O'zbekistonda fuqarolik va uning konstitutsiyaviy asoslari - Huquqshunoslik - Referatlar

O'zbekistonda fuqarolik va uning konstitutsiyaviy asoslari

Yuklangan vaqt:

17.09.2022

Ko'chirishlar soni:

0

Hajmi:

77 KB

Ko'chirib olish

O`zbekistonda fuqarolik va uning konstitutsiyaviy asoslari Reja 1-. Fuqarolik tushunchasi 2-. O`zbekiston Respublikasi fuqaroligining huquqiy asoslari 3-. Fuqarolikni qabul qilish, o`zgartirish va yo`qotish 4-. O`zbekiston Respublikasi fuqaroligiga ega bo`lish va fuqarolikni yo`qotish asoslari 5-. O`zbekiston Respublikasida fuqarolikni to`xtatilishi 6-. Fuqarolik masalalari bilan shug`ullanuvchi davlat idoralari 7-. Fuqarolikka oid arizalar va taqdimnomalarni ko`rib chiqish tartibi

1-. Fuqarolik tushunchasi Fuqarolik deganda jismoniy shaxsning ma`lum bir davlat bilan mustahkam huquqiy bog`lanishiga aytiladi. Bunda fuqaroning tegishli davlatga nisbatan huquq va burchlari hamda uning suveren davlat tomonidan himoya qilinishida ifodalanadi. Mazkur huquqiy aloqa insonning tug`ilganida yuzaga kelib, uning butun umri davomida saqlanib qoladi. Ushbu bog`liqlik insonning tug`ilgan va yashayotgan hudud bilan cheklanmay, davlat tashqarisida ham o`z kuchini yo`qotmaydi. Fuqarolar huquqi va burchlarini davlat o`zi belgilab beradi. Turli mamlakatlarda fuqarolarning huquq va burchlari bir xil emas. Ular mamlakatning siyosiy, ijtimoiy iqtisodiy va madaniy darajasiga bog`liq. Ilk bor "fuqaro" atamasi Fransuz revolyutsiyasining 1799- yildagi "Inson va fuqaro huquqlari Deklaratsiyasi"da bayon etilgan. 1948-yilda BMT tomonidan qabul qilingan Inson huquqlari to`g`risidagi Umumjahon Deklaratsiyasiga binoan, har bir kishi tabiiy, ajralmas, daxlsiz huquq va erkinliklarga egadir. Barcha davlat idoralari inson huquqlari va erkinliklarini oliy ijtimoiy qadriyatlari, deb bilib, ularni ta`minlashga va muhofaza qilishga majburdirlar. O`zbekiston Konstitutsiyasining 21-moddasiga ko`ra O`zbekiston Respublikasining butun hududida yagona fuqarolik o`rnatiladi. O`zbekiston Respublikasining fuqaroligi, unga qanday asoslarda ega bo`lganligidan qat`i nazar, hamma uchun tengdir. Qoraqalpog`iston Respublikasining fuqarosi ayni vaqtda O`zbekiston Respublikasining fuqarosi hisoblanadi. Fuqaro tomonidan huquqlarning amalga oshirilishi boshqa kishilarning huquqlariga zid bo`lmasligi lozim. Har bir kishi Konstitutsiyada belgilangan vazifalarni bajaradi, jamiyatning normal rivojlanishi uchun shu vazifalar bajarilishi zarur.

Konstitutsiyaning qoidalari bevosita amal qiladi va barcha davlat idoralari, mansabdor shaxslar, jamoat tashkilotlari, fuqarolar tomonidan ijro etilishi majburiydir. Konstitutsiyada mustahkamlab berilgan barcha huquqlar va erkinliklar sud yo`li bilan himoya qilinishi lozim. Shaxs va jamiyatning o`zaro mas`uliyati - huquqiy davlatning ajralmas belgisidir. Nodemokratik davlatda faqat fuqaroning davlat oldidagi mas`uliyati tan olinadi. U go`yo fuqaroga huquq va erkinlik berayotganday bo`ladi va uning maqomini tayinlaydi. Huquqiy davlatda esa buning aksini ko`ramiz. Bu yerda davlat organlari va mansabdor shaxslarning fuqarolar qoshida ularning huquq va erkinliklari uchun mas`ulligi masalasiga e`tibor qaratiladi. Bu mas`uliyat fuqarolarning huquq va erkinliklari buzilishida aybdor bo`lgan mansabdor shaxslarning javobgarlikka tortilishini ta`minlaydigan va keskin jazo choralari ko`rilishini ko`zda tutadigan tegishli me`yoriy-huquqiy hujjatlar mavjud bo`lgan sharoitdagina amaliy tus kasb etadi. Fuqarolarning huquq va erkinliklari buzilmasligining muhim kafolati konstitutsiyaviy qoida bo`lib, unga binoan davlatning hokimiyat tuzilmalari har bir kishiga uning huquq va erkinliklariga bevosita tegishli bo`lgan hujjatlar va materiallar bilan tanishishni ta`minlashga majbur. Huquqiy davlatda har bir fuqaroning o`z huquq va erkinliklarini himoya qilish huquqi tan olinadi. 2. O`zbekiston Respublikasi fuqaroligining huquqiy asoslari O`zbekiston Respublikasi Oliy Kengashi tomonidan 1992- yil 2- iyulda “O`zbekiston Respublikasining fuqaroligi to`g`risida”gi Qonunida fuqarolik masalalari, uning huquqiy holati qonun yo`li bilan mustahkamlangan. O`zbekiston Respublikasining fuqaroligi shaxs bilan davlatning doimiy siyosiy-huquqiy aloqasini belgilaydi bu aloqa ularning o`zaro huquq va burchlarida ifodalanadi. O`zbekiston Respublikasida har bir kishi fuqaro bo`lish huquqiga egadir. Hech kim fuqarolikdan yoki fuqarolikni o`zgartirish huquqidan mahrum qilinishi

mumkin emas. O`zbekiston Respublikasi o`z idoralari va mansabdor shaxslari orqali fuqarolar oldida mas`uldirlar, fuqaro esa davlat oldida mas`uldir. O`zbekiston Respublikasi hududida va uning tashqarisida o`z fuqarolarining huquq, erkinliklarini va manfaatlarini himoya qiladi. O`zbekiston Respublikasining fuqarolari fuqarolikni olish asoslaridan qat`iy nazar barcha uchun tengdir. O`zbekiston Respublikasining fuqarolari kelib chiqishidan, ijtimoiy va mulkiy holatidan, irqi, millati, jinsi, ma`lumoti, tili, dini, siyosiy va boshqa e`tiqodlaridan, mashg`ulotining turidan hamda boshqa holatlardan qat`iy nazar, qonun oldida tengdirlar. O`zbekiston Respublikasi fuqarolarining teng huquqliligi iqtisodiy, siyosiy, ijtimoiy va madaniy turmushning barcha sohalarida ta`minlanadi. Qoraqalpog`iston Respublikasining fuqarosi ayni bir paytda O`zbekiston Respublikasining ham fuqarosidir. Quyidagilar O`zbekiston Respublikasining fuqarolari bo`ladilar: Kelib chiqishi, ijtimoiy va mulkiy holatidan, irqi va millatidan, jinsi, ma`lumoti, tili, siyosiy qarashlari, diniy e`tiqodidan, mashg`ulotining turi va saviyasidan qat`iy nazar, ushbu Qonun kuchga kirgan vaqtda O`zbekiston Respublikasida doimiy yashab turgan, boshqa davlatlarning fuqarolari bo`lmagan hamda O`zbekiston Respublikasining fuqarosi bo`lish istagini bildirgan shaxslar: Davlat yo`llanmasi bilan O`zbekiston Respublikasidan tashqarisida ishlayotgan, harbiy xizmatni o`tayotgan yoki o`qiyotgan shaxslar, agar ular O`zbekiston Respublikasining hududida tug`ilgan bo`lsalar yoki doimiy yashaganliklarini isbot qilgan bo`lsalar, boshqa davlatlarning fuqarolari bo`lsalar va ushbu Qonun kuchga kirganidan keyin kechi bilan bir yil ichida O`zbekiston Respublikasining fuqarosi bo`lish istagini bildirgan bo`lsalar: O`zbekiston Respublikasi Qonunlariga muvofiq O`zbekiston Respublikasining fuqaroligini olgan shaxslar. O`zbekiston Respublikasi fuqarosi bo`lgan erkak yoki ayolning chet el fuqarosi bilan yohud fuqaroligi bo`lmagan shaxs bilan nikohdan o`tishi,

shuningdek bunday nikohning bekor qilinishi er yoki xotinning fuqaroligini to`xtatilishiga olib kelmaydi. Konstitutsiyaning 22-moddasiga muvofiq O`zbekiston Respublikasi o`z hududida ham, uning tashqarisida ham o`z fuqarolarini huquqiy himoya qilish va ularga homiylik ko`rsatishni kafolatlaydi. O`zbekiston Respublikasi hududida yashab turgani holda O`zbekiston Respublikasi fuqarosi bo`lmagan va chet davlat fuqaroligiga mansubligini isbotlaydigan dalillari bo`lmagan shaxslar fuqaroligi bo`lmagan shaxslar deb hisoblanadi. O`zbekiston Respublikasida har bir shaxs fuqaro bo`lish huquqiga egadir. Hech kim fuqarolikdan yoki fuqarolikni o`zgartirish huquqidan mahrum qilinishi mumkin emas. O`zbekiston Prezidenti I.A.Karimov O`zbekiston Respublikasi Konstitutsiyasining bir yilligi munosabati bilan qilgan ma`ruzasida shunday degan edi: "Shaxs O`zbekiston Respublikasi fuqaroligini qabul qilar ekan, bu bilan u Konstitutsiyamiz va qonunlarimizda mustahkamlab qo`yilgan huquq va erkinliklarga ega bo`ladi. Shuningdek, u ma`lum burchlarni ham bajarishga majburdir. Tabiiyki, O`zbekiston davlati ham fuqarolarning manfaatlari va erkinliklarini Respublika hududida va uning tashqarisida himoya qilish majburiyatini o`z zimmasiga oladi ". 1 3. Fuqarolikni qabul qilish, o`zgartirish va yo`qotish Fuqarolikni qabul qilish, o`zgartirish va yo`qotish alohida davlatlarning ichki qonunchiligi – Konstitutsiyalar, fuqarolik qonunlari va qonunchilik aktlari asosida amalga oshiriladi. Fuqarolikning yuzaga kelishi (kelib chiqishi) naturalizatsiya yo`li bilan, xalqaro shartnoma asosida va ayrim hollarda - reintegratsiya (tiklanish) orqali va taqdim etish yo`li bilan amalga oshiriladi. 1 .Каримов И.А. Буюк келажагимизнинг ҳуқуқий кафолати. Т.: "Шарқ", 1993, 9-бе т .

Fuqarolikni qabul qilishning asosiy yo`li tug`ilish orqali kelib chiqadi, qolgan barcha usullari kam uchraydi. Sababi ko`p kishilar tug`ilishi bilan fuqarolikni qabul qilib, o`z umri davomida uni o`zgartirmaydi. Tug`ilish bo`yicha fuqarolikka ega bo`lish 2 ta asosiy shaklga ega: "Qon huquqi" (jus sanguinus) asosida chaqaloqning fuqaroligi ota-onasining fuqaroligi bilan belgilanib, tug`ilgan joyiga bog`lanmaydi. Bu maqsadga Yevropaning ko`p mamlakatlari, jumladan - Avstriya, Norvegiya, Finlandiya, Italiya va boshqalar amal qiladi. "Zamin huquqi" (jus soli) asosiga ko`ra, fuqarolik chaqaloqning tug`ilgan joyidan kelib chiqib, uning ota-onasi fuqaroligi bilan bog`liq bo`lmaydi. Masalan, Braziliya qonunchiligida belgilanishicha, bu davlat hududida tug`ilgan har bir shaxs Braziliya fuqarosi hisoblanadi. Fuqarolikni qabul qilishning usullaridan biri naturalizatsiya (fuqarolikni qabul qilish) bo`lib, bu umuman fuqaroligi bo`lmagan yoki boshqa davlat fuqarosi bo`lgan shaxs tomonidan fuqarolik olinishidir. Naturalizatsiya tartibda fuqarolik quyidagi hollarda qabul qilinadi: a) fuqaroligi bo`lmagan yoki fuqaroligini o`zgartirmoqchi bo`lgan shaxs so`rovnomasiga asosan; b) bir davlat fuqarosining boshqa davlat fuqarosi bilan nikohdan o`tishi asosida; v) fuqaroligi bo`lmagan yoki boshqa davlat fuqarosi bo`lgan bolani farzandlikka olishda. Naturalizatsiya asosida fuqarolik berish yoki rad etish davlat tomonidan o`rnatilgan qoidalar bilan belgilanadi. Naturalizatsiya asosida fuqarolikni berish yakka tartibda yoki manfaatdor shaxs (farzandlikka olishda) roziligi bilan amalga oshadi. Barcha mamlakatlarning qonunchiligi bir qator cheklanishlarga ega bo`lib, ular asosida shaxslarga siyosiy, ijtimoiy, diniy, milliy va boshqa sabablardan kelib chiqqan holda naturalizatsiyada rad etiladi.

Ko`pchilik davlatlarda uzoq vaqt xotin erining fuqaroligiga qabul qilindi degan tushuncha yuqori o`rinni egallab kelgan. Hozirgi paytda ko`pgina davlatlar qonunchiligi belgilashicha, ayol chet ellik shaxsga turmushga chiqayotib, o`z fuqaroligini saqlab qolishi yoki o`z istagi bilan naturalizatsiya tartibida erining fuqaroligini qabul qilishi mumkin. Bu tartib umumiy jihatdan qabul qilinib, turmushga chiqqan ayollarning fuqaroligi haqidagi 1957 yildagi Konvensiyada hamda ayollarni har tomonlama ta`qib etilishini bartaraf etish bo`yicha 1979 yil Konvensiyasida belgilab o`tilgan. Reintegratsiya (dastlabki fuqarolikni tiklash) kam uchraydi. Qoida bo`yicha reintegratsiya jarayonida soddalashtirilgan tartibdagi fuqarolikni qabul qilish tartibi qo`llaniladi. Xalqaro shartnomalar asosida fuqarolik qabul qilish va o`zgartirish ko`pincha bunday holatlar tinchlik haqidagi shartnomalar, reatriatsiya haqida kelishuvlar, hududiy masalalardagi kelishuvlar vaqtida bo`ladi. Bu usul bir necha davlatlarning birlashishi bilan bog`liq holda yangi davlat tarkib topishi yoki bir davlat bo`linishi natijasida bir necha davlatlar tuzilishida, bir qism hududning bir davlatda boshqa davlat tasarrufiga o`tishi (sessiya), shuningdek qo`shni davlatlar o`rtasida alohida hududlarning almashuvi chog`ida amalga oshiriladi. Hududiy o`zgarishlar vaqtida ko`ngilli ravishda fuqarolik tanlash (optatsiya), o`zgartirish (ko`chirish vaqtida), avtomatik tarzda fuqarolikning o`zgarishi (transfert) bo`lishi mumkin. Transfert vaqtida bir davlatdan boshqa davlatga o`tayotgan hudud aholisining, xohishidan qat`iy nazar, bir davlatdan ikkinchisiga o`tar edi. Transfert kam uchraydi. O`zbekiston Respublikasi Oliy Kengashining 1994 yil sentabridagi qarori bilan O`zbekiston Respublikasi "Konsullik munosabatlari to`g`risidagi Vena Konvensiyasiga" qo`shildi. Bu hujjatga asosan O`zbekiston Respublikasi konsullik tashkilotlari chet davlatlarda O`zbekiston fuqarolarining huquqlari va qonuniy manfaatlarini himoya qilishni ta`minlaydi.

4. O`zbekiston Respublikasi fuqaroligiga ega bo`lish va fuqarolikni yo`qotish asoslari O`zbekiston Respublikasi fuqaroligi quyidagi hollarda olinadi: tug`ilganda; O`zbekiston Respublikasi fuqaroligiga qabul qilinishi natijasida; O`zbekiston Respublikasining xalqaro shartnomalarida nazarda tutilgan asoslar bo`yicha; Fuqarolik to`g`risidagi Qonunda nazarda tutilgan boshqa asoslar bo`yicha. Tug`ilgan paytida ota-onasi O`zbekiston Respublikasi fuqarosi bo`lgan bola, O`zbekiston Respublikasi hududida yohud O`zbekiston Respublikasidan tashqarida tug`ilgan bo`lishidan qat`iy nazar, O`zbekiston Respublikasi fuqarosi hisoblanadi. Ota-onasining fuqaroligi har xil bo`lib, ulardan biri bola tug`ilgan paytida O`zbekiston Respublikasining fuqarosi bo`lgan quyidagi hollarda bola O`zbekiston Respublikasining fuqarosi hisoblanadi. agar u O`zbekiston Respublikasi hududida tug`ilgan bo`lsa: agar u O`zbekiston Respublikasi hududidan tashqarida tug`ilgan bo`lsayu, ota-onasi yoki ularning biri shu vaqtda O`zbekiston Respublikasida doimiy istiqomat joyiga ega bo`lsa. Ota-onasining fuqaroligi har xil bo`lib, ulardan biri bola tug`ilgan paytda O`zbekiston Respublikasining fuqarosi bo`lgan bo`lsa, agar bu vaqtda ota-ona O`zbekistondan tashqarida doimiy yashash joyiga ega bo`lgan bo`lsalar, O`zbekiston Respublikasidan tashqarida tug`ilgan bolaning fuqaroligi ota- onasining yozma tarzda ifodalangan kelishuvi bilan belgilanadi. Ota-onasidan biri bola tug`ilgan paytda O`zbekiston Respublikasi fuqarosi bo`lgan, boshqasi esa fuqaroligi yo`q shaxs bo`lgan yohud noma`lum bo`lgan taqdirda, bola qayerda tug`ilgan bo`lishidan qat`iy nazar, O`zbekiston Respublikasining fuqarosi hisoblanadi. Onasining fuqaroligi bo`lmagan bolaning otasi belgilanib, u O`zbekiston Respublikasi fuqarosi bo`lsa, 14 yoshga yetmagan bola, qayerda tug`ilgan bo`lishidan qat`iy nazar, O`zbekiston Respublikasining fuqarosi hisoblanadi.

Fuqaroligi bo`lmagan, O`zbekiston Respublikasida doimiy istiqomat joyiga ega bo`lgan shaxslarning O`zbekiston Respublikasi hududida tug`ilgan bolasi O`zbekiston Respublikasi fuqarosi hisoblanadi. Ota-onasi noma`lum bo`lgan va O`zbekiston hududida yashayotgan bola O`zbekiston Respublikasi fuqarosi hisoblanadi. Chet el fuqarolari va fuqaroligi bo`lmagan shaxslar o`z iltimoslariga ko`ra ushbu Qonunga binoan kelib chiqishidan, irqi va millatidan, jinsi, ma`lumoti, tilidan, dinga munosabatidan, siyosiy va boshqa e`tiqodlaridan qat`iy nazar O`zbekiston Respublikasi fuqaroligiga qabul qilinishi mumkin. O`zbekiston Respublikasining fuqaroligiga qabul qilish shartlari quyidagilardan iborat: chet el fuqaroligidan voz kechish; so`nggi besh yil davomida O`zbekiston Respublikasi hududida doimiy yashaganlik. Ushbu qoida O`zbekiston Respublikasining fuqarosi bo`lish istagini bildirgan shaxslarga, basharti ular shu yerda tug`ilgan va hech bo`lmasa ota- onasidan biri, buvasi yoki buvisi O`zbekiston Respublikasi hududida tug`ilganligini va boshqa davlatlarning fuqarosi emasligini isbotlasa, taalluqli bo`lmaydi; qonuniy tirikchilik manbaalarining mavjudligi; O`zbekiston Respublikasining Konstitutsiyasini tan olish va bajarish. Bu talablar alohida hollardagina O`zbekiston Respublikasi Prezidentining Qaroriga binoan O`zbekiston Respublikasi oldida buyuk xizmatlari yoki fan, texnika va madaniyat sohasida katta yutuqlari bo`lgan, shuningdek O`zbekiston Respublikasini qiziqtiradigan kasb yohud malakaga ega bo`lgan ayrim shaxslarga nisbatan hisobga olinmasligi mumkin. Agar shaxs: O`zbekiston Respublikasining konstitutsiyaviy tuzumini zo`rlik ishlatib o`zgartirishni yoqlab chiqayotgan bo`lsa; faoliyati O`zbekiston Respublikasining konstitutsiyaviy prinsiplariga zid bo`lgan partiyalar va o`zga tashkilotlarga a`zo bo`lgan bo`lsa;

O`zbekiston Respublikasining qonunlariga muvofiq ozodliqdan mahrum etilgan va jazoni o`tayotgan bo`lsa, uni O`zbekiston Respublikasining fuqaroligiga qabul qilish to`g`risidagi iltimonomasi rad etiladi. Ilgari O`zbekiston Respublikasining fuqarosi bo`lgan shaxs o`z iltimosiga binoan ushbu Qonun talablariga muvofiq O`zbekiston Respublikasi fuqaroligiga tiklanishi mumkin. 5. O`zbekiston Respublikasida fuqarolikni to`xtatilishi O`zbekiston Respublikasi fuqarolik quyidagi hollarda to`xtatiladi: O`zbekiston Respublikasi fuqaroligidan chiqish oqibatida; O`zbekiston Respublikasi fuqaroligini yo`qotish oqibatida; O`zbekiston Respublikasining xalqaro shartnomalarida nazarda tutilgan asoslarga binoan; Ushbu Qonunda ko`zda tutilgan boshqa asoslarga binoan. O`zbekiston Respublikasi fuqaroligini to`xtatilishi Qoraqalpog`iston Respublikasi fuqaroligining to`xtatilishiga sabab bo`ladi. Fuqarolik to`g`risidagi Qonunda belgilangan tartibda shaxsning iltimosnomasiga ko`ra O`zbekiston Respublikasi fuqaroligidan chiqishga ruhsat etiladi. Agar O`zbekiston Respublikasi fuqaroligidan chiqishni iltimos qiluvchi shaxs davlat oldidagi majburiyatlarini yoki fuqarolarning yohud davlat va jamoat tashkilotlarining muhim manfaatlari bilan bog`liq mulkiy majburiyatlarni bajarmagan bo`lsa, uning O`zbekiston Respublikasi fuqaroligidan chiqishi rad etilishi mumkin. Agar O`zbekiston Respublikasi fuqaroligidan chiqishni iltimos qiluvchi shaxs ayblanuvchi sifatida jinoiy javobgarlikka tortilgan yohud unga nisbatan qonuniy kuchga kirgan va ijro etilishi zurur bo`lgan sud hukmi bo`lsa yoki shaxsning O`zbekiston Respublikasi fuqaroligidan chiqishi O`zbekiston Respublikasi davlat xavfsizligi manfaatlariga zid bo`lsa, uning O`zbekiston Respublikasi fuqaroligidan chiqishiga yo`l qo`yilmaydi. Quyidagi hollarda O`zbekiston Respublikasi fuqaroligi yo`qotiladi:

shaxs chet davlatda harbiy xizmatga, xavfsizlik xizmati idoralariga, militsiyaga, adliya idoralariga yoki davlat hokimiyati va boshqaruvining boshqa idoralariga ishga kirganligi natijasida; agar chet elda doimiy yashovchi shaxs besh yil davomida uzrli sabablarsiz konsullik hisobida turmagan bo`lsa; agar O`zbekiston Respublikasi fuqaroligi yolg`onligi shak-shubhasiz ma`lumotlar yoki sohta xujjatlarni taqdim etish natijasida olingan bo`lsa. O`zbekiston Respublikasi Prezidentining farmoni chiqqan kundan boshlab O`zbekiston Respublikasining fuqaroligi yo`qotiladi. Ota-onalarining fuqaroligi o`zgarganligi natijasida ularning har ikkalasi O`zbekiston Respublikasi fuqaroligiga o`tganda yoki har ikkalasi O`zbekiston Respublikasi fuqaroligidan chiqqanda, o`z navbatida ularning 14 yoshga to`lmagan bolalarining fuqaroligi ham o`zgaradi. Agar bolaning ota-onasidan biri ma`lum bo`lsa, ana shu ota yoki onaning fuqaroligi o`zgarganida 14 yoshga to`lmagan bolaning fuqaroligi ham tegishli suratda o`zgaradi. O`zbekiston Respublikasi hududida yashovchi bolaning ota- onasi yoki yolg`iz otasi yo onasi bo`lmasa O`zbekiston Respublikasi fuqaroligidan chiqsalar va ayni bir paytda ular O`zbekiston Respublikasi fuqarolari vasiylikka yoki homiylikka olgan bolaning tarbiyasida ishtirok etmasalar, ota-ona, vasiy yoki homiyning iltimosiga ko`ra bola O`zbekiston Respublikasi fuqaroligini saqlab qoladi. Agar ota-onasidan biri O`zbekiston Respublikasi fuqarosiga aylansa, boshqasi chet el fuqaroligi bo`lmagan shaxs bo`lib qolaversa, O`zbekiston Respublikasi fuqaroligini olayotgan ota yoki onaning iltimosnomasiga ko`ra bola O`zbekiston Respublikasi fuqaroligini olishi mumkin. Agar ota-onasidan biri O`zbekiston Respublikasi fuqarosiga aylansa, boshqasi esa fuqaroligi bo`lmagan shaxs bo`lib qolaversa, O`zbekiston Respublikasi hududida yashovchi bola O`zbekiston Respublikasi fuqarosiga aylanadi.

Agar ota-onasidan biri O`zbekiston Respublikasi fuqarosiga aylansa, boshqasi esa fuqaroligi shaxs bo`lib qolaversa, O`zbekiston Respublikasidan tashqarida yashovchi bola O`zbekiston Respublikasi fuqaroligini olayotgan ota yoki onaning iltimosiga ko`ra O`zbekiston Respublikasi fuqaroligini olishi mumkin. Agar ota-onasidan biri O`zbekiston Respublikasi fuqaroligidan chiqsa, boshqasi esa O`zbekiston Respublikasi fuqarosi bo`lib qolaversa, bola O`zbekiston Respublikasi fuqaroligini saqlab qoladi. O`zbekiston Respublikasi fuqaroligidan chiqayotgan ota yoki onaning iltimosiga ko`ra bunday bolaning O`zbekiston Respublikasi fuqaroligidan chiqishiga ruxsat etilishi mumkin. Chet el fuqarosi yohud fuqaroligi bo`lmagan shaxs bo`lib, O`zbekiston Respublikasi fuqarolari tomonidan farzadlikka olinayotgan bola O`zbekiston Respublikasi fuqarosiga aylanadi. Chet el fuqarosi bo`lib, biri O`zbekiston Respublikasi fuqarosi bo`lgan, boshqasi esa fuqaroligi bo`lmagan shaxs bo`lgan er- xotin tomonidan farzandlikka olinayotgan bola O`zbekiston Respublikasi fuqarosiga aylanadi. Fuqaroligi bo`lmagan, biri O`zbekiston Respublikasi fuqarosi bo`lgan er- xotin tomonidan farzadlikka olinayotgan bola O`zbekiston Respublikasi fuqarosiga aylanadi. Chet el fuqarosi bo`lib, biri O`zbekiston Respublikasi fuqarosi bo`lgan, boshqasi chet el fuqarosi bo`lgan er-xotin tomonidan farzandlikka oluvchilarning kelishuviga ko`ra O`zbekiston Respublikasi fuqarosiga aylanadi. O`zbekiston Respublikasi fuqarosi bo`lgan, chet el fuqarolari tomonidan farzandlika olingan yoki biri O`zbekiston Respublikasi fuqarosi, boshqasi chet el fuqarosi bo`lgan er-xotin tomonidan farzadlikka olingan bola O`zbekiston Respublikasi fuqaroligini saqlab qoladi. Farzandlikka oluvchilarning iltimosnomasiga ko`ra bunday bolaning O`zbekiston Respublikasi fuqaroligidan chiqishiga ruxsat berilishi mumkin. O`zbekiston Respublikasi fuqarosi bo`lgan, bolani fuqaroligi bo`lmagan shaxslar tomonidan farzandlikka olingan yoki biri O`zbekiston Respublikasi

fuqarosi bo`lgan, boshqasi fuqaroligi bo`lmagan shaxs bo`lgan er-xotin tomonidan farzandlikka olingan bola O`zbekiston Respublikasi fuqaroligini saqlab qoladi Ota-onalarning fuqaroligi o`zgargan taqdirda, shuningdek bolalar farzandlikka olingan taqdirda 14 yoshdan 18 yoshgacha bo`lgan bolalarning fuqaroligi Fuqarolik to`g`risidagi Qonunning 34-moddasida ko`zda tutilgan tartibda faqat bolalarning roziligi bilan o`zgartirilishi mumkin. 6-§. Fuqarolik masalalari bilan shug`ullanuvchi davlat idoralari O`zbekiston Respublikasi fuqaroligi to`g`risidagi ishlarni yurituvchi O`zbekiston Respublikasining davlat idoralari quyidagilardan iborat: O`zbekiston Respublikasining Prezidenti; O`zbekiston Respublikasining Ichki ishlar vazirligi; O`zbekiston Respublikasining Tashqi ishlar vazirligi; O`zbekiston Respublikasining diplomatiya vakolatxonalari va konsullik muassasalari. O`zbekiston Respublikasi Prezidentining fuqarolik masalalariga oid vakolatlari quyidagilardan iborat: O`zbekiston Respublikasi hududida doimiy yashovchi chet el fuqarolari fuqaroligi bo`lmagan shaxslarni O`zbekiston Respublikasi fuqaroligiga qabul qilish to`g`risida; Chet elda yashayotgan ajnabiy fuqarolar va fuqaroligi bo`lmagan shaxslar O`zbekiston Respublikasi Prezidentiga tegishli iltimosnoma bilan murojaat etgan taqdirda ularni O`zbekiston Respublikasi fuqaroligiga qabul qilish to`g`risida; O`zbekiston Respublikasi fuqaroligidan chiqish to`g`risida; O`zbekiston Respublikasi fuqaroligini yo`qotish to`g`risida qaror qabul qiladi. O`zbekiston Respublikasi Ichki ishlar vazirligi va uning tegishli idoralariga berilgan vakolatlar: O`zbekiston Respublikasida doimiy yashovchi shaxslardan O`zbekiston Respublikasi fuqaroligi masalalariga oid arizalarni qabul qiladi;

O`zbekiston Respublikasi fuqaroligi masalalariga doir arizalarni asoslash maqsadida keltirilgan dalil va hujjatlarni tekshiradi; fuqarolik masalalariga doir arizani zarur hujjatlar bilan birga O`zbekiston Respublikasi Prezidenti huzuridagi fuqarolik masalalari bo`yicha komissiyaga yo`llaydi; chet elda doimiy yashab turgan shaxslarning O`zbekiston Respublikasi fuqaroligiga mansubligini aniqlaydi; Chet elda doimiy yashab turgan shaxslarning O`zbekiston Respublikasi fuqaroligini yo`qotganligini qayd etadi; O`zbekiston Respublikasining chet elda doimiy yashab turgan fuqarolarini hisobga oladi. O`zbekiston Respublikasi Tashqi ishlar vazirligi, O`zbekiston Respublikasi diplomatiya vakolatxonalari va konsullik muassasalari: 1) chet ellarda doimiy yashab turgan shaxslardan O`zbekiston Respublikasi fuqaroligi masalalariga oid ariazalarni qabul qiladi; 2) O`zbekiston Respublikasi fuqaroligi masalalariga doir arizani asoslash maqsadida keltirilgan dalil va hujjatlarni tekshiradi; 3) fuqarolik masalalariga doir arizalarni zarur hujjatlar bilan birga O`zbekiston Respublikasi Prezidenti huzuridagi Fuqarolik masalalari bo`yicha Komissiyaga yo`llaydi; 4) chet elda doimiy yashab turgan shaxslarning O`zbekiston Respublikasi fuqaroligiga mansubligini aniqlaydi; 5) chet elda doimiy yashab turgan shaxslarning O`zbekiston Respublikasi fuqaroligini yo`qotganligini qayd etadi; 6) O`zbekiston Respublikasining chet elda doimiy yashab turgan fuqarolarini hisobga oladi. 7 Fuqarolikka oid arizalar va taqdimnomalarni ko`rib chiqish tartibi Fuqarolik masalalariga oid arizalar O`zbekiston Respublikasi Prezidenti nomiga ariza beruvchilarning doimiy istiqomat joyidagi ichki ishlar idoralari

orqali, chet elda doimiy yashovchi shaxslar tomonidan esa O`zbekiston Respublikasining tegishli diplomatik vakolatxonalari yoki konsullik muassasalari orqali topshiriladi. Chet davlat fuqarosi bo`lgan shaxs o`z fuqaroligini o`zgartirish niyatida mazkur davlatning munosabatini ko`rsatuvchi hujjatni taqdim etishi shart. O`zbekiston Respublikasi fuqaroligiga olish, O`zbekiston Respublikasi fuqaroligiga tiklash yoki undan chiqish to`g`risidagi iltimosnomalari arizachining yozma iltimosiga binoan ko`rib chiqiladi. 18 yoshga to`lmagan shaxslar hususidagi iltimosnomalar ular vakillarining notarial idoralar tomonidan, chet elda esa O`zbekiston Respublikasining tegishli diplomatik vakolatxonasi yoki konsullik muassasasi tomonidan tasdiqlangan qonuniy vakillarining iltimosiga binoan ko`rib chiqiladi. 14 yoshdan 18 yoshgacha bo`lgan bolalar O`zbekiston Respublikasi fuqaroligiga olish, O`zbekiston Respublikasi fuqaroligiga tiklash va undan chiqarish to`g`risida ariza topshirish chog`ida ularning roziligi bo`lishi shart. Bunday rozilik yozma bayon etilishi va natarial idoralar tomonidan, chet elda esa O`zbekiston Respublikasining tegishli diplomatik vakolatxonasi yoki konsullik muassasalari tomonidan tasdiqlangan bo`lishi shart. Voyaga yetmagan bolaning O`zbekiston Respublikasi fuqaroligidan chiqishi to`g`risida iltimosnoma topshirganda, basharti uning ota-onasidan biri O`zbekiston Respublikasi fuqarosi bo`lib qoladigan bo`lsa, uning o`z bolasining O`zbekiston Respublikasi fuqaroligidan chiqishiga munosabati bildirilgan arizasi ham taqdim etilish kerak. Bunday ariza notarius tomonidan, chet elda esa O`zbekiston Respublikasi diplomatik vakolatxonasi yoki konsullik muassasasi tomonidan tasdiqlangan bo`lishi shart. Basharti ariza beruvchi savodsizligi yoki jismoniy kamchiliklari sababli arizani imzolay olmasa, uning iltimosiga binoan boshqa kishi arizani imzolaydi, bu haqda ichki ishlar idorasi, chet elda esa O`zbekiston Respublikasi tegishli diplomatik vakolatxonasi yoki konsullik muassasasi tomonidan arizaga yozib qo`yiladi.

Shaxsning O`zbekiston Respublikasi fuqaroligiga mansubligi to`g`risidagi ariza uning doimiy istiqomat joyida ichki ishlar idorasiga, chet elda doimiy yashaydigan shaxs tomonidan esa O`zbekiston Respublikasining tegishli diplomatik vakolatxonasi yoki konsullik muassasiga beriladi. O`zbekiston Respublikasi fuqaroligiga mansublikni aniqlashda O`zbekiston Respublikasi fuqaroligiga mansubligi bilan bog`lanayotgan vaziyat boshlangan paytda amal qilib turgan O`zbekiston Respublikasi qonun hujjatlari hamda O`zbekiston Respublikasi tuzgan xalqaro shartnomalarning qoidalari qo`llaniladi. O`zbekiston Respublikasi fuqaroligi masalalariga oid arizalar ariza beruvchi shaxsan murojaat etgan taqdirda uning doimiy istiqomat joyidagi ichki ishlar idoralari, chet elda doimiy yashovchi shaxslarga nisbatan esa O`zbekiston Respublikasining tegishli diplomatiya vakolatlari yoki konsullik muassasalari tomonidan rasmiylashtiriladi. Uzrli sabablar bo`lgan taqdirda ichki ishlar idoralari, tegishli dimlomatiya vakolatxonalari va konsullik muassasalari fuqarolik to`g`risidagi hujjatlarni boshqa shaxslar yoki pochta orqali yuborilgan arizalarga muvofiq rasmiylashtirishlari shart. O`zbekiston Respublikasi fuqaroligi masalalariga oid arizalar berilganda davlat boji to`lanadi, uning miqdori O`zbekiston Respublikasi qonunlari bilan belgilanadi. Fuqarolik masalalariga oid arizani rasmiylashtirayotgan ichki ishlar idorasi yoki tegishli diplomatik vakolatxonasi yohud konsullik muassasasi mazkur ariza yuzasidan asoslangan xulosasini chiqaradi. O`zbekiston Respublikasi Ichki ishlar vazirligi, O`zbekiston Respublikasi Tashqi ishlar vazirligi fuqarolik masalalariga oid arizalar yoki taqdimnomalar yuzasidan o`z xulosalari hamda boshqa zarur hujjatlarni O`zbekiston Respublikasi Prezidenti huzuridagi fuqarolik masalalari komissiyasi nomiga yuboradilar. O`zbekiston Respublikasi fuqaroligidan chiqish to`g`risidagi arizalariga oid xulosalarda ariza beruvchining davlat oldida bajarilmay qolgan majburiyatlari yoki uning fuqarolar yohud davlat va boshqa jamoat tashkilotlari muhim manfaatlari bilan bog`liq bo`lgan mulkiy majburiyatlari hususidagi, uni ayblanuvchi sifatida

jinoiy javobgarlikka tortish haqidagi, yohud unga nisbatan sudning qonuniy kuchga kirgan, ijro etilishi lozim bo`lgan hukmi mavjudligi haqidagi yo bo`lmasa mazkur shaxsning O`zbekiston Respublikasi fuqaroligidan chiqishi O`zbekiston Respublikasining davlat xavfsizligi manfaatlariga zidligi to`g`risidagi ma`lumotlar ham xabar qilinadi. Fuqarolik to`g`risidagi Qonunning 30-moddasida ko`rsatilgan fuqarolikka oid masalalarni dastlabki tarzda ko`rib chiqish uchun O`zbekiston Respublikasi Prezidenti fuqarolik masalalari komissiyasini tuzadi. Fuqarolik masalalariga oid arizalar va taqdimnomalarni ko`rib chiqish paytida komissiya ariza beruvchining dalillarini, taqdimnomaning mazmunini, davlat idoralari va jamoat tashkilotlarining xulosalarini, boshqa hujjatlarni hamda tegishli tarzda rasmiylashtirilgan guvohlar ko`rsatmalarini atroflicha baholaydi. Basharti, shaxs Qoraqalpog`iston Respublikasiga borib yashamoqchi bo`lsa, komissiya Qoraqalpog`iston Respublikasi Vazirlar Kengashining uni O`zbekiston Respublikasi fuqaroligiga qabul etish yoki uning fuqaroligini tiklash maqsadga muvofiq yoki muvofiq emasligi to`g`risidagi, shu jumladan Respublikada uzga ish, turar joy va boshqa qulayliklar berish imkoniyati bor- yo`qligi haqidagi fikrni e`tiborga oladi. Komissiya o`z ixtiyoridagi ish yuzasidan materiallar va hujjatlarni tegishli davlat idoralari va jamoat tashkilotlaridan talab qilib olishga haqlidir, bu davlat idoralari va jamoat tashkilotlari esa komissiya belgilagan muddatda zarur ma`lumotni taqdim etadilar. Komissiya har bir ariza yoki taqdimnoma yuzasidan O`zbekiston Respublikasi Prezidentiga takliflar kiritadi. Komissiyaning qarori bayonnoma bilan rasmiylashtiriladi, uni komissiyaning majlisida qatnashgan barcha a`zolari imzolaydilar. Fuqarolik masalalari yuzasidan O`zbekiston Respublikasi Prezidenti farmon chiqaradi. Agar formonda boshqa muddat belgilangan bo`lmasa, O`zbekiston Respublikasi Prezidentining farmoni chiqarilgan kundan boshlab kuchga kiradi. Fuqarolik masalasiga oid takroriy ariza, qoida tariqasida, shu

maqsadga oid avvalgi qarordan keyin bir yil o`tgach ko`rib chiqiladi. Ish uchun muhim bo`lgan hamda ariza beruvchiga ma`lum bo`lmagan va ma`lum bo`lishi mumkin bo`lmagan vaziyatlar vujudga kelgan taqdirda takroriy ariza ilgariroq ham ko`rib chiqilishi mumkin. Fuqarolik masalalariga oid arizalar yoki taqdimnomalarni ko`rib chiqish muddati bir yildan oshmasligi kerak. O`zbekiston Respublikasida doimiy yashovchi shaxslarga nisbatan fuqarolik masalalariga oid qarorlarning ijrosi O`zbekiston Respublikasi Ishki ishlar vazirligi va uning tegishli idoralari, fuqarolik holatini qayd etish bo`limlari, chet elda yashovchi shaxslarga nisbatan esa O`zbekiston Respublikasining Tashqi ishlar vazirligi zimmasiga, O`zbekiston Respublikasining tegishli diplomatiya vakolatxonalari va konsullik muassasalari zimmasiga yuklatiladi. Qonunda belgilangan tartibda O`zbekiston Respublikasi fuqaroligini olgan shaxslar O`zbekiston Respublikasining ichki ishlar idoralari yoki diplomatik vakolatxonalari yohud konsullik muassasalari tomonidan O`zbekiston Respublikasining fuqarosi pasporti topshiriladi. 16 yoshga yetmagan bolalarning hujjatlariga ularning O`zbekiston Respublikasi fuqaroligiga mansubligi yozib qo`yiladi. O`zbekiston Respublikasida yashab turgan, lekin O`zbekiston Respublikasining fuqaroligi to`xtatilgan, boshqa davlat fuqarosi bo`lmagan shaxslar ichki ishlar idorasi tomonidan fuqaroligi bo`lmagan shaxslarga mo`ljallangan istiqomat guvohnomasi beriladi. O`zbekiston Respublikasining fuqarolik masalalariga oid qarorlar ijrosi O`zbekiston Respublikasining Prezidenti huzuridagi fuqarolik masalalari komissiyasi tomonidan, shuningdek boshqa vakolatli idoralar tomonidan o`z huquqlari doirasida nazorat etiladi. Fuqarolik masalalariga oid arizalarni qabul qilishdan asossiz bosh tortganlik, arizani ko`rib chiqish muddatlari buzilganlik, shuningdek mansabdor shaxslarning fuqarolik to`g`risidagi ishlarni ko`rib chiqish tartibini va fuqarolik masalalariga oid qarorlarni ijro etish tartibini buzadigan boshqa nohaq xatti-

harakatlari hususida ular bo`ysunadigan yuqori mansabdor shaxsga yoki sudga qonunda belgilangan tartibda shikoyat qilinishi mumkin. Chet elda O`zbekiston Respublikasining fuqarolari O`zbekiston Respublikasining himoyasi va homiyligidan foydalanadilar. O`zbekiston Respublikasi, o`zining diplomatik vakolatxonalari va konsullik muassasalari, shuningdek ularning mansabdor shaxslari O`zbekiston Respublikasi fuqarolarining o`zlari borgan mamlakat qonunlari bilan, O`zbekiston Respublikasi va uning fuqarosi borgan davlat qatnashayotgan shartnomalar hamda xalqaro odatlar bilan berib qo`yilgan hamma huquqlardan to`la foydalanish imkoniyatiga ega bo`lishlari uchun choralar qo`rishlari, ularning huquqlarini va qonun bilan muhofaza qilinadigan manfaatlarini qonunlarda belgilangan tartibda himoya qilishlari, zarur hollarda esa O`zbekiston Respublikasi fuqarolarining buzilgan huquqlarini tiklash choralarini ko`rishlari shart. Basharti, O`zbekiston Respublikasining xalqaro shartnomasida boshqacha tartib nazarda tutilgan bo`lmasa, O`zbekiston Respublikasining fuqarosi chet davlatga topshirilishi mumkin emas. O`zbekiston Respublikasi fuqarosi bo`lgan shaxsning chet davlat fuqaroligiga mansubligi tan olinmaydi. Alohida hollarda, xorijiy davlat fuqarolari bo`lmish vatandoshlar, agar ular yoki ularning ota-onalari, buvalari yoki buvilari bir vaqtlar mavjud tuzum tufayli vatanni tashlab ketishga majbur bo`lgan bo`lsalar, o`z iltimoslariga muvofiq O`zbekiston Respublikasi Prezidentining qarori bilan O`zbekiston Respublikasining fuqaroligiga ham qabul qilinishlari mumkin. O`zbekiston Respublikasi hududidagi chet el fuqarolarining va fuqaroligi bo`lmagan shaxslarning huquq va erkinliklari xalqaro huquq normalariga muvofiq ta`minlanadi. Ular O`zbekiston Respublikasining Konstitutsiyasi, qonunlari va xalqaro shartnomalari bilan belgilangan burchlarni ado etadilar.

O'xshashlar

Fuqarolarning huquqlarining konstitutsiyaviy asoslari

O`zbekiston Respublikasi Konstitutsiyaviy Sudi va uning konstitutsiyaviy huquqlari

O`zbekiston Respublikasida fuqarolik. Fuqarolarning konstitutsiyaviy burshlari

Ijtimoiy tuzumning konstitutsiyaviy-huquqiy asoslari

Islom fuqarolik huquqining asoslari