Паррандалар касалликлари Пуллороз Pullorosis, Thyphus avium - Сельское и лесное хозяйство - Рефераты

Паррандалар касалликлари Пуллороз Pullorosis, Thyphus avium

Загружено в:

20.09.2019

Скачано:

0

Размер:

60 KB

Паррандалар касалликлари Пуллороз Pullorosis, Thyphus avium Режа: 1. Тарихий маълумот 2. Эпизоотологияси 3. Иқтисодий зарар 4. Дифференциал диагноз 5. Олдини олиш

Пуллороз юқумли касаллик бўлиб, жўжаларда ўткир кечади. Катта ёшдаги жўжаларда эса яширин сурункали ҳолатда намоён бўлиб , тухумдоннинг яллиғланиши , перитонит кузатилади . Тарихий маълумот . Пуллороз биринчи марта асримизнинг бошларида Америкада Реттгер томонидан аниқланиб , “ ёш жўжаларнинг септицемияси ” деб ёзилган . Кейинчалик қўзғатувчиси аниқланиб , « бактерия пуллорум » деган ном берилди . Кейин касаллик « бациллярный белый понос » - ББП деб аталди . 1910 йилларга келиб , жўжаларни инкубаторларда очириш йўлга қўйилгач , пуллороз Америкадан Канадага , кейинчалик Франция , Бельгия , Италия , Венгрия , Япония , Австралия мамлакатларига тарқалади . Собиқ СССРда касаллик 1926 йили Англиядан келтирилган жўжалар орасида П. В. Сизов томонидан аниқланди. Кейинчалик Кавказ ва Украинада қайд қилинди. Марказий Осиё мамлакатларида, жумладан, Ўзбекистонда 1960 йиллардан бошлаб тез-тез учрай бошлади. Бунга эндигина ташкил қилинаётган паррандачилик фабрикаларининг инкубация учун тўғри келган жойдан тухум олиб келишлари сабаб бўлди. Тухум ёки жўжа келтиришда эпизоотик ҳолатга эътибор қилиш йўлдан чиқиб кетди. Касалликни ўрганишда П. В. Сизов, А. П. Куирмуратов, М. А. Артемичев, В. Н. Карягинлар ўз ҳиссаларини қўшдилар ва илмий асосланган кураш тадбирларини тавсия этдилар. Ўзбекистонда пуллороз билан профессор О. У. Ҳошимов ва И. Д. Бурлуцкий, фан номзоди Б. М. Рофиевлар шуғулланиб, колибактериоз ва пуллорозтифга қарши гипериммунли қон зардоби ҳамда вакцина тайёрладилар ва амалиётга жорий қилдилар. Бу иккала препарат ҳам маҳаллий штаммлардан тайёрланди. Қўзғатувчиси. Пуллорознинг қўзғатувчиси жўжаларда Salmonella, катта она товуқларда S. Gallinarum бўлиб, кичик таёқча шаклида. Спора ва капсуласи йўқ. Оддий сунъий муҳитда яхши ўсади. МПА, Эндо, Плоскирова муҳитлари оптимал муҳит ҳисобланади. Сальмонелла қонда, паренхиматоз аъзоларда, ичакда, жўжаларнинг сурилиб ҳазм бўлмаган сариғида,

товуқларда эса сариқ фолликуласида тўпланган бўлади. Табиатда жуда кенг тарқалган бўлиб, товуқлар гўнгида, яйраш майдончасидаги панжара ва охурларда, шу ҳудудда яшаётган кемирувчи, чумчуқ, олашақшақ, мусича, кабутарлар организмида ҳам учрайди. Чидамлилиги. Сальмонелланинг ташқи муҳит таъсирига чидамлилиги фаслга боғлиқ. О. Ҳошимовнинг маълумоти бўйича 2° дан +33,7°С гача намлик 31,2-75% бўлган муҳитларда 18 кундан 103 кунгача яшай олади. Товуқ гўнгида 100 кун, оқмайдиган сувларда 200 кун, тупроқда 400 кун тирик сақланади. 60°С қиздирилганда 30 минутда ўлади. Қайнатилганда эса 1 минутда ҳалок бўлади. 1% ли карбол кислота эритмаси ҳамда 1% ли формалинда 5 минутда ўлади. Эпизоотологияси. Табиий шароитда пуллороз билан товуқлар, куркалар ва қатор ёввойи паррандалар, кабутарлар, тустовуқлар, чумчуқлар ва бошқалар касалланади. Сунъий юқтириш учун денгиз чўчқачалари, қуён ва оқ сичқонлар яхши объектдир. Табиий шароитда гўштдор зотли жўжалар тухум берадиган зотларга нисбатан касалликка ўта мойилдир. Хўрозлар камроқ касалланади. Касал жўжа ва товуқ ҳамда улардан олинган тухумлар касаллик тарқатувчи манба ҳисобланади. Касал товуқлардан олинган тухумларнинг инкубацияга қуйилиши ва очирилган жўжаларнинг тарқатилиши касаллик тарқалишида асосий йўл ҳисобланади. Бундан ташқари, хўжаликларнинг ўзаро келишиб ҳар хил эпизоотик шароитдаги фабрикалардан жўжа олиб келиши ҳам касаллик тарқалишига сабаб бўлади. Носоғлом хўжаликдан келтирилган жўжалар орқали касаллик жуда тез тарқалади. Пуллороз носоғлом хўжаликдаги озиқ-овқат қолдиқлари, тўшамалар, далага чиқарилган гўнг орқали ҳам тарқалади. Касаллик асосан алиментар ва трансвориал, баъзан аэроген йўл билан юқади. Антисанитария ҳолати, гигиена талабларининг бузилиши, сифатсиз озуқалар билан озиқлантириш, жуда паст ёки юқори ҳарорат таъсири пуллорознинг тез тарқалишига олиб келади. Инкубатордан чиққан жўжалар орасида касаллари

бўлса, улар биринчи кунданоқ жуда кўп жўжаларни зарарлайди. Бу ҳолат айниқса юқорида айтилган шароитда яққол намоён бўлади. Иқтисодий зарар. Пуллороз паррандачиликка катта иқтисодий зарар келтиради. 50-70 фоизгача жўжалар ҳалок бўлади. Пуллороз чиққан хўжаликни соғломлаштириш жуда қийин, чунки унинг қўзғатувчиси табиатда кенг тарқалган бўлади. Зарарланган жўжаларнинг қатор хўжаликларга тарқатилиши ўша жойларда пуллороз ўчоғини яратади. Тайёрланган тухумнинг қайтадан инкубаторларга келиб тушиши катта иқтисодий зарар келтиради. Касаллик борасида ўтказиладиган тадбирлар анча маблағ талаб этади. Дезинфекция, дератизация, дезинсекция ишларини амалга ошириш учун ҳам катта сарф-харажат бўлади. Патогенези. Катта ёшдаги паррандаларда касаллик локал характерга эга бўлиб, қўзғатувчи тухум сариғининг фолликуласида ҳамда паренхиматоз аъзоларнинг некротик ўчоқларида тўпланади. Агар организмнинг резистентлиги тушиб кетса, касаллик зўрайиб, клиник белгилар рўй-рост намоён бўлади ва ўлим билан тугайди. Бу ҳолатда қўзғатувчи тухум сариғидан бошқа аъзоларда ҳам учрайверади. Жўжаларда эса сальмонелла ичакка ўтиб, ундан ички аъзоларга тушади, қонда кўпайиб, септицемия юзага келади. Касаллик кўпинча летал натижа билан тугайди. Кечиши ва клиник белгилари. Жўжаларда касаллик ўткир, ярим ўткир ва сурункали кечади. Она товуқларда эса сурункали ва белгисиз ўтади. Касал жўжалар ҳолсизланиб, иштаҳаси бўғилади, нафас олиши тезлашиб, тўхтовсиз ичи кетади. Ахлати оппоқ ва ҳиди ўта ёқимсиз бўлади. Ахлат орқа чиқарув тешиги атрофида қотиб, уни бекитиб ҳам қўяди. Патларининг ялтироқлиги ўзгариб, ҳурпайиб қолади. Жўжалар бир жойга тўпланиб, чирқиллашиб туради. Пуллороз трансвориал юққанда касаллик ўткир кечади ва биринчи кунданоқ клиник белгилари намоён бўлиб, 2-3 кун ичида ўлади. 10-20 кунлик жўжаларда касаллик секинроқ давом этиб, талофат ўта юқори бўлади. 20 кунлиқдан ўтган жўжаларда эса касаллик кўпинча сурункали шаклга айланиб кетади. 5-6 ойлик бўлгач, ўз тенгдошларига яқинлаб ётиб

олиши ҳам мумкин. Касалликка чалинган она товуқлар тухумининг пўчоғи юпқалашиб кетади, баъзан пўчоқсиз бўлиши ҳам мумкин. Тухум қиладиган жойида узоқ ўтириб қолади. Ич кетиш бошланиб, тухуми камаяди, қорни осилиб қолади, товуқлар пингвин турган ҳолатни эслатади. Ўлим перитонит ва умумий сепсис натижасида рўй беради. Патологоанатомик ўзгаришлар. 14-18 кунлик эмбрионнинг қорин бўшлиғида сўрилиб улгурмаган тухумнинг сариқ қисми кўзга ташланади. Жигар катталашади ва дистрофияга учрайди. Жигар, ўпка ва юракда кичик некроз ўчоқлари бўлади. Касаллик ўткир кечганда анус атрофи ич ўтиши натижасида кучли ифлосланиб, тиқин пайдо бўлиб қолади. Жигар тез йиртилади. Ўт пуфаги тўлиб, шилимшиқ ва фибрин тўпланган бўлади. Буйракда доначасимон дистрофия кўзга ташланади. Касаллик ярим ўткир ва сурункали кечаётганда ўлган жўжа озғин бўлади. Паренхиматоз аъзоларда дистрофия ва некроз ўчоқлари кузатилади. Кўр ичакда қаттиқ творогсимон кўкимтир оқ масса ва суюқ сутсимон суюқлик тўпланган бўлади. Клоака кенгайиб, ёпишиб қолади. Перикардит, перигепатит, фибриноз перитонит кузатилади. Диагноз. Пуллорозга диагноз қўйиш учун касалликнинг эпизоотологияси ўрганилади, клиник белгилари ва патологоанатомик ўзгаришлар ҳисобга олинади. Она товуқларда эса РА ва ККРА қўйилади. Диагноз қуйиш қийинлашса, биосинама ва микробиологик усулга мурожаат қилинади, МПБ, МПА, Эндо ва Плоскирова муҳитларига экилади. Дифференциал диагноз. Пуллороздан колибактериоз, аспергиллёз, Ньюкасл, кокцидиоз касалликларини ажратиш зарур. Колибактериоздан ажратиш учун пуллор антигени билан РА қўйилади. Бунда асосан микробиологик усулга мурожаат қилинади. Жўжаларда S. Pullorum, она товуқларда S. gallinarum Грам манфий, ҳаракатсиз, учлари қайрилган таёқчасимон микроб бўлиб, одатдаги суньий озиқли муҳитларда яхши ўсади. МПА, МПБ ва Плоскирова муҳитида ҳам 37°С да ўсади. Биокимёвий хусусияти: индол ва ацетилметилкарбинол, мочевина, лактоза, сахароза,

адонит ва салицинни ферментация қилмайди. Симмонса муҳитида яхши ўсади. Глюкоза, галактоза, фруктоза, арабиноза, ксилоза, маннит, сорбит, мальтоза, дульцитни ферментация қилиб, газ ва кислота ҳосил бўлади. Аспергиллёз касаллигида аспергилла, кокцидиозда эса кокцидий ооцитлари топилади. Даволаш. Ёш жўжаларга антибиотиклар (пенициллин, биомицин, террамицин, стрептомицин, левомицетин, синтомицин) яхши наф беради. Улар ўлим сонини камайтиришга олиб келади, лекин бактерия ташувчиликдан халос этолмайди. Фуразолидон жуда яхши самара беради. Уни озуқа билан минг бош жўжага 2,0-3,0 дан 8-10 кун мобайнида бериб борилади. Олдини олиш. Ветеринария-санитария қоидаларига қатъий амал қилиб, зоогигиена талабларини тўлиқ бажариш, жўжаларни ёшига мос келадиган балансли озуқа билан озиқлантириш катта аҳамиятга эга. Инкубаторга ўз жойида тўлиқ рацион билан боқилган (оқсил, витаминлар, микро ва макро элементлар миқдори талаб даражасида бўлган) товуқлар тухуми олиб келиниши шарт. Инкубаторга тушган тухум дезинфекция қилинади ва каротинга текширилади. Очирилган жўжалар иссиқ-совуқ таъсирига чалинмаслиги керак. Биологик тоза тухум олиш учун товуқлар ККРА реакцияси билан текшириб кўрилади. Профилактика мақсадида жўжаларга биринчи кунданоқ антибиотиклар, фуразолидон препаратлари тавсия этилади. АБК, ПАБК мақсадга мувофиқ натижа беради. Пуллороз чиқиб қолгудек бўлса, касал ҳамда реакция берган жўжа ва товуқлар йўқ қилинади, товуқхоналарда дезинфекция ўтказилади. Бунинг учун 3% ли ишқор, 5% ли креолин, 10-20% ли хлорли оҳак эритмаси тавсия эталади. Жўжалар орасида пуллороз чиққудек бўлса, улар даволанади ёки ўлдириб йўқ қилинади. Соғломлари профилактикадан ўтказилади (антибиотик ёки фуразолидон). Бунда О. Ҳошимов ва Б. Рофиевларнинг қуйидаги тавсиясини қўллаш мақсадга мувофиқдир. Гипериммун зардоб жўжаларга инкубаторда 2 марта САГ аппарати ёрдамида чанглатиб (аэрозол)

сепилади (1 м 3 га 25 мл). Сўнгра товуқхонада жўжаларга 3 кун зардоб сув билан ичирилади. Вакцина 2 марта 15 кун оралиғида аэрозол усулида қўлланилади. Эмланган жўжалардан 15-30-45-60-90 кундан кейин қон олиб, РА ёрдамида қон зардоби титрга текширилади.

Фойдаланилган адабиётлар: 1. Р.Ф. Сосов. Эпизоотология. М. “Колос” 1974. 2. А.А. Конопаткин . Эпизоотология. М. “Колос” 1984. 3. И.А. Бакулов., А.Д. Третьяков. Руководство по общей эпизоотологии. М. “Колос” 1979. 4. М.С. Ганнушкин. Общая эпизоотология. М. “Сельхозгиз” 1961. 5. М.П. Пармонов ва бошқалар. Эпизоотология. Т. 1996 6. М.П. Пармонов. “Ўта хавфли юқумли касалликлар” маърузалар матни. Сам. 2002 7. Ф.А. Ниёзов. “Паррандалар касалликлари”. Т. 1995 8. М.П. Пармонов., А.А. Қамбаров Эпизоотология. Т. 2006 9. М.П. Пармонов ва бошқалар. Эпизоотология фанидан амалий – лаборатория машғулотлари. Сам. 2007 й 10. А.А. Поляков. Ветеринарная дезинфекция. М. “Колос” 1975 11. В.П. Урбан. Практикум по эпизоотологии. Ленинград. 1987

Похожие

Паррандалар гриппи Grippia avium

Паррандалар чечаги Variola avium, epithelioma et diphtheria avium

Паррандалар селекцияси

Ньюкасл касаллиги Pseudo pestis avium

Гамборо касаллиги Morbus Gamboro