Badiiy tasvir va ifoda vositalari - Adabiyot - Referatlar

Badiiy tasvir va ifoda vositalari

Yuklangan vaqt:

10.09.2022

Ko'chirishlar soni:

0

Hajmi:

2144.5 KB

Ko'chirib olish

Badiiy tasvir va ifoda vositalari Reja: 1. Tasvir va ifoda vositalari haqida umumiy tushuncha. 2. Tildan foydalanishda normadan "og`ish" tushunchasi va uning turlari. 3. Leksik satxdagi normadan og`ish: "so`z tanlash" asosida tasviriylik va ifodaviylikni kuchaytirish. 4. Trop(ko`chim) semantik satxdagi normadan og`ish sifatida. Tropning asosiy turlari.

Badiiy tilning eng muhim spetsifik xususiyatlari sifatida obrazlilik va emotsionallikni ko`rsatdik. Badiiy asarda tasvirlanayotgan narsani jonli tasvirlash, his-tuyg`u va kechinmalarni yorqin ifodalashga xizmat qiluvchi vositalarni umumlashtirib "badiiy tasvir va ifoda vositalari" deb ataladi. Avvalgi faslda aytilganidek, badiiy tasvir va ifoda vositalari badiiy tilning belgilovchi xususiyati emas, balki belgilovchi xususiyat bo`lmish obrazlilik(tasviriylik) va emotsionallikni kuchaytiruvchi unsurlardir. Aytish kerakki, bu tushuncha adabiyotshunoslikda "poetik vositalar", "sintaktik figuralar", "stilistik figuralar" kabi nomlar bilan ham yuritiladi. Shuni ham yodda tutish lozimki, bu vositalarning bunisi tasvir, bunisi ifoda vositasi deyishlik ham nomaqbul, chunki badiiy adabiyot so`z vositasida tasvirlaydi va shu tasvir orqali ifodalaydi. YA`ni, ko`p hollarda bitta vositaning o`zi ham tasvir ham ifodaga xizmat qiladi. Faqat lirik asarlarda qo`llaniluvchi ayrim vositalar (mas, tovush takrorlari) borki, ular asosan ifodaviylikni kuchaytirish vazifasini bajaradi. Badiiy til umumxalq tili bazasida yuzaga keladi, dedik. Yozuvchi umumxalq tilidan foydalanar ekan umumodatlangan normadan og`adi (ya`ni, til unsurlarini odatdagidan o`zga shakl, ma`no, tartib, munosabat va sh.k.larda qo`llaydi) va shu "og`ish"dan ma`lum badiiy-estetik maqsadni ko`zda tutadi. Bu xil og`ishlar tilning turli sathlarida — fonetik, morfologik, leksik, semantik, sintaktik sathlarda kuzatilishi mumkin. Badiiy tasvir va ifoda vositalari ijodkorning muayyan badiiy- estetik maqsadga erishish uchun umumodatlangan normadan og`ishi natijasida yuzaga keladi, ular tasvirning jonli va to`laqonli bo`lishiga, ifodaviylikning kuchayishiga xizmat qiladi. Leksik satxdagi normadan og`ish yozuvchining umumxalq tili bazasidagi leksik vositalardan foydalanishida ko`rinadi. Ma`lumki, umumxalq tilidagi so`zlar o`zlarining nominativ holatida ham tasviriylik va ifodaviylik imkoniyatlari jihatidan farqlanadi. YA`ni, ijodkor ifoda va tasvirni so`z ma`nosiga daxl qilmagan holda, mavjud so`z hazinasidan "so`z tanlash" hisobigagina kuchaytirishi mumkin bo`ladi. Yozuvchining umumxalq tilida mavjud so`zlardan umumodatiydan o`zgacharoq foydalanishi quyidagicha badiiy-estetik maqsadlar bilan yuz beradi:

1 . Davr koloritini(ruhini) berish uchun. Lug`atdagi eskirgan so`zlar — arxaizm va istorizmlar odatdagi so`zlashuvda ishlatilmasligi ma`lum. Biroq ular tarixiy mavzudagi badiiy asarlarda davr koloritini berish uchun juda zarur. Deylik, o`z asarida o`n beshinchi asr voqeligini tasvirlayotgan ijodkor, tabiiyki, o`sha davrga xos realiyalarni tasvirlashi lozim bo`ladi. YA`ni, o`sha davr koloritini o`sha davrga xos bo`lgan narsa-buyumlar, hodisalar, tushunchalar va h. nomlarisiz to`la tasvirlab bo`lmaydi. Ikkinchi tomondan, o`n beshinchi asr muhitida harakatlanayotgan personaj tili ham shunga mos bo`lishi, uning nutqida o`sha davrga xos so`zlar va so`zshakllar ishlatilishi obrazning ishonarli va to`laqonli bo`lishiga xizmat qiladi. 2. Adabiy tilda kam qo`llaniluvchi dialektizmlar badiiy asarda joy koloritini berish uchun qo`l keladi. Aytaylik, o`zbek tilida so`zlashuvchilar tarqalgan xududlarda umummilliy xususiyatlar bilan bir qatorda o`sha xudud kishilarigagina xos bo`lgan jihatlar (urf-odatlar, tasavvurlar, aqidalar, narsa-buyumlar va h.k.) ham mavjudki, bular birinchi galda sheva tilida o`z aksini topadi. Shunday ekan, asarda tasvirlanayotgan xududga xos buyoqlarni berish, unda harakatlanayotgan personaj xarakterini to`laqonli badiiy talqin etish uchun dialektizmlardan foydalanish zarurati yuzaga keladi. 3. Badiiy obraz konkretlilik xususiyatiga ega. Asardagi personaj konkret muhitda harakat qiladi. Muhitga mansublikni ifodalashda varvarizmlar, vulgarizmlar, argo va jargonlarning ahamiyati katta. Muhit koloritini ifodalash bilan birga, ular personaj nutqini individuallashtirish, ruhiyatini ochish va umumiy qiyofasini yaratishda ham muhim ahamiyatga kasb etadi. 4. Tasvir predmetiga munosabatni ifodalash. Tilimizda mavjud so`zlar emotsional bo`qdorligi nuqtai nazaridan bir-biridan farq qiladi. Yozuvchi tasvir predmetiga munosabatini ifodalash uchun mavjud so`zlardan keragini tanlashi zarur bo`ladi. Masalan, sinonim so`zlar qatoridan ijobiy bo`yoqqa yoki salbiy bo`yoqqa ega so`zning tanlanishi yozuvchining tasvir predmetiga munosabatini yorqin ifodalab berishi mumkin.

Semantik satxdagi og`ishlar. Ma`lumki, nutq jarayonida biz so`zlarni o`z ma`nosida yoki ko`chma ma`noda qo`llashimiz mumkin. So`zning odatiy ma`nosidan o`zga ma`noda qo`llanishi semantik satxdagi og`ish sanaladi. Ko`chma ma`noda qo`llangan so`zlarning umumiy nomi trop (ko`chim) deb yuritiladi. So`z ma`nosi ko`chishining, tropning metafora, metonimiya, sinekdoxa, kinoya singari bir qator ko`rinishlari mavjud. Badiiy asarda qo`llanilgan ko`chimlar ishlatilish darajasi, badiiy bo`yoqdorligi, ta`sirdorlik darajasi kabi jihatlaridan bir-biridan jiddiy farqlanadi: a) ko`chimlarning bir qismi allaqachon til hodisasiga aylanib ulgurgan. Masalan, "kun botdi", "soat yuryapti" kabi birikmalarda so`z ma`nosi ko`chganligi aniq, biroq biz ularga shu darajada ko`nikib ketganmizki, hozirda ularga ko`chim sifatida qaramaymiz ham. Badiiy asar matnida mazkur ko`chimlar qo`llanganida, tabiiyki, muallif muayyan badiiy-estetik maqsad bilan semantik satxda og`ishga yo`l qo`ygan deya olmaymiz, zero, ular yozuvchi tomonidan tayyor holda olingan. Baski, bu xil ko`chimlar matnda estetik funksiya bajarmaydi, ularni badiiyat hodisasi sifatida talqin qilib bo`lmaydi; b) asar matnida badiiy adabiyotda an`anaviy tarzda ishlatilib kelayotgan ko`chimlar ham ko`p uchraydi. Masalan, "shakar lab", "gul yuz", "bulbul", "sarv qomat", "qoshi kamon", "nargis ko`z" va hokazo. Bu xil ko`chimlar ham yuqoridagilar singari tayyor holda olinadi, biroq, ulardan farqli o`laroq, matnda estetik funksiya bajaradi: tasviriylikni, ifodaviylikni kuchaytiradi; v) badiiy-estetik funksiyadorligi, tasviriylik va ifodaviylikni kuchaytirishi jihatidan muayyan matndagina ko`chma ma`noda qo`llangan, muallifning assotsiativ fikrlashi mahsuli o`laroq dunyoga kelgan ko`chimlar alohida o`rin tutadi. Ularni shartli ravishda "xususiy muallif ko`chimlari" deb atashimiz mumkin. Shu xildagi ko`chimlargina yozuvchining muayyan badiiy-estetik maqsadni ko`zlab yo`l qo`ygan semantik satxdagi og`ishi natijasidirki, uning badiiy til bobidagi mahorati xususida gap borganda biz, avvalo, shu xil ko`chimlarni e`tiborga olishimiz kerak bo`ladi.

Voqelikdagi narsa-hodisalar orasidagi bizga ko`rinmagan, biroq san`atkorona o`tkir nigoh bilan ilg`angan o`xshashlik, aloqadorlik asosidagi ko`chimlar o`quvchini hayratga soladi, unga zavq bag`ishlaydi. Badiiy asarda eng ko`p qo`llanuvchi ko`chim turlaridan biri metaforadir. Metafora usulidagi ma`no ko`chishida narsa-hodisalar orasidagi o`xshashlikka asoslaniladi. Tabiatan, metaforani yashirin o`xshatish deb atash mumkin. Yashirin o`xshatish deb atalishiga sabab shuki, metaforada o`xshatilayotgan narsa tushirib qoldirilgani holda o`xshayotgan narsa uning ma`nosini bildiradi. Tabiiyki, bunda o`xshatilayotgan narsalardan aynan o`xshashlik talab qilinmaydi, ikki narsa hodisaga xos belgilardan birortasi asos uchun olinadi. Masalan, "oltin kuz", "oltin davr" birikmalarining birinchisida "rang", ikkinchisida "qimmat" asos uchun olingan. Keltirilgan misol metaforaning eng sodda ko`rinishlaridan bo`lib, quyida o`xshashlik aloqalari birmuncha murakkabroq namoyon bo`luvchi xususiy muallif metaforalaridan bir nechasini mushohada qilib ko`ramiz. R.Parfining: "Suv ostida yaltiraydi tosh, Xarsanglarda sinadi suvlar" — satrlarida metaforaning ma`nosi ikki bosqichda namoyon bo`ladi. Shoir tilimizda ancha keng qo`llaniluvchi suvning oynaga o`xshatilishiga tayanadi (birinchi bosqich) va shu asosda suvning xarsangga urilib parchalanishini oynaning sinishiga o`xshatadi (ikkinchi bosqich). Shoirning quyidagi: Derazamga uriladi qor Jaranglaydi jarangsiz kumush,- satrlarida metaforaning ma`no assotsiatsiyalari yanada kengroq. Ma`lumki, qorning kumushga (rang o`xshashligi) o`xshatilishi ancha keng qo`llanadi. Shoir shu asosda "kumush"ning yana bir assotsiyatsiyasini uyg`otadi: qorning yog`ishini "kumush tangalarning sochilishi"ga o`xshatadiki (jaranglaydi jarangsiz kumush), go`yo kimdir hayri-ehson qilib tanga sochayotgandek. Xalqimizda "qor" yog`ishi to`kinlikdan, barakotdan deb bilinishi sizga ma`lum, albatta. Ko`ramizki, qor shoirning assotsiativ fikrlashida avvalo "kumush"ni, keyin xalqimizning maishiy tafakkurida muqim o`rinlashgan fikrni uyg`otadi. Anglashidadiki, leksik metaforaning mazmuni bir so`z doirasida anglashilishi mumkin bo`lsa, matn

ichidagi metaforaning ma`nosi matndagi boshqa so`zlar bilan aloqada oydinlashar ekan. Masalan, shoir yozadi: Eng dahshatli baqiriq - soqovning baqirig`i. O`, qanday kuch bilan baqirar qabrtoshlar... Albatta, bu o`rinda metaforaning ma`nosi turlicha tushunilishi, u turli o`quvchining ongida turlicha assotsiatsiyalarni uyg`otishi mumkinligi tabiiy. Parchadagi birinchi misra ikkinchisining anglanishiga asos bo`ladi. "Soqovning baqirig`i"dagi dahshatli jihat shuki, uni kamdan kam odam eshitadi, eshita oladi. Shunga o`xshash, qabrtoshlar ham bizni juda ko`p narsalardan ogoh etadi, faqat ularning baqirig`ini biz doim ham "eshitolmaymiz". Baqirig`ini yonidagi odam eshitmayotganini bilib turgan soqovning holatini tasavvur qilasiz-da, bizni ogoh etib unsiz baqirayotgan qabrtoshlar, ular ortidagi o`tganlar ruhini tasavvur etasiz. Va ayni shu nuqtada she`r dilingizni titratadi, boshda tushunarsizdek ko`ringan satrlar qatidagi ma`no ongingizga o`chmas bo`lib muhrlanadi. Ma`no ko`chishining keng tarqalgan turlaridan yana biri metonimiyadir. Metonimiya (gr.-"o`zgacha nomlash", "boshqa narsa orqali atash") usulida ma`no ko`chganida narsa-hodisalar o`rtasidagi aloqadorlik asos qilib olinadi. Bu aloqadorlik turlicha ko`rinishlarda namoyon bo`lib, bunda narsa-hodisa, holat yoki harakat bilan ular egallagan joy ("stadion hayqirdi", "butun shahar qatnashdi"), vaqt ("og`ir kun", "omadli yil"); harakat bilan u amalga oshiriladigan vosita ("achchiq til"); narsa va uning egasi, yaratuvchisi ("Fuzuliyni o`qimoq); narsa va u yasalgan modda, xom-ashyo ("barmoqlari to`la tilla"); ruhiy holat, xususiyat va uning tashqi belgisi("ko`z yummoq") kabi aloqalarga asoslaniladi. Badiiy adabiyotda, ayniqsa, metaforik tafakkur yetakchilik qilayotgan zamonaviy adabiyotda metonimiya metaforaga nisbatan kamroq uchraydi, o`zining estetik funksiyadorligi jihatidan ham u metaforadan quyiroq turadi. Shunday bo`lsa-da, badiiy matnda metafora bilan yondosh qo`llangan holda u katta badiiy samara beradi, fikrni lo`nda va ta`sirli ifodalashga xizmat qiladi. Misol uchun A.Oripovning "Bahor" she`ridan olingan "Qaydadir yurtini eslab ingrar nay" satrini olib ko`raylik. Cholg`u asbobi orqali kuy ma`nosining berilishi — metonimiya,

biroq u "ingrar" metaforasi bilan qo`shilib kuchli badiiy samara beradi. Yoki "Faryod chekkanim yo`q el ichra taqir, O`ch ham olganim yo`q na qalamimdan" satrlarida ham yana vosita orqali jarayon nazarda tutiladi va u ham "o`ch olmoq" metaforasi bilan baqamti qo`llanadi. Bu ikkisi birlikda esa "butun vujudim bilan ijodga berilib g`amlarimni unutishga harakat qilmadim" degan ma`noni beradi va, muhimi, shu mazmunni obrazli, ta`sirli ifodalashga xizmat qiladi. Yuqoridagi misollarda vosita-harakat aloqasi asosidagi ko`chimni ko`rgan bo`lsak, U.Azimning: "Ko`zlarini ochib-yumar Mitti qushcha - yarador. Falak, unga najot yubor, O`lim, bo`lma xaridor",- satrlarida joy metonimiyasini ko`ramiz. Zero, bundagi "falak" so`zi tafakkurimizda o`rinlashgan ishonch asosida "yaratgan"ni anglatadi. Yoki yana shu shoirning "Sen nimani ko`ribsan, ey, Rim?" satrida ham joy nomi orqali unda yashovchilar ma`nosi ifodalanadi. Ba`zi hollarda obrazni yaratishda metafora va metonimiyaning qorishiq holda kelishi, birgina so`zning ham metonimik, ham metaforik asosdagi ko`chma ma`nolari qo`llanishi kuzatiladi. Shu jihatdan Sh.Rahmonning quyidagi she`riga diqqat qilaylik: Xazonga aylandi kunlarim... Motamda turganday boqaman. Fasllar to`qnashgan lahzada xazonlar to`pini yoqaman. Ko`zlarim achishar behosdan yuragim, qo`llarim titraydi. Alanga olmaydi kunlarim, tutaydi, oh, muncha tutaydi. SHe`rning lirik qahramoni — kechmishini sarhisob qilayotgan, o`tgan kunlaridan qoniqmaslik tuyayotgan odam. Shoirning assotsiyativ tafakkuri "xazon"da metonimik asosda kuzni, ayni paytda uning o`zida metaforik asosda yana o`tgan, hayot daraxtidan go`yo uzilib tushgan kunlarini ko`radi. SHe`rning kayfiyatini his qilishda, uni tushunishda "xazon" yetakchi ahamiyat kasb etadi, go`yo kalit vazifasini bajaradi. Shunga o`xshash, X.Davronning "Qarshida deraza so`ylaydi ertak, Unda ikki soya - baxtiyor malul" satrlarida ham yolg`iz ayol

ruhiyatini ochishda metonimiyadan mohirona foydalanilgan va unda ham metonimiya metafora bilan baqamti qo`llangan. Tropning yana bir turi sinekdoxa bo`lib, u mohiyat e`tibori bilan metonimiyaning bir ko`rinishidir. Sinekdoxaning metonimiya ko`rinishi sifatida qaralishiga sabab shuki, bunda ham aloqadorlik asosida — butun va qism, yakka va umum aloqasi asosida ma`no ko`chishi yuz beradi. Shu bois ham mutaxassislar sinekdoxani metonimiyaning miqdoriy ko`rinishi deb qaraydilar. X.Davronning "Kulol muhabbati" she`ridan: Sahardan to oqshomga qadar, Ko`kda porlab yonmaguncha oy, Ertak so`ylar sarxush barmoqlar, Ertak tinglar qizil rangli loy... Bu o`rinda ham "ertak so`ylar" metafora bo`lsa, "barmoqlar" sinekdoxadir. "Ertak so`ylar" deganda kulolning o`z ishiga butun mehri, qalb qo`ri bilan berilgan ijodning sehrli onlari nazarda tutiladi. Tabiiyki, ertak so`ylayotgan "barmoqlar" — qism va u butunni — kulolni anglatadi. Yoki M.Yusuf "Faqat shu yer yaqin yurakka, Faqat shunda quvonar ko`zlar" deganida ko`z odam ma`nosini bildirishi ham sinekdoxaga misol bo`la oladi. Yakka narsa nomi bilan umumni nazarda tutishlik ham sinekdoxa sanaladi. Sh.Rahmon bir she`rida: "Qadimda mevalar yetilgan paytda savob deb yashagan komil ajdodim musofir chanqog`in bossin deb atay buzib qo`yar ekan bog`lar devorin" deb yozarkan, "qadim ajdodim" birikmasi ostida ajdodlarni, butun xalqni nazarda tutadi. Shunga o`xshash, "O`zbekning qorako`z bolalariga bitta dunyo qolsin hayratlik" deganida ham o`zbek xalqi nazarda tutilgani tayindir. Badiiy asarlarda atoqli otlarning turdosh ot ma`nosida qo`llanilishi ham sinekdoxaning bir ko`rinishi deb qaraladi. Masalan, shoir "faqat Jumavoyi bo`lgani uchun havaslaring kelar robinzonlarga" deganida Robinzonga o`xshash hayot kechiruvchi kishilarni - ko`pchilikni nazarda tutadi. Ma`no ko`chishining yana bir turi "kinoya" (ironiya) bo`lib, u teskari o`xshatishga asoslangan ko`chimdir. Masalan, A.Qodiriy Kalvak maxzumning badbashara qiyofasini chizib bergach, boshqa bir o`rinda uni "husni Yusuf" deb

ataydiki, bu birikmaning teskari ma`noda qo`llangani bizga ravshan. Kinoya qahramonlar tilida ham keng qo`llanadi. Biroq bu holda u ko`chim sifatida emas, ko`proq konkret hayotiy holatga, sog`lom mantiqqa yoxud so`zlovchining maqsadiga muvofiq kelmaydigan gap sifatida ko`rinadi. Kinoya asosidagi bu usul antifrazis deb yuritiladi. Antifrazis tasvir predmetiga yozuvchi munosabatni ifodalashda ayniqsa qo`l keladi. M.M.Do`stning "Iste`fo" qissasida bu usuldan keng foydalanilgan. masalan, Binafshaxon qizini himoya qilib: "Qizimiz kimdan kam? O`zi husndor bo`lsa, diplomi yaqin qoldi, aqli odobi joyida. O`zbekcha gapirishniyam biladi..."- deydiki, bu muallif kinoyasi qahramon ma`naviy qiyofasini ochishda katta ahamiyat kasb etadi. Yoki, qahramonlardan birining "Bugun kayfiyatim o`nglandi. Xotingayam do`q urdim" deyishi; boshqasining "o`zimizdayam do`xtir ko`p, barisi ota qadrdon, porayam so`ramaydi" deyishlari yozuvchining qahramonga, muhitga munosabatini ifodalashga xizmat qiladi. Ko`chimning yana bir turi allegoriya bo`lib, bunda mavhum tushunchalar konkret narsa-hodisalar orqali ifodalanadi. Badiiy adabiyotda allegoriyalar ko`proq an`anaviy tarzda qo`llanib, ular turg`un holatga kelib ulgurgan. Masalan, badiiy asarlarda "tulki" ayyorlik, "bo`ri" vahshiylik, "eshak" farosatsizlik, "jiblajibon" qo`nimsizlik, "buqalamun" tutruqsizlik kabi ko`chma ma`nolarda qo`llanadi. Badiiy adabiyotda mohiyatan allegoriyaga yaqin bo`lgan ko`chimning bir turi sifatida simvol (ramz) ham qo`llanadi. Simvolning allegoriyadan farqi shundaki, u muayyan kontekst doirasida ham o`z ma`nosida va ham ko`chma ma`noda qo`llanadi. Masalan, Cho`lpon she`riyatidagi "yulduz", "bulut", "bahor", "qish" obrazlari buning yorqin misoli bo`la oladi. Jumladan, Cho`lponning mashhur "Qalandar ishqi" she`rini o`qiganda uni ishqiy mavzudagi she`r sifatida tushunishimiz mumkin. Biroq bu she`rdagi ramzlar qatida boshqa bir ma`no ham mustaqil holda mavjud bo`lib, bu ma`noni o`z vaqtida shoirga ruhan yaqin qishilar tushunganlar. Sababi, ular ramzlarning ma`nosi anglashiladigan kontekstdan — shoirning hayot yo`li, orzu-intilishlari, she`r yozilgan paytdagi ruhiy holati va h. omillardan xabardor bo`lganlar. Demak, hozirda ham she`rni Cho`lponning hayot yo`li va ijodiy merosi kontekstida o`rganilsa, ramziy ma`no anglashilishi mumkin.

Ramzning tabiati haqidagi fikrlarni R.Parfi she`ridan olingan tubandagi parcha misolida ham ko`rishimiz mumkin: Yana keldim mahzun go`shaga Bunda bir nay yotibdi sinib. Qo`y sig`inma ortiq o`shanga, Qo`y sig`inma unga sevgilim... Parchadagi "singan nay" ramzdir. Mazkur ramzni o`z ma`nosida ham (ya`ni, o`sha go`shada chindanam singan nay yotibdi degan ma`noda), shuningdek, uni lirik qahramonning yo`qotilgan hislari, armonga aylangan orzulari ma`nosida ham tushuniish mumkin bo`ladi. Ikkinchi holatda biz "singan nay"ni ramz sifatida qabul qilgan bo`lamiz. Masalaning yana bir muhim tomoni shuki, "singan nay" bilan "yo`qotilgan hislar, armonga aylangan orzular" orasida hech qanday, ya`ni, metaforadagi kabi o`xshashlik yoki metonimiyadagi kabi aloqadorlik asosidagi munosabat mavjud emas. YA`ni, "singan nay" faqat shu kontekst doirasidagina shartli ravishda o`sha mazmunni ifodalashi mumkin. Xuddi shu gap Cho`lponning "Qalandar ishqi" she`ridagi "yor", "muhabbat", "dengiz", "yulduz", "quyosh" ramzlariga ham to`la taalluqlidir. Zero, ular ham o`zlari ifodalayotgan ramziy ma`no bilan o`xshashlik yoki aloqadorlik munosabatida emas, faqat shartli ravishdagina (shartdan, kontekstdan boxabar kishilargagina) ramziy ma`noni ifodalaydilar. Shartdan, kontekstdan bexabar o`quvchi uchun esa she`rning faqat bevosita mazmuni, yuzadagi mazmunigina mavjuddir. Badiiy tasvir va ifoda vositalari mavzusiga to`xtalar ekanmiz, biz mavjud vositalarning hammasini ko`rib chiqishni maqsad qilmaganmiz. Zero, bu vositalarning har biri alohida mashg`ulot mavzusi bo`lish uchun yetarli material beradi. Yuqoridagi mulohazalar mazkur mavzuga kirish vazifasini o`tasa kifoya. Siz endi adabiyotshunoslikka oid lug`atlar, badiiy til xususiyatlariga oid ishlar bilan tanishish, badiiy asarlarni mutolaa qilish jarayonida til unsurlariga jiddiy e`tibor qilishingiz, biz to`xtalmagan yoki misollar keltirmagan vositalar mohiyatini mustaqil o`rganishingiz va o`zlashtirishingiz zarur bo`ladi.

Adabiyotlar: 1. Fitrat. Adabiyot qoidalari. T., 1995 2. Adabiyot nazariyasi: 2 tomlik.-1-t.-T.,1978 3. Boboyev T. SHe`r ilmi ta`limi.-T.,1996 4. Boboyev T., Boboyeva Z. Badiiy san`atlar.-T.,2000 5. Lapasov J. Badiiy matn va lisoniy tahlil.- T.:O`qituvchi,1995 Hojiahmedov A. SHe`riy san`at va mumtoz qofiya.-T.,1998 7. Hojiahmedov A. SHe`r san`atlarini bilasizmi.-T.,1999 8. Qosim Y. Yangi o`zbek she`riyatida ramzlar// O`zbek tili va adabiyoti.-1998 №5. B.3-8. 9. Tomashevskiy B.V. Stilistika.-L.,1983 10. Polyakov M. Voprosi poetiki i xudojestvennoy semantiki.- M., 1986. 11. Vinokur G.O. O yazo`ke xudojestvennoy literaturi.-M.,1991 12. Grigoryev V. Poetika slova.-M.,1979 13. Teoriya metafori.-M.,1990 14. Kvyatkovskiy A.K. Poeticheskiy slovar.-M., 1966. 15. www.kasu.uz 16. www.tdpu.uz

O'xshashlar

Hikoyada badiiy sintez va ramziy tasvir

Hozirgi o’zbek she’riyatida ruhiy kechinma va badiiy ifoda

Ideal va badiiy yaxlitlik

Badiiy obraz va obrazlilik

Hayot va adabiyot adabiyotning tasvir ob’ekti predmeti vazifasi