Mehnatga xaq to'lash - Экономика - Рефераты

Mehnatga xaq to'lash

Загружено в:

20.09.2019

Скачано:

0

Размер:

71.5 KB

Mehnatga xaq to`lash Reja: 1. Mehnat haqi tushunchasi va uning umumiy tavsifi 2. Normal ish vaqtidan chetga chiqqan bajarilgan ishlar uchun haq to`lash tartibi

Mehnat haqi tushunchasi va uning umumiy tavsifi Ish haqi azaldan aholi daromadining asosiy manbalaridan biri hisoblanadi. SHu bois, bozor iqtisodiyoti sharoitida mehnatga haq to`lashni huquqiy jihatdan tartibga solish va takomillashtirish, mehnat unumdorligini oshirish hamda fuqarolarning moddiy ahvolini yaxshilashda tutgan o`rnini aniqlash muhim ahamiyat kasb etadi. Ma`lumki, ishlab chiqarish korxonalarida olingan sof daromad, davlat muassasalarida esa davlat byudjeti hisobidan ajratiladigan mablag`lar ish haqining asosiy manbai hisoblanadi. Ish haqi tarkibi jihatidan ikki qismdan iborat: asosiy ish haqi va qo`shimcha ish haqidan tashkil topadi. Tarif razryadi yoki mansab maoshi ish haqining asosiy qismini, mukofot, ustama, rayon koeffitsientlariga qarab to`lanadigan to`lovlar ish haqining qo`shimcha qismini tashkil etadi. Ish haqi bilan bog`liq munosabatlarni tartibga solishda, ayniqsa, davlat byudjeti muhim o`rin tutadi. O`zbekiston Respublikasining "Byudjet tizimi to`g`risida" 2000 yil 14 dekabrda qabul qilingan 158-11-son qonunining 1-moddasida byudjet tizimiga oid barcha masalalarni hal qilish tartibi batafsil bayon etilgan. Mazkur qonunda ko`rsatilganidek, davlat byudjeti—davlat pul mablag`larining (shu jumladan, davlat maqsadli jamg`armalari mablag`lari) markazlashtirilgan jamg`armasi bo`lib, unda daromadlar manbai va ulardan tushumlar miqdori, shuningdek, moliya yili mobaynida aniq maqsadlar uchun ajratiladigan mablag`lar sarfi yo`nalishlari va miqdori nazarda tutiladi. Respublika byudjeti davlat byudjetining umumdavlat miqyosidagi tadbirlarni moliyalashtirishda foydalaniladigan qismi sifatida daromadlar manbalari va ulardan tushumlar miqdori, shuningdek, moliya yili mobaynida aniq maqsadlar uchun ajratiladigan mablag`lar sarfi yo`nalishlari va miqdoridan iboratdir. Mazkur qonunning 4-moddasida ko`rsatilishicha, byudjet tizimi turli darajadagi byudjetlar va byudjet mablag`lari oluvchilar yig`indisi, byudjetlarni tashkil etish va tuzish tamoyillarini, byudjet jarayonida ular o`rtasida, shuningdek, byudjet hamda mablag`lar oluvchilar o`rtasida vujudga keladigan o`zaro munosabatlarni ifodalaydi.

Davlat byudjeti daromadlari va harajatlarini boshqarish O`zbekiston Respublikasi Moliya vazirligi tomonidan amalga oshiriladi (Mazkur qonunning 36- moddasi). Ma`lumki, xorijiy investitsiyalarni jalb etish mamlakatimizda amalga oshirilayotgan iqtisodiy islohotlarning muhim yo`nalishlaridan biri sifatida e`tirof etilgan. SHu ma`noda, O`zbekiston respublikasi Vazirlar Mahkamasi tomonidan 2000 yil 19 avgustda qabul qilingan "Horijiy investitsiyalar ishtirokidagi korxonalarda ish haqi to`lashni tartibga solish chora-tadbarlari to`g`risida"gi qarori muhim ahamiyat kasb etadi. Ushbu qarorga muvofiq, O`zbekiston Respublikasi Moliya vazirligi, Markaziy bank, Mehnat va aholini ijtimoiy muhofaza qilish vazirligi tomonidan 21-23 sentyabrda "Horijiy investitsiyalar ishtirokidagi korxonalarda mehnatga haq to`lash fondini shakllantirish to`g`risida" Nizom tasdiqlanib, Adliya vazirligida 2000 yil 29 sentyabrda 975-sonli raqam bilan davlat ro`yhatidan o`tkazilgan. Bundan ko`zlangan maqsad xorijiy investitsiyalar ishtirokidagi korxonalarda mehnatga haq to`lash tizimini tartibga solish, mehnatga haq to`lash fondini sun`iy kamaytirishga yo`l qo`ymaslik va shu korxonalarning haq to`lash borasida kafolatlarini kuchaytirishdan iborat. Ushbu nizom o`zida ko`rsatilgan shartlarga muvofiq barcha korxona, tashkilot va muassasalarga nisbatan tatbiq etiladi. Ma`lumki, 2001 yil 6 dekabrda O`zbekiston Respublikasi Oliy Majlisining 2- chaqiriq 7-sessiyasida O`zbekiston Respublikasining 2002 yil uchun davlat byudjeti haqidagi qonun tasdiqlangan. 2002 yilga mo`ljallangan davlat byudjetida ko`zda tutilgan asosiy vazifalar, jumladan, valyuta bozori va tashqi iqtisodiy faoliyatni erkinlashtirish, iqtisodiy o`sishni faollashtirishga yo`naltirilgan investitsion dasturlar tarkibiy o`zgarishlar va ijtimoiy infratuzilmani rivojlantirish, mamlakat mudofaasini va havfsizligini mustahkamlash bilan bir qatorda, aholining ijtimoiy yordamga muhtoj qatlamini qo`llab-quvvatlash dasturlarini amalga oshirishga oid izchil chora-tadbirlar ishlab chiqilishi va amaliyotga tatbiq etilishiga ham alohida ahamiyat berilgan. Joriy yilgi davlat byudjetida mamlakatni ijtimoiy- iqtisodiy rivojlantirishning strategik yo`nalishlarini ro`yobga chiqarish,

jamiyatdagi iqtisodiy islohotlar va o`zgarishlar ko`lamini kengaytirishga doir dasturiy chora-tadbirlarni amalga oshirish nazarda tutilgan. SHu bilan birga, unda makroiqtisodiy, shuningdek, moliyaviy jihatdan barqaror iqtisodiy o`sishni ta`minlash, iqtisodiyotda tarkibiy islohotlarni chuqurlashtirish, tashqi iqtisodiy aloqalarni va valyuta bozorini bosqichma-bosqich erkinlashtirish, halqning moddiy farovonligini yaxshilash, aholining yordamga muhtoj guruxlarini ijtimoiy jihatdan muhofaza etishni kuchaytirish va boshqa bir qator masalalarning amalga oshirilishi mo`ljallangan. 2002 yilgi davlat byudjetida daromadga solinadigan soliq stavkasini pasaytirish hamda jismoniy shaxslarni soliqqa tortish tartibini yanada takomillashtirish ham ko`zda tutilgan. Ma`lumki, bozor munosabatlarini shakllantirish va erkin narxlarning joriy etilishi sharoitida hukumat tomonidan aholini ijtimoiy himoya qilishga doir, shu jumladan, ish haqi, pensiyalar va nafaqalarni bosqichma-bosqich oshirish asosida aniq maqsadga qaratilgan chora-tadbirlar amalga oshirilmokda. Ta`kidlash joizki, ilgari iqtisodiyotning turli sohalarida bir xil malakadagi teng mehnatga turli miqdorda ish haqi to`lanishi va uning miqdori bo`yicha katta tafovutga yo`l qo`yilgan. Buning natijasida, mehnat unumdorligi va malakani oshirishga rag`batlantiruvchi omillar o`rtasida, ish haqi bilan bajariladigan ishning murakkabligi o`rtasidagi bog`liqlik tobora susayib ketayotgani yaqqol sezila boshladi. Bu hol ayniqsa ishlab chiqarish va noishlab chiqarish tarmokdari mutaxassislari mehnatiga haq to`lashda jiddiy tafovutlarni keltirib chiqardi. Bunday nomutanosiblikning kuchayishini bartaraf etish va xodimlarning turli toifalari ish haqida, ular mehnatining murakkabligi va malakasiga bog`liq, asosan gap nisbatlarni qaror toptirish maqsadida O`zbekiston Respublikasi Vazirlar Mahkamasining "1993 yil 1 yanvardan boshlab mehnatga haq to`lashning yagona tarif setkasini joriy etish to`g`risida"gi qarori qabul qilingan. O`zbekiston Respublikasi Vazirlar Mahkamasiiipg 1996 yil 18 martdagi "Mehnatga haq to`lashning yagona tarif setkasini takomillashtirish to`g`risida"gi 103-sonli qarori bilan mehnatga haq to`lashning 22 ta razryadi joriy etilgan.

Bundan tashqari, mazkur yagona tarif setkasini qo`llash yuzasidan O`zbekiston Respublikasi Mehnat va aholini ijtimoiy muhofaza qilish vazirligi tomonidan 1996 yil 28 martda tavsiyanomalar ishlab chiqilib, tasdiqlangan. YAgona tarif setkasi eng kam ish haqi miqdori, mehnatning murakkabligi va xodimlar malakasini hisobga oluvchi tabaqalashtirilgan koeffitsentlarga asoslanadi. Halq xo`jaligining ishlab chiqarish va noishlab chiqarish sohasi xodimlariga qo`llanilishidan qat`iy nazar, bu koeffitsientlar mehnatga haq to`lashda xolisona yondashuvni ta`minlaydi. YAgona tarif setkasini joriy etilishi, eng avvalo, ish haqining rag`batlantiruvchi roli va adolat tamoyillarining tiklanishini taqozo etadi. Yuqorida ta`kidlanganidek, O`zbekiston Respublikasi hukumati tomonidan joriy etilgan mehnatga haq to`lashning 22 razryadli tizimi amalda tarif stavkasining eng quyi razryadidan eng yuqori razryadiga muttasil ortib borishini ta`min etadi. Yagona tarif setkasi har bir xodimga bajarayotgan ishining murakkabligi va malakasiga bog`liq o`z mehnati uchun oladigan ish haqini aniq belgilab olish imkonini beradi. Unda, shuningdek, bajariladigan ishning hajmi va murakkabligiga qarab har bir lavozim bo`yicha aniq maosh belgilash imkonini beruvchi muayyan razryadlar diapazoni ham nazarda tutilgan. Shunisi ham muhimki, yangidan belgilangan stavka va maoshlar asosida joriy etilgan tarif setkasida ilgari amalda bo`lgan barcha qo`shimcha haqlar, ustamalar, shu jumladan, rayon koeffitsientlari bo`yicha belgilangan to`lovlar ham saqlanib qolgan. Boshqacha aytganda, har bir xodim egallagan lavozimi va malakasiga qarab mehnatga haq to`lashning muttasil o`sib borishida kelajagini yaqqol ko`rish imkoniyatiga ega bo`ladi. YAgona tarif stavkasini joriy etishda xodimning ayni vaqtda oladigan ish haqi yangi tarif setkasi joriy etilishi natijasida hisoblanadigan ish haqidan kam bo`lgan hollarda, xodimlar mehnatiga to`lanadigan haq o`zgarishsiz qoladi. Qonunga ko`ra, tabiiy iqlim va turmush sharoitlari noqulay bo`lgan joylarda mehnat haqiga qo`shimcha ravishda rayon koeffitsentlari va ustamalar belgilanadi. Bunday koeffitsient va ustamalar joriy qilinadigan joylarning ro`yhati, ularni qo`llash tartibi va miqdori O`zbekiston Respublikasi hukumati tomonidan

belgilanadi. Jumladan, O`zbekiston Respublikasi Vazirlar Mahkamasining 1992 yil 20 apreldagi 200-sonli qarori bilan rayon koeffitsientlari belgilangan. Mazkur qaror Navoiy viloyatining ayrim rayon va shaharlariga tegishlidir. Chunonchi, O`zbekiston Respublikasi Vazirlar Mahkamasining "Navoiy viloyati halq xo`jaligi tarmoqlari xodimlarining ish haqini hududiy tartibga solishni takomillashtirish to`g`risida" 1992 yil 20 apreldagi 200-sonli qaroriga muvofiq, mazkur viloyatning ishlab chiqarish kuchlarini rivojlantirish, yuqori malakali mutaxassislarning halq xo`jaligi tarmoqlarida muhim ishlab qolishini ta`minlash va ularni ijtimoiy himoya qilish maqsadida 1992 yil 1 iyulidan boshlab Navoiy mintaqasida joylashgan quyidagi shahar va tumanlardagi korxona, tashkilot va muassasalar xodimlarining ish haqiga muayyan miqdorda hududiy koeffitsientlar belgilash joriy qilingan: Zarafshon va Uchquduq shaharlarida; Tomdi va Uchquduq tumanlarida; Konimex, Nurota, Xatirchi, Navbahor, Qiziltepa tumanlarida; Navoiy tumani va Navoiy shahrida. Mazkur qarorda, ushbu viloyat byudjet tashkilotlari uchun ish haqiga belgilangan koeffitsientlarni to`lash bilan bog`liq mablag`lar davlat byudjeti hisobidan amalga oshirilishi nazarda tutilgan. Bundan tashqari, O`zbekiston Respublikasi Mehnat va aholini ijtimoiy muhofaza qilish vazirligining 2001 yil 5 apreldagi 2-sonli va Moliya vazirligining 33-sonli "Uchquduq, Zarafshon, Nurobod shaharlari, Zarafshon shaharchasi byudjet muassasalarini tashkilotlari xodimlariga muayyan davr ishlaganlik uchun oylik to`lovlar to`lash tartibi to`g`risida"gi Nizom tasdiqlanib, Adliya vazirligida 2001 yil 13 aprelda 1026-sonli raqam bilan davlat ro`yhatidan o`tkazilgan. Mazkur nizomga muvofiq, yuqorida eslatilgan shaharlarda joylashgan byudjetdan ta`minlanadigan tashkilot va muassasalarning xodimlariga uzoq yillik xizmati uchun quyidagi miqdorlarda oylik to`lovlar belgilangan.

Kodeksning 154-moddasiga binoan ish beruvchi o`zining moliyaviy holatidan qat`i nazar, xodimga bajargan ishi uchun haqni belgilangan mehnat haqi shartlariga muvofiq to`lashi shart. Mehnat shartnomasining taraflar kelishuvi bilan belgilangan mehnat haqi miqdori jamoa shartnomasi yoki kelishuvida o`rnatilgan miqdordan kam bo`lishi mumkin emas. Ta`kidlash joizki, mehnat haqining eng kam miqdoriga qo`shimcha to`lovlar, ustamalar, rag`batlantirish tarzidagi to`lovlar, normal ish vaqtidan chetga chiqqan bajarilgan ishlar uchun oshirilgan miqdorda to`lanadigan haq, shuningdek, rayon koeffitsientlari qo`shilmaydi. Qonunga binoan, mehnat haqi shartlarini o`zgartirishga yo`l qo`yilmaydi. Istisno tariqasida, texnologiyada, ishlab chiqarish va mehnatni tashkil etishda o`zgarishlar yuz bergan taqdirda, agar mehnatga haq to`lashning avvalgi shartlarini saqlab qolish imkoniyati bo`lmasa, shuningdek, qonunda nazarda tutilgan boshqa hollarda yo`l qo`yilishi mumkin. Ana shunday hollarda, bo`lajak o`zgartirish haqida xodim kamida ikki oy ilgari ogohlantirilishi lozim. Mehnat haqi, qoida tariqasida, pul shaklida to`lanadi. Mehnat haqini alkogolli va tamaki mahsulotlari, shuningdek, O`zbekiston Respublikasi hukumati tomonidan belgilab qo`yiladigan boshqa tovarlar tarzida to`lash taqiqlanadi (O`zbekiston Respublikasining "Ayrim qonun hujjatlariga o`zgartirishlar va qo`shimchalar kiritish to`g`risida" 2001 yil 30 avgustdagi qonuni bilan kiritilgan). Normal ish vaqtidan chetga chiqqan bajarilgan ishlar uchun haq to`lash tartibi Mehnat kodeksining 157-moddasida ko`rsatilganidek, ish vaqtidan tashqari ishlar, dam olish kunlari va bayram kunlaridagi ishlar uchun kamida ikki hissa miqdorda haq to`lanadi. To`lanadigan haqning aniq miqdori jamoa shartnomasida belgilab qo`yiladi. SHu kunlarda bajarilgan ish uchun xodimning xohishiga qarab boshqa dam olish kuni berilishi mumkin. Xodimning iltimosiga binoan, ish vaqtidan tashqari ish uchun belgilangan ish vaqtidan tashqari bajarilgan ish soatlariga teng keladigan miqdorda otgul berilishi ham mumkin, Bayram yoki dam

olish kunlari yoxud ish vaqtidan tashqari bajarilgan ishlar uchun boshqa dam olish kuni berilgan taqdirda, bunday ishlar uchun kamida bir hissa miqdorida haq to`lanadi. Qoidaga ko`ra, tungi vaqtdagi ishning har bir soati uchun kamida bir yarim barobar miqdorda haq to`lanadi. Tungi vaqtdagi ish uchun oshirilgan miqdorda to`langan haq tarif stavkasiga (mansab maoshiga) qo`shilmaydi. Jamoa shartnomasida kechki smenadagi ish uchun oshirilgan miqdorda haq to`lash nazarda tutilishi mumkin. Bevosita tungi smenadan oldingisi kechki smena hisoblanadi. Xodimning aybisiz yaroqsiz mahsulot tayyorlanganda va bekor turib qolingan vaqtda uning o`rtacha ish haqi saqlanadi. Xodimning aybi bilan tayyorlangan qisman yaroqsiz mahsulot uchun kamaytirilgan ishbay baholar bo`yicha haq to`lanadi, bunday baholar jamoa shartnomasida belgilab qo`yiladi. Xodimning aybi bilan tayyorlangan mutlaqo yaroqsiz mahsulot va bekor turib qolingan vaqt uchun haq to`lanmaydi. Kodeksning 160-moddasida ko`rsatilganidek, bir necha kasbda (lavozimda) ishlagan, xizmat ko`rsatish doirasi kengaygani, bajariladigan ishlar hajmi ortgani, o`zining asosiy ishi bilan bir qatorda ishda vaqtincha bo`lmagan xodimlarning vazifasini bajargani uchun, shuningdek, o`rindoshlik asosida ish bajarilganida, xodimlarning mehnat haqi miqdori mehnat shartnomasining taraflari o`rtasidagi kelishuvga binoan amalda bajarilgan ish yuzasidan belgilanadi. Mehnatga haq to`lash muddatlari jamoa shartnomasida yoki boshqa lokal normativ hujjatda belgilab qo`yiladi. Jamoa shartnomasida ish beruvchining aybi bilan xodimga haq to`lash belgilangan muddatlar kechiktirilgani uchun javobgarlik nazarda tutilishi mumkin. Xodimlarga ish haqi, odatda, ular ishlayotgai joyda to`lanadi. Mehnat kodeksining 164-moddasida mehnat haqidan ushlab qolish mumkin bo`lgan holatlar ko`rsatilgan. Umumiy qoidaga ko`ra, xodimning yozma roziligi bilan, rozilik bo`lmasa sudning qaroriga asosan, mehnat haqidan ushlab qolinishi mumkin. Ushbu moddada xodimning roziligidan qat`i nazar, mehnat haqidan ushlab qolinishi mumkin bo`lgan holatlar sanab ko`rsatilgan. Ish haqini har gal to`lash vaqtida ushlab qolinadigan haqning umumiy miqdori xodimga tegishli bo`lgan mehnat haqining ellik foizidan ortib ketmasligi lozim.

Qoidaga ko`ra, o`rtacha oylik ish haqi keyingi ikki kalendar’ oydagi o`rtacha oylik ish haqidan kelib chiqib belgilanadi. Xodim mehnat ta`tilida bo`lganda, davlat yoki jamoat vazifalarini bajarish, ikki oygacha bo`lgan muddatda ish qidirish (mahalliy mehnat organi tomonidan berilgan ma`lumotnomaga muvofiquch oy), shuningdek kasallik davrida tarif stavkalari, lavozim maoshlari miqdorlari oshgan xollarda, mehnatga haq to`lashning yangi shartlaridagi korxona, tashkilot va muassasalarning ishlagan kunlariga to`g`ri kelgan ish kunlarining amaldagi soni uchun to`lovlar qayta hisoblanadi. quyidagi hollarda xodimning roziligidan qat`i nazar, mehnat haqidan ushlab qolinadi: O`zbekiston Respublikasida belgilangan soliqlar va boshqa ijro hujjatlari majburiy to`lovlarni undirish uchun; sudning qarorlari va boshqa ijro etish uchun; ish haqi hisobiga berilgan avansni ushlab qolish uchun, xo`jalik ehtiyojlariga, xizmat safarlariga yoki boshqa joydagi ishga o`tganligi munosabati bilan berilgan bo`lib, sarf qilinmay qolgan va o`z vaqtida qaytarilmagan avansni ushlab qolish uchun hamda hisob-kitobdagi xatolar natijasida ortiqcha to`langan summani qaytarib olish uchun. Bunday hollarda, ish beruvchi avansni qaytarish yoki qarzni to`lash uchun belgilangan muddat tamom bo`lgan kundan yoxud haq to`lash noto`g`ri hisoblab chiqarilgan kundan boshlab bir oydan kechiktirmasdan avans yoki qarzni ushlab qolish haqida farmoyish berishga haqlidir. Agar bu muddat o`tib ketgan bo`lsa yoki xodim xo`jalik ehtiyojlari bilan xizmat safariga borgani yoxud boshqa joyda ishga o`tgani sababli berilgan avansning ushlab qolinishini asossiz yoki miqdorini noto`g`ri deb hisoblasa, u qarz sud tartibida undiriladi; hisobidan xodim ta`til olib bo`lgan ish yili tugamasdan turib mehnat shartnomasi bekor qilinganda, ta`tilning ishlanmagan davriga tegishli kunlari uchun. Ana shu kunlar uchun haq mehnat shartnomasi Mehnat kodeksining 89- moddasi 4-qismida, 100-moddaning 2-qismi 1 va 2-bandlarida, 106-moddanimg 1

va 2-bandlarida ko`rsatilgan asoslarga ko`ra, shuningdek, o`qishga kirgani yoki pensiyaga chiqqani munosabati bilan bekor qilinganda ushlab qolinmaydi; xodim tomonidan ish beruvchiga etkazilgan zararni qoplash uchun, agar etkazilgan zararning miqdori xodimning o`rtacha oylik ish haqidan ortiq bo`lmasa; 6) ushbu Kodeksning 181-moddasi 1-qismining 2-bandida nazarda tutilgan jarimani undirish uchun. Yuqorida ta`kidlanganidek, ish haqini to`lash vaqtida ushlab qolinadigan to`lovning umumiy miqdori xodimga tegishli bo`lgan mehnat haqining 50%dan ortib ketmasligi lozim. Shuningdek, mehnat haqi, qoida tariqasida pul shaklida to`lanadi. Mehnatga haqni alkogolli va tamaki mahsulotlari bilan, shuningdek, ro`yhati O`zbekiston Respublikasi hukumati tomonidan belgilab qo`yiladigan boshqa tovarlar tarzida to`lash taqiqlanadi (MKning 153-moddasi). Fuqarolarning konstitutsiyaviy huquq va manfaatlarini ta`minlash, mulkchilik shakllaridan qat’i nazar, korxona va tashkilotlar xodimlariga ish haqi o`z vaqtida va to`liq to`lanishi uchun xo`jalik yurituvchi sub`ektlarning javobgarligini oshirish maqsadida O`zbekiston Respublikasi Vazirlar Maxkamasi tomonidan 2002 yil 19 martda ish haqi o`z vaqtida to`lanishiga doir qo`shimcha chora-tadbirlar to`g`risida" 88-sonli qaror qabul qilingan. Mazkur qarorda ta`kidlanishicha, 2002 yil apreldan boshlab mulkchilik shaklidan qat’i nazar, korxona va tashkilotlarning ish haqini tovarlar bilan natura shaklida to`lashi taqiqdanadi. Ammo qishloq xo`jaligi tovar ishlab chiqaruvchilari tomonidan etishtirilgan va qayta ishlangan, xodimlarning yozma arizasiga ko`ra shartnomaviy narxlarda beriladigan qishloq xo`jalik mahsulotlari bundan mustasnodir. Qarorda vazirliklar, idoralar, xo`jalik birlashmalari, mulkchilik shaklidan qat’i nazar, korxona va tashkilotlar rahbarlari xodimlarga ish haqi o`z vaqtida va to`liq to`lanishi uchun shaxsan javobgarligi belgilab qo`yilgan. Bundan tashqari, qarorda O`zbekiston Kasaba Uyushmalari Federatsiyasi Kengashiga, kasaba uyushmalarining tarmoq kengashlariga, vazirliklar va idoralar bilan birgalikda mehnatga haq to`lashni tartibga solishda va uning o`z vaqtida to`lanishini ta`miilashda jamoa shartnomalarining, xo`jalik yurituvchi

sub`ektlarning boshqa normativ hujjatlarining rolini oshirishga doir qo`shimcha chora-tadbirlar ko`rish tavsiya etilgan. Bu chora-tadbirlarda ish haqi o`z vaqtida to`lanmagani uchun ish beruvchilarning moddiy javobgarligi ham nazarda tutilishi alohida qayd etilgan.

Adabiyotlar ro`yxati: 1. O`zbekiston Respublikasining Konstitutsiyasi. T. «Adolat» 20 1 4 y. 2. O`zbekiston Respublikasining «Mehnat kodeksi». T. «Adolat» 20 1 4 y. 3. O`zbekiston Respublikasining Mehnat huquqi. Oliy o`quv yurtlari uchun darslik. A.A.Inoyatov. –T. «Iqtisodiyot va huquq dunyosi» 2002 y. 4. O`zbekiston Respublikasi mehnat qonunchiligi bo`yicha me`yoriy huquqiy hujjatlar to`plami. Toshkent, «Iqtisodiyot va huquq dunyosi», 200 6 y. 5. Vazirlar Mahkamasining « Xalq ta ` limi xodimlari mehnatiga haq to ` lash shartlarini tartibga solish to ` g ` risida » 1994 yil 29 sentyabrdagi 490- son qaroriga o ` zgartirishlar kiritish haqida O ` zbekiston Respublikasi Vazirlar Mahkamasining 2004 yil 18- avgustdagi 401- son qarori . 6. «Xalq ta`limi xodimlari mehnatiga haq to`lashning takomillashtirilgan tizimini tasdiqlash to`g`risida» O`zbekiston Respublikasi Vaziralar Mahkamasining 2005 yil 21 dekabr qarori. 7. Vazirlar Mahkamasining «Mehnatga haq to`lashning yagona ta`rif setkasini yanada takomillashtirish to`g`risida» 2004 yil 2 iyuldagi 309-son qaroriga o`zgartirish kiritish haqida O`zbekiston Respublikasi Vazirlar Mahkamasining 2005 yil 25 oktyabr 237-son qarori. 8. «Fuqarolarning jamg`arib boriladigan pensiya ta`minoti to`g`risida» gi O`zbekiston Respublikasi Qonuni qabul qilingani munosabati bilan O`zbekiston Respublikasi ayrim qonun hujjatlariga o`zgartirish va qo`shimchalar kiritish haqida 2005 yil 23 sentyabrdagi O`zbekiston Respublikasi 8-son Qonuni. 9. O`zbekiston Respublikasining Mehnat kodeksi ga sharhlar . T. TDYUI. 200 8.

Похожие

Xodimlar bilan mehnatga xaq to’lash bo’yicha

Mehnatga moslashishi

Mehnatga oid munosabatlar

Mehnatga munosabat va undan qoniqish jarayoni

Sanoatda kadrlar va mehnatga haq to’lash