Tinchlik va osuda hayotimizni himoya qilish – muqaddas burch - Manaviyat asoslari - Referatlar

Tinchlik va osuda hayotimizni himoya qilish – muqaddas burch

Yuklangan vaqt:

20.09.2019

Ko'chirishlar soni:

0

Hajmi:

65.5 KB

Ko'chirib olish

Tinchlik va osuda hayotimizni himoya qilish – muqaddas burch Mamlakatimiz istiqlolga erishgan kundanoq O‘zbekiston milliy davlatchiligini, uning hududiy yaxlitligi, aholining tinch va osoyishta hayotini ta’minlash davlat siyosatining bosh masalalaridan biriga aylandi. Sobiq ittifoq davrida adolatsiz siyosatni harbiy sohada ham yaqqol ko‘rish mumkin edi. Jumladan, O‘zbekistondan chaqiriluvchilarning aksariyat qismi o‘sha davrda asosiy muloqot tili bo‘lgan “rus tilini bilmaydi”, “jismoniy jihatdan rivojlanmagan”, “bilim darajasi past”, “texnikani o‘zlashtira olmaganlar” degan asossiz bahonalar bilan ularni aksariyat hollarda ta’minot, qurilish hamda ikkinchi darajali vazifalarga yuborilar edi. Mamlakat xavfsizligining keng qamrovli konsepsiyasi ishlab chiqildi, uning huquqiy asosi yaratildi. Bu yo‘nalishda, avvalambor, 1991 yil 31 avgustda qabul qilingan “O‘zbekiston Respublikasi mustaqilligining asoslari to‘g‘risida”gi Qonunda mudofaa tizimini vujudga keltirishda mamlakat harbiy siyosatining belgilanishi, 1996 yil 24 aprelda O‘zbekiston Respublikasi Oliy Majlisining beshinchi sessiyasida ma’qullangan “Milliy xavfsizlik to‘g‘risida”gi Qonun, 1997 yil avgust oyida Oliy Majlis IX sessiyasida qabul qilingan O‘zbekiston Respublikasining Milliy xavfsizlik konsepsiyasi alohida ahamiyatga ega bo‘ldi. O‘zbekiston Respublikasi Oliy Kengashining 1991 yil 31 avgustda bo‘lib o‘tgan navbatdan tashqari o‘n ikkinchi sessiyasida qabul qilingan “O‘zbekiston Respublikasi davlat mustaqilligi to‘g‘risida”gi bayonotida “Davlat mustaqilligini, hududiy yaxlitligini, fuqarolarning konstitutsiyaviy huquqi va erkinligini himoya qilish maqsadida O‘zbekiston Respublikasi Mudofaa ishlari vazirligi va Milliy gvardiya tuziladi, respublika hududida joylashgan SSSR Ichki ishlar vazirligi, SSSR Davlat xavfsizlik komiteti hamda Ichki qo‘shinlar O‘zbekiston Respub likasi yurisdiksiyasiga olinadi” deb ko‘rsatildi. Bu 1991 yil 31 avgustda qabul qilingan “O‘zbekiston Respublikasi davlat mustaqilligining asoslari to‘g‘risida”gi qonunda huquqiy jihatdan mustahkamlandi va uning 6-moddasida “O‘zbekiston Respublikasi Mudofaa ishlari vazirligini tuzish, Milliy gvardiya va noharbiy (muqobil) xizmatni tashkil etish

huquqiga ega” deb mustahkamlandi. Bu amalda yosh respublikaga o‘z harbiy siyosatini belgilash va amalga oshirishning huquqiy asosini yaratib, Qurolli Kuchlarini tuzishga asos bo‘ldi. O‘zbekiston Respublikasi Prezidenti huzuridagi Vazirlar Mahkamasining 1991 yil 25 oktabrdagi “O‘zbekiston Respublikasi Mudofaa ishlari vazirligi masalalari bo‘yicha” Qarori asosida mamlakat Mudofaa ishlari vazirligi tashkil etildi va uning Nizomi hamda tashkiliy – shtat tuzilishi tasdiqlandi. Vazirlik mahalliy harbiy boshqaruv organlari, fuqarolar mudofaasi shtabi va armiya safidan tashqaridagi xizmatning maxsus boshqarmasi negizida tashkil qilindi. Keyinchalik Turkiston harbiy okrugining boshqaruv organlari negizida Mudofaa ishlari vazirligi Bosh shtabi va boshqarmasi hamda ularning joylardagi quyi bo‘linmalari tuzildi. 1991 yil 30 dekabr kuni Minsk shahrida MDH davlat rahbarlarining yig‘ilishida harbiy masala ko‘tarildi va unda O‘zbekiston Respublikasi birinchilardan bo‘lib o‘z Qurolli Kuchlarini tuzajagini bildirdi. Kengashda Qurolli Kuchlar va Chegara qo‘shinlari to‘g‘risidagi Bitim qabul qilindi. Hamdo‘stlik qatnashchilari bo‘lgan davlatlar o‘z qurolli kuchlarini tuzishlarini tasdiqladi. O‘zbekiston Respublikasi Oliy Kengashi tomonidan 1992 yil 10 yanvarda “O‘zbekiston Respublikasi hududida joylashgan SSSR Ichki ishlar vazirligining harbiy qismlari va o‘quv muassasalarini O‘zbekiston Respublikasi tasarrufiga olish to‘g‘risida”gi va 14 yanvarda “O‘zbekiston Respublikasi hududida joylashgan harbiy qismlar va harbiy o‘quv muassasalari to‘g‘risida”gi qarorlar qabul qilindi. Ushbu qarorlarga muvofiq, sobiq SSSR Qurolli Kuchlarining respublika hududida joylashgan qismlari, qo‘shilmalari, birlashmalari, harbiy o‘quv yurtlari, muassasalari, tashkilotlari va boshqa harbiy tuzilmalari qonuniy asosda O‘zbekiston Respublikasi yurisdiksiyasiga olindi. Mazkur qaror qabul qilingan kun – 14 yanvar, O‘zbekiston Respublikasining 1993 yil 29 dekabrdagi Qonuniga muvofiq, “Vatan himoyachilari kuni” deb e’lon qilindi. O‘zbekiston Respublikasi Prezidentining 1992 yil 18 maydagi “O‘zbekiston Respublikasi hududida joylashgan havo desanti qo‘shinlari, harbiy transport aviatsiyasi, razvedka qo‘shinlari, ta’minot qismlari haqida”gi, 1992 yil 12 noyabrdagi “O‘zbekiston

Respublikasi hududida joylashgan havo hujumiga qarshi harbiy qismlar haqida”gi, 13 noyabrdagi “O‘zbekiston Respublikasi hududida joylashgan kimyoviy harbiy qismlar haqida”gi farmonlari bilan mamlakatimiz hududida joylashgan mazkur turdagi qo‘shinlar respublika tasarrufiga olindi va sifat jihatidan takomillashtirildi. Mudofaa vazirligi tasarrufida quruqlikdagi qo‘shinlar, harbiy havo hujumidan mudofaa qo‘shinlari, harbiy havo kuchlari, maxsus va muhandislik-quruvchilik qo‘shinlari, Milliy gvardiya tashkil etilib, har bir qo‘shin turining aniq vazifalari belgilandi. Milliy xavfsizlik xizmati tasarrufidagi Chegara qo‘shinlari boshqarmasi 1992 yil 24 martda O‘zbekiston Respublikasi Prezidentining Farmoni bilan tashkil etildi. 1993 yil 26 aprelda esa davlat chegaralarini mustahkamlash, qo‘shinlarni boshqarishni mukammallashtirish va ularning xavfsizligini oshirish maqsadida Boshqarma O‘zbekiston Respublikasi Milliy xavfsizlik xizmatining chegara qo‘shinlari Bosh boshqarmasiga aylantirildi va uning zimmasiga davlat chegarasini himoya qilish hamda qo‘riqlash sohasidagi davlat siyosatini amalga oshirilishini ta’minlash vazifasi yuklandi. “O‘zbekiston Respublikasi Davlat chegaralarini qo‘riqlashni kuchaytirishning tashkiliy tadbirlari to‘g‘risida”gi Vazirlar Mahkamasining 1998 yil 30 noyabrdagi qarori davlat chegaralari himoyasini tashkil etishni yanada takomillashtirishda muhim voqea bo‘ldi. Bunga muvofiq, O‘zbekiston Respublikasi Davlat chegaralarini qo‘riqlash va himoya qilish Konsepsiyasi tasdiqlandi. O‘zbekistonda chegara qo‘shinlarini rivojlantirish va takomillashtirishdagi yangi davr – 1999 yilning 13 yanvardan amalga oshirila boshlandi. Xuddi shu kuni O‘zbekiston Respublikasi Prezidentining Farmoni bilan chegara qo‘shinlari Bosh shtabi negizida O‘zbekiston Respublikasi Davlat chegaralarini himoya qiluvchi qo‘mita tashkil topdi. Mamlakatimiz chegaralarini qo‘riqlash “O‘zbekiston Respublikasining Davlat chegarasi to‘g‘risida”gi 1999 yil 20 avgustda qabul qilingan qonuni asosida amalga oshirilib kelinadi. O‘zbekiston Respublikasi mudofaasini tashkil etishda Ichki ishlar vazirligining maxsus qism va bo‘linmalari qayta tashkil etildi. Mazkur qo‘shinlarga mamlakat ichki xavfsizligi va tinchligini ta’minlash, muhim davlat obyektlari, axloq tuzatish koloniyalarini qo‘riqlash, maxsus yuklarni kuzatib borish, jinoiy javobgarlikka tortilgan

shaxslarga sud jarayonlarida soqchilik qilish, maxsus harbiy operatsiyalarda qatnashish, terrorchilarga qarshi kurash kabi vazifalarni bajarish yuklatildi. Mamlakat aholisining xavfsizligini hamda ishlab chiqarish obyektlarining barqaror ishlashini samarali ta’minlash maqsadida Favqulodda vaziyatlar vazirligi tashkil etilgani diqqatga sazovor. Vazirlik O‘zbekiston Respublikasi Prezidentining 1996 yil 4 martda qabul qilingan “O‘zbekiston Respublikasi Favqulodda vaziyatlar vazirligini tashkil etish to‘g‘risida”gi Farmoniga asosan Mudofaa vazirligining tuzilmasi sifatida faoliyat ko‘rsatib kelgan Fuqaro mudofaasi va favqulodda vaziyatlar boshqarmasi negizida tashkil etildi. Shuni qayd etish lozimki, O‘zbekiston Respublikasi o‘z mudofaa tizimini yaratishda birinchi navbatda duch kelingan qiyinchilik bu kadrlar masalasi edi. Harbiy xizmatga jalb etilgan ofitserlarni tayyorlash maqsadida qisqa muddatli kurslar tashkil etildi. O‘zbekiston Respublikasi Qurolli Kuchlarini malakali kadrlar bilan ta’minlashni yo‘lga qo‘yish maqsadida O‘zbekiston Respublikasi Prezidenti – Qurolli Kuchlar Oliy Bosh Qo‘mondoni tashabbusi bilan yangi harbiy o‘quv muassasalari tashkil etish, ularda tayyorlanadigan mutaxassislarni ko‘paytirish masalalariga ham alohida e’tibor qaratildi. Bu yo‘nalishda O‘zbekiston Respublikasi Prezidentining 1993 yil 12 fevraldagi Farmoniga asosan Toshkent elektrotexnika va aloqa institutining maxsus fakulteti, Vazirlar Mahkamasining “O‘zbekiston Respublikasi Qurolli Kuchlari Akademiyasini tashkil etish to‘g‘risida”gi 1994 yil 15 iyuldagi Qaroriga muvofiq, O‘zbekiston Respublikasi Qurolli Kuchlar Akademiyasi, 1994 yil 18 martdagi qaroriga muvofiq Jizzax aviatsiya oliy harbiy bilim yurti tashkil etilgani harbiy sohadagi islohotlarni yanada chuqurlashtirishga xizmat qildi. O‘zbekiston Respublikasi Prezidentining 2001 yil 26 yanvardagi professional harbiy xizmatchilarni tayyorlashga ixtisoslashtirilgan serjantlar tayyorlash maktablariga asos solish haqidagi farmoni asosida Markaziy va Toshkent harbiy okruglarida 2001 yil may oyidan va 1 noyabridan Sharqiy va Janubi-g‘arbiy maxsus harbiy okruglarida, 2007 yilda Shimoli-g‘arbiy harbiy okrugida serjantlar tayyorlash maktabi tashkil etildi. Maktablarda mudofaa, ichki ishlar va chegara qo‘shinlari uchun mutaxassislar tayyorlash yo‘lga qo‘yildi. Maktablarda zamonaviy uslublar asosida modellashtirish

jarayonlarini o‘z ichiga olgan yangi ta’lim usullari joriy etildi. Amalga oshirilgan serunum ishlar natijasida professional kadrlar tanqisligi bartaraf etildi. O‘zbekiston Qurolli Kuchlari faoliyatining huquqiy negizini yaratish maqsadida mamlakat XII chaqiriq Oliy Kengashining 1992 yil 3 iyuldagi X sessiyasida O‘zbekiston Respublikasining “Mudofaa to‘g‘risida”gi, “Umumiy harbiy majburiyat va harbiy xizmat to‘g‘risida”gi, “Muqobil xizmat to‘g‘risida”gi Qonunlari qabul qilindi. Mazkur qonunlar asosida mamlakat mudofaasini tashkil etish, fuqarolarni harbiy xizmatni o‘tashlarining huquqiy asoslari yaratildi. “Mudofaa to‘g‘risida”gi Qonunga binoan O‘zbekiston Respublikasi Mudofaa ishlari bo‘yicha vazirligi Mudofaa vazirligiga aylantirildi. Mazkur sessiyada O‘zbekiston Qurolli Kuchlari safiga kirishda harbiy xizmatchilar tomonidan qabul qilinadigan Harbiy qasamyodning matni va qasamyod qildirish tartibi tasdiqlandi. Ta’kidlash joizki, bugungi kunda Harbiy qasamyod haqli ravishda jangchilarning axloqiy-ruhiy, ma’naviy va jangovar kodeksiga aylandi. Mazkur hujjatlarning qabul qilinishi mamlakat Qurolli Kuchlari faoliyatining ishonchli huquqiy negizini yaratdi, mudofaa asoslari va maqsadlari hamda mustaqil davlat armiyasining qurilishi tamoyillarini belgiladi. O‘zbekiston Respublikasining Konstitutsiyasida Qurolli Kuchlarning huquqiy mavqei uzil-kesil va eng yuksak darajada mustahkamlandi. Uning 125-moddasida: “O‘zbekiston Respublikasi Qurolli Kuchlari O‘zbekiston Respublikasining davlat suverenitetini va hududiy yaxlitligini, aholining tinch hayoti va xavfsizligini himoya qilish uchun tuziladi” deb belgilanishi davlat Qurolli Kuchlarining asl maqsad va vazifalarini dunyo hamjamiyati oldida yana bir bor namoyon etdi. Vatan himoyasi mamlakatning har bir fuqarosi uchun sharafli burch ekanligi O‘zbekiston Konstitutsiyasining 52-moddasida belgilab qo‘yildi. Unga asosan, “O‘zbekiston Respublikasini himoya qilish – mamlakat har bir fuqarosining muqaddas burchidir”. Ushbu modda O‘zbekiston Respublikasi “Umumiy harbiy majburiyat va harbiy xizmat to‘g‘risida”gi qonunining 1-moddasi bilan mustahkamlanadi. Mazkur moddada “O‘zbekiston Respublikasini tashqaridan bo‘ladigan qurolli tajovuzdan himoya qilish O‘zbekiston Respublikasi fuqarolarining konstitutsiyaviy burchi”, deb ko‘rsatildi.

Ushbu konstitutsiyaviy burchni ado etish O‘zbekiston Respublikasining “Mudofaa to‘g‘risida”gi Qonuni bilan mustahkamlandi. O‘zbekiston Qurolli Kuchlari fuqarolarning umumiy harbiy majburiyatlari asosida harbiy xizmatga chaqirish hamda fuqarolarning shartnomaga asosan harbiy xizmatga kirishi belgilandi. 1996 yil 9 oktabrda O‘zbekiston Respublikasi Prezidenti Farmoni bilan O‘zbekiston Respublikasi Qurolli Kuchlarining Ichki xizmat, Intizom, Garnizon qorovullik xizmatlari nizomlari tasdiqlandi. 1996 yil 14 oktabrda esa Mudofaa vazirining buyrug‘i bilan Saf nizomi harbiy hayotga joriy etildi. Mamlakat mudofaasining huquqiy bazasini tashkil etishda 1995 yilning 6 mayida O‘zbekiston Respublikasi Oliy Majlisida mamlakat Harbiy Doktrinasi loyihasining birinchi o‘qishda ma’qullanishi va mazkur hujjat xalq muhokamasi uchun matbuotda e’lon qilinishi hamda o‘sha yilning 30 avgust kuni O‘zbekiston Respublikasi Oliy Majlisining VIII sessiyasida qabul qilinishi katta ahamiyatga ega bo‘ldi. Mazkur hujjat muhokamasida keng xalq ommasining ishtirok etishi mamlakat mudofaa tizimini yaratish va mudofaani tashkil etish umumxalq ishi ekanligini yana bir bor ko‘rsatdi. Harbiy Doktrina davlatning ijtimoiy tuzumi va siyosati bilan belgilanadi. O‘zbekiston Respublikasining tashqi va mudofaa siyosati tamoyillaridan kelib chiqqan holda 2000 yil 3 fevralda O‘zbekiston Respublikasi Prezidenti huzuridagi Xavfsizlik kengashida O‘zbekiston Respublikasi Mudofaa Doktrinasining qabul qilinishi davlat harbiy siyosatining asosiy mohiyati mamlakat mudofaasiga qaratilganligini yana bir bor tasdiqladi. Mamlakatdagi mudofaa sohasidagi tub o‘zgarishlar, Markaziy Osiyo mintaqasidagi harbiy siyosiy vaziyatdan kelib chiqqan holda O‘zbekiston Respublikasining “Mudofaa to‘g‘risida”gi (yangi tahriri) Qonuni (2001 yil 11 may) va “Umumiy harbiy majburiyat va harbiy xizmat to‘g‘risida”gi (2002 yil 12 dekabr) Qonuni qayta ishlab chiqildi va O‘zbekiston Respublikasi Oliy Majlisi tomonidan qabul qilindi. O‘zbekiston Respublikasi Oliy Majlisining 1995 yil fevralda bo‘lib o‘tgan birinchi sessiyasida mamlakatimiz Prezidentining “O‘zbekistonni ijtimoiy-siyosiy va iqtisodiy rivojlantirishdagi asosiy tamoyillar” ma’ruzasining “Milliy xavfsizlikni

ta’minlash tamoyillari” nomli qismi mustaqil O‘zbekiston Respublikasining harbiy- siyosiy hujjati darajasiga ko‘tarildi. Unda ilk bor davlat harbiy siyosati, milliy xavfsizlik muammolari, yangi armiyaning qurilishi, mamlakatni mudofaaga tayyorlash, uning suvereniteti va hududiy yaxlitligini himoya qilishga bo‘lgan rasmiy qarashlar keng va to‘laqonli tarzda bayon etildi. Harbiy soha rivojlanishining siyosiy, iqtisodiy, ma’naviy jihatlari jamlanib, harbiy qurilishning strategiyasi va taktikasi asoslab berildi. Prezidentimiz Islom Karimov O‘zbekiston Respublikasi Birinchi chaqiriq Oliy Majlisning o‘n to‘rtinchi sessiyasida so‘zlagan nutqida xalq deputatlari e’tiborini yana bir bor Qurolli Kuchlarni, chegara va ichki qo‘shinlarni yagona davlat siyosati asosida bosqichma-bosqich chuqur isloh etish masalalariga qaratdi. Armiya islohotlari asosiy yo‘nalishlarining nazariy asoslarini ishlab chiqdi. Prezidentimiz “O‘zbekiston XXI asrga intilmoqda” asarida armiya islohotlarining maqsadi aniq bayon etildi. Unda “... armiyani, chegara qo‘shinlari va ichki qo‘shinlarni isloh qilishga doir davlat siyosatini amalga oshirish faqat mudofaa salohiyatimizni yuksaltirishga qaratilgan. Boshqacha aytganda, bu jarayon yagona maqsadni ijtimoiy-iqtisodiy va siyosiy islohotlarni amalga oshirish, demokratik jamiyat va huquqiy davlat qurish uchun, odamlarimizning tinch hayoti va bunyodkorlik mehnatini ta’minlash uchun shart-sharoit yaratib berishni ko‘zlab amalga oshirilmoqda”, deb ko‘rsatildi. Mamlakatimizda Qurolli Kuchlar tizimini professional asosda tashkil etishda harbiy islohotlar davri boshlanib, uch bosqichda amalga oshirildi. Harbiy islohotlarning birinchi bosqichi 1998 – 2000 yillarda o‘tkazildi. Bu davrda: – qo‘shinlarda tezkor boshqaruvni amalga oshirish maqsadida Toshkent (Toshkent shahri va viloyati), Sharqiy (Andijon, Namangan, Farg‘ona), Markaziy (Sirdaryo, Jizzax, Samarqand), Shimoli-g‘arbiy (Qoraqalpog‘iston Respublikasi, Xorazm), Janubi-g‘arbiy maxsus (Buxoro, Navoiy, Qashqadaryo, Surxondaryo) harbiy okruglari, chegara hududlar, ichki ishlar qo‘shinlarining hududiy qo‘shilmalari tuzildi; – muhim strategik yo‘nalishlarda qo‘shin guruhlari tashkil etildi; – qo‘shinlar, birlashmalar va qismlarni qaytadan joylashtirish tadbirlari mamlakat xavfsizligiga tahdid solayotgan xavf-xatarlarni chuqur tahlil qilish asosida, amalga oshirilishi mumkin bo‘lgan jangovar operatsiyalarning tartibi va yo‘nalishi, xususiyati

hamda mazmuni, shuningdek, Markaziy Osiyo mintaqasidagi harbiy harakatlar maydonining o‘ziga xos jihatlarini hisobga olgan holda o‘tkazildi; – havo hujumidan mudofaa qo‘shinlari bilan Harbiy havo kuchlari birlashtirildi hamda Harbiy havo kuchlari va havo hujumidan mudofaa qo‘shinlari tashkil etildi; – soni va tuzilishi, professional tarkibi jihatidan eng maqbul armiyani tuzish uchun amaliy harakatlar boshlandi. Maxsus operatsiyalarni amalga oshiruvchi kuchlar qismlarining tashkil etilishi – professional armiyaga o‘tishdagi ilk qadam bo‘ldi. Islohotlarning ikkinchi bosqichi 2000 – 2002 yillarni o‘z ichiga oladi. Bu davrda: – O‘zbekiston Mudofaa Doktrinasiga muvofiq, Mudofaa vazirligi va Chegara qo‘shinlari bo‘linmalari, Ichki ishlar vazirligi va Milliy xavfsizlik xizmatining maxsus qismlari, shuningdek, boshqa idoralarning harbiy tuzulmalarini o‘z ichiga olgan Qurolli Kuchlar tizimi yaratildi. Qurolli Kuchlarning yagona markazlashgan boshqaruvini tashkil etish maqsadida Mudofaa vazirligi bosh shtabi O‘zbekiston Qurolli Kuchlari Birlashgan shtabiga aylantirildi. – Mudofaa vazirligi, Chegara va Ichki qo‘shinlar qo‘shilma va qismlarining tubdan yangi jangovar, texnik ta’minot tizimi joriy etildi; – jangovar harakatlarni olib borish yuzasidan asosiy nizomiy hujjatlar, ko‘rsatmalar, yo‘riqnomalar yaratildi va qayta ishlandi; – serjantlar tayyorlash maktablari tashkil etildi. O‘zbekiston Respublikasi Oliy Majlisining 2002 yil 29-30 avgust kunlari bo‘lib o‘tgan sessiyasida mamlakatda mudofaa sohasida olib borilayotgan harbiy islohotlar deputatlar e’tiboriga havola etildi. Sessiya ishiga taklif etilgan harbiy okrug qo‘mondonlari o‘tgan davrda okruglarda olib borilgan tashkiliy hamda harbiy boshqaruv tizimida amalga oshirilgan ishlar to‘g‘risida ma’ruza qildilar. Ma’ruzalar harbiy islohotlar samarasini yana bir bor ko‘rsatdi. Islohotlarning uchinchi bosqichi 2002 – 2005 yillarni o‘z ichiga oladi. Bu davrda: – mamlakatda umumiy harbiy majburiyat va harbiy xizmat tubdan o‘zgardi; – O‘zbekiston fuqarolarining harbiy ta’lim va vatanparvarlik tarbiyasining uzluksiz ko‘p pog‘onali tizimi yaratildi.

Vazirlar Mahkamasining 2004 yil 12 apreldagi “O‘zbekiston Respublikasi Qurolli Kuchlari serjantlarining maqomi to‘g‘risida”gi Qaroriga asosan 5 yil davomida serjantlar tarkibi lavozimlarida benuqson xizmat qilgan harbiy xizmatchilarga test sinovlarida to‘planishi mumkin bo‘lgan eng ko‘p ballning 20 foizi miqdorida qo‘shimcha imtiyoz berish hamda “Eng ilg‘or serjant” tanlovining respublika bosqichi g‘oliblari oliy harbiy ta’lim muassasalariga tanlov (konkurs)dan tashqari qabul qilinish huquqiga ega bo‘ldi. O‘zbekiston Respublikasi Prezidentining 2005 yil 31 oktabrdagi qaroriga muvofiq, oliy harbiy ta’lim muassasalariga o‘qishga kiruvchi, harbiy xizmat davrida jangovar va ma’naviy-ma’rifiy tayyorgarlik bo‘yicha yuqori natijalarga erishgan, muddatli harbiy xizmatni tamomlab, belgilangan shakldagi tavsiyanomaga ega bo‘lgan fuqarolarga test sinovlarida to‘planishi mumkin bo‘lgan eng yuqori ballning 25 foizi miqdorida qo‘shimcha imtiyoz berildi. O‘zbekistonda harbiy xizmatchilarni ijtimoiy muhofaza qilishni kuchaytirish, ularni uy-joy, oziq-ovqat, mablag‘ va tibbiy xizmatlar bilan ta’minlash, harbiy kuchlarni texnik qayta jihozlash, harakatchanligini oshirish bo‘yicha ulkan ishlar amalga oshirildi. Amalga oshirilgan bu ishlar Qurolli Kuchlarni har tomonlama takomillashtirdi, unga jangovarlik kasb etdi, shaxsiy tarkibni jipslashtirdi, mavjud harbiy-siyosiy vaziyatda mas’ul vazifalarni bajarishga qodirligini oshirdi, harbiy xizmatchilar va ularning oila a’zolari ijtimoiy himoyasini yanada takomillashtirdi, kadrlar tayyorlash tizimini jahon andozalari darajasiga ko‘tardi, mamlakatimizda hamda mintaqamizda tinchlik va barqarorlik kafolatiga aylantirdi.

Foydalanilgan adabiyotlar ro‘yxati: 1. O‘zbekiston Respublikasining Konstitutsiyasi. –T.: “O‘zbekiston”. 2008. 2. Karimov I.A. O‘zbekiston: milliy istiqlol, iqtisod, siyosat, mafkura. 1-jild. -T.: “O‘zbekiston”, 1996. 3. Karimov I.A. Bizdan ozod va obod Vatan qolsin. 2-jild. –T.: “O‘zbekiston”, 1996. 4. Karimov I.A. Vatan sajdagoh kabi muqaddasdir. 3-jild. –T.: “O‘zbekiston”, 1996. 5. Karimov I.A. Bunyodkorlik yo‘lidan. 4-jild. –T.: “O‘zbekiston”, 1996. 6. Karimov I.A. Yangicha fikrlash va ishlash – davr talabi. 5-jild. –T.: O‘zbekiston, 1997. 7. Karimov I.A. Xavfsizlik va barqaror taraqqiyot yo‘lidan. 6-jild. –T.: “O‘zbekiston”, 1998. 8. Karimov I.A. Biz kelajagimizni o‘z qo‘limiz bilan quramiz. 7-jild. –T.: “O‘zbekiston”, 1999. 9. Karimov I.A. Ozod va obod Vatan, erkin va farovon hayot – pirovard maqsadimiz. 8-jild. –T.: “O‘zbekiston”, 2000. 10. Karimov I.A. Vatan ravnaqi uchun har birimiz mas’ulmiz. 9-jild. –T.: “O‘zbekiston”, 2001.Karimov I.A. Xavfsizlik va tinchlik uchun kurashmoq kerak. 10-jild. –T.: “O‘zbekiston”, 2002

O'xshashlar

Sharqona, o’zbekona ma’naviy fazilatlar

Inson qalbiga yo’l

Islom dinida inson ma'naviyati va ma'rifati masalasi, shaxs ma'naviy qiyofasining talqini

Islohot – inson manfaatlari uchun

Millatlararo va fuqarolararo ahillik – eng katta boyligimiz