Konfliktlarni boshqarish tartiblari - Pedagogika - Referatlar

Konfliktlarni boshqarish tartiblari

Yuklangan vaqt:

20.09.2019

Ko'chirishlar soni:

0

Hajmi:

1172.5126953125 KB

Ko'chirib olish

Konfliktlarni boshqarish tartiblari Reja: 1. Konflikt yechimini topishdagi munosabat. 2. Konflikt bilan ilk to‘qnash kelgan vaqtdagi qadamlar. 3. Konfliktlarni boshqarish usullari .

Konflikt yechimini topishdagi munosabat. Konflikt yechimini topish passiv holatdagi munosabatni emas, balki aktiv, ya’ni faol munosabatni talab etadi. Konflikt vaziyatda ko‘pchilik impulsiv, ya’ni anglanmagan harakat olib boradi. Ularga konflikt vaziyatda o‘zini tutish bo‘yicha bilim va malakalar yetishmaydi. Vaziyat esa o‘z ustidan nazorat o‘rnatilishini talab etadi. Demak, konflikt vaziyat o‘ylangan qadamlarni so‘raydi. Bu – konfliktga bo‘lgan ongli munosabat belgisi bo‘ladi. Ziddiyatga nisbatan ongli munosabat jarayonida inson nizoni nazorat ostida ushlab tura oladi, ziddiyatga o‘z ta’siri o‘tkaza oladi, tomonlar his-tuyg‘ularining “ko‘pirib” ketmasligi oldini oladi, tomonlarni konstruktiv munosabatlarga chorlaydi, ularni muzokaralar stoliga olib kela oladi, nizoni keltirib chiqargan muammo haqida o‘ylash, fikr va mushohada qilish muhitini yarata oladi. Odatda bizning oldimizda biror narsadan jahli chiqqan, diqqati oshgan, “g‘azablangan” va “jilovini qo‘ldan bergan” odam bo‘lsa, biz unga nisbatan o‘zimizni turlicha tutamiz. Biz jahli chiqqan odamdan o‘zimizni olib qochishimiz mumkin, nima bo‘lganligini so‘rab, uni tinchlantirishga harakat qilib ko‘rishimiz, yoki unga “aql” o‘rgatishimiz mumkin, o‘zimiz ham uning jahlidan ta’sirlanib, jizzakilik va jahl ishlatishimiz mumkin, konfliktni keltirib chiqargan tomonga “do‘q” va “po‘pisaga” o‘tishimiz mumkin, ularning “adabini” berib qo‘yish bizning bosh maqsadimizga aylanishi ham mumkin. Ammo bu yo‘llarning barchasi aqli raso, bosiq, hayot tajribasi bor odam usullari emasligi ayon. Bu usullarning qo‘llanilishi konfliktni chuqurlashtiradi, tomonlar orasidagi tang ahvolni yanada qiyinlashtiradi, konflikt yechimidan hammani boshqa, ya’ni ziddiyatni chuqurlashtirishga yo‘naltirilgan tomonga olib ketadi. Shu bois, konflikt bilan ilk to‘qnash kelgan vaqtda kuyidagi qadamlardan foydalanish darkor: Birinchi qadam: Konflikt vaziyatni u qanday bo‘lsa o‘shanday, o‘z emotsiyalaringizdan holi bo‘lgan tarzda qabul qiling. Konflikt vaziyat sizga yoqmasligi, sizga qarshi holatni vujudga keltirishi, umuman rejalashtirilmagan holda kelib chiqqan ham bo‘lishi mumkin. Ammo aynan siz uning “nima”

ekanligi, ya’ni konflikt haqiqatini to‘la va aniq anglagan paytingizdan boshlabgina, siz uni boshqara olish qobiliyatiga ega bo‘lasiz. Konflikt bilan ilk to‘qnashgan paytda konflikt bir taraf, siz esa bir taraf bo‘lasiz. Konfliktni anglashning eng birinchi qadami unga obyektiv, xolis, emotsiyalarsiz baho berishdir. Konfliktga nisbatan o‘z emotsiyalari va fikrlaridagi neytralitetni saqlab qolish, konfliktni anglashga qaratilgan yo‘lning boshi hisoblanadi. Mana shunday neytral sharoit esa sizga konflikt ishtirokchisi sifatida aniq, faktlarga asoslangan, oydin va mustaqil mushohada qilish uchun imkon yaratib bera oladi. Konfliktni anglash obyektiv faktlarni tan olish demakdir . Bu faktlar sizning manfaatlaringizga qarshi bo‘lishi mumkin. Ammo siz konfliktning yechimini haqiqatan ham topmoqchi bo‘lgangiz, barcha faktlarni, ular sizga yordam bersa ham, ular sizga halaqit bersa ham, tan olish yo‘lidan bormog‘ingiz darkor bo‘ladi. Konfliktga aynan u kelib chiqqan vaziyatdan boshlab baho bering. Biroq agar mana shu vaqtda sizning kayfiyatingiz “pachoq” bo‘lsa, mana shu “yomon” kayfiyatni tan olishdan o‘z ishingizni boshlang. Sizning o‘z kayfiyatingiz yomonligi tan olishingiz, u sabab noto‘g‘ri amallar qilmasligingiz uchun asos bo‘lib xizmat qiladi. Siz o‘z kayfiyatingiz va xissiyotlarning ortganligini tan olishingiz mana shu emotsiyalar ichida noto‘g‘ri xukm chiqarishdan sizni saqlab qoladi. Ikkinchi qadam: Konflikt vaziyatda inson mana shu vaziyatning bo‘lmasligi mumkinligi, ideal holatda uning qanday bo‘lishi mumkinligi masalasiga juda katta kuch sarflaydi. Siz ziddiyat orqali eng aziz odamlaringiz bilan munosabatlarning buzilganligidan hijolat bo‘lasiz, ularni yangitdan o‘rnatmoqchi bo‘lasiz. Hayollaringiz turli harakatlarni belgilab beradi. Bu holatda siz ko‘proq reallikdan uzoqlashib, hayollaringizda yashaysiz. Ammo konflikt vaziyatni hayollarga erk berib hal qilib bo‘lmaydi. “U menga bunday qo‘pol gapirmasligi kerak edi”, “Men o‘zi unga kimman, agar meni hurmat qilsa, bunday demagan bo‘lar edi”, “Nimaga u hammaga kulib qarayveradi”, “U o‘ziga hamma qaraganidan lazzat oladi, aslida meni qiynamoqchi”, “U o‘z zimmasidagi vazifalarni yaxshi bajarishi kerak, bo‘lmasa

uning keragi yo‘q”, “U hadeb meni niqtayveradi, har doim, u nima derkin, deb yashashim kerakmi?!”, “Nima uchun u mening hayotimga aralashadi, men mustaqil odamman-ku”, “Boshliq bo‘lsa o‘ziga, nima, hadeb baqiraverishi kerakmi?!”... Mana shunday fikrlar konfliktlar doirasida inson ichki emotsional holatining kuchayib ketganligida ro‘y beradi. Bunday holatlarga biz o‘zga odamlar qilgan amallarni o‘zimizning emotsional qadriyatlarimiz bilan o‘lchaymiz, ammo ularning o‘z emotsional qadriyatlari mavjudligini esdan chiqaramiz. Biz uchun o‘z emotsional qadriyatlarimiz – dunyodagi eng to‘g‘ri formula bo‘lib ko‘rinadi. Ammo ana shu emotsional formulamizni o‘z-o‘zimizga ishlatib ko‘rsak-chi?! Har doim ham o‘zimiz eng yaxshi bahoga loyiqmiz-mi?! Insonlar uchun o‘ziga nisbatan shubha bilan qarash, o‘zining qilgan ishlaridan qoniqmaslik xislatlari ham xos. Demak, xulosa shuki – o‘zgalarni ham, o‘zimizni ham bir xil emotsional daraja va meyorlar bilan boholashga o‘tish lozim. Uchinchi qadam: Konflikt vaziyat va uning tahlili bizni ko‘p narsalarga o‘rgatadi. Konflikt vaziyat va uning yechimini qidirish juda katta hayotiy tajriba beradi. Biz agar konflikt yechimi bo‘yicha bilimlarga ega bo‘lmagan bo‘lsak ham, real konflikt jarayonida ba’zi xulosalarni qilamiz va o‘z hayotiy tajribamizni oshirib boramiz. Shu bois, har bir vujudga kelgan konflikt bu sizning o‘sish va ulg‘ayish jarayoningiz hisoblanadi. Konfliktni to‘g‘ridan to‘g‘ri, uni bo‘yamasdan qabul qilish, faktlarga asoslanishdan so‘ng, konfliktning ideal darajada hal qilinishi mumkinligi - hayol qilishdan voz kechib, konfliktga real va ijodiy yondashuvni boshlashni talab etadi. Konfliktga real yondashuv qiyinchiliklarni bo‘yamasdan va bo‘rttirmasdan qabul qilish, vaziyatni obyektiv baholashni bildiradi. Chirigan olmani qanchalik artsangiz ham u chirigan olmaligicha qolaveradi. Konfliktga ijodiy yondashuv esa, qanchalik qiyin bo‘lmasin, siz konflikt asosida turgan muammoni yechishingiz lozimligi anglatadi. Eng avvalo, o‘z mas’liyatingizga - o‘z xatolaringiz, kamchiliklaringiz, nizo laringizni qabul qilishingiz lozim, aynan o‘zingiznikini. Konflikt yechimini “samoanaliz”siz olib borib bo‘lmaydi. O‘zingizning holatingizni aniq belgilab olish, sizga muammoga

obyektiv qarash, uning hal bo‘lish yo‘llarini to‘g‘ri topish imkoniyatini yaratadi. Konfliktga nisbatan ijodiy yondashuvda siz o‘z xissiyotlaringiz, o‘ylaringizni tartibga olish imkoniyatiga ega bo‘lasiz. Ana shundan boshlab konflikt siz uchun hayotiy dars va tajriba bo‘la boshlaydi. To‘rtinchi qadam: Bolalikda emaklashdan oyoqqa turishga, yurishga o‘rganayotgan kichkintoy birdaniga oyoqqa turadi-da, qo‘rqmay yuraveradi, yuraveradi. Agar yiqilib tushsa ham, darrov yana oyoqqa turib, yurib ketadi. Bu harakatlaridan o‘zi ham juda zavqlanadi. Bola hech qachon to‘g‘ri qilyapman-mi, noto‘g‘ri qilyapman-mi, deb o‘ylamaydi. Bola uchun yiqilish – oddiy holga aylanadi. Bola yiqilganidan kuyinmaydi, balki zavqlanadi. Bola uchun oyoqqa turib, yurish qanchalik qiziqarli bo‘lsa, yiqilish ham shunchalik qiziqarlidir. Katta bo‘lganimizda-chi?! Yutuqlar bizni qiziqtiradi, quvontiradi. Yutqizish-chi?! Bolaga o‘xshab yiqilganimizdan tajribaga ega bo‘lamiz-mi, o‘z xulosalarimizni qilamiz-mi?! Yiqilib, toyilish bizga biror narsalarni o‘rgatadi-mi?! Yiqilish va toyilish, xato qilishga biz qanday munosabatda bo‘lamiz?! Uni xoxlamaymiz, undan qo‘rqamiz, undan ezilamiz, yutqizganimizni tan olishga shoshilmaymiz, yutqizganimizni boshqalardan yashiramiz. Ammo, bu to‘g‘rimikin?! Demak, konflikt vaziyatdagi biz o‘ylagan hato va yutqizishlar aslida hayotiy tajriba, ularni to‘g‘ri qabul qilish, ma’lum xulosalarga kelish va keyingi hayotda qo‘llay olish darkor. Yiqilish, yutqazish – keyingi qadamlar, keyingi hayotning boshidir. Hayotida yiqilish, turtilish, yutqazish – katastrofa emas. Chunki yiqilgandan keyingi hayot ham mavjud. Beshinchi qadam: Oldingi ruknlarda aytilgan tamoyillardan kelib chiqqan holda, konfliktdan keyingi vujudga kelgan vaziyatni yangitdan, yangi vaziyatda yashash qonuniyatiga, yangi imkoniyatga, yangi munosabatlarga aylantirish darkor. Konflikt vaziyatga yangi imkoniyatlarni yaratish kerakligi nuqtai nazaridan qarasangiz, o‘zingiz ham, opponentingiz ham bunyodkorlik tamoyillari asosida yangitdan yashashga o‘tadi. Sizlar bir-biringizni inkor etishdan qutilib, hamma uchun zarur va barcha mavjud tomonlarni koniqtirgan vaziyatni tashkil qilish, yangi munosabatlarni qurish jarayoniga o‘tasiz. Demak, konfliktning boshlanishiga

– yangi imkoniyatlarning yaratilishi va yangi munosabatlarning o‘rnatilishi sifatida qarash lozim. Demak, konflikt – hayotning tugashi emas, balki yangi hayotning boshlanishidir. Shunday qilib, konflikt yechimiga qaratilgan sayi-harakatlar passiv, impulsiv yoki aktiv, faol bo‘lishi mumkin. Konfliktga faol munosabat unga nisbatan ongli munosabatni talab etadi. Konfliktga bo‘lgan ongli munosabat esa munosabatlarni emotsiyalardan tozalashni, ziddiyatga obyektiv, xolis, ortiqcha xis-tuyg‘ulardan ozod bo‘lgan tarzda baho berishni, obyektiv faktlarga e’tibor bilan qarab, o‘zining kamchiliklarini ham tan olishni, hammaga bir xil mezonlar bilan qarashga o‘rganishni, konflikt yechimiga qaratilgan qadamlarni o‘ylab amalga oshirishni talab etadi. Konfliktlarni boshqarish. Konfliktlarni boshqarishning qanday usullari mavjud? Konfliktlar mazmuni, ularning kelib chiqish sabablari, konflikda qanday holatlar vujudga kelishi borasida avvalgi boblarda biz ma’lum bilimlarga ega bo‘ldik. Biz eng zarur shart, ya’ni konfliktni o‘z holicha tashlab qo‘ymaslik kerakligini anglab yetdik. Ziddiyatga faol aralashish, uni boshqarish va uning yechimini hamkorlikda ishlab

chiqish – konflikt yechimini topishga olib kelishini ko‘rdik. Konflikt yechimi uchun zarur bo‘lgan insoniy fazilatlar va ko‘nikmalar haqida gapirdik. Ammo shu bilan birga konflikt yechimini topish uchun konfliktni boshqarishning o‘ziga xos usullari ham egallash darkor. Konfliktlarni boshqarish haqida ma’lumotlarni bilish va ularni qo‘llay olish ham sizning hayotingizda osoyishtalik olib kiradi. Konfliktologiyada konfliktlarni boshqarish usullari odamlarning xarakteri, o‘zini tutishi, psixologiyasi asosida ishlab chiqilgan. Endi konfliktlarni qanday boshqarish mumkinligini ko‘rib chiqamiz. Konfliktlarni boshqarishning besh asosiy usuli mavjud. Odatda, konfliktlar nazariyasida bu usullar turli hayvonlar hatti-harakati asosida biror «jonivor»ning o‘zini tutish xususiyatlariga nisbat beriladi. Biz ishlab chiqilgan hamda konfliktologiya nazariyasida keng qo‘llaniladigan konfliktlarni boshqarishning «jonivor» usullarni ko‘rib chiqamiz. Sizning vazifangiz - o‘z xarakteringiz ta’kidlangan usullardan qaysi bir usulga ko‘proq to‘g‘ri va mos kelishini aniqlashdan iborat. Ammo hayotda turli vaziyatlar bo‘ladi, shuningdek insonning murakkab xarakterini faqat bir usulga bog‘lab o‘rganish to‘g‘ri emas. Ko‘plab hollarda inson xarakteri to‘g‘ridan-to‘g‘ri faqat bir usulga monand bo‘lmay, ba’zan usullar aralashmasiga ham teng kelishini nazarda tutishga to‘g‘ri keladi. Shuningdek, insonning u yoki bu konflikt vaziyatlardagi o‘zini tutishi o‘sha vaziyatga ham o‘zaga xos tarzda bog‘liq bo‘ladi. Demak, konfliktologiyada kuyidagi konfliktlarni boshqarish usullari mavjud: Moslashish va ko‘nikish usuli – «QO‘Y» «Siz nima desangiz ham, men siz bilan hamfikrman» Moslashish va ko‘nikiksh usulidagi odam o‘zini har doim biror voqelikka moslashga urinadi. Favqulodda holatlarda ham o‘sha vaziyat va vaziyatni keltirib chiqargan insonlar bilan kelishish yo‘lidan boradi. Siz boshqa odamga har doim o‘z roziligingizni ko‘rsatishga harakat qilasiz, chunki bu yo‘l konfliktdan

qochish, ochiqdan – ochiq qarshilik ko‘rsatmaslik, undan o‘zini chekkaga olish, konfliktda faol ishtirok etmaslik imkoniyatini yaratadi. Siz konflikt vaziyatning o‘zidan qo‘rqasiz. Konflikt vaziyat siz uchun – tinch va osuda hayot maromining buzilishi, yangi qarorlar qabul qilinishi, sizdan biror narsaning talab etilishidir. Shu bois, siz aslida qarorlar qabul qilishdan cho‘chiysiz va o‘zingizni bu holatdan olib chiqib ketishga harakat qilasiz. Shu bois, sizning ustingizdan hukm chiqarish holatlari keng kuzatiladi. Siz ularga qarshilik ko‘rsatmaysiz, chunki konfliktni jiningiz suymaydi. «Siz haqsiz mening hovlimda sizning olma daraxtingizni o‘tqazish g‘irt ahmoqlik edi, chunki uning mevalaridan mening bolalarim huzur ko‘radi». Siz uchun birovning jahlini chiqarishdan ko‘ra o‘lim afzalroqdir. Birovlarning siz haqingizdagi fikri, ularning jahlidan va qahridan siz havotirlanasiz. Shuning uchun siz aslida nimalarni o‘ylayotganligingiz va qanday xislar sizni qiynayotganligini hech kimga ko‘rsatmaysiz. Siz uchun eng muhimi, sohta bo‘lsa ham iliq munosabatlar, salom-alik, va bas. Demak, hamma narsa joyida. Siz uchun tanish-bilishlaringiz bilan iliq munosabatlar juda muhim bo‘lib, ular sizga ziyon yetkazayotgan va adolatsiz bo‘lsa ham mayli, siz chidayverasiz. Siz zulmlar va nohaqliklarga chidamli munosabat orqali o‘z hayotingizdagi konfliktlarning oldini olgan bo‘lasiz. Siz faol bo‘lmagan va oqar suv yo‘nalishida suzish orqali konfliklarni boshqarasiz, ziddiyatning mohiyatini umuman o‘ylab ham ko‘rmaysiz, balki o‘zingizga emotsional-xissiy og‘irlikni olgan holda, konfliktni faol aralashmasdan yengib borasiz. Usulning afzalliklari: «Qo‘y” sifatida, siz boshqalar bilan tinch va do‘stona munosabatlarni muntazam saqlab qolasiz. Chunki sizning hech kimga og‘irligingiz tushmaydi. Hamma sizdan foydalanadi. Siz hamma narsaga chidaysiz. Birovlarga siz ko‘proq e’tiborli bo‘lasiz, shu bois birovlar sizga ehtiyoj sezadi. Sizning oldingizda ular o‘z dardlari va munosabatlarini ochiq aytaveradi. Chunki sizdan zarar yo‘q. Usulning kamchiliklargi: Sizning talablarigiz, xis-tuyg‘ularingiz juda kam e’tiborga olinadi, sizning ehtiyojlaringiz inobatga olinmaydi va juda kam bajo keltiriladi. Agar bu holatda sizga nisbatan adolatsizliklar ko‘payib borsa,

qalbingizda yashirin g‘azab, nafrat kuchayib boradi, biroq sizning bu fazilatingizni qadrlaydigan insonlar atrofingizda bo‘lsa, hayotingiz siz istagandek tinch va osuda o‘taveradi. Ammo o‘zingizning kuchsiz ekanligingizni har doim sezib turasiz. «Bu mening ishim emas» usuli – «STRAUS» «Meni tinch qo‘yinglar! Meni hech narsa qiziqtirmaydi!» Siz konfliktning yechimini qidirish o‘rniga undan qochasiz, ammo bu qochish “qo‘y” usulidan farq qiladi. Agar “qo‘y” usuli konflikt mavjudligini tan olsa, siz “konflikt – yo‘q” deb turib olasiz. YA’ni siz umuman konfliktni tan olmaysiz, buning natijasida sizning emotsiyalaringiz zarar ko‘rmaydi. Siz qaylardadir undan yashirinib yurasiz, muammo mavjudligini tan olgingiz kelmaydi. Konflikt kelib chiqqanligini va uni yechish lozimligini o‘ylagingiz kelmaydi. Mashmashalardan qochasiz. “Ularni o‘ylamasa, ular yo‘q bo‘ladi”, deb o‘ylaysiz. «Ko‘y» yengilgan vaziyatda, siz umuman uning mavjudligini ham tan olgingiz kelmaydi. O‘zingizni konflikt yechimi borasida o‘ylashga, fikr qilishga majbur qila olmaysiz, bu haqida o‘rtoqlashgingiz ham kelmaydi. Agar siz konflikt vaziyatga tushib qolsangiz, eng avvalgi reaksiyangiz – “bu mening ishim emas”, deyishdir. O‘zingizni hech narsa bilmagan, hech narsa ko‘rmagan, hech narsa hal qila olmaydigan odam sifatida ko‘rish sizga qulayroq bo‘ladi. Siz konflikt kelib chiqqan yerdan o‘zingizni olib qochasiz, boshqa xonaga chiqib ketasiz, yoki samovorga yo‘l olasiz, suhbat mavzusini o‘zgartirishga harakat qilasiz, konflikt yechimini qidirishni keyinga qoldirasiz yoki uni “umuman mavjud emas” deb hisoblaysiz. Bu fikringiz shunday qat’iy fikrga aylanadiki, boshqalarga ham “umuman hech narsa bo‘lgani yo‘q, boshimni qotirmanlar” tarzida muomala qilishni boshlaysiz. Shu bois, agar boshqalar konflikt yechimini qidirib, uni hal etishga kirishsalar, siz uchun eng qulay vaziyat kelib chiqqan bo‘ladi. Eng muhimi sizni bezovta qilishmasa, bas. Hamma narsani sizsiz hal qilishaversin. Odatda sizning muammolaringizni boshqalar hal etishini ko‘proq xush ko‘rasiz.

Usulning afzalliklari: Siz hech qachon yoqalashish, mushtlashish, urush – janjal vaziyatiga tushmaysiz. Chunki har doim biror bir ziddiyat vujudga kelayotgan joydan qochishga ulgurasiz. Havfli vaziyatlardan o‘zini saqlash va ziyonsiz chiqib keta olish juda yaxshi malaka hisoblanadi. Siz xech qachon to‘qnashuvlar asosida kelib chiqadigan jismoniy zo‘rlik bilan to‘qnashmaysiz, o‘zingizning salomatligingiz posboni hisoblanasiz. Usulning kamchiliklari: Ammo siz o‘zingizni kuchli va o‘zini himoya qilishga qodir inson deb hisoblamaysiz. Siz strausdek har doim konfliktni ko‘rganda boshingizni yerga tiqib olasiz. Siz hech qachon o‘z muammolaringizni yechishga tayyor bo‘lmaysiz, uning hal bo‘lishi uchun yo‘l-yo‘riq qidirmaysiz. Va agar sizning muammolaringiz boshqalar tomonidan hal etilsa ham, bu yechim yuzaki, adolatsiz va omonat, ya’ni vaqtinchaliq, o‘tkinchi bo‘lishi mumkinligini tushunsangiz ham, ularga aralashmaysiz. Bu esa sizning manfaatlaringizga qarshi yechimlar va xulosalar bo‘lishi ham mumkin. Umuman muammolarni jiningiz suymaydi, siz ulardan qo‘rqasiz, shu bois, bu usulning eng yomon oqibati, o‘z muammolaringizdan qutulish uchun boshqa zararli yo‘llarga kirib ketish hollari kuzatiladi, shu bois sizning narkotik va alkogolga ruju qo‘yishingiz ehtimoli mavjud. Agressiv usul – «AKULA»

«Kim nima desin-chi?! Kim menga qarshi chiqa oladi?! Qani o‘zi zo‘r bor- mi?! » Sizning shioringiz – doimo, har qanday vaziyatda ham faqat va faqat “g‘olib” bo‘lish. Konflikt vaziyatda siz uchun g‘olib chiqish - muammoning hal bo‘lishi, ya’ni konflikt yechimidan ko‘ra afzalroqdir. Ayb sizdaligini bilsangiz ham “g‘olib” chiqishga intilasiz. “G‘olib” bo‘lish uchun hech narsadan toymaysiz. Siz “g‘olib” bo‘lishlikni konflikt yechimidan, muammoning hal qilinishidan ko‘ra yaxshi ko‘rasiz va shuni rejalashtirib, harakat olib borasiz. Aslida, konflikt yechimi “to‘g‘ri” yo‘l ekanligini bilmaysiz, yoki unga ishonmaysiz. Siz har qanday boshqa bir odamni aybdor qilishga tayyersiz va ko‘pincha «kerak», «lozim», «zarur», «bo‘lishi kerak» kabi so‘zlarni ishlatasiz. Sizning jahlingiz tez, bir pasta g‘azablanasiz, qahringiz qattiq, jizzakilik siz uchun oddiy hol, sabr bilan birovni eshitishga qodir emassiz. Opponentingizning fikrlarini jim turib eshitishni - unga bo‘y sunish sifatida qabul qilasiz. Atrofingizdagi odamlar har qanday vaziyatda albatta “g‘olib” chiqishingizni ko‘rishlarini va sizning kuchingizni tan olishlarini istaysiz. Bunda adolat buzilishi sizni o‘ylantirmaydi. Siz ko‘p qizishasiz, boshqalarga bosim o‘tkazasiz, baqirishingiz ham mumkin. Haqiqatan ham siz ko‘p hollarda g‘oliblikni qo‘lga kiritasiz, ammo boshqalarning aziyat chekishi hisobiga, boshqalarning manfaatlari buzilishi hisobiga.

Usulning afzalliklari: Siz har doim o‘z emotsiyalaringizni oshkora tutasiz, fikrlaringizni erkin bayon qila olasiz. Siz faol bo‘lishni, mas’uliyatni o‘zingizga olishni hamda tavakkalchilikni yoqtirasiz. Har doim salbiy xis-tuyg‘ularning ochiq chiqib ketishi imkoniyati mavjudligi sizni emotsional krizislardan asraydi. Siz ichingizda ezilib, qiynalib yurmaysiz. Depressiya degan so‘z – sizga yot. Usulning kamchiliklari: Sizning faqat o‘z manfaatlaringiz uchun harakat qilishingiz atrofingizdagi do‘st va vafodor odamlarni qoldirmaydi, sizning emotsional portlashlaringizdan ko‘pchilik yaqinlaringiz qiynaladi, boshqalar fikrini mensimasligingiz, faqat o‘zingizga ishonishingiz odamlar bilan munosabatlaringizni qiyinlashtirib qo‘yyadi. Siz kamdan-kam boshqalar maslahatiga quloq solasiz va boshqalar bilan kelishib ishlaysiz. Ko‘proq boshqalar siz bilan kelishishi kerak bo‘ladi. Muammo shundaki, sizdagi xislatlarning zo‘ravonlikka o‘tib ketishi juda oson. Siz zo‘ravonlik qilish va uni o‘tkazishdan tortinmaysiz. Zo‘ravonlikni tabiiy hol sifatida qabul qilasiz. Zo‘ravonlikning ko‘payishi esa jinoyatga olib kelishi mumkin. Ammo siz bu to‘g‘rida o‘ylamaysiz. Sizning har doim g‘olib bo‘lishingiz zaruriyatga, oddiy holga aylanib boradi. Sizning “g‘olib”ligingiz boshqaning “mag‘lubiyati” ekanligi o‘ylamaysiz. Kompromiss (kelishuvchanlik) usuli – «TULKI» «Men siz uchun hamma narsaga tayyorman. Men siz uchun foydali bo‘la olaman-mi?!» Siz har bir konfliktda o‘ziga xos yechim mavjudligini bilasiz. Ammo konflikt yechimi uchun ko‘p vaqt va sa’y– harakat ishlatishni istamaysiz. Shu bois, eng yengil va tezkor yechimni qidirasiz. Buning uchun xushomad, maqtov, joningizni jabborga berish, riyokorlik, birovlarga yoqishga harakat qilasiz. Sizning shioringiz – “avval orqaga bir qadam, keyin oldinga ikki qadam”dir. «Judayam jahlingiz chiqib ketdimi? Mayli, qo‘ying, bu ishni o‘zim qila qolaman». “Ha, men aybdorman, keling men yana bir boshdan harakat qilib ko‘ray. Hamma aytganlaringizni tushundim. Siz buyurganday

qilaman...”. “Siz nima desangiz shu, sizdan o‘tkir odam yo‘q bu dunyoda, yerda ilon qimirlasa, siz bilasiz...”. Kompromisga borishni siz o‘zingizga uyat deb hisoblamaysiz, balki kompromissga bora olmaganlardan o‘zingizni ustun qo‘yasiz. Chunki kompromissga bora olmaslikni inson xarakteridagi qusur sanaysiz, bu siz uchun ayb. Siz har qanday vaziyatda kelishishga harakat qilasiz, kompromiss – sizning hayotiy ehtiyojingizdir. Bu holatda hech bir tomon yutqazmaydi, ammo hech bir tomon yutib ham chiqmaydi. Siz ko‘pincha o‘z maqsadlaringizni ruyobga chiqarish uchun qulay vaziyat qidirasiz va mana shu qulay vaziyatni kutasiz. Siz mayda “kichik” odam bo‘lib, “katta” ishlar qilish mumkinligiga to‘la ishonasiz va bu ish qo‘lingizdan keladi ham. Bo‘ysungandek ko‘rinib, keyin hukmron bo‘lish uchun kompromisslardan ustamonlik bilan foydalanasiz. Usulning afsalliklari: Sizning xulq-atvoringiz moslashuvchan bo‘lib, har qanday vaziyatda va holatda siz o‘zingizni erkin his qilasiz. Siz o‘zingizga ishonasiz. Talab qilinsa, har doim chekina olasiz. Zarur vaqtda chekinish – o‘z manfaatlarini saqlab qolish ekanligini bilasiz. Chekinishdan or qilmaysiz, bu – sizning yutug‘ingizdir. Shu bois, tezda boshqa odam bilan ikkalangiz uchun qoniqarli va manfaatli bo‘lgan xulosalarga kelishingiz mumkin. Muzokaralarda sizdan unumli foydalanish imkoniyati mavjud. Sizdagi kelishuv va kompromissga borish qobiliyati konflikt vaziyatni, qisqa muddatga bo‘lsa ham, yechimga olib kelishi mumkin. Kompromissga bora oladigan odam ko‘pchilikda ishonch uyg‘otadi. Ishonch esa konflikt yechimining zarur shartlaridan biri hisoblanadi. Usulning kamchiliklari: Sizni adolatli yechimdan ko‘ra, ko‘proq tezkor yechim qiziqtiradi. Shu bois sizning yechimingiz adolatsiz va vaqtinchalik bo‘lishi mumkin. Siz shoshilasiz, shu sabab har doim ham konflikt yechimi uchun mavjud hamma yo‘llarni qidirib, topishga ulgurmaysiz. Konflikt yechimi siz aralashganda vaqtinchalik bo‘lib, keyin yana boshidan rivojlanib ketishi ehtimoli mavjud. Sizdagi qobiyaliyatga ishonib qolib, konfliktdagi bosh muammo – muammoligicha qolib ketishi mumkin. Hamkorlik usuli – «BOYO‘G‘LI» «Men hamkorlikka doim tayyorman!»

Siz o‘z xarakteringiz, bilimingiz va o‘zingizni tutishingiz bo‘yicha doimo hamkor rolini o‘ynashga tayyor odamsiz. Siz hamkorlik uchun ochiq va hozir inson hisoblanasiz. Shu bois, konflikt vaziyatda sizning butun diqqat–e’tiboringiz konflikt yechimini topshiga qaratilgan bo‘ladi. Siz hech kimni qoraralamaysiz, hech kimni ayblamaysiz. Siz boshqalarning so‘zlariga quloq tutasiz hamda boshqalarning his–tuyg‘ulari va ehtiyojlarini ham hisobga olasiz. Siz o‘z emotsiyalaringiz va tuyg‘ularingiz haqida tinch, osuda, hissiyotsiz gapira olasiz. Siz o‘z hissiyotlaringizni to‘la nazorat qila olasiz. Sizning ovozingiz, mimikangiz, nutqingiz, ochiq qalbingiz, samimiyligingiz – hammasi konflikt yechimini topishga qaratiladi. Siz konflikt yechimiga qaratilgan turli fikr va yo‘llarni taklif etasiz, siz har ikki tomon uchun ham adolatli yechimini topishga harakat qilasiz. Har ikkala tomonning manfaatlarini hisobga olish, ularning ikkalasi ham “g‘olib” bo‘la olishi, qoniqish hosil qilishi siz uchun muhim. Siz umumiy ikki yoqlama foydali xukm chiqarish uchun harakat qilasiz. Boshqalar bilan hamkorlikda har biringizni qanoatlantiruvchi qarorlarning bir necha variantlarini ishlab chiqa olasiz. Agar konflikt nazoratingizdan chiqib ketganligi hamda uni to‘laqonli ravishda o‘zingiz hal qilishga imkoniyatingiz yetmasligini his qilsangiz, yoki konfliktning zo‘ravonlikka o‘tib ketayotganligi anglasangiz, siz boshqalardan, ya’ni uchinchi bir tomondan yordam so‘rashga doimo tayyor turasiz. Sizning qaroringiz kelishuvchilik, kompromiss va norozilikka rozilik elementlarini qamrab oladi. Siz konfliktlarni to‘la yechimga olib kelishga qodirsiz. Usulning afzalliklari: Odatda sizning ko‘pchilik qarorlaringiz adolatli bo‘ladi va ular uzoq muddat amal qiladi. Sizning boshqalar bilan munosabatlaringiz ishonch asosiga quriladi. Atrofingizda odamlar, do‘stlar, og‘ayni-birodarlar, dugonalar ko‘p bo‘ladi. Sizga o‘z xis-tuyg‘ulari va sirlarini odamlar ishonadi. Siz boshqalarning qadr-qimmati va nafsoniyatini qadrlaysiz hamda toptalgan xis-tuyg‘ularni e’zozlaysiz. Kerak bo‘lganida siz uchun hamma yordamga tayyor turadi. Sizning

xarakteringizda anglangan bosiqlik, mushohadago‘ylik, mulohazakorlik kuchli bo‘ladi. Sizning qarorlaringizga kattalar ham, kichiklar ham bo‘ysunadi. Siz o‘zingizga mas’uliyat yuklay olasiz va adolatparvarlik posboni bo‘lib umr kechirasiz. Usulning kamchiliklari: Real hayotda “boyo‘g‘li” bo‘lish oson emas. U odamga juda katta mas’uliyat yuklaydi. Doimo boshqalar dardu-hasrati bilan yurishga to‘g‘ri keladi. Shu bois, hech kim «boyo‘g‘li» bo‘lish oson deb hisoblamaydi. «Boyo‘g‘li» bo‘lish odamdan ichki madaniyat, qadr – qimmatni e’zozlash, bilim va malaka, vaqt, mas’uliyat, jasorat va o‘ziga ishonch talab etadi. Mazkur barcha xislatlarni o‘zida tarbiyalash esa oson vazifa emas. Shu bilan birga mana shu qobiliyatni ishlata bilish ham osonlik bilan kechmaydi. Adolat posboni bo‘lishingiz hammaga ham yoqavermaydi, sizga qarshi bo‘lganlar ham mavjud bo‘ladi. Shunday qilib, konfliktlarni boshqarish usullari mavjud bo‘lib, har bir inson o‘z xarakteriga oid usulni qo‘llaydi. Konfliktlarni boshqarish usullarini bilish esa insonga o‘zini yaxshi anglashi va o‘z qadamlarini tahlil qila olishi uchun yordam beradi va ko‘maklashadi. Har bir usul afzalliklari va kamchiliklari mavjud. Shu bois, afzalliklarni kuchaytirish va kamchiliklardan o‘z xatti-harakatlarini tozalash ziddiyatli vaziyatlarda nizolarning oldini olishga imkon yaratadi. Konfliktlarni boshqarish usullari insondan o‘ziga xos malakalarni talab qiladi va aslida konfliktlarni boshqarish oson ish emas. Ammo konfliktlarni boshqarishga o‘rgangan inson har doim o‘z hayotini, atrofidalar hayotini muammolardan tozalab, ularning to‘g‘ri, adolatli va osuda yashashlari uchun muqobil shart- sharoitlar vujudga keltira oladi.

Adabiyotlar: 1. Karimova S. Kompozitsion mukammallik yo`lida//O`zbek tili va adabiyoti.- 1991.-№6.-B.54-58 2. K.Turdiyeva. Asar syujeti va kompozitsiyasi haqida//Til va adabiyot ta`limi 2001-№3. B. 23-27. 3. Qurbonov T. Portret yaratish uslubi haqida//O`zbek tili va adabiyoti.-1996.- №5.-B.47 4. Zarubejnaya estetika i teoriya literaturi XIX-XX vv.-M.,1987 5. Jirmunskiy V. Teoriya stixa.-L.,1975 6. Uspenskiy B. Poetika kompozitsii.-M.,1970

O'xshashlar

Ta’lim jarayonini boshqarish

Madaniy muassasalarni boshqarish.

Ta'limni boshqarish tizimi

Ta’lim sifatini boshqarish.

Korxonalarda xarajatlarni boshqarish