Маданият ва қадриятлар - Falsafa - Referatlar

Маданият ва қадриятлар

Yuklangan vaqt:

19.09.2022

Ko'chirishlar soni:

0

Hajmi:

64.5 KB

Ko'chirib olish

Маданият ва қадриятлар Режа: 1. Маданият ва қадрият тушунчаси, мазмун – моҳияти. 2. моддий – маънавий, маданият ва қадриятлар. 3. Маданиятнинг жамият тараққиётида тутган ўрни. 4. Қадриятлар тизими ва кўринишлари.

Маданият мураккаб, серқирра ижтимоий ҳодиса. У бир қатор фанларнинг ўрганиш объекти бўлиб ҳисобланади. Масалан, археология ўтмишда яшаган кишилар фаолияти натижасида вужудга келган предметлар, ёдгорликлар, асори-атиқаларни ўрганади. Этнография маълум бир халқнинг маданиятини ўрганади. Ижтимоий фалсафа маданиятни яхлитликдан иборат ижтимоий ҳодиса сифатида ўрганади. Маданият атамаси кўп маъноларга эга – экин экиш, қайта ишлов бериш, асраш, авайлаш, маълумот, таълим-тарбия тараққиёт. Маданият инсонни бошқа барча табиий-биологик дунёдан ажратиб туради. Маданият тушунчасини айрим олимлар арабча «мадина» ва «ият» сўзларининг қўшилишидан келиб чиққан ва у «шаҳарга оид» маъносини англатади, деб ҳисоблайдилар. Европалик олимлар маданият тушунчаси «культура» сўзидан келиб чиққан, у парваришлаш маъносини билдиради, деган фикрни илгари сурадилар. Маданият ўзбек тилида тарбия кўрганлик, билимлилик, сифатлилик маъноларида ишлатилган. Инсон ва жамият ижодий фаолиятининг барча кўринишлари унинг оқибатида яратилган жаъми моддий ва маънавий қадриятларни ўз ичига қамраб олади. Маданият тушунчасига хилма-хил таърифлар берилган. XX асрнинг 50- йилларида америкалик олимлар Анри Кребер ва Антоне Клакхом маданият тушунчасига берилган таърифлар 164 та эканлиги ҳақида фикр билдирганлар. Ҳозирги замон фалсафасида маданият тушунчасига берилган таъриф 500 атрофида, деб ҳисоблайдилар О.Г.Данильян ва В.М.Тараненко. 1 Маданият тушунчасида: а) инсон фаолиятининг натижалари б) инсон фаолиятининг ўзи, унинг усуллари ва воситалари ифодаланади. Инсоннинг фаолияти моддий ва маънавий турларга бўлинади. Шунга кўра маданият 2 хил турда намоён бўлади: 1. Моддий маданият. 1 Қаранг: О.Г.Данильян, В.М.гараненко. Философия – Москва, «ЭКСМО» 2005 г., стр. 398.

2. Манавий маданият. Моддий маданият деганда инсоният томонидан яратилган жаъми моддий қадриятлар назарда тутилади. Меҳнат қуроллари ва воситалари, техника, технология, ишлаб чиқариш маданияти, турмушнинг моддий шарт- шароитлари, ва ҳ.к. моддий маданият шакллари ҳисобланадилар. Маънавий маданият деганда маънавий қадриятларни ишлаб чиқариш, тақсимот ва исътемол қилиш соҳалари назарда тутилади. Маънавий маданият таркибига: а) инсон маънавий фаолиятининг барча натижалари фан, фалсафа, санъат, сиёсат, хуқуқ, таълим-тарбия, дин жамият бошқариш; б) Муассасалар ва ташкилотлар: мактаб, олий ва ўрта махсус ўқув юртлари, театр, кино, музей, кутубхона, концерт заллари ва ҳоказолар киради. Моддий ва маънавий маданият орасига қатъий чегара қўйиш, уларни бир-биридан ажратиш мумкин эмас. Меҳнат қуролини ясаш моддий эхтиёждан келиб чиқади ва моддий ишлаб чиқариш фаолиятининг натижаси ҳисобланади. Айни вақтда меҳнат қуролини инсон билимсиз ясаш мумкин эмас. Маънавий маданият ижтиомий тараққиётнинг муҳим омили ҳисобланади. Жамиятнинг тараққиёт даражаси маънавий маданият билан бошланади. Инсон гўдаклик чоғиданоқ маданият таъсири остида яшайди. Инсон таълим тарбияси деганда, аввало уни маданиятли инсон сифатида камол топтириш назарда тутилади. Таълим-тарбия жараёнида инсон маданиятга ошно бўлишига ўрганади, маданиятнинг турли асосларига кўра бир қатор турларга бўлиш мумкин. Масалан миллий (ўзбек маданияти, рус миллий маданияти); минтақавий (славянлар маданияти, туркий халқлар маданияти, африкаликлар маданияти) маданият турларини кўрсатиш мумкин. тарихий давр нуқтаи назаридан антик маданият, ўрта асрлар даври маданияти каби турларига

бўлиш мумкин. жамият ҳаёти соҳаларига татбиқан сиёсий маданият, иқтисодий маданият, хуқуқий маданият ҳақида фикр юритиш мумкин. маданиятнинг ўзига хос турлари: оммавий маданият, ёшлар маданияти, эклекта маданияти, ишчилар маданияти хақида фикр юритиш мумкин. маданиятнинг жамиятда тутган ўрни унинг функцияларида намоён бўлади. Маданиятнинг функцияларига қуйидагилар киради: а) гносеологик ёки тарбиявий б) яратувчилик в) коммуникативлик г) норматив функция д) инсонпарварлик функциялари киради. Маданиятда инсоният тажрибаси мужассамлашган бўлади ва билимлар шаклида намоён бўлади. Уларни ўзлаштириш маданият – гносеологик ёки тарбиявий функциясининг моҳиятини ташкил этади. Маданият кишилар ижодий фаолиятининг мухим омили ҳисобланди. Илмий изланишлар олиб бориш, санъат соҳасида фаолият кўрсатиш маданиятининг яратувчилик функцияси моҳиятини ташкил этади. Ҳаётнинг барча жабҳаларида - меҳнатда, турмушда, шахслараро муносабатларда маданият кишилар хулқ-атворига таъсир кўрсатади, уларнинг ҳатти-ҳаракатини бошқаради. Маданиятнинг норматив (тартибга солиш) функцияси аҳлоқда, хуқуқда ўз ифодасини топади. Маданият ижтимоий ҳаёт тажрибасини бир авлоддан иккинчи авлодга етказишнинг қудратли воситаси ҳисобланади. Маданият анъаналар тарзида авлодлар томонидан ўзлаштирилади ваш у асосда авлодлар алоқадорлиги таъминлади. Ижтимоий тажрибани авлодларга сингдириш маданиятнинг коммуникатив функциясини ташкил этади. Маданият инсонда инсонийликнинг такомиллаштириш вазифасини бажаради. Маданият туфайли инсон камолотга интилади, инсонда энг юксак инсоний хислатлар шаклланади.

Маданият инсонийликнинг меёъри ва кўрсаткичи ҳисобланади. Бу маданиятнинг инсонпарварлик функциясидан далолат беради. Жамият тараққиётининг қайси соҳаси ҳақида гап кетишдан қатъий назар бу тараққиётда асосий ўринни, инсон ва унинг маданий юксалиш даражаси ҳал қилувчи омил бўлиб ҳисобланади. Фалсафанинг энг муҳим муаммоларидан бири – қадриятлар муаммоси ҳисобланади. Қадриятлар муаммоси фалсафа тарихида қадимдан мавжуд бўлган. Қадимий Юнон файласуфлари Суқрот, Платон эзгулик, яхшилик, адолат, фаровонлик, қадриятлари ҳақида фикр юритганлар. Аристотель адолат, бахт юксак қадрият эканлигини таъкидлаганлари ҳолда уларни нисбий характердалиги, улар инсоннинг оқиллигига боғлиқлиги ҳақида фикр юритадилар. Ўрта асрларда қадриятлар илоҳий мазмунда таҳлил қилинган. Уйғониш даврни фалсафий қарашларида инсонпарварлик, хурфикрлилик қадриятларига алоҳида диққат қаратилган. XIX асрдан бошлаб қадриятлар назарияси ишлаб чиқилди. Қадриятлар тўғрисидаги назария, таълимотни ифодалайдиган аксиология термини XIX асрнинг иккинчи ярмида Француз файласуфи П.Лаки ва немис олими Э.Гортманлар томонидан истеъмолга киритилди. 2 Аксиология – қадриятлар фалсафаси фани шаклланди. Қадриятлар тўғрисидаги таълимот қадриятшунослик, қадриятлар фалсафаси – аксиология, деб юритилади. Барча тур ва кўринишдаги қадриятлар, улар орасидаги узвий алоқадорлик, қадриятларнинг жамиятдаги ўрни масалалари аксиология фанининг предметини ташкил этади. Қадриятлар нима? Бу тушунча қадр-қиммат тушунчаси билан бевосита боғлиқ. Қадриятлар кишилар қадрлайдиган нарсаларга нисбатан ишлатилади. Фалсафа қомусий луғатида қадриятлар жамият, инсон, инсоният учун аҳамиятли бўлган барча нарса ва ҳодисалар, хислат ва фазилатлар жамул- жами деб таъриф берилган. 3 2 Фалсафа. Қомусий луғат. – Т., «Шарқ» 2004 йил, 17-бет. 3 Ўша асар 17-бет.

Академик Ж.Туленовнинг фикрича, қадрият дейилганда инсон ва инсоният учун ахамиятли бўлган, миллат, элат ва ижтимоий гуруҳларнинг манфаатлари ва мақсадларига хизмат қиладиган табиат ва жамият ҳодисалар мавхум тушунилмоғи лозим. Қадриятлар ижтимоий хусусиятга эга бўлиб, кишиларнинг амалий фаолияти жараёнида шаклланади ва ривожланади. Қадриятлар тушунчасида унга хос хусусиятлар акс этган: 1. Қадриятлар ўз моҳиятига кўра ижтимоий. Нарсаларнинг ўзи мустақил равишда қадрият бўла олмайди. Жамият бўлмаса, қадрият ҳам йўқ. Қадриятлар доимо инсон қадриятларидир. Шунинг учун ҳам қадриятлар инсон билан алоқадорликда бўлгандагина нарсалар қадрли бўла олади. 2. Қадриятлар инсоннинг амалий фаолияти жараёнида юзага келади. инсон ва унинг маълум натижага эришишига йўналтирилган фаолият унинг учун ахамиятли, қадрли. 3. Ҳар қандай нарса 2 хил хусусиятга эга. Бири – нарсанинг нимага кераклиги, иккинчиси унинг инсон эхтиёжларига алоқадорлиги нарса ўзидан- ўзи қадрли бўла олмайди. У инсонниг Бирон-бир эхтиёжини қондирсагина қадрли бўла олади. Демак, унинг қадрли-қадрли эмаслиги инсонга, унинг муносабатига боғлиқ. 4. Қадриятлар объектив моҳиятга эга. Қадрият ўз-ўзидан эмас, инсонниг предметли – амалий фаолиятидан келиб чиқади. Қадриятларни турли асосларга кўра муайян турларга ажратиш мумкин: Жамият ҳаётининг соҳаларига тааллуқли бўлиш нуқтаи-назаридан қадриятларнинг: а) моддий; ижтимоий-сиёсий, маънавий турларини кўрсатиш мумкин. Моддий қадриятлар ичида табиий қадриятлар муҳим ўрин тутади. Табиий қадриятларга ер, ер ости бойликлари, сув, ҳаво, ўрмонлар, ўсимликлар, фойдали қазилмалар, ҳайвонлар ва бошқалар киради. Иктисодий ахамиятга эга бўлган табиий хом-ашё, фойдали қазилмалар Ўзбекистон Республикасининг миллий бойлиги, асосий қадриятларидандир. Табиий

ресурслар: ёнилғи, металл, рудалар, ҳаво, сув, ўсимликлар, ҳайвонлар бўлмаса инсон яшай олмайди. Она Ер кишилар учун моддий неъматлар манбаи, меҳнат воситалари хазинасидир. Ер – инсоният тараққиётининг бешигидир. Шундай экан, ҳаёт манбаи – Ерни қадрламаслик мумкин эмас. Ўзбекистон Республикасининг Конституциясининг 55-моддасида «Ер, ер ости бойликлари, сув, ўсимлик ва ҳайвонот дунёси ҳамда бошқа табиий заҳиралар, умуммиллий бойликдир, улардан оқилона фойдаланиш зарур ва улар давлат муҳофазасидадир», деб ёзиб қўйилган. 4 Моддий қадриятлар незигини мулк ташкил этади. Мулкни ўз эгасига бериш жамият тараққиётининг мухим омили ҳисобланади, унинг мулк эгаси ушбу мулкни сақлаш ва кўпайтириш учун курашади. Мамлакат иқтисодиётининг тараққий эттиришга хизмат қиладиганлар, аввало, мулкдорлардир. Шунинг учун ҳам мамлакатимизда амалга оширилаётган иқтисодий ислоҳотларнинг асосини мулкий муносабатларини тубдан ўзгартириш ташкил қилади. «Мулкнинг мулкдорга том маънода хизмат қилишига, унинг мулк эгасига, бутун мамлакатга фойда келтириб, ҳар бир фуқаронинг фаровонлигига хизмат қилишга эришиш зарур. Ана шундагина пайдо бўлаётган мулкдорлар синфи ўз мамлакатининг иқтисодиётини мустаҳкамлашдан чинаккам манфаатдор бўлади, ижтимоий тузумни мустаҳкамлаш ва ҳимоя қилиш, ижтимоий сиёсий барқарорликни таъминлаш учун барча имкониятларни яратади», дея таъкидлаган эди Президент Ислом Каримов. 5 Моддий қадриятлар табиий (табиат предметлари, меҳнат предметлари ва ҳ.к.) ва предметли (инсон меҳнати натижалари) кўринишларида намоён бўлади. Инсоният сиёсий қадриятларга ижтимоий адолат, тинчлик, барқарорлик кабилар киради. Маънавий қадриятлар деганда илмий, аҳлоқий, диний, эстетик қадриятлар назарда тутилади. Кимнинг эхтиёжларини акс эттириш хусусиятларига кўра қадриятлар шахсий, гуруҳий ёки жамоавий, миллий, умуминсоний кўринишларга эга. 4 Ўзбекистон Республикаси Конституцияси. – Т., 1993 йил, 19-бет. 5 Каримов И.К. Юксак малакали мутахассислар – тараққиёт омили – Т., «Ўзбекистон» 1995 йил, 9-бет.

Жамият ва инсон ҳаётида тутган ўринларига кўра: иккинчи даражали, кундалик ва олий қадриятларни кўрсатиш мумкин. Моддий, ижтимоий-сиёсий маънавий қадриятларнинг муайян бир қисмини олий (юксак) қадриятлар ташкил этади. Тинчлик, инсон ҳаёти, адолат, эркинлик, хуқуқ ва бурчлар ҳақидаги тасаввурлар, дўстлик, севги, қариндошлик кабиларни олий қадриятлар туркумига киритиш мумкин. Қадриятларнинг мазмуни, кўриниши ўзгарувчандир. Қадриятлар турлари орасига қатъий чегара қўйиш мумкин эмас. Улар ҳаёт шароитилари, давр тақазоси билан бир турдан бошқа турга ўтиши мумкин. жамиятдаги ўзгаришлар, тараққиёт янги қадриятларнинг шаклланишига, ёки айрим қадриятларнинг йўқолишига олиб келиши мумкин. Инсон ва унинг ҳаёти энг олий қадрият ҳисобланади. Республика Конституциясида шундай сўзлар ёзилган; «Ўзбекистон Республикаси демократия, умуминсоний принципларга асосланади, уларга кўра инсон, унинг ҳаёти, эркинлиги, шаъни, қадр-қиммати ва бошқа дахлсиз хуқуқларга олий қадрият ҳисобланади» 6 . Шундай қилиб қадриятлар инсон ва жамият ҳаётида мухим ўрин тутади. 6

Адабиётлар: 1. Ўзбекистон Республикаси Контституцияси. – Т., «Ўзбекистон», 2003 йил. 2. И.Каримов. Юксак малакали мутахассислар тараққиёт омили. – Т., «Ўзбекистон» 1995 йил. 3. И.Каримов. Истиқлол ва маънавият. – Т., «Ўзбекистон» 1994 йил. 4. И.Каримов. Ўзбекистон XXI аср бўсагасида: хавфсизликка тахдид, барқарорлик шартлари ва тараққиёт кафолаталари. – Т., «Ўзбекистон» 1997 йил. 5. Ж.Туленов. Жамият фалсафаси. Олтинчи бўлим. – Т., 2001 йил. 6. Ж.Туленов. Қадриятлар фалсафаси. – Т., «Ўзбекистон» 1998 йил. 7. О.Г.Данильян, В.М.Гараненко. Философия – Москва, изд. Эксмо, 2005 г., стр. 398-422.

O'xshashlar

Ахлоқий маданият ва қадриятлар

Миллий ва минтиқавий қадриятлар

Умумбашарий ва умуминсоний қадриятлар

Қадриятлар тизими ва намоён бўлиши

Маданият ва фан фалсафаси