Qishloq xo’jaligida ishlab chiqarish xarajatlari va mahsulot tannarxi - Экономика - Рефераты

Qishloq xo’jaligida ishlab chiqarish xarajatlari va mahsulot tannarxi

Загружено в:

26.10.2022

Скачано:

0

Размер:

254.4736328125 KB

Qishloq xo’jaligida ishlab chiqarish xarajatlari va mahsulot tannarxi Reja: 1. Qishloq xo’jaligida qilinadigan xarajatlar va ularning turkumlanishi. 2. Qishloq xo’jaligi mahsulotlari tannarxi haqida tushuncha, uning turlari va aniqlanish tartibi. 3. Qishloq xo’jaligida xarajatlarni tejash va mahsulotlar tannarxini pasaytirish yo’llari.

1. Qishloq xo’jaligida qilinadigan xarajatlar va ularning turkumlanishi. Qishloq xo’jalik korxonalari turli mahsulotlar ishlab chiqarish, xizmatlarni bajarish uchun moddiy, pul va mehnat xarajatlarini amalga oshiradilar. Masalan, urug’lik, mineral va mahalliy o’g’itlar, kimyoviy vositalar, yoqilg’i, ehtiyot qismlar, yem-xashaklar, xodimlarning mehnatlariga to’langan haqlar, soliqlar, mahsulotlarni sotish bilan bog’liq bo’lgan xarajatlar va boshqalar. Qishloq xo’jaligi tarmog’ida xarajatlarning turkumlanishi 1999-yil 5-fevralda O’zbekiston Respublikasi Vazirlar Mahkamasining 54-sonli qarori bilan tasdiqlangan “Mahsulot (ishlar, xizmatlar)ni ishlab chiqarish va sotish xarajatlarining tarkibi hamda moliyaviy natijalarni shakllantirish tartibi to’g’risida”gi Nizom asosida amalga oshiriladi. Qishloq xo’jaligida amalga oshiriladigan xarajatlar o’zgaruvchan va doimiy xarajatlarga bo’linadi (1-rasm). Doimiy xarajatlar ishlab chiqarilayotgan mahsulot hajmiga bog’liq bo’lmagan holda amalga oshiriladi. Mahsulot hajmi ko’payishi yoki kamayishi bilan doimiy xarajatlar miqdori o’zgarmaydi. Masalan, ijaraga olingan asosiy vositalarga to’lanadigan ijara haqi, asosiy vositalarning amortizatsiya summasi va boshqalar doimiy xarajatlar tarkibiga kiradi. O’zgaruvchan xarajatlar ishlab chiqariladigan mahsulot hajmining o’zgarishi bilan bevosita bog’liqdir. Ishlab chiqariladigan mahsulotlar miqdorining ko’payishi o’zgaruvchan xarajatlar ko’proq sarflanishini taqozo etadi. Ularga urug’liklar, mineral va mahalliy o’g’itlar, yoqilg’i, ozuqa, mehnatga to’lanadigan ish haqi, elektroenergiya xarajatlari va boshqa xarajatlar kiradi.

1-rasm. Qishloq xo’jaligida xarajatlar turlari. Qishloq xo’jaligida qilinadigan xarajatlarning o’zgarishi tarmoqda yangi texnikalarni, samarali texnologiyalarni joriy etish, sermahsul chorva hayvonlarini yaratish, shakllantirish hamda ilg’or tajribalarni amalga oshirish bilan bevosita bog’liq. Sarflanayotgan xarajatlarni tahlil etish jarayonida ularning qanchasi mahsulot yetishitirishga oid agrotexnik jarayonlar bo’yicha sarflanganligiga ham alohida e’tibor beriladi. Bundan maqsad - fantexnika, texnologiya yangiliklarini ishlab chiqarishning u yoki bu jarayoniga tatbiq etish natijasida xarajatlarni tejash imkoniyatini aniqlashdir. Shuning uchun ham xarajatlarni mahsulot yetishtirish agrotexnik jarayonlari bo’yicha ham turkumlashtirish mumkin (2chizma). Xarajatlarning bunday tartibda turkumlanishi ularning dehqonchilik mahsulotlari yetishtirish davrlari bo’yicha qilinadigan miqdorini, qiymatini aniqlash imkoniyatini yaratadi. Shunga asoslangan holda ularning samarali amalga oshirishlishini ta’minlash, mablag’lar bilan ta’minlanish masalalari ham hal etilishi imkoniyati yaratiladi. Xarajat, ming s o‘ m Mahsulot miqdori, tonna Doimiy xarajatlar Mahsulot miqdori, tonna Xarajat, ming s o‘ m O‘ zgaruvchan xarajatlar

2-rasm. Xarajatlarning agrotexnik jarayonlar bo’yicha turkumlanishi. Qishloq xo’jaligida moddiy, mablag’ va mehnat sarflarini amalga oshirishda ularning o’rindoshligini hisobga olish hamda mahsulot tannarxini pasaytirish talab etiladi. Qishloq xo’jaligida sarflanayotgan xarajatlardan foydalanish samaradorligini oshirish zarur. Buning uchun fan-texnika yutuqlarini, yangi texnologiyalarni, ilg’or tajribalarni imkoniyat doirasida ishlab chiqarishga tatbiq etish lozim. Xarajatlarni maqsadga muvofiq sarflash natijasida olinadigan foyda summasi oshadi va natijada xo’jalikning rentabellik darajasi ortadi. Foyda summasining oshishi xo’jalikni kengaytirilgan takror ishlab chiqarish asosida rivojlantirish uchun imkoniyat yaratadi. Shuning uchun ham bu masalaga respublikamiz

hukumati, qishloq xo’jaligida faoliyat yurituvchi tadbirkorlar alohida e’tibor bermoqdalar. Iqtisodiy mohiyatiga ko’ra, bir xil xarajatlar xarajat elementlarini, bir nechta turdosh xarajat elementlari xarajat moddalarini tashkil etadi. Demak, xarajat moddalari xarajat elementlariga nisbatan kengroqdir. Qishloq xo’jaligida xarajatlar mahsulot yetishtirish jarayonida bevosita hamda bilvosita sarflanadigan xarajatlarga ham turkumlanadi. Bevosita xarajatlar mahsulotlarni yetishtirishda bevosita qatnashadi. Masalan, urug’lik, o’g’it, yoqilg’i va boshqalar. Bilvosita xarajatlar esa qishloq xo’jaligi mahsuloti yetishtirishda bevosita ishtirok etmasada, tarmoqda mahsulot yetishtirish uchun zarur hisoblanadi. Masalan, korxonani boshqarish xarajatlari, ombor xo’jaligi xarajatlari va hokazo. Qishloq xo’jalik mahsulotlarini yetishtirishda (ishlarni bajarish va xizmatlarni ko’rsatishda) qilinadigan xarajatlar quyidagi turlarga bo’linadi: 1) mahsulot (ishlar, xizmatlar)ning ishlab chiqarish tannarxiga kiritiladigan xarajatlar. Mahsulot (ishlar, xizmatlar)ning ishlab chiqarish tannarxiga kiruvchi xarajatlar iqtisodiy mazmuniga ko’ra quyidagi elementlarga ajratiladi: • ishlab chiqarish moddiy xarajatlari; • ishlab chiqarish xususiyatiga ega bo’lgan mehnatga haq to’lash xarajatlari; • ijtimoiy sug’urta ajratmalari; • asosiy fondlar va ishlab chiqarish ahamiyatiga ega bo’lgan nomoddiy aktivlar amortizatsiyasi; • ishlab chiqarish ahamiyatiga ega bo’lgan boshqa xarajatlar. Ishlab chiqarish bilan bog’liq moddiy xarajatlar tarkibiga quyidagi moddalar kiritiladi:  ishlab chiqariladigan mahsulotning asosini tashkil etib, uning tarkibiga kiradigan yoki mahsulot tayyorlashda (ishlarni bajarishda, xizmatlarni

ko’rsatishda) zarur tarkibiy qism hisoblangan, chetdan sotib olinadigan xomashyo va materiallar;  normal texnologik jarayonni ta’minlash va mahsulotlarni o’rash uchun mahsulot (ishlar, xizmatlar) yoki boshqa ishlab chiqarish ehtiyojlariga sarflanadigan (asbob-uskunalar, binolar, inshootlar va boshqa asosiy vositalar sinovini o’tkazish, nazorat qilish, saqlash, tuzatish va ulardan foydalanish) uchun ishlab chiqarish jarayonida foydalaniladigan, xarid qilinadigan materiallar, shuningdek, asbobuskunalarni tuzatish uchun ehtiyot qismlar, asboblar, moslamalar, inventar, jihozlar, laboratoriya asbob-uskunalari va asosiy fondlarga kirmaydigan boshqa mehnat vositalarining eskirishi, maxsus kiyim va arzonbaholi boshqa ashyolarninig eskirishi;  sotib olinadigan, kelgusida ushbu xo’jalik yurituvchi subyektlarida montaj qilinadigan yoki qo’shimcha ishlov beriladigan butlovchi buyumlar va yarim tayyor mahsulotlar;  tashqi yuridik va jismoniy shaxslar, shuningdek, xo’jalik yurituvchi subyektning ichki tarkibiy bo’linmalari tomonidan bajariladigan, faoliyatning asosiy turiga tegishli bo’lmagan, ishlab chiqarish xususiyatiga ega bo’lgan ishlar va xizmatlar. Ishlab chiqarish xususiyatiga ega bo’lgan ishlar va xizmatlarga mahsulot tayyorlash bo’yicha ayrim operatsiyalarni bajarish, xomashyo va materiallarga ishlov berish, iste’mol qilinayotgan ashyo va materiallar sifatini aniqlash uchun sinovlar o’tkazish, belgilangan texnologik jarayonlarga rioya etilishi ustidan nazorat qilish, asosiy ishlab chiqarish fondlarini tuzatish va boshqalar tegishli bo’ladi. Xo’jalik yurituvchi subyekt ichida tashqi huquqiy shaxslarning transport xizmatlari (xomashyo, materiallar, asboblar, detallar, tovarlar, yuklarning boshqa turlarini markaziy ombordan quyi bo’g’inlarga, ya’ni sexga va tayyor mahsulotni saqlash uchun omborga keltirish) ham ishlab chiqarish xususiyatiga ega bo’lgan xizmatlarga tegishlidir; - tabiiy xomashyo (yer rekultivatsiyasiga ajratmalar, ixtisoslashtirilgan huquqiy shaxslar tomonidan amalga oshiriladigan yerni rekultivatsiya qilish

ishlariga haq to’lash), ildizi bilan beriladigan daraxtga haq to’lash, sanoat korxonalari tomonidan suv xo’jaligi tizimidan belgilangan limitlar doirasida va undan ortiqcha olinadigan suv uchun haq to’lash. Sanoatning xomashyo tarmoqlari uchun yog’och, taxta materiallaridan yoki foydali qazilmalardan (rudadan) foydalanish huquqlarining amortizatsiya qilinadigan qiymati yoki atrof-muhitni tiklash xarajatlari; - texnologik maqsadlarda energiyaning barcha turlarini ishlab chiqarishga, binolarni isitishga sarflanadigan yonilg’ining chetdan sotib olinadigan barcha turlari, xo’jalik yurituvchi subyektlarning transporti tomonidan bajariladigan, ishlab chiqarishga xizmat ko’rsatish bo’yicha transport ishlari; - xo’jalik yurituvchi subyektning texnologik, transport va boshqa ishlab chiqarish va xo’jalik ehtiyojlariga sarflanadigan barcha turdagi xarid qilinadigan energiya (xo’jalik yurituvchi subyektning o’zi tomonidan ishlab chiqariladigan elektr energiyaga va energiyaning boshqa turlariga, shuningdek, xarid qilinadigan energiyani iste’mol joyigacha transformatsiya qilish va uzatish xarajatlari tegishli xarajat elementlariga kiritiladi); - ishlab chiqarish sohasida moddiy boyliklarning tabiiy yo’qotish me’yorlari doirasida va ulardan ortiqcha yo’qotilishi, yaroqsizlanishi va kam chiqishi; - xo’jalik yurituvchi subyektning trasporti va xodimlari tomonidan moddiy resurslarni yetkazish bilan bog’liq xarajatlar (yuklash va tushirish ishlari ham shu jumlaga kiradi) ishlab chiqarish xarajatlarining tegishli elementlariga kirishi kerak (mehnatga haq to’lash xarajatlari, asosiy fondlar amortizatsiyasi, moddiy xarajatlar va boshqalar); - xo’jalik yurituvchi subyektlar tomonidan moddiy resurslarni yetkazib beruvchilardan olinadigan idishlar ham moddiy resurslar qiymatiga kiritiladi; - mahsulot tannarxiga kiritiladigan moddiy resurslar xarajatlaridan qaytariladigan chiqitlar qiymati, idish va o’rash-joylash materiallari qiymati. Ular amaldagi sotilishi, foydalanilishi yoki omborga kirim qilinishi narxi bo’yicha chiqarib tashlanadi;

- “moddiy xarajatlar” elementi bo’yicha aks ettiriladigan moddiy resurslar qiymati sotib olish narxidan, shu jumladan, barter bitimlarida, qo’shimcha narx (ustama)dan, ta’minot, tashqi iqtisodiy tashkilotlar tomonidan to’lanadigan vositachilik taqdirlashlaridan, tovar birjalari xizmatlari qiymatidan, shu jumladan, brokerlik xizmatlaridan, bojlar va yig’imlardan, transportda tashishga haq to’lashdan, tashqi yuridik shaxslar tomonidan amalga oshiriladigan saqlash va yetkazib berishga haq to’lashdan kelib chiqib shakllanadi. Ishlab chiqarish xususiyatiga ega bo’lgan mehnatga haq to’lash xarajatlari tarkibiga quyidagi moddalar kiritiladi: • xo’jalik yurituvchi subyektda qabul qilingan mehnatga haq to’lash shakllari va tizimlariga muvofiq bajarilgan narxnomalar, tarif stavkalariga va lavozim maoshlaridan kelib chiqib hisoblangan, amalda bajarilgan ish uchun ishlab chiqarish xususiyatiga ega bo’lgan, hisoblangan ish haqi, shu jumladan, bajarilgan ishni hisobga olish bo’yicha dastlabki hujjatlarda nazarda tutilgan rag’batlantiruvchi tusdagi to’lovlar; • kasb mahorati va murabbiylik uchun tarif stavkalariga va okladlariga ustamalar; • ish rejimi va mehnat sharoitlari bilan bog’liq bo’lgan kompensatsiya tusidagi to’lovlar; • texnologik jarayon jadvalida nazarda tutilgan tungi vaqtda, ishdan tashqari vaqtda, dam olish va bayram (ishlanmaydigan) kunlarida ishlaganlik uchun tarif stavkalari va okladlarga ustamalar va qo’shimcha haq; • kun, smenali rejimda ishlaganlik, kasblarni birga qo’shib olib borganlik va xizmat ko’rsatish hududlarini kengaytirganlik uchun ustamalar; • hukumat tomonidan tasdiqlangan kasblar va ishlar ro’yxati bo’yicha og’ir, zararli, alohida zararli mehnat va tabiiy-iqlim sharoitlarida ishlaganlik uchun ustamalar, shu jumladan, ushbu sharoitlardagi uzluksiz ish staji uchun ustamalar; • qurilishda, rekonstruksiya qilishda va mukammal ta’mirlashda bevosita band bo’lgan, shuningdek, qonun hujjatlarida nazarda tutilgan hollarda vaxta usuli bilan

ishlarni bajargan xodimlar uchun ishning ko’chma va qatnov xususiyati uchun ustama; • mehnatga haq to’lashning hududlar bo’yicha tartibga solinishiga, shu jumladan, hudud koeffitsiyentlari va amaldagi qonun hujjatlariga muvofiq cho’l, suvsiz va yuqori tog’ joylarida ishlaganlik uchun koeffitsiyentlar bilan belgilangan to’lovlar; • ish vaxta usulida tashkil etilganda, ish vaqti jamlanib hisoblanganda va qonun hujjatlari bilan belgilangan boshqa hollarda xodimlarga ularga ish vaqtining normal davom etishidan ortiq ishlaganligi munosabati bilan beriladigan dam olish (ortiqcha ishlagan ish vaqti uchun dam olish) kunlari uchun haq to’lash; • amaldagi qonun hujjatlariga muvofiq navbatdagi (har yili) va qo’shimcha ta’tillar, navbatdagi (har yili) foydalanilmagan va qo’shimcha ta’tillar uchun kompensatsiyalar, o’smirlarning imtiyozli soatlari, bolani ovqatlantirish uchun onalar ishidagi tanaffuslar, shuningdek, tibbiy ko’riklardan o’tish bilan bog’liq vaqt uchun haq to’lash; • majburiy ta’tilda bo’lgan xodimlarga, asosiy ish haqini qisman saqlab qolgan holda haq to’lash; • donor xodimlarga qonni tekshirish, topshirish kunlari uchun va qon topshirilgan har bir kundan keyin beriladigan dam olish kunlari uchun haq to’lash; • davlat vazifalarini bajarganlik uchun (harbiy yig’inlar, favqulodda vaziyatlar bo’yicha yig’inlar va boshqalarda qatnashganlik uchun) mehnat haqi to’lash; • xo’jalik yurituvchi subyekt shtatida turmaydigan xodimlar mehnatiga ular tomonidan fuqarolik-huquqiy tusda tuzilgan shartnomalar bo’yicha ishlar bajarilganligi uchun haq to’lash, agar bajarilgan ish uchun xodimlar bilan hisob- kitob xo’jalik yurituvchi subyektning o’zi tomonidan amalga oshirilsa, pudrat shartnomasi ham shu jumlaga kiradi; • belgilangan tartibga muvofiq ishlab chiqarish jarayonida qatnashuvchi xodimlar mehnatiga haq to’lash fondiga kiritiladigan to’lovlarning boshqa turlari. Ijtiomiy sug’urta xarajatlari tarkibiga quyidagi moddalar kiritiladi:

- qonun xujjatlari bilan belgilangan normalar bo’yicha mehnatga haq to’lash fondiga ijtimoiy tusdagi majburiy ajratmalar; - nodavlat pensiya jamg’arlariga, ixtiyoriy tibbiy sug’urtaga va ixtiyoriy sug’urtaning boshqa turlariga ajratmalar; Ijtimoiy sug’urta to’lovlari 2019-yil 30-dekbrda qabul qilingan yangi tahrirdagi Soliq Kodeksiga ko’ra ijtimoiy soliq deb nomlangan. Ish beruvchining xodimlar mehnatiga haq to’lashga doir xarajatlari ijtimoiy soliq solish obyektidir. Ushbu Kodeksning 403-moddasiga ko’ra, paxta yig’im-terimi bo’yicha mavsumiy qishloq xo’jaligi ishlariga jalb qilingan jismoniy shaxslarning bu ishlarni bajarganligi uchun mehnat haqi to’lashga doir xarajatlar soliq solish obyekti hisoblanmaydi. 2020-yil 1-yanvardan ijtimoiy soliq stavkasi 12 foiz etib belgilangan. Fermer xo’jaliklari tomonidan to’lanadigan ushbu mablag’lar davlat maqsadli jamg’armalari hamda Kasaba uyushmalari federatsiyasi Kengashi o’rtasida belgilangan tartibga muvofiq quyidagi miqdorlarda taqsimlanadi: - budjetdan tashqari Pensiya jamg’armasi – 98,4 foizi; - Bandlikka ko’maklashish davlat jamg’armasi – 0,8 foizi; - Kasaba uyushmalari federatsiyasi Kengashi jamg’armasi – 0,8 foizi. Asosiy vositalar va ishlab chiqarish ahamiyatiga ega bo’lgan nomoddiy aktivlar amortizatsiyasi bo’yicha xarajatlari tarkibiga quyidagi moddalar kiritiladi: - asosiy ishlab chiqarish fondlarining dastlabki (tiklash) qiymatidan kelib chiqib hisoblangan amortizatsiya summasi (hisoblangan eskirish). Lizing bo’yicha va belgilangan tartibda tasdiqlangan me’yorlar, qonun hujjatlarida amalga oshiriladigan jadallashtirilgan amortizatsiya ham shu jumlaga kiradi; - ishlab chiqarish ahamiyatiga ega bo’lgan nomoddiy aktivlar eskirishi har oyda xo’jalik yurituvchi subyekt tomonidan dastlabki qiymati va ulardan foydali foydalanish muddatidan (biroq xo’jalik yurituvchi subyekt faoliyati muddatidan ortiq emas) kelib chiqib hisoblanadigan mahsulot (ishlar, xizmatlar) tannarxiga tegishli bo’ladi. Foydali foydalanish muddatini aniqlash imkoni bo’lmagan

nomoddiy aktivlar bo’yicha eskirish me’yori besh yil hisobiga belgilanadi, biroq xo’jalik yurituvchi subyekt faoliyati muddatidan ortiq emas. Ishlab chiqarish tusidagi boshqa xarajatlar tarkibiga quyidagi moddalar kiritiladi: - ishlab chiqarish jarayoniga xizmat ko’rsatish xarajatlari; - ishlab chiqarishni xomashyo, materiallar, yonilg’i, elektr energiyasi, asboblar, moslamalar va boshqa mehnat vositalari va buyumlari bilan ta’minlash xarajatlari; - asosiy ishlab chiqarish fondlarini ish holatida saqlash xarajatlari (texnik qo’riq va qarov, o’rtacha, joriy va mukammal tuzatish xarajatlari). Asosiy vositalarni barcha turda (joriy, o’rtacha, mukammal) tuzatishlarni xo’jalik yurituvchi subyektning o’z kuchi bilan o’tkazish ishlab chiqarish xarajatlarining tegishli elementlari (moddiy xarajatlar, mehnat haqi to’lash xarajatlari va boshqalar) bo’yicha mahsulot (ishlar, xizmatlar) tannarxiga kiritiladi. Zarurat bo’lganda, ayrim tarmoqlarning xo’jalik yurituvchi subyektlari O’zbekiston Respublikasi Moliya vazirligining ro’yxati bilan mukammal tuzatish ishlarini o’tkazish uchun mablag’lar zahirasini tashkil qilishlari mumkin. Ushbu zahiraga ajratmalar “Ishlab chiqarish tusidagi boshqa xarajatlar” elementi tarkibida aks ettiriladi va ko’zda tutilayotgan xarajatlar qiymati hamda asosiy vositalar har bir obyekti mukammal tuzatishlarning davriyligidan kelib chiqqan holda aniqlanadi. Zahiraga ajratmalar me’yori har bir hisobot yili oxirida qayta ko’rib chiqiladi va zarurat bo’lganda yangi moliya yili uchun ajratmalar miqdori ko’paytirilishi yoki kamaytirilishi mumkin. Agar mukammal tuzatishga zahira mablag’lari summasi ushbu obyektni tuzatishga qilingan haqiqiy xarajatlar summasidan oshib ketsa, oshib ketgan summa bo’yicha tuzatish kiritilishi kerak, agar haqiqiy xarajatlar oshib ketsa, u holda oshib ketgan summa “Ishlab chiqarish tusidagi boshqa xarajatlar” elementi tarkibida aks ettiriladi. - yong’indan saqlash va qo’riqlashni hamda xo’jalik yurituvchi subyektlarning texnika xavfsizligi qoidalari bilan nazarda tutilgan boshqa maxsus talablarini ta’minlash, ular faoliyatini nazorat qilish xarajatlari.

Yuqoridagilardan tashqari qo’riqlash xarajatlari bunday qo’riqlash mavjud bo’lishini talab qiluvchi mazkur ishlab chiqarishga maxsus talablar mavjud bo’lgan taqdirda mahsulot (ishlar, xizmatlar) tannarxiga kiritilishi mumkin. 2) davr xarajatlari. Ular mahsulotlarni ishlab chiqarish jarayoniga bevosita bog’liq bo’lmay, balki xo’jalikning faoliyatini sohalar bo’yicha tashkil etish va ularni boshqarish bilan bog’liq bo’lgan xarajatlardan iboratdir. Bu xarajatlar o’z navbatida maqsad va vazifalariga ko’ra, quyidagi turlarga bo’linadi: - mahsulotlarni sotish bilan bog’liq bo’lgan barcha xarajatlar; - ma’muriy xarajatlar, ularga tarmoqni, korxonani boshqarish bilan bog’liq bo’lgan barcha xarajatlar, jumladan, boshqaruv tizimlarining faoliyati, boshqaruv sohasidagi vositalar bilan bog’liq bo’lgan xarajatlar; - boshqa operatsion xarajatlar, jumladan, kadrlar tayyorlash, loyihalarni tuzish, xodimlarni ijtimoiy muhofaza qilish bilan bog’liq xarajatlar; - hisobot davrining kelgusida soliq solinadigan bazadan chiqariladigan xarajatlar. 3) moliyaviy faoliyat bo’yicha xarajatlar. Ularga barcha turdagi kreditlar bo’yicha, mol-mulkning ijara haqi to’lovlari hamda qimmatli qog’ozlarni chiqarish, sotish, tarqatish bilan bog’liq bo’lgan xarajatlar kiradi. 4) favqulodda xarajat va zararlar. Ularga korxonalarning odatdagi faoliyatidan chetga chiquvchi hodisalar yoki operatsiyalar natijasida vujudga keladigan va ro’y berishi kutilmagan odatdan tashqari xarajatlar kiradi. Masalan, zilzila, sel kabi tabiiy ofatlar natijasida ko’rilgan zararlar. 2. Qishloq xo’jaligi mahsulotlari tannarxi haqida tushuncha, uning turlari va aniqlanish tartibi. Bozor iqtisodiyoti sharoitida tarmoqlar, korxonalar miqyosida umumiy qiymat ko’rsatkichlari bilan birgalikda o’rtacha xarajatlar, ya’ni tannarx ko’rsatkichi ham mavjud. Tannarx bozor iqtisodiyoti sharoitida iqtisodiy

kategoriya hisoblanadi. Uning yordamida qishloq xo’jaligida yetishtirilayotgan mahsulotlar, bajarilayotgan ishlar va ko’rsatilayotgan xizmatlarning bir birligi xo’jalik uchun necha so’mga tushganligi aniqlanadi. Uning darajasi baho bilan taqqoslanishi natijasida olinadigan foyda yoki ko’riladigan zararlar aniqlanadi. Bu ko’rsatkich xo’jaliklar uchun juda muhimdir. Tannarx deganda bir birlik mahsulot ishlab chiqarish, ish va xizmatlarni bajarish uchun sarflangan xarajatlar nazarda tutiladi. Uning mutlaq darajasini aniqlash uchun barcha xarajatlarning umumiy summasi shu xarajatlar yordamida ishlab chiqarilgan mahsulot miqdoriga taqsimlanadi. Qishloq xo’jaligida tannarx quyidagi formula yordamida aniqlanadi: T =  X ; YM Bunda: T – mahsulot, ish yoki xizmatning tannarxi;  X – qilingan xarajatlarning summasi; YM – yalpi yetishtirilgan mahsulot, jami bajarilgan ish, ko’rsatilgan xizmatlar miqdori. Qishloq xo’jaligida mahsulotlar tannarxining quyidagi turlari aniqlanadi: - reja tannarxi; - ishlab chiqarish tannarxi; - to’liq tannarxi. Mahsulotning ishlab chiqarish tannarxini aniqlash uchun ishlab chiqarish xarajatlari yig’indisini yalpi yetishtirilgan mahsulot miqdoriga taqsimlash orqali aniqlanadi. To’liq tannarx esa barcha xarajatlarning yetishtirilgan yalpi mahsulot miqdoriga yoki sotiladigan mahsulot miqdoriga nisbati bilan aniqlanadi. To’liq tannarx tijorat tannarxi deb ham ataladi, chunki u asosan sotilgan mahsulotlar uchun hisoblanadi. Qishloq xo’jalik mahsulotlari (ishlar va xizmatlar)ning reja tannarxi ham aniqlanadi. Reja tannarxi ilmiy-tadqiqot institutlari tomonidan ishlab chiqilgan me’yorlar asosida aniqlanib, qishloq xo’jalik korxonasi tomonidan yil boshida tuziladigan “Biznes reja”da aks ettiriladi. Qishloq xo’jalik mahsulotlarining reja tannarxini aniqlash yil boshida amalga oshiriladi. Bundan ko’zlangan asosiy

maqsad – ishlab chiqarilishi ko’zda tutilgan mahsulotlarning ilmiy asoslangan me’yorlar asosida reja tannarxini aniqlab olish va shu asosida tannarxni nazorat qilib borishdir. Bunda xarajatlar ilmiy asoslangan me’yorlar darajasida amalga oshirilayotganligi kuzatib boriladi. Agar ilmiy asoslangan me’yorlardan ortiqcha xarajatlarga yo’l qo’yilsa, uni o’z vaqtida aniqlash va bartaraf etish imkonini yaratib beradi. Qishloq xo’jaligida barcha xarajatlarni amalga oshirish natijasida asosiy va turli xildagi qo’shimcha mahsulotlar olinadi. Jumladan, paxtachilikda paxta xomashyosi asosiy mahsulot hisoblansa, g’o’zapoya qo’shimcha mahsulot sanaladi. G’alla yetishtirishda don asosiy, somoni (poyasi) qo’shimcha mahsulotdir. Sut yo’nalishidagi qoramolchilikda sut asosiy, buzoq va go’sht qo’shimcha mahsulot hisoblanadi. Lekin tarmoqdagi barcha xarajatlar asosiy mahsulotni yetishtirishga qaratilgan bo’ladi. Qishloq xo’jaligida yetishtiriladigan asosiy va qo’shimcha mahsulotlarning ishlab chiqarish tannarxini aniqlashda xarajatlar asosiy va qo’shimcha mahsulotlar o’rtasida koeffitsiyentlar orqali taqsimlanadi. Masalan, donchilikda qo’shimcha mahsulot hisoblangan somon belgilangan koeffitsiyentlar yordamida asosiy mahsulotga aylantiriladi. Ularni asosiy mahsulotlarning miqdoriga qo’shib, yalpi don mahsulotining shartli miqdori aniqlanadi. Jami shartli mahsulot tarkibidagi asosiy hamda qo’shimcha mahsulotlarning salmoqlari aniqlanadi. Shundan so’ng jami ishlab chiqarish xarajatlari aniqlab olingan salmoqqa mutanosib ravishda asosiy va qo’shimcha mahsulotlarga taqsimlanadi. Asosiy mahsulot hissasiga to’g’ri keladigan ishlab chiqarish xarajatlarini asosiy mahsulotning haqiqiy miqdoriga taqsimlab, asosiy mahsulotning tannarxi aniqlanadi. Qo’shimcha mahsulot hissasiga to’g’ri keladigan ishlab chiqarish xarajatlarini qo’shimcha mahsulotning haqiqiy miqdoriga taqsimlash orqali esa qo’shimcha mahsulotning tannarxi aniqlanadi. Qishloq xo’jalik mahsulotlarini ishlab chiqarishda olinadigan qo’shimcha mahsulotlarni shartli asosiy mahsulotga aylantirish koeffitsiyentlari 1-jadvalda keltirilgan.

1-jadval Qishloq xo’jaligida olinadigan qo’shimcha mahsulotlarni shartli asosiy mahsulotga aylantirish koeffitsiyentlari № Mahsulot turlari Koeffitsiyentlar 1. G’o’zapoya 0,05 2. Somon 0,08 3. Makkajo’xori poyasi 0,17 4. Bir yillik beda urug’i 0,9 5. Bir yillik o’tlardan ko’k massa 0,25 6. Ko’p yillik o’tlardan ko’k massa 0,3 7. Qo’y va echkidan olingan sut 0,22 8. Jun 5 9. Sigir suti 0,9 10. Buzoq 0,1 Qilingan xarajatlarni qishloq xo’jaligidagi asosiy va qo’shimcha mahsulotlar o’rtasida taqsimlash tartibini aniq misol yordamida ko’rib chiqamiz. Masalan, fermer xo’jaligida 500 tonna bug’doy va 450 tonna somon yetishtirilgan bo’lsa, ishlab chiqarish xarajatlarini asosiy va qo’shimcha mahsulotlarga taqsimlash quyidagicha amalga oshiriladi: a) somon massasini 0,08 ga ko’paytirib, shartli bug’doyga aylantirib olamiz (450x0,08=36); b) shartli bug’doy massasini yetishtirilgan bug’doy massasiga qo’shib, bug’doyning shartli yalpi hosilini aniqlab olamiz (500+36=536); d) bug’doy massasining bug’doyning shartli yalpi hosilidagi salmog’i aniqlab olinadi, bizning misolimizda 36 soni 536 ning necha foizini tashkil etishi aniqlanadi (3600:536=6,7);

e) jami xarajatning 6,7 foizini somon massasiga taqsimlash, qolgan qismini esa bug’doy massasiga taqsimlash orqali asosiy va qo’shimcha mahsulotlarning tannarxi aniqlanadi. Boshqa qishloq xo’jalik mahsulotlari bo’yicha ham xarajatlar asosiy va qo’shimcha mahsulotlar o’rtasida yuqoridagi usul yordamida taqsimlanadi. Qishloq xo’jalik mahsulotlarining tannarxini aniqlashda tannarx obyektlari 3- rasmda aks ettirilgan. 3-rasm. Qishloq xo’jaligida mahsulot tannarxi obyektlari Mahsulot ishlab chiqarish xarajatlarini va tannarxini o’rganish boshqaruv hisobining muhim bo’limlaridan biridir. Korxonada moliyaviy va boshqaruv hisobining yaxshi yuritilishi xarajatlarni to’g’ri hisobga olish va shu orqali ularning sarflanishini nazoratga olish imkonini yaratib beradi.

Xarajatlarni kalkulyatsiyalash - qilingan xarajatlarni aniq xarajat obyektlariga taqsimlash jarayonidir. Xarajatlarni kalkulyatsiyalash orqali mahsulot tannarxi tarkibida har bir xarajat elementining salmog’ini aniqlash va tegishli choralarni ko’rish imkoni yaratiladi. Barcha tarmoqlarda bo’lgani singari qishloq xo’jaligi tarmog’ida ham qat’iy tejamkorlik tizimini joriy etish, ishlab chiqarish xarajatlari va mahsulot tannarxini kamaytirishni rag’batlantirish hisobidan korxonalarning raqobatbardoshligini oshirish muhimdir. 3. Qishloq xo’jaligida xarajatlarni tejash va mahsulotlar tannarxini pasaytirish yo’llari. Keyingi yillarda qishloq xo’jalik mahsulotlarining tannarxi tarkibida moddiy xarajatlar salmog’i ortib bormoqda. Shu sababli mamlakatimizda korxonalarni modernizatsiyalash, texnik va texnologik jihatdan qayta jihozlash orqali mahsulot tannarxini pasaytirishga alohida e’tibor berilmoqda. Bundan tashqari, mahsulot ishlab chiqarish jarayonida qo’llanilayotgan me’yorlarning ko’pchiligi sobiq ittifoq davrida ishlab chiqilgan bo’lib, tejamkorlik talablariga to’liq javob bermaydi. Shu sababli mazkur dasturda ushbu me’yorlarni qayta ko’rib chiqishga ham e’tibor berilmoqda. Qishloq xo’jaligida har bir so’mni oqilona, maqsadga muvofiq sarflashga harakat qilish, ya’ni moddiy, pul va mehnat xarajatlarini tejash, shu orqali yetishtiriladigan mahsulotlarning, bajariladigan ish va xizmatlarning tannarxlarini pasaytirishga erishish lozim. Buning uchun: • dehqonchilik va chorvachilik tarmoqlarida mavjud bo’lgan barcha ishlab chiqarish vositalaridan yil davomida tadbirkorlik bilan oqilona, samarali foydalanib, barcha ishlarning vaqtida, sifatli bajarilishini ta’minlash; • ekinlarning tezpishar, yuqori hosilli navlarini, urug’chilikni, chorva hayvonlarining mahsuldor zotlarini ishlab chiqarish jarayoniga tatbiq etishni ta’minlash;

• xarajatlarni tejaydigan yangi texnika, samarali texnologiyalarni joriy etish natijasida ishlab chiqarish jarayonlarining yuqori darajada mexanizatsiyalashganlik, avtomatlashganlik darajasini oshirib, mehnat unumdorligini oshirish; • qishloq xo’jalik korxonalarining texnik va texnologik jihatdan ta’minlanganlik darajasini oshirish; • yerlarning meliorativ holatini yaxshilash va sug’orishning zamonaviy, tejamkor usullarini qo’llash; • qishloq xo’jalik mahsulotlari tayyor bo’lganda o’z vaqtida yig’ishtirib olish, saqlash va tashishni to’g’ri tashkil etish; • mehnatni tashkil etishning samarali shakllarini joriy etish va rag’batlantirish tizimini takomillashtirish; • ekinlar hosildorligini, chorva hayvonlarining mahsuldorligini oshirishga erishish lozim.

Qisqacha xulosalar Barcha tarmoqlarda bo’lgani singari qishloq xo’jaligi tarmog’ida ham mahsulot ishlab chiqarish uchun turli arajatlar qilinadi. Qishloq xo’jaligi tarmog’ining o’ziga xos xususiyatlari xarajatlar qilinishida ham o’z ta’sirini ko’rsatadi. Bunda tabiiy omillarning ta’siri, ishlab chiqarishning mavsumiyligi kabi o’ziga xos xususiyatlari xarajatlar hajmi va tarkibiga o’z ta’sirini ko’rsatadi. Qishloq xo’jalik korxonalari faoliyatiga baho berishda mahsulot tannarxi ham muhim ahamiyatga ega. Qishloq xo’jaligi tarmog’ida faoliyat yurituvchi tadbirkorlik subyektlarining faoliyati samaradorligini oshirish uchun mahsulot tannarxini arzonlashtirish muhim ahamiyatga ega.

Nazorat va muhokama uchun savollar: 1. Qishloq xo’jaligida amalga oshiriladigan xarajatlar qanday turkumlanadi? 2. Jami va o’rtacha xarajatlari deganda nimani tushunasiz? 3. Qanday xarajatlarni doimiy va o’zgaruvchan xarajatlar deb atash mumkin? 4. Xarajatlar elementlari va moddalari haqida qanday tushunchaga egasiz? 5. Qishloq xo’jalik mahsulotlari tannarxi deganda nimani tushunasiz? 6. Qishloq o’jaligida mahsulot tannarxining qanday turlari mavjud? 7. Qishloq xo’jalik mahsulotlari tannarxi tarkibiga qanday xarajatlar kiradi? 8. Qishloq xo’jaligida mahsulot tannarxini pasaytirishga qanday choratadbirlar yordamida erishish mumkin?

FOYDALANILGAN ADABIYOTLAR RO’YXATI 1. Abdug’aniyev A.A., Abdug’aniyev A.A. Qishloq xojaligi iqdisodiyoti. Darslik. - T: “Adib Nashriyoti”, 2011. – 400 b. 2. David L. Debertin. Agricultural Production Economics Textbook. 2nd ed. Published by McMillan. University of Kentucky, USA. 2012. 3. Rustamova I.B., Sheripbayeva U.A., Dehqonova N.S., Ahmedova V. Qishloq xo’jaligi iqtisodiyoti. O’quv qo’llanma. –T.: TDAU, 2015. 174 b. 4. Samatov G’.A, Rustamova I.B., Sheripbayeva U.A. Qishloq xo’jaligi iqtisodiyoti va menejmenti. Darslik. –T.: “Cho’lpon” nomidagi nashriyot-matbaa ijodiy uyi, 2012. -320 b. 5. Umurzoqov O’.P, Toshboyev A.J., Rashidov J., Toshboyev A.A.. Qishloq xo’jaligi iqtisodiyoti va menejmenti. Oquv qo’llanma. –T.: “Iqtisod- Moliya”, 2008. -264 b. 6. Murtazayev O, Ahrorov F.B. Qishloq xo’jaligi iqtisodiyoti. Darslik. –T.: “ILM ZIYO”, 2017. -415 b.

Похожие

Qishloq xo`jaligida ishlab chiqarish xarajatlari va mahsulot tannarxi

Ishlab chiqarish xarajatlari

Ishlab chiqarish xarajatlari 2

Ishlab chiqarish va davr xarajatlari tahlili

Mahsulot ishlab chiqarish va sotishning auditi