Klassik davrdagi Yunon madaniyati - Tarix - Referatlar

Klassik davrdagi Yunon madaniyati

Yuklangan vaqt:

26.09.2022

Ko'chirishlar soni:

0

Hajmi:

54.5 KB

Ko'chirib olish

Klassik davrdagi Yunon madaniyati Reja: 1. Qadimgi yunon falsafasi 2. Adabiyot va teatr 3. San`at.

Qadimgi va klassik zamonlarda tabiat va insonlar faoliyati ustidan olib borilgan kuzatishlarning natijalarini umum lashtirish natijasida falsafiy qarashlar ravnaq topib borgan. Qadimgi Yunonistonda fanning turli sohalari bo`yicha mashhur olimlar yetishib chiqqanlar. Yunon olimlari Qadimgi Misr, Bobil va Kichik Osiyo xalqlarining bilimlaridan ko`p bahramand bo`lganlar. Qadimgi Sharq fani yunon dunyosida ilm-fanning yanada rivojlanishiga barakali ta`sir etgan. Miloddan avvalgi VII-VI asrlardan boshlab Yunonistonda madaniyat va fan yanada rivojlanib ketadi. O`sha davrda Yunonistonda Gerodot, Demokrit, Protagor, Gippokrat, Suqrot, Aflotun, Aristotel kabi ulug` olimlar yashab ijod qlganlar. Miloddan avvalgi VI asrda Kichik Osiyoning g`arbiy sohilidagi Ioniya viloyati va undagi Milet shahri ilm-fan taraqqiyotining markaziga aylangan. Ioniya olimlari Misr va Bobil olimlarining ilmiy bilimlaridan yaxshi xabardor bo`lib, o`sha bilimlarni yanada rivojlantirganlar. Ular tabiat va jamiyat hodisalarini kuzatib bu hodisalarning sabablarini tushuntirishga harakat qilganlar. Periklning do`sti Anaksagor materiyaning tuzilishi bilan qiziqqan va uning kelib chiqishiga asos "Olamiy aql" deb hisoblangan. Miloddan avvalgi 460-370 yillarda yashagan Abderalik Demokrit esa butun koinot, narsalar ham eng mayda zarralar - atomlardan iborat degan mashhur ta`minotni yaratdi. ("atom"- yunonchada "bo`linmas" demakdir). Uning fikricha harakat - materiyaning azaliy xususiyatidir. Mashhur yunon olimlaridan yana biri tabib Gippokratdir. U Kichik Osiyoning janubi-g`arbiy sohiliga yaqin kelgan. Olim Misr, Kichik Osiyo, Liviya va qadimgi skiflar mamlakatiga safar qilgan. Gippokrat o`sha yerdagi odamlarning turmush tarzi va urf-odatlari bilan tanishgan. Gippokrat tibbiyot bilimi asoslarini otasi Geraklitdan o`rgangan. U mashhur tabib bo`lib, tibbiyotning barcha masalalari bilan shug`ullangan. Gippokrat mashhur tabib bo`lishi bilan birga zamonasining ulug` faylasufi - donishmand ham bo`lgan. U odamlarga mehribon, kamtar odam edi. U o`z shogirdlari bilan birga "Gippokrat to`plami" nomli tibbiy

asar yozib qoldirgan. U 72 ta kitob va maqolalardan iboratdir. Gippokrat miloddan avvalgi 375 yili 85 yoshida vafot etgan. Atoqli yunon faylasuf donishmandlaridan biri Suqrot bo`lib, u miloddan avvalgi 441 yili Afinada tug`ilgan. U o`z umri davomida birorta ham kitob yozmagan. Suqrot maktablarda dars bermagan, ma`ruzalar o`qimagan, balki odam gavjum bo`lgan joylarda o`z shogirdlarini haqiqatni bilishga undagan. Suqrot haqiqatni bilish mumkin emas deb o`ylovchilarga qarama-qarshi, uni bahs- munozara orqali bilinadi deb hisoblardi. O`z qarashlarida odamlarni tenglashtirishga qarshi chiqib, ularni haqiqatni bilganlar va bilmaganlarga ajratadi. Uning bu fikrlari Afina quldorlik demokratiya tuzumining dushmani sifatida ayblanib, miloddan avvalgi 399 yilda sudga berilgan. Sud uni o`lim jazosiga hukm qilgan. Sud hukmiga muvofiq, u giyohdan tayyorlangan bir piyola zaharni ichib o`lgan. Yunonistonning ulug` olimlaridan biri Aristotel edi. U Makedoniya podsholari saroyida yashagan tabibning o`g`li bo`lib, miloddan avvalgi 384 yilda tug`ilib, 322 yilda vafot etgan. Sharq dunyosida uni "birinchi muallim" deb baholaganlar, chunki u g`oyat keng bilimga ega bo`lgan ilmiy bilimlarni alohida sohalarga bo`lib chiqqan va mustaqil fanlarga birlashtirgan. U fanlarni turkumlarga bo`lib, ularning har birini botanika, fizika, siyosat va tarix kabi nomlar bilan atagan. Aristotel o`z zamonasidagi olimlar bilan birga Yer shar shaklida bo`lib, u butun koinotning markazidir, Quyosh va yulduzlar Yer atrofida aylanadi deb hisoblagan. U Makedoniya podshosi Iskandarning ustozi ham edi. Aristotel o`z davri va keyingi davrlarning ham eng mashhur olimlaridan biri bo`lib qolgan. Qadimgi yunon adabiyotining paydo bo`lishi uzoq o`tmishga borib taqaladi. Yunonlar ajoyib afsona, rivoyat, she`r, doston, tragediya va komediyalar yaratganlar. Yunon baxshilari esa qadimgi afsona va rivoyatlarni og`zaki tarzda avloddan-avlodga yetkazganlar. "Prometey", "Gerakl", "Didal va Ikar", "Argonavtlar", "Odisseya" va "Iliada" kabi afsona va dostonlar yunon adabiyotining nodir namunalaridir.

Yunon adabiyotining mashhur asarlari qatoriga "Iliada" va "Odisseya" dostonlarini kiritish mumkin. Rivoyatlarga ko`ra bu asarlarning muallifi miloddan avvalgi VIII asrda yashagan ko`r baxshi Gomer ekan. Dostonlarda yunonlarning Kichik Osiyodagi Troya shahriga qilgan yurishlari, qahramonlarning kurashlari va boshlaridan o`tkazgan sarguzashtlari haqida hikoya qilinadi. Olimlar uzoq vaqtgacha Gomer dostonlaridagi voqealar o`ylab chiqarilgan afsonalar deb faraz qilganlar. Ular Troya shahari ham bo`lmagan deb o`ylab kelardilar. Ammo arxeolog olimlar Kichik Osiyoning shimoli-g`arbidagi yerlarda qazish ishlarini olib borar ekanlar, u yerdan yog`indan kuyib kul bo`lgan shahar xarobalarini topganlar. Bu yunonlar o`n yildan urush olib borgan Troya shaharining qoldig`i ekan. Olimlar Troya xarobalaridan uy-joylar, mudofaa devorlari, sopol buyumlarining parchalari, yashirinib qo`yilgan narsalar va odam suyaklarining qoldiqlarini topganlar. Bu "Iliada" va "Odisseya" dostonlarida tasvirlangan Troya shahri edi. Yunoniston tarixini o`rganishda yunon afsonalari, xususan Gomer dostonlari juda katta ahamiyatga ega. Shu ma`noda miloddan avvalgi XI-IX asrlar Gomer davri deb bekorga aytilmagan. Dostonlar she`riy usulda yozilgan bo`lib, tilining boyligi va ta`sirchanligi bilan ajralib turadi. Shunday qilib, Gomer dostonlari buyuk adabiy asargina bo`lib, qolmay, ajoyib tarixiy kitob hamdir. Yunonistonda adabiyot teatr bilan bog`liq suratda rivojlangan. Mualliflar tomonidan yaratilgan har bir adabiy asar teatr sahnasi orqali o`z o`quvchilariga yetib borgan. Teatr aslida yunoncha so`z bo`lib, "tomoshalar joyi" degan ma`noni bildiradi. Qadimgi yunon teatri ham san`atining bir turi bo`lib, miloddan avvalgi VI asrlarda paydo bo`lgan. Teatr yunon madaniyatining eng ajoyib hodisalardan biridir. Yunon teatri qishloq xo`jaligi homiysi bo`lgan xudo Dionis sharafiga o`tkaziladigan bayramlar vaqtida ijro etiladigan xalq qo`shiqlari va o`yinlari asosida vujudga kelgan.

Dionis bayramlari, toklar barg chiqargan bahorgi ko`klamgi Dionisi va uzum pishgan kuzda - kuzgi Dionisi bayramlari o`tkazilgan. Ko`klamchi Dionisi bizning navro`z, kuzgi Dionisi esa Mehrjon bayramlarimizga to`g`ri keladi. Bayram vaqtida odamlar Dionis haqidagi afsonalarni ashula qilib aytib, afsonalardan olingan manbalarni u yoki bu qiyofaga kirib ijro etganlar. Namoyish ishtirokchilari qiziq-qiziq gaplar aytib, odamlarni kuldirar, ayrim odamlarni masxara qilib ko`rsatishar edilar. Tomoshani ko`proq odamlar ko`ra olishlari uchun tepalik pastida ko`rsatilgan. Afina va Yunonistonning boshqa shaharlaridagi akropol-qal`a tepaligi pastida tomoshalar ko`rsatilgan. Tomoshabinlar tepalik yon bag`rida o`tirganlar. Aktyorlar pastdagi chodir ichida kiyinib, uning yonida tomoshalar ko`rsatganlar. Bu joy sahna bo`lgan. Keyinchalik chodir o`rniga kichikroq bino qurilib, tomosha ko`rsatish paytida unga dekorasiya - har xil bezaklar osib qo`yilgan. Uning oldida tomosha ko`rsatiladigan joy ham qurilgan. Bu o`rindiqlar avval yog`ochdan, keyin esa toshdan yasalgan. Shu tariqa yunon teatrlari vujudga kelgan. Keyinchalik qurilgan yunon teatrlariga 17-25 ming tomoshabin joylashib, tomosha ko`rgan. Qadimgi yunon rivoyatlari va afsonalari teatr uchun juda boy ma`lumot bergan. Ana shu afsona va rivoyatlar asosida qadimgi yunon adiblari ajoyib tragediyalar yaratganlar. Hozir tragediya deyilganda oxiri fojea bilan tugaydigan pyesa tushuniladi. Ammo yunonchada bu so`z "echkilar qo`shig`i" degan ma`noni beradi. Tragediyada qatnashuvchilar afsonalardagi qahramonlar bo`lib, asarda ular o`rtasidagi kurash, ularning ko`rsatgan qahramonliklari, azob-uqubatlari va fojeali o`limlari tasvirlanadi. Miloddan avvalgi VI-IV asrlarda Yunonistonda Esxil, Sofokl, Yevripid kabi juda mashhur shoirlar yashab ijod etganlar. Ularning har biri o`lmas tragediyalar yozib qoldirganlar. Ulardan eng mashhuri Esxil bo`lib, u miloddan avvalgi 525-456 yillar orasida yashagan. U 90 dan ortiq tragediya yozgan. Uning eng mashhur tragediyalari "Zanjirband Prometey" va "Forslar" dir. Esxilni "tragediya otasi" deb ataganlar. Uning "Zanjirband Prometey" tragediyasi boshqa asarlaridan ajralib turadi.

Yana bir ulug` tragediya shoirlaridan biri afinalik Sofokl bo`lib, u miloddan avvalgi 496-406 yillarda yashab ijod etgan. Sofokl ham Esxil kabi 120 dan ko`proq tragediya yozgan. Ammo ulardan yettitasigina bizgacha yetib kelgan. Ular orasida eng mashhuri "Shoh Edip" va "Antigona" tragediyalaridir. "Shoh Edip" tragediyasida shoh Edipning o`z otasini o`ldirib, o`z onasiga uylanishdek og`ir jinoyati tasvirlangan. Sofoklning "Antigona" tragediyasi ham Yunonistonda shuhrat qozongan. Bu asar ilk bor Afina teatrida namoyish etilgan. Qadimgi yunon teatrlarida hazil, kulgi, mutoiba ruhida yozilgan pyesalar ham qo`yilgan. Komediya so`zining ma`nosi "xushchaqchaq dehqonlarning qo`shiqlari" demakdir. Qadimgi yunon komediyasining yirik namoyondasi Aristofan bo`lib, u miloddan avvalgi 450-388 yillarda yashab ijod etgan. U "Tinchlik", "Ayollar xalq yig`inida" va "Suvoriylar" degan mashhur komediyalar yozib, o`z davridagi juda ko`p voqealarni tasvirlaydi. Aristofan o`z komediyalarida Peloponnes urushidan azob chekkan qishloq aholisining mashaqqatli turmushini ham aks ettirgan. Uning komediyalarda xudolar va o`sha zamon odamlari orasidagi ko`p illatlar fosh etilgan. Aristofan komediyalari o`zining o`tkir hajv etishi va zaharxandaliklari bilan ajralib turadi. Qadimgi yunonlarda me`morchilik, haykaltaroshlik va rassomchilikning kelib chiqishi Krit-Miken davriga borib taqaladi. San`atning bu turlari asta-sekin rivojlana borib, miloddan avvalgi V asrda o`zining yuqori pog`onasiga ko`tariladi. Me`morchilik yunon madaniyatining tarkibiy qismi bo`lgan. Yunonlar ibodatxona, teatr, saroy va majlis binolariga alohida e`tibor berganlar. Dastlab bu binolar yog`ochdan oddiy doriy uslubida qurilgan. Imoratning ustunlari tagkursiga emas, balki yerga o`rnatilgan. Keyinchalik binolarga toshdan, xususan marmar toshlardan qilingan ustunlar ishlatilgan. Bunday ustunlar kuchli erkak kishining yo`g`on gavdasiga qiyoslangan. Ba`zi binolarning ustunlari nozik, xushbichim bo`lib, yuqori qismi qo`chqorning gajak, qayrilma shoxlariga o`xshagan. Ularga nafis naqshlar berilgan. Bunday ustunlar ioniya uslubidagi ustunlar deyilgan. Ularni xushbichim ayol gavdasiga qiyoslaganlar.

Yunonlar ibodatxona, agora, gimnaziya, teatr va boshqa jamoat binolariga ham alohida e`tibor berganlar. Ibodatxonalarda davlat boyligi-xazinasi saqlanib, shahar aholisining bayram tantanalari shu yerda o`tkazilgan. Afrikadagi Parfenon, Zevs ibodatxonalari, Afina akropoli va boshqa binolar jahon me`morchiligining eng noyob yodgorliklaridan hisoblanadi. San`at turvlaridan biri bo`lgan haykaltaroshlik ham miloddan avvalgi V-IV asrlarda ravnaq topdi. Haykallar dastlab yog`ochdan, keyin esa jez va marmar toshdan yasalgan. Yunon ustalari Zevs, And, Afina, Appalon, Dionis, Artemida, Germes, Gefest kabi xudo va ma`budalarning haykallarini, Gomer, Gerodot, Solon, Femistokl, Perikl va Demokrit kabi tarixiy shaxslarning byustlarini ham jozibali qilib ishlaganlar. Qadimgi Yunonistonda miloddan avvalgi V asrlarda Miron, Poliklet va Fidiy kabi mashhur haykaltaroshlar yashab ijod etganlar. Mironning "Disk otayotgan yigit", "Afina bilan Marsiy" degan haykallari jonli harakatli holatda ishlangan. Argoslik Polikletning "Nayzabardor" va "Diodumen" kabi haykallari ham mashhurdir. Me`mor va haykaltarosh Fidiy o`z zamonasining mashhur ustasi edi. ning Parfenondagi oltin, yog`och va fil suyaklaridan ishlangan 12,5 metrlik ma`buda – Afinaning tik turgan holatdagi haykali juda mashhurdir. Fidiy yunon xudosi Zevsning Olimpiyada taxtida o`tirgan vaziyatdagi haykalini ishlagan. Ayni paytda Fidiy asarlari bilan Parfenon ibodatxonasi bezatilgan. Haykaltarosh Praksitel esa ma`budlar va ma`budlarni yigit va yosh qiz- juvonlar qiyofasida tasvir etgan. Uning Dionis bilan o`ynab turgan Germes asari diqqatga sazovordir. Rassomchilik san`ati ham Yunonistonda juda erta vujudga kelgan. Bunga Krit-Miken davriga mansub bo`lgan odam, hayvon va turli bezaklarning rasmlari misol bo`la oladi. Qadimgi yunonlar ham narsa va hodisalardan zavqlanadigan kishilar edi. Ular xilma-xil kulolchilik buyumlari, ko`rkam, nafis va bejirim ko`zachalar va vazalar yasashda tengi yo`q ustalar edilar.

Miloddan avvalgi VII-VI asarlarda yunonlar qizg`ish rang sopol ustiga qora lak bilan turli bezaklar chizilgan idishlar ishlab chiqarganlar. Bular qora gulli ko`za va vazalar bo`lib, ular Yunoniston va undan tashqarida ham mashhur bo`lgan. Ammo miloddan avvalgi V asrga kelib ko`za va vazalar qora rangga bo`yalgan. Bezak va shakllar uchun sopolning tabiiy qizil rangi saqlanib qolingan. Bunday vaza va ko`zalar qizil gulli ko`zalar deb nom olgan. Din ijtimoiy ong shakllaridan biri bo`lib, e`tiqod, ishonch degan ma`nolarni bildiradi. Uning kelib chiqishi kishilikning uzoq o`tmishiga borib taqaladi. Dastlab yunonlarda ibtidoiy din shakllari - totemizm, animizm va fetishizm kuchli bo`lgan. Ibtidoiy jamoadan tabaqaviy jamiyatga o`tish davrida yunonlarning diniy tasavvurlari o`zgara borgan. Yunon dunyosida har bir narsa, hodisa va kasb- korning o`z xudolari-homiylari, ya`ni ma`bud va ma`budalari bor deb o`ylaganlar. Bu ko`p xudolikning ko`rinishlaridan biri edi. Afsonalarda juda ko`p yunon xudolarining nomlari tilga olingan. Yunonlarning eng mashhur xudolari Zevs, Poseydan, Aid, Appolon, Artemida, Afina, Germes, Gefest, Dionis, Afrodita va boshqalardir. Yunonlar har bir narsaning o`z xudosi va homiylari bor, deb hisoblaganlar. Ular tabiatning hamma yerida yashab, uni boshqarib turar ekanlar. Yunonlar o`z xudolarini o`lmaydigan, kuchli kelishgan va juda chiroyli odamlar qiyofasida tasavvur etganlar.

Adabiyotlar: 1. Геродот "История". М-Л. , 1972 2. Соболевский С. И. Аристофан и его время. , М. , 1957. 3. История древней Греции. Под. ред. В. И. Кузищина. М., 1986. 4. Античная Греция. Т.1-2. М, 1983. 5. Кун Н. А. Легенды и мифы Древней Греции. М. , 1975. 6. Нейгебауэр О. Точные науки в древности. М. , 1968. 7. Словарь античности. М. , 1989.

O'xshashlar

Yunon-Eron urushlari

Yunon Eron urushlari

Qadimgi Yunon teatri

Antik davri yunon adabiyoti

Eng qadimgi Yunon adabiyoti