Бухгалтерия баланси, унинг тузилиши ва мазмуни - Iqtisodiyot - Referatlar

Бухгалтерия баланси, унинг тузилиши ва мазмуни

Yuklangan vaqt:

08.10.2023

Ko'chirishlar soni:

0

Hajmi:

167.5 KB

Ko'chirib olish

Бухгалтерия баланси, унинг тузилиши ва мазмуни Режа: 1. Баланс тўғрисида тушунча, унинг ҳисоб жараёнида тутган ўрни 2. Бухгалтерия балансининг турлари 3. Бухгалтерия балансининг таркибий тузилиши ва элементлари 4. Хўжалик операцияларининг бухгалтерия балансига таъсири ва балансдаги ўзгаришларнинг турлари

БАЛАНС ТЎҒРИСИДА ТУШУНЧА, УНИНГ ҲИСОБ ЖАРАЁНИДА ТУТГАН ЎРНИ Бухгалтерия ҳисобининг муҳим вазифаларидан бири бўлиб мулкга эгалик қилиш ҳуқуқини ифодаловчи Актив = Хусусий капитал+ Мажбуриятлар математик тенгликни ҳамма вақт таъминлаб бериш ва сақлаш ҳисобланади. Ушбу тенгликни таъминлаш учун бухгалтерия ҳисоби одатда, маълум бир даврнинг бошида актив, хусусий капитал ва мажбуриятларнинг бошланғич ҳолатини билишдан бошланиб, шу даврнинг охирида уларнинг охирги ҳолатини билиш билан якунланади. Бундай ахборотларни олиш усули бўлиб бухгалтерия баланси ҳисобланади. Бухгалтерия баланси негизида «баланс» сўзи ётади. Бу сўз лотинча « bis », яъни « иккита » ва « lanx », яъни «тарози палласи » сўзларидан олинган бўлиб, ўзаро тенглик, бир хиллик рамзи ҳисобланади. Шуни таъкидлаш жоизки, Бухгалтерия ҳисоби ва амалиётида «баланс» сўзи на фақат тенглик мазмунида, балким давлат аҳамиятига молик муҳим бухгалтерия ҳисоби хужжати сифатида ҳам талқин этилади. Ўзбекистон Республикасида бухгалтерия баланси хўжалик юритувчи субъектлар томонидан тузиладиган молиявий ҳисоботнинг таркибий қисми ҳисобланади. Унинг шакли, таркиби ва тузиш тартиби Молия Вазирлигининг 2002 йил 27 декабрдаги 140- сон буйруқ билан тасдиқланган «Молиявий ҳисобот шаклларини тўлдириш Қоидалари» билан, балансни тақдим этиш тартиби эса Молия Вазирлигининг 2000 йил 15 июндаги 47- сон буйруғи билан тасдиқланган «Чораклик ва йиллик молиявий ҳисоботларни тақдим этиш муддатлари тўғрисида Низом» да белгиланган. БУХГАЛТЕРИЯ БАЛАНСИНИНГ ТУРЛАРИ Корхоналар томонидан тузиладиган бухгалтерия балансини турли белгилари бўйича таснифлаш мумкин, масалан тузилган санасига, маълумотларни жамлаш

ҳажмига, субъектларни молиялаштирилишига, регулировка счетлари қолдиқлари ҳисобга олинганлигига ва бошқа белгиларига қараб (расмга қаранг). Тузилган санасига кўра бухгалтерия балансини қуйидаги турларга ажратиш мумкин: кириш (ёки таъсис) баланси; бошланғич ва ҳисобот баланси; тугатиш баланси; бирлаштириш ва ажратиш баланси. Кириш ёки таъсис баланси деганда корхонанинг давлат рўйхатидан ўтган санасига, яъни таъсис этилган кунига тузилган баланси тушунилади. Одатда ушбу санага тузилган баланснинг активида фақат таъсисчиларнинг янги ташкил этилган корхона олдидаги қарзи, баланснинг пассивида эса эълон қилинган устав капиталининг миқдори кўрсатилади.

расм. Бухгалтерия балансини таснифлаш асослари Бошланғич баланс деганда ҳисобот даври бошига, ҳисобот баланси деганда эса ҳисобот даврининг охирига тузилган баланс тушунилади. Ҳисобот баланси кейинги давр учун бошланғич баланс бўлиб ҳисобланади. Тугатиш баланси - корхона тугатилиши санасига тузилган баланс. Бирлаштириш баланси - икки ва ундан ортиқ корхоналар бир бири билан қўшилганда қўшилиш санасига тузилган баланс. Ажратиш баланси - бу корхона ихтиёридан мустақил бошқа корхона ажралиб чиқганда бир - бирига маблағларни топшириш ва қабул қилиш санасига тузилган баланс. Маълумотларни жамлаш даражасига кўра баланс йиғма ва алоҳида баланс турларига бўлинади. Йиғма баланс - бу бир тизим корхоналари баланслари моддаларини горизонтал ҳолда жамлаш натижасида тузилган баланс, масалан трест, концерн, компания, вазирлик ва шу каби юқори органлар томонидан тузилган баланс. Алоҳида баланс -бу ҳар бир ҳўжалик юритувчи субъект томонидан тузилган баланс. Ўз қарамоғида шўъба хўжалик жамиятларига эга бўлган бош корхоналар консолидациялаштирилган баланс тузадилар. Субектларни молиялаштирилишига қараб баланс бир биридан тубдан фарқ қиладиган давлат бюджетидаги муассасалар баланси ва хўжалик юритувчи субъектлар балансига бўлинади. Ҳисоб маълумотларини жамлаш циклларига кўра синов баланси, тузатилган синов баланси ва охирги якуний баланс турларини ажратиш мумкин. Синов баланси - бу вақтинчалик счетлар ёпилмасдан тузилган, шунингдек ҳисобот даври охиригаа айрим счетлар бўйича ҳисоб- китоблар маълум сабабларга кўра охиригача амалга оширилмаган ҳолда тузилган дастлабки баланс

Тузатилган синов баланси - мавжуд камчиликлар тузатилгандан сўнг, лекинда вақтинчалик счетлар ёпилмасдан тузилган баланс. Якуний баланс - бу вақтинчалик счетлар ёпилгач, молиявий натижалар тўғрисидаги ҳисобот ва тақсимланмаган файда тўғрисидаги ҳисоботларнинг маълумотлари эътиборга олиниб тузилган баланс. Охирги учта турдаги балансни тузиш тартиби чет эл корхоналари амалиётида кенг тарқалган. Регулировка счетлари қолдиқларини ҳисобга олиб баланс-брутто ва баланс - нетто тузилиши мумкин. Баланс- брутто - бу активлар суммасидан жамланган амортизация ва эскириш суммаларини, шунингдек савдо устамаларини, шубҳали қарзлар бўйича мавжуд резерв суммасини чегириб ташламасдан тузилган баланс. Ушбу баланс корхона активларининг реал қийматини ифода этмайди. Баланс-нетто - бу активлар суммасидан жамланган амортизация ва эскириш суммаларини, шунингдек савдо устамаларини, шубҳали қарзлар бўйича мавжуд резерв суммасини чегириб ташлаш йўли билан тузилган баланс. Ушбу баланс корхона активларининг реал қийматини ифода этади. БУХГАЛТЕРИЯ БАЛАНСИНИНГ ТАРКИБИЙ ТУЗИЛИШИ ВА ЭЛЕМЕНТЛАРИ Бухгалтерия балансининг тузилиши ва таркиби . Ҳам тенглик, ҳам хужжат сифатида эътироф этиладиган бухгалтерия баланси икки томонли, яъни чап ва ўнг томонли, жадвал кўринишига эга бўлади. Жадвалнинг чап томони «Актив», ўнг томони эса - «Пассив» номи билан аталади. Жадвалнинг «Актив» томонида корхонанинг хўжалик активлари уларнинг турлари бўйича, жадвалнинг «Пассив» томонида эса хўжалик активлари уларнинг ташкил топиш манбалари бўйича акс эттирилади. «Актив» ва «Пассив» томонларда кўрсатилган активлар ва уларнинг ташкил топиш манбалари суммаларининг йиғиндиси бир бирига тенг келади, айнан шу тенглик «баланс» дейилади. Жадвал кўринишидаги бухгалтерия баланси ички томондан бўлимлардан, бўлимлар эса- алоҳида моддалардан иборат бўлади.

Баланс бўлими деганда корхона активларини ва уларнинг ташкил топиш манбаларини ифодаловчи моддалар суммасини у ёки бу белгисига қараб жамлаш усули тушунилади. Баланс моддаси деганда баланснинг ҳар бир қатори тушунилади, ҳар бир қатор эса ўз навбатида битта ёки бир нечта бухгалтерия ҳисоби счетларини ўз ичига олади. Шунинг учун ҳам баланснинг тасдиқланган шаклида ҳар бир модда бўйича қавс ичида тегишли счетларнинг тартиб рақамлари кўрсатилган. Ўзбекистон Республикасида қўлланилаётган бухгалтерия балансининг «Актив» томони хўжалик активларини хизмат муддатига кўра қуйидаги иккита бўлим бўйича тизимлашга асосланган: I -бўлим . « Узоқ муддатли активлар». Ушбу бўлимда 1 йилдан кўп муддатда оборотда бўладиган асосий воситалар, номоддий активлар, молиявий ва капитал инвестициялар, шунингдек узоқ муддатли дебиторлик қарзлар ва муддати узайтирилган харажатларнинг қолдиқ суммалари кўрсатилади. II-бўлим . «Жорий активлар». Ушбу бўлимда 1 йилдан кам муддатда оборотда бўладиган ишлаб чиқариш захиралари ва харажатлари, тайёр маҳсулотлар ва товарлар, пул маблағлари, дебиторлик қарзлар ва бошқа жорий активларнинг қолдиқ суммалари кўрсатилади. Баланснинг «Пассив » томони хўжалик активларини ташкил топиш манбаларини турига қараб қуйидаги иккита бўлим бўйича тизимлашга асосланган: I -бўлим . «Ўз маблағларининг манбаи». Ушбу бўлимда устав капитали, қўшилган капитал, резерв капитали, тақсимланмаган фойда ва хусусий капиталнинг бошқа элементларининг қолдиқ суммалари кўрсатилади. II-бўлим . «Мажбуриятлар». Ушбу бўлимда корхонанинг юридик ва жисмоний шахслар олдидаги қарзларининг қолдиқ суммаси кўрсатилади. Бухгалтерия балансида бўлимлар бўйича маълумотлар алоҳида қаторда, иккала бўлим суммаларининг йиғиндиси алоҳида қаторда акс эттирилади. Айрим моддалар бўйича қавс ичида ўзаро айирмалар кўринишида кўрсатилган счетлар уларнинг биринчиси суммасидан иккинчисини суммасини

айириб ташлагандан кейин қоладиган суммани шу қаторга ёзишни билдиради. Бундан ташқари бухгалтерия балансида маълумотлар, мос равишда, ҳисобот давр бошига ва ҳисобот давр охирига алоҳида устунларда кўрсатилади. Бу баланс моддаларидаги ўзгаришларни визуал назорат қилиб бориш имконини беради. Бухгалтерия баланси тўғрисида тасаввурни равшанлаштириш учун қуйида унинг қисқартирилган шакли ва таркиби шартли маълумотлар билан келтирилган. «Баҳор» хусусий корхонасининг бухгалтерия баланси ( минг сум ҳисобида) Актив Сумма Пассив Сумма 1- бўлим. Узоқ муддатли активлар 1-бўлим. Ўз маблағларининг манбаи Асосий воситалар 2000 Устав капитали 5000 Номоддий активлар 100 Тақсимланмаган фойда 1000 Молиявий инвестициялар 500 Резервлар 200 1-бўлим бўйича жами 2600 1-бўлим бўйича жами 6200 2-бўлим. Жорий активлар 2-бўлим. Мажбуриятлар Ишлаб чиқариш захиралари 4500 Қисқа муддатли кредитлар 1000 Тайёр махсулотлар 1500 Тўланадиган счетлар 600 Товарлар 1300 Олинган аванслар 1400 Пул маблағлари 200 Бюджет олдидаги қарзлар 600 Дебиторлик қарзлар 500 Иш ҳақи бўйича қарзлар 500 2- бўлим бўйича жами 8000 Суғурта бўйича қарзлар 200 Бошқа қарзлар 100 2- бўлим бўйича жами 4400 БАЛАНС 10600 БАЛАНС 10600 ХЎЖАЛИК ОПЕРАЦИЯЛАРИНИНГ БУХГАЛТЕРИЯ БАЛАНСИГА ТАЪСИРИ ВА БАЛАНСДАГИ ЎЗГАРИШЛАРНИНГ ТУРЛАРИ Фаолият кўрсатаётган корхонанинг баланси ўзгаришсиз қолиши мумкин эмас, чунки содир бўлган хўжалик жараёнлари ва операциялари албатта активлар ва уларни ташкил топиш манбаларининг давр бошидаги ҳолатига таъсир кўрсатмасдан қолмайди. Мисол учун, корхона ўз устав капиталини

кўпайтирса ёки камайтирса бу албатта ҳам активга, ҳам пассивга таъсир ўтказади. Ёки омбордан материал

ишлаб чиқаришга берилса активларнинг таркибида ўзгариш юз беради, иш ҳақидан даромад солиғи ушланса, активларни ташкил топиш манбалари таркибида ички ўзгариш юз беради. Бундай мисолларни кўплаб келтириш мукин. Демак, юз берган операциялар натижасида балансда турли ўзгаришлар бўлиб туради. Ушбу ўзгаришларни тўртта типга ажратиш мумкин: Ўзгариш типи Ўзгаришнинг номи 1-тип Бухгалтерия балансининг активи таркибидаги ўзгаришлар 2-тип Бухгалтерия балансининг пассиви таркибидаги ўзгаришлар 3-тип Бухгалтерия баланси активи ва пассивининг кўпайишига олиб келувчи ўзгаришлар 4-тип Бухгалтерия баланси активи ва пассивининг камайишига олиб келувчи ўзгаришлар БАЛАНС АКТИВИ ТАРКИБИДАГИ ЎЗГАРИШЛАР Бу типдаги ўзгаришлар, мазмунидан кўриниб турибдики, фақат бухгалтерия балансининг актив қисмига кирувчи элементларга (моддаларга) тегишлидир. Яъни юз берган хўжалик операцияси фақат актив элементларига тегишлидир. Корхонада юз берган операция натижасида бир актив кўпаяди, иккинчиси эса камаяди. Пировардида эски баланс ўзгаришсиз қолади. Бу тип ўзгаришнинг формуласи қуйидагича бўлади: А +Х –Х = П Мисоллар: № Хўжалик операцияси мазмуни Операцияни баланс моддаларига таъсири 1 Кассадаги пуллар банкдаги ҳисоб-китоб счётига топширилди Касса моддасидаги сумма камаяди, Ҳисоб-китоб моддасидаги сумма кўпаяди. Бироқ баланснинг олдинги суммаси ўзгармайди

2 Кассага пуллар банкдаги ҳисоб- китоб счётидан келиб тушди Касса моддасидаги сумма кўпаяди, Ҳисоб-китоб моддасидаги сумма камаяди. Бироқ баланснинг олдинги суммаси ўзгармайди 3 Омбордан материаллар ишлаб чиқаришга сарфланди Материаллар моддасидаги сумма камаяди, тугалланмаган асосий ишлаб чиқариш моддасидаги сумма кўпаяди. Бироқ баланснинг олдинги суммаси ўзгармайди 4 Ишлаб чиқаришдан тайёр маҳсулот олинди Тугалланмаган асосий ишлаб чиқариш моддасидаги сумма камаяди, тайёр маҳсулот моддасидаги сумма кўпаяди. Бироқ баланснинг олдинги суммаси ўзгармайди 5 Корхона банкдаги ҳисоб- китоб счётидан бошқа корхонага қарз сифатида пул ўтказиб берди Ҳисоб-китоб моддасидаги сумма камаяди, молиявий инвестиция моддасидаги сумма кўпаяди. Бироқ баланснинг олдинги суммаси ўзгармайди 6 Корхонанинг ҳисоб-китоб счётига бошқа корхонага олдин берилган қарз суммаси келиб тушди Ҳисоб-китоб моддасидаги сумма кўпаяди, молиявий инвестиция моддасидаги сумма камаяди. Бироқ баланснинг олдинги суммаси ўзгармайди БАЛАНС ПАССИВИ ТАРКИБИДАГИ ЎЗГАРИШЛАР Бу типдаги ўзгаришлар, мазмунидан кўриниб турибдики, фақат бухгалтерия балансининг пассив қисмига кирувчи элементларга (моддаларга) тегишлидир. Яъни юз берган хўжалик операцияси фақат пассив элементларига тегишлидир. Корхонада юз берган операция натижасида битта пассив кўпаяди, иккинчиси эса камаяди. Пировардида эски баланс ўзгаришсиз қолади. Бу тип ўзгаришнинг формуласи қуйидагича бўлади: А = П + Х –Х

Мисоллар: № Хўжалик операцияси мазмуни Операцияни баланс моддаларига таъсири 1 Тақсимланмаган фойданинг бир қисми резерв капиталига ўтказилди Тақсимланмаган фойда моддасидаги сумма камаяди, резерв капитали моддасидаги сумма кўпаяди. Бироқ баланснинг олдинги суммаси ўзгармайди 2 Резерв капитали тақсимланмаган фойдага ўтказилди Тақсимланмаган фойда моддасидаги сумма кўпаяди, резерв капитали моддасидаги сумма камаяди. Бироқ баланснинг олдинги суммаси ўзгармайди 3 Тақсимланмаган фойдадан таъсисчиларга дивиденд ҳисобланди Тақсимланмаган фойда моддасидаги сумма камаяди, таъсисчилар олдидаги мажбуриятлар моддасидаги сумма кўпаяди. Бироқ баланснинг олдинги суммаси ўзгармайди 4 Тақсимланмаган фойданинг бир қисми устав капиталини кўпайтиришга йўналтирилди Тақсимланмаган фойда моддасидаги сумма камаяди, устав капитали моддасидаги сумма кўпаяди. Бироқ баланснинг олдинги суммаси ўзгармайди 5 Иш ҳақидан даромад солиғи ушлаб қолинди Иш ҳақи бўйича қарзлар моддасидаги сумма камаяди, бюджетга қарзлар моддасидаги сумма кўпаяди. Бироқ баланснинг олдинги суммаси ўзгармайди

БАЛАНС АКТИВИ ВА ПАССИВИНИНГ КЎПАЙИШИГА ОЛИБ КЕЛУВЧИ ЎЗГАРИШЛАР Бу типдаги ўзгаришлар, мазмунидан кўриниб турибдики, бухгалтерия балансининг ҳам активи, ҳам пассивига кирувчи элементларга (моддаларга) тегишлидир. Яъни юз берган хўжалик операцияси бир вақтнинг ўзида ҳам актив, ҳам пассив пассив элементларига тегишлидир. Корхонада юз берган операция натижасида корхонанинг активи ҳам, пассиви ҳам бир хил суммага кўпаяди. Пировардида эски баланс суммаси кўпайиш томонга ўзгаради. Бу тип ўзгаришнинг формуласи қуйидагича бўлади: А +Х = П+Х Мисоллар: № Хўжалик операцияси мазмуни Операцияни баланс моддаларига таъсири 1 Хом ашё ва материаллар таъминотчилардан қарзга олинди Материаллар моддасидаги сумма кўпаяди, таъминотчилар олдидаги қарзлар моддасидаги сумма кўпаяди. Мос равишда, баланс активи ва пассиви бир хил суммага кўпаяди 2 Ҳисоб-китоб счётига банк кредити келиб тушди Ҳисоб-китоб счёти моддасидаги сумма кўпаяди, олинган кредитлар бўйича қарз моддасидаги сумма ҳам кўпаяди. Мос равишда, баланс активи ва пассиви бир хил суммага кўпаяди 3 Таъсисчилар устав капиталини кўпайтиришга қарор қилдилар Таъсисчиларнинг қарзлари моддасидаги сумма кўпаяди, устав капитали моддасидаги сумма ҳам кўпаяди. Мос равишда, баланс активи ва пассиви бир хил суммага кўпаяди 4 Юқори ташкилотдан қайтариб бермаслик шарти Билан автомашина келиб тушди Асосий воситалар моддасидаги сумма кўпаяди, резерв капитали моддасидаги сумма кўпаяди. Мос равишда, баланс активи ва пассиви бир хил суммага кўпаяди

5 Валюта счётига хорижий банкдан чет Эл валютасида кредит олинди Ҳисоб-китоб счёти моддасидаги ва кредит моддасидаги сумма кўпаяди. Мос равишда, баланс активи ва пассиви бир хил суммага кўпаяди БАЛАНС АКТИВИ ВА ПАССИВИНИНГ КАМАЙИШИГА ОЛИБ КЕЛУВЧИ ЎЗГАРИШЛАР Бу типдаги ўзгаришлар, мазмунидан кўриниб турибдики, бухгалтерия балансининг ҳам активи, ҳам пассивига кирувчи элементларга (моддаларга) тегишлидир. Яъни юз берган хўжалик операцияси бир вақтнинг ўзида ҳам актив, ҳам пассив пассив элементларига тегишлидир. Корхонада юз берган операция натижасида корхонанинг активи ҳам, пассиви ҳам бир хил суммага кмаяди. Пировардида эски баланс суммаси камайиш томонга ўзгаради. Бу тип ўзгаришнинг формуласи қуйидагича бўлади: А -Х = П - Х Мисоллар: № Хўжалик операцияси мазмуни Операцияни баланс моддаларига таъсири 1 Кассадан ходимларга иш ҳақи берилди Касса счёти моддасидаги сумма кўмаяди, ходимлар олдидаги қарзлар моддасидаги сумма ҳам камаяди. Мос равишда, баланс активи ва пассиви бир хил суммага камаяди 2 Ҳисоб-китоб счётидан банк кредити қайтарилди Ҳисоб-китоб счёти моддасидаги сумма камаяди, олинган кредитлар бўйича қарз моддасидаги сумма ҳам камаяди. Мос равишда, баланс активи ва пассиви бир хил суммага камаяди.

3 Ҳисоб-китоб счётидан бюджетга солиқлар тўланди Ҳисоб-китоб-счёти моддасидаги сумма камаяди, бюджет олдидаги қарзлар моддасидаги сумма ҳам камаяди. Мос равишда, баланс активи ва пассиви бир хил суммага камаяди. 4 Валюта счётидан хорижий банкдан чет эл валютасида олинган кредит қайтарилди Валюта счёти моддасидаги ва кредит моддасидаги сумма камаяди. Мос равишда, баланс активи ва пассиви бир хил суммага камаяди. Демак, балансдаги ўзгаришларнинг типлари бўйича қуйидаги хулосаларни қилиш мумкин: • I - ва II - типдаги ўзгаришлар олдинги баланс суммасини ҳеч қачон ўзгартирмайди. • III - ва IY -типдаги ўзгаришлар албатта олдинги баланс суммасини ўзгаришига олиб келади, жумладан учинчи тип ўзгаришлар баланс суммасини ошишига, тўртинчи тип ўзгаришлар баланс суммасини камайишига сабаб бўлади. • ҳеч қачон балансдаги ўзгариш типлари бир вақтнинг ўзида активни бир суммага ошириб, пассивни эса ўша суммага камайтириши мумкин эмас. • ҳеч қачон балансдаги ўзгариш типлари активни бир суммага кўпайтиришга (камайтиришга), пассивни эса бошқа бир суммага кўпайтиришга (камайтиришга) олиб келиши мумкин эмас.

Адабиётлар : 1. Бакиева Х., Ризаев Н. Бухгалтерия хисоби назарияси. Укув кулланма. -Т.: Иктисод-молия, 2008 2. Каримов А., Исломов Ф., Авлокулов А. Бухгалтерия хисоби. Дарслик. -Т.: Шарк, 2004. 3. Пардаев А.Х., Пардаев Б.Х. Бошкарув хисоби. Укув кулланма. - Т.: Г.Еулом номидаги адабиѐт ва санъат нашриѐти, 2008. 4. Сатывалдыева Д.А. Бухгалтерский учет. Учебник. -Т.: IQTISODIYOT . 2015 г. 580 с. 5. Хамдамов Б.К., Исломов Ф.Р., Авлокулов А.З. Молиявий хисобот. Укув кулланма. - Т.: ―ИКТИСОД-МОЛИЯ‖, 2008. 7. Дусмуратов Р. Кишлок хужалигида бухгалтерия хисоби ва статистика асослари. -Т: Фан ва технология‖, 2014. 8. Жураев Н., Абдувохидов Ф., Сотиволдиева Д. Молиявий ва бошкарув хисоби. Дарслик (лотин алифбосида). -Т.: 2012 й. 480 б. 9. Холбеков Р.О. Бухгалтерия хисоби назарияси (лотин алифбосида). -Т.: Чулпон номидаги нашриѐт-матбаа ижодий уйи, 2011 й. 200 б.

O'xshashlar

Бухгалтерия баланси

Бухгалтерия баланси ва ҳисобот

Бухгалтерия баланси, счётлар ва иккиёқлама ёзув

Бозор ва унинг тузилиши

Бухгалтерия баланси ва молиявий натижалар тўғрисидаги ҳисоботларни тузиш ва такдим этиш