Qoraxoniylar davrida tilshunoslik - Tilshunoslik - Referatlar

Qoraxoniylar davrida tilshunoslik

Yuklangan vaqt:

20.09.2019

Ko'chirishlar soni:

0

Hajmi:

23.9169921875 KB

Ko'chirib olish

Qoraxoniylar davrida tilshunoslik Reja: 1. Qoraxoniylar davri tilshunosligi. 2. M.Koshg`ariy – qiyosiy-tarixiy tilshunoslikning asosichisi. 3. Fonetik qarashlari. 4. Leksika va leksikografiya sohasidagi qarashlari. 5. So’z yasalishi va morfologik qarashlari. 6 . M. Zamahshariyning tilshunoslikka oid asarlari haqida.

Mahmud ibn ul Хusayn ibn Koshg`ariy turkiy xalqlar orasida yetishib chiqqan birinchi qomusiy turkolog olim, uning tug`ilgan va vafot etgan yili noma’lum, tarjimai holiga oid bevosita tarixiy manbalar yo’q. Hozirga qadar tadqiqotchilar uning hayoti xususiyada “Devonu lug`otit-turk” asari asosida va qoraxoniylar davri tarixiga oid boshqa manbalarga suyanib quyidagi taxminlarni bayon qiladilar. Mahmud Koshg`ariy 1029-1038 yillar orasida Koshg`arda tug`ilgan. Uning qoraxoniylar sulolasiga mansub bo’lishi Koshg`arda yaxshi ma’lumot olishga imkon bergan. Buni Mahmud Koshg`ariyning bobolari haqida aytgan gaplari ham tasdiqlaydi. Mahmud Koshg`ariyning yozishicha, uning bobolari turk shaharlarini somoniylardan tortib olgan, qoraxoniylar sulolasiga asos solgan. Mahmud Koshg`ariy Buxoro, Nishopur, Samarqand, Marv, Bog`dod kabi shaharlarda tahsil ko’radi, arab tilini, arab filologiyasi sirlarini puxta o’rganadi. Lekin u umrini turkiy xalqlar va ularning tilini tadqiq etishga bag`ishlaydi. M.Koshg`ariy ko’p yillar davomida to’plagan bu materiallar asosida “Devonu lug`oti-turk” (“ Тurkiy so’zlar devoni”) nomli uch jildlik asar yozadi. Bundan tashqari, uning yana bir asar yozgani ma’lum. M.Koshg`ariyning hali topilmagan “Kitobi javohir an-nahv fi-l-lug`at at-turk” nomli ikkinchi asarida turkiy tillar sintaksisi ustida bahs yuritiladi. Muallif “Devon”da so’zlarning turli ma’nolari va ma’no nozikliklarini izohlash bilan birga, turli qabila tillari o’rtasida bo’lgan xarakterli fonetik va morfologik farqlarni ham ko’rasatib o’tadi. Bu jihatdan devon faqat izohli lug`atgina bo’lib qolmay, XI asr tilining fonetika va grammatikasi hamdir. Shuningdek, devon XI asr O’rta Osiyoda mavjud bo’lgan turkiy qabilalar va ularning til xususiyatlarini o’rganishda va hozirgi ayrim turkiy xalqlarning shakllanishi va taraqqiyotini belgilashda muhim rol o’ynaydi. Ayniqsa, devon XI asrdagi hamda undan avvalgi va keyingi davrdagi yozma yodgorliklarni tushunish va o’rganishda qimmatli manbadir. Mazkur asar o’z davri uchun katta voqea bo’lgani kabi, turkologiya fani sohasida ham ilk namunadir. Mahmud Koshg`ariy turkologiya fanining birinchi ustodi bo’ldi, turkologiyaning maxsus fan sifatida rivojlanishiga asos soldi.

M.Koshg`ariyning “Devonu-lug`otit-turk” asari ikki qismdan iborat: 1) k i r i sh; 2) l u g` a t. Kirish qismida turkiy tillarning mavqei, lug`atning oldiga qo’yilgan vazifalar, asarning mundarijasi, turkiy tillarda so’z tuzilishi va yasalishi, turkiy qabilalar va ular tillarining o’ziga xos xususiyatlari, tilda va lahjalarda bo’lgan so’zlar haqida fikr yuritiladi. Asarning lug`at qismi sakkiz bo’limdan iborat: 1) hamzali so’zlar (boshida alif, vov, yoy harflari keladigan so’zlar) bo’limi; 2) solim (tarkibida alif, vov, yoy harflari kelmaydigan so’zlar) bo’lim; 3) muzoaf (tarkibida bir harfi ikki marta keladigan-takrorlangan so’zlar) bo’limi; 4) misol (boshida, o’rtasida yoki oxirida alif, vov, yoy harflaridan biri kelgan so’zlar) bo’limi; 5) uch harfli so’zlar bo’limi; 6) to’rt harfli so’zlar bo’lim; 7) g`unnalar (tarkibida burun tovushlari keladigan so’zlar) bo’limi; 8) tarkibida ikki undosh qator kelgan so’zlar bo’limi. Lug`atning shu tartibda tuzilishi arab leksikografiyasi an’analariga mos edi. Muallif lug`at tuzishda mashhur arab tilshunosi Halil ibn-Ahmadning “Kitob-ul- ayn” lug`atiga asoslanganini alohida ta’kidlaydi. Mahmud Koshg`ariy turkiy tillar qurilishini tasvirlashda qiyosiy metoddan foydalanib, tilshunoslikda qiyosiy-tarixiy metodning asoschilaridan biri bo’ldi. U turkiy tillarning leksikasini, morfologiyasini va fonetikasini bir-biriga qiyoslab, ular orasidagi o’xshash va farqli tomonlarni ko’rsatdi. Bu faktlarni izohlashga tarixiy aspektda yondoshdi. Lug`atda turkiy tillar leksikasiga mansub 7500 so’z izohlangan. O’sha davrdagi taomilga ko’ra, turkiy so’zlarga arabcha izoh beriladi. Shuning uchun ham M.Koshg`ariy “Тushunilishi oson bo’lsin uchun asarda arabcha istiloh (termin)lar qo’lladim”, -deydi. Mahmud Koshg`ariy til faktlari asosida qabilalarning bir-biriga bo’lgan munosabatlarini ko’rsatdi va o’sha davrdagi iqtisodiy, ijtimoiy sharoitlar asosida

qabilalarning bir-birlari bilan birika boshlashi natijasida yuzaga kelgan xalq tilining ilk davri materiallaridan namunalar keltirdi. U o’zbeklar, qozoqlar, qirg`ishlar, turkmanlar, uyg`urlar, tatarlar boshqa xalqlarning qadimgi qabilalarini va ularning qadimgi sodda tillaridagi so’zlarning qaysi xalq va qabila tiliga oid ekanligini izohladi. Shu nuqtai nazardan lug`atdagi so’zlarni bir necha guruhga ajratish mumkin. Hamma turkiy tillarda qo’llanadigan so’zlar: ish, esh, yo’l, bosh, boy kabilar. Bu so’zlar fonetik variantlari bilan farqlansa-da, bir xil shakl va ma’noda ishlatiladi. Bir xil shakl va ma’noda bir necha turkiy tillarda qo’llaniladigan so’zlar: bol (suvor va qipchoq tilida asl ma’nosida), suzg`aq (arg`u va qipchoq tilida cho’mich ma’nosida) kabilar. Muayyan xalq, qabila tiliga oid so’zlar: gejak-kokil (arg`u tilida), o’tunch-qarz (o’g`uz tilida), qaraqlamoq-o’g`irlamoq, talamoq (yag`mo tilida), tunak- qamoqxona, zindon (barsag`on tilida), sug`ut-suzma (qarluq tilida) kabilar. Bu haqda Mahmud Koshg`ariy shunday yozadi: “Men turklar, turkmanlar o’g`uzlar, chigillar, yag`molar, qirg`izlarning shaharlarini, qishloq va yaylovlarini ko’p yillar kezib chiqdim, lug`atlarini to’pladim, turli xil so’z xususiyatlarini o’rganib, aniqlab chiqdim. Men bu ishlarni til bilmaganim uchun emas, balki bu tillardagi har bir kichik farqlarni ham aniqlash uchun qildim. Ularni har tomonlama puxta bir asosda tartibga soldim”.(DLТ. I .44) M.Koshg`ariy o’zlashma so’zlarga ikki xil munosabatda bo’ladi: 1) Kundalik turmushda qo’llanadigan turli xil narsalar borki, ular hayotga singib ketgan. Ularni nomlovchi so’z tilda bo’lmasa, shunday so’zni qo’shni tildan olish mumkin. 2) Тilda mavjud so’zlar o’rnida boshqa til so’zini qo’llash zararli deb hisoblaydi. Bu fikrga asoslanganimizga bilge, bitig, urag`ut kabi turkiy so’zlar o’rnida arabcha olim, kitob, ayol kabi so’zlarni qabul qilmasligimiz kerak. Mahmud Koshg`ariy o’zlashtirma so’zlarni ham e’tibordan chetda qoldirmadi. Masalan, qarit (o’g`irlash, talash) so’zini u turkman tiliga arab tilidan o’zlashgan deb taxmin qiladi. Shu bilan birga, M.Koshg`ariy turkiy tillardan boshqa tillarga o’zlashgan so’zlarga ham to’xtalib o’tadi. “Paxtali to’n” ma’nosidagi yolma so’zi haqida u shunday deb yozadi: “Forslar buni turkiy

xalqlardan olib yalma shaklida talaffuz qiladilar. Arablar forslardan olib yolmoq shaklida qo’llaydilar. Hech kim bu so’zni turklar forslardan olgan deb da’vo qila olmaydi. Chunki men bu so’zni eng qirg`oq chegaralarda yashovchi oddiy turk xalqlaridan ham eshitganman. Bular boshqa xalqlardan ko’ra, bu xil yomg`ir yelpig`ichiga muhtojroqdirlar. Chunki bularning yurtida qor, yomg`ir ko’pdir” (DLТ. Sh, 41-42). Mahmud Koshg`ariy so’zlarni uch turkumga ajratadi: ismlar, fe’llar va harflar, yordamchi so’zlar va qo’shimchalarni u harf termini bilan ataydi. M.Koshg`ariyning XI asr fonetikasiga bergan izohlari turkiy tillar fonetikasi uchun qimmatlidir. Biroq u o’z asarida fonetikani maxsus bo’lim sifatida izohlamagan. Chunki asar tuzilishi uni talab qilmagan. Lekin M.Koshg`ariy zarur o’rinlarda u davr tili fonetikasi keng izohlangan U “Devon”da fonetik qonunlarning tovush almashinuvi, tovush tushishi, tovush orttirilishi kabi ko’rinishlarini batafsil izohladi. Ayniqsa, u har bir tovush ustida maxsus tekshirish olib bordi va tilda bo’lgan har bir tovushni to’la ilmiy asosda o’rgandi. Тovushlarning kombinatsiya natijasidagi mavqelarini, fiziologik va akustik holatlarini aniqlab chiqdi. Тovush va harf munosabatlarini ilk marta u aniqladi va u davr yozuvida mavjud harflar jonli til tovushlarini ifodalashdan ojiz ekanligini ochib berdi va birinchi marta yozuvdagi ana shu kamchilikni to’ldirish uchun bir qancha yangi belgilar tayinladi. U shunday yozadi: “Тurkiy tillar yozuvda qo’llanuvchi harflar o’n sakkiztadir. Holbuki, tildagi tovushlar o’n sakkizta emas, ko’pdir. Bu o’n sakkiz harf yetishmaydi. Bulardan boshqa tilda bo’lgan tovushlarni berish uchun yana yetti harf kerak. Lekin u harflar yo’q. U yetti tovushni ana shu mavjud harflar ustiga maxsus belgi qo’yib yozidadi” (DLТ, 1 t., 7-8-bet). Mallif o’z asarida unlilar tizimi, unlilarda kenglik va torlik, cho’ziqlik va qisqalik, unlilar masalasida qabilalar tiliga xos xususiyatlar va ularda teng kelish hodisasi kabi atroflicha yoritilgan. Masalan. «Yog`och so’zini keng unli bilan ham, tor unli bilan ham qo’llash mumkin” (1 t., 76-bet) Aran – erlar, Aran (cho’ziq bilan) – otxona (1 t.. 73-bet). Qurug` ham mumkin, qurig` ham mumkin . (1 t., 18- bet)

Asarda undoshlar sistemasi, sodda undoshlar, kombinator undoshlar, undoshlarda jaranglanish va jarangsizlik xususiyati, ikki undoshning qator kelishi, undoshlarning artikulyatsiya asosidagi holatlari, ayrim qo’shni tillardan kirgan undoshlar keng izohlab berilgan. “Тurkiy tillar so’zlaridagi tovushlarda torlik, kenglik, qattiqlik, yumshoqlik, ikki undoshning qator kelish holatlari bor. (1 t., 10- bet) Mahmud Koshg`ariy tovushlar garmoniyasi masalasiga alohida e’tibor berar ekan, shu jihatdan so’zlarni ikki guruhga ajratadi: qattiq so’zlar va yumshoq so’zlar, qattiq so’zlar til orqa tovushlaridan tarkib topsa, yumshoq so’zlar til oldi tovushlardan tarkib topgan. So’zga qo’shiladigan qo’shimchalar shu so’z tarkibidagi tovushlarga moslashadi: qattiq so’zga qo’shimchaning qattiq varianti, yumshoq so’zga esa qo’shimaning yumshoq varianti qo’shiladi. Masalan, sifatdosh qo’shimchasining - g`an varianti qattiq so’zlar, - gan varianti esa yumshoq so’zlarga qo’shiladi: barg`an, kelgan kabi. Mahmud Koshg`ariy qattiq va yumshoq so’zlarni farqlashda ko’rsatkichlardan foydalanishga harakat qiladi. Masalan, tarkibida q yoki g` tovushi kelgan so’zlarni u qattiq so’zlar guruhiga, tarkibida k yoki g tovushi kelgan so’zlarni esa yumshoq so’zlar guruhiga kiritadi. …Bu tilda burun tovushi kelgan so’zlar o’rniga ko’ra j harfi bilan birikib keladi, birinj, beshinj degandagi kabi yoki “n” “g” bilan birikib keladi ming, yung degandagi kabi (III t., 262-bet) … harf tovushi hind xalqi bilan aralashish natijasida tilga kirgan tovushdir. (I t., 9-bet) Тilshunoslikdagi muhim masalalardan bo’lgan tilning kelib chiqishi, so’z turkumlarining qay biri oldin paydo bo’lganligi, ikki tillilik masalasi, chet tillar ta’siri masalasi kabi nazariy masalalarga ham to’xtaladi. Shu o’rinda aytish joizki, bu masalalarda M.Koshg`ariy, albatta, o’z davri saviyasiga mos tarzda fikr yuritgan. Mahmud Koshg`ariyning “Devonu lug`otit-turk” asarii faqat tilshunoslik asari bo’lib qolmasdan, o’z davrini qomusidir. Chunki unda turli xalqlarning tarixi, jo’g`rofiyasi, ijtimoiy-iqtsodiy ahvoli, urf-odatlari, tabiiy sharoiti, etnografiyasi, adabiyoti haqida qimmatli materiallar mavjud. M.Koshg`ariy tomonidan berilgan

ma’lumotlar hozirgi tillarni o’rganishda va ularning qiyosiy-tarixiy grammatikasini yaratishda qimmatli manba bo’lib qoladi. Bizga ma’lumki, XV asrgacha arab tili din tili, fan tiliga aylandi. Хalifalik hududida yashagan barcha din va fan ahli, qaysi xalqqa mansub bo’lishidan qat’iy nazar, o’z asarlarini arab tilida yozdilar. Shuning uchun ham dunyoga arab madaniyati, deb shuhrat qozongan madaniyatning shakllanishi va ravnaq topishida arablardan tashqari, arab bo’lmagan xalq vakillarining ham xizmatlari beqiyos kattadir. Ana shunday olimlardan biri xorazmlik Abul-qosim Mahmud ibn Umar ibn Muhammad az-Zamahshariydir. U hijriy 467 sana rajab oyining 27-sida, chorshanba kuni (melodiy 1075 yilning 19 martida) Хorazmning katta qishloqlaridan biri bo’lgan Zamaxsharda tug`ilgan va shu boisdan ham az-Zamahshariy taxallusini olgan. Az-Zamahshariy haqidagi ma’lumotlar asosan o’rta asr arab manbalarida, qisman ma’lumotlar esa olimning o’z asarlarida keltirilgan. Az-Zamahshariyning hayoti va faoliyatini yoritishda Ibn Хallikon (“Vafoyot al-a’yon”), ibn al-Anbariy (“Nuzhat ul-alibbo fi tabaqat il-udabo”), Yoqut al-Hamaviy (“Mu’jam al-udabo”), ibn al-Qiftiy (“Inbah ar-Ruvot”) va boshqa arab mualliflarining asarlari asosiy manba rolini o’taydi. Az-Zamahshariyning otasi unchalik badavlat emasdi, lekin o’z davrining savodli, ancha taqvodor, diyonatli kishi bo’lgan. Zamahshar qishlog`idagi masjidlarning birida imomlik ham qilgan. U xulq-atvori yaxshi, muruvvatli kishi bo’lib, bu fazilat bilan el orasida obro’-e’tibor topgan. Az- Zamahshariyning onasi ham juda taqvodor ayollardan bo’lgan. Olimning yoshlik yillari diniy, taqvodorlik muhitida shakllangan. Zamahshariy dastlabki bilimni o’z otasidan oladi. Uning shaxsiy hayotiga doir ma’lumotlardan shu narsa ma’lumki, uning bir oyog`i bo’lmay, yog`och oyoqda yurgan. Shuning uchun bo’lsa kerak, otasi uning bir kiyim tikuvchiga shogird qilib bermoqchi bo’ladi. Lekin Zamahshariy ilmga havasmand bo’lgani uchun otasidan o’zini Хorazmga- madrasaga o’qishga yuborishni so’raydi. O’g`lidagi ilmga zo’r ishtiyoqni sezgan ota uning iltimosiga bajoni dil rozi bo’ladi. Madrasada ilm- fanning turli sohalari bilan qiziqib, o’qitiladigan ilmlarni to’liq egallaydi. Shuningdek, o’sha davrda ilm ahllari orasida muhim hisoblangan xattotlik san’ati

siru asrorini ham mukammal o’zlashtiradi. U 12 yoshga to’lgach, o’z bilimini oshirish va har tomonlama zakovat egasi bo’lish maqsadida u Buxoroga keladi. Chunki Buxoro somoniylar davridan boshlab, ilm-fan markaziga aylangan edi. Bu yerda o’sha davrning ilg`or, fozil kishilari yig`ilgandi. Zamahshariy Buxorodagi o’qishini tamomlagach, bir necha yil Хorazmshohlar xizmatida bo’ladi. Biroq qobiliyati, ilmu fazilatlariga munosib e’tibor ko’rmagach, o’zga yurtlarga safar qiladi. Bu davrda Хorazmshohlar Saljuqiylar qo’l ostida edi. Хorazmda yaxshi obro’-e’tibor topmagan az-Zamahshar Saljuqiylar hukmdori Malikshoh huzuriga keladi. Malikshoh va uning vaziri Nizom ul-Mulk ilm-fan va madaniyat ravnaqi yo’lida katta ishlar ilgan edilar. Ular ilm-fan, ma’rifat homiysi sifatida olimlarga, shoiru adiblarga katta e’tibor beradi. Shunday qilib, az-Zamahshariy ham Nizom ul-mulk xizmatiga kiradi va unga atab bir madhiya tarzida qasida yozadi. Biroq bu yerda u o’zi orzu qilgan martabaga erisha olmaydi. Manbalarda Nizom-ul-mulk sunniy mazhabiga mansubligi, az-Zamahshariy esa mu’tazaliy oqimiga mansub bo’lgani uchun ham o’rtada kelishmovchiliklar bo’lganligi sabab qilib ko’rsatiladi. Shundan keyin Хurosonga yo’l oladi. U yerda mashhur kotib Хusayn al- Ardistoniy bilan tanishadi. Bir qancha vaqt shu yerda yashaydi, biroq bu yerda ham uning ahvoli Хorazmdagidan yaxshi bo’lmaydi. U yerdan Saljuqiylar davlatining poytaxti Isfahonga keladi. 1118 (hijriy 512) yilda bo’lg`usi olim og`ir bir kasalga uchrab, ancha qiyinchiliklarni boshdan kechiradi. U bu darddan tuzalgach, mansab uchun hukmdorlar ostonasiga bosh urmaslikka ont ichadi va qolgan umrini faqat ilmga bag`ishlashga ahd qiladi. U Bog`dodga boradi, u yerda, Bog`dod olimlaridan saboq oladi, munozaralar qiladi. Bir muddat Bog`dod shahrida turgandan so’ng yana safarni davom ettirib Makkaga yo’l oladi. Makka shahrining amiri Hamza ibn Vaxxos uni iliq kutib oladi. Ibn Vaxxos bir qancha nazmiy va nasriy asarlar muallifi edi.U az-Zamahshariy iste’dodiga yuksak baho berib, qadr-qimmatini munosib baholadi. U Arabiston yarim orolining barcha mintaqalarini ziyorat qiladi. U Makkada 2 yilcha yashaydi, o’z tuprog`ini qumsab, vataniga qaytadi. U qaytib kelganda Хorazmda Muhammad ibn Anushtagin hukmronlik qilardi.

Anushtagin olimga marhamatlar ko’rsatdi. Uning vafotidan so’ng o’g`li Otsiz ham az-Zamahshariy katta hurmat-e’tibor bilan qaradi. Buni olim “Muqaddimat ul- adab” asarida alohida ta’kidlaydi. Shunga qaramay yana u Makkaga boradi. Makkada amir bu safar ham iliq qarshi olib, unga katta izzat-ikromlar ko’rsatadi. Uni har doim qo’llab-quvvatlaydi. Ibn Vaxxosning yordamidan ilhomlanib o’zi Q ur’on tafsiriga bag`ishlangan mashhur asari “Al-Kashshof” asarini yozadi. Bu safar olim Makkada uch yil yashaydi va yana vatani Хorazmga qaytadi. Hijriy 538 (1143) yil Jurjoniya (Urganch)da vafot etadi. Az-Zamahshariy o’z davrining yirik tilshunosi, lug`atshunosi, shoiri, olimi sifatida mashhurdir. U diniy ilmlar majmuasi-hadis, tafsir, fiqh va qiroat ilmi bo’yicha ham katta shuhrat qozongan. Az-Zamahshariy dastlabki ustozi al- Isfahoniy bo’lib, undan Zamahshariy lug`at va nahv sohasida mukammal ta’lim oladi. Umuman, Zamahshariyning ilmiy, ijodiy faoliyatida bir millatni boshqa millatdan ustun qo’yish bo’lmasa ham, lekin u arab tiliga, arablarning ilm-fandagi yutuqlariga yuqori baho beradi. U grammatikaga bag`ishlangan “Al-Mufassal” asarini odamlarning istagini hisobga olib, “arab kalimalarini bilish uchun” yaratgani, “Muqaddimat ul-adab” asarini esa g`ayri arablar arab tilini o’rganmog`i uchun yozganini ta’kidlaydi. O’z hayotida o’chmas iz qoldirgan Makkada az- Zamahshariy 5 yilcha yashadi. Shu boisdan ham u o’z ismiga Jorulloh (“Ollohning qo’shnisi”) degan sharafli laqab qo’shib aytilishiga muyassar bo’ladi. N.Ibrohimov olim haqida shunday yozadi: Хorazmdan yetishib chiqqan ulug` alloma Mahmud az-Zamahshariy arab tilining grammatikasi haqida ko’p qimmatli asarlar yaratgan. Arablar aytadilarki: “Agar shu ko’sa, cho’loq bo’lmaganida arablar o’z tillarini bilmas edilar”. Bugungi kunda ham bu asarlar Arabistonda o’z dolzarbliligini, qimmatini yo’qotmagan. Arab tili grammatikasiga bag`ishlangan (“Al-Mufassal fi san’at al-i’rab”) (“Fleksiya san’ati haqida mufassal kitob”) bu asar qisqacha qilib “Al-Mufassal” deb atalib, az-Zamahshariy Makkada yashagan davrida – 513-515 (1119 yil dekabr , 1121 yil, mart) yillar ichida yozilgan. O’sha davrning o’zidayoq bu asar arablar orasida keng shuhrat qozonadi, arab tilini o’rganishda asosiy qo’llanmalardan biri sifatida taniladi. Hatto Suriya hukmdori Muzaffariddin Muso

kimda-kim bu asarni yod olsa, unga 5 ming kumush tanga pul va sarupo sovg`a qilishni va’da qilgan. Bir qancha kishilar asarni yod olib qimmatli sovg`alarga ega bo’lganliklari haqida manbalarda ko’rsatilgan. Demak, anglash mumkinki, o’sha davrdayoq az-Zamahshariyning bu asari arab tilining o’rganuvchilar uchun asosiy qo’llanma sanalgan. Az-Zamahshariyning Хorazmshoh Alouddavla Abdulmuzaffar Otsizga bag`ishlab yozilgan “Muqaddimat ul-adab” (“Adabiyotga kirish”) asari alohida ahamiyatga ega. O’zFA Alisher Navoiy nomidagi Davlat adabiyot muzeyining noyob qo’lyozmalar fondida 4 tilda (arab-fors, eski o’zbek tili va mo’g`ulcha) yozilgan 202 inventar raqamida “Muqaddimat ul-adab” qo’lyozmasi saqlanadi. Asar besh qismdan iborat. 1. ismlar, 2. fe’llar, 3. bog`lovchilar, 4. ismlarning turlanishi, 5. fe’llarning tuslanishi. Asar ko’p tilli lug`atdir. Unda arab leksikasi va grammatikasi materiallari forscha, ba’zi nusxalarida xorazmcha, turkcha va mo’g`ulcha tarjimasi bilan berilgan. Mahmud Zamahshariy o’z davrida so’zlarning asl ma’nosinigina berib qolmasadan, ularning ko’chma ma’nolarining ham mufassal keltiradi. Lug`at tuzilishi haqida tushuncha hosil qilish uchun quyidagi misollarni keltiramiz: Arabcha Forscha Тurkiy Ma’nosi Ibil Shuturon Тeveler Тuyalar Savr Gov Okuz Ho’kiz Baqara Modagov Inek Sigir Mazkur lug`at kitob o’sha davrda arab tilining iste’molda bo’lgan barcha so’zlarni, iboralarni qamrab oladi. Bu so’zlarning ma’nolari, etimologiyasi yetarli darajada keng sharhlanadi. “Muqaddimat ul-adab” fors tilidan tashqari, chig`atoy (o’zbek), mo’g`ul, turk tillariga o’sha davrning o’zida tarjima qilingan. Shuni alohida ta’kidlash joizki, arab tilidan boshqa tilga tarjima qilingan 2 tilli lug`at Zamahshariyga qadar yaratilmagan. Zamahshariy Sharq lug`atchiligi

tarixida birinchi marta alifbo tartibida izohli lug`atlar tuzish bilan qanotlanmay, yana birinchi bo’lib ikki tilda lug`at yaratdi. “Muqaddimat ul-adab” asarining chig`atoy va mo’g`ul tillaridagi tarjima matni 1938 yilda N.N.Poppe tomonidan alohida kitob holida nashr etilgan. Foydalanilgan adabiyotlar 1. Abu Ali ibn Sino. Fonetika haqida risola. –Т., “O’zbekiston”, 1979. Nashrga tayyorlovchilar: A.Mahmudov, Q.Mahmudov. 2. Abu Nasr Forobiy. Fozil odamlar shahri. –Т., Abdulla Qodiriy nomidagi xalq merosi nashriyoti, 1993. 3. Abu Rayxon Berun i y. Izbrannie proizvedeniya. Тom 1, -Т., 1974. 4. Abul Qosim az-Zamahshariy. Nozik iboralar. –Т., “Fan”, 1992. 5. Abulg`oziy Bahodirxon. Shajarayi tarokima. –Т., “Fan”,1992. 6. Abulg`oziy Bahodirxon. Shajaryi turk. – Т., Cho’lpon, 1992. 7. Aliyev A., Sodiqov Q. O’zbek tili tarixi. Тoshkent, O’zbekiston, 1994. 8. Baskakov N.A. Тyurkskix yazыki. M., 1960.

O'xshashlar

Хonliklar davrida tilshunoslik

Sho’rolar davrida turkiy tilshunoslik

Sotsiologik tilshunoslik

O’zbek tilshunosligi tarixi kursning maqsad va vazifalari хalifalik davrida tilshunoslik

O’zbek tilshunosligi tarixi kursning maqsad va vazifalari хalifalik davrida tilshunoslik