logo
  1. Главная страница
  2. Рефераты
  3. Экономика
  4. Merkantilizm

Merkantilizm

Загружено в:

26.10.2023

Скачано:

0

Размер:

59 KB
Скачать
Merkantilizm Reja: 1. Merkantilizmning nazariy va metodologik xususiyatlari 2. Dastlabki va keyingi merkantilizmning o‘ziga xosligi 3. Merkantilizmning tarixiy ahamiyati Natural xo‘jalik munosabatlarining bozor iqtisodiy munosabat-lari tomonidan siqib chiqarilishi XVI asrdan XVIII asrgacha bo‘lgan tarixiy davrni o‘z ichiga oladi. Bu davr iqtisodiy adabiyotda odatda merkantilizm davri deb ataladi. Merkantilizm (italiyancha «merkante» so‘zidan kelib chiqqan – savdogar ma’nosini anglatadi), bu bozor (kapi-talistik) iqtisodiyotga bo‘lgan birinchi ilmiy qarashlar tizimidir. Merkantilizmning nazariy va metodologik xususiyatlari Merkantilizm eng avvalo davlatning iqtisodiy siyosatini ifoda etgan, uning amaliy faoliyati uchun tavsiyalar ishlab chiqqan. Merkantilistlar tadqiqotining maqsadi reallik sifatidagi iqtisodiyotni tahlil qilish emas, balki hukumatga amaliy maslahatlar berishdir. Shuning uchun ular davlatning iqtisodiyotga faol aralashuvini qo‘llab quvvatladilar, yuqori soliq stavkasini va davlat xarajatlarini himoya qildilar. Merkantilistlarning ilmiy dunyoqarash printsiplari quyidagilar bilan xarakterlanadi: har qanday oltin va qimmatbaho narsalarga boylik sifatida qarash; mamlakatga oltin va kumushning oqib kelishini ta’minlash maqsadida tashqi savdoni tartiblash; arzon xom ashyoni import qilish yo‘li bilan sanoatni rag‘batlantirish; import qilinadigan sanoat tovarlariga protektsionistik tariflarni belgilash; eksportni, ayniqsa tayyor mahsulotlar eksportini rag‘batlantirish; ish haqining past darajasini ushlab turish uchun aholining o‘sishi. Milliy farovonlikning zaruriy sharti sifatidagi aktiv savdo balansi doktrinasi, shak- shubhasiz merkantilizmning asosi hisoblanadi. Shu narsani qayd qilib o‘tish kerakki, uzoq yillar davomida boylikning, halq farovonligining asosi mehnat, yer, dehqonchilik va chorvachilik, xunarmandchilik deb kelinar edi (uni biz yuqorida ko‘rib chiqdik). Lekin XV asrga kelib vaziyat keskin o‘zgardi. Avvalo natural-xo‘jalik tuzumining yemirilishi, tovar-pul munosabatlarining o‘sishi, fan va madaniyatning yuksalishi, ayniqsa yangi yerlarning ochilishi, buyuk geografik kashfiyotlar, mustamlakachilik tuzumining paydo bo‘lishi, birinchi navbatda, savdoning tez rivojlanishiga turtki bo‘ldi. Noekvivalent savdo tufayli metropoliyalar mustamlakalar hisobiga beqiyos boyidi. Mana shu davrga kelib jamiyatning boyishida savdoning rolini asoslab berishga uringan merkantilizm qarashlarida noelastik talab va eksportning importdan ko‘p bo‘lishining maqsadga muvofiqligi, kapital eksportini rag‘batlantirish va jamiyat ishlarini qo‘llab-quvvatlash tushunchalari ustunlik qilgan, shuningdek «qo‘shningni quritsang» go‘yoki millat boy bo‘ladi kabi noto‘g‘ri siyosat ilgari surilgan. Demak, merkantilizm bozor iqtisodiy munosabatlarining vujudga kelish davridagi birinchi iqtisodiy tafakkurlar maktabi sifatida bir qator nazariy – metodologik xususiyatlarga ega. Ularning mohiyati shunga kelib taqaldi, ya’ni merkantilistlar: · tadqiqot predmeti (iqtisodiy tahlil) sifatida muomala sohasini tekshirishni afzal ko‘rdilar, buning ustiga ishlab chiqarish sohasidan ajralgan holda; · tadqiqot usuli sifatida asosan iqtisodiy hodisalarning tasodifiy yuzaki tashqi ko‘rinishini ifoda etishga olib keluvchi va iqtisodiyotning barcha sohalarini sistemali tarzda tahlil qilish imkoniyatini istisno etuvchi empirizm (nazariyadan ko‘ra amaliy faoliyatga ko‘proq moyil bo‘lishlik)dan foydalandilar; · pulning paydo bo‘lishini odamlarning sun’iy ixtirosi natijasi deb hisobladilar, pulning o‘zini esa boylik bilan bir narsa deb qaradilar; · pul qiymati (qimmati) ning kelib chiqishini oltin va kumush pullarning «tabiiy xususiyati» va mamlakatdagi ularning miqdori bilan bog‘lab talqin qildilar; · mehnat taklifining oshishini yuqori ish haqi bilan emas, balki past ish haqi zarurligi bilan bog‘lab ko‘rsatdilar; · iqtisodiy o‘sishga davlatning tashqi savdoni tartiblashi va savdo balansida ijobiy saldoga erishish tufayli mamlakat pul boyligining ko‘payishi natijasi sifatida qaradilar. Shu bilan birga, merkantilistik maktabning bu va boshqa qoidalari iqtisodiy adabiyotda an’anaviy ravishda uning rivojlanishidagi ikki bosqich - dastlabki va rivojlangan bosqichlarini hisobga olgan holda tavsiflanadi. Bunday bosqichlarga bo‘linish dastlabki va keyingi merkantilistlarning aktiv savdo balansiga erishish yo‘llarini har xil tushunganligi sababli kelib chiqadi. Dastlabki va keyingi merkantilizmning o‘ziga xosligi Dastlabki merkantilizm, monetar tizimining o‘rnatilishi bilan bog‘liq bo‘lgan monetarizm, buyuk geografik kashfiyotlardan oldin paydo bo‘ldi va XVI asrning o‘rtalarigacha faol amal qilib keldi. Uning asosiy vakillari U.Stafford (Angliya), G.Skaruffi (Italiya) va boshqalar hisoblanadi. Dastlabki merkantilizm «pul balansi» siyosatini olib borgan. Bu siyosat pul muomalasini, tashqi savdoni qattiq tartiblab turishni ta’minlovchi ma’muriy yo‘l bilan mamlakatning pul boyligini ko‘paytirishga qaratilgan (mamlakat puli qancha ko‘p bo‘lsa, u shuncha boy hisoblangan). Dastlabki merkantilizm oltin va kumushni boylikning mutlaq shakli deb qaradi va uni chetdan olib kelish yo‘lini qidirdi. Tashqi savdoda ijobiy saldoga erishish uchun dastlabki merkantilistlar maqsadga muvofiq hisobladilar: · eksport qilinadigan tovarlarga maksimum yuqori baho o‘rnatishni; · tovarlar importini har tomonlama cheklashni; · mamlakatdan oltin va kumushning oqib chiqib ketishiga yo‘l qo‘ymaslikni. Dastlabki merkantilizm davrida hukumat ataylab chaqalarni buzib, ularning qimmatini pasaytirish bilan shug‘ullanganki, xorijiy savdogarlarni ularning pulini mahalliy pulga almashtirish va ko‘proq tovar sotib olishga qiziqtirish maqsadida. Keyinchalik tovar-pul munosabatlarining rivojlanishi, tashqi savdoning kengayishi merkantalistlarning boylik muammosiga bo‘lgan ko‘z qarashini o‘zgartirishga majbur etdi. Keyingi merkantilizm XVI asrning ikkinchi yarmidan XVIII asrgacha bo‘lgan davrni o‘z ichiga oladi. (Uning asosiy vakillaridan biri ingliz Tomas Men hisoblanadi). Bu davrga kelib milliy sanoat va savdoni rivojlanishining davlat tomonidan rag‘batlantirilishi sababli, malakatlar o‘rtasida savdo aloqalari keng va muntazam rivojlana boshladi. Dastlabki merkantilistlarning «pul balansi» o‘rniga keyingi merkantilistlarning «savdo balansi» nazariyasi kelib chiqdi. «Savdo balansi» nazariyasi (yoki etuk merkantilizm) Angliyada keng tarqala boshladi. Mazkur kontseptsiya vakillari dastlabki merkantilistlarni mamlakatdan tashqariga pul chiqarishni man etgani, importni haddan tashqari cheklagani uchun tanqid qildi. Ularning fikricha hukumatning tashqi iqtisodiy siyosatdagi asosiy vazifasi – mamlakatda imkoni boricha ko‘proq pul mablag‘larini jamg‘arish emas, balki aktiv savdo balansiga erishishdir (eksportning importdan ustun bo‘lishi). Eksport va import o‘rtasidagi farq - mamlakat boyligining o‘sishidir. Demak, real boylik – bu «o‘lik pullar» yig‘indisi emas, balki yangi pullarni, ya’ni pul kapitalini vujudga keltiruvchi pullardir. Shulardan kelib chiqqan holda, keyingi merkantilizm vakillari aktiv savdo balansiga erishish uchun bir qator tavsiyalarni ilgari surdilar: · tashqi bozorlarni nisbatan arzon tovarlar sotish yo‘li bilan egallash, hamda bir mamlakat tovarini olib boshqalariga uni qimmatiga sotish; · mamlakatda aktiv savdo balansini saqlab turgan holda, tovarlar importiga ruhsat etish (zeb-ziynat buyumlaridan tashqari); · qulay savdo ishlarini amalga oshirish uchun oltin va kumushni chetga chiqarish, mamlakatda ularning massasini ko‘paytirish va aktiv savdo balansini saqlab turish uchun vositachilik qilish. Pulning tovarli mohiyatini tan olsada uning qimmatini keyingi merkantilistlar ilgarigidek oltin va kumushning tabiiy xususiyatidan deb qaradilar. Ammo aynan ular metallistik nazariyadan pulning miqdoriy nazariyasiga va monometallizm tizimiga o‘tishga sabab bo‘lgan. Agar dastlabki merkantilistlar pulning jamg‘arish funktsiyasini asosiy deb bilgan bo‘lsalar, keyingi rivojlangan merkantilistlar – muomala funktsiyasini asosiy hisobladilar. Keyingi merkantilistlarning ishonchiga ko‘ra, pulning qimmati uning miqdoriga nisbatan teskari bog‘liqlikda, tovarlar bahosi darajasi esa pul miqdoriga to‘g‘ri mutanosiblikda bo‘ladi. Ular, pul taklifining ko‘payishi unga bo‘lgan talabni oshirgach, savdoni rag‘batlantiradi deb bir tomonlama hisobladilar. Endi biz keyingi rivojlangan (etuk) merkantilizmning atoqli vakillarining asosiy g‘oyalarini qisqacha ko‘rib chiqamiz. Angliyada etuk merkantilizm Tomas Men (1571-1641) asarlarida ifoda etilgan. Manufaktura tizimining klassik vakili T.Men shu bilan birga o‘z davrining yirik kommersanti, Ost-Indiya kompaniyasi direktorlaridan bir bo‘lgan. Kompaniyani chetga moneta chiqargani uchun tanqid qiluvchilardan uning manfaatini ximoya qilish maqsadida T.Men 1621 yil «Angliyaning Ost-Indiya bilan bo‘lgan savdosi to‘g‘risida mulohaza» kitobini chop etdi. Monetaristlar kontseptsiyasiga savdo balansi nazariyasini qarshi qo‘ydi. T.Men 1630 yil «Angliyaning tashqi savdodagi boyligi yoki boylikni tartiblash sifatidagi tashqi savdo balansi» asarini yozdi. Unda muallif pul muomalasini qattiq tartiblashning zararli ekanligini, chetga monetalarning erkin chiqarilishi kerakligini, uningsiz tashqi savdoni normal rivojlantirib bo‘lmasligini qayd qilib o‘tadi. Uningcha: «Har yili xorijliklardan xarid qilgan summadan ko‘ra, ularga ko‘proq sotish» qoidasini ta’minlash asosiy hisoblanadi. Faqat aktiv savdo balansi yordamida, uning fikriga ko‘ra, mamlakat ixtiyorida qoladigan va uning boyligini orttiradigan pulni chetdan jalb qilish mumkin. J.Lokk «boylik» to‘g‘risida T.Men bilan deyarli hamoxang fikr yuritgan. Uningcha, boylik deganda faqat oltin va kumush miqdorining ko‘pligi emas, balki uning boshqa mamlakatlarga nisbatan ko‘p bo‘lishi ko‘zda tutilishi kerak. R.Kantilon, xuddi J.Lokk kabi, o‘zining «Savdo tabiati to‘g‘risida ocherk» (1775) kitobida «qo‘shni mamlakatlarga qaraganda muomalada ko‘p puli bo‘lgan har qanday davlat, ulara nisbatan ustunlikka ega…» deb, qayd qilib o‘tgan. Frantsiyada merkantilizmning asosiy vakili, mashxur «Siyosiy iqtisod traktati» (1615) asarining muallifi – Antuan Monkreten (1576-1621) hisoblanadi. U savdogarlarni ancha foydali toifa deb hisobladi, savdoni kasb-hunarning bosh maqsadi sifatida tavsifladi. A.Monkreten pul boyligini ko‘paytirish yo‘llarini qidirdi, o‘z takliflarini qirol Lyudovik XIII ga tavsiya etdi. Davlatning iqtisodiyotga faol aralashuvi jamg‘armaning, mamlakat xo‘jaligini mustahkamlash va rivojlantirishning asosiy omili sifatida qaraladi. A.Monkreten manufakturani rivaojlantirishni, xunarmandchilik maktablarini tashkil etishni, mahsulotlar sifatini yaxshilashni va mamlakatda ishlab chiqarilgan tovarlar savdosini kengaytirish bilan Frantsiya bozoridan xorijiy savdogarlarni siqib chiqarishni taklif qildi. Xorijiy savdogarlarni u mamlakat boyligini so‘rib oluvchi nasosga taqqoslaydi. A.Monkreten dasturi Frantsiya tashqi savdosini kengaytirishni ko‘zda tutadi. U nisbatan monetarizm g‘oyasini, shuningdek savdo balansi kontseptsiyasini aks ettiradi. Merkantilizmning tarixiy ahamiyati Merkantilizm, uning vakillari – ijodiy merosidagi ham pozitiv, shuningdek ham negativ elementlar nuqtai nazardan, iqtisodiy ta’limotlar tarixida o‘chmas iz qoldirdi. Birinchidan, merkantilistlar kontseptsiyasi deyarli butunlay muomala sohasidagi xo‘jalik hayot amaliyotiga qaratilgan. Shunday bo‘lsada, bu ularga ko‘plab iqtisodiy kategoriyalarni ilmiy oborotga kiritish, savdo sohasi, ssuda operatsiyalari va pul muomalasining muhim qonuniyatlarini aniqlab berish imkonini beradi. Lekin iqtisodiyotning boshqa sohalariga bo‘lgan ularning ta’siri doimo aynan bir xil bo‘lgan emas. Masalan, mamlakatning o‘z sanoati va savdosini rivojlantirishi uchun pul muhim vosita ekanligini to‘g‘ri tushuntirib bergach, merkantilistlar shunday bo‘lsada milliy iqtisodiyotga xorijiy investitsiyalarni jalb qilishga e’tibor bermadilar. Bundan tashqari, ular uchun ishsizlik muammosi ham muhim hisoblanmagan; «ixtiyoriy ishsizlik»ning asosiy sababi ishlamaslik xohishini keltirib chiqaruvchi yoki «yalqovlik», yoki «axloqiy buzuqlik» hisoblangan. Ikkinchidan, merkantilizm bozor munosabatlari shakllanishining va Evropada ancha rivojlangan mamlakatlar - Angliya va Frantsiyada uning o‘rnini olgan klassik siyosiy iqtisodning o‘ziga xos xususiyatlarini keltirib chiqardi. Xususan, Frantsiyada XVII asrda moliya vaziri Jan Batist Kolber ancha faol protektsionizm siyosatini olib borgan davrda sanoatning qudratli manufaktura tarmog‘i yaratildi. Ammo bir vaqtning o‘zida mamlakat tashqarisiga don chiqarishni man etish va boshqa mamlakatlardan uni erkin olib kelish yo‘li bilan fermer xo‘jaliklarining shakllanishiga to‘sqinlik qilindi. O‘sha davrdagi Frantsiya ichki bozori, uning azaliy raqibi – Angliyaga nisbatan, «torligi» oqibatda aynan shu vaziyatga bog‘lab tushuntirildi. Natijada frantsuz merkantilizmi kolbertizm deb atala boshladi, klassik siyosiy iqtisod doirasidagi o‘ziga xos frantsuz maktabi esa fiziokratizm ta’limoti deb yuritildi. Angliyada esa merkantilizm, iqtisodiy tarixdan ma’lumki, Frantsiyaga nisbatan ancha «unumli» bo‘ldi. XVII asrdagi savdo va sanoat sohasidagi bu mamlakatning protektsionizm siyosatidagi asosiy yutuqlari, odatda Ost-Indiya kompaniyasi rahbarlaridan biri – Tomas Men nomi bilan bog‘lab tushuntiriladi. Shu narsa ham ma’lumki, aynan Angliyada merkantilizm bilan bo‘lgan g‘oyaviy kurash natijasida eng muhim nazariy xulosalar ishlab chiqildi va ular A.Smit, D.Rikardo, T.Maltus, J.S.Mill va boshqalarning asarlarida o‘z aksini topdi. Bundan tashqari, Angliya XIX asrda ancha kuchli rivojlangan mamlakat sifatida eng muhim antimerkantilistik chora tadbirlarni, jumladan ichki va tashqi savdoda to‘la erkinlik siyosatini amalga oshira boshladi. Adabiyotlar: 1. Agapov I. Istoriya ekonomicheskix ucheniy. – M.: ViM, 1997. 2. Bartenev S.A. Istoriya ekonomicheskix ucheniy. V 6 t. - M.: «Ekonomist’», 2005. 3. Blaug M. Ekonomicheskaya misl v retrospektive. M.: «Delo-Ltd» , 1994. Vsemirnaya Istoriya Ekonomicheskoy Misli. 1 t. M.: Misl, 1987. Iqtisodiy ta’limotlar tarixi. T.: FAN, 1997. Kostyuk V.N. Istoriya ekonomicheskix ucheniy. M.: Tsentr, 1998. Mayburd E.M. Vvedenie v istoriyu ekonomicheskoy misli. Ot prorokov do professorov. M.: «DELO», «VITA- PRESS», 1996. 4. Merkantilizm (Pod red. I.S.Plotnikova). M.: OGIZ-Sotsekgiz, 1975. 5. Rijov I.V. Istoriya ekonomicheskix ucheniy. – M.: «Perspektiva», 2004. 6. Titova N.E. Istoriya ekonomicheskix ucheniy. M.: «Gumanitarniy izdatelskiy tsentr VLADOS», 1997. 7. Yusupov Yu.B. Stanovlenie i razvitie ekonomicheskoy nauki. T.: AO «Uchkun», 1999. 8. Yadgarov Ya.S. Istoriya ekonomicheskix ucheniy. M.: INFRA-M, 1999.

Похожие

Merkantelizm iqtisodiy ta’limoti va uning mohiyati
Iqtisodiyotning umumiy asoslari
Iqtisodiy taraqqiyot to‘g‘risidagi turli xil nazariya va qarashlar
Iqtisodiy ta’limotlar tarixi fanining predmeti va o’rganish usullari
Marjinalizm ta`limoti va neoklassik iqtisodiy maktablar