O`zbek adabiyoti tarixi fani. Uning o`rganish ko`lami - Adabiyot - Referatlar

O`zbek adabiyoti tarixi fani. Uning o`rganish ko`lami

Yuklangan vaqt:

08.09.2022

Ko'chirishlar soni:

0

Hajmi:

51 KB

Ko'chirib olish

O`zbek adabiyoti tarixi fani. Uning o`rganish ko`lami Reja: 1 . Kirish. 2. O`zbek adabiyoti tarixi fani haqida. 3. O`zbek adabiyotining o`rganish ob`ekti. 4. Uning maqsad va vazifalari. 5. Sho`rolar davrida bu adabiyotga, uning ayrim vakillari ijodiga bo`lgan munosabat. 6. O`zbek adabiyotini davrlashtirish masalasi. 7. O`zbek mumtoz adabiyotining taraqqiyot bosqichlari.

O`zbek xalqi boy adabiy yodgorliklarga ega. O`tmishda yaratilgan mo``tabar og`zaki va yozma adabiyotimiz namunalarini chuqur o`rganish va bilish har bir o`quvchining, shu yurtda yashayotgan kishilarning ulug` burchidir. Bugungi kunda, yurtimiz ozodlikka, xalqimiz istiqlolga erishgandan so`ng, o`tmish merosimizga e`tibor yanada kuchaydi. Prezidentimiz I.A.Karimov o`zlarining qator suhbatlari, nutq va kitoblarida buyuk ajdodlarimiz qoldirgan merosni o`rganishning ahamiyatini qayta-qayta ta`kidlamoqdalar. Zero, xalqimiz mustaqillikka erishgandan so`nggina bizga noma`lum ko`pgina ulug` shoirlarimiz, olimlarimiz, muhaddislarimiz haqida ma`lumotga ega bo`ldik. Asarlarini o`rgana boshladik. O`zbek adabiyoti qadimiy tarixga ega. Adabiyot jamiyat hayotining o`ziga xos ifodasi. U jamiyat tarixidagi jiddiy o`zgarishlarni xilma-xil obrazlar vositasida turli badiiy shakllarda aks ettirdi. Adabiyot, avvalo, so`z va ruhiyat san`atidir. U inson ruhiyatidagi nihoyatda nozik tovlanish va ohanglarni ilg`ashga, ularni aks ettirishga intiladi. Dunyoda insonlar bir-birlariga o`xshamaganlariday, ularning qalb kechinmalari ham takrorlanmasdir. Badiiy adabiyot bilan adabiyot tarixi shug`ullanadi. O`zbek adabiyoti tarixi nozik ruhiy holatlarni mahorat bilan aks ettiradigan durdonalarga boydir. Ular hozirgi avlod ruhiyatida, qalbida ham hayajon uyg`ota oladi, ularning ma`naviy boyishlariga tegishli hissa qo`sha oladi. Ular ma`naviy kamolotga xizmat qiladi. Adabiyot tarixi fani badiiy adabiyotning tarixiy taraqqiyot jarayonini o`rganadi va o`rgatadi. Har bir xalqning o`z tarixi, madaniyati, san`ati va adabiyoti bor. Shunga ko`ra, adabiyot tarixi

ma`lum bir xalqning-shu adabiyotni yaratgan xalqning nomi bilan ataladi. O`zbek xalqi ma`naviy madaniyatining katta va ajralmas bir qismi o`zbek adabiyotidir. O`zbek adabiyoti tarixi o`zbek xalqining qadim zamonlaridan boshlab hozirgi kunga qadar yaratgan badiiy adabiyotini o`z ichiga oladi. Adabiyotshunoslikda o`zbek adabiyoti tarixi ikki nom asosida tilga olinadi: O`zbek mumtoz adabiyoti. Hozirgi zamon o`zbek adabiyoti yoki XX-XXI asrlar o`zbek adabiyoti. O`zbek mumtoz adabiyoti deganda eng qadimgi davrlardan boshlab, XX asr boshlarigacha bo`lgan davr nazarga olinadi. O`zbek adabiyoti tarixi xilma-xil tur va janrdagi badiiy asarlarni o`z ichiga oladi. Lirika va epos o `tmish o `zbek adabiyotining asosiy turlaridir. Fazal, muxammas, musaddas, noma, ruboiy, doston, hikoyat va boshqalar keng tarqalgan adabiy janrlardir. O`zbek adabiyoti tarixi xilma-xil adabiy tur va janrlarning shakllanishi va rivojlanishi tarixi hamdir. O`tmish o`zbek adabiyoti bir qator memuar va tarixiy asarlarni ham o`z ichiga oladi. «Boburnoma», «Shajarai turk», «Shajarai tarokima», «Firdavs ul-iqbol» va boshqalar shular jumlasidandir. O`zbek adabiyoti tarixi «Tohir va Zuhra», «Bo`z o`g`lon», «Yusuf Ahmad» kabi xalq kitoblarini ham o`z ichiga oladi. Bular folkloristikaning ham, adabiyot tarixining ham predmetidir. Tarjima adabiyot ham o`zbek adabiyoti tarixining muhim bir qismini tashkil

etadi. O`zbek xalqi asrlar davomida ko`pgina xalqlar bilan iqtisodiy va madaniy aloqada bo`lib keldi. Shu aloqalarning mevasi sifatida tarjima adabiyot vujudga keldi. O`zbek tiliga tojik, ozarbayjon, eron, hind, arab, rus va boshqa xalqlarning ko`p badiiy asarlari va tarix kitoblari tarjima qilindi. Nizomiyning «Xisrav va Shirin», «Haft paykar», Sa`diyning «Bo`ston», «Guliston», Jomiyning «Bahoriston», «Yusuf va Zulayho», Hiloliyning «Shoh va gado», shuningdek, «Kalila va Dimna», «Ming bir kecha», «Ravzatus safo», «Badoyi-ul-vaqoe» va boshqalar shular jumlasidandir. Sobiq sho`rolar davrida ko`p sohalarda bo`lgani kabi, o`zbek adabiyotiga munosabat masalasida ham bir yoqlamalikka yo`l qo`yildi. Adabiyot vakillari «saroy adabiyoti vakillari», «diniy-mistik adabiyot vakillari», «progressiv adabiyot vakillari» kabi ajratishlar asosida baholandi. Saroy adabiyoti, diniy-mistik adabiyot vakillari deb nom olgan qator shoirlar merosi etarlicha nashr etilmadi. Yoki ular ijodi kamsitildi. Ko`pgina badiiy ijod namunalarini xalqqa etkazishga to`sqinlik qilindi. Izoh: bu holat misollar bilan asoslanadi. O`zbekiston mustaqilikka erishgandan so`ng, o`tmish adabiyotimizga e`tibor kuchaygani bois Yassaviy, Sulaymon Boqirg`oniy, Imom Fazzoliy, Bahouddin Naqshband, So`fi Olloyor, Haziniy, Husayniy, Amiriy, Feruz kabilarning nomlari xalqqa keng ma`lum qilindi. Asarlari chop etildi. Buyuk hurmat va ehtirom ko`rsatildi. Adabiyot tarixi xalq tarixining ajralmas bir qismidir. Badiiy adabiyot taraqqiyoti jamiyatning umumiy taraqqiyoti bilan uzviy bog`liqdir. Adabiyotni davrlashtirish asosida o`rganish maqsadga muvofiq ko`riladi. Adabiyotshunosligimizda adabiyotni davrlashtirish

muammolidir. Adabiyotni davrlashtirishga nima asos qilib olinadi? Mana bu savolga aniq javob berish qiyin. Ayrim mutaxassislar adabiyot tarixi bosqichlarini podsholarning, sulolalarning hukmdorlik davri bilan, boshqalari esa yirik tarixiy voqealar bilan bog`lashadi. Ba`zi olimlarimiz prof. N.Mallayev o`zbek adabiyoti tarixini, bir tomondan, jamiyatning umumiy taraqqiyot qonunlari, o`zbek xalqining ijtimoiy-siyosiy hayotdagi taraqqiyoti, ikkinchi tomondan, adabiyot tarixi taraqqiyotining o`ziga xos xususiyatlarini: badiiy adabiyotning ijtimoiy mohiyati, vazifasining o`sib borishi, adabiy tur va janrlarning shakllanishi, taraqqiy etishi hamda so`z san`atining boshqa jihatlari takomiliga xos xususiyatlarni ko`zda tutib bosqichlarga ajratish kerakligini ko`rsatib o`tishgan. Prof. B.To`xliyev adabiyot tarixini quyidagicha davrlashtirishni tavsiya etadi: Eng qadimgi adabiy yodgorliklar «Avesto», «Alpomish» va b. Ilk o`rta asrlar adabiyoti «Kultegin» bitiklari va b. O`rta asrlar adabiyoti IX-XVI asrlar: A.Temuriylar davri adabiyoti. V.Navoiy va uning davri adabiyoti. XVII-XIX asrlar adabiyoti. XX asr adabiyoti. B.To`xliyev. O`zbek adabiyoti. Darslik. 9-sinf. T., 2000 y. 13-bet. Professor N.Mallayevning oliy o`quv yurti talabalari uchun chiqargan darsligida quyidagi bosqichlar berilgan: Eng qadimgi adabiy yodgorliklar. X-XII asrlar adabiyoti. XIII asrdagi va XIV asr boshlaridagi adabiyot.

XIV asr o`rtalaridan XVII asrgacha bo`lgan adabiyot. XVII asrdan XIX asrning o`rtalarigacha bo`lgan adabiyot. XIX asrning ikkinchi yarmi va XX asr boshlaridagi adabiyot. Biz o`zbek adabiyoti tarixi (mumtoz adabiyot)dan yangi darsliklar nashr etilguncha N.Mallayev tavsiya etgan bosqichlar asosida o`zbek adabiyotini o`zbek mumtoz adabiyotini o`rganishni ma`qul topdik. Eng qadimgi adabiy yodgorliklar Markaziy Osiyo hududida qadimdan yashagan o`zbek, tojik, turkman va boshqa xalqlarning adabiy yodgorliklaridir. Keyingi taraqqiyot bosqichlaridagi adabiyot esa bevosita o`zbek xalqi tomonidan yaratilgan adabiyotdir. Biz o`zbek adabiyoti, og`zaki va yozma yodgorliklar, shoirlar, ularning hayoti va ijodi, asarlari va boshqalar bilan tanishib boramiz.

Foydalanilgan adabiyotlar: 1. I.A.Karimov. Istiqlol va ma`naviyat. Toshkent, 1994. 2. N.M.Mallayev. O`zbek adabiyoti tarixi. 1-kitob. T.,1963. 3. O`zbek adabiyoti tarixi. 5tomlik. 1-tom. T.,1978. 4. Buyuk siymolar, allomalar. 1-kitob. T.,1996. 5. B.To`xliyev. O`zbek adabiyoti. Darslik. 9-sinf. T., 2000. 6. R.Vohidov, H.Eshonqulov. Mumtoz adabiyot- hikmat xazinasi. Buxoro, 2001. 7. www.ziyonet.uz

O'xshashlar

O`zbek bolalar adabiyoti

Oybek va o`zbek bolalar adabiyoti

60-90-yillar o`zbek adabiyoti

XX asr boshlaridagi o`zbek adabiyoti

Sho`ro davri o`zbek adabiyoti