Plazmatik hujayralar yoki plazmotsitlar (plasmocyti) - Валеология - Рефераты

Plazmatik hujayralar yoki plazmotsitlar (plasmocyti)

Загружено в:

20.09.2019

Скачано:

0

Размер:

688.9140625 KB

Plazmatik hujayralar yoki plazmotsitlar (plasmocyti) Reja: 1. To`qima bazofillari yoki semiz hujayralar (labrocytus seu Granulocytus basophilus textus) 2. Yog’ hujayralari (adipocyti)

Plazmotsitlar sut emizuvchilarda va, xususan, odamda ko`p uchrovchi hujayra turidir. U murtaklarda, taloq, limfa tuguni, jigar, ichakning shilliq qavatida va boshqa a’zolarda uchraydi. Plazmatik hujayralar oval yoki yumaloq shaklga ega bo`lib, yadrosi ekstsentrik joylashadi. Hujayra sitoplazmasi to`q bazofil bo`yaladi. Elektron mikroskopda plazmotsit sitoplazmasida juda yaxshi rivojlangan donador endoplazmatik to`r, Golji kompleksi va erkin ribosomalarni ko`rish mumkin. Golji kompleksi atrofi-da lizosomalar ham uchraydi. Plazmotsitlarning asosiy vazifasi immunoglobulinlar yoki antitelolar ishlab chiqarishdir. Hozirgi vaqtda immunoglobulinlarning asosan 5 sinfi (A, G, M, D, E) plazmatik hujayrada hosil bo`lishi tasdiqlangan. Bu moddalar donador endoplazmatik to`rda vujudga kelib, boshqa a’zo hujayralaridagi singari sekretor konveyerga tushib, hujayradan tashqariga chiqariladi. Sekretor moddaning tashqariga chiqishi plazmotsitoz (sitoplazma bo`lakchalarining ajralnshi) yo`li bilan yuzaga chiqishi mumkin. Hozirgi davrda plazmatik hujayralarning B- limfotsitlardan hosil bo`lishi aniqlangan. Qonning o`zak hujayralaridan qushlarda Fabritsiy xaltachasi, sut emizuvchilarda esa qizil suyak ko`migida B-limfotsitlar hosil bo`ladi. B- limfotsitlar esa antitelolar ishlab chiqaruvchi plazmatik hujayralarga aylanishi mumkin. Plazmatik hujayralarning bir necha turlari farqlanadi: plazmoblastlar, proplazmotsitlar va yetuk plazmatik hujayralar. Plazmoblast hujayrasida RNK to`planadi va bu hujayra intensiv oqsil sintez qiladi. Antitelolarning hosil bo`lishi plazmoblastlarning yetilgan plazmatik hujayraga aylanishi bilan bog`liq. Bunda bir necha ketma-ket hujayra bo`linib, bir plazmoblastdan o`nlab yetilgan plazmatik hujayralar hosil bo`ladi. Immunologik aktiv klon antigen kiritilgandan 1--2 kundan so`ng plazmoblastlarning bo`linishidan hosil bo`ladi. Plazmoblastlar tez bo`linuvchi hujayralardir. Ular proplazmotsitlar bosqichiga o`tib, ko`p miqdorda immunoglobulin hosil qiladi. Shu bilan ularda ko`payish qobiliyati saqlanib qoladi. So`ngra proplazmotsitlar yetilgan, ko`payish qobiliyatini yo`qotgan hujayralarga aylanadi. Hujayra bo`linishidan boshlab, ya’ni klon hosil bo`lishidan to yetilgan plazmatik hujayralar hosil bo`lguncha 3 sutka o`tadi. Antitelo hosil bo`lishining

to`xtashi antitelo hosil qiluvchi hujayralar populyatsiyasiningso`nishi bilan bog`liq. Antigen to`qimaga tushganda unda plazmatik qatorning hamma hujayralari, ko`proq yetilgan plazmatik hujayralar bo`ladi. Lekin immunologik reaksiya boshlanishida avval antitelo hosil qiluvchi plazmoblastlar, undan so`ng yetilgan hujayralar ko`payadi. Immunologik reaksiyaga tayyorlik boshlang`ich hujayraga bog`liq bo`lib, yetilgan hujayralarga bog`liq emas. Bir plazmatik hujayra faqat bir immunologik spetsifik antitelo hosil qiladi. To`qima bazofillari yoki semiz hujayralar (labrocytus seu granulocytus basophilus textus) To`qima bazofillari (labrotsit, mastotsit yoki geparinotsit) birinchi marta 1877 yilda Paul Erlix tomonidan ta’riflangan bo`lib, sitoplazmasida yirik donachalarni tutgani uchun semiz hujayralar nomini olgan. Ular asosan qon tomir kapillyarlari atrofida joylashadi. Bu hujayralar yirik noto`g`ri dumaloq shaklga ega bo`lib, fiziologik reaksiyalarda va turli patologik holatlarda miqdori o`zgarib turadi. Hujayra sitoplazmasida organellalardan tashqari yirik gomogen donachalar (kattaligi 0,3-1,0 mkm) joylashgan (74-rasm). Bir hujayrada. taxminan 10-20 ta donachalar bo`lib, ularni tuzilishiga ko`ra donador, plastinkasimon va aralash donachalarga bo`lish mumkin.. Donachalar o`zida biologik aktiv bo`lgan moddalar: g e p a p i n, g i s t a m i n va serotoninlar tutadi. Bundan tashqari sitoplazmada har xil fermentlar: lipaza, ishqoriy fosfataza, peroksidaza, sitoxromoksidaza, ATF-aza va boshqalar mavjud. Hujayraga xos fermentlardan biri bo`lib gistidin dekarboksilaza hisoblanadi. Bu ferment yordamida gistidin aminokislotasidan gistamin sintezlanadi. To`qima bazofillarining donachalarida saqlanadigan geparin va gistamin to`qimalar muhiti doimiyligini (gomeostazni) ta’minlashda muhim rol o`ynaydi. Geparin donachalar mahsulotining qariyb 30% ini tashkil etib, sulfatlangan kislotali glikozaminoglikanlarga kiradi.

74-rasm. To`qima bazofilning elektron mikrofotogrammasi. X 12.000. I-sitolemma; 2-yadro; 3-sekret donachalari. U qon ivishiga to`sqinlik qiladi, hujayralararo moddaning o`tkazuvchanligini pasaytiradi va yallig`lanish protsessini susaytiradi. Gistamin esa kuchli aktiv modda bo`lib, kapillyarlar devorining o`tkazuvchanligini oshiradi va qon tomirlarni kengaytiradi. Shu xususiyatlari tufayli to`qima bazofillaridan ajralib chiqadigan gistamin turli xil allergiya reaksiyalarida ishtirok etadigan asosiy moddalardag` biri bo`lib hisoblanadi. Gistamindal tashqari, allergiya reaktsiyalarida to`qima bazofillari ajratib chiqaradigan moddalar, jumladan, allergiyaning sekin ta’sir ko`rsatuvchi moddasi, trombotsitlarni aktivlovchi modda, neytrofil va eozinofillarning :xemotaksisini kuchaytiruvchi modda va boshqalar ishtirok etadi. Bu moddalarning hujayradan tashqariga chiqishi degranulyatsiya deb atalib, u turli usul bilan amalga oshishi mumkin. Degranulyatsiya jarayonida to`qima bazofillarining hujayra qo-big`ida joylashgan maxsus retseptorlari muhim o`rin tutadi. Bu retseptorlar organizmga tushgan yot antigenlarning antitelolar bilan hosil qilgan maxsus «antigen + antitelo» kompleksini o`ziga biriktirib olib, natijada, hujayradan yuqorida qayd qilingan moddalarning ajralib chiqishiga olib keladi. Hozirgi paytda allergiya kasalliklarida immunoglobulinlarning maxsus E sinfi (Ig E) muhim rol o`ynashi tasdiqlangan. Allergiya reaktsiyalariga moyil bo`lgan

organizmda antigenlarga yoki allergenlarga qarshi ko`p miqdorda Ig E ishlab chiqariladi. «Allergen + Ig E» kompleksi esa to`qima bazofillarining retseptorlari bilan bog`lanib, hujayralar degranulyatsiyasiga sabab bo`ladi. Demak, bu holatlarda Ig E himoya vazifasini o`tash o`rniga to`qimalarda muhit doimiyligini buzilishga olib keladi. To`qima bazofillariga tuzilishi va ximiyaviy tarkibi jihatidan qondagi bazofil leykotsitlar juda yaqin turadi. Ammo bazofil leykotsitlarning qizil suyak ko`migidagi o`zak hujayralardan kelib chiqishi tasdiqlangan bo`lsa, to`qima bazofillarining kelib chiqish manbai hozirgacha aniq ko`rsatilmagan. To`qima va qon bazofillarining tuzilish va faoliyat jihatidan o`xshashligi, bu ikkala hujayralarning son jihatidan bir-birini to`ldirib turishi to`qima bazofillari ham o`zak hujayralardan kelib chiqadi degan taxminga dalil bo`la oladi. To`qima bazofillarida mitoz bo`linishining juda kam uchrashi ham bu fikrning qo`shimcha isbotidir. Yog’ hujayralari (adipocyti) Y OG ’ hujayralari yoki adipotsitlar asosan qon tomirlar bo`ylab joylashadi. Ba’zi joylarda esa yog` hujayralari to`planib, yog` to`qimasini hosil qiladi. Yog` hujayralari biriktiruvchi to`qi- maning kambial elementlaridan, retikulyar va adventitsial hujayralardan hosil bo`lishi mumkin. Bu hujayralar sitoplazmasida yig`ilgan mayda-mayda yog` tomchilari yirik tomchilarni hosil qiladi (75-rasm). Sitoplazma organellari va yadro chetga surilib, yog` hujayrasi sharsimon shaklni oladi. Maxsus bo`yovchi moddalar (sudan III va boshqalar) yog`ni bo`yasa, spirt uni eritadi. Gematoksilin-eozin bilan bo`yalgan preparatlarda yog` hujayralari oqish bo`lib ko`rinadi.

75-rasm. Yog` hujayralari. Charvidan tayyorlangan. 0b. 10. ok. 10. 1-yog` hujayralari; 2-biriktiruvchi to`qima; 3-qon tomir. Elektron mikroskopda endoplazmatik to`r va Golji kompleksining juda sust rivojlanganligini ko`rish mumkin. YOG ` tarkibi turlicha bo`lib, iqlim sharoitiga va ovqatlanish turiga bog`liq («Yog` to`qimasi» ga q.) Adipotsitlar (ba’zan lipotsitlar deb ham ataladi) ancha yuqori modda almashtirish qobiliyatiga ega. Qon va limfaga so`rilgan yog` tomchilari yoki xilomikronlar (diametri 1 mkm atrofida) tomirlar endoteliysidagi fermentlar ta’sirida yog` kislotalari bilan glitseringa parchalanadi. Bu moddalar adipotsitlar tomonidan so`rilib hujayralarda glitserolkinaza fermenti yordamida yana qayta triglitseridlarga sintezlanadi va yog` zapasi shaklida to`planadi. Adipotsitlarda to`plangan yog` zaruriyat tug`ilgan paytda hujayradan chiqarilib lipaza fermenti yordamida parchalanadi, hosil bo`lgan glitserin va yog` kislotalari qondagi albumin bilan bog`lanib to`qimalarga «yoqilg`i» sifatida yetkaziladi. Pigment hujayralar P igment hujayralar siyrak biriktiruvchi to`qimaning ma’lum joylarida, ko`zning qon tomirli va rangdor pardalarida, terida, sut bezi so`rg`ichi, anus (chiqaruv) teshigi atrofida ko`proq uchraydi. Pigment hujayralar noto`g`ri shakldagi kalta o`simtali hujayralar bo`lib, sitoplazmasida mayda-mayda pigment donachalarini tutadi. Bu pigment melanin deb atalib, mikroskopda to`q jigarrang bo`lib ko`rinadi. Uzida pigment saqlovchi hujayralar melanoforotsitlar, pigment

sintez qilish xususiyatiga ega bo`lgan hujayralar esa melanoblastotsit yoki melanotsitlar deb ataladi. Melanin pigmenti melanoblastotsit hujayralarining ditoplazmasida tirozin aminokislotasining oksidlanish mahsulotlarini polimerizatsiyasi natijasida hosil bo`ladi. Tirozin esa melanoblastotsit mitoxondriyalari tarkibida bo`luvchi tirozinaza fermenti ta’sirida hosil bo`ladi. Melaninning hosil bo`lishi endokrin bezlarning faoliyatiga bog`liq. Uning sintez qilinishi ultrabinafsha nurlari va ba’zi bir kimyoviy moddalar ta’sirida kuchayadi. Pigment hujayra-larining kelib chiqish manbai oxirigacha aniqlanmagan. Ko`pchilik tadqiqotchilar fikricha bu hujayralar, garchi biriktiruvchi to`qimada joylashsa ham, mezenximadan emas, balki nerv qirra-sidan taraqqiy etadi. Retiqulyar hujayralar (reticulocyti) Retikulyar hujayralar qon yaratuvchi organlar asosini hosil qiluvchi, sitoplazmasi bazofil bo`yaluvchi, yadrosi oval, mayda donador xromatinli hujayralardir. Bu hujayralar ichakda, buy-rakda va boshqa a’zolarning shilliq qavatida ham uchraydi. Retikulyar hujayralar kam differensiallangan hisoblansa ham, ularning bo`linishi kam kuzatiladi. Ular o`simtali, sitoplazmasi ochroq bazofil bo`yaluvchi hujayralar bo`lib, turli ta’sirlar natijasida yumaloq shaklni oladi. Retikulyar hujayralarning turlari va faoliyati haqidagi ma’lumotlar yetarli bo`lmaygina qolmay, turli qarama-qarshiliklarga ham egadir. Hujayralarning nomi reticulum - to`r so`zidan kelib chiqqan bo`lib, bu yerda to`r hosil qiluvchi hujayralar ma’nosida kelgan. Haqiqatan ham, retikulyar hujayralar o`z o`siqlari va retikulin tolalari yordamida yuqorida qayd yetilgan a’zolarda maxsus to`rlar hosil qiladi. Qon yaratuvchi a’zolarda (timus bundan mustasno) retikulyar hujayralar bo`lajak qon hujayralari (eritrotsitlar, granulotsitlar va B-limfotsitlar) uchun maxsus mikromuhit yaratishda ishtirok etadi. Ular suyak ko`migida, taloqda va limfa tugunlarida B-limfotsitlar joylashadigan zonalarda uchrab, «follikulyar dendritik hujayralar» (FDH) nomi bilan yuritiladi. FDH dan tashqari, bu a’zolarda

fibroblastlarga o`xshab ketadigan va kam differentsiallashgan retikulyar hujayralar uchraydi. Xulosa qilib aytganda, retikulyar hujayralar mezenxima mahsuloti bo`lib, qon va immunokompetent hujayralari uchun mikromuhit tashkil etuvchi hujayralardan biridir. Quyida keltiriladigan hujayralar (endoteliy, adventitsial hujayralar va peritsitlar) asosan qon tomirlar sistemasi uchun xos bo`lib, ularning hayoti va faoliyati shu sistema bilan bog`liq-dir. Ammo qon va limfa tomirlari biriktiruvchi to`qimaning asosiy elementlari bo`lgani uchun biz bu hujayralarni qisqacha ta’riflab o`tamiz. Endoteliy hujayralari (endotheliocyti) Endoteliy hujayralari yurak, qon tomir sistemasining hamma tarkibiy qismlarini va limfa tomirlarini ichki tarafdan qoplab turadi. Bu hujayralar uzluksiz qavat hosil qilib, limfatik tomirlardan boshqa qismida bazal plastinkada joylashadi. Endoteliy hujayralari yassi hujayralar bo`lib, kumush bilan impregnatsiya qilinganda hujayra chegaralari aniq ko`rinadi. Qo`shni hujayralar orasidagi kontaktlar turg`un bo`lmay patologik hollatlarda va ba’zi fiziologik o`zgarishlarda yo`qolishi va qayta tiklanishi mumkin. Elektron mikroskopda hujayra ostidagi bazal plastinka aniq ko`rinadi. Hujayraning yadro saqlovchi qismlari kengrok, (3-6 mkm), chetki qismlari ancha yupqa bo`ladi (qalinligi 20- 80 nm va ba’zan 1-2 mkm gacha boradi). Ba’zi a’zolarning endoteliy hujayralari sitoplazmasi ma’lum qismlarda shunchalik yupqalashadiki, hujayraning ichki va tashqi membranalari bir-biriga tegib, fenestralar hosil qila-di. Hujayra sitoplazmasida ko`p miqdorda pinotsitoz pufakchalar mavjud bo`lib, ular turli moddalarni kapillyar bo`shlig`idan to`qimalarga va modda almashinuv mahsulotlarining esa oraliq moddadan kapillyarlarga o`tishida muhim o`rin tutadi. Endoteliy hujayralari joylashgan bazal plastinka (membrana) fibrillyar tolalardan va ko`p miqdorda mukopolisaxaridlar saqlovchi amorf moddadan iborat bo`lib, uning holati kapillyarlar o`tkazuvchanligini belgilaydi. Endoteliy hujayralari biriktiruvchi to`qimaning kollagen tolalariga nozik ipchalar -

filamentlar orqali birikadi. Xulosa qilganda, endoteliy hujayralari mezenximadan taraqqiy etib, qon (yoki limfa) va to`qimalar orasidagi moddalar almashinuvida muhim o`rin tutadi. Bu jarayonda endoteliy hujay-ralaridagi yupqalashgan qismlardagi fenestralar, hujayralar orasidagi yoriqlar va sitoplazmadagi pinotsitoz pufakchalar katta ahamiyatga ega. Peritsitlar (pericyti, periangiocyti) Qon tomir endoteliy hujayralarining tashqi tomopida bazal membrana hosil qilgan yoriqlarda yoki bazal membrana bilan endoteliy hujayra bazal plazmolemmasi orasida peritsit hujayralari joylashib, ularni perikapillyar hujayralar yoki periangiotsitlar deb ham yuritiladi. Peritsitlarning o`ziga xos xususiyatlaridan biri ularning hamma tarafdan bazal membrana bilan o`ralgan holda joylashishidir. Bazal membrana peritsitga yaqin yerda ikkiga bo`linib, hu-jayrani qamrab oladi. Peritsitlar ovalsimon yoki noto`g`ri shaklga ega bo`lishi mumkin. Ba’zan peritsitlar tuzilishi jihatdan limfotsitlarga juda o`xshab ketadi. Peritsitlarning faoliyati oxirigacha aniqlangan emas. Bu hujayralarda ba’zan nerv oxirlarining tugallanishi peritsitlar qon kapillyarlari teshigining kattaligini boshqarib turadi, degan fikrga olib keladi. Keyingi yillarda peritsitlarga ma’lum bir sharoitda biriktiruvchi to`qimaning boshqa hujayralariga (fibroblastlarga) aylanadigan o`ziga xos hujayralar sifatida qaralmoqda. Adventitsial hujayralar (adventitiocyti) Ular kam differensiallangan, yassi yoki duksimon shaklga zga hujayralar bo`lib, qon tomirlar atrofida joylashadi. Adventitsial hujayralar peritsitlardan farq qilib, hech qachon bazal membrana bilan o`ralmaydi. Ularning sitoplazmasi sust bazofil bo`yalib, o`zida kam miqdorda organellalar tutadi. Adventitsial hujayralar kam differensiallangan hujayralar bo`lib, ulardan ma’lum sharoitlarda fibroblastlar yoki adipotsitlar (yog` hujayralari) hosil bo`lishi mumkin deb hisoblanadi. Surak biriktiruvchi to’qimaning hujayralararo moddasi Siyrak biriktiruvchi to`qimaning hujayralararo moddasi amorf (asosiy)

moddadan va uch turli tolalardan iborat. Kollagen va elastik tola tolalarning asosiy qismini tashkil etib, unda retikulyar tolalar kam uchraydi. Amorf modda va tolalar asl biriktiruvchi to`qimaning hamma turlarida har xil nisbatda uchraydi. Shuning uchun quyida keltirilgan hujayralararo moddaning tuzilishi biriktiruvchi to`qi-maning hamma turlari uchun tegishlidir. Asosiy modda (substantia fundamentalis) Asosiy, amorf yoki sement modda gomogen massa bo`lpb, kolloiddan iborat. Amorf modda biriktiruvchi to`qima takomilining ilk bosqichlarida hosil bo`lib, avvaliga tolalar ko`proq bo`ladi keyinchalik amorf modda differensiallashib, biriktiruvchi to`qimaning bir turida, masalan, terida kam, tog`ayda esa ko`proq glikozaminoglikanlar (mukopolisaxaridlar) tutadi. Normal sharoitda asosiy modda gel konsistentsiyasiga ega. Uning tarkibiga biriktiruvchi to`qima hujayralarida sintezlanuvchi moddalar (sulfatlangan glikozaminoglikanlar-xondroitin-sulfat, geparinsulfat, keratinsulfat, gialuron kislota; fermentlar, immun tanachalar) va qon tomir orqali keluvchi moddalar (albumin, globulin, vitaminlar, gormonlar, ionlar, suv, fermentlar, immun tanachalar va metabolitlar) kiradi. Bu komponentlarning miqdori fiziologik va patologik holatlarda o`zgarib turadi. Glikozaminoglikanlar, xususan, gialuron kislota, xondroitinsulfat va geparinsulfat asosan oqsillar bilan kompleks holatda bo`ladi. Amorf moddaning miqdori birik-tiruvchi to`qimaning turli qismlarida turlicha. Qon tomir kapillyarlari atrofida, yog` hujayralari to`plangan joylarda yoki retikulyar hujayra ko`p bo`lgan qismlarda amorf modda kam bo`ladi. Lekin biriktiruvchi to`qimaning epiteliy bilan chegaradosh qismlarida amorf modda ko`p. Bu yerda amorf modda kollagen va retikulyar tolalar bilan birga chegara membranasini (bazal plas-tinkani) hosil qiladi. Asosiy modda turli moddalarni qon tomirdan hujayraga yoki metabolizm qoldiqlarini hujayradan qonga o`tishida asosiy tuzilma sanaladi. Uning o`tkazuvchanligi glikozaminoglikanlar konsentratsiyasiga va boshqa fizik- kimyoviy holatlarga bog`liq. Gistamin va gialuronidaza fermenti ta’sirida amorf moddaning o`tkazuvchanligi keskin oshadi. Shunday qilib, amorf modda

organizmda modda almashinuvida muhim o`rin tutib, uning o`zgarishi turli kasalliklarga olib kelishi mumkin. Siyrak biriktiruvchi to’qima tolalari Kollagen tolalar (fibrae collagenosae). Kollagen (yunon. kolla - yelim, genos - yaratmoq, vujudga keltirmoq, yelim hosil qiluvchi demakdir) faqatgina asl biriktiruvchi to`qimada bo`l-may, balki suyakda - ossein tog`ayda - xondrin tolalar nomi bilan mavjud. Kollagen tolalar siyrak biriktiruvchi to`qimada turli yo`nalishda yotuvchi to`g`ri yoki egri-bugri tortmalar holida joylashadi. (76-rasm). Kollagen tolalar tarkibida fibrillyar oqsil - kollagen bo`lib, u fibroblast hujayralarida polipeptid zanjirlar (prokollagen) shaklida hosil bo`la boshlaydi. Har bir zanjir uch turli aminokislotadan iborat bo`lib, ulardan birinchisi xohlagan aminokislota, ikkinchisi prolin yoki lizin, uchinchisi esa glitsindir. Bu aminokislotalar zanjirda ko`p marta xuddi shu tartibda qaytariladi. Prolin va lizin darhol gidroksiprolin yoki gidroksilizingacha oksidlanadi. Hujayra ichida 3 ta kalta polipeptid zanjirlar bir-biriga o`raladi va tripletlar hosil qiladi. Har bir triplet molekulasi uch polipeptid zanjirdan iborat bo`lib, eni 1,4 nm, uzunligi 280-300 nm ga teng. Bu tripletlar tropokollagen deb nomlana-i. Uning molekulyar og`irligi 360 000 ga teng. Tropokollagen oqsili hujayra tashqarisiga sekretsiya qilinadi. Tropokollagen tolalari bir-biriga ulanib, protofibrillarni hosil qiladi. So`ngra ATF ishtirokida polimer zanjirlar vodorod bog`lar yordamida yonma-yon ulanib «birlamchi fibrillalarni» (75 nm ga teng) hosil qiladi. Ularda ko`ndalang chiziqlarni ko`rish mumkin. Ko`ndalang chiziq polimerizatsiya qilish davrida hosil bo`lib, tropokollagen molekulalarining orasida qoladigan bo`shliqqa bog`liq. Birlamchi fibrillalar birlashib, eni 5-15 mkm, uzunligi turlicha bo`lgan kollagen fibrillalarni hosil qiladi. Shunday qilib, kollagen tolalar birlamchi fibrillalardan, ular esa protofibrillalardan, protofibrillalar esa tropokollagenlardan iborat (77-rasm). Hozirgi vaqtda kollagenning 12 tipi mavjud. Bu tiplar har xil a’zolarda

bo`lgan kollagenning ximiyaviy tarkibi, joylashishi va xususiyatlariga ko`ra tafovut qilinadi: I tip-terida, suyakda, ko`z muguz pardasida, sklerada uchraydi. II tip - gialin va tolali tog`aylarda joylashadi. 76-pacm. Terining to`rsimon qavatidagi kollagen tolalarning bo`ylama kesmasi. Elektron mikrofotogramma. X87.500. 1- kollagen fibrillalar; 2- ko`ndalang chiziqlar. III tip - homila terisining dermasida, retikulyar to`qimada va yirik qon tomirlar devorida uchraydi. IV tip - bazal membranalarda va ko`z gavharini o`rovchi kapsulada joylashadi. Qolgan V-XII tipdagi kollagenlarning xususiyatlari hali aniq emas. Kollagen tolalarda glitsin, prolin, oksiprolin, glyutamin, asparagin kabi aminokislotalar ko`p bo`lib, oltingugurt saqlovchi aminokislotalar kam. Kollagen tolalar juda pishiq va cho`zilmaydi. Pay suyultirilgan ishqor va kislotalarda 10 marta shishadi.

77- rasm. A - kollagen tolalarning tuzilish sxemasi. B - kollagen makromolekulasining spiral strukturasi (Rich bo`yicha); kichik oq doiralar- glitsin, yirik oq doiralar-prolin. Shtrixlangan doiralar - gidroksiprolin. I - polipeptid zanjir; II - kollagen molekulalari (tropokollagen); III - protofibrilla; IV- ko`ndalang chiziqli ko’rinadigan eng ingichka fibrillalar; V - kollagen tola (V.G. Yeliseev va boshqalar, 1972). Elastik tolalar. Elastik tolalarning hosil bo`lishi kollagen tolalarning hosil bo`lishiga o`xshaydi. Fibroblastlar elastik tolalarning ham hosil bo`lishida ishtirok etadi. Elastik tolalar tolali biriktiruvchi to`qimada va biriktiruvchi to`qimaning ba’zi boshqa turlarida uchraydi. Ular maxsus bo`yoqlar bilan bo`yalganda (orsein, rezorsin-fuksin) kollagen tolalardan aniq ajralib ko`rinadi. Elastik tolalar qalinligi 8-20 nm keladigan fibrillalardan hosil bo`lib, tolalar qalinligi siyrak biriktiruvchi to`qimada 1-3 mkm bo`lsa, elastik bog`lamlarda 8- 10 mkm gacha yetadi. . . . Elastik tolalarda kollagendan farqli ravishda ko`ndalang chiziqlik yo`q. Bu holat elastik tolani hosil qiluvchi oqsillarning betartib joylashishi bilan ta’riflanadi. Elastik tola oqsillari umumiy qilib elastin deb ataladi.

Elastik tolalarda bir-biridan farqlanuvchi oqsillar borki, bu oqsillar aminokislotalar tarkibi kollagen oqsilidan boshqachadir. Kollagenga nisbatan bu oqsillarda glitsin va prolin kabi aminokislotalar ko`p bo`lib, glyutamin, asparagin kislota, oksiprolin, arginin va boshqalar ancha kam. Bundan tashqari, elastik tolalardagi oqsil o`zida sistin aminokislotasini tutmaydi. Uning o`rniga bu oqsilda aminokislotalar hosilasi bo`lgan desmozin va izodesmozin bo`lib, bu hosilalar elastik tolaning cho`ziluvchanligini ta’minlaydi. Elastik tolalar yaxshi cho`ziladi, lekin uzilishi ham oson. Elastik tolalarda vaqt o`tishi bilan mineral tuzlar o`tirib, uni sinuvchan qilib qo`yady. Retikulyar tolalar. Biriktiruvchi to`qimaning ba’zi turlarida, qon yaratuvchi a’zolar stromasida, jigarda, qon tomirlar (asosan kapillyarlar), mushak va nerv tolalari atrofida kollagen va elastik tolalardan tashqari retikulyar yoki retikulin tolalar ham uchraydi. Bu tolalar III tipdagi kollagenga kirib, kumush tuzlari bilan impregnatsiya qilinganda aniq ko`ringani uchun ba’zan argirofil (yunon. argyros - kumush) tolalar deb ham yuritiladi. Retikulyar tola (rete - to`r) deb nomlanishi ularning to`r hosil qilishini bildiradi. Retikulyar tolalarning tuzilishi yaxshi o`rganilmagan bo`lsa ham, ma’lum faktlar bu tolalar oqsildan - retykulindan (kollagenning maxsus turi) tuzilganligini ko`rsatadi. Retikulii oqsili kollagen va elastik tolalardagi oqsillardan serin, oksilizin va glyutamin aminokislotalarining ko`pligi bilan ajralib turadi. Oqsil mikrofibrillalari taxminan 40-60 nm qalinlikda bo`lib, ularda ham xuddi kollagen protofibrillalaridagi kabi ko`ndalang chiziqlik ko`rinadi. Retikulyar tolalar kuchsiz kislota, ishqorlar va tripsin ta’siriga chidamli. Zich tolali biriktiruvchi to’qima Siyrak va zich tolali biriktiruvchi to`qimalar orasida keskin chegara o`tkazish mushkul, chunki organizmda biriktiruvchi to`qimaning hujayralar va hujayralararo modda nisbati asta-sekin o`zgaradi. Tolalarning joylanish tartibi bo`yicha zich tolali biriktiruvchi to`qimaning shakllangan va shakllanmagan turlari farq qilinadi. Zich shakllanmagan biriktiruvchi to`qima terining to`rsimon qavati va

bo`g`in xaltachalari biriktiruvchi to`qimasida uchrab, uning kollagen va elastik tolalari bir-biriga zich, lekin tartibsiz joylashganligi uchun to`rsimon tuzilishga ega. Hujayralar turi ko`p bo`lmay, amorf modda ham kamdir. Hujayralar asosan fibroblast va fibrotsitlardan iborat bo`lib, ular uzunchoq shaklga ega. Zich shakllangan biriktiruvchi to`qima esa tolalarning tartibli joylashishi bilan farqlanadi. Bu to`qimada tolalarning joylashishi kuch chiziqlari bo`ylab yo`nalgan. Shakllangan birik-tiruvchi to`qimaga paylar, bog`lamlar, fibroz membranzlar va plastinkasimon biriktiruvchi to`qima kiradi. Bu to`qimaning tarkibiy qismlarining tuzilishiga mukammalroq to`xtab o`tamiz. Paylar (tendo). Paylar pishiq tortmalar bo`lib, mushaklar shu paylar orqali suyakka birlashadi. Paylar bir-biriga parallel yotuvchi yo`g`on kollagen tolalardan tashkil topgan. Kollagen tolalar orasida elastik to`r yotadi (78-rasm). Ularning orasida asosiy modda joylashadi. Biriktiruvchi to`qima hujayralaridan esa tolalar orasida yotuvchi fibrotsitlargina bo`ladi. Fibrotsitlar to`rtburchak, uchburchak yoki trapetsiya shakliga ega bo`lib, yon tomondan tayoqcha shaklini eslatadi. Bu hujayralarni pay hujayralari deb ham nomlanadi. Payda har bir kollagen tolalar tutami fibrotsitlar bilan chegaralangan. Bu tolalar birlamchi tartibli tolalar deyiladi. Bu tolalar tashqi tomondan endotenoniy deb ataluvchi siyrak tolali bi|ljtiruvchi to`qimaning yupqa pardasi bilan o`ralgan. Birlamchi tolalar yig`ilib ikkilamchi tolalar tutamini hosil qiladi. Ikkilamchi tolalar tutami o`z navbatida uchlamchi tolalar tutamini hosil qiladi. Bu tolalar tutami tashqi tomondan peritenoniy deb ataluvchi siyrak tolali biriktiruvchi to`qimadan iborat parda bilan chegaralangandir. Shu pardalarda paylarni oziqlantiruvchi tomirlar hamda paylarni innervatsiya qiluvchi nerv tolalari va nerv oxirlari joylashadi. Fibroz membranalar. Fibroz membranalar - fastsiyalar, aponevrozlar, diafragmaning pay markazlari, ba’zi organlarning kapsulasi, tog`ay ustki pardasi, sklera, tuxumdon va urug`donlarning oqlik pardalarini hosil qiladi. Aponevrozlar, fassiyalar va diafragmaning pay markazi bir-birining ustida bir necha qavat bo`lib yotgan kollagen tolalar tutamlari va ular orasida joylashgan

hujayralardan iborat. Kollagen tolalar bir-biriga parallel yotadi. Fibroz membranalarda kollagen tolalar tutamidan tashqari, elastik tolalardan iborat to`r ham mavjud. Suyak ustki pardasi, sklera, tuxumdonning oqlik qavati, bo`g`imlar kapsulasida kollagen tolalar tutami biroz noto`g`ri joylashgan bo`lib elastik tolalarning ko`pligi bilan aponevrozlardan farq qiladi. Bu qavatlarda fibrotsitlar burchakli yoki duksimondir. 78- rasm. Zich tolali shakllagan biriktiruvchi to`qima. Payning bo`ylama kesimi. Gematoksilin- eozin bilan bo`yalgan. 0b. 10, ok. 10. 1 - kollagen tolalar; 2 - fibrotsitlar. Plastinkasimon biriktiruvchi to`qima kapsula bilan o`ralgan nerv oxirlarida uchraydi. U kontsentrik joylashgan biriktiruvchi to`qima plastinkalaridan iborat. Plastinkalarning asosiy moddasida bo`ylama, ko`ndalang yo`nalishda joylashgan yoki tartibsiz chirmashgan ingichka kollagen tolalar joylashgan. Bu tolalardan ba’zi birlari kollagenga ijobiy reaktsiya bermaydi,. balki o`zining xususiyatlari bilan retikulin tolalarga yaqinlashadi. Plastinkalar ustida o`simtali, yadrosi oval shakldagi fibrotsit hujayralari yotadi. Plastinkalar orasida odatda fibroblastlar va o`troq makrofaglar uchraydi. Elastik biriktiruvchi to`qima. Bu to`qima chin tovush bog`lamida uchrab, parallel yo`nalgan elastik tolalarning yaxshi rivojlanganligi bilan xarakterlanadi. Bu bog`lamda elastik tolalar tarmoqlangani uchun ular to`r shaklini hosil kiladi. Elastik bog`lamlar kollagen to`qimadan farq qilib har xil tartibli tutamlar hosil

qilmaydi. Elastik tipdagi arteriya devorlarida (aorta, o`pka arteriyasi va boshqalar) elastik to`qimaning plastinkalari darchali membranalar (membranae elasticae fenestratae) hosil qiladi. Darchali membranalar bir necha qavat bo`lib joylashgan, ular oralig`i esa silliq mushak hujayralari, fibrotsitlar va asosiy modda bilan to`lgan.

Adabiyotlar: 1. Narziyev D.X., T.: “Mexnat”1986 2. Kodirov E. “Gistologiya” T.: “O’qituvchi” 1994 3. Alimov D.A. Gistologiya va Embriologiya. T. “ O’q ituvchi” 4. Vrakin V.F. “Morfologiya selskoxozyaystvennix jivotnix” M.: “Kolos” 1984. 5. Sidorova M.V. M.: VO “Agropromizdat” 1991 6. Akayevskiy A.I. Anatomiya domashnix jivotnix M.: “Kolos” 1975 7. Sidorova M.V. Davidova Praktikum po anatomi s osnovami gistologii L.: “Selxozizdat” 1985 8. Vrakin V.F. embriologi selskoxozyaystvennux jivotnux M. “Kolos” 1982.

Похожие

Gemolimfatik tugunlar

Limfa tugunlari

Biologik membranalar va hujayra qobig’i

Xujayra fiziologiyasi

Qon yaratuvchi va immun himoya a’zolari