Туркистонда Россия империяси мустамлака бошқарув тузумининг қарор топиши - История - Рефераты

Туркистонда Россия империяси мустамлака бошқарув тузумининг қарор топиши

Загружено в:

20.09.2019

Скачано:

0

Размер:

92 KB

Туркистонда Россия империяси мустамлака бошқарув тузумининг қарор топиши Режа: 1. Туркистон ўлкасида ҳарбий-ма ъ мурий ҳокимият тизимининг юзага келиши. 2. Туркистон генерал-губернаторлигида хокимият т и з и мини ва унинг функциялари. 3. Россия империясининг Туркистондаги миллий сиёсатининг ўзига хос хусусияти.

Сиёсий тарих. XVI асрнинг иккинчи ярмига келиб Россия подшолиги ўз ҳудудларини кенгайтира бориб Қозон, Аштархон (Астрахан) ва Сибир хонликларини босиб олди. Шундан сўнг рус подшоларининг Ўрта Осиё ҳудудларига қизиқиши кучая бошлади. Подшо ҳукумати бу ҳудудлар ҳақида маълумот тўплаш учун 1558 йил апрелида “Москва савдо компанияси” вакили Антони Женкинсонни Ричард ва Роберт Жонсонлар билан биргаликда 1589 йил сентябригача, 1620 йилда Иван Хохловни, 1669 йилда Б.А. Пазухин ва С.И. Пазухинларни, 1675 йилда В.А. Даудов бошчилигидаги элчиларни Бухоро, Хива, Самарқанд, Урганч ва Балхга жўнатган эди. Бу элчиларнинг асосий мақсадлари Ўрта Осиё хонликлари ва унга қўшни бўлган ҳудудларнинг иқтисодий, ижтимоий-сиёсий ва ҳарбий аҳволи, халқаро алоқалари ҳақида маълумотлар тўплашдан иборат эди. Аммо, Ўрта Осиё ҳудудларини босиб олиш учун тўғридан тўғри амалий ҳаракатлар XVIII аср бошларида, яъни, Пётр I ҳукмронлиги даврида бошланди. Манғишлоқлик туркман савдогари Хўжа Нафас орқали Амударё соҳили олтин қумларига бойлиги ҳақида хабарни эшитган Пётр I 1717 йилда князь Бекович-Черкасский экспедициясини 3000 дан ортиқ қўшин билан Хива хонлигига жўнатади. Аммо, бу экспедиция муваффақиятли чиқмай, унинг қўшинлари Хива хони Шерғозихон томонидан қириб ташланади. Шундан сўнг Пётр I 1721 йилда Флорио Бевени бошчилигидаги элчиларни Бухорога жўнатади. Италиялик Россия жосуси Ф. Бевенига элчилик ниқобидаги ўз сафари чоғида иқтисодий ва географик аҳамиятга молик ерларни бухороликларга сездирмасдан эслаб қолиш, Каспийга қуйиладиган катта-катта дарёлар ва мавжуд кемалар, шаҳарлар ва истеҳкомлар ҳақида маълумотлар тўплаш топширилган эди. Бундан ташқари Ф.Беневени Бухоро хонлиги қалъалари ва қўшинларининг умумий сони, армиясининг тузилиши ва аҳволи, бошқариш усули, Бухоронинг Эрон, Хива ва Туркия билан муносабатлари ҳақида тўла маълумот тўплаши ҳамда Россия билан Бухоро давлати ўртасида савдо-сотиқни ривожлантиришда мавжуд имкониятларни аниқлаш билан бирга, Ўрта Осиё дарёларидаги олтин

заҳиралари ҳақида маълумот тўплаши ҳам лозим эди. Ф Беневени Бухорода уч йилдан ортиқ яшаб Бухоро ва Хива хонлигининг ички ва ташқи сиёсати, иқтисодиёт, табииий бойликлари ҳақида маълумотлар тўплаб 1825 йилда Россияга қайтади. XVIII асрнинг биринчи чорагида кўчманчи қозоқлар Урал дарёси ва Каспий денгизидан Хива хонлиги чегарасигача бўлган ҳудудда Катта, Ўрта ва Кичик жузга бўлинган ҳолда яшар эдилар. Қозоқ султонлари ўртасидаги урушлар устига, қалмоқларнинг ҳужумлари қўшилиб, ўзаро қонли тўқнашувлар бўлиб турган. Ундан ташқари 1723 йилги очарчилик қозоқларни қийин аҳволга солиб қўйди. Ўзаро урушлардан чарчаган қозоқ султони (Кичик жуз) Абулхайрхон 1730 йилда Россияга мурожжат қилиб, қозоқларни Россия ҳимоясига олишини сўради. XVIII асрнинг биринчи ярмида барча кўчманчи қозоқлар Россия тобелигига олинди. Россия ҳукумати ўзбек хонликларини босиб олиш мақсадида бутун XVIII аср мобайнида қозоқ жузлари яшаб турган ҳудудларда 150 га яқин катта ва кичик қалъалар қурдириб, плацдарм сифатидаги янги шаҳарларга (Омск, Семипалатинск, Уст-Каменогорск, Оренбург ва бошқ.) асос солдилар. XIX аср бошларига келиб Европанинг баъзи давлатлари ўртасида ҳарбий-сиёсий вазият кескинлашиб кетганлиги боис, 1806-1812 йилларда рус-турк, 1808-1809 йилларда рус –швед, 1805-1813 йилларда рус –форс, 1805-1812 рус-француз урушлари бўлиб ўтди. Бунинг натижасида Россия ҳукуматининг ўзбек хонликларига бўлган эътибори камайди. Николай I (1825-1855 йй.) рус тахтига ўтиргач вазият яна ўзгарди. Қозоқ даштларидаги ҳарбий истеҳкомлар воситасида Россия империяси Хива хонлиги ҳудудларига яқинлашиб кела бошлади. Россиянинг ўзбек хонликларига нисбатан сиёсатини изчил амалга ошириш тарафдорларидан бири бўлган Оренбург генерал-губернатори В.А.Перовский подшо Николай I фармонига кўра 1839 йилда 5 мингдан зиёд қуролланган қўшин билан Хива хонлиги устига юриш бошлади.

Аммо, йўлдаги оғир шарт-шароитлар рус қўшинларининг аҳволини қийинлаштирди. 1840 йилнинг бошларида Хива чегараларига етиб келган Перовский қўшинлари Хива хони Оллоқулихоннинг ўзбек, қозоқ ва туркманлардан иборат бирлашган қўшинлари томонидан тор –мор этилди. XIX асрнинг ўрталарида жаҳоннинг йирик давлатлари ўртасида янги мустамлакалар учун кураш қизиб кетган бир шароитда Россия империяси ҳам бу курашлардан четда қолмади. Шу жиҳатдан бу даврда Англия ва Россия манфаатлари Ўрта Осиёда тўқнашди. Россия империяси ҳукумати Англиянинг Туркистон ва Каспий денгизининг шарқий томонларини эгаллаб олишидан хавсираётган эдилар. Чунки Англия Афғонистон ва Ҳиндистон орқали ўзбек хонликлари билан савдо-сотиқ ва дипломатик алоқалар олиб борар эди. Англиянинг асосий мақсади хонликларни босиб олишга уринаётган Россиянинг режаларини барбод қилиш, ўзбек хонликларини Россияга қарши бирлаштириш ҳамда Ўрта Осиё бозорларини эгаллаш эди. Англия ўз мақсадини амалга оширишни тезлатиш учун турли йилларда Стоддарт, Конолли, Бёрн, Арчи Тодд, Аббот, Шекспир, Иосиф Вольф каби кўплаб форс ва турк тилларини яхши билган жосусларни ўзбек хонликларига жўнатди. Шунингдек, Англия ҳукумати Туркия билан ҳамкорликда Ўрта Осиё давлатларини бирлаштиришга кўп ҳаракат қилди. Аммо, уларнинг барча ҳаракатлари зое кетди. Чунки, ўзбек хонликлари ўртасида низолар кучли эди. Ундан ташқари Россия ҳукумати ўзбек хонликларини бир-бирига қарши гиж-гижлатиш сиёсатини олиб борди. Россия ҳукумати Ўрта Осиё ҳудудларини босиб олишдан кўпроқ манфаатдор бўлиб, бу манфаатдорлик босқинчилик ҳаракатларини тезлаштиришга ундар эди.

Олимларнинг фикрларига кўра, қуйидаги сабаблар Россиянинг Ўрта Осиё хонликларини босиб олишни тезлаштирган эди: 1. Россиянинг енгил саноатини таъминлаб берувчи арзон ҳом ашё базасининг Ўрта Осиёда мавжудлиги. 2. Қрим уруши (1853-1856 йй.) туфайли Қора денгиз портларининг Россия қўлидан кетиши ҳамда унинг ўрнига Ўрта Осиё хонликларини эгаллаш ҳисобига тўлдириш. Ўрта Осиё орқали Эрон, Афғонистон, Хитой, Ҳиндистон каби давлатларда Англиянинг таъсирини йўқотиб, бу давлатлар билан савдо ва дипломатик алоқалар ўрнатиш. 3. Россиянинг Европа бозорлари билан рақобат қила олмаслиги сабабли ишлаб чиқарилган маҳсулот учун Ўрта Осиё бозорларини эгаллаши лозим эди. 4. Россияда ўтказилган ер ислоҳотлари туфайли қашшоқлашиб қолган аҳолини кўчириб келтириш ҳамда уларни ер-сув билан таъминлаш. Шунингдек, Англиянинг Ўрта Осиё бозорларига интилиши ҳам Россия ҳукуматини ташвишга солиб қўйган эди. Шу боис ҳам хонликларга бевосита чегарадош бўлганлигидан фойдаланган Чор Россияси ҳарбий ҳаракатларни бошлаб юборди. 1853 йилда Оренбург генерал-губернатори В.А.Перовский қўшинлари Қўқон хонлигининг стратегик аҳамиятга эга бўлган Оқмачит (ҳозирги Қизил Ўрда) қалъасини куч билан эгаллади. Қрим уруши туфайли тўхтаб қолган ҳарбий ҳаракатлар 1860 йилнинг ёзида яна жонланиб, полковник Циммерман бошчилигидаги рус қўшинлари Тўқмоқ, кейин эса Пишпак (ҳоз. Бишкек) қалъаларини эгалладилар. 1864 йилнинг май ойида Верний қалъасидан (1854 йилда Алмати овули ёнида руслар томонидан қурилган) йўлга чиққан полковник Черняев Авлиёота, Сузоқ қалъаларини, июл ойида Туркистон шаҳрини босиб олди. Шундан сўнг Чимкент шаҳри қамал қилиниб, бу ерда рус қўшинлари Қўқон саркардаси Алимқул Амирилашкар зарбаларига дуч келдилар. Аммо, ҳарбий- техник жиҳатдан устунликка эга бўлган Черняев қўшинлари 22 сентябрда Чимкентни эгаллашга эришдилар.

1864 йилнинг октябрида Черняев қўшинлари Тошкентга ҳужум бошладилар ва шаҳарнинг шарқидаги Дарвишак қопқа деган жойда мағлубиятга учрадилар. 1864-1865 йилнинг қишида Черняев Тошкентга юриш учун ҳарбий таёргарлик кўриб, ўз қўшинларини Сибир ва Оренбургдан етиб келган қурол- яроғ, қўшимча ҳарбий кучлар билан тўлдирди. 1865 йил 28 апрелда Черняев Чирчиқ дарёси бўйидаги Ниёзбек қалъасини эгаллаб, бу ердаги Тошкент шаҳрини сув билан таъминлаб тутувчи тўғонни бўзиб ташлади. Тошкент мудофаасини ташкил этишда Алимқул саркарданинг хизматлари катта бўлди. 8 май куни Алимқул катта лашкар билан Қўқондан етиб 9 май куни руслар билан жангга киришди. Аммо, Алимқул қаттиқ ярадор бўлиб, ҳалок бўлгач тошкентликлар орасида саросималик бошланди. 1865 йил 15 июн куни Тошкент забт этилди. Шундан сўнг Чор Россияси қўшинларининг ҳарбий ҳаракатлари Бухоро амирлигига қаратилди. 1866 йилда олиб борилган босқинчилик урушлари натижасида (генерал Романовский бошчилигида) амирлик ҳудудлари эгаллана бошланди. 1866 йил май ойида Эржарда бўлган жангда амир Музаффар енгилиб Жиззаҳга қочди. 19-22 май кунлари бўлган жанглардан сўнг Романовский қўшинлари Хўжандни эгалладилар. Октябр ойида Ўратепа ва Зомин босиб олинди. Жиззах шаҳри учун қаттиқ жанглар бўлиб 11-18 октябр кунлари бу шаҳар ҳам босқинчилар томонидан эгалланди. 1868 йил 1 май куни фон Кауфман бошчилигидаги рус қўшинлари амирликнинг йирик шаҳарларидан бири бўлган Самарқандга юриш бошладилар. Чўпонота тепалигида бўлган жангда амир қўшинлари мағлубиятга учради ва 2 май куни Самарқанд шаҳри эгалланди. Амир Музаффар асосий кучрларни тўплаб Самарқанд томон юрди. Кауфман ҳам катта кучлар билан Бухорога томон ҳаракатланди. 2 июн куни Зирабулоқда ҳар иккала қўшинлар ўртасида жанг бўлиб амир мағлубиятга учради.

Амир Музаффар ва Кауфман қўшинлари Зирабулоқда урушаётган бир пайтда Шаҳрисабз ва Китоб беклари Жўрабек ва Бобобек ҳамда амирнинг ўғли Абдумалик тўра бошчилигида Самарқандда қолдирилган рус қўшинларига қарши кураш бошланди. Аммо, Кауфман зудлик билан Самарқандга қайтиб бу ҳаракатни бостирди ва Самарқандни талон-тарож қилишга буйруқ берди. 1868 йил 23 июнга келиб, чорасиз қолган амир Музаффар Туркистон генерал –губернатори фон Кауфман билан сулҳ тузишга мажбур бўлди ва Россия императорининг вассалига айланди. Бу сулҳга кўра, Бухоро амири Россияга катта миқдорда товон пули (125 минг тилла) тўлаб, Россия ҳукуматининг розилигисиз ташқи алоқалар олиб боришдан маҳрум бўлди ва Зарафшон дарёсининг юқори қисмидаги ерлар, Самарқанд ва Каттақўрғон Россия таркибига киритилди. Шунга қарамасдан, амирдан норози бўлган кучлар чор ҳукуматига қарши урушни давом эттирдилар. Амирнинг катта ўғли Абдумалик тўра, Жўрабек, Бобобек ва Султон Содиқ кучлари бирлашиб Кармана, Қарши ва Чироқчи бекликларини эгалладилар ҳамда Амдумаликни амир деб эълон қилдилар. 1868 йилнинг кузида амир Музаффар ўз ўғлига қарши фон Кауфмандан ҳарбий ёрдам сўради. Унга жавобан амир ҳузурига генерал Абрамов бошчилигидаги қўшинлар жўнатилди. 1868 йил 21 октябрда бўлган жангда Абдумалик Тўра бошчилигидаги қўшинлар мағлубиятга учради. 1872 йилнинг охирларида Россия ҳукумати Хива хонлигига қарши ҳарбий ҳаракатлар бошлашга жиддий қарор қабул қилди. Хивага қарши Оренбург, Манғишлоқ, Красноводск ва Кавказ округи қўшинлари ҳам жалб этилди. 1873 йилнинг баҳорида 12 мингдан ортиқ қўшин ва 56 та тўп- замбаракларга умумий қўмондонлик Кауфман зиммасига юклатилиб, Хива хонлигига юриш бошланди. Хива ҳукмдори Муҳаммад Раҳимхон II масалани тинч йўл билан ҳал этишга уриниши беҳуда кетгач, ҳарбий кенгаш чақириб, мудофаа режаларини тузади ва душман истилочиларига қарши кучларни сафарбар этади. Аммо, кучлар ва ҳарбий тайёргарлик нисбати тенг эмас эди.

1873 йил 18 май куни Амударё бўйларидаги қаттақ жанглардан сўнг Хазорасп эгалланди. Шундан сўнг рус қўшинлари Қўнғирот, Хўжайли, Манғит қалъаларини эгаллаб 29 май куни Хивага кириб келадилар. Хон Измиқшўр тарафдаги туркман овулига қочиб кетади. У Хивага қайтиб келгунига қадар хон саройидаги қимматбаҳо буюмлар ва 300 та нодир қўлёзма асарлар Петербургга жўнатилди. 1873 йил 12 августда Хива яқинидаги Гандимиён қишлоғида фон Кауфман билан Муҳаммад Раҳимхон ўртасида сулҳ шартномаси (“Гандимиён шартномаси”) имзоланди. Бу шартномага кўра, Амударё қуйи оқимининг ўнг қирғоғидаги ерлар Россия ихтиёрига ўтди. Рус кемаларининг Амударё бўйлаб сузишлари учун барча имкониятлар яратилди. Рус савдогарлари хонлик ҳудудида эркин савдо қилиш, Амударёнинг чап қирғоғида савдо омборлари қуриш ҳуқуқини олдилар. Хива хонлиги Россиянинг рухсатисиз ташқи алоқалар олиб боришдан маҳрум этилиб, вассалга айланди. Хонлик зиммасига 2.200 минг сўм товон тўлаш (20 йил муддатга) мажбурияти юклатилди. Россия савдо-саноатчилари Хива хонлигида бож ва мажбуриятлардан озод этилиб, уларга хонликда кўчмас мулк сотиб олишга рухсат берилди. Чор Россияси Бухоро амирлиги ва Хива хонлигига қарши уруш олиб бораётган даврда Қўқон хонлигида чуқур сиёсий ва иқтисодий инқироз ҳукм сураётган эди. Чунки, 1868 йил 13 февралда Кауфман ва Қўқон хони Худоёрхон ўртасида шартнома имзоланган бўлиб, шу пайтгача Россия босиб олган ҳудудлар империя тассарруфига ўтган эди. Орадан кўп ўтмасдан бундай вазият Фарғона водийсида Худоёрхонга қарши норозилик ҳаракатларини келтириб чиқарди. Бу ҳаракатнинг катта қисмига ўзини Қўқон хони Олимхоннинг набираси Пўлатхон деб эълон қилган Мулла Исҳоқ Ҳасан ўғли бошчилик қилди (Наманган ва унинг атрофларида).

Худоёрхоннинг обрўли амалдорлари Исо Авлиё, Абдураҳмон офтобачи, хоннинг укаси, Марғилон ҳокими Султон Муродбек, хоннинг ўғиллари Насриддинбек (Андижон ҳокими), Муҳаммад Аминбеклар Пўлатхон томонга ўтиб кетадилар. 1873 йилга келиб қўзғолон бутун Фарғона водийсини қамраб олган эди. Ўша йили Худоёрхон қўзғолончиларни қисман мағлуб этган бўлса-да, аҳвол ўзгармади. !875 йилнинг ўрталарига келиб қўзғолончилар Ўш, Наманган, Андижон, Асака, Марғилон шаҳарларини эгалладилар. Хонликдаги норозилик ҳаракатларининг бундай тус олиши Россия ҳукуматини саросимага солиб қўйди. Шу боис ҳам полковник М.Д.Скобелев қўзғолонни бостириш учун Туркистон ўлкасига юборилди. Бу орада Худоёрхон Кауфмандан ёрдам сўраб мурожаат қилди. 1875 йилнинг ёзида Худоёрхон Хўжанд орқали Тошкентга қочиб кетди. Кауфман Худоёрхоннинг 40 та аравадаги мол-мулкини мусодара қилиб, ўзини Оренбургга сургун қилди. Ҳали Худоёрхон Қўқондан чиқиб кетмасидан олдинроқ унинг катта ўғли Насриддинбек Абдураҳмон офтобачи бошчилигидаги гуруҳ раҳбар-лигида Қўқон хони деб эълон қилинди. Янги хон Россия билан муносабатларини яхшилаш мақсади борлигини билдириб фон Кауфманга мактуб йўллаган бўлса-да, амалда Россия ҳукуматининг босқинига қарши куч тўплашга киришган эди. Шу мақсадда Насриддинбек Бухоро амири ва Тошкентнинг нуфузли кишиларидан бири бўлган Саидазимбойга ёрдам сўраб нома жўнатади. Аммо Бухоро амри ҳам, Саидазимбой ҳам ўзларига юборилган номаларни Кауфманга топширадилар. Насриддинбекнинг ҳаракатлари пучга чиқди. Ундан ташқари, Худоёрхон қочиб кетгач айрим гуруҳлар Насриддинбек, айримлари эса Пўлатхон томонга бўлиниб кетдилар. Қўқон хонлигидаги халқ ҳаракатлари ҳамда Худоёрхоннинг қочиб кетиши натижасида юзага келган оғир вазият рус босқинчиларига қўл келди. 1875 йил август ойининг бошларида Қўқон хонлиги қўшинлари Тошкент томонга (Қурама тумани) юриш бошлади.

Бунга қарши Кауфман ҳам катта қўшин билан қарши ҳужумга ўтди. 22 августда Маҳрам қалъаси (Хўжанддан Қўқонга юриш йўлида) рус қўшинларининг ғалабаси амалда хонлик тақдирини ҳал қилди. 26 август куни Кауфман Маҳрамдан Қўқонга йўлга чиқди. Насриддинбек Кауфман билан келишув йўли билан бориб 1875 йил 22 сентябрда у билан шартнома имзолади. Насриддинбекнинг Кауфман билан келишуви халқнинг яна қўзғолон кўтаришига сабаб бўлди. Бу сафар ҳаракатнинг маркази Андижон бўлди. Пўлатхон атрофига тўпланган нуфузли амалдорлар Андижоннинг Бўтақора қишлоғида уни хон деб эълон қилдилар. 1875 йилнинг охирига қадар Андижон, Наманган, Балиқчи шаҳарларида қаттиқ жанглар бўлиб, улар қўлдан-қўлга ўтиб турди. Қўқоннинг ўзида ҳам қўзғолон кўтарилиб, Насриддинбек қочиб кетди. Пўлатхоннинг Кауфман билан музокаралар олиб бориш ҳаракати зое кетди. 1876 йил 28 январда Пўлатхон Олой водийсида сўнгги кучлари билан тор-мор этилди. Пўлатхон қўлга олиниб, 1 март куни Марғилонда осиб ўлдирилди. Насриддинбек ва Абдураҳмон офтобачи Тошкентга жўнатилди. 1876 йил 19 февралда Қўқон хонлиги тугатилиб, унинг ўрнига Фарғона вилояти ҳарбий губернаторлиги ташкил этилди. Генерал М.Д.Скобелев Фарғона вилоятининг ҳарбий губернатори этиб тайинланди. Чор Россиясининг бундан кейинги асосий ҳарбий ҳаракатлари туркманлар яшайдиган ҳудудларни босиб олиш билан боғлиқ бўлди. 1877 йилда Каспий ортининг Ахалтака воҳасидаги Қизил Арват рус қўшинлари томонидан эгалланди. 1881 йилда Скобелев бошчилигидаги рус қўшин- ларининг ниҳоятда даҳшатли қирғинидан сўнг Кўктепа қалъаси, ундан сўнг Асхабад (Ашхобод) шаҳри эгалланди. 1884 йилда рус қўшинлари Марв воҳасини ҳам босиб олдилар. Босиб олинган ҳудудларда Каспийорти вилояти тузилиб, у Туркистон генерал-губернаторлиги таркибига киритилди.

Шу тариқа Чор Россияси 20 йилдан зиёдроқ давом этган босқинчилик урушлари натижасида жуда катта ҳудудлардан иборат бўлган Ўрта Осиё хонликларини босиб олди. Россия империяси босиб олинган ҳудудларининг чегараларини аниқлаш ва мустаҳкамлаш чораларини ҳам кўрди. 1881 йилда янги Россия ва Россия-Эрон ўртасида, 1885-1887 йилларда Россия- Афғонистон, 1895 йилда Помирдаги чегаралар белгиланди. Чор Россиясининг мустамлака бошқарув усули. Россия империяси босиб олинган ҳудудларда ўз ҳукмронлигини ўрнатиш ва бошқариш учун мустамлакачиларнинг манфаатларини ҳимоя қиладиган мустаҳкам бошқарув тартибларини жорий этиш учун барча чора-тадбирларни кўрдилар. Чунки бошқарув тизими Россия ҳукумати учун жуда муҳим бўлиб, босиб олинган жойларда мустамлакачилик сиёсатини олиб боришда асосий таянч ҳисобланган. Тадқиқотчиларнинг эътироф этишларича, Туркистон маъмурияти империянинг бошқа ўлкалари бошқарувидан ўзининг кескин ҳарбийлашгани билан алоҳида ажралиб туради. Россия ҳукуматининг Туркистон ўлкаси учун 1865-1916 йиллар оралиғида ишлаб чиққан ҳамда амалга тадбиқ этилган ўнта қонун лойиҳалари (1865, 1867, 1871, 1873, 1882, 1884, 1886, 1908, 1912, 1916 йиллар) да ва уларнинг моддаларига адлия, молия, ҳарбий, ички ишлар ва бошқа вазирликлар киритган ўзгаришларда ана шу ҳолат ўз аксини топган. Тошкент шаҳри босиб олинганидан сўнг 1864-1865 йилларда босиб олинган ҳудудларда Оренбург генерал-губернаторлиги таркибида (1865 й.) ҳарбий-лашган маъмурий бошқарув тартибларига асосланган Туркистон вилояти ташкил этилиб, унга генерал-майор М.Г.Черняев губернатор этиб тайин-ланади. Туркистон вилоятини бошқариш учун 1865 йил 6 августда “Туркистон вилоятини бошқариш тўғрисидаги Муваққат Низом” қабул қилиниб, унга мувофиқ ҳарбий ва фуқаролик ҳокимияти ҳарбий губернатор қўлида бўлимларга бўлиниб, уларни бўлим бошлиқлари бошқарган. Бўлим бошлиғи бир вақтнинг ўзида бўлим ҳарбий коменданти ҳам ҳисобланган.

Бўлим бошлиқларига маҳаллий аҳоли устидан назорат қилувчи ва рус амалдорларидан тайинланадиган бошқарувчилар бўйсунган. Шунингдек, бу “Низом” га кўра, Туркистон вилояти губернатори, “бий, оқсақол, раис ва қози лавозимидаги туб жой аҳоли вакилларини эгаллаб турган лавозимига тасдиқлаш, бўшатиш, алмаштириш ваколатига эга бўлган”. Маҳаллий аҳоли устидан назорат қилувчи бошқарувчиларнинг вазифалари жойларда тинчликни сақлаш, карвонлар хавфсизлигини таъминлаш, ўрмон, сув иншоотларини қўриқлаш, ўтроқ ва кўчманчи аҳоли ўртасидаги жанжалларни ҳал қилиш, аҳолига солиқ ва мажбуриятларни белгилаш, уларни ўз вақтида ва ўз миқдорида тўлашни назорат қилиш, назорат натижаларини бўлим бошлиғига етказишдан иборат бўлган. Маҳаллий аҳолининг ўтроқ ҳаёт кечирувчи қисмида суд ишлари бўйича қозилар чиқарган ҳукмлар ҳарбий губернатор томонидан тасдиқланиши лозим бўлиб, қозиларнинг чиқарган ҳукмларини ҳарбий губернатор ўзгартириш ҳуқуқига эга бўлган. Кўчманчи аҳолининг бий судлари маҳаллий аҳоли бошқарувчиларининг рухсати билан ўтказилган. Бий судларида ишлар одат қоидалари асосида кўрилган. 1865 йилдаёқ Россия императори Александр II нинг фармони билан Оренбург ва Ғарбий Сибир генерал-губернаторликлари ҳамда Туркистон вилояти турмуш тарзи ва умумий аҳволини ўрганиш учун “Дашт комиссияси” тузилиб, Ўрта Осиёга жўнатилади. Ушбу комиссиянинг вазифаси босиб олинган ҳудудлардаги шароитни ўрганиш ҳамда уларни қандай бошқариш ҳақида низом тузиш учун маълумотлар тўплашдан иборат эди.

Комиссия ўз иш жараёнида босиб олинган ерлардан қуйидаги қоидаларга асосланган ҳолда фойдаланишни белгилаб берган эди: 1. Ҳарбий ва фуқаро ҳокимиятини бир қўлда тўплаган ҳолда ўлкани бошқариш. 2. Сиёсий ҳокимиятга эга бўлмаган барча ички ишларни бошқаришни ерли аҳолининг хулқ-атвори ва урф-одатларини ҳисобга олиб, маҳаллий аҳоли қўлига топшириш. 3. Маҳаллий бошқармада, унинг қонун ва урф-одатларида мавжуд бўлган давлат манфаатларига зиён етказувчи барча нарсаларни бутунлай тугатиш. 4. Имконияти борича судни маъмуриятдан батамом ажратиб қўйиш. Кўриниб турибдики, “Дашт комиссияси” нинг асосий вазифаси мустамлакачиликка асосланган ўлка бошқарув тизимини такомиллаштиришга қаратилган эди. Бу “Комиссия” томонидан ишлаб чиқилган “Еттисув ва Сирдарё вилоятларини бошқариш ҳақидаги қоидалар лойиҳаси” бўйича Вазирлар Маҳкамаси қабул қилган қарорда қуйидагилар қайд этилган эди: 1. Лойиҳада кўрсатилган ҳудудларда Еттисув ва Сирдарё вилоятлари таркибида Туркистон генерал-губернаторлиги ташкил этилсин. 2. Генерал-губернаторга ўлкани бошқариш учун лойиҳада назарда тутилган штатлардан келиб чиққан ҳолда, бошқариш учун амалдорлар олишга имконият берилсин. 3. Генерал-губернаторга лойиҳада кўрсатилган ерларда, ўлкадаги маҳаллий шароит, тузем (маҳаллий) халқларнинг эҳтиёжларини ҳисобга олган ҳолда сўнгги марта қонуний тартибда кўриб чиқиш ва қабул қилиш учун унинг қисмлари бўйича ва яхлит ҳолда ўзининг хулосасини бериш топширилсин. Унгача лойиҳада кўрсатилган ҳолатларни асос сифатида қабул қилиб, ўлка тузилиши учун фавқулодда муҳим ва фойдали деб ҳисобланган ҳамма чораларни кўриш топширилсин.

Тадқиқотларга кўра, Туркистон вилоятининг Оренбург генерал- губернаторлиги таркибида бўлиши вақт ўтиши билан турли муаммоларни келтириб чиқарган эди. Шунинг учун ҳам Туркистон вилоятининг узоқда жойлашганлиги, вилоят маъмурияти вакиллари сонининг камчилиги генерал- губернаторлик билан боғланишга, унинг кўрсатмаларини ўз вақтида бажарилишига салбий таъсир кўрсатаётганлиги империя ҳукмрон доиралари ўртасида Туркистон вилоятини Оренбург генерал-гебернаторлигидан алоҳида ажратиш масаласини кун тартибига қўйган эди. 1867 йилда Петербургда Туркистон бошқаруви бўйича тайёрланган “Низом” лойиҳаси махсус комиссия томонидан муҳокама қилиниб, унда Оренбург генерал- губернаторлигидан алоҳида бўлган Туркистон генерал-губернаторлигини ташкил қилиш тўғрисидаги қарор қабул қилинади. 1867 йил 11 апрелда Александр II томонидан комиссия таклифи маъқулланиб, 11 июлда Жанубий Қозоғистон ва Ўрта Осиёнинг босиб олинган ҳудудларида Туркистон генерал-губернаторлиги ташкил этилганлиги тўғрисида фармон эълон қилинади. Биринчи генерал-губернатор қилиб фон Кауфман тайинланади. Янги ташкил этилган ушбу маъмурий бирлик даставвал 2 та – Сирдарё ва Еттисув вилоятларини ўз ичига олган эди. Архив манбаларининг маълумот беришича, чор ҳукуматининг 1867 йилги манифестига кўра, Кауфманга “ўлкани бошқариш учун керакли ва зарур деб ҳисобланган барча тадбирларни маҳаллий шароитдан келиб чиққан ҳолда мустақил равишда амалга ошириш ҳуқуқи берилиб, сиёсий, чегаравий ва савдо ишларини ҳал қилиш, қўшни мамлакатларга уларнинг Россия билан ўзаро алоқаларига тегишли музокаралар олиб бориш ва битимлар имзолаш, ўзаро келишувга эришиш ва қарорлар қабул қилиш учун ишончли вакилларни жўнатишда чекланмаган ваколатлар берилди”. 1867 йилги “Низом” лойиҳасида Туркистон ўлкасининг Россия ҳарбий вазирлиги таркибида бўлиши, ўлка ҳарбий ҳокимият орқали бошқарилиши, генерал-губернатор ўлкада жойлашган қўшинга қўмондонлик қилиши, бошқарувнинг қуйи бўғинига ерлик аҳоли вакиллари сайлов орқали

сайланиши, ўлка бошқарувини Россия империясидаги мавжуд бошқарув тизимига яқинлаштириб, кейинчалик ўлкани империянинг ажралмас бир қисмига айлантириш, ўлканинг маъмурий – ҳудудий бўлинишида эса империянинг сиёсий, иқтисодий ва стратегик мақсадларидан келиб чиқиб иш тутилиши кўрсатиб ўтилган. Тадқиқотчиларнинг (С.Тиллабоев) таъкидлашича, Россия империяси Ўрта Осиёнинг босиб олинган ҳудудларида ўз ҳукмронлигини сақлаб қолиш ва уни мустаҳкамлашни биринчи даражали вазифа ҳисоблангани учун ҳам бошқарув соҳасида дастлаб катта ўзгаришларни амалга оширмаган. Юқори органлар назоратида бўлган қуйи бошқарув органлари, солиқ тизими сақлаб қолинган. Қуйи бошқарувнинг дастлаб сақланиб қолинишига асосий сабаб маҳаллий аҳолининг ички ҳаётига дастлабки даврда кескин аралашиш ва аҳолининг турмуш тарзига катта ўзгаришлар киритиш салбий оқибатларни келтириб чиқариши мумкин эди. Ундан ташқари, янги босиб олинган ерларда ҳали қаршилик ва норозилик ҳаракатлари давом этаётганлиги, бошқарув тизимида фаолият олиб бораётган ўз одамлари бўлмаганлиги, маҳаллий шароитни тўлиқ билмаслик кабилар ҳам анъанавий бошқарув тизимини маълум муддат сақлаб қолишга мажбур қилган. 1868 йилда империя Министрлар Кенгаши томонидан Туркистон генерал-губернаторига икки йил ичида янги “Низом” лойиҳасини тайёрлаб тақдим қилиниши тўғрисида кўрсатма берилади. 1871 йилда фон Кауфман раҳбарлигида Туркистон ўлкасини бошқариш тўғрисида “Низом” лойиҳаси тайёрланиб тақдим этилсада, муҳокамада тасдиқланмай қайтарилади. Ушбу лойиҳа 1873 йилда қайта ишланиб, иккинчи маротаба Министрлар кенгашига жўнатилади. Аммо, бу сафар ҳам “Низом” лойиҳасида камчиликлар мавжуд бўлиб, “қониқарсиз, ер масаласи тартиблари эса сиёсий жиҳатдан хавфли” бўлганлиги туфайли 1874 йилда тасдиқланмай, қайтарилади. Аммо, шунга қарамасдан ушбу “Низом” лойиҳасидаги тартиблар 1876 йилда янги ташкил этилган Фарғона вилоятига жорий этилади.

1882 йил 8 майда императорнинг Туркистон генерал-губернаторлигини тафтиш қилиш тўғрисидаги фармони эълон қилинади. Тафтиш ишларига раис қилиб “Дашт комиссияси”нинг собиқ раиси, махфий маслаҳатчи Ф.К.Гирс тайинланди. 1883 йилда Гирс тафтиш ишларини тугаллаб, императорга генерал-губернаторлик ва унга қарашли ташкилотларнинг аҳволи тўғрисидаги ҳисоботни, “Ўлкани бошқариш тўғрисидаги низом лойиҳаси”ни қўшиб тақдим этди. 1884 йил 21 январда император Александр III нинг кўрсатмаси билан Давлат Кенгаши аъзоси, генерал-адъютант, граф Н.Игнатьев раислигида “Туркистон ўлкасини бошқариш тўғрисидаги низомнинг қайта ишланган сўнгги лойиҳасини ишлаб чиқиш” бўйича комиссия ташкил қилинади. Чоризмнинг олий доиралари томонидан тузилган ушбу комиссиянинг асосий вазифаси – “Ўлкани Россияга қатъий қарам қилиб қўйиш мақсадлари ва уни бошқаришда харажатларни камайтириш, даромадларни эса оширишга, шунинг билан бирга, фуқароларни бошқариш талабларига ва жойларнинг шарт-шароитларига тўғри келадиган низом” тузилишини амалга оширишдан иборат эди. Россия императори томонидан “Туркистон ўлкасини боошқариш тўғрисидаги Низом” 1886 йил 12 июнда тасдиқланган бўлсада, маъмурий тизим бўйича эътирозлар давом этди. Аммо, иператор Туркистон ўлкасида собиқ генерал-губернаторлик бошқарувининг асосий тамойилларини сақлаб қолган ҳолда унга баъзи ўзгаришлар киритди. Умуман олганда, Туркистон ўлкасида Россия империяси ҳукмронлик қилган йилларда қонун лойиҳалари доимо тўлдирилиб, ўзгартирилиб турилди. Чунки подшо Россиясининг қонун лойиҳалари Туркистонни Россия империясининг марказлашган бошқарув тизимига киритиб, уни рус буржуазияси ва дворян-помешчиклар мулкига айлантиришга қаратилган эди. Туркистон генерал-губернаторлигини бошқариш бўйича дастурий ҳужжатлар ишлаб чиқишда “ҳарбий вазият” омили ҳал қилувчи бўлган. Бундай ҳужжатлар чоризмнинг Ўрта Осиё хонликларининг янгидан-янги

ҳудудларини босиб олиши муносабати билан вужудга келган ва айнан шунинг учун ҳам доимо “муваққат” ёки “вақтинчалик” характерга эга бўлган. Мисол учун, “Сирдарё ва Еттисув вилоятларини бошқариш тўғрисидаги Низом” (1867 й) “тажриба тариқасида” уч йил муддатга жорий қилинган бўлиб, 20 йил давомида амал қилган. “Зарафшон округини бошқаришнинг вақтинчалик қоидалари” (1868 й), “Амударё бўлимини бошқаришнинг вақтинчалик қоидалари” (1874 й) ва “Фарғона вилоятини бошқариш бўйича вақтинчалик Низом” (1876 й) тўғрисида ҳам шундай дейиш мумкин (Н.Абдурахимова). Туркистон ўлкасининг маъмурий-ҳудудий бошқаруви. Аҳолиси. Россия империяси Ўрта Осиё хонликларини босиб олганидан сўнг бу ҳудудлапрда кўп асрлардан буён шаклланиб, мавжуд бўлиб келган, ўтроқ ва кўчманчи аҳолининг диний ҳамда маҳаллий хусусиятларини ўзида акс эттирган бошқарув тизими ўрнига империя манфаатларига хизмат қилувчи бошқарув тартиблари ўрнатилади. Маълумки, 1867 йилда Туркистон генерал- губернаторлиги ташкил этилиб, унинг генерал-губернатори ўз қўлида ҳарбий ва фуқаролик ҳокимиятини бирлаштирган. Генерал-губернатор бир вақтнинг ўзида подшо ноиби, ҳарбий округ қўшинлари қўмондони, Еттисув казак қўшинлари атамани, бош миршаб ва бош прокурор вазифаларини ҳам ўтаган. Генерал-губернатор император томонидан тайинланган ва вазифасидан озод этилган бўлиб, у ҳарбий вазирга бўйсунган. Туркистон генерал-губернаторлиги бошқарув тизими марказий, вилоят, уезд (туман), участка (волост), шаҳар, қишлоқ ва овул бошқаруви шаклларидан иборат эди. Генерал-губернаторлик дастлабки ташкил этилган пайтда иккита – маркази Тошкент бўлган Сирдарё ва маркази Верний (Олмаота) бўлган Еттисув вилоятларидан иборат бўлган. Сирдарё вилояти ҳудудига аосан илгари Туркистон вилоятига тегишли бўлган ерлар ва Қўқон хонлигининг босиб олинган шимолий ҳудудлари кирган.

Еттисув вилояти эса Семипалатинск вилоятининг Сергиопол, Копал ва Алатавск округи ҳудудлари ҳамда Туркистон вилоятининг бир қисмидан иборат ҳудудларда ташкил этилган. Сирдарё вилояти маъмурий жиҳатдан Казалинск, Перовск, Туркистон, Чимкент, Авлиёота, Тошкент, Хўжанд, Жиззах уездларига бўлинган бўлса, Еттисув вилояти Сергиопол, Копаль, Верний, Иссиқкўл ва Тўқмоқ уездларига бўлинган. Россия ҳукумати янгидан босиб олинган ерлар ҳисобига Туркистон генерал-губернаторлиги таркибига қўшимча маъмурий – ҳудудий бирлик ташкил этиб борган. Жумладан, 1868 йилда Бухоро амирлигига қарашли босиб олинган ерларда маркази Самарқанд бўлган Зарафшон округи, Хива хонлигига қарашли ерларни босиб олиш ҳисобига 1874 йилда маркази Петро-Александрович (Тўрткўл) бўлган Амударё бўлими, 1876 йилда Қўқон хонлиги ҳудудларида маркази Янги Марғилон (Скобелев, Фарғона) бўлган Фарғона вилояти ташкил этилган эди. ХIХ аср охири – ХХ аср бошларида Туркистон генерал-губернаторлиги маъмурий-ҳудудий жиҳатдан Сирдарё, Еттисув, Самарқанд, Фарғона ва Каспийорти (Закаспий) вилоятлари ҳамда Амударё бўлимидан иборат эди. Вилоятлар уездларга бўлинган бўлиб, улар қуйидагилар эди: Сирдарё вилояти – Авлиёота, Казалинск, Қурама, Перовск, Туркистон, Чимкент; Тошкент шаҳри марказ сифатида генерал-губернаторга бўйсунган; Амударё бўлими ҳам Сирдарё таркибида бўлган; Еттисув вилояти – Верний, Копал, Жаркент, Лепсин, Пишпек, Пржевалск, Тўқмоқ; Фарғона вилояти – Андижон, Қўқон, Марғилон, Наманган, Ўш, Чуст ва Чимён; Самарқанд вилояти – Самарқанд, Каттақўрғон, Хўжанд ва Жиззах; Каспийорти (Закаспий) вилояти – Манғишлоқ, Красноводск, Ашхобод, Тажан ва Марв уездлари.

Адабиётлар: 1. Азамат Зиё. Ўзбек давлатчилиги тарихи: (Энг қадимги даврдан Россия босқинига қадар). T . : Шар қ. 2000 . 2. Сагдуллаев ва бошқалар. Ўзбекистон тарихи: давлат ва жамият тараққиёти. T., 2000. 3. Сагдуллаев А.С., Мавлонов Ў. Ўзбекистонда давлат бошқаруви тарихи. - Т., 2006. 4. Ртвеладзе Э.В. История государственности Узбекистана. – Т.: Узбекистан. 2009. 5. Эшов Б.Ж. Ўзбекистон давлатчилиги тарихи. (ўқув қўлланма). – Т.: Маърифат, 2009. 6. Давлат қурилиши ва бошқаруви. Муаллифлар жамоаси. Тошкент, Академия, 2007. 7. Сагдуллаев А.С., Мавлонов Ў.М. Ўзбекистонда давлат бошқаруви тарихи. Тошкент, Академия, 2006.

Похожие

Республика тузумининг инқирози ва илк Рим империяси даври

IV—V Асрларда рим империяси қулдорлик тузумининг кризиси

IV – V асрларда Рим империяси. Кулдорлик тузумининг инкирози

1916 йилги миллий-озодлик қўзғолони. Жадидлар фаолияти

Бошқарув асосларининг шаклланиши ва давлатларнинг ташкил топиши