В. Беляева, Б.А. Абдулғозиева, В.Д. Горячева, С.Я. Перегудова, К.М. Байпаков, Л.В. Ундерова каби тадқиқотчилар томонидан ҳам ўрганилган. Уларнинг маълумотлари ушбу Марказий Осиёда христианлик бўйича тузилган маърузаларимизда ҳам кенг фойдаланилди. Христианлик таълимотининг тарқалишида христиан жамоаларининг Шарқ ва Жанубга ҳаракатлари даврида амалга оширган кенг миссионерлик фаолиятлари катта роль ўйнади. Экваториал Гвинея, Бурунди ва Тонга каби Африка давлатларининг герб ва байроқларида «библия» ёки «вифлеем юлдузи»нинг мунтазам равишда акс этиши маҳаллий аҳолига тарғиботчилар кўрсатган давомли таъсирларидан далолат беради. Бошқа тарафдан, христианликнинг Марказий Осиёга кириб келишига Рим империясида христианларнинг беаёв тазйиқ остига олинишлари ҳам сабаб бўлди. III асрга тегишли бир Сурия манбаи Ўрта Осиё икки дарё оралиғини ўз ичига олган Кушон давлатидаги христианлар ҳақида маълумот беради. Улар Эрон, Ўрта Осиё аҳолисини христианлик билан таништирдилар, Монголия чўллари ва ҳатто Хитойгача етиб бордилар. Христианликнинг олдин Эронда, кейин Ўрта Осиёда тарқалишини анъанага кўра, христианларнинг аввал Византия, кейин эса Сосоний ҳукмдорлари томонидан тазйиқ остига олинишлари билан боғлайдилар. Аммо афтидан бу тазйиқлар фақат аввалги сепилган уруғларнинг униб чиқишига шароит яратган.

Христианларнинг Шарққа ҳаракатланиши Буюк ипак йўли савдо йўлларининг шаклланиши, унга хизмат кўрсатишга мўлжалланган муайян ҳунарманд ҳамда савдогар қатлам ва гуруҳларнинг шаклланиши билан ҳам боғлиқ. Биринчи босқичда бу Шарқдаги йирик шаҳарларда яҳудий жамоаларнинг жойлашиши билан боғлиқ бўлган. У ерга янги таълимот тарғиботчилари ҳам интилганлар. Илк христиан гуруҳларини ўрганиш улар ичида ҳунарманд, савдо доирасига хос бўлганлар аксариятни ташкил қилганини кўрсатади. Павел ҳамда Коронфадаги Акина апостоллар ишларига кўра, чодирлар тайёрлашган. Мато билан савдо қилувчи аёл ҳақида ҳам гапирилади. Исо Масиҳнинг онаси Биби Марямни христианликни танқид қилувчилар «ип йигирувчи» деб аташар эди. Эрамизнинг II асри охирида христианликнинг рақиблари унинг миссионерларини кўнчи, тўқимачи, жун савовчи, кигиз босувчилар, яъни антик шаҳарлардаги энг камбағал ҳунарманд-косиблар орасида диний тарғибот юритишда айблашган. Шарқ давлатларида биринчи юз йилликдаёқ тарқалиб улгурган христианлик биринчи навбатда сиёсий воқеалар сабабли бир неча бор гуллаб-яшнаш ва таназзул даврларини бошидан кечирди. Эрондаги биринчи христиан жамоалари тўғрисидаги маълумотларни, анъанага кўра, эрамизнинг II асри билан боғлашади. Бунда кўпинча Сосонийлар давлатида ғайридинларни, жумладан, христианларни қувғин қилишни ташкил этган коҳин Картирнинг ислоҳотлари далил қилиб кўрсатилади. Аммо бу воқеа III асрнинг иккинчи ярмига таллуқлидир. Маълум бўлишича, III аср ўртасида ғарбий ҳарбий колонияларда асир олинган римлик аскарларнинг аксарияти христианлар эди. Уларни Шопур I ўзи асос солган Яқин Шарқдаги шаҳарларда жойлаштирди. Эроннинг Шод-Шопур, Вех-Шопур, Антиох- Шопур шаҳарларидаги илк христиан жамолари ҳақида хабар берган христиан анъанаси айнан шу воқеаларни назарда тутади. Харк оролидаги христиан катакомбалари ҳам шу асрга оиддир. Шунинг учун II асрдаги Эрон христиан жамолари ҳақидаги маълумотлар гипотезалигича қоляпти.

Тадқиқотчиларнинг фикрича, Ўрта Осиёнинг жанубий чегараларига яқин ерларда жойлашган жамоалар бу ерда христианликнинг пайдо бўлишида асосий рол ўйнаган. Улар Византия, Сурия, Фаластин ва Эрондан Ўрта Осиёга кўчиб келиб, бу ерда ўзлари билан олиб келган ўз маданияти, санъати ва диний таълимотини тарқатишган. Марв христианлари тўғрисидаги маълумотлар энг қадимги ҳисобланади. Илмий адабиётда шундай фикр мавжудки, христианлар, Беруний гувоҳлиги бўйича, Марвда Исо Масиҳ туғилганидан 200 йил ўтгач пайдо бўлган. Беруний Марвга христианликнинг диндор Барахий томонидан 200 йилдан кейин олиб кирилгани ҳақида маълумот беради. Археологик маълумотлар эса, Марв шаҳри атрофида христиан эҳромининг III-IV асрларда фаолият кўрсатгани ҳақида далолат беради. III асрнинг иккинчи ярмида кучайиб бораётган зардуштийлик коҳинлари, айниқса, Варахрон II (276-293) устози олий коҳин Картир даврида сосонийлар Эрони чегарасида ҳамма ўзга динларни йўқ қилишга ҳаракат қилади. Аммо Марвдаги буддизм мисоли кўрсатадики, сосонийларнинг Шарқдаги диний сиёсати христианларга нисбатан ушбу талабларга ҳар доим ҳам жавоб беравермаган. III аср охиридан эса, Варахрон меросхўри Нарс (293-302) даврида зардуштийлик фанатизми пасайди ва христианликка нисбатан ўзгарди. Буни шундан ҳам билса бўладики, 334 йилдаги манбаларда IV аср бошларида Марвда епископлик ташкил этилганлиги ҳақида айтилади, V аср бошида эса метрополия ташкил қилинади. Турли ибодатхона ва монастирлар метрополиянинг яқин ва узоқ ҳудудларида монеликсиз ўз фаолиятини давом эттиради.

Христианликнинг марказий осиёдаги марказлари Қадимги ва ўрта аср Туркистонидаги христианлик ҳақида дастлабки маълумотларни шарқшунос академик В.В.Бартольд тайёрлади. У Ўрта Осиё икки дарё оралиғида жойлашган ҳамма давлатлардан ўрта асрда ўтган савдо йўлларини батафсил таҳлил қилади. Бу тасодифий эмас. Халқларнинг ўзаро диний ва маданий муносабатлари савдо-иқтисодий муносабатларидек қадимги ва муҳим. Бундан ташқари, униси ҳам, буниси ҳам бир хил йўналишдан борган, чунки улар тинчлик, тотувлик мақсадаларида ривожланган. Бартольд савдо йўлларини батафсил таҳлил қилишига сабаб улардан диний тарғибот мақсадларида ҳам фойдаланилганлигидирки, буни ёзма манбалар тасдиқлайди. Қуруқликдаги йўлларнинг шаклланиши хронологик анъанага кўра, Ханьлар Хитойи элчиси Чжан Цань (эр.ав. 138-126) дипломатик миссияси билан бошланади. Ушбу дипломатик миссиянинг мақсади Ғарбда Хитой чегараларида турган урушқоқ кўчманчи қўшинлар – Хун қабилаларига қарши курашиш учун иттифоқчилар қидириш эди. Ҳарбий нуқтаи назардан унинг миссияси муваффақиятсиз бўлди. Хунлар қўлида 10 йилдан зиёд асир бўлган Чжан Цань кейинчалик уларнинг потенциал кучли рақиблари бўлган Амударё соҳилларида яшовчи Юэчжилар ҳудудига келиб қолади. Бу ерда Чжан Цань гуллаб-яшнаётган мамлакатларни кўради. Бу мамлакатларнинг халқлари азалдан қўшнилари Ҳиндистон, ҳатто Хитойнинг алоҳида шаҳарлари билан савдо олиб боришар ва тинчлик тарафдори эдилар.Бу йўллар фанда асосий савдо предметларидан бирининг номи билан Буюк Ипак Йўли деб аталди. Шундай қилиб, Хань императори учун қўққисдан ғарбий давлатлар ва минг йиллик тарихга эга алоқа йўллар очилди. Чжан Цаннинг дипломатик миссиясидан сўнг Ханлар Хитойи томонидан ғарбий мамалакатларга савдо- дипломатик йўллар расман шаклланади. Бу воқеалардан сўнг эрамизнинг I асрларида қулай сиёсий тизим пайдо бўлди. Бу тизим Европанинг деярли ҳамма илғор давлатларини қамраб олди.

Тўрт империя – Рим, Парфия, Кушон подшоҳлиги ва Ханлар Хитойи квартети ташкил қилинди. Улар сиёсий, иқтисодий ва маданий ўзаро муносабатга кирдилар. Савдо предметлари билан бир қаторда фан ва техниканинг энг яхши ютуқлари ҳамда ғоялар ҳам алмашилар эди. Карвонлар таркибида савдогар ва дипломатлар билан бирга ҳунарманд ва олимлар, турли динларнинг миссионерлари ва муридлари боришар эди. Буларнинг ҳаммаси иқтисод-техника ва фан-маданият соҳасидаги ютуқларни ўзаро алмашувга сабаб бўлди. Савдо йўлларидаги пунктлар турли дин муридлари ва миссионерларининг учрашув жойи бўлиб қолди. Карвонлар тўхтаган жойлардаги мамлакат ҳукмдорларининг саройларида ҳам қизғин фалсафий- диний баҳслар бўлар эди. Шундай ҳам бўлардики, номаълум миссионерлар, диний ғояларнинг хабарчилари бирон-бир ҳукмдорнинг яқини бўлиб қолар эди. Уларнинг тарафдорлари эса дўстона мамлакатда жойлашар эдилар. Савдогарлар учун ҳам маънавий тарғиботчилар муҳим эди, чунки узоқ йўлда номаълум давлатларда суянч бўлишар эди. Бу йўлнинг қуруқликдаги трассалари Ҳиндистон ва Эрон, Ўрта Осиё давлатлари орқали Бактрия жанубидан марказий ҳудудларга – Фарғона, Суғдга, кейин эса - Чоч орқали янада шимолроқдаги ҳудудларга: Жанубий Қозоғистон, Сибир ва Еттисойга ўтган. Трассалардаги миссионерлар фаолиятининг излари Ўрта Осиё қишлоқ ва шаҳарларининг моддий маданияти ва ёзма манбаларда сақланиб қолган. Жаҳон динлари орасида бу ерда христианлик фаол роль ўйнайди, унинг миссионерлари йирик шаҳарлар, айрим қишлоқларда, ҳатто чўлдаги чўпонлар орасида тарғибит ишларини олиб боришган. Илк доимий савдо йўллари Парфия ва Сосонийлар Эрони, Ўрта Осиёнинг жанубий ҳудуди орқали ўтган. Бунда икки омил ҳал қилувчи роль ўйнаган – савдо йўллари йўналиши ва черков томонидан тақиқланган турли секта ва дин тарафдорларининг ўз ерларидан ҳайдалиши.

Ўрта Осиё учун биринчи навбатда унга чегарадош ҳудудларда пайдо бўлган христианлар жамоаси алоҳида аҳамиятга эга бўлган деб тахмин қиладилар. Христиан жамоалари пайдо бўлган биринчи шаҳарлар деб Марв, Самарқанд ва, балки, Термиз ҳисобланади. Чунки улар ҳудудидан илк карвон йўллари ўтган. Марв маълумотларига кўра, II асрдан бошлаб шаҳарнинг ғарбий деворлари ортида черков бинолари пайдо бўлади. Марвда Епископ пайдо бўлгандан сўнг, яъни IV асрдан бошлаб ибодатхона шаҳарга ўтказилган бўлиши мумкин. Чунки шаҳар атрофида христиан қабристони жойлашган. Бу эса христианлранниг сони кўплигидан далолат беради. Эрондаги Маздакийлар ҳаракати зардуштийликнинг расмий дин сифатидаги аҳамиятига путур етказган V-VI асрларда Христиан жамоасининг ўсганлиги кузатилади. Ушбу даврда Хуросоннинг шимолий ҳудудларида христианликнинг муваффақиятли тарғиботи 420 йил атрофида Марвда митрополия очилиши билан якунланади. Бу ерда монастирлик жамоаси пайдо бўлади. Черков буюмларини тайёрлайдиган устахоналар ҳам вужудга келади. Марв йирик Шимолий Хуросон митрополияси маркази бўлиб қолади. Ундан ғарбга кетадиган карвон йўлида Кўктепа ҳудудида илк христианликка оид олтин буюмлар топилган. Марвга яқин жойда Хоразм шимолий савдо йўлида шаҳардан икки фарсах нарида V-VI асрларда Эфес, Ктесифон, Сард типидаги илк Кичик Осиё черковлари анъанасида қурилган катта черковли христиан қишлоғи пайдо бўлади. Унинг чўзиқ зали бир нечта гумбазли бўлиб, уларнинг ўртасидагиси баландлиги билан кўзга ташланиб туради. Христиан таъсирининг излари Марвдан шарққа олиб борувчи Амул йўлидаги қишлоқ ва қалъаларда сезилиб туради. Кўп сонли манбалар нуфузли обрўга эга бўлган христиан форслар ҳақида кўплаб маълумот беради. Тадқиқотчиларнинг фикрича, насронийлик Эронда шунчалик кучайганки, хатто у зардуштийликнинг ўрнини ҳам эгаллаши мумкин эди, аммо фақатгина араб истилоси бунга халақит берди.

VII асрда христиан жамоалари Ўрта Осиёнинг марказий ва шарқий минтақаларида патриарх Иешуяб II даврида (628-643) кўпайди. Самарқандда митрополия фаолият кўрсатар эди. Ҳозирги Ургут шахри ўрнида бўлган тоғли ҳудуд Шавдардаги Вазкерд христиан жамоасининг гуллаб-яшнаши тахминан шу даврга тўғри келади. Ибн Ҳавқалнинг фикрича, Шавдар ўзининг ажойиб иқлими, нонвойчилик ва овчилик билан шуғулланган соғлом аҳолиси билан машҳур бўлган. Туркманистондан то Қирғизистон худудигача олиб борилган археологик тадқиқотларга кўра, юқоридаги даврларда черковлар, ибодатхоналар кўпайиб борган. Илк ўрта асрларда (IV-VIII аср) Суғд, Усрушона, Шош, Хоразмда несториан хочлари суратлари, Суғд ёзуви ва муқаддас хайвонлар тасвири туширилган тангалар зарб этилган. Суғдга кўчиб келган диндор ва насронийлар билан бирга уларнинг урф- одатлари ҳам кириб келган. Самарқандда муқадддас Мина буюми керамикадан ишланган бўлиб, ундаги авлиёнинг икки елкасида хоч, оёқлари остида ётган иккита туя тасвири ифодаланган. Бу каби буюмлар VI-VII асрларда Мисрдаги муқаддас Мина ибодатхонасида ҳам ясалган. Бундай тарихий буюмларнинг топилиши Самарқанд ва унинг атрофлари христианлар учун муқаддас жой бўлганлигидан далолат беради. Самарқанд ва Ургутдаги топилмаларни ўрганиб чиққан М.Е. Массон ҳам бу жойларда насронийлар яшаган деган хулосага келган. Топилмалар орасида Муқаддас Мария тасвирланган деворий суратлар ҳам бор. Ёзма манбаларга кўра, Жиззах вилоятида (Усрушонанинг бир қисми) Винкерд номли насроний аҳоли яшаган. Бу аҳоли хунармандчилик билан ҳам шуғулланган. Вазкерд худудидаги ғор деворларидан Эзгулик, Сара ва Елизаветанинг учрашуви, Исо туғилиши ифодаланган суратлар топилган. Арабларнинг Ўрта Осиёни босиб олиши кўплаб мафкуравий ўзгаришларга олиб келди. Араблар ўзлари босиб олган худудларда исломни мажбуран сингдира бошладилар.

Кўплаб черков ва ибодатхоналар масжидга айлантирилди. Масалан, Атторан яқинидаги черков Бону Ханзан ва Калон масжидларига айлантирилган. Араб истилоси даврида ислом Эрон ва Ўрта Осий маданияти билан уйғунлашиб кетди. Насронийлар халифат давлатларида малакали табиблар бўлиб, юқори лавозимларда ишлашган. Улар орасида файласуф, дипломатлар ҳам бўлган. Араб истилосидан сўнг Шарқдаги сиёсий-маданий марказлардан бири Марв эди. IX аср бошларида Ҳорун ар-Рашид укаси Маъмун билан урушган даврда Марв халифалик маркази эди. XII асрда Марв Салжуқийлар давлатининг пойтахтига айланди. Юқоридаги воқеалар фан ва маданиятнинг ривожланишига имкон берди. Мисол тариқасида машҳур насроний табиб Али ибн Саҳл Раббаини келтириш мумкин. У 808 йилда туғилган. Унинг отаси Марв ҳокимининг котиби эди. Араб географи ал-Киндининг ёзишича, Раббаи файласуф ва математик ҳам бўлиб, Афлотуннинг “Алмагест” асарини юнончадан таржима қилган. Сўнг унга Раббаи -Ўқитувчи деб ном беришган. Беруний марвлик насроний табиб Ибн Масадан кўп таълимот ўрганган. Ибн Маса кўплаб илмий асарлар ёзиб, доривор ўсимликлар ва қўзиқоринларнинг ўсадиган жойлари ва ҳосиятларини тасвирлаган. Патриарх, Тимофей даврида (780-819й.) Ўрта Осиёга христиан миссионери Субхальешу йўл олади. Тимофей христианликни қабул қилган турк хоқони ва бошқа бошқарувчилар билан тез-тез ёзишиб туради. Сомонийлар даврида (1Х-Х аср) христианликнинг аҳволи ўзгаради. Ислом давлат дини бўлгани учун мафкурада асосий ўринни эгаллаб, ғайридинларни сиқиб чиқаради. Юқорида қайд этилганидек, Наршахий Бухорода христиан черкови ўрнида мусулмон масжиди қад ростламоқда, деган экан.

Шунака вазият, масалан, давлатнинг шарқий ҳудудларида ҳам кузатилади: Тараза забт этилгандан кейин, христиан ибодатхонаси ўрнида масжид қурилади, Марвда собор черкови ўрнида масжид қайд ростлайди. Шу вақтнинг ўзида христиан жамоалари Ўрта Осиё вилоятларида ҳам, унинг шарқий колонияларида ҳам фаолиятини юргазаверади. Бу хақда юқорида қайд этилганидек, Самарканд яқинидаги Шавдарада жойлашган христианлар қишлоғининг ривожланганлиги ва X асрда унинг жамоаси ўз ибодатхонасига эга бўлганлиги гувоҳлик беради. Сирдарё қирғоғидаги Вазкерд христианлар қишлоғи ҳам тасвирланадики, бу Самарканд ва Марв митрополиялари фаолияти тўхтаб қолмаганлигини билдиради. Сомонийлар давлатининг инқирози ва Қораҳонийларнинг давлат тепасига келиши ҳар хил динларнинг, шу жумладан христианликнинг ривожланишига олиб келди. 841-847 йилларда Марказий Осиёда уйғурлар манихей давлати халок бўлади, лекин шундан сўнг аҳолининг кўп қисми христианлик динини қабул қилади. 1009 йилда несториан рухонийлари Марказий Осиё халқларининг мўғул тилида сўзлашувчи энг йирик ва энг маданий бўлган караитийларни чўқинтирганлар. Чўлда адашиб қолган Караит хонига, гўё, илохий Сергий пайдо бўлиб унга йўл кўрсаткан экан. Хон ҳамма халки билан бирга ч ў қиниб, Маргуз(Марк) номини олган. Тахминан шу пайтда онгутлар халқи -жангари туркларнинг авлодлари (хунларнинг сўнгги қолдиқлари) христианликни кабул килишади. Шу даврда Моварауннаҳрни забт этиб Х-Х1 асрларда Қораҳанийлар империясини тузган қабилалар таркибига кирувчи гузалар ва кисман чигилалар ҳам чўқинтирилган эди. Несторианлик XII аср бошига келиб ҳам ривожланди. ХI-ХП асрларда Самаркандда несторианлар митрополияси давом этмоқда эди. Шу вактда несторианлик турк халклари ўртасида кенг таркалган эди, Корахонийлар турк сулоласи давлат тепасига келиши билан уларнинг Суғдга келиши кучайди.

Еттисойда ўша даврга оид сирийа ёзувлари битилган кўплаб қабр тошлари сакланиб колган бўлиб, булар В.В. Бартольднинг фикрига кура, Кангла турк қабилаларига тегишлидир. XIII аср бошларида Ўрта Осиё мўғуллар томонидан заб этилган эди, бу оқибатда кўп шаҳарлар вайрона бўлишига олиб келди. Шу бил а н бирга уларнинг Ў рта Оси ё га келиши билан яна несторианлар келиши кузатилади. Марко Поло ҳам XIII асрнинг иккинчи чорагида Самарканда қурилган Авлиё Иоанн Крестител черковини тилга олиб ўтган.

Адабиётлар : 1. Д.А.Авдусин.Основы археологии. М. 1989. 2. А.А.Асқаров. Сапалитепа. Ташкент, 1973. 3. Атеистический словарь. А.И.Абдусамадов, Р.М.Алейник, Б.М.Алиева ва бошқ. М.П.Новикова умумий таҳр. Остида – М.:Политиздат, 1984. 4. Л.С.Васильев.История религии Востока. М. 1983. 5. В.Н.Даниленко. Космогония первобытного общества. М. 1999. 6. А.П.Окладников.Утро человечества. Л. 1967.

Похожие

Исломнинг Марказий Осиёга кириб келиши ва исломлашув жараёнининг хусусиятлари

Христианликнинг асосий йўналишлари - Католиклик, Православлик, Протестантлик

Христианлик

Марказий Осиёда яҳудийлик

Марказий осиё, зардуштийлик