Naqd pulsiz hisob-kitoblar, ularning hisobi va rasmiylashtirilishi - Экономика - Рефераты

Naqd pulsiz hisob-kitoblar, ularning hisobi va rasmiylashtirilishi

Загружено в:

20.09.2019

Скачано:

0

Размер:

201.5 KB

Naqd pulsiz hisob-kitoblar, ularning hisobi va rasmiylashtirilishi Reja: 1- § . Naqd pulsiz hisob-kitoblar va ularining tashkil qilinishi 2- § . To’lov topshiriqnomalari bo’yicha hisob-kitoblar ularning hisobi va rasmiylashtirilishi 3- § . To’lov talabnomasi bo’yicha hisob-kitoblar, ularning rasmiylashtirilishi va hisobga olinishi

1 - § . Naqd pulsiz hisob-kitoblar va ularining tashkil qilinishi Bozor iqtisodiyoti sharoitida xalq xo’jaligini rivojlantirishning eng muxim omillaridan biri - pul aylanishini to’g’ri va aniq tashkil qilishdan iborat, chunki bozor iqtisodiyoti tovar-pul munosabatlarining holati va taraqqiyoti bilan chambarchas bog’liqdir. Korxona va tashkilotlar o’zlarining xo’jalik faoliyatlari jarayonida doimo bir-birlari bilan aloqada bo’ladilar. Ular o’rtasida tovar ayirboshlash jarayoni pul va pulli hisob-kitoblar yordamida amalga oshiriladi. Tovar ayirboshlashning o’zi esa pul aylanishining moddiy asosi bo’lib hisoblanadi, uning asosida boshqa pulli munosabatlar vujudga keladi. (soliq organlari, pensiya fondi, bank muassasalari va boshqalar). Pulli munosabatlarda pul shakllaridan foydalanish xususiyatlari va to’lov usullariga ko’ra pul aylanishi naqd pulli va naqd pulsiz pul aylanishiga bo’linadi. Chakana savdo va aholiga pullik hizmat ko’rsatish asosan naqd pulda amalga oshiriladi. Bundan tashqari, naqd pulli aylanishga kommunal xizmatlar uchun to’lovlar, maishiy hizmatlar uchun to’lovlar, ishchi va xizmatchilarga ish xaqi va va unga tenglashtirilgan to’lovlarni to’lash, sug’urta tashkilotlariga badallar to’lash, uy-joy qurilishi va boshqa maqsadlar uchun olingan kreditlarni qaytarish va boshqa to’lovlar kiradi. Naqd pul aylanishi umumiy pul oborotining taxminan 10 foizini tashkil etadi. Xalq xo’jaligida bo’ladigan pul aylanishining 80-90 foizini naqd pul ishlatmasdan, naqd pulsiz hisob-kitob shakllari asosida olib boriladi. Naqd pulsiz hisob-kitoblar deganda, korxona va tashkilotlarning tovar ayirboshlash, xizmat ko’rsatish va tovarsiz operatsiyalar bo’yicha bir-biriga bo’lgan talab va majburiyatlarni naqd pul ishlatmasdan pul mablag’larini bir hisobvaraqdan ikkinchi hisobvaraqqa o’tkazish orqali amalga oshirilishi tushuniladi. Naqd pulsiz pul aylanishi yalpi ijtimoiy mahsulotni ishlab chiqarish jarayonida sodir bo’ladigan munosabatlarini o’zida aks ettirishiga ko’ra ikki kismga bo’linadi: 1. Tovar operatsiyalari bo’yicha pul aylanishi. 2. Moliyaviy majburiyatlar bo’yicha pul aylanishi.

Birinchi guruhga tovarlarni sotish, xizmatlar ko’rsatish va kapital qurilish jarayonidagi hisob-kitoblarni aks ettiruvchi pul aylanishi kiradi. Ikkinchi, moliyaviy majburiyatlar, guruhiga esa byudjetga to’lovlar, ya’ni foydadan to’lanadigan soliq, qo’shilgan qiymat solig’i va boshqa majburiy to’lovlar hamda byudjetdan tashqari fondlar, bank ssudalarini qaytarilishi, kredit uchun foizlarning to’lanishi, sug’urta kompaniyalari bilan hisob-kitoblar kiradi. Naqd pulsiz aylanish pulli munosabatlar ishtirokchilarining joylashuviga qarab bir shahar ichidagi va shaharlararo pul aylanishiga bo’linadi. Bir shahar ichidagi pul aylanishi bir hisob markaziga qarashli banklar o’rtasidagi hisob-kitoblar majmuini bildiradi. Shaharlararo pul aylanishi esa turli hisob markazlariga qarashli banklar o’rtasida amalga oshiriladigan hisob-kitoblar yig’indisidir. Lekin respublikamizda bank tizimining rivojlanishi, «elektron to’lovlar» tizimiga o’tish asosida hisob-kitoblarning tezligi va sifatining oshishi natijasida hisob-kitoblarda ishtiroq etuvchi sub’ektlarning joylashuviga karab ikkiga bo’lish maqsadga muvofiq bo’lmay qoldi. Chunki hisob-kitoblarda katnashuvchi sub’ektlar qaysi hududda joylashganidan qat’iy nazar, to’lovlar bir necha soatda, xattoki bir necha daqiqada o’tkaziladi. Naqd pulsiz hisob-kitoblarni tashkil etishda bir qator tamoyillarga asoslaniladi. Bu tamoyillar kuyidagilardir: 1. Har bir xo’jalik sub’ekti o’z pul mablag’larini banklarda ochilgan depozit hisobvaraqlarda saqlashlari lozim. Korxona va tashkilotlar o’zaro hisob-kitoblarini bevosita bankdagi hisobvaraqlar orqali amalga oshirishlari shart. Qaysi bankda hisobvaraq ochishni mijozlarning o’zlari tanlaydilar. 2. Hisob-kitoblar to’lovchining roziligi bilan yoki uning topshirig’iga asosan depozit hisobvaraqdagi mablag’i evaziga amalga oshiriladi. Korxona bank kreditidan foydalanish xuquqiga ega bo’lsa, to’lovlar bank krediti hisobidan ham amalga oshirilishi mumkin. 3. To’lovlar belgilangan to’lovlar ketma-ketligi asosida bajariladi. 4. Xo’jalik yurituvchi sub’ektlar hisob-kitob shakllarini mustaqil tanlashlari va uni shartnoma orqali mustahkamlab qo’yishlari mumkin.

5. Tovar etkazib beruvchi korxona hisobvarag’iga pul mablag’lari mazkur mablag’larining mol sotib oluvchi korxona hisobvarag’idan o’chirilgandan so’ng o’tkazib beriladi. 6. To’lovni kafolatlash maqsadida, etkazib berilishi lozim bo’lgan tovar yoki ko’rsatilishi lozim bo’lgan xizmat qiymatining 15 foizi oldindan to’langandan so’nggina tovarlar jo’natiladi yoki xizmatlar ko’rsatiladi. Hisob-kitoblarni amalga oshirishda yuqorida sanab o’tilgan tamoyillarga amal qilinmas ekan, bu hisob-kitob munosabatlarida qatnashuvchi tomonlarning moliyaviy holatiga salbiy ta’sir ko’rsatadi. Hozirgi kunda O’zbekiston Respublikasi hududida naqd pulsiz hisob-kitoblar «O’zbekiston Respublikasida naqd pulsiz hisob-kitoblarni amalga oshirish to’g’risida» 2002 yil 12 yanvar O’zbekiston Respublikasi Markaziy banki tomonidan tasdiqlangan Nizom asosida olib boriladi. «O’zbekiston Respublikasida naqd pulsiz hisob-kitoblarni amalga oshirish to’g’risida»gi Nizom Fuqarolik kodeksi, «Markaziy bank to’g’risida»gi, «Banklar va bank faoliyati to’g’risida»gi, «O’zbekiston Respublikasi korxonalari to’g’risida»gi Konunlari va Markaziy bankning O’zbekiston hududida naqd pulsiz hisob-kitoblarni tartibga soluvchi boshqa me’yoriy hujjatlarga muvofiq ishlab chiqilgan. Mulkchlik shakllarining xilma-xilligi sharoitida xo’jalik yurituvchi sub’ektlarning faoliyati tovar-pul munosabatlari rivojlanish sharoitlarida naqd pulsiz hisob-kitob qoidalari xo’jalik organlari tomonidan hisob-kitob shakllarini erkin tanlash printsiplaridan kelib chiqadi va ular shartnomalarda mustahkamlanadi. Xo’jalik organlarining shartnomaviy munosabatlariga bank aralashmaydi. Nizomga asosan naqd pulsiz hisob-kitoblar qonunda ko’zda tutilgan va O’zbekiston Respublikasi Markaziy banki tomonidan qabul qilingan quyidagi shakllar orqali amalga oshiriladi: • To’lov topshiriqnomalari; • To’lov talabnomalari; • Akkreditivlar;

• Inkasso topshiriqnomalari; • Tijorat banklarining hisob-kitob cheklari; • Plastik kartochkalar bo’yicha hisob-kitoblar. To’lovchi va mablag’ oluvchi orasidagi hisob-kitoblar shakli shartnoma asosida belgilanadi. Hisob-kitob shakllari deyilganda, xuquqiy me’yorlarda ko’zda tutilgan, hisob-kitob hujjatining turi, hujjatlar aylanish tartibi, mablag’larni mol sotuvchi korxona hisobvarag’iga o’tkazish va yozish usuli bilan bir-biridan farq qiluvchi hisob-kitob turlari tushuniladi. Hisob-kitoblarning alohida shakllarining mazmuni, ular bo’yicha hujjatlar aylanishini va operatsiyalar hisobi hamda rasmiylashtirilishini alohida paragraflarda ko’rib chiqamiz. 2 - § . To’lov topshiriqnomalari bo’yicha hisob-kitoblar, ularning hisobi va rasmiylashtirilishi To’lov topshiriqnomasi bu to’lovchi korxonaning uning bankdagi depozit hisobvarag’idan pul mablag’larining ma’lum bir summasini boshqa mijozning hisobvarag’iga o’tkazish xaqida o’ziga xizmat ko’rsatuvchi bankka bergan topshirig’idir. To’lov topshiriqnomasi 0505411002 shakldagi standart blankada to’lovchi tomonidan rasmiylashtirilib bankka topshiriladi. To’lov topshiriqnomalari orqali kuyidagi to’lovlar amalga oshiriladi: • tovarlar va xizmatlar uchun hisob-kitoblar; • notovar operatsiyalar bo’yicha hisob-kitoblar; • Markaziy bankning me’yoriy hujjatlarida ko’zda tutilgan bo’lsa, bank ssudalari va unga ko’shilgan foizlarni qoplash uchun mablag’ o’tkazish; • Hukumat qarorlari va bank qoidalarida belgilangan hollardagi bank to’lovlari. Ilgari to’lov topshiriqnomalari rasmiylashtirilgan kundan boshlab 10 kun ichida bankka topshirilishi mumkin bo’lib, shu davr ichida u haqiqiy bo’lib hisoblanar edi. «Naqd pulsiz hisobkitoblarni amalga oshirish to’g’risida»gi yangi Nizomga asosan to’lov topshiriqnomasi rasmiylashtirilgan kun bankka taqdim etilishi lozim, ya’ni topshiriqnomaning sanasi uni bankka taqdim etilgan kun bilan bir xil bo’lishi kerak, ular mos kelmagan holda to’lov topshiriqnomasi ijro uchun qabul

qilinmaydi. Lekin byudjetga va byudjetdan tashqari fondlar bo’yicha to’lovlar bundan mustasno. To’lov topshiriqnomalarining bankka topshiradigan nusxalar soni to’lovchi va mablag’ oluvchilarning qaysi bankda joylashganligiga bog’liq. To’lovchi va mablag’ oluvchi korxonalar bir bank bo’limi xizmatidan foydalansalar, topshiriqnomalar bankka uch nusxada taqdim etiladi. Topshiriqnoma nusxalarining har biri quyidagicha ishlatiladi: • birinchi nusxa to’lovlar amalga oshirilgandan keyin bank mas’ul ijrochisi tomonidan imzo, to’lov amalga oshirilgan sana va qabul qilish sanasi ko’rsatilgan, bankning to’rtburchak muhrining izi tushirilgan holda kunlik hujjatlar yig’masiga tikiladi; • ikkinchi nusxasi to’lov oluvchining hisobvarag’iga ilova sifatida mas’ul ijrochi tomonidan imzo, to’lov amalga oshirilgan sana, bankning to’rtburchak muhr izi tushirilgan holda to’lovni oluvchi korxona vakiliga beriladi; • uchinchi nusxa operatsiya bajarilgandan so’ng, bank bo’limining to’rtburchak shtampi izi tushirilgan, mas’ul ijrochi tomonidan imzo, to’lovni amalga oshirish va topshiriqnomani qabul qilish sanasi ko’rsatilgan holda, to’lovchi korxona vakiliga ularning depozit hisobvarag’idan ko’chirma bilan birgalikda beriladi. Lekin har doim ham bir-biri bilan munosabatda bo’lgan xo’jalik yurituvchi sub’ektlar bir bank xizmatidan foydalanmaydilar, chunki hisob-kitoblar bir hudud tashqarisiga chiqishi mumkin. Agar to’lovchi va mablag’ oluvchi korxonalarga bir hudud ichidagi yoki boshqa hududda joylashgan turli bank bo’limlari tomonidan xizmat ko’rsatilsa, to’lov topshiriqnomalari bankka ikki nusxada taqdim etiladi: • birinchi nusxasi to’lovlar amalga oshirilgandan keyin bank mas’ul ijrochisi tomonidan imzo, to’lov amalga oshirilgan sana, bankning muhr izi tushirilgan va qabul qilish sanasi ko’rsatilgan holda kunlik hujjatlar yig’masiga tikiladi; • ikkinchi nusxasi bank bo’limining muxr izi tushirilgan, bank mas’ul ijrochisining imzosi, to’lov amalga oshirilgan sana va topshiriqnomani qabul qilish sanasi ko’rsatilgan holda to’lovchi korxona vakiliga beriladi.

To’lov topshirig’ida quyidagi rekvizitlar ko’rsatilishi lozim: a) to’lov topshirig’ining nomi va nomeri. b) to’lov topshirig’i to’ldirilgan sana, ya’ni kun, oy va yil. v) to’lovchining nomi, to’lovchi bankining nomi va kodi. g) to’lovchining hisobvaraq nomeri va identifikatsiya kodi. d) mablag’larni oluvchi korxona nomi, unga xizmat ko’rsatuvchi bank nomi va kodi j) mablag’ oluvchining hisobvaraq nomeri. z) to’lovlarning summasi raqam va yozuvlarda ko’rsatiladi. i) to’lovning maqsadi. To’lov topshirig’ining barcha rekvizitlari to’ldirilgandan so’ng, topshiriqnomaning alohida ajratilgan pastki qismiga to’lovchi korxona rahbari va bosh buxgalterining imzosi hamda muhr izi qo’yiladi. Ushbu muhr va imzolar to’lov topshirig’ining faqat birinchi asl nusxasiga qo’yiladi. Korxonalardan hujjatlar qabul qilish, shartnomada boshqa narsa ko’zda tutilmagan bo’lsa, butun kun davomida bankning mijoz bilan ishlash vaqtidan kelib chiqqan xolda amalga oshiriladi. Bunda operatsion kun davomida bank tomonidan korxonalardan qabul qilingan hujjatlar shu kunning o’zidayoq ijro qilinadi. Mas’ul ijrochi mijozlardan to’lov topshirig’ini olgandan so’ng, to’lov topshirig’idan barcha rekvizitlarning to’liq va to’g’ri rasmiylashtirilganligini tekshiradi. Bundan tashqari, to’lovchi korxonaning depozit bo’yicha ochilgan hisobvarag’ida hujjatda ko’rsatilagan summani to’lashga etarli pul mablag’lari borligini aniqlaydi. Agar to’lov topshirig’i to’g’ri va to’liq rasmiylashtirilib, uni to’lashga etarli pul mablag’lari bo’lsa, mas’ul ijrochi topshiriqnomadagi barcha ma’lumotlarni dasturiy yo’l bilan kompyuter orqali bankning elektron to’lovlarini amalga oshiruvchi hisoblash markaziga o’tkazadi. Ertasi kun ertalabdan kechikmagan muddatda bank balansi chiqarilgandan keyin hujjatning birinchi nusxasi bankning kundalik yig’majildiga tikiladi va belgilangan tartibda avval joriy arxivda saqlanadi, bir yil o’tgandan so’ng umumiy bank arxiviga topshiriladi. To’lov topshiriqnomasining ikkinchi nusxasi esa mijozning hisobvarag’idan

ko’chirma bilan birgalikda operatsiyalar o’tkazilganligini tasdiqlovchi hujjat sifatida mijozga qaytarib beriladi. Ushbu bank operatsiyasi bo’yicha quyidagi buxgalteriya yozuvi amalga oshiriladi: Debet To’lovchining «Talab qilinguncha saqlanadigan depozit» bo’yicha ochilgan hisobvaraq nomeri Kredit Mablag’ oluvchining «Talab qilinguncha saqlanadigan depozit» bo’yicha ochilgan hisobvaraq nomeri. Ushbu operatsiyani misolda ko’rib chiqamiz. Davlat korxonasi hususiy korxonadan mahsulot sotib oldi. Davlat korxonasi sotib olingan mahsulotning pulini to’lash uchun to’lov topshirig’i rasmiylashtirib o’ziga xizmat ko’rsatuvchi bankka taqdim etdi. To’lov topshirig’i tegishli nazoratdan o’tkazilgandan so’ng, pul o’tkazish bo’yicha quyidagi buxgalteriya yozuvi bajarildi: Debet 20210 «Davlat tasarrufidagi korxonaning talab qilib olinguncha saqlanadigan depoziti». Kredit 20208 «Hususiy korxonaning talab qilinguncha saqlanadigan depoziti». Yuqorida ko’rsatilgan buxgalteriya yozuvlari har ikkala korxonaga bitta bank xizmat ko’rsatgan holda bajariladi. Agar mablag’larni oluvchi korxona boshqa bank xizmatidan foydalanadigan bo’lsa, u holda to’lovchi bankidan vakillik hisobvarag’i orqali o’tkaziladi. Bunday holni quyidagi buxgalteriya yozuvi orqali ko’rish mumkin: Debet 20210 «Davlat tassarufidagi korxonaning talab qilib olinguncha saqlanadigan depoziti». Kredit 10301 «Tijorat bankining vakillik hisobvarag’i». Shunday qilib, tijorat bankining hisoblash markazidan dasturiy yo’l orqali modem usuli bilan elektron to’lov o’tkaziladi, ya’ni «Elektron pochta» deb nomlangan tizim orqali elektron to’lov topshirig’i Markaziy bank qoshidagi hisob markaziga o’tkaziladi. Markaziy bank qoshida ochilgan hisob markazi to’lovchi korxonaga xizmat qiluvchi tijorat bankidan olingan ma’lumotlar asosida elektron

to’lov topshirig’ini modem orqali mablag’ oluvchi korxonaga xizmat ko’rsatuvchi tijorat bankiga o’tkazadi. Elektron to’lovlar tizimi orqali olingan elektron to’lov topshiriqnomalari mablag’larni oluvchi bankda ikki nusxada qog’ozga chiqariladi. Topshiriqnomaning birinchi nusxasi bank mas’ul ijrochisining imzosi va bank muxr izi qo’yilib, kunlik hujjatlar yig’majildiga tikiladi. Ikkinchi nusxasi esa bank mas’ul ijrochisining imzosi va bank muxri izi qo’yilgan holda mijoz hisobvarag’iga ilova sifatida mijozga beriladi. Bu bankda quyidagi buxgalteriya yozuvi amalga oshiriladi: Debet 10301 «Tijorat bankining vakillik hisobvarag’i». Kredit 20208 «Xususiy korxonaning talab qilguncha saqlanadigan depozit hisobvarag’i». Ushbu buxgalteriya yozuvi yordamida to’lovchi korxona bankidan Markaziy bank orqali kelib tushgan pul mablag’lari mablag’ oluvchi korxona bankida mablag’ oluvchining hisobvarag’iga o’tkaziladi. Ta’minotchilar tomonidan mahsulot etkazib berish va xizmatlar ko’rsatish transport xizmati bilan birgalikda bir tekisda amalga oshirilsa, o’zaro hisob- kitoblar doimiy to’lovlar tartibida o’tkazilishi mumkin. Bunday hisob-kitoblar har bir alohida savdo bitimi ya’ni mahsulot ortish, jo’natish yoki xizmat ko’rsatish bo’yicha emas, balki tomonlar oldindan kelishib olgan muddatlar va hajmlarda to’lov topshiriqnomalardan foydalangan holda mablag’larni davriy ravishda ko’chirish yo’li bilan bajariladi. Tomonlar davriy ravishda, lekin har oyda kamida bir marta mahsulotning amalda jo’natilishi yoki xizmatlar ko’rsatilishi asosida o’tgan davri uchun qiyoslashni bajarish va shartnomada belgilangan tartibda qayta hisob-kitob qilishlari lozim. Aniqlangan farqlar alohida topshiriqnoma bilan o’tkazilishi yoki navbatdagi to’lovda hisobga olinishi mumkin. O’zaro qarzlar eng kam miqdorda bo’lishi uchun hisob-kitoblarga oyning oxirida aniqlik kiritish maqsadga muvofiqdir. Umuman to’lov topshiriqnomalari bilan hisob-kitoblar bo’yicha hujjatlar aylanishini quyidagi sxema orqali ko’rish mumkin:

2-sxema. To’lov topshiriqnomalari bo’yicha hisob-kitoblardagi hujjatlar aylanish sxemasi Hisob-kitob markazi Mol sotuvchi korxona 1. Shartnoma Yuqorida keltirilgan sxemaga kuyidagicha tavsif beramiz: 1. Eng avvalo mol jo’natuvchi va mol oluvchi korxonalar o’rtasida xo’jalik shartnomasi tuziladi. 2. Shartnomaga asosan mol jo’natuvchi korxona mol oluvchi korxonaga mahsulot jo’natadi. 3. Mol oluvchi korxona olgan mahsulotga pul o’tkazish uchun to’lov topshirig’i rasmiylashtirib o’ziga xizmat ko’rsatuvchi bankka topshiradi. 4. Bank xodimi tomonidan to’lov topshirig’i asosida mol oluvchi korxona hisobvarag’idan pul chegiriladi. 5. Hisob markazi orqali elektron to’lov mol sotuvchi korxona bankiga jo’natiladi. 6. Kelib tushgan elektron to’lov mol sotuvchi korxona bankida mol sotuvchi korxona hisobvarag’iga o’tkaziladi. 7. Elektron to’lov topshirig’ining bir nusxasi to’langan hujjatlar sifatida mol sotuvchi korxonaga beriladi. . Elektron to’lov 5 Mol jo’natuvchi korxona banki 6 Mol oluvchi korxona banki 7 . To’lov 3 . Tovar 2 Mol oluvchi korxona 4

Hozirgi kunda respublikamizda banklar orqali o’tkazilayotgan barcha to’lovlarning 65-75 foizi to’lov topshiriqnomalari yordamida amalga oshirilmoqda, bu uning afzalliklari bilan bog’liqdir. Bu afzalliklar quyidagilardan iboratdir: • birinchidan, hujjatlar aylanishining oddiyligi va tezligi, ya’ni hisob-kitoblarni amalga oshirishning texnik jihatdan kulayligi. Bu esa o’z navbatida xo’jalik yurituvchi sub’ektlar va bank xodimlarining mehnat sarfini kamaytiradi; • ikkinchidan, pul mablag’lari harakatining tezligi, ya’ni to’lov talabnomasiga nisbatan to’lov topshiriqnomasi bo’yicha hisob-kitoblarda hujjatlarning aylanishi harakati qisqaligi so’zsiz xo’jalik oborot mablag’larining aylanish tezligini oshiradi; • uchinchidan, tovar sotib oluvchining qabul qilgan tovarlari yoki xizmatlar sifatini oldindan aniqlab olinishi. Hisob-kitoblarning bu shaklida to’lov talabnomasi orqali hisob-kitoblarda bo’lgan kabi bankka rad etish arizasi topshirilmaydi, chunki to’lovchining o’zi to’lovni to’lashga rozi bo’lsa, topshiriqnomani bankka topshiradi; • to’rtinchidan, to’lov topshiriqnomasining barcha tovarsiz operatsiyalarda ko’llanishi, bu esa ushbu shakl bo’yicha hisob-kitoblarning ahamiyatini yanada yakkol aks ettiradi. To’lov topshiriqnomasi bo’yicha hisob-kitoblarning afzalliklari bilan bir qatorda kamchiliklari ham mavjud. Kamchiliklar shundan iboratki, mol jo’natuvchi yoki xizmat ko’rsatuvchi korxona uchun to’lovning o’z vaqtida o’tkazilishi to’la kafolatlanmagan. Chunki to’lovning o’z vaqtida o’tkazilishi to’lovchi korxonaning depozit hisobvarag’idagi mablag’lar miqdoriga bog’liq. To’lovning to’liq o’tkazilishiga etarli pul mablag’larining bo’lmasligi pul aylanishi sekinlashtiradi va mahsulot jo’natuvchi yoki xizmat ko’rsatuvchi korxonaning moliyaviy holatini yomonlashtiradi. Lekin ko’rsatilgan kamchilik to’lov topshiriqnomasi bo’yicha hisob- kitoblarning naqd pulsiz hisob-kitoblarning boshqa shakllari oldidagi ahamiyatini kamaytirmaydi. Aksincha, hozirgi davrda xo’jalik sub’ektlari o’rtasida to’lov

topshiriqnomalarining ko’llanilish doirasi yanada kengayib bormoqda, chunki oldingi yillarda to’lov topshiriqnomalari bo’yicha to’lovlar faqat mahsulot jo’natilgandan va xizmatlar ko’rsatilgandan keyingina amalga oshirilar edi. Bunday holat bozor munosabatlari sharoitida o’zini oqlamaydi, debetor va kreditor qarzdorliklarning oshib ketishiga olib keladi, bu esa, o’z navbatida, iqtisodiyotda qarzdorlik zanjirini keltirib chiqaradi. Yuqorida ko’rsatilgan muammolarning oldini olish maqsadida hukumatimiz tomonidan bir qator mexanizmlar ishlab chiqildi, qaror va farmoyishlar qabul qilindi. Dastlab 1995 yil 5 mayda O’zbekiston Respublikasi Prezidentining «Korxona va tashkilotlar rahbarlarining xalq xo’jaligidagi hisob-kitoblarni o’z vaqtida o’tkazishni ta’minlash bo’yicha javobgarligini oshirish chora-tadbirlari to’g’risida»gi 154-sonli Farmoni chiqarildi. Farmonga muvofiq, mulk shaklidan qat’iy nazar har bir xo’jalik sub’ekti agar mol oluvchi korxona bo’lsa, u albatta o’sha mol qiymatining kamida 15 foizi summasini oldindan to’lashi talab etiladi. Tabiiyki, bu to’lov topshiriqnomasi asosi amalga oshiriladi. Oldindan to’lov o’tkazish ilgari yoqilg’i-moylash mahsulotlari va boshqa ba’zi xollarda Davlat bankining ruxsati bilan amalga oshirilar edi. Lekin hozirgi paytda xo’jaliklar o’zlari o’zaro xo’jalik shartnomalari orqali 100 foizli yoki undan kam miqdorda bo’lgan oldindan to’lovlar o’tkazishni kelishib oladilar. Yuqorida ko’rsatilgan mexanizm esa tomonlar o’rtasida shartnomada ko’rsatilgan majburiyatlarning bajarilishi ustidan nazorat o’rnatishga yordam beradi. 15 foizdandan kam bo’lmagan avanslangan to’lovlarning o’tkazilishning majburiyligi, bank bunday to’lovlar ustidan doimo nazorat olib borishi xaqida O’zbekiston Respublikasi Prezidentining yana bir «Hisob-kitoblar tizimi hamda to’lov intizomini mustahkamlash chora-tadbirlari to’g’risida»gi 1996 yil 24 yanvardagi Farmoni chiqarildi, Farmonda korxona va tashkilotlar tomonidan bankka topshiriladigan to’lov topshiriqnomasida kat’iy ravishda shartnoma nomeri, to’lov tartibi, 15 foizdan kam bo’lmagan avans to’lovi miqdori ko’rsatilishi shart qilib belgilandi. Demak, naqd pulsiz hisob-kitoblarning qaysi shaklidan foydalanishdan kat’iy nazar, xo’jaliklar avvalo to’lov summasining 15

foizdan kam bo’lmagan miqdorini to’lov oluvchi korxona hisobvarag’iga aynan to’lov topshirig’i yordamida o’tkazadilar. Bu esa to’lov topshirig’ining iqtisodiyotning hamma sohalarini kamrab olayotganidan dalolat beradi. Umuman, xalq xo’jaligiida hususiy sektorning o’rni kengayib borgan sari kichik va boshqa xususiy korxonalar sonining oshishi to’lov topshiriqnomalari bo’yicha hisob- kitoblar hajmining kengayishiga yo’l ochib beradi. 3 - § . To’lov talabnomasi bo’yicha hisob-kitoblar, ularning rasmiylashtirilishi va hisobga olinishi Naqd pulsiz hisob-kitob shakllaridan biri to’lov talabnomasi bo’yicha hisob- kitoblar bo’lib, ular 1992 yil 1 avgustigacha respublika naqd pulsiz aylanishining qariyb 60-65 foizini tashkil etar edi. Markaziy bankining 1992 yil 6 iyundagi 78- sonli qaroriga muvofiq O’zbekiston xalq xo’jaligida hisob-kitoblarni tartibga solish, ularning holatini yaxshilash, hamda bozor talablariga moslashtirish maqsadida, 1992 yil 3 iyuldan boshlab mulkchilik shaklidan kat’iy nazar barcha korxona va tashkilotlar uchun talabnomalarning o’rniga yangi tartibdagi to’lov- talabnoma topshiriqnomasi bo’yicha hisob-kitoblar amaliyotga kiritildi. Shu bilan birgalikda, 1992 yil 1 avgustgacha to’lov talabnomalarining oborotda bo’lishiga ruhsat etildi. Lekin korxona va tashkilotlar to’lov talabnomasi orqali amalga oshiriladigan hisob-kitoblarga bir necha o’n yillab o’rganib qolganliklari sababli, Markaziy bankka to’lov talabnomasini amaliyotga qaytadan tadbiq etish bo’yicha ko’plab talab va takliflar kelib tushayotganligini hisobga olgan holda, bu masala qayta ko’rib chiqilib, 1996 yil 29 fevraldagi Markaziy bankining Xatiga asosan qaytadan muomalaga kiritildi. To’lov talabnomasi - bu mahsulot etkazib beruvchi va mablag’ oluvchilarning belgilangan summani to’lovchi bank orqali to’lashi to’g’risidagi talabnomani o’z ichiga olgan hisob-kitob hujjatidir. To’lov talabnomasi bo’yicha hisob-kitoblar «aktsept» shaklidagi hisob-kitoblar ham deb yuritiladi. «Aktsept» so’zi lotin tilidan olingan bo’lib, rozilik ma’nosini anglatadi, ya’ni bu to’lovchining to’lovni amalga oshirish uchun bankka bergan roziligidir. Aktsept shakli asosiy inkassaviy hisob-kitob shakli bo’lib hisoblanadi. «Inkasso»

italyancha so’zdan olingan bo’lib, bank o’z mijozi taqdim etgan hujjatga asosan etkazib berilgan mahsulot uchun unda ko’rsatilgan summani to’lovchidan uning banki orqali olib berish bo’yicha majburiyat bo’lib hisoblanadi. Rozilik bildirish usuliga ko’ra aktsept ijobiy va salbiy bo’lishi mumkin. To’lovchi korxonaning roziligi ham, noroziligi xam yozma ravishda bildirilsa, ijobiy aktsept hisoblanadi. Bunday holda to’lov to’lovchidan yozma ravishdagi rozilik xati kelgandagina amalga oshiriladi. Agar 15 kun ichida to’lovchidan rozilik xati kelmasa to’lov talabnomasi to’lovni oluvchiga to’lanmasdan qaytariladi. Salbiy aktsept esa sukut saqlash orqali bildiriladi, to’lovga norozilik yozma ravishda bildiriladi. Agar to’lovga qarshi norozilik xati yozma ravishda kelib tushmasa bank tomonidan to’lov amalga oshiriladi. Salbiy aktseptning o’zi to’lovni amalga oshirish muddatiga ko’ra oldindan aktsept va so’nggi aktseptga bo’linadi. Talabnomani oldindan aktseptlash usulida hisob-kitoblar o’tkazilganda talabnomaning puli aktseptlash muddati tugagandan so’ng, ya’ni ertasi kuni to’lanadi. To’lovchi korxona o’ziga xizmat ko’rsatuvchi bank muassasasiga talabnoma kelib tushgandan keyin 3 kun ichida to’lovdan bosh tortganini ma’lum qilish huquqiga ega. Tovar etkazib beruvchi tovar-moddiy boyliklar etkazib berish, xizmatlar ko’rsatish to’g’risidagi shartnoma, shuningdek, tegishli qonun hujjatlari shartlarini buzgan xollarda to’lovchi to’lashdan bosh tortishi mumkin. Bunday hollarda to’lovchi tomonidan bankka yozma ravishda rad etish arizasi topshirilib, unda to’lovdan bosh tortish sabablari ko’rsatiladi. Aktseptlashning so’nggi aktsept turida to’lov talabnomasi bankka kelib tushgan kunda to’lanadi, lekin to’lov o’tkazilgandan keyingi 3 kun ichida to’lovdan bosh tortish xuquqi saqlanib koladi. Belgilangan muddat o’tgandan so’ng to’lovchi tomonidan rad etish arizasi kelib tushmasa, to’lov to’langanligicha qoladi. Lekin iqtisodiyotning rivojlanishining turli davrlarida aktseptning har xil turlari qo’llaniladi. Masalan, hisob-kitoblarning davrini bir muncha qisqartirish maqsadida 1991 yilgacha asosan so’nggi aktsept ishlatilar edi, faqat qonun- qoidalarda ko’rsatilgan hollardagina oldindan aktseptga yo’l qo’yilar edi. Debet

avizolariga yo’l qo’yilmayotgani sababli hozirgi kunda faqatgina oldindan aktsept turi ishlatilmoqda. Hisob-kitoblarning aktsept, ya’ni to’lov talabnomalari orqali o’tkaziladigan shaklida ishlatiladigan asosiy hujjat bu - to’lov talabnomasidir. To’lov talabnomalari mahsulot etkazib beruvchi tomonidan belgilangan №0505411001 shakldagi blankalarda bankka taqdim etiladi. To’lov talabnomalari quyidagi hollarda ishlatilishi mumkin: a) yuklab jo’natilgan tovarlar uchun; b) bajarilgan ishlar uchun; v) ko’rsatilgan xizmatlar uchun; g) amaldagi qonunchilikda, me’yoriy hujjatlar yoki shartnomada ko’zda tutilgan boshqa to’lovlar uchun. To’lov talabnomasida mahsulot etkazib beruvchi tomonidan talabnoma nomeri, u to’ldirilgan sana, shu korxona nomi, uning hisobvaraq nomeri, xizmat ko’rsatuvchi bank nomi, bankining kodi, to’lovchi korxonaning nomi, uning bankdagi hisobvaraq nomeri, to’lovchiga xizmat ko’rsatuvchi bank nomi va kodi, to’lov summasi va to’lov maqsadi ko’rsatiladi. Hujjatlarda ko’rsatilishi lozim bo’lgan umumiy rekvizitlardan tashqari to’lov talabnomasida quyidagilar ko’rsatilishi lozim: a) shartnoma sanasi va nomeri; b) mahsulotlarni yuklab jo’natish sanasi va tovar-transport yoki qabul qilish, topshirish hujjatlari va transport turi, tovarlar pochta va telekommunikatsiya agentligi orqali jo’natilganda esa - pochta kvitantsiyalarining nomeri; Agar mahsulot uni sotib oluvchining transport vositasi bilan olib ketilsa, talabnomaning alohida ajratilgan joyida yuk uni sotib oluvchining o’z transporti bilan olib chiqib ketilgani hamda ishonchnomaning nomeri ko’rsatiladi. Shunday hollar ham bo’ladiki, mahsulot kontraktatsiya shartnomalari asosida realizatsiya qilinadi. Kontraktatsiya shartnomalari bo’yicha mahsulot etkazib berishda to’lov talabnomasining yuqori qismida ya’ni talabnoma deb yozilgan so’z yoniga

«Kontraktatsiya shartnomasi» deb ko’rsatilishi lozim. To’lov talabnomasining pastki, alohida ajratilgan qismida maxsulot jo’natuvchi korxona rahbari va bosh buxgalterning imzolari va korxonaning muhr izi qo’yiladi. To’lov talabnomasi mahsulot yuklab jo’natilgandan keyin shartnomada belgilangan muddatdan kechiktirilmasdan bankka inkassoga topshiriladi. Maxsulot etkazib beruvchi bitta operatsiya bo’yicha talabnomalarni inkasso uchun qayta taqdim qilish huquqiga ega emas. Umuman, to’lov talabnomalari bo’yicha hisob-kitoblarni rasmiylashtirish va hisobga olish ishlarini 3 bosqichga bo’lib ko’rib chiqamiz: 1-bosqich. Mahsulot etkazib beruvchi bankida to’lov talabnomasini inkassoga qabul qilinishi. 2-bosqich. Mahsulot oluvchi bankida to’lov talabnomalarini to’lash bo’yicha operatsiyalari. 3-bosqich. Mahsulot etkazib beruvchi bankida to’lovni qabul qilish bo’yicha operatsiyalar. To’lov talabnomalari bo’yicha hisob-kitoblarning har bir bosqichini alohida ko’rib chiqamiz. 1. Mahsulot etkazib beruvchi bankida to’lov talabnomasini inkassoga qabul qilinishi. To’lov talabnomasi mahsulot jo’natilgandan so’ng shartnomada belgilangan muddatlarda mahsulot jo’natuvchi korxona tomonidan ro’yxat, ya’ni reestr asosida bankka inkassoga topshiriladi. Ro’yxat to’lov talabnomalarining barcha rekvizitlarini o’z ichiga olgan holda ikki nusxada to’ldiriladi. Ro’yhatning birinchi nusxasi korxonaning rahbari va bosh buxgalteri tomonidan imzolanib muxrning izi bilan rasmiylashtirilishi lozim. Ro’yxatning birinchi nusxasi qabul qilingan sana, mas’ul ijrochi imzosi qo’yilgandan so’ng, bankning to’rtburchak muxr izi tushirilib bankda qoldiriladi. Ro’yxatning ikkinchi nusxasi esa qabul qilingan sana, mas’ul ijrochi imzosi qo’yilib, bankning to’rtburchak muxr izi tushirilib mahsulot etkazib beruvchiga qaytariladi.

To’lov talabnomalari 2 yoki 3 nusxada to’ldiriladi. Agar mahsulot etkazib beruvchi va to’lovchi tomonlarga bitta bank bo’limi xizmat ko’rsatsa talabnoma 3 nusxada taqdim etiladi. Bu holda to’lov talabnomalarning har bir nusxalari quyidagicha ishlatiladi: • birinchi nusxa to’lovlar amalga oshirilgandan keyin bank mas’ul ijrochisi tomonidan imzo, to’lovi amalga oshirilgan sana, bankning to’rtburchak muhr izi tushirilgan va qabul qilish sanasi ko’rsatilgan holda kunlik hujjatlar yig’masiga tikiladi; • ikkinchi nusxasi to’lovni oluvchining hisobvarag’iga ilova sifatida mas’ul ijrochi tomonidan imzo, to’lov amalga oshirilgan sana, bankning to’rtburchak muhr izi qo’yilgan va qabul qilingan sana ko’rsatilgan holda beriladi; • uchinchi nusxa qabul qilish sanasi, to’lovni amalga oshirish sanasi, mas’ul ijrochining imzosi va bank to’rtburchak muxr izi qo’yilgan holda to’lovchiga uning hisobvarag’idan ko’chirma bilan birgalikda beriladi. Agar to’lovchi va mahsulot etkazib beruvchi bir hudud ichidagi yoki turli hududlarda joylashgan turli bank bo’limlari xizmatidan foydalansalar, bu holda to’lov talabnomalari 3 nusxada bankka taqdim etiladi. Ularning har uchchala nusxalari pochta aloqasi yoki kurerlar orqali to’lovchi bankiga jo’natiladi. 2. Mahsulot oluvchi bankida to’lov talabnomasini to’lash bo’yicha operatsiyalar. To’lovchi korxona bankiga mahsulot etkazib beruvchi korxona bankidan birinchi ikkinchi va uchinchi nusxa to’lov talabnomasi pochta aloqasi yoki kurerlar orqali kelib tushadi. To’lov talabnomalari tomonlar o’rtasida tuzilgan shartnomaga asosan aktseptlash tartibida yoki aktseptlamasdan to’lanishi mumkin. Bank tomonidan talabnomalarni aktseptlash uchun bir shahar ichida 3 kun, shaharlararo hisob-kitoblarda 5 kun muhlat beriladi. Lekin korxonaning iltimosiga ko’ra bank bu muddatni 10 kungacha cho’zishi mumkin. Aktseptlash tartibida to’lanadigan talabnomalarning birinchi nusxasi to’lov uchun aktseptlashni kutayotgan hisob-kitob hujjatlari kartotekasiga joylashtiriladi. Bu kartoteka bankda 1-kartoteka deb yuritiladi. Talabnomaning ikkinchi nusxasi tovar-transport

hujjatlari bilan birga keyingi ish kunidan kechiktirilmasdan hujjatni aktseptlash uchun qabul qilingan sana ko’rsatilgan holda va to’lov to’g’risida ma’lumot sifatida to’lovchiga beriladi. Agar bankda 1-kartotekaning hisobini yuritish dasturiy yo’l bilan olib borilmasa, bunday talabnomalar qabul qilingan kuni «To’lov uchun aktseptlanishi kutayotgan hisob-kitob hujjatlari»ni hisobga olib borish daftarida ikki nusxada quyidagi rekvizitlarni ko’rsatgan holda bank tomonidan qayd etiladi: • to’lov talabnomasining bankka kelib tushish sanasi va to’lov muddati; • to’lovchining hisobvaraq nomeri; • to’lovchining nomi; • bank kodi; • talabnomaning nomeri; • to’lov maqsadi va summasi; To’lov talabnomasini 1-kartotekaga joylashtirishda quyidagi balansdan tashqari provodka bajariladi. Dt 90962 «To’lov muddatini kutayotgan hisob-kitob hujjatlari», Kt 96319 «Kontr. hisobvaraq». Daftarda har bir to’lov muddati bo’yicha talabnoma summalari va bu summalarning yig’indilari ko’rsatilgan bo’lishi lozim. 1-kartotekaning hisobi dasturiy yo’l bilan amalga oshirilsa, talabnoma bo’yicha ko’rsatilgan rekvezitlar kompyuterga kiritiladi. Yuqorida eslatib o’tganimizdek, to’lovchi to’lov talabnomasining ikkinchi nusxasini olgandan keyin, uning to’g’ri rasmiylashtirilganligini, shartnoma shartlariga to’g’ri kelishkelmasligini tekshirib chiqadi. To’lovchi belgilangan muddatda tovar moddiy qiymatliklarni jo’natishda, xizmatlar ko’rsatishda amaldagi qonuniy hujjat talablariga hamda shartnoma shartlariga amal qilinmagan xollarda talabnomani qisman yoki to’liq to’lashdan bosh tortishi mumkin. Buning uchun bankka yozma ravishda rad etish arizasi topshirilishi lozim. Agar belgilangan muddatda bankka rad etish arizasi topshirilmasa, ya’ni yozma ravishda aktseptlashni rad etmasa talabnoma aktseptlangan bo’lib hisoblanadi. Aktseptlashni rad etish xuquqiga ega bo’lgan mansabdor shaxslar doirasini bank

bo’limi boshqaruvchisi belgilaydi. Banklar aktseptlashni rad qilish mohiyati bo’yicha kelib chiqqan baxs va nizolarga aralashmaydilar. To’lov talabnomasini to’lashdan bosh tortib yozilgan rad etish arizasi to’lovchi tomonidan bankka topshirilganda talabnomalar shu kunning o’zidayoq 1- kartotekadan olinadi hamda tovartransport hujjatlari va boshqa ilovalar bilan birga mahsulot etkazib beruvchi korxona bankiga ijrosiz qaytarib yuboriladi. To’lovchi talabnomani aktseptlashdan qisman bosh tortganda, to’lovchi tomonidan aktseptlangan summa bo’yicha to’lovlar o’tkaziladi. To’lovchi hisobvarag’ida talabnomaning aktseptlangan qismini to’lashga etarli pul mablag’lari bo’lmaganda talabnoma «Muddatda to’lanmagan hisob-kitob hujjatlari» kartotekasiga joylashtiriladi. Bu kartoteka 2kartoteka deb yuritiladi. Bunda talabnomaning dastlabki summasi o’chiriladi va yonida to’lovchi aktseptlagan summa yozib ko’yiladi. Kartotekaga kirim qilingan summa to’lovchi korxona hisobvarag’iga pul mablag’lari kelib tushgandan so’ng to’lanadi. Agar 1-kartotekaga joylashtirilgan to’lov talabnomasi bo’yicha to’lovchi tomonidan rad etish arizasi kelib tushmasa, to’lov talabnomasi aktseptlash uchun berilagan 3 kun muhlat o’tgandan so’ng to’lanadi. To’lov talabnomasini to’lashdan avval to’lovchi korxonaning depozit hisobvarag’ini yurituvchi mas’ul ijrochi talabnomani to’lash uchun etarli pul mablag’larining to’lovchi hisobvarag’ida mavjudligini tekshiradi. Agar depozit hisobvarag’ida etarli pul mablag’lari bo’lsa, talabanoma to’lanadi. To’lov talabnomasini to’lash quyidagi buxgalteriya yozuvi orqali amalga oshiriladi: Debet 20210 «Davlat tasarrufidagi korxonaning talab qilinguncha saqlanadigan depozit hisobvarag’i» Kredit 10301 «Tijorat bankining vakillik hisobvarag’i» Balans ichidagi hisobvaraqlar bo’yicha bajarilgan ushbu buxgalteriya yozuvlari bilan bir qatorda balansdan tashqari ko’zda tutilmagan holatlar hisobvaraqlar bo’yicha ham buxgalteriya yozuvlari bajariladi, 1 kartotekadagi to’lov talabnomasining o’zi kartotekadan olinadi va hisobdan chiqariladi:

Debet 96319 «To’lov muddatini kutayotgan hisob-kitob hujjatlari bo’yicha kontr. hisobvaraq» Kredit 90962 «To’lov muddatini kutayotgan hisob-kitob hujjatlari» Bu buxgalteriya yozuviga qarama-qarshi bo’lgan yozuv to’lov talabnomasini 1- kartotekaga qabul qilingan paytda bajariladi, ya’ni to’lov talabnomasining 1- kartotekaga kirim qilinganligini bildiradi. Yuqoridagi buxgalteriya yozuvi esa talabnomaning kartotekadan olinganligini bildiradi. To’langan talabnoma elektron to’lovlar tizimi yordamida Markaziy bank qoshidagi Hisobkitob markazi orqali mahsulot sotuvchi bankiga o’tkaziladi. Talabnomaning ushbu nusxasi bankning kundalik hujjatlar yig’majildiga tikiladi va belgilangan tartibda saqlanadi. Lekin har doim ham to’lovchi korxonaning hisobvarag’ida to’lov talabnomasini to’lashga etarli pul mablag’lari bo’lmasligi mumkin. To’lovchining depozit hisobvarag’ida mablag’ bo’lmaganda talabnomalar 2-kartotekada to’lovni kutayotgan hujjatlar qatoriga joylashtiriladi, bu haqda mahsulot etkazib beruvchi bankiga xabar beriladi. Talabnoma 2-kartotekaga joylashtirilganda balansdan tashqari ko’zda tutilmagan holatlar hisobvaraqlari bo’yicha quyidagi buxgalteriya yozuvlari amalga oshiriladi: Debet 90963 «Muddatda to’lanmagan hisob-kitob hujjatlar» Kredit 96321 “Muddatda to’lanmagan hisob-kitob” To’lov talabnomasi 2-kartotekada to’lovchi korxonaning talab qilinguncha saqlanadigan depozit hisobvarag’iga talabnomani to’lashga etarli pul mablag’lari kelib tushguncha saqlanadi. Pul kelib tushgandan so’ng, kelib tushgan mablag’lar doirasida me’yoriy hujjatlarda o’rnatilgan tartibda to’lov amalga oshiriladi. To’lov o’tkazish bo’yicha quyidagi buxgalteriya yozuvi bajariladi: Debet - Mahsulot sotib oluvchining depozit hisobvarag’i Kredit - Tijorat bankining vakillik hisobvarag’i Bu erda mahsulot sotuvchi turli mulkchlik shakldagi xo’jalik yurituvchi sub’ekt bo’lishi mumkin. Yuqorida to’lov talabnomasi to’langanda davlat tasarrufidagi

korxonaning depozit hisobvarag’i orqali operatsiya o’tkazilgan holni ko’rgan edik. Balans ichidagi buxgalteriya yozuvini bajarishdan avval hujjat 2-kartoteka hisobidan chiqariladi, bu operatsiya quyidagi buxgalteriya yozuvi asosida amalga oshiriladi: Debet 96321 «Muddatida to’lanmagan hisob-kitob hujjatlari bo’yicha kontr. hisobvaraq» Kredit 90963 «Muddatda to’lanmagan hisob-kitob hujjatlari» Bank 2-kartotekadagi to’lov muddati o’tkazib yuborilagan hisob-kitob hujjatlari bo’yicha to’lovlarni amalga oshirishda to’lovchilardan penya undirish va oluvchilar foydasiga o’tkazish xuquqiga ega, agar bu bank va mijoz o’rtasida tuzilgan shartnomada kelishilgan bo’lsa. Bank to’lovchilardan mablag’larni oluvchilar foydasiga muddati o’tkazib yuborilagan to’lovlar bo’yicha muddati o’tkazib yuborilgan har bir kun uchun qonunda belgilangan miqdorda penya undiradi. Muddati o’tkazib yuborilgan kunlarni belgilashda kalendar kunlar hisobga olinadi. Undirilgan penya muddati o’tkazib yuborilgan to’lovning asosiy summasi bilan to’lovchining hisobvarag’idan hisobdan chiqariladi va mahsulot etkazib beruvchining bankiga elektron to’lovlar tizimi orqali o’tkaziladi. Ba’zi vaqtlarda to’lov talabnomasini to’lash uchun to’lovchi korxonaning roziligi, ya’ni aktseptlashi talab etilmaydi. To’lovchilarning hisobvaraqlaridan mablag’larni aktseptlamasdan hisobdan chiqarish tomonlar o’rtasida tuzilgan shartnomaga asosan kommunal xizmat, telefon, kanalizatsiya, pochta-telegraf xarajatlari hamda tashilgan ahlat uchun amalga oshiriladi. Kommunal xizmatlar uchun to’lovlar o’lchov asboblari gaz, suv, issiqlik va elektr-energiyasi uchun hisoblanadi. Bunday aktseptsiz to’lovlarni amalga oshirish uchun bankka taqdim qilingan to’lov talabnomaning yuqori qismiga «aktseptsiz» hamda “hisoblash asboblari asosida” degan so’zlari ko’rsatib o’tilgan bo’lishi lozim. Ushbu yozuvlar bo’lmagan taqdirda talabnomalar umumiy asosda aktseptlanadi va to’lanadi. Talabnomada ma’lum to’lovlarni aktseptlamasdan hisobdan chiqarish xuquqiga ega bo’lgan konuniy hujjat yoki shartnomaning sanasi, nomeri va to’lovning

maqsadi ko’rsatilishi shart. Bunda bank ilova qilingan hujjatlarning talabnomada ko’rsatilgan ularning rekvezitlariga mosligini tekshirib ko’radi. Bank operatsion kuni kelib tushgan aktseptsiz to’lanadigan talabnomalar shu kunning o’zida to’lanadi. To’lovchi korxonaning depozit hisobvarag’ida talabnomani to’lash uchun mablag’lar yo’qligi yoki kamligi aniqlansa hamda ularni to’lashi uchun bank kreditini berish imkoniyati bo’lmaganda, to’lanmagan summa «O’z muddatida to’lanmagan hisob-kitob hujjatlari» kartotekasi bo’yicha alohida hisobvaraqqa o’tkaziladi, talabnomaning o’zi esa 2-kartotekaga joylashtiriladi. Operatsion kun tugagandan so’ng bankka kelib tushgan to’lov talabnomalari keyingi ish kuni to’lanadi. Bunday talabnomalarga «Kechki» degan belgi qo’yib qo’yiladi. Umuman aktseptsiz to’langan yoki 2-kartotekaga joylashtirilgan talabnomalar bo’yicha buxgalteriya yozuvlari aktseptlash tartibda to’lanadigan talabnomalar singari amalga oshiriladi. 3. Mahsulot etkazib beruvchi bankida to’lovni qabul qilish bo’yicha operatsiyalar. To’lovchi korxona bankida to’langan to’lov talabnomasi «Elektron pochta» elektron tizimi orqali Markaziy bank qoshidagi Hisob-kitob markaziga uzatiladi. Hisob-kitob markazida to’lovchi korxona bankining vakillik hisobvarag’idan to’lov talabnomasida ko’rsatilgan pul summasi mahsulot etkazib beruvchi bankining vakillik hisobvarag’iga o’tkaziladi. Elektron to’lov tizimi orqali olingan elektron talabnomalar mablag’lari oluvchi bankda ikki nusxada qog’ozga chiqariladi. Ularning birinchi nusxasi bank mas’ul ijrochisining imzosi va bank muhri qo’yilib kundalik hujjatlar yig’majildiga tikiladi va belgilangan tartibda saqlanadi. Talabnomaning ikkinchi nusxasi bank mas’ul ijrochisining imzosi va bank muxri qo’yilgan holda mahsulot etkazib bergan korxonaning depozit hisobvarag’iga ilova sifatida qo’shib beriladi. Shu bilan birga bu korxonaga hisobvarag’idan ko’chirma ham beriladi. Mahsulot etkazib beruvchi bankida to’lovchi bankidan kelib tushgan to’lov summasi quyidagi buxgalteriya yozuvi orqali mablag’ oluvchining hisobvarag’iga o’tkazib ko’yiladi:

Debet Tijorat bankining vakillik hisobvarag’i Kredit Mahsulot etkazib beruvchining depozit hisobvarag’i Bu erda mahsulot etkazib beruvchi davlat tasarrufidagi, davlat tasarrufidan tashqaridagi turli mulkchilik shakllariga qarashli korxonalar bo’lishi mumkin. Shunga ko’ra ularning hisobvaraq nomerlari belgilanadi. Ushbu buxgalteriya yozuvi mahsulot etkazib beruvchi korxonaning hisobvarag’iga sotilgan mahsuloti uchun pul mablag’larining kelib tushganligini bildiradi. To’lov talabnomalari bo’yicha hisob-kitoblar umumlashgan holda kanday amalga oshirilishini to’lov talabnomalari bo’yicha hisob-kitoblarning hujjatlar aylanishi sxemasi orqali yaqqol ko’rish mumkin. 3-sxema. To’lov talabnomalari bo’yicha hisob-kitoblarda hujjatlarning aylanish sxemasi Hisob markazi 9 8 10 Mahsulot jo’natuvchi 4 Mahsulot oluvchi 7 korxona banki korxona banki 5 6 11 3 Mahsulot oluvchi Mahsulot jo’natuvchi korxona korxona 1 2

1. Mahsulot jo’natuvchi korxona bilan mahsulot oluvchi korxona o’rtasida xo’jalik shartnomasi tuziladi. 2. Mahsulot jo’natuvchi korxona mahsulot oluvchi korxonaga tovar jo’natadi. 3. Mahsulot jo’natuvchi korxona o’ziga xizmat ko’rsatuvchi bank bo’limiga to’lov talabnomasi va tovar-trasport hujjatlarini taqdim qiladi. 4. Mahsulot jo’natuvchi korxona banki mahsulot oluvchi korxona bankiga pochta yoki kurerlar orqali hujjatlarni jo’natadi. 5. Mahsulot oluvchi korxona banki kelib tushgan to’lov talabnomasini aktseptlash uchun mahsulot oluvchi korxonaga beradi. 6. Korxona o’z bankiga aktseptlangan talabnomani taqdim etadi. 7. Mahsulot oluvchi korxona banki talabnomada ko’rsatilgan summani to’lovchi korxona hisobvarag’idan chegirib, talabnoma bo’yicha to’lovni amalga oshiradi. 8. Mahsulot oluvchi korxona banki Hisob-kitob markaziga to’langan elektron to’lov talabnomasini modem orqali jo’natadi. 9. Hisob-kitob markazi elektron to’lov tizimi orqali to’langan talabnomani mahsulot sotuvchi korxona bankiga o’tkazadi. (Hisob-kitob markazida bo’ladigan operatsiyalar boshqa mavzuda batafsil ko’rilishi sababli u erda Hisob-kitob markazida bajariladigan ishlar batafsil yoritilmadi.) 10. Mahsulot sotuvchi korxona banki talabnoma summasini mahsulot sotuvchi korxonaning hisobvarag’iga o’tkazadi. 11. To’lovning kelib tushganligini habar qilish uchun kompyuterda chiqarilagan elektron to’lov talabnomasining ikkinchi nusxasini hisobvaraqdan ko’chirma bilan birgalikda mahsulot sotuvchi korxonaga topshiradi. Naqd pulsiz hisob-kitoblarning boshqa shakllari kabi to’lov talabnomasi bo’yicha hisobkitoblar xam ma’lum bir afzallik va kamchiliklarga ega. To’lov talabnomalari bilan hisobkitoblarnig afzalliklari quyidagilardan iborat: 1) Mahsulot sotuvchi bilan mahsulot oluvchi tomonlar bir-birini o’zaro nazorat qilishga qulay. 2) Mahsulot oluvchiga tovarni jo’natish kechiktirilmaydi.

3) Mol jo’natuvchi bilan hisob-kitob qilish uchun mahsulot oluvchining mablag’ini aloxida hisobvaraqda deponent qilib ko’yish talab etilmaydi, ya’ni to’lovchining mablag’lari biror muddatga oborotdan tashqariga chiqib ketmaydi. 4) To’lovchiga taqdim etilgan hujjatlar asosida mol etkazib beruvchining shartnoma shartlari qay darajada bajarilishini tekshirish huquqi beriladi, shu bilan birga shartnoma shartlaridan biri buzilgan holda to’lov to’lashdan bosh tortish huquqiga ega bo’ladi. 5) Mol oluvchi hisobvarag’idan aktseptsiz talabnomalar bo’yicha mablag’larning majburiy olinishi mahsulot etkazib beruvchi yoki xizmat ko’rsatgan tomon manfaatlariga mos keladi. To’lov talabnomasi bo’yicha hisob-kitoblarning kamchiliklari kuyidagilar: 1. Mahsulot sotuvchi korxonaga to’lovning o’z vaqtida o’tkazilishi kafolatlanmaydi. 2. To’lov o’tkazilishi bilan tovar jo’natilishi vaqtining bir-biriga mos kelmasligi. 3. To’lov talabnomasi bo’yicha hisob-kitoblarda hujjatlar aylanishi to’lov topshirig’iga nisbatan uzoqroq davom etadi. Umuman, to’lov talabnomasi bo’yicha hisob-kitoblarning ishlatilishi ko’p hollarda 2kartotekadan o’z vaqtida to’lanmagan to’lov talabnomalarning ko’payishiga sharoit yaratadi, chunki talabnoma bankka to’lov uchun kelib tushgan vaqtda to’lovchining hisobvarag’idan har doim ham to’lovni amalga oshirish uchun etarli pul mablag’lari bo’lmaydi. Kartotekaga qo’yilgan har bir to’lov talabnomasi respublika xalq xo’jaligi debetorlik va kreditorlik qarzlarining oshganligidan dalolat beradi. Shu sababli, respublika banklari o’z mijozlarining kartotekadagi hujjatlari va ularni to’lash bo’yicha qanday ishlar olib borilayotganini nazorat qilib turadilar.

Asosiy adabiyotlar 1. «O’zbekiston Respublikasi Markaziy banki to’g’risida»gi O’zbekiston Respublikasi Qonuni. 1995 y. 26 dekabr. 2. «Banklar va bank faoliyati to’g’risidagi»gi O’zbekiston Respublikasi Qonuni. 1996 y. 25 aprel. 3. O’zbekiston Respublikasi Prezidentining «Hisob-kitoblar mexanizmini takomillashtirish va respublika hamda mahalliy byudjetlarga to’lovlarning o’z vaqtida kelib tushishini rag’batlantirish chora-tadbirlari to’g’risida»gi Farmoni. 1998 y. 4 fevral. 4. O’zbekiston Respublikasi Markaziy bank buxgalteriya hisobining hisobvaraqlar rejasi. 5. O’zbekiston Respublikasi tijorat banklarining buxgalteriya hisobining hisobvaraqlar rejasi. 6. O’zbekiston Respublikasida «Naqd pulsiz hisob-kitoblarni tashkil qilish haqida»gi 60-sonli Nizom. 2002 y. 12 yanvar. 7. O’zbekiston Respublikasi banklarida ochiladigan bank hisobvaraqlari haqidagi 1-sonli yo’riqnoma. 2001 y. 6 oktyabr. 8. O’zbekiston Respublikasi banklarida buxgalteriya hisobi va hisoboti to’g’risidagi 61-sonli yo’riqnoma. 1997 y. 5 sentyabr. 9. Abdullaeva Sh.Z. «Pul, kredit va banklar» Toshkent 2000 y. 10.Abdullaeva Sh.Z, Navro’zova K.N. «Banklarda buxgalteriya hisobi asoslari» O’quv qo’llanma T. 2001 y. 11.Murugova I.A. Navro’zova K.N. «Osnova buxgalterskogo ucheta bankax» T. 2001 g.

Похожие

Naqd pulsiz hisob-kitoblar tizimi

Naqd pulsiz hisob-kitoblar mohiyati va ularni tashkil etish asoslari

Banklararo hisob-kitoblarning hisobi va ularning rasmiylashtirilishi

Pul mablag’lari va hisob–kitoblar hisobi

Budjet tashkilotlarida hisob-kitoblar hisobi