Alisher Navoiyning ilmiy merosi “Muhokamat ul-lug’atayn” “Mezon ul-avzon” “Majolis un-nafois” - Литература - Рефераты

Alisher Navoiyning ilmiy merosi “Muhokamat ul-lug’atayn” “Mezon ul-avzon” “Majolis un-nafois”

Загружено в:

20.09.2019

Скачано:

0

Размер:

21.3857421875 KB

Alisher Navoiyning ilmiy merosi “Muhokamat ul- lug’atayn” “Mezon ul-avzon” “Majolis un-nafois” Reja: 1. Navoiyning ilmiy nasri (ilm sohalari bo`yicha umumiy ma`lumot). 2. "Muhokamat ul-lug'atayn" asarining filologik aha miyati. 3. Navoiyning adabiyotshunoslikka oid asarlari, "Mezon ul-avzon" va aruzshunoslik. 4. "Majolis un-nafois" va XV asr adabiy muhiti (asar tuzilishi, majlislar mundarijasi (Atoyi, Sakkokiy, Lutfiy, Jomiy va Husayniy haqidagi ma`lumotlar tahlili).

Alisher Navoiyning nasriy asarlari mavzu, janr va badiiyati jihatidan rang- barangdir. Bu asarlar qanday mavzuga bag’ishlanganliklaridan yoki qaysi janrga mansubliklaridan qat`iy nazar o’sha davrdagi nasrning ilmiy-badiiy, estetik talab va mezonlariga to’la-to’kis muvofiq bo’lib, Navoiyga qadar bo’lgan turkiy-o’zbek nasrini har jihatdan boyitdi. Alisher Navoiyning nasriy asarlari asosan o’zbek tilida yozilgan bo’lib, "Risolai muammo" va "Devoni Foniy"dagi nasriy debocha fors-tojik tilidadir. Alisher Navoiyning nasriy asarlarini yo’nalishi nuqtayi nazaridan quyidagi guruhlarga ajratish mumkin: ilmiy, tazkira, holot, ijtimoiy-axloqiy. 1. Risola . Alisher Navoiy nasriy risolalarining bir qismi ilmning turli sohalari, jumladan, adabiyot nazariyasi, qiyosiy tilshunoslik, iqtisod va madrasalardagi ta`limning amaliy masalalariga bag’ishlangan. Quyida bularning ayrimlari haqida muxtasar to’xtalamiz. "Muhokamat ul-lug’atayn". "Ikki til muhokamasi" deb nomlangan bu asar 905 hijriy yilning jumodiyul avval oyi- 1499 melodiy yilning dekabr oyi oxirlarida chorshanba kuni yozib tugatilgan: Bu nomaki, yozdi qalamim tortib til, Tarixin aning jumodiyul-avval bil. Kunnung raqamini chorshanba qilg’il, To’qqiz yuz yildin o’tub erdi besh yil. (16-tom, 40) "Muhokamat ul-lug’atayn" da turkiy-o’zbek va fors-tojik tillarini qiyosiy o’rganish vositasida turkiy-o’zbek tilining Sharqda mashhur bo’lgan arab va fors- tojik tillari darajasidagi mavqeidan so’z yuritiladi hamda ulardan, xususan fors- tojik tilidan farq qiluvchi xususiyatlari turli xildagi ko’pgina misollar, jumladan "yuz lafz" (yuzta so’z)ni keltirib, talqin qilish bilan isbotlanadi. Bu ma`no Alisher Navoiyning quyidagicha yozganlarida ham o’z ifodasini topgan. "Turkiy va sort lug’ati kayfiyati va haqiqati sharhida bu risolani jam` qilib bitidim va anga "Muhokamat ul-lug’atayn" ot qo’ydum, to turk eli tili fasohatu diqqati va balog’atu vus`ati… zohir qildim. Va xayolimg’a mundoq kelurkim, turk

ulusi fasihlariga ulug’ haq sobit qildimki, o’z alfoz va iboratlari haqiqati va o’z til va lug’atlari kayfiyatidin voqif bo’ldilar" [16-tom, 40]. Shuni eslatish joizki, Alisher Navoiy turkiy tilning fazilatlari haqida so’z yuritganda o’sha davrda mashhur bo’lgan arab, fors-tojik va hind tillarini kamsitmaydi, aksincha ularning har biriga xos bo’lgan xususiyatlarni ham ehtirom bilan bayon etadi. Bundan kuzatilgan maqsad turkiy tilning fasohati va balog’ati haqida ilmiy asoslangan mulohazalarni bayon etish bilan bir qatorda "…turk nozimlari (shoirlari) o’z alfozlari bilan she`rg’a mashg’ulluq qilg’aylar va ko’ngul g’unchasi dog’idinki, pechlar chirmanibdur, bahor nasimidek anfos bila guldek ochilg’aylar" [16-tom, 38]. Demak, Alisher Navoiy turkiy tilning fasohati va lug’aviy boyligini dalillar bilan isbotlash vositasida turkiy tildagi adabiyot-she`riyatning yanada ravnaq topishi lozimligini ham nazarda tutgan. "Muhokamat ul-lug’atayn"da faqat qiyosiy tilshunoslik masalalaridan so’z yuritilgan emas, balki unda til tarixi, o’zbek adabiyoti tarixi, she`riy janr va badiiy san`atlar, fors-tojik adabiyoti namoyandalari asarlari va o’zining ijodiga doir qimmatbaho mulohazalar ham mavjud. Alisher Navoiyning qayd qilishicha, turkiy til va turkiy tildagi adabiyot tarixi o’zaro chambarchas bog’lidir. Shuning uchun asarda Hulokuxon, Amir Temur, Shohrux mirzo hamda Sulton Husayn Boyqaro zamonlarida turkiy tilning rivojlangani tufayli turkiy she`riyatning mavlono Sakkokiy, Haydar Xorazmiy, Atoyi, Muqimiy, Amiriy, Yaqiniy, Gadoyi, mavlono Lutfiy, Husayniy va o’zi kabi zabardast siymolari maydonga kelganligini alohida qoniqish bilan uqtirib o’tadi. Shuning bilan birga, bu jarayonning Sulton Husayn Boyqaro - Husayniy tomonidan qo’llab-quvatlanishi tufayli yanada rivojlangani ta`kidlanadi. "Muhokamat ul-lug’atayn"da she`riy janr (tuyuq), badiiy san`atlar (iyhom, tajnis, tarse`) haqida turkiy she`riyatdagi o’ziga xos xususiyatlari jihatidan ma`lumot beriladi. Fikrning isboti uchun misolga murojaat qilaylik:

"She`rda barcha tab` ahli qoshida ravshan va majmu`i fusaho ollida mubarhandurki, tajnis va iyhom bag’oyat kulliydir. Va bu farxunda iborot va xujasta alfoz va ishorotda forsiydin ko’prak tajnisomez lafz va iyhomangez nukta borki, nazmga mujibi zebu ziynat va boisi takallufu san`atdur. Masalan: ot lafziki, bir ma`nisi ismdur, yana bir ma`nisi markabdur va yana bir ma`nisi amrdurkim, toshni yo o’qni ot, deb buyurg’aylar. Bu tajnisda mundoq deyilibdurkim, Bayt: Chun pari-yu hurdur oting, begim, Surat ichra dev erur oting, begim. Har xadangekim, ulus andin qochar, Notavon jonim sari oting, begim" (16-tom, 17). "Muhokamat ul-lug’atayn"ning adabiyotshunoslik sohasidagi ahamiyati yuqorida qayd qilingan fazilatlar bilan cheklanmaydi. Asarda Alisher Navoiyning turkiy va forsiy tillarda yaratgan asarlari, ularning yozilish sabab va tarixlari, ijodiy hamkorliklari haqida ma`lumotlar uchraydiki, ular ulkan shoirning ijodiy tarjimayi holini yaratishda qimmatbaho material bo’lib xizmat qiladi. Bu jihatdan "Xazoyin ul-maoni", "Tuhfat ul-afkor", "Xamsa" va boshqalar haqida yozganlari ardoqlidir. Bundan tashqari, "Muhokamat ul-lug’atayn"ning adabiy ahamiyati yana shu bilan ham belgilanadiki, unda o’sha davr nasri uchun xos uslub - saj` san`ati (nasrda ohangdorlik va qofiya, radif unsurlari) mahorat bilan ishlatilgan hamda turli xil she`riy nav`lardan misol keltirish bilan ziynatlangan. Misollar, Saj` san`ati: "Takallum ahli xirmanining xo’shachini va so’z durri samini maxzanining amini va nazm gulistonining andalebi nag’masaroyi , ya`ni Alisher al-mutaxallis bin Navoyi … mundoq arz qilurkim…" [16-tom, 8]. Asarda ruboiy (7 ta, shu jumladan, 1 ta forscha), qit’a (2 ta), tuyuq (2 ta) janridagi she’rlar hamda ko’plab fard baytlar mavjud bo’lib, ularning aksariyati mustaqil asar xususiyatiga ham egadirlar. Ruboiy:

Ey so’z bila qilg’on ofarinish og’oz, Insonni aroda aylag’on mahrami roz. Chun "kun fa yakun" safhasiga bo’ldi tiroz, Qilg’on oni nutqi-la boridin mumtoz . (16-tom, 7) Shunday qilib, Alisher Navoiyning "Muhokamat ul-lug’atayn" ilmiy asari turkiy tilshunoslikning nodir yodgorligi bo’lib, unda turkiy tilning o’ziga xos xususiyatlari, uning buyuk ahamiyatga molik badiiy yodgorliklarni yaratishga qodirligi masalasi ilmiy asosda yoritilgan. Shuning bilan birga asarning mavzu doirasi keng bo’lib, unda umuman adabiyotshunoslikning turli xildagi muhim muammolari tilga olingan va o’sha davrdagi nasrning o’ziga xos xususiyatlari o’z ifodasini topgan. "Mezon ul-avzon". Adabiyot nazariyasi, xususan aruz ilmi aruz masalalariga bag’ishlangan "Mezon ul-avzon" (vaznlar o’lchovi) o’zbek adabiyotshunosligi tarixida o’ziga xos mavqega ega bo’lgan ilmiy risoladir. To’g’ri, Alisher Navoiyning mazkur risolasi yaratilgunga qadar va uning zamonasida ham arab, fors-tojik hamda o’zbek tillarida mazkur masalaga oid risolalar yozilgan edi. Jumladan, Xalil ibn Ahmadning arab tilidagi "Kitob ul-ayn", Shamsiddin Qays Roziy "Al mo’`jam"ining bir qismi, Abdurahmon Jomiy, Sayfiy Buxoriylarning fors-tojik tilidagi "Aruz" risolalari, Shayx Ahmad Taroziy qalamiga mansub o’zbek tilidagi "Funun al-balog’a" asarining bir qismi va boshqalar. Alisher Navoiyning "Mezon ul-avzon"i esa bu risolalardan o’zining ko’pgina fazilatlari bilan ajralib turadi: birinchidan, risola faqat aruz ilmiga bag’ishlanib, o’zbek tilida yozilgan; ikkinchidan, aruz ilmi turkiy she`riyat asosida talqin qilingan; uchinchidan esa, Alisher Navoiy bu haqda shunday yozadi: "Chun ul hazratning (Sulton Husayn Boyqaro) muborak xotirlari she`r buhuru avzonig’a va nazm qavoidu mezonig’a muncha moyil erdi aruz fanidan bu muxtasar sabt bo’ldi va anga "Mezon ul-avzon" ot qo’yuldi va necha qoidau doira va vaznkim, hech aruzda, misli fan voze`i Xalil ibn Ahmad va ilm ustodi Shams Qays kutubida va Xoja Nosir Tusiyning "Me`yor ul-ash`or" ida, balki

hazrati Maxdumiy navvara marqaduhi nuran (Abdurahmon Jomiy) "Aruz"larida yo’q erdikim, bu faqir bu fan usulidin istixroj qilib erdikim, bu kitobg’a izofa qildim" [16-tom, (44-45). Demak, Alisher Navoiyning e`tiroficha, asarda oldingi risolalarda tilga olinmagan masalalar yoritilgan. Darhaqiqat, "Mezon ul-avzon" da turkiy xalqlar she`riyati va ularning rasmiy aruzga munosabati masalasi birinchi marta tilga olinib, nihoyatda katta ilmiy ahamiyatga ega bo’lgan fikrlar bayon etilgan. "Mezon ul-avzon"ning yozilgan yili asarda ko’rsatilmagan. Shuning uchun bu masalaga oid taxminlar mavjud bo’lib, shulardan biri asar XV asrning 90-yillarida yozilgan bo’lsa kerak, degan fikrdir. "Mezon ul-avzon"da arabiy, forsiy va turkiy tillardagi she`riyatda qo’llanilgan hazaj, rajaz, ramal, munsareh, muzore`, muqtazab, sare`, jadid, qarib, xafif, mushokil, mutaqorib, mutadorik, vofir, komil, tavil, madid, basit kabi o’n to’qqizta bahr haqida o’zbek tilidagi misollar asosida mulohaza yuritilgan. Alisher Navoiy mazkur bahrlarning xususiyatlarini yoritish bilan bir qatorda ulardan qaysilari arab she`riyatiga xosligi, qaysilari Ajam va turkiy she`riyatda ko’proq ishlatilgani hamda zamondoshlari tomonidan qo’shilgan yangi bahrlar haqida ham o’z kuzatishlari natijalarini bayon etgan. Alisher Navoiyning guvohlik berishicha, aruz tizimidagi sakkizta asl rukn larning beshtasi fors-tojik va turkiy she`riyatda qo'llanadi: "Va ulcha bu sekkiz usuldin (asllardan) forsiy she`rda kasirul vuqu`dur - beshdur: mafo`iylun va fo`ilotun va mustaf`ilun va maf`uvlotu va fa`uvlun. Va turkcha she`rda ham ulcha mulohaza qililibdur, bu arkondin (ruknlardan) o'zga vuqu` topmas" [ 16-tom, 47-48 ] . " Tavil va madid va basit bahri arab shuarosining maxsusidur... va Ajam shuarosi anga mashg’ul bo’lmaydurlar." (16-tom, 58). Shunday bo’lsa-da, mazkur bahrlar haqida so’z yuritganda turkiy-o’zbek tilida misollar keltirgan. Bu bilan, garchi ular kam ishlatilsa-da, ammo o’zbek tilida bu bahrlarda ham she`rlar yaratish mumkin, degan fikrni ifoda etadi. Bu misollar Alisher Navoiyning qalamiga mansub baytlar bo’lsa kerak.

Yana, asarda zamondoshlari va Alisher Navoiyning aruz bahrlarini boyitish, yangi doiralarni tuzish sohasidagi xizmatlari ham alohida ta`kidlanadi. Jumladan, Alisher Navoiy aruz bahrlari doiralari qatoriga o’zi aniqlagan "Doirai mujtamia"ni qo’shgani haqida kamtarlik bilan shunday yozadi: "Bu mazkur bo’lgan to’qquz asl bahrning (sare`, jadid, qarib, munsareh, xafif, muzore`, muqtazab, mujtas, mushokil) solimini.bir doirai azimada jam` qilib, har birining o’rnig’a alohida misol kelturub, to’qqiztasini yana bir misra`din ham istixroj qilib, ul "Doirai mujtamia" deyildi va bu doira rasmi zamon zurafosidin ba`zining xayolig’a kelib erdi, ammo faqir anga tartib berdim va ul bu nav` surat biladur" [16-tom, 56-57]. "Mezon ul-avzon"da Alisher Navoiy "turk ulusi, bataxsis chig’atoy xalqi aro shoe` avzondurkim, alar surudlarni ul vazn bila yasab, majlisda ayturlar", deb "tuyug’, qo’shuq, chinga, muhabbatnoma, mustazod, aruzvoriy, turkiy" kabi surudlarni tilga olgan, ularning mavzu, vazn va tili haqida diqqatga sazovor mulohazalarni bayon qilgan, har biridan misol keltirib, aruziy bahrlarning vaznlari ruknlarini ham qayd qilgan. Asarning mazkur bobi turkiy aruz tarixini o’rganishdagina emas, balki xalq qo’shiqlari va mumtoz yozma she`riyat orasidagi o’zaro ta`sirni aniqlashda ham katta ahamiyatga ega. Fikrning isboti uchun faqat bitta surud-chinga haqida yozilganlarni keltirish maqsadga muvofiq ko’rinadi: "Yana "chinga"durkim, turk ulusi zufof va qiz ko’churur to’ylarida ani ayturlar. Ul surudedur bag’oyat muassir. Va ikki nav`dur: bir nav`i hech vazn bila rost kelmas va bir nav`ida bir bayt aytilurkim, munsarehi matviyi mavquf bahridur va "yor-yor" lafzini radif o’rnig’a mazkur qilurlar, andoqkim, bayt: Qaysi chamandin esib keldi sabo, yor-yor, Kim damidin tushti o’t jonim aro, yor-yor [16-tom, 92-93]. Shunday qilib, "Mezon ul-avzon" Sharq poetikasining tarkibiy qismi bo’lgan aro’z ilmini turkiy-o’zbek she`riyati qonun-qoidalari asosida o’zbek tilida yoritgan hamda bu masalaga doir ko’pgina ilmiy muammolarni hal qilgan asardir. Bu ish

esa, keyinchalik, Zahiriddin Muhammad Bobur tomonidan "Muxtasar" da rivojlantirildi. "Majolis un-nafois". "Nafosat ahlining majlislari" deb atalgan bu mashhur asarning birinchi tahriri 1491 melodiy yilda yaratilib, shundan so’ng u yanada to’ldiriladi va 1498 melodiy yilda uning ikkinchi-to’ldirilgan nusxasi maydonga keladi. Asarning birinchi tahririda 350ta shoir kiritilgan bo’lsa, ikkinchi tahrirda 459 ta shoir va she`riyatga daxldor siymolarning zikri keltirilgan. "Majolis un-nafois"ning kirish qismida uqtirilganidek, unda Sulton Husayn Boyqaro tavalludidan (m. 1438) to kitob yaratilgan davr oralig’ida faoliyat ko’rsatgan she`r va she`riyatga aloqador siymolar, ya`ni asosan Alisher Navoiyga zamondosh bo’lganlarning zikri keltirilgan. Ma`lumki, Alisher Navoiyga qadar va uning zamonasida ham arab va fors- tojik tilida shoirlarga bag’ishlangan ko’pgina tazkiralar yaratilgan edi. Masalan, Saolibiyning "Yatimat ud-dahr", Muhammad Avfiyning “Lubob ul-albob”, Davlatshohning "Tazkirat ush-shuaro" va boshq. Biroq, Alisher Navoiy yaratgan tazkira bir qator xususiyatlarga ega: 1. Alisher Navoiygacha bo’lgan tazkiralar arab yoki fors-tojik tilida yozilgan bo’lib, ularda asosan arab she`riyati yoki fors-tojik she`riyati namoyandalari haqida ma`lumot berilgan. Alisher Navoiyning "Majolis un-nafois"i esa turkiy-o’zbek tilida yozilgan bo’lib, unda XV asrdagi zullisonayn adabiy muhitning xususiyatiga ko’ra ham turkiy-o’zbek va ham forsiy-tojik tilida ijod qilgan shoirlar qamrab olingan. Asarda shoirlarga daxldor ma`lumotlar o’zbek tilida bo’lib, ularning asarlari qaysi tilda (turkiy, forsiy) yozilgan bo’lsa, aynan keltirilgan. Shu jihatdan "Majolis un-nafois" tazkirasi XV asrdagi turkiy-o’zbek she`riyati va forsiy-tojik she`riyati haqida ma`lumot beruvchi muhim manbadir. Shundan kelib chiqib, bu asar XVI-XVIII asrlar davomida to’rt marta Faxriy Hirotiy, Muhammad Qazviniy, Shoh Ali, Abulboqi Sharif Razaviylar tomonidan fors-tojik tiliga tarjima qilingan edi.

2. Alisher Navoiy "Majolis un-nafois"ida shoirlarni joylashtirish, ularga doir ma`lumotlar berish, asarlaridan namuna keltirish va ularga baho berish mezoni boshqa tazkiradagilardan farq qiladi. Jumladan, Alisher Navoiy asarning birinchi, ikkinchi va uchinchi majlislarida shoirlarni ko’rgani-ko’rmagani, muloqotda bo’lgani va bo’lmagani nuqtayi nazaridan joylashtiradi; ikkinchidan, shoirlar asarlaridan eng yaxshi namuna sifatida bir yoki ikki baytni keltiradi; shoirlar bilan muloqotda bo’lgan bo’lsa, o’zining unga bo’lgan shaxsiy yoki ijodiy munosabatini ham uqtirib o’tadi; shoirlar haqidagi ma`lumotlar esa haqqoniy va xolisonaligi bilan ajralib turadi. 3. Alisher Navoiy "Majolis un-nafois"ida Sharq adabiyotshunosligidagi ikki an`ana ko’rinadi: biri-tazkirachilik, ikkinchisi biror-bir shoir she`rlariga sharh yozish. Ma`lumki, biror-bir shoir she`rlariga sharh yozish arab va fors-tojik adabiyotshunosligida ancha tajribalarga ega. Jumladan, Hofiz, Rumiy asarlariga yozilgan sharhlar. Ammo bu tajriba turkiy-o’zbek tilidagi adabiyotshunoslikda Alisher Navoiygacha bo’lgan davrda ko’zga tashlanmaydi. Alisher Navoiy turkiy adabiyotshunoslikdagi bu bo’shlikni to’ldirish maqsadida "Majolis un-nafois" tazkirasining sakkizinchi majlisida Husayn Boyqaro she`riyatiga yozgan sharhini joylashtiradi. Shuning natijasida "Majolis un-nafois"da ham tazkirachilik an`anasi va ham sharh yozish an`anasi mujassam bo’lib, "Majolis un-nafois"ning boshqa tazkiralardan farq qiluvchi xususiyatini ham maydonga keltiradi. Shuning bilan bir qatorda Alisher Navoiy turkiy-o’zbek adabiyotshunosligida shoirlar she`rlariga sharh yozish an`anasini boshlab beradi. Alisher Navoiy bu an`anani Shoh G’arib mirzo devoniga sharh yozish bilan davom ettirish niyatida edi, ammo bu niyat amalga oshmagan ko’rinadi. 4. Alisher Navoiy "Majolis un-nafois"da birinchi marta Amir Temur va temuriyzoda shoirlar haqida tizimli ma`lumot va asarlaridan namunalarni keltiradi. Bu nihoyatda muhim va nodir ma`lumotlardir. Demak, Alisher Navoiyning "Majolis un-nafois"i o’zining bu va boshqa xususiyatlari bilan bundan oldin yaratilgan tazkiralardan farq qiladi hamda

tazkirachilik an`anasida, xususan, Movarounnahr, Xuroson, Ozarboyjon hududlarida XVI-XIX asrlar davomida yaratilgan tazkiralarda zamondoshlarga bag’ishlanganlik an`anasining ustuvor bo’lishiga sababchi bo’ladi. Alisher Navoiyning "Majolis un-nafois"i kirish, sakkiz majlis va xilvatdan iborat. "Kirish" qismida asarning yozilish sabablari bayon etilgan. "Majolis un-nafois"dagi majlislarni uch guruhga ajratish mumkin. Birinchi guruhga- birinchi, ikkinchi va uchinchi majlislar mansub. Ularda shoirlar Alisher Navoiyning o’sha mualliflar bilan uchrashgan-uchrashmaganligi mezoni asosida joylashtirilib, 311 shoirning zikri keltirilgan. Ikkinchi guruhga-to’rtinchi, beshinchi va oltinchi majlislarni kiritish mumkin. Bularga she`riyatga daxldor shaxslar - fozillar, mirzodalar hamda Xurosondan tashqari hududlarda yashovchi 125 ta fozil va donishmand kishilar kiritilgan. Uchinchi guruhga yettinchi va sakkizinchi majlislarni kiritish mumkin. Bu majlislarda she`r va she`riyatga daxldor Amir Temur va temuriyzodalar (23 kishi) zikri berilgan. "Majolis un-nafois" ning birinchi majlisi Amir Qosim Anvor zikri bilan boshlanib, uning sakkizinchi bobi Husayn Boyqaro zikri bilan nihoyasiga yetadi. "Xilvat" bo’limida esa Husayn Boyqaroning nozik she`rshunosligidan dalolat beruvchi hayotiy hikoyatlar keltiriladi va asar yakunlanadi. "Majolis un-nafois"da Alisher Navoiy tarjimayi holi, ustoz va zamondosh shoirlar bilan uchrashuvlari, jumladan, Abdurahmon Jomiy, mavlono Lutfiy, Fazlulloh Abulaysiy, Mirzobek, Sayfiy Buxoriy, Shayximbek Suhayliy va boshqalar haqida nihoyatda qimmatli ma`lumotlar bor. "Majolis un-nafois" XV asrdagi ko’pqirrali adabiy muhitning nihoyatda tiniq ko’zgusi bo’lganidan undan adabiy muhit tarkibi, xususiyatlari (zullisonaynlik, janriy rang-baranglik), undagi adabiy yo’nalishlar (yuksak mazmunli badiiy yodgorliklar yaratish va shaklbozlik), har bir shoirning o’ziga xos fazilatlari haqida nodir ma`lumotlar joy olgan.

"Majolis un-nafois"ning ilmiy tanqidiy matni arab alifbosida Suyima G’anieva tomonidan nashr ettirildi (Toshkent, Fan, 1961). Uning to’liq matni MATning 13-tomida nashr etildi. Shunday qilib, Alisher Navoiy nasriy asarlari turkiy-o’zbek nasrining nodir va bebaho yodgorliklari bo’lgani bilan ahamiyatlidirlar. Bu asarlar Alisher Navoiy ijodiy-ilmiy merosi ko’lamining naqadar keng ekanligini yana bir karra namoyish etib, uning o’zbek xalqi tamadduni xazinasini noyob durdonalar bilan boyitganidan dalolat beradi. Adabiyotlar : 1. Valixo‘jayev B. O‘zbek adabiyoti tarixi (O‘quv qo‘llanma). II qism. – Sam.: SamDU nashri, 2002. 2. Vohidov R., Eshonqulov H. O’zbek mumtoz adabiyoti tarixi. (O’quv qo’llanma) –T.: Yangi asr, 2006. 3. Valixo‘jayev B. O‘zbek adabiyotshunosligi tarixi. – T.: O‘zbekiston, 1993. 4. Alisher Navoiy. MAT. 20 tomlik. 16-tom. - T.: Fan, 2000. ("Muhokamat ul- lug’atayn", "Mezon ul-avzon"). 5. Alisher Navoiy ijodi va nasr problemalari // O’zbek nasri tarixidan. – T.: Fan, 1982. 36-59-b. 6. O‘zbek mumtoz adabiyoti namunalari (Majmua, Tuzuvchı: N.Rahmonov). 1-2 jild. – T.: Fan, 2005; 2006.

Похожие

Alisher navoiyning ilmiy merosi 2

Navoiyshunoslik Navoiy hayoti va ijodini o’rganish manbalari

XV asrning II yarmida Hirot adabiy muhiti

Alisher Navoiyning hayoti va ijodi

Alisher Navoiyning ilmiy merosi (Алишер Навоийнинг илмий мероси)