Социология фанининг предмети, объекти ва ижтимоий фанлар тизимидаги ўрни - Sotsiologiya - Referatlar

Социология фанининг предмети, объекти ва ижтимоий фанлар тизимидаги ўрни

Yuklangan vaqt:

20.09.2019

Ko'chirishlar soni:

0

Hajmi:

84 KB

Ko'chirib olish

Социология фанининг предмети, объекти ва ижтимоий фанлар тизимидаги ўрни Режа: 1. С оциология мустақил ижтимоий -сиёсий фан сифатида. 2.Социологиянинг бошқа фанлар тизимида тутган ўрни. 3.Социологиянинг тарк и бий тузилиши. Социал қонунлар ва категориялар. 4.Ҳозирги даврда социология фанини ўқитишнинг зарурлиги

1. С оциология мустақил ижтимоий -сиёсий фан сифатида. Социология (лотинча sоcietas – жамият ва юнонча Lоgоs – таълимот) – сўзларидан келиб чиққан бўлиб, жамият ҳақидаги фан маъносини англатади. Яхлит тизим сифатида жамият ва алоҳида институтлар, ижтимоий гуруҳлар, жамият тузилмалари ва уларда юз берадиган ижтимоий жараёнларни ўрганади. Жамиятни тушуниш, англаш унга нисбатан сўз муносабатини билдиришга тенг бўлиб, инсониятнинг ҳамма тарихи учун хосдир. Социология ҳақидаги тушунча биринчи маротаба XIX асрнинг 30 - йилларида француз файласуфи Огюст Конт томонидан илмий қўлланишга киритилган. Унинг тушунишича, Социология жамиятга тааллуқли бўлган ҳамма нарсаларни ўз ичига олган «жамиятшунослик» билан бир қаторда турган. Социология – инсониятнинг бир неча йиллик тарихий тараққиёти давомида яратилган маданиятнинг ажралмас таркибий қисмидир. ХVIII асрда кишилик жамияти, унинг қонуниятларини ўрганувчи мустақил фан сифатида тарих фалсафа таркибида шаклланди. Ижтимоий ҳаётнинг мураккаблашувчи ва илмий билимларнинг табақаланиши Социология нинг фалсафадан ажралиб, мустақил фанга айланишини муқаррар қилиб қўйди. XIX асргача социология фалсафанинг таркибий бир қисми бўлиб келди. Аслида фалсафий билимлар доираси жуда кенг бўлиб, уларнинг таркибига қўйидагилар кирад 1) Онтология – борлиқ ҳақидаги қарашлар. 2) Социология – жамият ҳақидаги қарашлар. 3) Гносеология – борлиқни билиш муаммолари. 4) Логика – инсон тафаккури қонунлари ҳақидаги қарашлар тизимларидир. 5) Этика – ахлоқийлик ҳақидаги қарашлар. 6) Эстетика – гўзаллик ҳақидаги қарашлар. Демак, биз фалсафий билимлар доирасидан келиб чиқиб, Социология фани ва унинг ўзига хос хусусиятларини ўрганамиз.

XIX аср бошларидан эса Социология ўзига хос илмий методларга эга бўлиб, фалсафадан ажралиб чиқиш имконига эга бўла бошлади.Социал система тараққиёти ва фаолият кўрсатиш қонуниятлари ҳақидаги мустақил фан сифатида XIX асрнинг 30-йилларида илмий муомалага «Социолгия» атамаси киритилгандан сўнг шаклланди. Жамият ҳақидаги «позитив фан» (ҳақиқий фан) яратишга уриниш Х1Х аср ўрталарида юзага келди. Социологиянинг асосчиси француз мутафаккири О. Конт Социологияни жамият ҳақидаги тажрибага асосланган фан деб ҳисоблайди, Э. Дюркгейм эса социал далиллар ҳақидаги фан деб атайди. Марксизм куқтаи назаридан Социология фани ижтимоий тизим сифатида жамият ва унинг тузилмавий элементларини ташкил этган шахслар, ижтимоий бирликлар, ижтимоий институтларни илмий асосда ўрганиш ҳисобланади. Ҳозирги адабиётларда Социологияга қуйидагича таъриф берилган: Социология - яхлит ижтимоий тузум сифатида жамият ҳақидаги ва унинг айрим таркибий элементлари (шахслар, ижтимоий бирликлар, институтлар) орқали бу тузумнинг амал қилиши ва ривожланиши тўғрисидаги фандир. Объекти жамият ҳисобланса-да, Социология фанининг дастлабки босқичи сифатида жамият тушунчасини ажратиб кўрсатиш етарли эмас. Социологиянинг илмий мақомини асослаш моҳияти унинг объекти ва предмети ўртасидаги фарқдан келиб чиқади. Объектни билиш – тадқиқот объекти нимага йўналтирилганлигини, объектив воқелик сифатида унга нима қарама-қарши турганлигини англатади. Ҳар қандай воқелик, жараён ёки объектив воқеликнинг муносабати турли фанларнинг («Физика», «Химия», «Биология», «Психология», «Иқтисодиёт», Социология ва ҳоказолар) объекти бўлиши мумкин. Предмет объект каби объектив воқеликнинг бир қисми ёки унинг элементлари йиғиндиси бўлиб, умумий ёки ўзига хос хусусиятларга эга.ҳар бир фан ўз навбатида предмети нуқтаи назаридан фарқ қилади. Ижтимоий хусусиятларга эга бўлган кишилараро алоқалар, ўзаро боғлиқликлар мажмуаси – Социология фанининг объекти вазифасини ўтайди.

Объект ва предмет ҳамма вақт бир-бири билан узвий боғлиқ бўлади. Чунки, объект моҳиятни тўғри тушуниш, илмий - тадқиқот йўналишини холис белгилай олиш имконини беради. Демак, Социологиянинг объекти жамиятнинг бошқарувчи тафаккур қонуниятлари, рационал воситаларидир. Социология жамият ҳақидаги умумий фан бўлибгина қолмай, балки махсус соҳалараро фан ҳамдир. У бошқа фанлар ўрганмайдиган ўз объектига эга. Унинг ўзига хос соҳаси социал реаллик бўлиб, у инсон ва жамият муносабатининг ижтимоий-маданий муайянлигидир. Шу боисдан ҳам жамиятдаги ижтимоий алоқалар, ижтимоий ҳамкорликлар, ижтимоий муносабатлар ва уларнинг ўзаро ташкил этилиш усуллари Социологиянинг объекти бўлади. Инсонлар ўзаро алоқаларга, ҳамкорлик муносабатларига киришишлари орқалигина муайян ижтимоий хусусиятларни намоён этиш имкониятларига эга бўладилар. Социология ижтимоий муҳитни тадқиқ этганда умуммиллий тушунча ва категориялардан келиб чиқади. Хусусан, объектив ва субъектив, эркинлик ва зарурият, борлиқ ва онг каби фалсафий категориялардан фойдаланиб, социологик объект моҳиятни талқин этади. Социология социал объектни социал субъектлар орқали(шахс, гуруҳ, жамият, социал соҳалар, муносабатлар, одамларнинг социал фаолияти ва тафаккур тарзи) таҳлил қилади. Социология турли социал соҳаларни тадқиқ этиш асосида уларнинг ўзига хос ижтимоий ривожланиш тенденцияларини аниқлайди. Муайян социал гуруҳлар таҳлили ва таснифи орқали у жамият ва инсон тўғрисидаги умуий қарашлар, қонунлар ва тенденцияларни яратади, ривожланиш қонуниятларини очиб беради. Социология ўз объекти доирасида социал ҳаётнинг турли, алоҳида томонлари билан ҳам шуғулланади ва бунинг натижасида фанда интеграл соҳалар вужудга келади. Жумладан, ҳуқуқ социологияси, сиёсат социологияси, иқтисодиёт социологияси, индустриал социологиялар. Социология бу соҳаларда

ўз обьекти- инсон ва унинг сиёсий, иқтисодий ва бошқа соҳалардаги ўрни ва ривожланиши, ҳаёт тарзи ва фикрлаш услуби каби масалаларни ҳал қилади. Социология ўзининг махсус обьекти асосида якка шахс фаолияти конкрет намоён бўлишини эмпирик даражада ўрганишни ҳам ўз ичига олади. О.Конт фикрича, объект ва предмет қарама-қаршиликлардан иборат. Социология ижтимоий ҳаёт жараёнларини 3 босқичда ўрганади: 1. Аниқ- эмпирик; 2. Хусусий (махсус); 3. Умумий. Шунга мувофиқ равишда Социология эмпирик, махсус ва умум- социологик тадқиқот жараёнларини ўз ичига олади. Социал деган тушунча, социал алоқалар ҳамда муносабатлар ва уларни ташкил этиш усуллари, Социология билиш объектининг ўзига хослигини очиб берса, социал қонуниятлар эса Социология фани предметини аниқлаш учун бошланғич нуқта ҳисобланади. Социологиянинг предмети: Агар фаннинг обьекти «Нимани ўрганиш керак?» деган саволга жавоб берса, предмети эса «Ўша объектнинг қайси жиҳатларини ўрганади?” деган саволга жавоб беради. Социология – инсонларнинг социал жамоалар ва социал жараёнларда тутган ўрни, улар ўртасидаги муносабатларни ўрганадиган фандир. Социология – айни вақтда жамият ва шахснинг иқтисодий, сиёсий, мафкуравий, маънавий ҳаётдаги фаолияти ва ижтимоий мазмунини ўрганадиган фан ҳамдир. Социология – жамият тузилишини, унинг элементлари ва уларнинг яшаш шароитларини ва шу тузумда содир бўлаётган ижтимоий жараёнларни ўрганадиган фандир. Социология – шахсга ижтимоий ҳаёт қонуниятлари орқали ижтимоий муҳитга кўникма ҳосил қилишга (адаптация) кўмаклашадиган, шулар билан бир қаторда инсонлар жамиятини ривожлантиришда социал ташкилотларнинг

инсонларга мос, энг қулай вариантини топишда ва уни амалга оширишдаги жисмоний, эмоционал-психологик ва маънавий имкониятларини ишга солади. «Чунки ҳаёт бор экан, инсон бор экан, ҳар қайси тоифа ўзининг манфаатларини қандайдир йўллар билан амалга оширишга ҳаракат қилади, бу ҳаётни қандай ташкил қилиш лозим, инсон, оила қандай шароитда тинч ва бахтли яшаши мумкин, деган масалалар атрофида фикр юритади , кер а к бўлса, қонуний йўллар билан ўз мақсадларига эришишга интилади» . 1 Социологиянинг вазифаси жамият тараққиётини таьминлайдиган энг қулай вариантларни, ижтимоий-маданий моделларни топишдан иборат. Булар жамият ва инсоннинг ўз-ўзини такомиллаштиришга қаратилган қонуниятлардир. Социологиянинг вазифаси мураккаб социал дунёни ташкил этувчи ўзаро бирикувчи ва ҳаракат қилувчи тузилма ва механизмлар моҳиятини аниқлашдан ҳамда уларнинг ривожланиш тенденцияларини белгилашдан иборат. Бугунги кунда Социология предметининг мазмун доирасида: 1. Фалсафий герменевтика – янгича тус берилаётган натурализмдан фойдаланиб, уларни янгича талқин қилиш (тенденцияси) ; 2. Гуманистик оқимни ривожлантириш тенденцияси тобора залварроқ мавқе касб эта бошлади. Шундай қилиб, Социология тарихий аниқ ижтимоий тизимлар амал қилишининг социал умумий қонун ва қонуниятлари ҳақидаги, ушбу қонун ва қонуниятларнинг шахслар, ижтимоий гуруҳлар, бирликлар, синфлар, халқлар фаолиятида номоён бўлиши ва таъсир кўрсатиш дастаги ҳақидаги фандир. Социология учун социал деган тушунча асосий ҳисобланади. « C оциал» тушунчасидан биринчи марта Карл Маркс томонидан фойдаланилган. Улар одамларнинг бир-бирига бўлган муносабати, ҳаёт тарзи шароитлари ва далилларини ва инсоннинг жамиятда тутган роли ва ҳолатини таҳлил этганларида «Социал» муносабатлар тушунчасини қўллаган. 1 И. Каримов . Бизнинг бош ма қсадимиз – жамиятни демократлаштириш ва янгилаш, мамлакатни модерниза ция ва ислоҳ этишдир. Т. « Ўзбекистон » , 2005. 12-13бетлар.

Социал у ёки бу хусусиятнинг ва социал муносабатларнинг ўзига хос йиғиндисидир.ҳар қандай социал муносабатлар тизими (иқтисодий, сиёсий ва бошқа) одамларнинг бир-бирига ва жамиятга бўлган муносабатига тааллуқли. «Социал» деган тушунчанинг ўзига хослигини ҳарактерловчи қуйидаги асосий жиҳатларни ажратиб кўрсатиш мумкин: - биринчидан, бу хусусият турли гуруҳ, индивидлар учун тааллуқли ва улар томонидан социал муносабатларнинг у ёки бу хусусиятини интеграциялаш натижаси ҳисобланади. - иккинчидан, ҳозирги социал муносабатлар (иқтисодий, сиёсий ва бошқа) билан боғланган индивидларнинг ва уларнинг гуруҳлари ўртасидаги турли муносабатларнинг мазмуни ва ҳарактерини англатади. - учинчидан, социал жиҳат турли индивид ва гуруҳ индивидларининг бир- бирига, жамиятдаги тутган ўрнига, ижтимоий ҳаёт, воқелик ва жараёнларига муносабатида номоён бўлади; - тўртинчидан, индивидлар ўртасидаги алоқа ва ўзаро таъсирнинг номоён бўлиши биргаликдаги фаолият натижаси, демакдир. Социология ижтимоий ҳаётни у ёки бу шаклда ва соҳада ўрганар экан, у аввало социал воқелик ҳақидаги билимларни шакллантириш, социал ривожланиш жараёнларини тасвирлаш, тушунтириш, ўзининг асосий методологиясини ва социологик тадқиқот методларини ишлаб чиқиш каби илмий муаммоларни ҳал этади. Социологиянинг жамият ҳаёти билан хилма-хил алоқаси, унинг ижтимоий бурчи биринчи навбатда у бажараётган функциялар билан аниқланади.ҳар қандай фанлар каби социологиянинг энг асосий функцияларидан бири назария ва амалиётнинг бирлигидир. Социологик тадқиқотларнинг кўпчилик қисми амалий муаммоларни ҳал этишга йўналтирилган. Социологиянинг амалий йўналтирилганлиги шунда номоён бўладики, у ижтимоий жараёнларнинг ривожланиш майллари ҳақидаги илмий асосланган маълумотни ишлаб чиқишга қодир. Мана шунда унинг олдиндан айтиб бериш функцияси номоён бўлади.

Жамият ҳаётида социологик тадқиқотлардан ижтимоий ҳаётнинг турли соҳаларини ривожлантиришни режалаштиришда фойдаланиш катта аҳамиятга эга. Социал режалаштириш ижтимоий тизим қандай бўлишидан қатъи назар ҳамма мамлакатларда ривожланган. Социология мафкуравий функцияни ҳам бажаради. У: - биринчидан, табиий-тарихий жараёнларни англаш, жамият тараққиётининг яқин орадаги мақсадларини ва истиқболларини ишлаб чиқишга қаратилган; - иккинчидан, илмий ва мафкуравий мунозарани бошқа қарашлар тизими орқали олиб бориш; - учинчидан, аҳоли ўртасида илмий ва миллий мафкурани тарқатиш; - тўртинчидан, малакали мутахассисларни тайёрлаш, улар томонидан илмий мафкурани ҳар томонлама ўзлаштириш имконини беради, шунингдек, одамлар ўртасида муносабатларни шакллантиришга, уйғун ҳиссиётларни ижтимоий муносабатларга хизмат қилдириб яхшилашга ҳам ёрдам бериши мумкин. Шу туфайли Социология инсонпарварлик функциясини ҳам бажаради. Социологиянинг усуллари: Социология фанининг мураккаб вазифаларини назарий ҳал этишга хизмат қиладиган ўзига хос усуллари ҳам мавжуд бўлиб, уларни қуйидагича таснифлаш мумкин. - қиёслаш ва таққослаш усули; - назарий усул (фикрлаш, абстрактликдан конкретлик сари ўтиш); - индуктив ва дедуктив усул; - изоҳлаш усули; - прогнозлаш усули (ижтимоий тўқнашувларнинг олдини олиш); - интеграция, умумлаштириш усули. Социология нинг конкрет тадқиқотлар ўтказишда қўлланадиган эмпирик - амалий усуллари ҳам бор. Улар қуйидагилардан иборат: - эксперимент усули; - кузатиш усули;

- ҳужжатлар асосида ўрганиш усули; - сўров усули; - эмпирик-социологик усул (сўров, анкета, математик модель); - математик усул; - статистик умумлаштириш усули; - умуммантиқий усул (анализ, синтез, абстрактлаш, умумийли ва ҳоказо). Социология фанида қуйидаги методологик масалаларига ҳам жиддий эътибор берилади: 1. функционал методология (жамиятдаги ҳодисаларнинг аҳамиятини аниқлашга интилади); 2. феноменологик методология (жамият аъзоларининг мавқеи); 3. таснифлаш методологияси (бунга қўлланишига кўра, классификация, гуруҳлаш, таққослаш, турлаш, системалаштириш киради). Шунингдек, Социология фани муайян ижтимоий муносабатларни тадқиқ этиш асносида умумий, махсус ҳамда эмпирик методология тамойилларига ҳам таяниб иш тутади. Социология объектини турлича тушуниш натижасида методологиянинг 3 асосий тури шаклланган: 1. Тушинтирувчи (умумий қонуниятларнинг, объект хислатини белгилайди, алоқа, муносабат ўрнатишни назарда тутади); 2. Таърифловчи (яъни, тавсифлаш, классификациялаш, гуруҳлаш, таққослаш, турлаш, системалаштириш); 3. Тушунувчи (яъни, инсон фаолиятини ўрганишда табиий ҳамда ижтимоий фанлар қонуниятларидан уйғунлаштириб фойдаланишни тақозо этувчи) методология. 2.Социологиянинг бошқа фанлар тизимида тутган ўрни. Ижтимоий ва гуманитар фанлар тизимида «Сциология» алоҳида ўринни эгаллайди. Бу бир нечта ҳолатлар билан белгиланади. Чунончи у:

1. жамият ҳақидаги, унинг ҳодисалари ва жараёнлари ҳақидаги фан ҳисобланади; 2. ўз ичига умумий социологик назарияларни ёки ҳамма ижтимоий- гуманитар фанларнинг назария ва методологияси ҳисобланган жамият назариясини; 3. жамият ва инсон ҳаётий фаолиятининг турли томонларини ўрганувчи ижтимоий-гуманитар ва социал соҳани ўз ичига олиб, ҳаётнинг у ёки бу соҳасини тадқиқ этувчи қонуниятлар мажмуидан ташкил топади; 4. инсон ва унинг фаолияти, техник ва услубий жиҳатдан ишлаб чиқилган социологик тадқиқотлар, гуманитар ва ижтимоий фанлар томонидан заруратга кўра ўрганилади ва ҳисобга олинади. «Фалсафа», «Иқтисодиёт», «Тарих», «Сиёсатшунослик», «Психология» фанлари Социология нинг шаклланишига самарали таъсир кўрсатади. Социологиянинг фалсафа билан узвий алоқаси шунда кўринадики, умумсоциологик назариялар ва амалий социологик тадқиқотлар маълум методологик асосга таянадилар. Шундай асосни эса «Фалсафа» фани яратади. Социология «Фалсафа»га нисбатан мустақилликни шунга асосланиб эълон қилади-ки, у ўз олдига ижтимоий муаммоларни, воқеликни илмий, англаш усули асосида ҳал этиш вазифасини қўяди. Социология «Статистика» фани билан ҳам мустаҳкам алоқада ривожланади. Бу икки фаннинг ўзаро алоқалари шу қадар яқинки, Социология нинг ривожланишини статистик ёндашувларсиз тасаввур қилиш қийин. Социология шунингдек, «Иқтисодий назария», «Бошқарув назарияси», «Тарих», «Педагогика», «Ҳуқуқшунослик», «Сиёсатшунослик» каби фанлар билан ҳам мустаҳкам алоқада ривожланади. 3.Социологиянинг тарк и бий тузилиши. Социал қонунлар ва категориялар. Қонун деганда, одатда, аниқ вазиятда умумий, зарурий ва такрорланишга хос бўлган жиддий алоқа ёки муносабатлар тушунилади.

Социал қонуният – социал воқелик ва жараёнларнинг жиддий зарурий алоқасини акс эттиради. Социал қонунлар муносабатларни акс эттиради. Бу халқлар, миллатлар, синфлар, социал-касб-корлик гуруҳлари, шаҳар ва қишлоқ, шунингдек, жамият ва оила, жамият билан шахс ўртасидаги муносабатларни белгилайди. Социал қонунларга асосланган ҳолда одамлар, ўз ҳаётий фаолиятлари учун зарурий бўлган шароит таъсири остида уни қўллайдилар. Табиат қонунлари каби социал қонунлар воқеаларнинг табиий ҳаракати давомида пайдо бўлади. Улар кўпчилик индивидларнинг ижтимоий вазиятда ва объектив алоқаларда мақсадга мувофиқ таъсир кўрсатиши натижаси ҳисобланади, яъни одамлар яшайдилар, моддий ва маънавий неъматларни яратишда қатнашадилар; маҳсулотни айирбошлайдилар, тақсимлайдилар ва истеъмол қиладилар, болаларни дунёга келтирадилар ва тарбиялайдилар, уларнинг иродаси ва онги билан боғлиқ бўлмаган ҳолда қонуний воқеалар занжири юзага келади. Социал қонун ва қонуниятларни тадқиқ этиш, демак, социал соҳа турли элементлари ўртасидаги зарурий алоқаларни ўрнатишдир. Социологик қонунлар социал системанинг турли босқичларида намоён бўлувчи турли хил социал бирликлар, ташкилотлар ва институтларга бирлашган одамлар ўртасидаги муҳим, такрорланиб турувчи ўзига хос алоқалардир. Социологик қонунлар 2 турга бўлинади: умумий ва хусусий қонунлар. 1. Умумий социологик қонунлар: а) барча социал системаларнинг ривожланиши давомида амал қилади; б) социал тизимларнинг социал муҳитда амал қилувчи бошқа қонунлари моҳиятини аниқлаб бериб, фундаментал асосларини акс эттиради. Социал муносабатларнинг ишлаб чиқариш усулларига тобелигини ифодаловчиси ҳам умумсоциологик қонунлардир. Социал муносабатларнинг ишлаб чиқариш - иқтисодий муносабатларига нисбатан фаол роли ҳам муҳим социал қонуниятдир. Масалан, социал бирликларда одамлар муносабатларининг яхлитланиши, жамоада шунга мос

муҳитнинг яратилиши ишлаб чиқариш ривожига, умумий ҳолда жамиятга ҳам бевосита таъсир қилади. Эҳтиёж ва қизиқишларнинг социал шартланганлиги ҳам умумсоциологик қонуниятга киради. Шахс шаклланиши социал моҳиятининг роли ҳам умумсоциологик қонунлар орқали ўрганилади. Умумий қонунлар ҳамма ижтимоий тизимларда амал қилади. Масалан, қиймат қонуни ва товар - пул муносабатлари. Ўзига хос қонунларнинг амал қилиши битта ёки бир нечта социал тизимлар билан чекланган (масалан, бир жамият туридан иккинчисига ўтиш). 2. Хусусий (махсус) қонунлар. Социал тизимнинг алоҳида тузилиш соҳаларида амал қилади. Масалан, социал бирликлар ўзига хос ҳаёт ва фаолият тарзига эга: синфий, миллий, оилавий-кундалик ва бошқалар. Социал ривожланиш қонунлари объектив бўлиб, инсон онги, иродасига боғлиқ бўлмаган ҳолда амал қилади. Лекин ижтимоий ҳаётда ҳеч нарса инсонсиз амал қилмайди. Шунинг учун социал қонунлар инсон фаолияти қонунларидир. Уларнинг хатти-ҳаракатлари механизми эса - омма ва инсонларнинг, социал субъектларнинг детерминацион механизмидир. Бу жиҳатдан қараганда Социологиянинг умумий қонуниятлари: ижтимоий-сиёсий, иқтисодий ва маънавий соҳаларда амал қилади. Қонунларни уларнинг намоён бўлишига қараб динамикага оид (жўшқин) ва статикага (турғун) оид деб ажратиб ўрганиш мумкин. Динамикага оид қонунлар ижтимоий ўзгаришларнинг омиллари ва шакллари, йўналишларини белгилайди ҳамда аниқ вазиятда воқеаларнинг давомийлигини англатади. Статикага доир қонунлар динамик қонунлардан фарқ қилиб, ижтимоий воқелик боғланишини қатъий белгиламасдан, ўзгаришларнинг йўналишини акс эттиради.

Социологик тадқиқот амалиётида гуруҳларга бўлиш катта аҳамиятга эга бўлиб, унинг ёрдамида социологик қонунлар алоқа шаклларига қараб ажратилади. Социал қонунлар умумийлик даражаси нуқтаи назаридан фарқ қилади. Социал соҳани яхлит ҳолда ривожлантиришни ҳарактерловчи қонунлар мавжуд. Бу қонунлар социал соҳанинг алоҳида бўлаклари ривожланишини белгилайди (синфлар, гуруҳлар, миллатлар). Социал қонунларнинг бешта категориясини ажратиб кўрсатиш мумкин: Биринчи, ўзгармас ҳарактер касб этувчи ёки унга боғлиқ бўлган қонунлар. Уларга биноан «А» воқелик мавжуд бўлса, у ҳолда, албатта «Б» воқелик ҳам бўлиши шарт. Иккинчи, ривожланиш тенденциясини акс эттирувчи қонунлар. Бунда ижтимоий объектнинг тузилиш динамикаси бир турдаги ўзаро муносабатлардан иккинчисига ўтиши билан боғлиқ. Учинчи, социал воқелик ўртасидаги функцияга оид боғланганликни қарор топтирувчи қонунлар. Бу қонунлар у ёки бу ижтимоий тизим барқарор ҳолатда сақлаб турилишини таъминлайди. Тўртинчи, социал воқелик ўртасидаги сабабий боғланишни акс эттирувчи қонунлар. Масалан, социал интеграциянинг энг муҳим ва зарурий шарти – бу, ижтимоий ва шахсий манфаатларни оқилона бирга қўшиб олиб бориш ҳисобланади. Бешинчи, социал воқелик ўртасидаги алоқаларни ўрнатиш мумкинлигини англатувчи қонунлар. Социал қонунлар одамларнинг аниқ фаолияти давомида рўёбга чиқарилади.

Адабиётлар: 1. Каримов И.А. Баркамол авлод орзуси.-Т: “Шарқ”, 1999. 2. Каримов И.А. Озод ва обод Ватан, эркин ва фаровон ҳаёт-пировард мақсадимиз.-Тошкент: “Ўзбекистон”, 2000. 3. Каримов И.А. Миллий истиқлол мафкураси.-Т: “Ўзбекистон”, 2000. 4. Каримов И.А. “Ўзбекистон XXI асрга интилмоқда”-Т6 “Ўзбекистон”, 1999й. 5. Каримов И.А, “Ўзбекистон Миллий истиқлол ва тараққиёт йўли”-Т.: “Ўзбекистон”, 1996. 6. Каримов И.А. “Ўзбекистон ўз истиқлол ва тараққиёт йўли”-Т.: “Ўзбекистон” 1992й. 7. Каримов И.А. Бунёдкорлик йўлидан.-Т.: “Ўзбекистон”, 1996й. 8. Каримов И.А. Ўзбекистон XXI аср бўсағасида. Хавфсизликка таҳдид, барқарорлик шартлари ва тараққиёт кафолатлари.-Т.: "Ўзбекистон", 1997й.

O'xshashlar

Социология фанининг предмети, обеъкти ва ижтимоий фанлар тизимидаги урни

Социология фанининг назарий асослари

Социология фанининг шаклланиши ва тараққиёт босқичлари

Социология фанининг шаклланиши ва тараққиёт босқичлари

Социологиянинг предмети, таркибий тузилиши ва ривожланиш қонуниятлари