O’zbekiston hududida qadimgi davlatlar va muassasalarining vujudga kelishi - Tarix - Referatlar

O’zbekiston hududida qadimgi davlatlar va muassasalarining vujudga kelishi

Yuklangan vaqt:

14.01.2024

Ko'chirishlar soni:

0

Hajmi:

86 KB

Ko'chirib olish

O’zbekiston hududida qadimgi davlatlar va muassasalarining vujudga kelishi Reja: 1. Qadimgi davlat uyushmalarining vujudga kelishi. 2. “Avesto” ning yaratilash tarixi va unda ilk davlat birlashmalari. 3. “Avesto” da huquqshunoslikka doir masalalarining yoritilishi . 4. O`zbekiston hududidagi qadimgi davlatlar va ularda boshqaruv masalalari.

O’zbekiston hududida ilk davlatlarning va davlat uyushmalarining vujudga kelishi ishlab chiqarish kuchlarining rivojlanishiga bog’liq holda bo’lgan. Davlatlarning vujudga kelishi O’rta Osiyoda turli xalqlarni yurishlaridan himoyalanish maqsadida o’zaro birlashib keyin davlatlar vujudga kelgan. O’zbekiston hududida ilk davlat uyushmalari mil. avv. VII-VI asrlarda tashkil topgan. Davlatga yuklatilgan vazifalarni amalga oshirish uchun davlat muassasalari tashkil topgan. Davlat muassasalari vazifasini maxsus tayinlangan shaxslar amalga oshirgan. Yil sayin ko’payib borayotgan jamoa xo’jaliklariga yer va suvni taqsimlash, qurish, irrigatsiya (sug’orish), jamoaning ichki va tashqi ishlarini boshqarish zarurati “qishloq hokimlari” deb nomlanuvchi oqsoqollar sinfini shakllanishiga olib keldi. Ularning mol-mulkini himoya qiluvchi dushmandlarga qarshi kurashishni va tinch paytda aholi ustidan nazorat, hukmronlik qilish uchun 50-100 dan ortiq o’z askarlari bo’lgan. Ma’lum hududlar bir necha qishloqlar birlashib tumanni hosil qilgan. Tumanni “oqsoqollar kengashi” boshqargan. Oqsoqollar kengashi esa viloyat yoki shahar hokimiga bo’ysungan. Umuman olganda so’ngi paleolit davriga kelib odamlarning hayoti va turmush tarzida ham turli o’zgarishlar bo’lib o’tadi. Xususan, odamlar g’orlarlardan chiqib yengil turar-joylar: chayla va yarim yer to’lalarda yashay boshladilar. Ular endi faqat tog’li hududlarda yashab qolmay vohalar bo’ylab tarqalib, tekisliklarda, daryo va ko’llar bo’ylarida joylashadilar hamda qarindosh- urug’chilik jamoalariga bo’linadilar. Natijada jamiyatda juft oilalar paydo bo’ladi hamda ular birlashtirib urug’ jamoasini tashkil etadilar. Fikrimizni yana davlatchilik shakllanishi bilan yo’g’diradigan bo’lsak ilk davlatlarning paydo bo’lishida o’zaro ayirboshlash, savdo-sotiq va madaniy aloqalarning ham ahamiyati nihoyatda katta bo’lgan. Dastavval shuni aytish joizki, O’rta Osiyo hududlarida yashagan aholi qadimgi davrlardan boshlab o’zaro munosabatlarni rivojlantirib kelganlar. Bronza davriga kelib shimoldagi ko’chmanchi chorvador qabilalar va janubdagi o’troq dehqonchilik aholisi o’rtasida o’zaro mol ayirboshlash va madaniy aloqalar yanada jadallashdi. Bu o’rinda o’sha davrda shakllanib, keyinchalik ancha rivojlangan qadimgi yo’llarning

ahamiyati beqiyos bo’ldi. O’rta Osiyo qadimgi aholisi mintaqadan tashqari qo’shni davlatlar bilan ham o’zaro aloqalarni rivojlantirganlar. Bu o’rinda shuni ta’kidlash joizki, qimmatbaho Badaxshon(Tojikiston) lojuvard toshlari mil. avv 3 mingyillikdayoq Mesopotamiya va Misr shaharlarida nihoyatda qadrlangan va bu hududlar bilan o’zaro mol ayirboshlash munosabatlari o’rnatilgan. Ma’lumki, mil. avv. 2-mingyillikka kelib qadimgi O’zbekistonning dehqonchilik vohalarida o’troq aholining alohida joylashuv manzilgohlaridagi ijtimoiy va iqtisodiy o’zgarishlar o’troq dehqonchilikning rivojlanishi, aholi zichligining yuqori darajasi, hunarmandchilikning taraqqiy etishi, ijtimoiy tabaqalanish va boshqaruv tizimning murakkablashib borishi o’zaro almashinuv, savdo-sotiq va madaniy aloqalarning kuchayishi hamda harbiy siyosiy vaziyat O’zbekiston hududlarida dastlabki shaharsozlikning paydo bo’lishida asosiy omillardan biri hisoblanadi. O’lkamiz hududidagi ilk shaharlar qishloqlardan, iqtisodiy, siyosiy va madaniy mavqeyi bilan ajralib turgan. Bu shaharlar asosan aholisi sug’orma dehqonchilik bilan shug’ullangan vohalarda qadimgi savdo yo’llari bo’ylarida hukmdorlar qarorgohlari atrofida paydo bo’lgan. Bunday shaharlar o’zlari joylashgan vohalarning siyosiy, iqtisodiy, madaniy, diniy va harbiy markazlari vazifasini bajargan bo’lishi shubhasizdir. Mehnat qurollarining takomillashishi natijasida yerga ishlov berish yaxshilanib, ekin maydonlari kengayib, odamlarning mehnati unumliroq bo’lib bordi. Temirning kashf etilishi, undan yasalgan menat qurollari qishloq xo’jaligi va hunarmandchilikning tez o’sishiga olib keldi. Odamlarning daryolarni bo’g’ib, to’g’onlar qurib, kanallar qazib yerlarga suv chiqarish imkoniyati kengaydi. Bu odamlar turmushini ancha yaxshiladi, umrini uzaytirdi, aholi son jihatdan ko’payib bordi. Urug’chilik munosabatlari ham o’zgarib bordi. Ikki urug’ a’zolaridan tashkil topgan er-xotin juft oilalar vujudga keldi. Katta patriarxal oilalar urug’ jamoalaridan ajralib chiqadi, ularga urug’ jamoalariga qarashli yerlardan chek yerlari ajratib beriladi. Shu tariqa urug’ jamoasining umumiy xo’jaligi oilalar jamoasiga bo’linadi. Bunday oilalar jamoasi ishlab chiqarish jamoalari deb ham ataladi.

Katta oila jamoasining oqsoqoli bir vaqtning o’zida oila jamoasi uchun diniy va dunyoviy boshliq, piru ustod va murabbiy bo’lgan. Urug’-qishloq oqsoqoli esa butun qishloq ahlining boshlig’i hisoblangan. Oqsoqqollar kengashi qo’lida diniy va dunyoviy hokimiyat jamlangan bo’lib, u jamoa faoliyatiga oid barcha masalalarni hal qilgan. Mo’tabar shaxslarning topshiriq va buyruqlari jamoa azolari uchun majburiy hisoblangan. Ishlab chiqarish jamoalari tarkibini tashkil etgan har bir oila o’z xususiy mulkiga ega bo’lgan. Xususiy mulkning kelib chiqishi, jamoalarning ishlab chiqarish qonun-qoidalari asosida tashkil topishi o’z navbatida mulkiy tabaqalanishni keltirib chiqardi. Boylik, avvalo, jamoa oqsoqollari, harbiy boshliqlar, mo’tabar shaxslar qo’lida to’plana boshladi. Ular yerlarning hosildor qismini egalladilar, ko’plab chorva mollariga ega bo’ldilar. Oqsoqollar oila jamoalari, urug’ va qabila ishlarini boshqargani uchun jamoachilar ularga yetishtirgan hosillarining, chorva mollarining bir qismini berishga majbur bo’lgan. Oqsoqollar o’z iste’molidan ortib qolgan bunday mahsulotlarni mis, oltin, kumush buyumlariga ayirbosh qilganlar. “Avesto” Ovasto (parfiyoncha: apastak-matn; ko’pincha “Zend-Avesto”, ya’ni “tafsir qilingan matn” deb ataladi) zardushtiylikning muqaddas kitoblari to’plami. Ko’pchilik tadqiqotchilar 86 fikriga ko`ra, “Avesto” O’rta Osiyoda, xususan Xorazmda mil. avv. 1-ming yillikning 1-yarmida vujudga kelgan deya hisoblaydilar. “Avesto” da keltirilgan geografik ma’lumotlar ham buni tasdiqlaydi. “Avesto” uzoq vaqt mobaynida shakllangan. Unda keltirilgan ma’lumotlarning eng qadimgi qismlari mil. avv. 2-ming yillik oxiri 1-ming yillik boshiga oid bo`lib, og’zaki tarzda avloddan-avlodga o’tib kelgan. Keyingi asrlarda “Avesto” tarkibiga turli diniy urf-odatlar bayoni, axloqiy, huquqiy qonun-qoidalar ham qo`shilib borgan. “Avesto”ni Zardusht diniy asar sifatida bir tizimga solgan. Dastlabki yozma nusxasi esa 12 ming mol terisiga bitilgan deb rivoyat qilinadi. U Persepolda saqlangan. Aleksandr (Makedoniyalik Iskandar) Eronni zabt etganda, bu nusxa kuydirib yuborilgan. Arshakiylardan Vologes I davri (51-78) da qayta kitob qilingan, lekin u saqlanmagan. Sosoniylar davri (III-VII) asrda yaxlit kitob holiga

keltirilgan. “Avesto” 21 nask (qism)dan iborat bo`lgan. Uning hajmi katta kitob bo’lganligi sababli dindorlar kundalik faoliyatida foydalanish uchun uning ixchamlashtirilgan shakli “Kichik Avesto” yaratilgan. Arablar Eronni fath etgach zardushtiy ruhoniylarining bir qismi Hindistonga ko`chib o’tgan. Ularning avlodlari (parslar) Bombey shahrida o`z jamoalarida hozirgacha “Avesto” ning asl nusxasini saqlab keladi. Fransuz tadqiqotchisi Anketil Dyuperron zardushtiylar jamoasida yashab, “Avesto” tilini va yozuvini o’rganib, uni tarjima qilib nashr etgan (1771). “Avesto” ning bu nusxasi 27 jilddan iborat bo’lib, asarning yettidan bir qismidir. U Yasna, Vispered, Vendidad, Gotlar va Yashtlar nomi bilan yuritiladigan kitoblarni o’z ichiga oladi. Kitobda bayon etilgan g’oyalarga ko’ra, olam ikki asosning, ikki ibtidoning, ya’ni yorug’lik bilan zulmatning, yaxshilik bilan yomonlikning to’xtovsiz kurashidan iborat. Yaxshilik va ezgulik xudosi Ahuramazda yer, o`simlik va boshqa hamma tabiiy boyliklarni yaratgan. Yomonlik va yovuzlik timsoli Anxramaynu Ahuramazdaga qarshi to’xtovsiz kurashadi, ammo uni yengishga ojizlik qiladi. Bu kurash abadiy davom etadi. Yaxshilikni ifodalovchi kuchlar osmonda, yomonlikni ifodalovchi kuchlar yer ostida joylashgan, yer sathi esa kurash maydonidir. Hayotdagi turfa o’zgarishlar qaysi kuchning g’alaba qilishiga bog’liq. Inson ham tana va ruhning, ahloq esa yaxshi va yomon xulqning o’zaro kurashidan iborat. Cheksiz, abadiy fazo va vaqt ham ikki qarama-qarshi qismdan: yaxshilik va Ahuramazda hukmron bo’lgan abadiy yorug’lik bilan yomonlik va Anhramaynu hukmron bo’lgan abadiy zulmatdan tashkil topadi. “Avesto” ta’limotiga ko’ra, birinchi inson Govamard (ho’kiz-odam; forscha Kayumars) bo’lib, undan barcha kishilar tarqalgan. Birinchi shoh Yima davri oltin davr hisoblangan, chunki unda o’lim bo’lmagan, Ahuramazda doimiy bahor yaratgan. Kishilar bekamu ko’st, baxtiyor yashagan. 900 yil o’tgach shoh Yima g’ururga berilib, man etilgan sigir go’shtini yeydi va yovuzlik ramzi Anhramaynu hukmidagi kuchlar bosh ko’taradi. Olamni muzlik qoplaydi. Yima Ahuramazda amri bilan odamlar va hayvonlarni sovuqdan saqlab qolish uchun qo’rg’on (var) qurib, unga har bir jonzotdan bir juftini joylashtirgan. Insoniyat tarixining ilk oltin davri tugagach, yaxshilik va yomonlik o’rtasidagi kurash davri

bo`lgan ikkinchi davr boshlangan. Uchinchi davrda Ahuramazda g`alaba qilib, ezgulik saltanati barqaror bo`ladi, o`lganlar tiriladi. “Avesto” ning axloqiy-falsafiy mohiyati “ezgu fikr”, “ezgu so`z” va “ezgu amal” hisoblangan. Zardushtiylarning ibodat oldidan aytiladigan niyati, so’zlari shu 3 ibora bilan boshlanadi. “Avesto” o`zbek, umuman O`rta Osiyo, Eron, Ozarbayjon xalqlarining qadim davrdagi ijtimoiy-iqtisodiy hayoti, diniy qarashlari, olam to’g’risidagi tasavvurlari, urf- odatlari, ma’naviy madaniyatlarini o’rganishda muhim va yagona manba. “Bu nodir kitob bundan 30 asr muqaddam ikki daryo oralig’ida, mana shu zaminda umrguzaronlik qilgan ajdodlarimizning biz avlodlariga qoldirgan ma’naviy, tarixiy merosidir”. O’zbekiston hukumatining tashabbusi bilan YUNESKO Bosh konferensiyasi 30-sessiyasi “Avesto” yaratilganining 2700 yilligini dunyo miqyosida nishonlash haqida qaror qabul qildi (1999-yil. noyabr). “Avesto” ning jahon madaniyati va dinlar tarixida tutgan o’rnini hisobga olgan holda hamda yuqoridagi qarordan kelib chiqib O’zbekiston Respublikasi Vazirlar Mahkamasi maxsus qaror e’lon qilib (2000-yil 29-mart), “Avesto” ning 2700 yilligini nishonlash tadbirlarini belgiladi. Unga ko`ra 2001-yilning oktabr oyida O’zbekistonda xalqaro ilmiy konferensiya va tantanali bayram tadbirlari o’tkazildi. “Avesto” jahon madaniyatining, jumladan, Markaziy Osiyo va Eron xalqlari tarixining qadimgi noyob yodgorligidir. Zardushtiylik eʼtiqodiga amal qiluvchilarning muqaddas kitobi sifatida Yagona Tangriga topinish shu taʼlimotdan boshlangan. Bu kitob tarkibi, ifoda uslubi va timsollar tizimi bilan adabiy manbalarga yaqin turadi. “Avesto” oromiy va pahlaviy yozuvlari asosida yaratilgan maxsus alifboda dastlab to’qqiz ho’kiz terisiga yozilgan. Ilk nusxalari asosida sosoniylar (mil. avv. VII-III asr) davrida 21 kitob holida yig’ilgan, bizgacha ularning chorak qismi yetib kelgan. Tiklangan matnga ”Zand” nomi bilan sharhlar bitilgan. “Avesto” toʻrt qismdan iborat: 1- Yasna (“Diniy marosimlar”) 2- Yasht (maʼno jihatdan Yasnaga yaqin),

3- Visparad (“Barcha ilohlar haqidagi kitob”) 4- Vendidad (“Yovuz ruhlarga qarshi qonunlar majmuasi”). “Avesto” insoniyat sivilizatsiya tarixining ilk sahifalarini tashkil etgani uchun jahon olimlarining eʼtiborini tortgan. U haqda F. Nitsshe, F. Shpigel, A. Mayllet, V. Bartold, E. Bertels, Yan Ripka, O. Makovelskiy, I. Braginskiy kabi xorijiy olimlarning tadqiqotlari mavjud. O’zbekistonda “Avesto” ni o’rganish qadimdan boshlangan. Abu Rayhon Beruniy, Abu Jafar Tabariy, Abu Baxr Narshaxiy asarlarida “Avesto” taʼlimotiga va unda tilga olingan timsollarga murojaat mavjud. Hozirgi o’zbek olimlari A. Qayumov, H. Homidov, M. Is’hoqov, N. Rahmonovlarning ilmiy tadqiqot va maqolalari eʼtiborli. Hukumatimiz qarori bilan 2001-yilda “Avesto” ning 2700 yilligi nishonlandi. Bundan tashqari “Avesto” da zardushtiylikning umumbashariy ahamiyati va mohiyatidan tashqari unda o’lkamizda ilk boshqaruv tizimining amal qilinganligi to’g’risida ham qimmatli ma’lumotlar uchraydi. Mamlakatni idora qilgan shaxs “Kavi” deb yuritilgan. Oqsoqollar kengashi – “varzanapoti”, “Xanjamana”, xalq yig’ilishi-v’yaxa deyilgan. Tarixchilarning ma’lumotlariga qaraganda, eramizning birinchi asrida ashkoniylar podshosi Valages Ariakid, III-asrga kelib Xusrav Parviz, Shopuri Xurmuzd davrida bu mukaddas kitob bir necha bor ko’chirilgan. Shu sabablarga ko’ra, keyingi vaqtlarga qadar “ Avesto ”ning vatani, ya’ni qaysi davlatga, xalqqa mansubligi haqida biror to’la ma’lumotlar berilmagan edi. Keyingi vaqtlarda chop etilgan ilmiy-tarixiy maqolalarda Avesto ning vatani Xorazmdir. Xorazm “Avesto” ning ilk markazi kabi ma’lumotlarni uchratamiz. “Muqaddas Avesto”ning 2700 yillik yubileyi shodiyonalari 3-noyabr 2001- yili ko’hna Urganch shaxrida “ Avesto ”ning vatanida bo’lib o’tdi. Bu tantanalarda O’zbekiston Respublikasi Prezidenti I.A. Karimov qatnashib o’zining sermazmun nutqida: “Avesto” birgina o’zbek xalqining tarixiy ilmiy-madaniy yodgorligigina emas, balki u butun umumbashariyatning bebaxo durdonasidir - deb ta’kidladilar. “ Avesto ”ning qancha qismdan iboratligi, umumiy mundarijasi haqida zardushtiylik diniy-falsafiy tizim to’g’risidagi asar ekanligi “Denart”da (IX asrga mansub)

keltirilgan ma’lumotlargina mavjud. Bu asarda “Avesto” ning 21 nask qismdan iboratligini qayd qilib, ularning mazmunini qisqacha bayon etiladi. “Avesto” sosoniylar davrida muqaddas hisoblangan va xalq orasida ishlatilmaydigan tilda yozib olingan. Bu tilni hatto ruhoniylar ham tushunaolmaganliklari sababli o’sha davrning adabiy tili hisoblangan paxlaviy tiliga tarjima qilingan va uning asosiy mazmuniga keng sharhlar berilgan. Bu tarjima va sharhlar “Zend” nomi bilan ma’lum. Shu tufayli o’tgan asrda Yevropada “ Avesto ” kitobi “Zend Avesto ” deb noto’g’ri nomlangan. “Avesto” ning katta xajmda bo’lganligi sababli dindorlarning kundalik faoliyatida foydalanish uchun “Kichik Avesto ” yaratilgan. “Kichik Avesto ”, “Katta Avesto ” dan tanlab olingan duolar to’plamidan iborat bo’lgan va bizgacha Avesto ning juda oz qismi yetib kelgan. Vandidodda jinoyatlar tasnifi: Bizning kunlarimizgacha ulardan faqat oxirgi kitob Vandidod (forscha Vendidat – “Devlarga qarshi qonun”) yetib kelgan. Zardushtiylik huquqining ushbu yodgorligi zardushtiylik dini davlat maqomini, zardushtiylar esa davlat tomonidan qo’llab-quvvatlashni yo’qotgan davrda jamoa turmushi qattiq tartibga solinganligadan dalolat beradi. Shu sababli Vandidodning ko`plab huquqiy qoidalari Yaxve dini jamoasi alohida bo’la boshlagan davrda tuzilgan. Shu bilan birga Vandidodning huquqiy qoidalari ancha dunyoviy zaminga xos xususiyatlarga egadir . Garchi besh kitobda va Vandidodda qonunlar Xudoning kashfiyoti sifatida taqdim etilgan bo’lsa ham, tadqiqotchilar ushbu kashfiyotning xususiyatidagi tafovutini qayd etadilar. Masalan, S. Ganbarov tomonidan yozilgan “Avesto” da siyosiy va huquqiy g`oyalar tadqiqotida Vandidodda jinoyatlar tasnifi misolida yaxshi ko’rish mumkin: Birinchidan , dinga qarshi jinoyatlar: bid’at, boshqa din vakili bilan nikohga kirish, ruhoniy vazifasini qonunsiz bajarish, • Ikkinchidan , shaxsga qarshi jinoyatlar : qasddan hujum qilish yoki jazava holatida hujum qilish , tahdid qilish shifokorning zararli xatti - harakati , homiladorlik paytida ayolning sog ` lig ` iga qarshi jinoyatlar . • Uchinchidan , hayvonlarga ayniqsa kuchuklarga qarshi jinoyatlar.

• To`rtinchidan , mulkiy jinoyatlar: o`g`irlik, talon-toroj, bosqinchilik, firibgarlik. Xasislik mulkiy jinoyatlarning alohida turi hisoblangan. Chunki “kimki adolatli iltimosni rad etsa ... aslida ashyo so`rayottan o`g`ri hisoblanadi”. • Beshinchidan , axloqqa qarshi jinoyatlar: fohishabozlik, er-xotin xiyonati. Bundan tashqari ko`rsatilmagan yordam ham qattiq jazolanadigan axloqiy jinoyat hisoblangan. • Oltinchidan, tabiat kuchlariga qarshi jinoyatlar: erga, suvga, olovga va o’simlik dunyosiga qarshi jinoyatlar, ayniqsa erning isloflanishi bilan bog`lik jinoyatlar. Tabiat kuchlarining o`zi va hayvonlar tomonidan sodir etiladigan jinoyatlar to`g`risida maxsus to`xtab o`tilgan. Tabiat kuchlari va hayvonlar o`sha paytdagi zardushtiylik huquqida jinoyat ob’ektlarigina bo`lib qolmasdan, balki sub’ektlari ham hisoblangan 15 . Denkart asarida Ahura Mazdaning kashfiyoti uch turga bo’linishi haqida so`z yuritiladi: - gazanig - oliy ma’naviy bilim va burch; darig (qonuniy) - dunyoviy bilim va dunyoviy burch; hada mapsrig - ushbu ikki soha (ya’ni sharhlar o`rtasida joylashgan barcha narsa) Xisrav I (531-579 yy.) hukmronligi yillarida tuzilgan Sosoniylar qonunlari majmui – “Bir ming sud qarorlari kitobi” da huquqshunoslik kasbining katta diniy ahamiyati to`g`risida so’z yuritiladi. Din va huquqning aloqasiga, jumladan sud ishlariga bunday qarash tasodifiy emas edi. Eronda kodekslashtirilgan huquq mavjud emas edi. “Denkart”ga muvofiq sudyalar (ular kohinlar tabaqasiga kirar edi) “Avesto” va Zandda (“Avesto”-ga forscha sharhlar) asosida qaror chiqarishlari kerak bo`lgan; oliy kohin (magupat) sudyalar va amaldorlarning har qanday qarorlarni bekor qilishi mumkin edi. Zardushtiylik huquqining yirik tadqiqotchisi A. Perixanyan “Avesto” da “ayollar huquqi” haqida qayd etadi. Bugungi kunda huquqshunoslarimiz tomonidan tadqiq etilayotgan ilmiy tadqiqotlar inson huquqi muammolariga bag`ishlanayotgan bo`lsa, ushbu masalaning ilk yechimi sifatida yana “Avesto”ga murojaat etish mumkin.

Jumladan, bolalarning huquqi to’g’risida “Avesto”, - deb qayd etadi S. Ganbarov, - tug`ilgan va hali tug`ilmagan bolalar huquqlarini qat’iy muhofaza qiladi (“Vandidod”, XV, 36-39)”, Voyaga etmagan bolalarni ota-onalaridan olib ketish, vasiysiz qoldirish og`ir jinoyat sifatida qaralgan. Bolalarni juda yoshligidan fanlarga o`qitish tavsiya etilgan. “Agar sening o`g`ling bo`lsa, deyiladi: “Adurbada maslahatlari” da, - uni bolaligidan maktabga ber, chunki o`qish - ko`zning nuri”. deb qayd etgan. Ijtimoiy munosabatlarda o`sha davrlardagi boshqa dinlarda bo`lgani singari zardushtiylikda qulchilik qoralangan, biroq qul zardushtiylikda muayyan huquqlarga ega bo`lgan. Bir qator hollarda u o`z hukmdoriga qarshi da’vo qo`zg`ashi ham mumkin bo`lgan. “Vandidod” ning IV fargard, 4-12-bandlar tahlili asosida shartnomaviy munosabatlarning xususiyatini ta’kidlash mumkin, zero har bir keyingi bitimda avvalgi bitimdagiga qaraganda, qimmatliroq bo`lgan ob’ekt qo`yilgan va u avvalgisining kafolati sifatida chiqqan. “Vandidod”ga muvofiq, har bir buzilgan yoki bajarilmagan shartnoma katta qiymatdagi yangi shartnomani tuzish bilan almashtirilishi zarur. “Vandidod” jazolash tizimi bilan shartnomaning bajarilishini kafolatlaydi. “Vandidod” mutlaqo aniq qat’iy buyruq shaklida tuzilgan, agar bir tomon “bitimda aldagan bo`lsa” jismoniy jazolashni qo`llashni ko`rsatadi, IV fargardning 36-53-bandlari og`zaki bitimdaga aldaganlik uchun 300 marta tikanak bilan jazolashni va 300 ta kaltaklashni, qo`l berishib tuzilgan bitim buzilgani uchun 600 marta tikanak bilan jazolashni, 600 marta kaltaklashni belgilagan. Shuningdek, ahdni buzgan kishining yaqin qarindoshlarining gunohni yuvuvchi tavba-tazarru yaqinlariga masuliyatni ham belgilaydi. Yaqin qarindoshlarga nisbatan belgilangan jazo choralari ahdni buzgan kishini jazolashning asosiy choralariga jumladan, jismoniy jazolashga qo’shimcha hisoblanadi. “Avesto” bo`yicha qarindoshlar guruhlari tilga olinadi. “Vandidod” qarindoshlikning to`qqiz bosqichini qayd etadi: 1) ota-onalar; 2) farzandlar; 3) aka-uka va opa-singillar; 4) bobo va buvi; 5) nevaralar; 6} tog`alar va xolalar; 7) amakivachchalar va ammavachchalar; 8) jiyanlar; 9) aka-uka va oga-singal nevaralari. Zardusht ta’limotida qarindoshlik

munosabatlari otaliq merosxo’rliq o’zaro huquq va majburiyatlar, qonunlarni buzganlikdagi javobgarliklarni tartibga solishda katta ahamiyatga ega bo`lgan. “Avesto”ni o`rganish natijasida quyidagi xulosalarni chiqarish mumkin: • Jazo ma’lum uchlikni buzganlik sharoitlarida belgilanadi. • O`zga fikrlovchilar uchun qattiq jazo belgilanadi. • Qattiq jazo qasddan qilingan jinoyatlar, dinga qarshi jinoyatlar, takroriy jinoyatlar uchun belgilanadi. Bunda jazo takroran qilingan jinoyatlar soniga qarab oshadi. • Jazoning bir turini boshqasi bilan birga qushish xarakterli hisoblanadi. • Ba’zi jinoyatlar “Avesto” bo`yicha kechirilmas hisoblanadi. • Jinoyatlarning ma’lum turi uchun jamoa javobgarligi belgilangan, bunda oila a’zolaridan birining gunohi qarindoshlarga yoyiladi. “Avesto”ni o`rganish jinoyatlarni quyidagicha klassifikatsiyalashni taklif etishga imkon beradi; - dinga qarshi jinoyat; - shaxsga qarshi jinoyat; - hayvonlarga qarshi jinoyat; - mulkiy jinoyat; - axloqqa qarshi jinoyat; - tabiat kuchlariga qarshi jinoyat “Avesto” da sud va sudda ishlarni ko`rish masalalariga ham katta e’tibor berilgan. Sud vazifalarini bajarish jamoa imtiyozi bo`lgan, deb o`ylash mumkin. Shu bilan birga “Avesto” odil sudlov uchun maxsus mo`ljallangan shaxslar haqida shohidlik beradi. Sud jarayoni, “Avesto” dan ko`rinishicha, ma’lum marosimda, asosan duolar o`qish tegishli shaklda aytilishi bilan o`tkazilishi lozim. Sudda ishni ko`rish, chamasi, muhobalashuv, ya’ni munozaralashuv tusida bo`lgan, Ishni hal etishdan oldin qoida buzuvchining aybi qator masalalarni, aybdorlik shaklini - qasddan yoki ehtiyotsizlik tufaylimi, qattiq hayajon holatida, birinchi marta yoki takroran qoidani buzganlik, aybdor o`z aybini tan oladimi, aybdorning diniy mansubligi va

boshqalar aniqlangan. Demak, “Avesto” da jamiyat hayoti, aholi va inson manfaatlari daxlsizligi masalasi ham alohida o’rin egallaganligini ko’rishimiz mumkin. Bugungi kunda jahon hamjamiyatida o’z o’rnini topgan va rivojlanib borayotgan vatanimiz tarixiga nazar tashlaydigan bo’lsak u bosib o’tgan yo’l uzoq davrni tashkil etadi. Biz fikrimizni O’rta Osiyo hududida shakllangan qadimgi davlatlar va ularning boshqaruviga doir fikr va xulosalarimizni aytib o’tib o’sha davrdagi boshqaruvning qanday yo’sinda bo’lganligini yana bir bor oydinlashtirishni o’zimizga joiz deb bildik. Boshqaruv shakli - mutlaq monarxiya. O`zbekistonning qadimgi tarixida u bunday tipdagi va boshqaruv shaklidagi davlat tarkibiga kirgan bir necha davrlar bo`lgan. Miloddan avvalgi 539-yildan boshlab miloddan avvalgi 330-yilgacha Ikki daryo oraligidagi deyarli butun hudud, Fargona va Chochdan tashkari, Axamoniylar sulolasidan bo`lgan Eron shohlari xukmronligiga buysungan. Xorazm, Sug’d, Baktriya, shuningdek saklar muayyan ma’muriy birliklar- satrapliklarni tashkil etgan. Ularga Ahamoniylar podsholari tomonidan tayinlanadigan satraplar boshchilik qilgan va ular davlat g’aznasiga ma’lum miqdorda o`lpon to`lagan. Shimoliy Baqtriya milodiy III asr o`rtasidan boshlab milodiy IV asr oxirigacha Sosoniylar podsholigi drisdiksiyasi ostida bo`lgan. Ularning tarkibiga kirgan Baqtriya maxsus huquqlardan foydalangan. Uning tepasida kelib chiqishi Sosoniylar sulolasining har xil shohobchalariga tegishli bo`lgan, kushonlar unvoniga hamda oltin, kumush va mis tangalar zarb qilish huquqiga ega bo`lgan sosoniy shaxzodalar turgan. Ularning ayrimlari keyinchalik butun davlatning podshosi bo`lganlar. Davlat tipi-konfederativ podsholik. Boshkaruv shakli – cheklangan monarxiya. Davlatlarning ushbu tipiga Qang va Yuechji davlatlarini yoki Katta Yuechji davlatining kushonlargacha mavjud bo`lgan birinchi davrini kiritish mumkin. Ular odatda qabila boshliqlari yoki o’z tangasini zarb qiluvchi urug

boshliqlari tomonidan boshqariladigan bir nechta mustaqil o`lkalardan iborat bo`lgan. Misol uchun Qang’ davlati xududida kamida beshta mana shunday o`lka mavjud bo`lgan. Bular: Buxoro va uning atrofi. Uning hukmdorlari Yevtidem tangalariga taqlid qilib o`z nomlar va unvonlari bitilgan tangalar chiqargan, Buxoroning janubi – sharqi va Samarkand Sug’dining shimoli-g’arbi. Bu yerda Girkod sulolasidan chiqqan doxiylar xukmdorlik qilgan, har xil shohlarning nomlari bitilgan o’z tangalarini chiqargan Samarkand So’g’di hamda o`zi mustaqil tanga zarb etgan Janubiy So’g’d o’lkalaridir. Ayni vaqtda ushbu o`lkalar uchun umumiy bo’lgan Qang’ning zarb qilingan tangasi mavjud bo`lmagan. Davlat tipi-egalik qilish. Boshqaruv shakli qabila doxiylari yoki urug` boshliqlarining meros qilib qoldiriladigan hokimiyati. Davlat birlashmasining ushbu tipi kichikroq o`lka bo`lgan. Yunon-Baqtriya podsholigi qulagach Baqtriyaga kelgan Chjan-Szyan tomonidan miloddan avvalgi 128-yilda yoki miloddan avvalgi 126-yilda qayd etilgan. Unga muvofiq Baqtriya ko’plab mayda mustaqil o`lkalardan iborat bo’lgan. “Bu erda deyarli har bir shahar o`z hukmdorini yetishtirgan”. Xitoy manbalarida O`rta Osiyo ikki daryo oraligi hududida 55 ta o’lka mavjudligi ko’rsatiladi. Ular muayyan mustakillikdan foydalangan va o’z tashqi siyosatini yuritishgan, jumladan Xitoy bilan diplomatik munosabatlar o`rnatgan. Soliq masalalari: Davlatning davlat sifatida mavjud bo`lishi har xil muassasalarning, shu jumladan soliqlar yig`ish bilan shug`ullanadigan muassasalarning mavjud bo`lishi bilan belgilanadi. Bu haqda yu.f.d.prof. A.X. Saidov, E. Rtveladze, E. Abdullaevlar hammualifligida yozilgan “Qadimgi O`zbekiston sivilizatsiyasi: davlatchilik va huquq tarixidan lavhalar” asarida O`rta Osiyo, shu jumladan qadimgi O`zbekiston hududida soliqlar mavjud bo`lganligi va u Ahamoniylar davridan amal qilgani qayd etiladi. Ma’lumki, Ahamoniylar podsholigining butun hududi 20 satraplikka bo’linadi. Ulardan Baqtriya, Sak, Xorazm, Parfiya, So`g`d va Xarayva O`rta Osiyo hududida joylashgan bo`lib, ularning har qaysisi Ahamoniylar podshosining

xazinasiga muayyan miqdorda soliq to’lashi shart bo`lgan. Soliq og`irlik o`lchovi – talantda ifodalangan va u 25,92 kg teng bo`lgan. Ahamoniylar podsholigi satraplari, shu jumladan O’rta Osiyo satraplari pul soliqlaridan tashqari natura shaklida ham o`lpon to’lashlari shart bo`lgan. Bu haqda, Doro I ning Suzdagi saroy qurilishi uchun Baqtriyadan oltin, Sug’diyonadan lojuvard kumush titrat, Xorazmdan yarqirama rangdor toshlar keltirilgani tarixdan ma’lum. O’rta Osiyoning janubiy viloyatlari Iskandar Zulqaynar tomonidan bosib olingach, hamda Salavkiylar va Yunon-Baqtriya podsholigi tarkibiga kirgach, bu hududda ellinistik dunyoga xos xususiyatlar tashkil topgan. Bu davlatlar boshqaruvi va davlat idoralari haqidagi ma’lumotlarni keyingi mavzularimizda bayon qilamiz. Asosiy mezonlar: qonun, shartnoma: Safa-Isfaxoniy qayd etganidek, “qonun tushunchasi zardushtiylikning eng ilk bosqichlarida uning muhim qismi bo`lgan… Zardushtiylik muqaddas adabiyotining uchdan bir qismi qonunning turli bosqichlari va sohalarida unga tegishli bo’lgan”, “Avesto” “amaliy qonunlari” ning maqsadi esa, “barcha jihatlardan uyg`un bo`lgan uyushgan, gullab – yashnagan jamiyatni yaratish” bo`lgan.

Adabiyotlar: 1. Karimov I . A O ’ zbekiston XXI asr bo ’ sag ’ asida : xafsizlikka tahdid , barqarorlik shartlari va taraqqiyot kafolatlari .- T ., “ O ’ zbekiston ”, 1997- yil . 2. Karimov I. A Asarlar, 7-tom, T., “O’zbekiston” 1999-yil. 3. Abdirahimova N.A Isakova.M.S, Sulaymonova.Z.M Davlat muassasalari tarixi.T., “Sharq”, 2007-yil. 4. Usmonov.Q, Sodiqov.M, Burxonov.S O’zbekiston tarixi. T., “Iqtisod- Moliya”, 2006-yil. 5. Azamat Ziyo. O’zbek davlatchlik tarixi. T., “Sharq”, 2000-yil. 6. Xamidova.M O’zbekiston davlati va huquqi tarixi (o’quv qo’llanma), T., “Sharq”, 2005-yil. 7. O’zbekiston tarixi. Murtazayeva R.H. tahriri ostida T., “Yangi asr avlodi”. 2003-yil. 8. O’zbekiston Milliy ensiklopediyasi. 3-tom. Toshkent., 2002-yil. 9. Tojiboyeva X Farobiy buyuk jamiyatshunos olim. T., “Turon Zamin Ziyo”, 2016-yil. 10. Eshov B O’zbekiston davlatchiligi va boshqaruv tarixi. T., “Sharq”, 2012- yil.

O'xshashlar

Eng qadimgi davlatlar davri

Ibtidoiy jamiyatda dinning vujudga kelishi

Makedoniyalik Aleksandr davlatining vujudga kelishi va parchalanishi

Xorazmda antik qal`alarning vujudga kelishi

Arab yozuvining vujudga kelishi, rivojlanishi va uning turlari