TIKUVCHILIK BUYUMLARI DETALLARINI YELIMLAB VA PAYVANDLAB ULASH USULLARI - Текстиль - Рефераты

TIKUVCHILIK BUYUMLARI DETALLARINI YELIMLAB VA PAYVANDLAB ULASH USULLARI

Загружено в:

20.09.2019

Скачано:

0

Размер:

1080 KB

TIKUVCHILIK BUYUMLARI DETALLARINI YELIMLAB VA PAYVANDLAB ULASH USULLARI REJA: 1. Kiyim detallarini yelimlab ulash 2. Kiyim detallarini payvandlab ulash 3. Kiyim detallarini yelimlab ulash

Materiallarni yyelimlab ulash sanoat tarmoqlarida keng qo`llanilmoqda. Sintetik smolalar paydo bo`lgandan buyon yelimlab ulash ayniqsa keng tarqaldi. Ko`p texnologik jarayonlarda yelimlab ulashning afzalliklari detalni boshqa usulda ulashga nisbattan katta. Yelimlash jarayoni mexanik birlashtirishning, sathlar o`zaro elektrostatik ta`sirining, ba`zi hollarda esa kimyoviy reaktsiyaning umumiy natijasidir. Kiyim detallarini yelimlab yopishtirayotganda gazlama bilan yelim bir-biriga ta`sir etadi. Tikuvchilik sanoatida yelimli materiallar detallarga uqa qo`yishda, detal chetlarini pishiqlashda (bahyaqator yuritilmaganida yolg`on qaviq o`rniga), yoqa, manjet, yeng uchiga qotirmalarni tayyorlashda, kiyim etagini bukib yopishtirishda, bort qotirmalarini tayyorlashda, kiyim uzellaridan cho`ntak qopqoq, yoqa va shu kabi uzellarni yelimlab yiqishda ishlatiladi. Kiyim detallarini yelimlab ulashga mo`ljallangan bir qancha mashinalar yaratilgan. Termokontakt usuli bilan MSTK-2 payvandlash mashinasida yoki "Pfaff" (Germaniya) firmasining 8300 rusumli mashinasida termokontakt usuli bilan yelim ipni yopishtirib olish mumkin. Keyin detal ziyi yoki bukish joyi ko`klangandan keyin dazmollanayotganda (pressda yoki dazmolda) yelim ip asosiy detalga yopishadi. 1-rasm. Cho`ntak qopqoq tayyorlash sxemasi. Kiyim detallarini yelimlab yopishtirganda detal qirqimini ichkariga qaratib bukib (qirqimi yopiq) yoki tashqariga qaratib (qirqimi ochiq) bukib ishlov berish mumkin. Cho`ntak qopqoqlariga ishlov berishda detallar qirqimini yopiq qilib ishlash usuli qo`llaniladi. Bunday usul bilan ishlashda (1-rasm) cho`ntak qopqog`i 1 ning va qopqoq astari 2 ning detallari tashqi 3 va ichki 4 qoliplar yordamida bukiladi (1-rasm,a). Shundan keyin qopqoq avrasining bukilgan chetiga dozator bilan yelim kukun sepiladi. Astarning bukilgan chetidan tashqi qolip olinadi, hamda astar ichki qolip, qisqich qolip 5 va pastki plastina 6 bilan birgalikda qopqoq avrasi ustiga to`g`rilanadi (1-rasm,b). Qoliplar va cho`ntak qopqoq pastki plastina olib tashlanib presslanadi (1-rasm,v).

2-rasm. Eng tayyorlash sxemasi. Qirqimi ochiq usulda detallarni bukib ishlash yeng uchini, ort bo`lak kesimini, yoqani ishlashda qo`llaniladi. Yeng uchi qirqimi ochiq usulda bukib ishlanganda oldin yelim plyonka yeng qotirmasining bir tomoniga uning yuqori qirqimidan 0,2 sm masofaga va ikkinchi tomoniga pastki qirqimidan 1,5-2 sm masofaga joylashtirib qo`yiladi. Yeng (2-rasm, 3) pressning ostki yostig`i 1 ga, teskari tomoni yuqoriga qilib qo`yiladi. Bunda yengning yon va uch qirqimlari qo`zg`almas tayanch bo`ylab to`g`rilanadi. Engning ustiga eng qotirmasi 4 qo`yiladi. Bunda qotirmaning yuqori qirqimi yaqinidagi plyonka pastga qaratib qo`yiladi. Ichki qolip 5 engni bosib tushgandan keyin, tashqi qolip 2 yengning uchini va kesimini bukadi. Keyin ichki qolipni chiqarib tashlab, ustki yostiq 6 tushiriladi va qotirmani yengga, yengning bukilgan chetlari esa qotirmaning pastki uchiga presslab yopishtiriladi. 3-rasm. Palto yoqasini yig`adigan OVK-6 yarimavtomat apparati.

Ana shu texnologik sxema asosida yarimavtomat apparatlar yaratilgan. Bular quyidagilardir: OKP-cho`ntak qopqog`ini yig`adigan apparat, OKSH-1-palto ort bo`lagi qirqimini ishlaydigan apparat, OVK-6 va OVK-7 (3-rasm) palto va pidjak yoqasini yig`adigan apparat, ONK-5-yeng uchini ishlaydigan apparat, SK-3 (4-rasm)-ust kiyim yon cho`ntagini yig`adigan apparat. Bu apparatlarda palto ort bo`lagi qirqimini, eng uchini yig`ayotganda ort bo`lak qotirmasini, yeng qotirmasini o`ramdan tushirib, asosiy detal ustiga qo`yish bilan yelim ipni g`altakdan tushirib joylashtirish jarayonlari birlashtirilsa, yelimlab ulashning samarasi yanada ko`proq bo`ladi. 2. Kiyim detallarini payvandlab ulash Kimyoning rivojlana borishi ko`p mehnat tejash va tabiiy materiallardan ko`ra yaxshiroq materiallar yaratish imkonini bermoqda. Kiyim tikishga mo`ljallangan, fizik-kimyoviy tarkibi jihatidan xilma-xil gazlamalarning paydo bo`lishi kiyim ishlab chiqarish bilan bog`liq bo`lgan muayyan muammolarni yuzaga keltiradi. Bulardan biri mehnat va uskunalar ish unumini pasaytirmay turib, yangi sintetik materiallardan kiyim tayyorlash muammosidir. Bu muammoni hal qilishning yangi ilg`or usullaridan biri kiyim detallari va uzellarini payvandlab ulash usulidir.

4-rasm. Ust kiyim yon cho`ntagini yig`adigan SK-3 yarimavtomati. Termoplastik materiallardan bichilgan ikki yoki bir necha detalni issiqlik va bosim ta`sirida yoki bosimsiz faqat issiqlik ta`sirida bir-biriga ulash jarayoni payvandlash deb ataladi. Payvandlangan chok hech qanday begona modda aralashtirmay hosil qilinadi. Uning yelimlab ulashdan farqi ham ana shunda. Payvandlab tayyorlanadigan kiyimlarga quyidagilar kiradi: plashlar, yoping`ichlar, shuningdek, turli kasbdagi ishchilar uchun peshband englik kabi maxsus kiyimlar. Ip bilan tikish o`rnida payvandlash ishlatilsa, ulangan joylar sifatliroq chiqadi. Yoqa, manjet, cho`ntak qopqoq kabi detallarni ishlashda ba`zan chok haqini kamroq chiqarish hisobiga gazlamadan hatto iqtisod qilib qolish ham mumkin. Payvandlanganda jarayonlarni kompleks mexanizatsiyalashtirish, ayrim detal va uzellar tayyorlaydigan potok qatorlari barpo etish, bo`lajak kiyim detallarini parallel ishlash usulidan foydalanish mumkin bo`ladi. Biror uskunada detallarni payvandlash usuli bilan ishlashni aynan shunday uskunada yelimlab ulash usuliga solishtirilsa, yelimlab ulash uchun 30-60 s, payvandlash uchun esa 2- 3 s ketadi. Undan tashqari, payvandlanganda yelim ham, uni ulanadigan detallarga surkash jarayoni ham kerak bo`lmay qoladi.

Qizdirilganda sintetik materiallarning xususiyatlari qanday bo`lishi ularni tashkil etgan tolalarni hosil qilishda ishlatilgan boshlang`ich mahsulotlarning fizik- kimyoviy tuzilishiga bog`liq. Payvandlash tartibi sintetik smolalarning va ulardan olingan tolalarning qanday haroratda yumshashi va suyuqlanishiga qarab belgilanadi. Tikuvchilikda termoplastik materiallardan buyumlar ishlab chiqarishning asosiy usullardan biri payvandlash usulidir. Bunday termoplastik materiallar ham, ularni payvandlash ham nihoyatda xilma-xil. Bulardan eng yaxshi o`rganib chiqilgani plyonka materiallarni payvandlashdir. Bunda plyonka materialning xususiyati, uning qanday usul bilan hosil qilinishi, polimerning yumshash va erish harorati, payvandlash zonasida pishiq chok hosil qilish uchun zarur bo`lgan bosim, payvand qilinayotgan plyonkalarni yopishqoq-cho`ziluvchan holatga kelguncha qancha vaqt qizdirish kerakligi va plyonkaning qalinligi kabi omillar payvand chok hosil bo`lishiga ta`sir etadi. Termoplastik materiallarning suyuqlanish harorati yaqqol ko`zga tashlanadigan bo`lmaydi va ular qizdirilganda elastik holatdan yopishqoq-cho`ziluvchan holatga asta-sekin o`ta boradi. Elektrda qizdirib payvandlash usulida qizdiriladigan asboblar faqat issiqlik tashish vazifasinigina emas, balki payvandlanish joyiga bosim berish vazifasini ham bajaradi. Payvandlanadigan sathlarga bosim berish uchun ko`pincha maxsus roliklar, lentalar yoki plitalar ishlatiladi. Elektrda qizdirib payvandlash ikki xil bo`ladi: ketma-ket payvandlash va parallel payvandlash. 5-rasm. Rolik yordamida elektrda qizitib payvandlash sxemasi: 1-gazlamani suradigan va bosib turadigan roliklar; 2-qizitish asbobi; 3- payvand qilinadigan plyonka; 4-qizigan roliklari bor ko`chma karetka; 5-plyonka qo`yiladigan sath. Avtomat bo`lmagan yoki avtomat universal mashinalarda elektrda qizdirib ketma-ket payvandlanadi. Ularda qizdiruvchi element sifatida rolik, lenta yoki

kavsharlagich ishlatiladi. Rolik yordamida elektrda qizdirib payvandlashning sxemasi 5-rasmda berilgan. Bu rasmdagi a sxemada payvandlanadigan plyonka surila boradi, b sxemada esa qizdirilgan roliklari bor karetka borib-kelib turadi. Bunday sxemada asosan ketma-ket payvandlanadigan, universal tikuv mashinasi printsipidagi mashinalar ishlaydi. Bu mashinalarda detallarni egri konturlar bo`ylab payvandlash mumkin. Choklar kiyim detallari konturiga mos, egrilik radiusi har xil bo`lib chiqa oladi. Yuqori chastotali tok bilan payvandlash usuli yuqori chastotali tok (YUCHT) elektr maydonida amalga oshiriladi. Yuqori chastotali tok elektr maydoni elektrodlar orasida hosil bo`ladi. Bu elektrodlar ayni vaqtda qisqichlik va bosim beruvchi vazifasini bajaradi. Payvand qilinayotgan materialning hajmidagi dielektrik yo`qotishlar natijasida o`zaro tegib turgan sathlar chegarasida payvandlanish uchun zarur darajada issiqlik hosil bo`ladi. Bu issiqlik yuqori chastotali tok elektr maydonida polimerlardagi dipol (qarama-qarshi belgili elektr zaryadlari bir-biridan muayyan masofada joylashgan) molekulalar siljib, muayyan ish bajarishi hisobiga ajralib chiqadi. Ana shu issiqlik materialni yumshatib, payvandlaydi. Bunday payvandlashning ikki xil usuli bor: ketma-ket (nuqtali va rolikli) payvandlash va parallel (pressda) payvandlash. 6-rasm. YUqori chastotada qizitib payvandlash sxemasi: 1-elektrodlar; 2-payvandlanadigan plyonkalar; 3-qizish zonasi. Ketma-ket payvandlash uchun payvandlash agregatlari tikish mashinalari printsipida konstruktsiya qilinadi. Elektrodi ilgarilama-qaytma harakat qilib ishlaydigan mashinalarda payvandlanadigan materialni roliklar yoki reyka surib turadi, chokni esa qisqa elektrod hosil qiladi. Roliklar materialni vaqt-vaqtida suradi, harakatlanadigan elektrod esa material to`xtagan vaqtda unga tegadi. Bu elektrodga 30-50 MGts chastotali tok ulangan bo`ladi. Yuqori chastotada qizdirib payvandlash usulining sxemasi 6-rasmda berilgan. Parallel ishlash usuli bilan presslab payvandlash tepa elektrodlari ma`lum shaklda bo`lgan payvandlash agregatlarida bajariladi. Payvandlash pressining

tezligi katta bo`lib, payvandlash tsikli 0,5-2,0 s davom etadi. Keyingi vaqtda tikuvchilik buyumlarini applikatsiyalar (qoplama bezaklar) va boshqa yo`llar bilan bezashda yuqori chastotali tok bilan payvandlash oddiy, tejamli va ishonchli usul ekanligi ma`lum bo`ldi. Tajriba ko`rsatishicha, bu usuldan ayollar ich kiyimini bezashda keng foydalanish mumkin. Bunday bezash usuli bolalar kiyimlarini, erkaklarning sport kuylaklarini, ko`rpa-yostiq jildlari va hokazolarni bezashda ham ishlatiladigan bo`ldi. Ultratovush bilan payvandlash. Payvandlash jarayonida issiqlikni uzatish usullaridan biri ultratovush chastotali elastik tebranish tarqatishdir. Qattiq jismda ultratovush tarqalishi qattiq jismning ayrim joylari elastik tebranib, deformatsiyalanishidan iborat. Tebranayotgan jism shu tebranish energiyasini yutib, uni issiqlikka aylantiradi. Ultratovush chastotali tebranishlar bir-biriga tegib turgan detallar orqali o`tayotganda shu tebranishlarning mexanik ta`sirida to`lqinlanishi ta`sirida payvandlanadi. Agar issiqlik istalgan usulda qizdirilgan elektrodlardan chiqayotgan va payvandlash uchun plyonkaning butun qalinligiga issiq o`tkazish zarur bo`lsa, unda dag`alroq chok hosil bo`ladi. Bir-biriga tegib turgan sathlarning haroratini payvandlanish darajasiga etkazish uchun elektrodning harorati payvandlanish haroratidan yuqori bo`lishi kerak. Elektrod materialga tegib turgan joydagi harorat esa atrofdagi muhit haroratiga teng bo`lishi zarur. Aks holda elektrodlarning o`zi qizib ketib, payvandlanish harorati ham ortib ketishi mumkin. Ultratovush chastotasidagi tebranishlarni hosil qilish va ularni materialga uzatish quyidagi sxemada bo`ladi (7-rasm). Vibrator 1 yuqori chastotali elektr energiyasini o`zakning ultratovush chastotali mexanik tebranishiga aylantiradi.

7-rasm. Ultratovush bilan payvandlash 8-rasm. Ultratovush chastotada ishlaydigan sxemasi JUS-1 mash inasi Amplitudasi nihoyatda kichik tebranishlar vibratordan kontsentrator 2 ga o`tadi. Kontsentrator maxsus konstruktsiyada yasalganligi uchun mexanik tebranishni kuchaytirib, pastki uchiga yig`adi. Tebranishlar kontsentrator uchidan (kontsentratorning uchi elektrod vazifasini ham o`taydi) termoplastik material 3 ga o`tadi. Material qaytargich-tayanch 4 ustiga qo`yilgan bo`ladi. Qaytargich esa stol 5 ustiga qo`yilgan bo`ladi. Bosimni elektrod yuqoridan yoki stolning sathi pastidan hosil qilishi mumkin. Termoplastik tolalari bor gazlama yoki trikotaj kiyim detallarini ulash, shuningdek, bezak bahyaqatorlar bosish uchun BSHM mashinasi (beznitochnaya shveynaya mashina-ipsiz tikish mashinasi) ishlab chiqilgan. Material reyka yordamida muayyan m/min tezlikda suriladi. Mashina asosiy valining aylanish chastotasi 1900 min, payvandlash bahyalar yirikligi 5 mm gacha, bahyaqator kengligi 5,5 mm gacha. Ultrotovush generatorining quvvati 200-400 Vt, tebranish chastotasi 22 kGts. Parallel ishlov beradigan ultrotovush chastotasida ishlaydigan mashinaga yapon firmasining JUS qurilmasi misol bo`lishi mumkin (8-rasm). Bu mashina sintetik tolalari kamida 65% bo`lgan gazlamalarda izma yasashga mo`ljallangan.

ASOSIY ADABIYOTLAR 1. Olimov Q.T. Tikuvchilik korxonalari jixozlari va uskunalari. Toshkent. “G’afur G’ulom nomidagi nashriyot-matbaa ijodiy uyi”, 2008 2. Olimov Q.T., Rustamov R.M. va boshqalar. Tikuv mashinalari. Toshkent. Inkomsentr. 2002. 3. Olimov Q.T. “Yengil sanoat mashina va apparatlari”. “DITAF”. Toshkent 2002 4. Olimov Q.T., Jalolova D. “Tikuvchilik korxonalari jixozlari. Toshkent. “Mexnat” 2003. 5. Olimov Q., Nurboboyev R.X., Uzoqova L.P., Bafoyev D.X. “Yengil sanoat jihozlarini ta’mirlash va tiklash asoslari” 6. M. Jabborova “Tikuvchilik texnologiyasi”, T.”O’qituvchi”, 1994 QO’SHIMCHA ADABIYOTLAR: 1. Samarxo’jayev X.H. “Tikuvchilik korxonalarining uskunalari”, Toshkent. “O’zbekiston”, 2001 2. Вал ь щиков Н.М., Шарапин А.И., Идиатулин И.А., Вальщиков Ю.Н. “Оборудование швейного производства”. Москва. “Легкая индустрия”1977 3. Савостицкий А.В., Меликов Е.Х. “Технология швейных изделий”. Москва, “Легкая и пишевая промышленность”, 1982. 4. V . V . Isayev . “ Tikuvchilik korxonalarining jixozlari ” T . “ O ’ qituvchi ”, 1986. 5. Ф.И.Червяков, Н.И.Сумариков, «Швейные машины», М. 1977. 6. Р.И.Егорова, В.П.Монастырная, «Технология швейных изделий», Москва. «Легкая индустрия», 1988. 7. WWW.yandex.ru 8. WWW.rambler.ru 9. WWW.vse.uz 10. WWW.yahoo.ru 11. Ziyonet axborot tarmog’i – www.ziyonet.uz 12. WWW.ya.ru

Похожие

Tikuvchilik buyumlari detallarini yelimlab va payvandlab ulash usullari

Tikuvchilik sanoatining umumiy tavsifnomasi, persektiv rivojlanishi

Kiyim tikish usullari. Qo’lda bajariladigan qaviqlar va qaviqqatorlar

Kiyim detallarini modellash

Ustki kiyim tikish texnologiyasi jarayonlari