Empirik sotsiologik tadqiqotlarni tashkil etish va umumlashtirish - Sotsiologiya - Referatlar

Empirik sotsiologik tadqiqotlarni tashkil etish va umumlashtirish

Yuklangan vaqt:

20.09.2019

Ko'chirishlar soni:

0

Hajmi:

36.9990234375 KB

Ko'chirib olish

Empirik sotsiologik tadqiqotlarni tashkil etish va umumlashtirish Reja: 1. Sotsiologik tadqiqot dasturining nazariy asoslari. Tadqiqotning ob‘ekti va predmeti. 2. Sotsiologik tadqiqot usullari: (tanlov, xujjatlarni tahlil qilish, kuzatish, so’rov, anketa, intervyu va boshqalar). 3. Sotsiologik tadqiqotlarni tashkil etish va o’tkazish usullari. 4. Sotsiologik tadqiqot natijalarini tahlil qilish va umumlashtirish.

Sotsiologiya fanini empirik sotsiologik tadqiqot jarayonisiz tasavvur qilib bo’lmaydi. Empirik so’zi qadimgi yunoncha bo’lib, tajriba ma‘nosini anglatadi. Empirik sotsiologik tadqiqot – yagona dastur va uslubiyot bilan amaliy asosda ijtimoiy hayot hodisa va jarayonlari to’g’risida olingan. Empirik ma‘lumotlarni tahlil qilish, umumlashtirish, zarur amaliy takliflar, tavsiyalar ishlab chiqishdan iborat. Empirik sotsiologik tadqiqotda ijtimoiy faktlarni izlash, tasnif qilish, to’plash muhim ahamiyatga ega. Ijtimoiy fakt deganda, ilmiy asoslangan, muayyan vaqt davomida real ijtimoiy voqelikning alohida jihadlarini tasnif qilish orqali olingan ma‘lumotlarga aytiladi. Hozirda, bozor munosabatlariga o’tish jarayonida jamiyat hayotida ro’y berayotgan muhim o’zgarishlarni, kishilar o’rtasidagi munosabatlarni amaliy sotsiologik tadqiqotlarsiz ilmiy asosda o’rganib bo’lmaydi. Jamiyatni ilmiy boshqarish doimo amaliy sotsiologik tadqiqot natijalariga tayanmog’i zarur. Mavjud ijtimoiy muammolarni hal etib borishda, jamiyatni ijtimoiy rivojlantirishda va uni rejali prognoz berish bilan ilmiy asosda boshqarishda amaliy sotsiologik tadqiqot natijalari muhim vazifalarni bajaradi. Sotsiologik tadqiqotlarning sifat darajasini va samaradorligini oshirish uchun empirik ma‘lumotlarning ishonchli ekanligini, ilmiy asoslanganligini ta‘minlash uchun, uning metodologik asosiga alohida e‘tibor qaratilmog’i lozim. Amaliy sotsiologik tadqiqot jarayonini 4 asosiy bosqichga bo’lib ko’rsatish mumkin. Bu bosqichlarning har biri o’ziga xos xususiyatlarga va muhim jihatlarga egadir. Bular quyidagilardan iborat: I Bosqich. Sotsiologik tadqiqotni tayyorlash va tashkil qilish: Amaliy sotsiologik vazifani belgilash va tadqiqot predmetini tanlash; Sotsiologik tadqiqot o’tkazish bo’yicha buyurtma qabul qilish va uni o’tkazish bo’yicha shartnoma tuzish; Bajariladigan ishlar bo’yicha kalendar reja, texnik vazifalarni va byudjet /sarf qilinadigan harajatlar smetasini/ tuzish; Dastur ishlab chiqish; Tadqiqot uslubiyoti, texnikasi va vositalarini ishlab chiqish. II Bosqich. Asosiy bo’lib, amaliy tadqiqot ishlari olib borish jarayonini o’z ichiga oladi: Sotsiologik tadqiqot tanlovini o’tkazish; Pilotaj; Dastlabki sotsiologik ma‘lumotlarni yig’ish; Empirik ma‘lumotlarning sifat va aniqlik darajasini nazorat qilish; III Bosqich. Empirik ma‘lumotlarni qayta ishlash: Olingan empirik ma‘lumotlarni guruhlarga ajratish; Taqsimiy jadval tuzish; Empirik ma‘lumotlarni kompyuterlarga kiritish va modellashtirish; IV Bosqich. Yakunlovchi bosqich bo’lib, olingan ma‘lumotlarni tahlil qilish, umumlashtirish, ulardan ilmiy xulosalar chiqarish va amaliy takliflar, tavsiyalar ishlab chiqishni o’z ichiga oladi: Tadqiqot ma‘lumotlarining dastlabki tasnifi va nazariy jihatdan fahmlamoq;

Ilmiy nazariy xulosalar, muayyan ilmiy-amaliy takliflar, tavsiyalar va tadbirlar ishlab chiqish; Berilgan vazifa bo’yicha ilmiy matnlar, hisobotlar tayyorlash. I bosqich: amaliy tadqiqotni tayyorlash va tashkil etish bosqichi. Empirik tadqiqot maqsadini aniqlash va belgilash; Empirik tadqiqot g’oyasini ishlab chiqish; Empirik tadqiqot jarayonini tashkil etish; Analitik muolaja tayyorlash; II Bosqich. Asosiy bosqich: empirik tadqiqot va eksperiment o’tkazish; III Bosqich. Olingan empirik ma‘lumotlarni qayta ishlash va amaliy tavsiyalar ishlab chiqish. Bu bosqichda quyidagi vazifalar bajariladi: Olingan empirik tadqiqot natijalarini statistik qayta ishlash; Nazariy jihatdan qayta ishlash; Olingan natijalarni amaliyotda qo’llash. Har qanday tadqiqot biron-bir muammoning qo’yilishidan boshlanadi. Bunday muammo tashqaridan, buyurtmachi tomonidan berilishi yoki jamiyat hayotida o’zining ilmiy yechimini kutayotgan muammo bo’lishi mumkin. Shulardan kelib chiqib, sotsiologik tadqiqotlarni tashkil qilishning asosiy shakllari: 1. Davlat buyurtmasi; 2. Xo’jalik shartnomasi asosida; 3. Jamoatchilik; 4. Aralash tartibda bo’lishi mumkin. Empirik sotsiologik tadqiqot ob‘ekti bo’yicha o’tkazilgan dastlabki tahlililar asosida mavjud muammoni tadqiq qilish dasturi ishlab chiqiladi. Ilmiy dastur har qanday amaliy va nazariy sotsiologik tadqiqotning dastlabki zarur hujjati hisoblanadi. Dastur sotsiologik tadqiqot ob‘ekti bo’yicha ishchi farazni tekshirishga qaratilgan, shuningdek, tadqiqot bo’yicha ilmiy faraz, bajariladigan asosiy vazifalarni va sotsiologik tadqiqot metodologik asosining bayonidan iborat. Dastur mazmuni haqida qisqacha ma‘lumot berilishi annotatsiya deb ataladi. Har qanday empirik sotsiologik tadqiqot dasturining umumiy talablari mavjud. Bularga: 1. tadqiqotning asosiy maqsad va vazifalarini aniqlash; 2. ishchi farazni ishlab chiqish; 3. dasturni ishlab chiqish jarayonida kompyuter texnikasidan foydalanish kabilar kiradi. Sotsiologik tadqiqot dasturi ichki tuzilishi jihatidan quyidagi qismlardan iborat bo’ladi: I. Nazariy-metodologik qism: Sotsiologik muammoni ishlab chiqish, tadqiqot maqsadi va vazifasini belgilash. Tadqiqot ob‘ekti va predmetini belgilash. Asosiy tushunchalarni ishlab chiqish. Tadqiqot predmetining dastlabki taxminiy tahlili. Ishchi farazni ishlab chiqish. II. Amaliy sotsiologik tadqiqot ish jarayoni qismi: 2.1. Tadqiqotning umumiy rejasi. 2.2. Asosiy amaliy ish jarayonlari. 2.3. Tanlov ishlari

2.4. Dastlabki olingan sotsiologik ma‘lumotlarni tahlil qilish usullarining tasnifi 2.5. Tadqiqot natijalarini umumlashtirish nazarda tutilgan yo’nalishlar. III. Xulosa qismi: Tadqiqot natijalarini mazmunan tasnifi. Buyurtmachiga tadqiqot natijalarini taqdim qilish shakllari /asosiy xulosalardan iborat hisobot, amaliy takliflar, tavsiyalar va tadbirlardan iborat/. Tadqiqot maqsadi va vazifasi. Dasturning ushbu qismida sotsiologik tadqiqot buyurtmachisi va bajaruvchilar o’rtasidagi munosabat o’zaro kelishib olinadi. Tadqiqot uchun sarf qilinadigan harajatlar: moliyaviy va mehnat resurslari hisoblab chiqiladi. Sotsiologik tadqiqot maqsadi turlicha bo’lishi mumkin. Masalan, muayyan ishlab chiqarish korxonasida mehnat unumdorligini ko’tarish muammosini sotsiologik tadqiq qilish zarur bo’lsa, bunda asosiy maqsad mehnat unumdorligini pastligining birinchidan, asosiy sabablarini aniqlash, ikkinchidan, mavjud yashirin iqtisodiy imkoniyatlarni qidirib topish va uchinchidan esa mavjud shart-sharoitni o’zgartirishdan iborat bo’ladi. Tadqiqotning asosiy vazifasi esa belgilab olingan maqsadni mazmunan, uslubiy va tashkiliy jihatdan yanada oydinlashtirib olishdan iborat bo’ladi. Tadqiqot predmeti va ob‘ekti. Tadqiqot predmeti – mavjud sotsiologik muammoning asosiy masalalaridan biri hisoblanadi. Bir xil muammoli holatda yagona empirik tadqiqot ob‘ekti bo’yicha tadqiqot predmeti bo’ladigan bir necha yo’nalishlar bo’lishi mumkin. Boshqacha qilib aytganda, tadqiqot predmeti tanlanganda, mavjud muammoni yechish yo’llari bo’yicha ilmiy faraz tuziladi, shu bilan birga, sotsiologik tadqiqot o’tkazish usullari va shakllariga ta‘rif beriladi. Sotsiologik tadqiqot ob‘ekti deganda, sotsiologik tadqiqot yo’naltirilgan ijtimoiy hodisa, jarayon va tuzilmalar tushuniladi. Har qanday sotsiologik tadqiqot ob‘ekti tizimli xususiyatga, asosan, vaqt, makon, imkoniyat va miqdoriy o’lchov chegarasiga ega bo’ladi. Empirik sotsiologik tadqiqot dasturining nazariy-usulbiy darajasida ob‘ektini tanlash muhim ahamiyatga ega. Hal qilinishi zarur bo’lgan muammo xarakteri, uning dolzarbligi, tadqiqot maqsadi va vazifasi, tadqiqot ob‘ektining qanday bo’lishligini belgilaydi. Agar tadqiqot ob‘ekti unchalik katta bo’lmasa, sotsiologik jihatdan uni to’laligicha qamrab olish imkoniyati bo’lsa, bir butun holda tadqiqot ob‘ekti qilib olish mumkin. Ba‘zan esa murakkab sotsiologik tadqiqot ob‘ektini to’laligicha qamrab olish imkoniyati bo’lmaydi. Shuning uchun bunday vaziyatda tadqiqot ob‘ektining nisbatan aniq chegarasi belgilab olinishi shart. Dasturda aniq ko’rsatilishi zarur: 1/ empirik tadqiqot ob‘ekti; 2/ sotsiologik tadqiqot ob‘ektni to’laligicha qamraydimi yoki uning ayrim jihatlarini tanlab oladimi? 3/ tanlov asosida olib boriladigan sotsiologik tadqiqot asosi /ro’yhat tuzish, kartoteka, sotsiologik xarita kabilar/. Sotsiologik tadqiqot farazi. Mavjud muammo bo’yicha ilmiy faraz ishlab chiqish empirik sotsiologik tadqiqotni nazariy jihatdan tayyorlashning yakunlovchi qismi hisoblanadi. Tadqiqot farazi – o’rganilayotgan ijtimoiy hodisa tarkibi yoki

uning tarkibiy qismlari o’rtasidagi o’zaro aloqadorlik xarakteri to’g’risidagi ilmiy farazdan iborat bo’ladi. Ilmiy faraz tadqiq etilayotgan ob‘ekt to’g’risidagi mavjud ma‘lumotlarga asoslangan holda ishlab chiqiladi. Faraz – bu, tadqiqot uchun boshlang’ich nuqta bo’lib, keyingi olib boriladigan amaliy sotsiologik tadqiqotlarda ilgari suriladigan farazga bog’liq bo’ladi. Shuni ta‘kidlash lozimki, farazni ishlab chiqish – empirik ma‘lumotlarni to’plash va tahlil qilishdagi mantiqiy asosni ishlab chiqish demakdir. Agar tadqiqotchi tomonidan ilmiy faraz ishlab chiqilgan bo’lsa, empirik ma‘lumotlar va tadqiqot natijalari shu ishchi farazning to’g’ri ekanligini tekshirishga, uni tasdiqlashga yoki bekor qilishga xizmat qiladi. Empirik tadqiqot farazi bo’lmasa, unda sotsiologik tadqiqotning ilmiylik darajasi past bo’ladi. Dastur tarkibidagi amaliy qismning muhim jihati – empirik tadqiqot uslubiyoti, texnikasi, jarayoni va usullarini asoslashdan iborat. Sotsiologik tadqiqot uslubiyoti – xususiy sotsiologik usullar majmui foydalaniladi. Metod /usul/ tushunchasi keng ma‘noda bilimlar tizimini yuzaga keltirish va asoslash usuli, vositasi demakdir. Sotsiologiyada usul sifatida umumsotsiologik printsiplar ham, ijtimoiy voqelikdagi jarayonlar va hodisalarni bilishdagi xususiy printsiplar va konkret usullar – matematik-statistik usullar, sotsiologik axborotni yig’ish usullari: kuzatish, so’roqlar, eksperiment va hujjatlarni o’rganish usuli va boshqalar tushuniladi. Sotsiologik tadqiqot texnikasi – maxsus usullarining birligini anglatib, u yoki bu usuldan unumli va o’z o’rnida foydalanishni ifoda qiladi. Sotsiologik tadqiqot jarayoni – tadqiqotni tashkil etish usuli, vositasi, barcha bilish va tashkiliy faoliyatning tartib bilan borish jarayonini anglatadi. Amaliy sotsiologik tadqiqot olib borish jarayonida konkret tadqiqot usullarining ahamiyati katta. Ular yordamida dastlabki empirik ma‘lumotlar yig’ib boriladi. Ular kuzatish, so’rovlar, hujjatlarni o’rganish va eksperiment usullaridir. a) Sotsiologik tadqiqotda kuzatish usuli. Sotsiologik tadqiqotlarda kuzatish – dastlabki empirik ma‘lumotlarni yig’ish usuli bo’lib, muayyan maqsadga qaratilgan, oldindan puxta o’ylab, muntazam olib boriladigan, hissiy qabulga asoslangan bo’ladi. Bu usuldan foydalanishning o’ziga xos afzalligi shundaki, tadqiqotchi muayyan darajada tadqiqot olib borilayotgan ob‘ektidan mustaqil bo’ladi va unga bo’ysunmaydi. Kuzatish usulidan olinadigan ilmiy ma‘lumotlar ob‘ektiv, xolis va hayotiy bo’lishi bilan o’zining ilmiy qimmatiga egadir. Shu bilan birga, kuzatish usulidan olingan ilmiy ma‘lumotlarda sub‘ektiv jihatlar ham bo’lishi mumkin. Chunki, sotsiologik tadqiqot tadqiqotchining ijtimoiy voqelikka, jarayoniga nisbatan qanday munosabatda bo’lishi va qay yo’sinda tavsiflashi asosida boradi. Kuzatish usulining yana bir muhim jihati uning muayyan darajada chegaralanganligi bo’lib, ko’pincha tadqiq etilayotgan voqelikni qayta kuzatish imkoniyati bo’lmasligidadir. Bu usulning yana bir zaif jihati shundan iboratki, kuzatish orqali tadqiqotchini qiziqtirgan savolga kuzatiluvchining fikr va hukmini bilish juda qiyin. Barcha hollarda kuzatish hozircha faqat so’z bilan ifodalanadi. Ammo, ba‘zi xulqiy-ehtirosli munosabatlarni, holatlarni bir tarzda yozish va so’z orqali ifodalash qiyin bo’ladi.

Kuzatish jarayonining xarakteriga qarab uni quyidagi tiplarga ajratib ko’rsatish mumkin: nazoratli /ochiq/ va nazoratsiz /inkognito/, to’la qamrovli /standartlashtirilmagan/ va qamramaydigan / standartlashtirilgan/, dala sharoitida va laboratoriya sharoitida, ichkaridan va chetdan kuzatish. Nazoratli, ya‘ni ochiq kuzatishda kuzatilayotgan guruh oldindan ogohlantirib qo’yiladi, nazoratsiz, ya‘ni inkognito kuzatishda esa, aksincha, guruh o’zini kuzatilayotganliklarini sezmaydi. To’la qamrovli, standartlashtirilmagan kuzatishda u aniq bir harakat rejasisiz amalga oshiriladi, standartlashtirilgan, ya‘ni to’la qamramaydigan kuzatishda kuzatishda kuzatuvchi tadqiqot predmeti va jarayoniga nisbatan aniq chegaralangan programmaga asoslanadi. Dala sharoitida kuzatish ob‘ekti qilib sotsial voqelikning u yoki bu tomoni, jarayoni olinadi. Laboratoriya sharoitidagi kuzatishda esa ob‘ekt qilib ob‘ektiv voqelikki ma‘lum bir darajada moslashtirilgan model olinadi. Ichkaridan kuzatishda tadqiqotchi kuzatayotgan ob‘ektda ro’y berayotgan ijtimoiy jarayonlarda bevosita ishtirok etadi va unga bo’ysunadi, chetdan kuzatishda esa tadqiqotchi ob‘ektga nisbatan mustaqil bo’ladi va unga bo’ysunmaydi. Ichkaridan kuzatishga misol qilib Amerika sotsiologi Uilyam Uaytning «Ko’cha burchaklari jamiyati» kitobida yoritilgan /1937/ tadqiqotini olish mumkin. Avtor, Italiya emigrantlari oilalaridan chiqqan yoshlar ichida reketning vujudga kelish jarayonini o’rganish niyatida, shu muhitda uch yarim yil yashagan, ular bilan bir xil hayot kechirgan. Sotsiologik kuzatish ob‘ekti insondir, shuning uchun tadqiqot jarayonida tadqiqotchining maqsadini intuitiv holda his qiilib, o’z xulq-atvori yoki xarakatini o’zgartirishi mumkin. Natijada, olingan ma‘lumot sotsiologning talabiga javob bermaydi. Demak, sotsiologik tadqiqotlarda faqatgina kuzatish usulidan foydalanish bilan cheklanib qolmaslik kerak. Chunki, kuzatish usuli orqali olingan ma‘lumotlar, natijalar o’rganilayotgan ob‘ekt to’g’risida to’la ma‘lumot bera olmaydi. Bu usuldan ko’pincha sotsiologik tadqiqotning dastlabki bosqichlarida, ob‘ekt to’g’risida dastlabki tasavvurga ega bo’lish uchun yoki sotsiologik tadqiqotlarning boshqa usullari yordamida olingan ma‘lumotlarni, statistik hujjatlarni qo’shimcha ravishda tekshirish maqsadida foydalaniladi. b) So’rov usuli va uning turlari. Sotsiologik ma‘lumotlarni yig’ish usullaridan biri so’rov usulidir. So’rov usuli yordamida boshqa hujjatli manbalarda uchramaydigan va boshqa sotsiologik tadqiqot usullari yordamida olish mumkin bo’lmagan ma‘lumotlar, axborotlarni olish mumkin. Shuning uchun, kishilar, ijtimoiy hayot jarayonlariga bo’lgan munosabatini, fikrini sotsiologik jihatdan o’rganishda so’rov usulining ahamiyati beqiyos kattadir. Ayniqsa, hozirda, jamiyatimizning bozor munosabatlariga o’tib borish jarayonida, ijtimoiy kommunikatsiyaning roli ortib borishi bilan so’rov ususlining sotsiologik tadqiqotlar olib borishdagi o’rni va ahamiyat yanada ortmoqda.

So’rov usulidan dastlabki sotsiologik axborotlarni olish uchun foydalaniladi. So’rov o’z xarakteri bilan og’zaki yoki yozma ravishda bo’lishi mumkin. Tadqiqotchining respondent /inglizcha – so’z bo’lib, javob bermoq ma‘nosini anglatadi, ya‘ni anketa savollariga va intervyuga javob beruvchi tushuniladi/ bilan muloqotda bo’lish shakli va sharoitiga qarab so’rov yozma – anketa orqali va og’zaki – intervyu olish, yashash joyi va uyushgan auditoriyada /mehnat jamoasida, mahallada, o’quv yurtida/, sirtdan /ro’znoma orqali, pochta orqali anketa o’tkazish/ va yuzma-yuz, telefon orqali, guruhli yoki inidividual kabi ko’rinishlarda bo’lishi mumkin. Formallashtirish darajasi bilan oldindan rejalashtirilgan va erkin, bir marotaba va takror bo’lishi mumkin. Ekspert so’rovi ham sotsiologik tadqiqotlarda muhim o’rin tutmoqda. Olingan mavjud sotsiologik ma‘lumotlarni qayta tekshirishda, ularni qanchalik mos ekanligini aniqlashda ekspert so’rovi turidan foydalaniladi. So’rov usulidan quyidagi hollarda foydalanish mumkin: 1/ o’rganilayotgan muammo bo’yicha yetarli darajada ma‘lumotlar kam yoki mutlaqo bo’lmaganda; 2/ tadqiqot predmeti yoki uning ayrim jihatlarini kuzatish imkoniyati bo’lmaganda; 3/ tadqiqot ob‘ekti sifatida ehtiyoj, manfaatlar, qiziqishlar, kayfiyat, qadriyatlar, e‘tiqod, ishonch, yoqlash kabi ijtimoiy yoki individual ong elementlarini o’rganish jarayonida; 4/ so’rov usulining imkoniyat darajasini oshirish maqsadida qo’shimcha tarzda va boshqa sotsiologik tadqiqot usullari yordamida olingan empirik ma‘lumotlarni qayta tekshirish uchun; 5/ muayyan ijtimoiy muammo ustida olib borilayotgan sotsiologik tadqiqot jarayonini qanchalik to’g’ri ekanligini nazorat qilib borishda. Yuqorida ko’rsatib o’tganimizdek, sotsiologik tadqiqotlarda so’rov usulidan yozma ravishda – anketa orqali va og’zaki – intervyu olish orqali foydalaniladi. Anketa orqali so’rov o’tkazish eng keng tarqalgan so’rov turi hisoblanadi. Chunki, anketa savollari orqali respondentlardan olinadigan javoblarni umumlashtirib, guruhlashtirish bilan tadqiq etilayotgan ijtimoiy muammo to’g’risidagi jamoatchilik fikri oydinlashadi. Olingan ma‘lumotlarning qanchalik to’g’ri, ob‘ektiv va hayotiy ekanligi esa tadqiqotchilar tomonidan tuziladigan anketa savollarining qanchalik mohirona va savodli ekanligiga bog’liq bo’ladi. Anketaga kiritilgan savollar sodda, tushunarli va javob berishga qulay tuzilishi shart. Unda respondent xarakteri, yoshi, kasbi, ma‘lumot darajasi va ruhiy jihatlari hisobga olinmog’i lozim. Aks holda, anketa so’rovi o’rganilayotgan muammo to’g’risida ishonchli, ob‘ektiv ma‘lumotlar bermasligi mumkin. Anketa so’rovi orqali empirik ma‘lumotlarning aniq, hayotiy bo’lishi – anketa o’tkazish jarayonini qanchalik to’g’ri tashkil qilish bilan bog’liq. Anketa o’tkazishning asosiy komponentlari – tadqiqotchi, so’roqlov varaqasi va respondent hisoblanadi. Tadqiqotchi yoki tadqiqot o’tkazilayotgan ob‘ektning rasmiy va norasmiy vakillari, rahbarlari tomonidan respondentlarga anketani tarqatish va ularni to’ldirish vaqtida nazorat qilishga yo’l qo’yilmasligi, respondent tomonidan mustaqil, o’zgalarning maslahatisiz to’ldirilishi shart. Anketa to’ldirishda respondentning ismi-sharifi ko’rsatilmasligi kerak. Chunki, anketa varaqasiga ismi-sharifini ko’rsatish talab qilinsa, o’rganilayotgan muammo

to’g’risida salbiy yoki e‘tirozli fikr bildirishdan cho’chib, respondent o’z fikrini ochiq-oydin yozmasligi mumkin. Siyosiy, ma‘muriy taziyqlardan yuragini oldirib qo’ygan o’zbek fuqarosi buni juda yaxshi tushunadi. Boshqa jihatdan esa, ko’pchilik kishilarga xos, yuqori rahbariyatga yaxshi ko’rinish, boshlig’iga shaxsiy sodiqligini bildirib qo’yish maqsadida ham berilgan savollarga noreal, «o’ta ijobiy» javob berib, kimligini bildirib qo’yish maqsadida ismi-sharifini ataylab ko’rsatib qo’yadiganlar ham uchrab turadi. Shuningdek, anketa savollariga, tadqiqot ishiga qarshi shaxslar ham bo’lishi mumkin. Shuning uchun, respondentlar bilan juda ehtiyot bo’lib, chiroyli, do’stona muomalada bo’lish zarur. Anketa o’tkazish davomida tadqiqotchidan yumshoqlik, shirinsuxanlik talab qilinadi. Anketa o’zining tarkibiy tuzilishiga ega. Anketa so’rovi: 1/ eng avvalo, anketa savollari tizimini ishlab chiqish jarayonini o’z ichiga oladi; 2/ anketa so’rovini kim tomonidan, qanday maqsadda o’tkazilishini va respondentlarga anketa to’ldirib berishni o’z ichiga oladi; 3/ anketa pasporti ham tarkibda muhim o’rin tutib, unda respondentning ijtimoiy-demografik xarakteristikasi tushuntiriladi. Bunda respondentning yoshi, jinsi, millati, ijtimoiy kelib chiqishi va holati, ma‘lumot darajasi, kasbi, partiyaviyligi, oilaviy ahvoli kabi ma‘lumotlar aniqlanadi. Ko’pincha pasport anketaning oxirida beriladi. Ko’pchilik sotsiologlarning fikricha, agar pasport anketaning boshida berilsa, respondentni cho’chitib empirik ma‘lumotning aniq va to’g’ri, hayotiylik darajasini pasaytirib yuboradi. Asosiy savollar anketa tarkibida markaziy o’rin egallaydi. Chunki, asosiy savollarga beriladigan javoblar sotsiologik tadqiqotlarning asosiy ma‘lumotlari hisoblanadi. Anketa oxirida yakunlovchi savollar kiritiladi. O’z mohiyatiga ko’ra, yakunlovchi savollar asosiy savollarning mantiqiy davomi bo’lib, unda o’rganilayotgan muammo yuzasidan respondentning individual, qo’shimcha fikr va mulohazalari olinadi. Anketa so’nggida tadqiqot uchun ko’rsatilagn beminnat yordam evaziga samimiy minnatdorchilik bildirishni unutmaslik kerak. Anketa savollarining soni ko’payib ketmasligi kerak. Qiziqarli, respondentni zeriktirmaydigan va ixcham tuzilmog’i lozim. O’z shakliga ko’ra, anketa savollari ochiq, yopiq, yarim ochiq va yarim yopiq bo’ladi. Ochiq savollarda respondentga javoblar varianti taqdim etilmaydi, ya‘ni u qanday hohlasa shunday, erkin javob berishi mumkin bo’ladi. Yopiq savollarda esa respondent faqat «ha» yoki «yo’q» tarzida javob berishi, yoki oldindan yozib qo’yilgan javoblardan birini tanlashi lozim. Yarim ochiq yoki yarim yopiq savollarda esa respondentga taqdim etilgan javoblar variantlaridan tashqari «boshqa» deb nomlangan variant ham beriladi, ya‘ni respondent berilgan javoblardan birini tanlashi yoki o’zining javobini taqdim etishi lozim bo’ladi. Anketa o’tkazishda uning vaqti 10-45 daqiqa davom etishi kerak. Qisqa muddatda o’tkaziladigan tezkor anketa o’tkazish muddati 10-45 daqiqadan oshmasligi lozim. Anketa o’tkazishning bunday usulida respondentning uzoq mulohaza qilishiga, ikkilanishiga yo’l qo’yilmaydi. Savollar ham sodda, qisqa va

aniq qilib tuziladi. Natijada qisqa muddatda empirik sotsiologik ma‘lumotlar to’plashga erishiladi. Intervyu hozirgi kunda eng ko’p va keng tarqalgan so’rov usulidir. Intervyudan bu qadar keng ko’lamda foydalanishda radio, televidenie, kundalik matbuotning roli katta bo’lmoqda. Shuning uchun ham intervyu sotsiologiya, psixologiya, jurnalistika, statistika, etnografiya, pedagogika, boshqaruv singari fanlarda keng va muvaffaqiyatli qo’llanilmoqda. Ayniqsa, hozirda bozor munosabatlariga o’tish sharoitida kundalik hayotimizda ro’y berayotgan jiddiy o’zgarishlar to’g’risidagi ommaning ijtimoiy fikrini aniqlashda intervyu olishning salmog’i ortmoqda. So’rov usulining bu turida intervyu ikki asosiy funktsiyani bajaradi: 1/ muayyan voqea-hodisa, jarayon to’g’risida ma‘lumot yig’iladi; 2/ shu bilan birga, ob‘ektga – respondentga intervyu orqali ta‘sir ko’rsatiladi. Sotsiologik tadqiqotlarda intervyu o’ziga xos xususiyatlarga ega. Eng avvalo, shuni ko’rsatib o’tish lozimki, intervyu orqali empirik ma‘lumotlarni yig’ish shaxsning individual jihatlari bilan ro’baro kelinadi. Shu orqali respondent to’g’risida, uning tadqiq etilayotgan muammo to’g’risidagi qarashlari, fikri to’g’risida axborot olinadi. Beriladigan savollarga nisbatan respondentning ruhiy reaktsiyasi kuzatiladi va hisobga olinadi. Intervyu olishda tadqiqotchi respondent bilan yaqin, samimiy, yuksak ahloqiy muomalada bo’lishi shart. Beriladigan savollar avvaldan puxta o’ylangan, respondentning shaxsiyatiga tegmaydigan, mazmunli bo’lishi talab qilinadi. Bunday shartlar respondentning intervyu so’roviga jiddiy munosabatda bo’lib, beriladigan savollarga to’la va har tomonlama javob berishini ta‘minlaydi. Intervyu olishda o’ziga xos qiyinchiliklar ham mavjud. Bunday qiyinchiliklarga eng avvalo intervyu ko’p vaqt va moddiy sarf-harajatlar talab qilishini kiritish lozim. Har bir respondent bilan ruhiy munosabat o’rnatish zarur. Bunga esa doimo ham erishilavermaydi. O’ta injiq, alamzada, hatto tajovuzkor respondentlar ham uchrab turadi. Sotsiologik tadqiqot o’tkazish madaniyati esa intervyu yakunining doimo muvaffaqiyatli va ijobiy tugallanishini talab qiladi. Intervyu tayyorlash, uni o’tkazish va olingan natijalarni umumlashtirishning o’zi qiyin jarayon hisoblanadi. Chunki, o’rganilayotgan muammoning mohiyatini, kelib chiqish sabablarini, umumiy tendentsiyalarini va uni bartaraf qilish yo’llarini o’rganish uchun yuzlab respondentlar bilan muloqotda bo’lishga to’g’ri keladi. 1-2 intervyu olish bilan tadqiqot ob‘ekti bo’yicha ob‘ektiv asosga ega bo’lgan ilmiy tasavvur hosil qilib bo’lmaydi. Sotsiologik adabiyoyotlarga intervyu bir necha turlarga ajratib ko’rsatilgan, quyidagilar shular jumlasidandir: Erkin intervyu /standartlashtirilmagan/ – bunda respondent bilan uzoq, erkin tarzda suhbat o’tkaziladi. Respondentga avvaldan belgilangan savollarga qo’shimcha ravishda savollar bilan ham murojaat qilish mumkin. Respondentga erkin va keng tarzda fikr yuritish imkoniyati yaratiladi. Intervyuning bunday turiga hozirda televidenie orqali muntazam ravishda olib borilayotgan «Yuzma-yuz», «Tema» kabi ko’rsatuvlarni misol qilib olishimiz mumkin. Standartlashtirilgan intervyu – oldindan rejalashtirilgan, muayyan mavzuning qat‘iy belgilangan doirasidan chiqmaydigan turiga aytiladi.

Intervyuning bu turi asosan davlat rahbarlari, siyosiy arboblar, siyosatchilar, mas‘ul va ma‘muriy shaxslar – respondentlar bilan o’tkaziladi. Yarim standartlashtirilgan intervyu esa qat‘iy belgilangan savollardan tashqari respondentning yoki tadqiqot ob‘ektining norasmiy jihatlarini oydinlashtirish, ular to’g’risida qo’shimcha ma‘lumotlarga ega bo’lish maqsadida o’tkaziladi. Ayrim kasb egalari bilan, masalan, artistlar, mashhur shaxslar, tarbiyasi og’ir bolalar, jinoyatchi va boshqa shu kabi respondentlar bilan o’tkaziladigan intervyuni misol qilib olish mumkin. O’tkazish jarayoniga ko’ra intervyu: a/ ko’cha-ko’yda, b/ guruhli, v/ klinik, g/ yo’naltirilgan kabi shakllarga ega. Muloqot vositasi sifatida esa chik, yuzma- yuz, telefon orqali yoki yopiq tarzda bo’lishi mumkin. Ayrim respondentlar bilan yopiq tarzda intervyu o’tkazishga ham to’g’ri keladi. Bunda respondentning shaxsi sir tutiladi. Chunki, respondent ochiq intervyu berishdan manfaatdor bo’lmaydi. Ko’pincha, yopiq intervyu davlat ichki ishlar maxsus bo’limlari vakillar bilan, ayrim jinoyatchilar bilan, or-nomusni yo’qotib pushaymon bo’lgan shaxslar – respondentlar bilan olib boriladi. Intervyuning har qanday tipidan /kamida 50 dan ortiq respondentdan/ olingan empirik ma‘lumotlar mazmun jihatdan guruhlarga ajratilib, umumlashtiriladi. Bu esa sotsiologik tadqiqot jarayonining keyingi bosqichida amalga oshiriladi. Sotsiometriya – kichik guruhlarni tarkibiy tahlil qilish usuli. Sotsiometriya /lotincha so’z: societas – jamiyat va yunoncha so’z: metron – o’lchamoq ma‘nosini anglatib/ kichik ijtimoiy guruhlardagi shaxslararo munosabatlarni miqdoriy o’lchovlar asosida o’rganadi. Unda kishilarning o’zaro bir-birlarini xush ko’rish, yoqtirish va xush ko’rmaslik mayillari o’rganiladi. Sotsiometriya tushunchasi XIX asr oxirida matematik usulning ijtimoiy hayotga tadbiq qilishi oqibatida paydo bo’ldi. Sotsiometriyaga XX asrda frantsuz sotsiologi, faylasufi G.D.Gurvich /1894-1965/ va amerika ruhshunos olimi Ya.L.Moreno /1892-1974/ lar tomonidan asos solingan. Ular kichik ijtimoiy guruhlarda shaxslararo munosabatlarni tadqiq qilish – mikrosotsilogiyada sotsiometriyani qo’lladilar. Ayniqsa, ijtimoiy psixologiyada sotsiometriyaning ahamiyati katta bo’ldi. Ya.L.Morenoning sotsiometriya tizimi 5 asosga ega edi: Kishilarning o’zaro xush ko’rishlik va yoqtirmaslik asosidagi ehtiros quvvati. Ularni aniqlash sotsiometriyaning asosiy vazifalaridan biri hisoblanadi. Jamiyat «sotsial atomi» alohida individ emas, balki individlarning birgalikdagi munosabatidan iborat. Bu aloqadorlik jarayoni ikki darajaga ega: o’z- o’zidan yuzaga keluvchi va real – bunda ehtirosli sherik shu bosqichda o’rganiladi. Sotsial gravitatsiya qonuni. Sotsiologik qonun. Sotsiodinamik qonun. Kishilar hayot faoliyat davomida o’zaro bir-birlariga nisbatan ijobiy /simpatiya/ yoki salbiy /antipatiya/ tuyg’ularga ega bo’ladilar. Har qanday kichik ijtimoiy guruh, tashkilot va muassasaning faoliyati uning a‘zolari o’rtasidagi munosabatlar xarakteriga ko’p jihatdan bog’liqdir. Ularda ijtimoiy muhit qanchalik

musaffo bo’lsa; ijtimoiy tizim faoliyati ham shunchalik muvaffaqiyatli boradi. Aks holda, kichik guruhlar va ulardagi kishilar hayoti shunchalik qiyin va og’ir kechadi. Sotsiometriya esa shu qiyinchiliklarni, nomuvofiqlilarni bartaraf etishga xizmat qiladi. Jamiyat rivojlanishi, undagi kishilar hayoti ham butun olam tortishish qonuniga bo’ysunadi. Xuddi tabiatdagidek, jamiyatda ham kishilar o’zaro gravitatsion /o’zaro tortishishga asoslangan/ munosabatda bo’ladi. Tabiatdagidan farq qilib, jamiyat hayotida bu qonuniyat o’ziga xos xususiyatlarga egadir. Aql kuchi, bioquvvat, xarakter, temperament, mayl, ta‘b, odat, tarbiya, did, e‘tiqod va shu kabi ijtimoiy-ruhiy omillar kishilar o’rtasidagi o’zaro munosabatlarning murakkab gravitatsion asosini tashkil qiladi. Ular asosida kishilar o’zaro yaqin «tortiladilar», do’stona, samimiy bo’ladilar yoki bir-biridan uzoqlashadilar, adovatda bo’ladilar. Sotsiometriya shu jarayonlarni miqdoriy jihatdan o’rganadi. O’z navbatida miqdoriy o’lchovlar sifatiy ko’rsatkichlarni farqlashga xizmat qiladi. Ming afsuski, sobiq Sovet Ittifoqi davrida sotsiometriyaga sinfiy jihatdan yondashilib, burjua ta‘limoti sifatida rad etildi. Sotsiologiya fani bo’yicha nashr qilingan ilmiy adabiyotlarda, darsliklarda sotsiometriya o’rganilmadi. Hozirda, bozor munosabatlariga o’tish jarayonida jamiyat ijtimoiy hayotining sotsiodinamik tarzda rivojlanishini sotsiometriyada o’rganish ko’plab ijtimoiy-iqtisodiy, mafkuraviy, tarbiyaviy muammolarni yechishga xizmat qiladi. Ijtimoiy-ruhiy muhitni mo’‘tadillashtiradi. Shuning uchun ham, kishilar o’rtasidagi ijtimoiy-ruhiy munsobatlarni va tuyg’ularni o’rganish faqatgina nazariy emas, balki amaliy ahamiyat ham kasb etadi. Empirik sotsiometrik tadqiqotlar jamiyat hayotini, undagi kishilar o’rtasidagi munosabatlarni muvofiqlashtirshda muhim ilmiy qimmatga ega. v) Birlamchi ma‘lumotlar olishda hujjatlarni o’rganish. Hujjatlarni o’rganish ham sotsiologik ma‘lumotlar yig’ishda o’ziga xos o’ringa ega. Hujjatlar ma‘lumotlarni to’plash usuliga ko’ra /qo’lyozma, bosma, kinoplyonka, magnit lenta/, avtorlik tipiga ko’ra /shaxsiy va ijtimoiy/, ularni yig’ish usuliga ko’ra /jamiyatda amal qiluvchi, tashkilot, kollektiv, korxona faoliyati jarayoniga tashkiliy qism bo’lib kiruvchi hujjatlar/, yig’ilayotgan empirik materialga yaqinlik darajasiga ko’ra /mavjud holatni bevosita aks ettiruvchi birlamchi va mavjud hujjatlarga asoslanib ko’rilgan ikkilamchi hujjatlar/ klassifikatsiyalanadi. Hujjatlarni o’rganish metodlarini ikki katta guruhga ajratish mumkin: an‘anaviy va formallashtirilgan. O’z navbatida, an‘anaviy metodlar ham ikki guruhga bo’linadi: umumiy /tushunish, intuitsiya, anglab yetish/ va maxsus /manbalarga asoslanish, psixologik, yuridik metodlar/. Formallashtirilgan metodlarga kontent-analizni kiritish mumkin. Kontent-analiz /tarkibiy analiz/ metodi hujjatda ma‘lum bir asosiy tushunchalarning qanchalik ko’p ishlatilishiga asoslanib xulosa chiqarishdan tashkil topadi. Misol tariqasida ikkinchi jahon urushi yillarida amerika sotsiologi Lassuelning Leyts bilan birga olib borgan kontent- analizini olish mumkin. Ular fashistik orientatsiyaga asoslangan deb taxmin qilingan. Amerika gazetalaridan birini tadqiq qildilar. Shu gazetaning 1943 yil 3

dan 31 dekabrgacha bo’lgan davrdagi sonlarini kontent-analiz metodi bilan o’rgandilar va ularda Amerikaga qarshi va Germaniyani yoqlovchi fikrlar qo’llanish hollarini hisoblab, sanab chiqdilar. Natijada, tadqiqotchilar olgan xulosalar ijobiy ekanligi aniqlanib, bu gazetada AQSH Oliy Sudi tomonidan ta‘qiqlangan. g) Sotsiologik tadqiqotda eksperiment usuli. Sotsiologik tadqiqotlarda o’rganilayotgan ob‘ekt to’g’risida dastlabki empirik ma‘lumotlarni to’plashda tajriba o’tkazish alohida o’rin tutadi. Sobiq Sovet Ittifoqi davrida uzoq vaqt sotsial fanlarda tajriba o’tkazish /eksperiment/ usulidan foydalanish munozarali masala bo’lib keldi. Shu bilan birga, jamiyat hayoti 73 yil davomida kishilar boshiga ko’z ko’rib, quloq eshitmagan qiyinchiliklar solgan sotsial eksperimentlar ketma-ketligidan iborat bo’ladi. Ularning deyarli barchasi muvaffaqiyatsizlik bilan tugadi. Ijtimoiy hayotning murakkabligi, ong va ruhiy jarayonlarni o’lchash qiyinchiligi, katta moliyaviy harajatlar, kishilar guruhlarini unga jalb etish qiyinligi va shu kabi sabablarga ko’ra sotsial eksperiment o’tkazish va undan foydalanish darajasi pastdir. Sotsial eksperiment usulining asosiy xususiyatlariga quyidagilar kiradi: ob‘ektiv reallik tizimiga ta‘sir ko’rsatish; nisbatan ajratib olingan eksperimental omilni tadqiq qilinayotgan ob‘ektga nisbatan rejali asosda qo’llash; uning oqibatlarini rejali nazorat qilib borish; o’zgarish samaradorligini, ijobiy va salbiy jihatlarini o’lchash. Sotsiologik va sotsial-psixologik tadqiqotlar shuni ko’rsatadiki, eksperiment usulidan foydalanish ikki asosiy omilga bog’liq bo’ladi: tadqiqot ob‘ektining o’ziga xosligiga va tadqiqot qilinayotgan ijtimoiy guruh javob reaktsiyasining xarakteriga. Bu usul har qanday sotsial ob‘ektga ham qo’llanilavermaydi. Bu usuldan foydalanishda eng avvalo, tadqiq etilayotgan ob‘ektning eksperiment o’tkazish mumkin deb topilsa, uni o’tkazish chegarasi aniq belgilanmog’i lozim. Eksperiment sotsial ob‘ekt /tizim/ funktsional munosabatlarini buzmasligi, izdan chiqarmasligi kerak. Sobiq Sovet Ittifoqi davrida olib borilgan global sotsial eksperimentlar ijtimoiy tizim rivojlanish qonuniyatlarini qo’pol ravishda buzilganligi, sun‘iy, hayotiy bo’lmagan, hayoliy tarzda olib borilganligi oqibatida ham muvaffaqiyatsizlik bilan yakunlandi. Yaqin o’tmishdagi M.Gorbachevning jamiyat hayotini «qayta qurish» kabi aniq ichki qurilishga ega bo’lmagan hayoliy sotsial eksperimental urinishni fikrimizga misol sifatida keltirishimiz mumkin. Sotsial eksperimentlar o’z vazifasi mazmuni, yakuniy natijasi bilan o’zaro farq qilsada, barchasiga xos ichki tuzilishga ega. Uning ichki unsurlariga eksperiment o’tkazuvchi /tadqiqotchi, olimlar guruhi, ilmiy laboratoriya/, yaratiladigan shart-sharoit tizimi – eksperimental omil, eksperimental holat va ekspeniment natijalari kiradi. Sotsiologiyada eksperiment asosan 3 tipida olib boriladi: Ekspost-fakto eksperiment. Bunda eksperiment o’tmishdan hozirgacha bo’gan ijtimoiy tadqiqot ob‘ekti qilib olinganda o’tkaziladi. Taqqoslash tamoyiliga asoslangan eksperiment. Bu tipda hozirgi davr ijtimoiy jarayonlari tadqiqot ob‘ekti qlib olingan bo’ladi.

Proektli eksperiment. U hozirdan kelajakka yo’naltirilgan bo’ladi. Bulardan tashqari, sotsial eksperimentlar: tadqiqot xususiyatiga qarab /fan sohasidagi, ijtimoiy jarayonlarini boshqarishdagi eksperimentlar/; sotsial eksperimentning tarkibining xarakteriga ko’ra; dala va laboratoriya sharoitidagi; mantiqiy tarkibiga ko’ra /parallel va davomiy tarzda/ tiplarga bo’linadi. Sotsial eksperiment o’tkazish muayyan bosqichlaridan iboratdir: Birinchi bosqich – nazariy bosqich bo’lib, unda o’tkaziladigan eksperiment tipi belgilanadi va nazariy jihatdan asoslanadi. Mavjud imkoniyatlar eksperiment omillar va tadqiqot ob‘ektining o’ziga xos jihatlari hisobga olinadi. Ikkinchi bosqich – eksperiment dasturida ko’rsatilgan asosiy vazifalar va metodikasi ishlab chiqiladi. Uchinchi bosqich – eksperiment dasturida ko’rsatilgan asosiy vazifalar aniq vositalar orqali ob‘ektga tadbiq qilinadi. To’rtinchi bosqich – so’nggi bosqich bo’lib, unda eksperimentdan olingan natijalar ilmiy tahlil qilinadi va baholanadi. Tarixiy tajriba shuni ko’rsatadiki, jamiyat hayotining umumsotsiologik muammolari ustida olib boriladigan sotsial eksperimentlar kutilgan natijalarni bermaydi. Bunda faqat ijtimoiy munosabatalarning funktsional va rivojlanish qonuniyatlariga putur yetkaziladi, xolos. Kishilar boshiga og’ir kulfatlar solib, bartaraf qilinishi qiyin oqibatlarga olib kelishi mumkin. Jamiyat hayotining maxsus sohalari doirasida, mirkosotsiologik ob‘ektlar ustida sotsial eksperimentlardan foydalanish maqsadga muvofiqdir. Chunki, nisbatan kichik doirada, sotsial ob‘ektda o’tkazilgan eksperiment natijalari aniq muddat ichida o’z natijalarini ko’rsatishi mumkin va uning oqibatlari /agar salbiy jihatlarga ega bo’lsa/ ijtimoiy hayotning boshqa sohalariga yoyilib ketmaydi. Bu natijalar eksperiment o’tkazilgan tadqiqot ob‘ektigagina tegishli bo’ladi. O’tkazilgan eksperimentning ijobiy natijalarini esa hayotning boshqa sohalariga yoyish, tadbiq qilish mumkin bo’ladi. Empirik sotsiologik tadqiqotning yakuniy bosqichida sotsiologik ma‘lumotlarni qayta ishlash, tahlil qilish, izohlash, umumlashtirish, xulosa yasash va amaliy tavsiyalar ishlab chiqish kabi vazifalar bajariladi. Empirik ma‘lumotlarni qayta ishlash sotsiologik tadqiqot natijalarining amaliy ahamiyatini oshirishda muhim rol o’ynaydi va quyidagilarni o’z ichiga oladi: Empirik ma‘lumotlarni qayta ishlash va kodlashtirish. Bunda asosiy vazifa empirik ma‘lumotlar, hujjatlar bir xil shaklga keltiriladi. Rasmiy tarzda ishlab chiqiladi va belgilangan shartlar asosida tartibga keltiriladi. Olingan ma‘lumotlarni tadqiqot vazifasiga mos holga keltirish, ya‘ni olingan empirik ma‘lumotlardan tadqiqot maqsadiga qanchalik erishilganligi va oldinga qo’yilgan vazifa qay darajada hal qilinganligi aniqlanadi. Statistik tahlil. Sotsiologik ma‘lumotlarni tahlil qilish jarayonida statistik tahlil muhim ahamiyatga ega. Statistik tahlil orqali ba‘‘zi ijtimoiy statistik qonuniyatlar va funktsional munosabatlar oydinlashadi. Bu esa, o’z navbatida, tadqiq etilayotgan muammo bo’yicha olingan bilimlarni umumlashtirish va ulardan ilmiy xulosalar chiqarishga asos bo’lib xizmat qiladi.

Empirik tadqiqot usullari yordamida olingan ma‘lumotlarni qayta ishlash va tahlil qilishda tartiblashtirish, shkallalashtirish, munosabatdorlik kabi usullardan ham keng foydalanish mumkin. Tartiblashtirish – bu tadqiq qilinayotgan ob‘ektlarning o’zaro nisbiy ahamiyatini tartibli asosda aniqlashni bildiradi. Darajalash – o’rganilayotgan ob‘ektni boshqa obe‘ktlarga nisbatan xususiy jihatlariga qarab sifat va miqdoriy darajasini aniqlash demakdir. Darajalash ekspert baholashning boshqa usullari bilan yanada to’ldirilishi mumkin. Empirik ma‘lumotlarni umumlashtirish jarayonida asosiy e‘tibor tadqiqot ob‘ektining faqat ijobiy tomonlarigagina emas, ko’proq yechimini kutayotgan muammolarga qaratilmog’i lozim. Bu bosqichda tadqiqot farazi olingan miqdoriy ko’rsatkichlar asosida tekshiriladi. Ma‘lumki, ishchi faraz – muayyan ijtimoiy ob‘ekt to’g’risidagi taxminiy faraz, xolos. Sotsiologik tadqiqot natijalarining tahlili esa, shu ishchi farazning to’g’ri yoki noto’g’riligini tasdiqlaydi. Ishchi farazning qanchalik haqqoniyligini tekshirishning samarali vositasi – ijtimoiy amaliyot, kishilarning amaliy, xayotiy faoliyati hisoblanadi. Sotsiologik tadqiqot empirik ma‘lumotlarni nazariy jihatdan umumlashtirish, muayyan xulosalar ishlab chiqish, amaliy tavsiyalar ishlab chiqish bilan yakunlanadi. Sotsiologik tadqiqot natijalarining ilmiy tahlili va ularni umumlashtirish ilmiy hisobot tarzida tuziladi. Ilmiy hisobot guruhlashtirilgan va tizimlashtirilgan holda tuzilib, kelgusida o’tkaziladigan tadqiqotlar uchun asos bo’lib xizmat qiladi. Ilmiy hisobot tarkibi asosan ikki qismdan iborat bo’lib, nazariy va amaliy bo’limlarni tashkil qiladi. Sotsiologik tadqiqotning ilmiy hisobotida quyidagi asosiy talablarga e‘tibor berilmog’i lozim. 1. Ilmiy hisobotda tadqiqot predmetiga muvofiq muammoning barcha o’zaro bog’liq jihatlari chuqur aks etishi zarur. Bunda, sotsiologik muammoning asosiy mohiyatli jihati aniq ko’rsatilmog’i kerak. Bajarilgan ishlar esa mantiqiy tartib asosida yozilib chiqiladi. 2. Ilmiy hisobotning har bir bobi ikki qismdan iborat qilib tuzilmog’i maqsadga muvofiq. Birinchi qism muammo va tadqiqot natijalarini o’z ichiga olmog’i, ikkinchi qism esa – ilmiy xulosalarni, amaliy taklif va tavsiyalarni tashkil etmog’i kerak. 3. Ilmiy hisobotda anketa savollari umumlashtirilgan holda ixcham qilib ifodalanadi. Hisobot aniq, hayotiy, hujjatli va statistik ma‘lumotlar asosida tasdiqlangan bo’lishi talab etiladi. 4. Ilmiy hisobot ixcham va to’g’ri yozilishi zarur. Ko’pi bilan 30-40 betdan oshmasligi zarur, jadvallar, diagrammalar ilova tarzida ham berilishi mumkin. Sotsiologik tadqiqot natijalarini ilmiy va yuksak saviyada tahlil qilish, ulardan ijtimoiy boshqaruv amaliyotida unumli foydalanish imkonini beradi. Empirik ma‘lumotlarni tahlil qilish va umumlashtirish jarayonidayoq o’rganilayotgan ob‘ektning muhim jihatlari ko’rina boshlaydi. Bu jihatlarni nazarda tutgan holda ilmiy takliflar, tavsiyalar va tadbirlar ishlab chiqish, sotsiologik tadqiqot natijalaridan amaliyotda foydalanish uchun asosiy vosita bo’lib xizmat qiladi.

Sotsiologik tadqiqot natijalaridan amaliyotda foydalanish bosqichi – ikkiyoqlama jarayon bo’lib, unda olimlar, ilmiy xodimlar ham amaliyotchilar ham faol ishtirok etadi. Ba‘zi sotsiologlar fanning asosiy vazifasi aniq ma‘lumotlar yig’ib, zarur xulosalar va o’rganilayotgan ijtimoiy muammo xususida zarur takliflar va tadbirlarni ishlab chiqishdan iborat, ularni hayotga, amaliyotga tadbiq qilish esa jamoat tashkilotlari, ma‘muriyatning ishi deb hisoblaydilar. Bunday qarash ilmiy ma‘lumotlar va ularni boshqaruvdagi yechimi o’rtasida uzilishga olib keladi. Bizningcha, har ikki bosqich yagona ilmiy-amaliy dastur asosida bo’lmog’i maqsadga muvofiq. Sotsiologik tadqiqot natijalarini amaliyotga tadbiq etishning turli shakllari va usullari mavjud: Uning muhim shakllaridan biri, olib borilgan tadqiqot natijalarini mavjud rahbariyat pog’onasi /ma‘muriyat, kasaba uyushmasi, bo’linma va boshqalar/ va tadqiqot guruhlari /masalan, ishchi brigadasi, talabalar guruhi kabilar/ oldida himoya qilish. Yana bir shakli, tadqiqot natijalarini kitob shaklida, uslubiy qo’llanma, maqolalar to’plamida va matbuotda nashr etish. Sotsiologik tadqiqot natijalari bo’yicha olimlarning radio va televidenieda chiqishlari ham o’ziga xos amaliy ahamiyat kasb etadi. Ilmiy-amaliy anjumanlar, seminarlar, simpoziumlar tashkil etish va o’tkazish kabi shakllari ham muhim ahamiyatga ega. Sotsiologik tadqiqot natijalaridan amaliy foydalanishda sotsial- psixologik markazlar faoliyatining ahamiyati katta. Afsuski, bunday markazlar bizning respublikamizda juda kam. Har bir viloyat, shahar va tuman hokimliklari qoshida shunday markazlar tashkil qilinsa, jamiyatimiz infrastrukturasidagi mavjud muammolarning hal qilib borilishida jiddiy o’zgarishlar yuz berishi aniq. Hozirda amaliy sotsiologiyaning muvaffaqiyatli rivojlanishi aniq amaliy vazifalarni, mavjud ijtimoiy muammolarni yechish bilan bog’liq. Ammo, shuni ko’rsatib o’tish joizki, hozirgacha bizda bunga yetarlicha e‘tibor berilmayapti. Sotsiologiya fanining jamiyatimiz hayotidagi ijtimoiy-amaliy roli juda past darajada. AQSH va Ovrupo mamlakatlarida keng rivojlangan «ijtimoiy muhandislik» kontseptsiyasini birinchi bor ishlab chiqqan ingliz faylasufi va sotsiologi Karl Popler fikricha, «ijitmoiy muhandislik» inson faoliyati va jamiyat hayotini oqilona asosda ta‘mirlash demakdir. Ijtimoiy hayot muammolari «muhandislik» faoliyatining natijasidagina to’g’ri hal qilinishi mumkin. «Ijtimoiy muhandislik»ning asosiy vazifasi ham shundan iboratdir. Bozor iqtisodiyotiga avvalroq o’tgan industrial rivojlangan davlatlarda inson omiliga katta e‘tibor beriladi. Davlat, tadbirkorlar va aholining keng qatlami insonga ajratiladigan investitsiya kapitalining eng ko’p foyda va samara berish yo’lidir. Buni AQSH, Kanada, Buyuk Britaniya, Germaniya, Singapur, Yaponiya, Tayvanda o’tkazilgan ko’pgina sotsiologik tadqiqotlar tasdiqlaydi.

Bu tadqiqotlarda avvalo insonga ajratiladigan investitsiyalarning iqtisodiy samarasiga ko’proq e‘tibor beriladi, chunki inson omili nafaqat iqtisodiy, balki siyosiy, madaniy, umumbashariy ahamiyatga egadir. Zamon talablarida inson biosferaviy jarayonlarda qatnashib, koinot qa‘riga tobora chuqurroq kirib borib, koinot masshtabidagi omilga aylanadi. Inson kelajakka, nafaqat o’ziga, balki butun Yerdagi hayot uchun javobgardir. Shuning uchun, inson tabiatini, ma‘naviyatini, hayotiy qiymatini o’zgarishida sayyoramizning keyingi evolyutsion hayotiga ta‘siri bor. Inson barcha iqtisodiy, siyosiy, ijtimoiy, biosferik jarayonlarning boshida turadi. U moddiy va intelektual xizmatlarning bajaruvchisi va iste‘molchisidir. Inson ta‘siri sifati va miqdorining o’sishi, uning talabini, hayot darajasini, ma‘naviyati, ijtimoiy va huquqiy o’rni, dinamika va ijtimoiy jarayonlarni fundamental tadqiq etish inson fenomeniga diqqatning adekvat o’sishini talab qiladi. Inson ma‘naviyatining shakllanishi va rivojlanishi bazisi – bu bilish, shuning uchun jamiyat intelektual potentsialini takomillashtiruvchi bilim maskanlarini rivojlantirish zamonning dolzarb masalasi hisoblanadi. Hozirgi bozor iqtisodiyotda insonning bilimi va qobiliyati raqobatbardoshlikning, iqtisodiy o’sishning, mehnat unumdorligining va samarali boshqarishning asosiy omilidir. Janubi-SHarqiy Osiyo davlatlari yuqori texnologiya va inson kapitali yordamida qisqa muddat ichida iqtisodiy o’sishga erishdilar. SHuning uchun yosh mustaqil O’zbekistonda iqtisodiy islohotlarning tez ijro etilishi ta‘lim tizimi rivojlanishiga va yuqori malakali mutaxassislar tayyorlashga alohida diqqat qilinishini talab qiladi. Bu talab yuksak intelektual potentsialga ega inson o’zgaruvchan bozor iqtisodiyotiga tezkroq moslasha olishi uchun yanada dolzarbdir. Mutaxassisni tayyorlash va ta‘lim berishning samarasini oshirish iqtisodiy, texnologik, ijtimoiy, huquqiy omillar majmuasini talab qiladi. Ko’p yillik tadqiqotlarning ko’rsatishicha, bosh omillardan biri ijtimoiy omildir. Bu omillar sotsiologiya fanining maxsus qismi tomonidan o’rganilib, «ta‘lim sotsiologiyasi» deb nomlanadi. Hozirgi vaqtda ta‘lim sotsiologiyasi O’zbekistonda bu sohadagi ijtimoiy masalalarning uslubiy asosining shakllanishi bosqichidadir. Ijtimoiy jarayonlar boshqaruvining mukammallashuvi hozirgi sharoitlarda ta‘lim tizimi axborotlarini qayta ishlab, tahlil qilib, yig’ish tizimini, ya‘ni «sotsiologik monitoring» ni yaratishni talab qiladi. Bu tizim professor-muallimlik tarkibini, talaba yoshlar, hisoblash matematikasini, zamonaviy hisoblash texnikasini va ijtimoiy masalalarni hal qila olish imkoniyatini hisobga olgan holda yaratiladi. Monitoring – bu sotsiologik tadqiqotlarni o’tkazish, sotsiologik jarayonlar haqidagi axborotlardan doimiy foydalanishni ta‘minlovchi tizimdir. Sotsiologik amaliyotga tushuncha ekologiyadan kirib kelgan. Ekologik tadqiqotlarda u atrof-muhitni uzluksiz nazorat qilishni bildiradi. Sotsiologik monitoring boshqaruv jarayonining sotsiologik ta‘minotini sezilarli darajada yaxshilaydi.

Sotsiologik tadqiqotlar uyushtirilganda odatda ijtimoiy muhit holatini aks ettiruvchi zarurroq ko’rsatkichlar aniqlanadi. So’ngra takroriy tadqiqotlar usuli bilan me‘yoriy va asosiy ko’rsatkichlardan foydalanilgan holda uzluksiz ravishda dinamik axborotni yig’ib tahlil qilishni ta‘minlaydigan sotsiologik o’lchovlar olib boriladi. Tadqiq qilinayotgan tashkilotning bunga xos ko’rinishi nafaqat jamiyat va kuzatilayotgan ob‘ekt hayotining turli sohalari haqida haqqoniy axborot olishni, ta‘minlaydi, balki jamiyat jarayonlari munosabatlari va qonuniyatini ochib ham beradi. Voqealarning rivojlanish munosabati doimiy nazoratda va ob‘ektning zarur parametrlari o’zgartirilganda, katta axborot jadvali to’planganda katta monitoring turiga ko’ra ilmiy tadqiqotlarga talab yuzaga keladi. Bunday monitoring tizimlarga avval meteorologiya va seysmologiyada duch kelindi. Hozirgi vaqtda bunday tizimlar statistika, bank ishi, birja, kosmonavtika, mudofaa, ishlab chiqarishda keng ko’lamda qo’llanilmoqda. Sotsiologiyaga monitoring tadqiqotlari usulbiyoti va amaliyoti ekologiyadan o’tdi. Dinamikaning monitoring tadqiqotlarida va ekologik holatlarda sifat va miqdoriy ko’rsatkichlar ustida kuzatishlar olib borildi. Bunda tizimlarni barcha komponentlari haqida ma‘lumotlar jamlamasi yaratildi. Bizning respublikamizda bunday tadqiqotlar Orolbo’yi mintaqasidagi ekologik muammolar munosabati bilan 90-yillarning boshlarida katta ko’lamda olib borildi. Katta hajmdagi ma‘lumotlar jamlamasi yig’ildi. Sotsiologik Tadqiqotlar Markazi ham 1989-92 yillarda Orolbo’yi ekologik tangligi oqibatlarini o’rganishda qatnashdi. Monitoring yaratishdagi ishlar qo’llanilmagan bo’lsada, monitoring o’lchovlar yaratish g’oyalari fundamental sotsiologik tadqiqotlar olib borilayotganda paydo bo’ldi. Sotsiologik tadqiqotlarga monitoring turi bo’yicha jamoat fikrini dinamik o’rganish ham kirdi. Monitoring qo’llovchi bo’lib Gellap Instituti hisoblanadi. Rossiya Federatsiyasida ham asosan monitoring turi qo’llanilmoqda. Rossiyada sotsiologik tadqiqotlarning koordinatsion markazi akademik T.I.Zaslavskaya boshchiligidagi Rossiya Sotsiologiya Markazi sanaladi. 1994 yildan beri Moskvada turli ijtimoiy muammolar bo’yicha natijalar e‘lon qiluvchi «Monitoring axborot byulleteni» nashr qilib kelinmoqda. Ba‘zi rivojlangan davlatlarda va MDHda ta‘lim sohalarida monitoringni yaratish va qo’llash bo’yicha qiziq natijalar olindi. Bizning mamlakatimizda ham mustaqil bo’lganimizdan so’ng sotsiologik monitoring yaratish bo’yicha ishlar boshlab yuborildi. Xususan, ToshDU sotsiologik markazi va Oliy ta‘lim vazirligi tomonidan Oliy ta‘lim monitoringining usulbiy asosini yaratish yo’lida ishlar olib borildi. Oliy va o’rta maxsus ta‘lim monitoringi tizimining umumiy masalalari tizim struktura va funktsiyalari bilan mos ravishda aniqlanadi. Oliy va o’rta maxsus ta‘lim tizimi quyidagilardan iborat: Oliy O’quv yurtlari – institutlar va universitetlar Malakani oshirish institutlari va fakultetlari.

O’rta maxsus o’quv yurtlari. Ilmiy-tadqiqot institutlari. Oliy va o’rta maxsus ta‘limning Respublika va mintaqaviy bo’limlari. Oliy va o’rta maxsus ta‘limi quyidagi funktsiyalarni bajaruvchi Monitoring tizimini o’z ichiga oladi: Malakali xodimlar bilan ijtimoiy talabni qondirish. SHaxsni tarbiyalash, insonni mustaqil faoliyatga tayyorlash. Oliy ta‘lim alohida sotsial qatlam hosil qilib, jamiyatda malakali mutaxassislarni yuzaga keltiradi. Oliy ta‘lim kasbiy bandlikdan farqli ravishda alohida qiymat aks ettiradi. Oliy ta‘lim o’ziga mos ravishda o’rin tanlashda, sotsial maqsadlarga yetishish shartlarini bajaradi. Oliy ta‘lim shaharlarda kadrlar salohiyatini kuchaytirishga yordam beradi. Oliy ta‘lim demografik jarayonlarga, ya‘ni nikoh, tug’ilish, turg’unlik va boshqalarga o’z ta‘sirini ko’rsatadi. Jamiyatning intellektual potentsialini ishlab chiqarishga qo’llash funktsiyasi. Oliy ta‘lim tizimi bilim darajasi va o’rganishga, ilmiy faoliyatga intilishni va ta‘lim imkoniyatlarining kengayishini rag’batlantirish. Iqtisodiy o’sishni va mehnat unumdorligini rag’batlantirish, tez iqtisodiy o’sishni ta‘minlaydigan zamonaviy milliy texnologiyani yaratish. Oliy va o’rta maxsus ta‘lim monitoringi tizimining umumiy masalalari monitoring funktsiyalarining samaralilik va uslubiy, ilmiy adabiyot bilan ta‘minlanish darajasiga qaratish kerak. 1995-96 yillarda sotsiologik Tadqiqotlar Markazi tomonidan professor- o’qituvchilar va talabalarning ijtimoiy holati tadqiq etildi. Bu tadqiqot o’qitish professor-o’qituvchilar va talabalarning ijtimoiy holatiga bog’liq ekanligini ko’rsatadi. SHuning uchun monitor tadqiqotlarning birinchi bosqichi sifatida professor- o’qituvchilar va talabalarning ijtimoiy holatining dinamikasi nazorati tanlandi. Mahsus tayyorlangan dasturlar asosida mamlakatning yirik oliy o’quv yurtlarida aniq sotsiologik tadqiqotlar o’tkazildi. Olingan ma‘lumotlar EHM da qayta ishlanib, tahlil qilindi va OO’Yu Vazirligi Ilmiy Hay‘atiga 1996 yil mayda taqdim qilindi. Ilmiy Hay‘at tomonidan ba‘zi e‘tirozlari bilan ma‘qullandi. Ilmiy hisobot O’zR va DFTKiga ham taqdim qilindi. _ Tayanch iboralar: Empirik, pilotaj, ilmiy matn, analitik muolaja, annatatsiya, sotsial eksperiment, gipoteza, sotsiometrlik so’rov, panel so’rov.

O'xshashlar

Sotsiologik tadqiqotlarni tashkil etish va umumlashtirish

Sotsiologiya fanining predmeti, obe‘kti va ijtimoiy fanlar tizimida tutgan o’rni

Sotsiologiyaga kirish

Sotsiologiyaning ob’ekti va predmeti

Sotsiologiya faninng vujudga kelishi va taraqqiy etishi