Banklarda hujjatlar aylanishi va bank nazoratining tashkil qilinishi - Экономика - Рефераты

Banklarda hujjatlar aylanishi va bank nazoratining tashkil qilinishi

Загружено в:

20.09.2019

Скачано:

0

Размер:

96.5 KB

Banklarda hujjatlar aylanishi va bank nazoratining tashkil qilinishi Reja: 1- § . Hujjatlar haqida tushuncha va ularning turlari 2- § . Bank muassasalarida ish kuni va hujjatlar aylanishining tashkil qilinishi 3- § . Ichki bank nazorati va uning turlari 4- § . Banklarda buxgalteriya hujjatlarini saqlash tartibi

1 - § . Hujjatlar haqida tushuncha va ularning turlari Hujjatlashtirish bu - hisobga olinishi kerak bo’lgan har bir operatsiya xaqidagi ma’lumotni o’z ichiga jamlagan va operatsiyaning qonuniyligini tasdiqlovchi hujjatlar majmuasidir. Banklar o’zining faoliyati jarayonida hujjatlar bilan ish olib boradi. Buxgalteriya hisobida o’tkazilishi kerak bo’lgan hech bir operatsiya hujjatsiz amalga oshirilishi mumkin emas. Chunki hujjatlar mulkning talon-taroj qilinmasdan to’liq saqlanishini ta’minlaydi. Misol uchun, pul mablag’larini bankka topshirish yoki bankdan olish to’liq to’ldirilgan va oldindan tekshirilgan maxsus hujjatlar asosida amalga oshirilishi mumkin, o’tkazib bo’lingan operatsiyalarning naqadar to’g’riligi yoki qonuniyligi keyinchalik shu hujjatlar asosida tekshiriladi. Tekshirish natijalari tahlil qilinib kerakli chora ko’riladi. Shuning uchun hujjatlar buxgalteriya hisobining asosi hisoblanadi. Hujjatlardagi operatsiyaning mazmuni, uni hisobga olish uchun kerak bo’lgan barcha belgilar hujjatlarning rekvizitlari yoki ko’rsatkichlari deyiladi. «Hujjatlar va korxonalarda buxgalteriya hisobini olib borish haqida»gi Nizomga muvofiq barcha hujjatlar uchun majburiy bo’lgan rekvizitlar o’rnatilgan. Xujjatlarning asosiy rekvizitlari quyidagilar: 1. Hujjatning to’liq nomi (masalan: to’lov talabnomasi, to’lov topshirig’i) 2. Hujjatni to’ldirish sanai va uning nomeri. 3. Mahsulot sotuvchi va mahsulot oluvchi korxonalarning to’liq nomi. 4. Shu korxona va tashkilotlarning bankdagi hisob nomerlari. 5. Ularga xizmat ko’rsatuvchi banklarning nomi, ularning kodi. 6. Operatsiyaning mazmuni. 7. To’lanadigan summa (raqamlar va harflar bilan). 8. Rahbar shaxslarning imzolari va korxonaning muhri. Har bir hujjat xatosiz, yozuv mashinkalarida bir yo’la bir necha nusxada to’ldirilishi yoki kompyuterda terilishi kerak. Kassa operatsiyalari bo’yicha ishlatiladigan hujjatlar bundan mustasno, bunday hujjatlar qo’lda, ruchkalar yordamida to’ldiriladi.

Bankda ishlatiladigan barcha hujjatlarni biz shartli ravishda 2 qismga bo’lamiz. 1. Korxonalar tomonidan rasmiylashtiriladigan hujjatlar. 2. Banklar tomonidan rasmiylashtiriladigan hujjatlar. Hujjatlarning asosiy qismi korxona va tashkilotlar tomonidan rasmiylashtirilib, banklarga topshiriladi. Korxona va tashkilotlar tomonidan to’ldiriladigan hujjatlarga asosan naqd pulsiz hisobkitob bilan bog’liq bo’lgan hujjatlar: to’lov talabnomasi, to’lov topshiriqnomasi, to’lov talabnomasining ro’yxati, cheklar ro’yxati, kassa operatsiyalari bo’yicha esa pul topshirish haqidagi hujjat (e’lon), pul cheki kabilar kiradi. Har bir hujjatlarga korxona rahbari va buxgalterining imzolari qo’yilib, ular muhr bilan tasdiqlangan bo’lishi lozim. Bu hujjatlar banklarga korxonaning ma’lum xizmatchisi tomonidan maxsus ajratib qo’yilgan qutilarga solib qo’yish yo’li bilan, yoki aynan shu korxonaga xizmat ko’rsatuvchi mas’ul ijrochiga berish yo’li bilan topshiriladi. Hujjatlar mas’ul ijrochi tomonidan shakl va mazmun jihatidan puxta tekshiriladi, shundan so’ng, shu hujjatlar asosida ma’lum bir operatsiya o’tkaziladi. Korxonalar tomonidan topshirilgan hujjatlar bilan ish ko’rish bilan bir qatorda banklarning o’zida ham ma’lum bir hujjatlar rasmiylashtiriladi. Masalan banklar o’rtasidagi o’zaro aloqalarda ishlatiladigan avizo, bank operatsiyalari bo’yicha ishlatiladigan memoreal va boshqa orderlar, kirim va chiqim jurnallari, balansdan tashqari (hisoblaridan orderlar bank xodimlari bo’yicha) kirim - chiqim orderlari bank tomonidan rasmiylashtiriladigan hujjatlarga kiradi. Lekin hozirgi kunda, 2 pog’onali bank tizimi faoliyat ko’rsatayotgan bir paytda, “avizo” deb nomlanuvchi hujjat asosan Markaziy bank muassasalari o’rtasida banklaaro oborotlar bo’yicha operatsiyalar o’tkazilganda rasmiylashtiriladi. Tijorat banklari esa mijozlarning hujjatlari asosida elektron to’lov hujjatlari rasmiylashtirib Hisob-kitob markaziga o’tkazadilar. Hujjatlar sodir etiladigan operatsiyalarning hajmiga ko’ra oddiy va yig’ma bo’lishi mumkin. Oddiy hujjatlarda faqat bitta xo’jalik operatsiyasi aks etadi,

yig’ma hujjatlarda esa bir necha operatsiyalar jamlangan bo’ladi. Oddiy hujjatlarga to’lov talabnomasi, to’lov topshiriqnomasi, akkreditiv ochish uchun ariza, kirim orderi va pul chekini misol qilish mumkin. Yig’ma hujjatlarga esa yig’ma to’lov topshiriqnomasi, to’lov talabnomasining ro’yxati, cheklar ro’yxati, kassa kirim jurnali, kassaning chiqim jurnalini kiritish mumkin. Bundan tashqari bajariladigan operatsiyalarning mazmuniga ko’ra bank operatsiyalari bo’yicha barcha hujjatlarni 3 guruhga bo’lish mumkin: 1. Naqd pulsiz hisob - kitoblarda ishlatiladigan hujjatlar; 2. Naqd pul bilan bog’liq bo’lgan kassa hujjatlari; 3. Balansdan tashqaridagi hisobvaraqlar bo’yicha hujjatlar. Ma’lumki, har bir xo’jalik yurituvchi sub’ekt o’z pul mablag’larini biror bankda ochgan hisobvaraqda saqlaydi va uning barcha naqd pulli hamda naqd pulsiz operatsiyalari (pul to’lash va pul kelib tushishi bo’yicha) mana shu hisobvaraqlar orqali o’tkazadi. Pul o’tkazish mijozning topshirig’i yoki mol jo’natuvchi korxonaning to’lov talabnomasi orqali bank xodimlari tomonidan bajariladi. Bu holda naqd pul ishlatilmaydi. Operatsiyalar hisobvaraqlardan yozuvlar bajarish orqali o’tkaziladi. Shuning uchun bunday operatsiyalarda ishlatiladigan hujjatlarni naqd pulsiz hisobkitoblarda ishlatiladigan hujjatlar guruhiga kiritamiz. Bank orqali o’tadigan operatsiyalarining bir qismi naqd pul ishtirokida amalga oshiriladi. Bu - bankning kirim kassa operatsiyalari va chiqim kassa operatsiyalaridir. Bank mijozlari tomonidan, ya’ni naqd pul bilan muomala qiluvchi savdo, maishiy xizmat ko’rsatish, umumiy ovqatlanish, madaniy tadbirlar o’tkazish bilan shug’ullanuvchi (kino teatr, kontsert zallari, muzey) muassasa va tashkilotlar tomonidan naqd pul tushumini topshirishi bilan bog’liq operatsiyalar kirim kassa operatsiyalari hisoblanadi. Xalq xo’jaligining turli tarmoqlariga qarashli bo’lgan korxona, tashkilot va muassasalar ishchi xizmatchilarga ish haqi, nafaqa, mukofot, xizmat safari xarajatlarini to’lash uchun naqd pul oladilar. Bu operatsiyalar chiqim kassa operatsiyalari bo’lib hisoblanadi.

Ushbu operatsiyalarda ishlatiladigan hujjatlarni naqd pul bilan bog’liq kassa hujjatlari guruhiga kiritamiz. Bankda balans ichidagi hisobvaraqlar bilan bir qatorda balansdan tashqari hisobvaraqlar ham yuritiladi. Bunday hisobvaraqlarda asosan qimmatbaho hujjatlar hamda ba’zi bir bank operatsiyalari bo’yicha hujjatlar hisobga olinadi. Masalan, to’lanadigan akkreditivlar, to’lov muddatini kutayotgan hisob-kitob hujjatlari, o’z vaqtida to’lanmagan hujjatlar, balans tashqaridagi hisobvaraqlar bo’yicha yuritiladigan hujjatlar shular jumlasidandir. Bu hisobvaraqlardagi qoldiq bank balansiga ta’sir etmaydi. Shuning uchun bunday hujjatlar balansdan tashqari hisobvaraqlar bo’yicha hujjatlarga kiritiladi. Bu guruhlarning har biriga korxona va tashkilotlar tomonidan to’ldirilgan hujjatlar hamda bank tomonidan to’ldirilgan hujjatlar kiradi. Bu hujjatlarning har biri haqida bundan keyingi mavzularda to’xtalib o’tamiz. 2 - § . Bank muassasalarida ish kuni va hujjatlar aylanishining tashkil qilinishi Hujjatlar rasmiylashtirilgan vaqtdan boshlab, ular bo’yicha operatsiyalar bajarilgunga qadar bo’lgan vaqt ichidagi tartibli harakatiga bank operatsiyalari bo’yicha hujjatlar aylanishi deyiladi. Hujjatlar aylanishi operatsiyalarining qonuniyligi, hujjatlarning haqiqiyligi va to’g’ri rasmiylashtirilganligini hamda ularning hisobda to’g’ri aks ettirilishini tekshirish bilan bog’liq bo’lgan ishlarni o’z ichiga oladi. Hujjatlar aylanishi bank operatsiyalarining o’z vaqtida to’g’ri va qonuniy tarzda amalga oshirilishida katta rol o’ynaydi. Shuning uchun har bir bankda hujjatlarning aylanishi va mijozlarga xizmat ko’rsatish vaqti grafiklarda aks ettiriladi. Bankning har bir ish kunining 3,5 - 4 soati bevosita mijozlarga xizmat ko’rsatishga ajratiladi. Lekin mijozlar uchun raqobat sharoitida ko’plab mijozlarni o’ziga jalb qilish maqsadida bank ish kuni bir necha soatga uzaytirilishi mumkin. Kunning qolgan qismida esa avvalgi kun hisob materiallari tekshiriladi, shu kunning operatsiyalariga yakun yasaladi va ertangi kun operatsiyalariga tayyorgarlik qo’riladi (shu kun kelib tushgan hujjatlar shu

kunning o’zida,kechki payt kelib tushgan hujjatlari esa ertasi kun o’tkaziladi, chunki hujjatlar kechki pochta orqali kelishi mumkin). Xujjatlar aylanishi aks etgan grafiklarda bank operatsiyalarini bajaruvchi bank xodimlarining bir-biriga hujjatlarni uzatish, banklararo oborotlar gruppasi, kassaga yoki hisoblash markazlariga (kompyuter bo’limiga) uzatish vaqtlari belgilanadi. Har bir bank muassasalarida hujjatlarning o’z vaqtida bir maromda tushishi, ularning oldida katta navbatlar hosil qilishning oldini olish maqsadida bankning mas’ul ijrochilari uchun mijozlarga xizmat ko’rsatish grafigi tuziladi. Grafikda kunda bank bilan muloqotda bo’ladigan, har bir mas’ul ijrochiga biriktirilgan korxona va tashkilotlar nomi va ularga xizmat ko’rsatish vaqti ular bilan kelishgan holda belgilanadi. Umuman, buxgalteriya xodimlarining ish kuni shunday tashkil etilishi kerakki, bunda kelayotgan hisob-kitob va pul hujjatlari o’z vaqtida ijro etilishi hamda ular hisobvaraqlar bo’yicha buxgalteriya hisobida aks ettirilib, kundalik balans tuzilishi kerak. Banklarda ish kuni va hujjatlar aylanishini tashkil etish bo’yicha O’zbekiston Respublikasi Markaziy banki tomonidan asosiy talablar ishlab chiqilgan bo’lib, ular “O’zbekiston Respublikasi banklarida buxgalteriya hisobi va hisoboti bo’yicha” 61 - sonli yo’riqnomada o’z ifodasini topgan. Yo’riqnomada ko’rsatilgan talabnomalar quyidagilardir: • Operatsiya kuni davomida, ya’ni ish kunining birinchi yarmida bankka kelib tushgan barcha hisob-kitob, pul hujjatlari shu kunning o’zida qabul qilinishi, rasmiylashtirilishi va buxgalteriya hisobi varaqlarida qayd etilishi kerak. Operatsiya kuni tugagandan keyin bankka kelib tushgan barcha hujjatlar, qoida tariqasida kelasi ish kunida mijozlarning hisobvaraqlariga kiritiladi. • Shaxsiy kompyuterlar yordamida fayllarga ishlov berish tartibi va ularni Hisob markaziga jo’natish vaqti 1998 yil 25 apreldagi 6 - bayonnoma bilan O’zbekiston Respublikasi Markaziy banki boshqaruvi tomonidan tasdiqlangan “O’zbekiston Respublikasi banklari o’rtasida elektron to’lovlar tizimi bo’yicha

hisob-kitoblar yuritish to’g’risida»gi Nizom hamda unga kiritilgan qo’shimcha va o’zgartishlar asosida amalga oshirilishi lozim. • Operatsiyalarni sifatli o’tkazilishini tartibga solib turish uchun har bir bank bo’limida doimiy ravishda bankka katta miqdorda hisob-kitob va pul hujjatlarini taqdim etuvchi asosiy mijozlardan hujjatlar qabul qilish qat’iy grafiklarini tuzish lozim. • Operatsiya kuni davomida mijozlardan barcha hujjatlarni bevosita buxgalteriya xodimlarining o’zlari qabul qilib oladilar. Operatsiya kuni tugagandan so’ng, ya’ni kunning ikkinchi yarmida hujjatlar bankka maxsus qutilar orqali topshiriladi. Ulardagi hujjatlar har soatda olib turilishi kerak. • Barcha hisob-kitob va pul hujjatlaridan o’tkazilishi lozim bo’lgan summalar, jumladan, byudjetga ajratmalar, ish xaqi va shunga tenglashtirilgan naqd pul to’lovlari mijozning “Talab qilib olinadigan” depozit bo’yicha hisobvarag’ida etarli pul mablag’lari bo’lgan taqdirda, ya’ni shu hisobvaraqdagi mablag’lar chegarasida to’lanadi. Yuqorida sanab o’tilgan talablarni hisobga olgan holda, har bir bankda mijozlarga xizmat ko’rsatish hamda hujjatlar aylanish grafigi belgilab qo’yiladi. Unda xo’jalik yurituvchi sub’ektlarga hisob-kitob va kassa hizmatlarini ko’rsatishning aniq vaqti hamda ularga ishlov beruvchi uchastkalardan o’tadigan vaqti ko’rsatiladi. Mijozlarga hizmat ko’rsatish va hujjatlar aylanishi grafigini bank rahbari tasdiqlaydi. Quyida banklarda buxgalteriya xodimlarining ish kuni rejimi to’g’risidagi namunaviy ko’rsatmalarni keltiramiz: Mas’ul ijrochilarning ish kuni ertalab 8.00 dan 17.00 gacha davom etadi. • Soat 8.00 dan 9.00 gacha mijozlarning shaxsiy hisobvaraqlardagi yozuvlarni tekshirish, analitik va sintetik hisob materiallarini bir-biri bilan solishtirish, kerakli hujjatlar bilan shaxsiy hisobvaraqlarni mijozlar bo’yicha hisobvaraqlar kartotekasiga joylashtirish bilan shug’ulanadi. • Pul sanash kassasidan tushumni yig’ishga doir hujjatlar operatsion bo’lim - buxgalteriya xodimi qo’liga ish kuni boshlanish vaqtida kelib tushishi lozim.

Operatsiya kuni davomida inkassatsiya qilingan tushum hujjatlari tushum sanab bo’lingandan keyin, lekin 13.00 dan kechikmay kassadan olinadi. Kassa daftarlarini kassa ma’lumotlari bilan solishtirish 15.00 gacha tugallanishi lozim. • Ish kunining ikkinchi yarmida mijozlardan qabul qilingan hisob-kitob, pul hujjatlari to’lov muddatlari arafasida qaydlov uchun rasmiylashtiriladi. • Mijozlardan hujjatlar butun ish kuni davomida qabul qilinadi. • Operatsion kun oxirigacha bankka kelib tushgan hujjatlar joriy kun balansi bo’yicha o’tkaziladi. • Operatsion kun tugagandan so’ng yoki kun oxirida topshirilgan hujjatlar bankning keyingi ish kuni balansi bo’yicha o’tkaziladi. • Ish kuni yakunlanishiga kamida ikki soat qolganda inkassaga qabul qilingan boshqa shaharlar bilan hisob-kitoblar bo’yicha to’lov talabnomalari to’lovchilarga xizmat ko’rsatuvchi banklarga o’sha kunning o’zidayoq jo’natiladi. • Mazkur bank mijozlarining hisobvaraqlari bo’yicha summalarini kiritish va olishi uchun hujjatlar bir operatsiya xodimlaridan boshqalarga berilishi kechiktirilmasligi, ular kelib tushgani va hujjatlarga ishlov berilgani sayin topshirib turilishi lozim. • Joriy kun operatsiyalari bo’yicha hujjatlar hisob-kitob markaziga ular bilan kelishilgan maxsus grafik bo’yicha berilishi kerak. • Ekspeditsiya bo’limiga hujjatlar qabul qilish ish kuni oxiriga kamida 1 - 1,5 soat qolganda to’xtatiladi. Hozirgi kunda respublikadagi barcha tijorat banklari yangi kompyuter va boshqa hisoblash texnikasi bilan ta’minlangan bo’lib, o’z ichki hisoblash markaziga ega. Shu sababli korxona va tashkilotlarning shaxsiy hisobvaraqlardagi yozuvlarini tekshirish hamda hisobvaraqlar bo’yicha yakunlarini balans hisobvaraqlari va kutilmagan vaziyatlar hisobvaraqlari bilan solishtirish shu kun oxirida amalga oshirish tavsiya etiladi. Bu esa yangi ertangi kun operatsiyalarini o’z vaqtida boshlashga imkon beradi. Har bir bank yuqorida ko’rsatilgan namunaviy ko’rsatmalarga asosan o’z faoliyati xususiyatlarini hisobga olgan holda buxgalteriya xodimlarining ish kuni

tartibini ishlab chiqadi. Ushbu rejim bank rahbari tomonidan tasdiqlangandan so’ng, har bir buxgalteriya xodimi unga amal qilishi majburiy hisoblanadi. Endi bank operatsiyalari bo’yicha hujjatlar aylanishiga to’xtalib o’tamiz. Bankning har bir operatsiyasi bo’yicha hujjatlar aylanishining o’z xususiyatlari bor. (naqd pulsiz, kassa, kreditlash...). Kassa operatsiyalari bo’yicha hujjatlar aylanishiga, ayniqsa katta ahamiyat beriladi. Shuning uchun kassa operatsiyalari bo’yicha hujjatlar aylanishini ko’rib chiqamiz. 1-sxema Kirim kassa operatsiyalari bo’yicha hujjatlar aylanishi. Mijoz nazoratchiga pul topshirganlik haqidagi e’lonni topshiradi. 1. Nazoratchi hujjatni tekshiruvdan o’tkazib, kassa kirim jurnalida undagi yozuvlarini aks ettirgandan so’ng e’lonni kirim jurnali bilan birga kassaga uzatadi. 2. Mijoz kassaga naqd pul topshiradi. 3. Kassir pulni sanab, e’lon va kirim jurnalidagi summa bilan solishtiradi, hujjatlarni rasmiylashtirib kvitantsiyani mijozga qaytaradi. 4. Order va kirim jurnali nazoratchiga qaytariladi. 5. Nazoratchi kun oxirida kassa kirim jurnali ma’lumotlarini kassa kitoblari bilan solishtiradi. 6. Solishtirishdan so’ng bu ma’lumotlar bank Hisob markaziga (kompyuter bo’limiga) yuboriladi. 7. Orderdagi ma’lumot shaxsiy hisobvaraqlarda aks ettiriladi va mas’ul ijrochiga beriladi. 8. Mas’ul ijrochi shaxsiy hisobvaraqdan ko’chirma bilan orderni birgalikda mijozga beradi. Qolgan operatsiyalar bo’yicha hujjatlar aylanishi ham alohida xususiyatlarga ega.

3 - § . Ichki bank nazorati va uning turlari Bankda o’tkaziladigan har bir operatsiya tekshirilib, ularning qonuniy rasmiylashtirilishi hamda mablag’lar va boyliklar but saqlanishi tegishlicha nazorat qilinishi ta’minlanmog’i lozim. Bu ichki bank nazoratidir. Ichki bank nazorati 3 xil yo’l bilan amalga oshiriladi: 1. Dastlabki nazorat. 2. Joriy nazorat. 3. So’ngi nazorat. Operatsiya bajarilishidan avval o’tkaziladigan nazorat - dastlabki nazorat deyiladi. Talontarojga yo’l qo’yilishi mumkin bo’lgan ba’zi operatsiyalar yoki rahbar xodimlarining ruxsati bilan bajarilishi kerak bo’lgan operatsiyalar o’tkazishdan oldin dastlabki nazorat olib boriladi. Dastlabki nazorat bank boshqaruvchisi, bosh buxgalteri, kredit bo’limi xodimi tomonidan amalga oshiriladi. Masalan, hisobvaraq ochish uchun bank boshqaruvchisi va bosh buxgalterining ruxsati kerak, kassa operatsiyalari bo’yicha albatta hujjatlar nazoratchi tekshiruvidan o’tkazilishi lozim, ssuda operatsiyalari esa kredit xodimi nazoratidan so’ng amalga oshiriladi. Qo’shimcha nazorat qilinishi kerak bo’lgan hujjatlar nazoratchiga yoki bosh buxgalterga topshiriladi, bunday hujjatlar nazorat ustxati olingandan so’ng ijroga qabul qilinadi. Quyida ko’rsatilgan hisobvaraqlar va operatsiyalar bilan bog’liq hisob-kitob, pul hujjatlari nazoratchi xodim tomonidan tekshirilishi va imzolanishi lozim: a) hisob-kitob, pul hujjatlari: • mijozlarning topshiriqlarisiz bajariladigan operatsiyalarga doir hujjatlar, xususan asosiy to’lov bilan undiriladigan penya summasini olishga doir orderlar; • talab qilib olinguncha saqlanadigan ikkilamchi hisobvaraqlaridagi qoldiqlarni o’tkazish bo’yicha orderlar; • summalar yuboriladigan manzilni o’zgartirish va qaytarib yuborish, bank vakillik hisobvarag’i bilan bog’liq orderlar; b) tavsiliy hisob yozuvlari bo’yicha:

• fuqarolar va xarbiy hizmatchilarning jamg’arma depozit hisobvaraqlari; • hisob-kitob operatsiyalari bajarish qoidalarini buzganlik uchun mijozlardan jarima undirish bo’yicha hisobvaraqlar; • O’zbekiston Respublikasi Davlat byudjetining kassa ijrosiga doir yo’riqnomada qo’zda tutilgan hollarda davlat byudjeti hisobvaraqlari; • vakolatli shaxslarniing depozit hisobvaraqlari; • xususiy qarz oluvchilarning ssuda hisobvaraqlari; • qimmatbaho metallar, bankning asosiy vositalari, kam baholi va tez eskiruvchi buyumlarni hisobga olib borish hisobvaraqlari; • debitor va kreditorlar, aniqliq kiritgunga qadar saqlanadigan summalar bo’yicha hisobvaraqlar; • bank boshqaruv apparatini saqlash xarajatlari, kelgusi davr xarajatlari, operatsiyalarga oid hamda boshqa daromad va xarajatlari bo’yicha hisobvaraqlari va boshqalar; Bank sarmoyalari, xorijiy operatsiyalar, qimmatbaho metallar, kassalarga yuborilgan qo’shimcha pullar, oborot kassasi limitidan ortiqcha olingan yo’ldagi pullar, foyda va zararlar hisobga olinadigan hisobvaraqlar bo’yicha orderlar, depozit va ssuda hisobvaraqlarini yopish uchun tuzilgan orderlar, yo’l qo’yilgan xatolarni tuzatish orderlariga bank bosh buxgalteri yoki uning muovini nazorat imzosini qo’yadi. Pul va pul omborlarida saqlanayotgan boshqa boyliklarni qabul qilish hamda jo’natish orderlari, rezerv fondlari bilan bajariladigan operatsiyalar bo’yicha orderlarga bosh buxgalterdan tashqari bank boshqaruvchisi va kassa mudiri tomonidan imzo qo’yiladi. Biror bir operatsiya o’tkazish jarayonida olib boriladigan nazorat asosan bank mas’ul ijrochilarni tomonidan amalga oshiriladi. Mijozlardan kelib tushgan hisob- kitoblar bilan bog’liq hujjatlarning har biri mas’ul ijrochi tomonidan shakl va mazmun jihatidan tekshiriladi. Hisobvaraqni yurituvchi mas’ul ijrochi hujjatlar to’g’ri rasmiylashtirilganligini, shu jumladan, hujjatni tasarruf etuvchilarning imzolari va muhr izi taqdim etilgan namunalarga mos kelishini hamda

hisobvaraqdan pul to’lanishi uchun mablag’larining etarliligini tekshirgandan so’ng qabul qiladi, shunday tekshiruv bo’lganini tasdiqlash uchun hujjatning barcha nusxalarini imzolaydi. Lekin imzolashdan avval hujjat nusxalarini solishtirib, ularning bir xilligiga ishonch hosil qilish kerak. Shundan so’ng, hujjatning oxirgi nusxasi mijozga qaytariladi. Shu nusxaga bosilgan mas’ul ijrochining shaxsiy shtampi hujjatlar ijro uchun qabul qilinganini tasdiqlovchi tilxat vazifasini bajaradi. Masalan: naqd pulsiz hisob-kitoblarda ishlatiladigan to’lov topshirig’ini olsak. Mas’ul ijrochi to’lov topshirig’ini mijozdan qabul qilib olar ekan, uning nusxalar soni etarliligi, to’liq va to’g’ri rasmiylashtirilganligi, shu korxona xo’jalik faoliyatiga mos kelishi, mijoz hisobvarag’ida mablag’larning etarli ekanligi, korxona muhri hamda rahbari va bosh buxgalterining o’zida saqlanayotgan kartochkadagi vakolatli shaxslar imzolari va korxona muhri bilan to’g’ri kelishini tekshirishi lozim. Shundan so’ng pul o’tkazish bo’yicha operatsiyalar bajarilishi mumkin. Operatsiyalar bajarilgandan so’ng, o’tkaziladigan nazorat so’ngi nazorat deyiladi. So’ngi nazorat bank bosh buxgalteri, uning muovini, taftish - nazorat xodimlari, bank rahbari tomonidan o’tkazilishi mumkin. Bu nazorat hujjatlar aylanishi, operatsiyalar hisobi to’g’ri yo’lga qo’yilganligini, bank xizmatchilari tomonidan ularga belgilab berilgan majburiyatlarning bajarilishi, ular tomonidan rasmiylashtirilgan operatsiyalarining to’g’riligini tekshirishdan iborat. Bank rahbari buxgalteriya ishi holatini umuman kuzatib turish bilan bir qatorda balans va hisobotlarning o’z vaqtida tuzilishini tekshirib borishi, mablag’lar mijozlarning hisobvaraqlariga o’z vaqtida va to’liq kiritilishi hamda chiqarilishini muntazam ravishda nazorat qilib turishi shart. Bank bosh buxgalteri bank rahbari tasdiqlagan rejaga muvofiq, buxgalteriya ishining alohida uchastkalarini muntazam ravishda keyingi nazoratdan o’tkazib turishi zarur. Bank rahbari va bosh buxgalterining xohishiga ko’ra boshqa mutaxassislar ham tekshiruvlarga jalb etilishi mumkin. Tekshiruvlar rejalarga muvofiq o’tkaziladi. Bu rejalarda navbatdagi tekshiruvdan o’kaziladigan uchastkalar hamda ularni o’tkazish hajmi va vaqti ko’zda tutiladi. Rejalar

tuzilayotganda keyingi vaqtlarda qaysi uchastkalar taftish qilingani yoki o’rganilgani, shuningdek, qaysi uchastkalarda taftish va tekshiruvlar o’tkazilganda jiddiy kamchiliklar topilgani hamda takroriy tekshiruv zarurligi hisobga olinadi. Shu bilan bir qatorda, bank buxgalteriya xodimlari o’zlarining bir turdagi muayyan vazifalarini qanday bajarayotganliklari tematik tekshiruvdan o’tkazib turilishi, shuningdek, O’zbekiston Respublikasi Markaziy bankidan olingan, ayniqsa, yangi kelgan alohida ko’rsatmalar bo’yicha tekshiruv tavsiya qilinadi. Keyingi tekshiruvlar natijalari qisqa ma’lumotnomalar bilan rasmiylashtirilishi kerak. Bank rahbari keyingi tekshiruv vaqtida aniqlangan kamchiliklar to’g’risida ma’lumotnomalar olingandan keyin 3 kun muhlat ichida bu ma’lumotnomani buxgalteriya apparati hodimlari ishtirokida shaxsan qo’rib chiqishlari hamda bu kamchiliklar sabablarini bartaraf etish uchun zarur chora- tadbirlar qabul qilishi zarur. Kamomadlar, talon-taroj qilish, shuningdek, mansab mavqeini su’istemol qilish bilan bog’liq va shunga o’xshash boshqa holatlar aniqlanganda bank rahbari ikki kun ichida nazorat yakunlari bo’yicha materiallarni tergov organlariga topshirishlari talab qilinadi. Bosh buxgalter va so’ngi nazorat hodimi keyingi muntazam tekshiruvlar chog’ida aniqlangan kamchiliklar bartaraf etilishini kuzatib borishlari va zarur hollarda takroriy tekshiruvlar tashkil etishlari lozim. Bank boshqaruvchisi bankdagi hisob ishlarining olib borilishi, hujjatlar aylanishi va bank ichki nazoratining olib borilishi bo’yicha asosiy javobgar shaxsdir. 4 - § . Banklarda buxgalteriya hujjatlarini saqlash tartibi Banklar orqali o’tkaziladigan har bir operatsiya ma’lum bir hujjatlar orqali rasmiylashtirilar ekan, ushbu buxgalteriya hujjatlari banklarda yo’qotilmay saqlanishi ta’minlanishi kerak. Buxgalteriya hujjatlarini saqlash yuzasidan belgilangan tartibga rioya etilishi hamda bu ishlar to’g’ri tashkil etilishi uchun javobgarlik bank rahbari va bosh buxgalteri zimmasiga yuklatiladi. Ular o’z

xodimlariga hujjatlarni saqlash bo’yicha yo’l-yo’riq beradilar, zarur bo’lgan hollarda ularni bexatar joylarga olib chiqish tartibi va navbatini belgilaydilar. Banklarda operatsiya tugagandan so’ng barcha hujjatlar «Tijorat banki bo’limlarida, hududiy boshqarmalar va bosh tijorat banklarida axborotni ximoyalash va mansabdor shaxslarning axborot but saqlanishi uchun javobgarligi to’g’risida»gi qoidalarga asosan arxivlanadi. Hujjatlarni saqlashga tayyorlash bilan ularni papkalarga tikishni bajaruvchi xodim shug’ullanadi. Buxgalteriyada o’tkazilgan kirim va chiqim hujjatlar, har bir ish kuni uchun, debetlangan balans hisobvaraqlarining nomerlari ortib borishi tartibida papkalarga tikiladi. Bosh buxgalterning xohishiga ko’ra kirim-chiqim hujjatlari kreditlangan hisobvaraqlar nomerlari ortib borish tartibida, shuningdek, axborotni shaxsiy kompyuterga kiritish uchun tayyorlangan dastalar bo’yicha shakllantirilishi mumkin. Barcha hujjatlar papkalarga (yig’majildlar) ularning hisoblash tasmalari (hisoblash mashinada summalari yozilgan lenta) bilan birgalikda joylanadi. Debet yoki kredit bo’yicha bittadan ortiq hisobvaraqqa taalluqli hujjatlar papkaning oxirida, kutilmagan vaziyatlar hisobvaraqlari bo’yicha hujjatlardan oldin tikiladi. Ba’zi operatsiyalar bo’yicha hujjatlar, jumladan, yakka tartibda ssuda oluvchilar bo’yicha yuritiladigan hujjatlar, kassa hujjatlari, aholining omonatlari bo’yicha hujjatlar, qimmatbaho metallar, chet el valyutasi bilan operatsiyalar va bankning xo’jalik operatsiyalarga doir hujjatlari alohida papkalarga joylanadi, chunki bu hujjatlarni saqlash muddatlari turlicha belgilangan. Juzlangan hujjatlar klavishli hisoblash mashinalarida hisoblab chiqiladi va ularning summasi jamlama ma’lumotlaridagi oborotlarning yakuniy summalari bilan taqqoslanadi. Ombor daftarlarida hisobga olinmaydigan kutilmagan vaziyatlar hisobvaraqlari bo’yicha orderlar saralab olinib, kirim-chiqim hujjatlari bilan birga juzlanadi va dastlab har bir hisobvaraqning kirimi, so’ngra chiqimi bo’yicha qutilmagan vaziyatlar bo’yicha hisobvaraqlarning ortib borishi tartibida kirim- chiqim hujjatlaridan keyin tikiladi. Bittadan ortiq hisobvaraqqa daxldor bo’lgan kutilmagan vaziyatlar hisobvaraqlari bo’yicha kirim-chiqim orderlari barcha orderlardan keyin tikiladi.

Kutilmagan vaziyatlar hisobvaraqlariga tegishli hujjatlar ham hisoblab chiqilib, ularni buxgalteriya jurnallaridagi ma’lumotlar bilan yoki oborotlar jamlama ma’lumotlari bilan taqqoslanadi. Broshyura holiga keltirilgan hujjatlar tikilgan papka muqovasining ustiga (old tomoniga) hujjatlar, buxgalteriya yozuvlaridan o’tkazilgan sana, saqlash muddati, bank bo’limining nomi, kirim-chiqim hujjatlarining umumiy summasi ko’rsatiladi. Hujjatlarni tayyorlash topshirilgan xodim ilovasi bor kirim-chiqim orderlarida bu ilovalar qancha deb yozilgani va ularning haqiqatdan ham mavjudligini sinchiklab tekshirib chiqishi zarur. Operatsiyalar tugagan kun hujjatlari ertangi kundan kechiktirmay broshyura holiga keltirilishi lozim. Biror sabab bilan tikilmagan hujjatlar, albatta, seyflarda saqlanishi shart. Yuqorida aytib o’tganimizdek, ba’zi uzoq vaqt saqlanadigan hujjatlar, shuningdek, bank ichidagi operatsiyalarga taalluqli hujjatlar alohida broshyuralanadi. Bunday hujjatlarga qo’yidagi operatsiyalar bo’yicha rasmiylashtiriladigan hujjatlar kiradi: • aholi va harbiy xizmatchilar omonatlari bo’yicha; • qimmatbaho metallar va xorijiy valyuta bilan bajariladigan hamda xorijiy valyutadagi hisobkitoblar yuzasidan operatsiyalar bo’yicha; • yakka tartibda uy-joy qurilish uchun ssuda va jismoniy shaxslarga boshqa maqsadlar uchun beriladigan ssudalar bo’yicha; • bank asosiy vositalari, kam baholi tez eskiruvchi buyumlar, daromadlari va xarajatlariga oid va bankning boshqa ichki xo’jalik operatsiyalari bo’yicha; Kassa hujjatlariga dastlabki ikki guruh hujjatlari saqlanadigan papkalarga kirim-chiqim hujjatlari bilan birga kirim va chiqim orderlari hamda ularning barcha ilovalari, shuningdek, boshqa banklardan kelgan avizolarning asl nusxalari joylanadi. Birinchi va to’rtinchi guruh hujjatlar papkasiga esa kassa hujjatlarining asl nushalari tikiladi. Bu hujjatlar qoida tariqasida har kunligi har kuni alohida tayyorlanib boriladi. Hujjatlarning soni va umumiy summasi muqovada ularni tayyorlagan xodim,

bosh buxgalter yoki uning muovini imzolari bilan, kassa hujjatlari bo’yicha papkalar esa yuqoridagi shaxslar bilan birga kassirlarning imzosi bilan tasdiqlanadi. Operatsiyalari kam bo’lgan banklarda tugagan yilga tegishli uzoq muddat saqlanadigan hujjatlar rahbar xohishiga qo’ra, yil tugaganidan keyin broshyuralashiga ruxsat etiladi. Bunday hollarda yil tugagunicha bu hujjatlar papkalarda to’plab borilishi va omborda yoki temir shkaflarda bosh buxgalter javobgarligida saqlanishi lozim. Hujjatlarni saqlash vazifasi topshirilgan xodimlar ular to’la va but saqlanishini ta’minlashlari shart. Bosh buxgalter, uning muovini yoki bo’lim boshlig’i ruhsatisiz boshqa hodimlarning hujjatlarining ko’rib chiqishlariga yo’l qo’yilmaydi. Hujjatlar omborlarda, temir javon (seyf)larda, ko’riqlanadigan xonadagi temir javonlarda sandiq yoki qutilarda saqlanadi. Ombor yoki temir javonlarda qo’yidagi hujjatlar saqlanadi; • tugagan yil uchun yillik hisobotning tegishli imzolar bilan rasmiylashtirilgan nusxasi hamda so’ngi tugagan oy uchun oylik balans va uning barcha ilovalari; • joriy oyning birinchi kuni uchun tekshiruv qaydnomalari; • oxirgi 1 yil (12 oy) uchun kassa hujjatlari; • aholi omonatlari bo’yicha amaldagi shaxsiy hisobvaraqlar; • joriy oy uchun kirim-chiqim hujjatlari, bino-inshootlari, xo’jalik inventarlari, kam baholi va tez eskiruvchi buyumlar hisobi yuritiladigan hisobvaraqlar bo’yicha daftarlar. Qo’riqlanadigan xonadagi temir javon va qutilarda omonatlar bo’yicha shaxsiy hisobvaraqlardan tashqari amaldagi shaxsiy hisobvaraqlar kartotekalari, operatsiyalar daftarlari, imzolar namunalari qo’yilgan kartochkalar, ish haqi to’lash uchun berilgan mablag’lar hisobi yuritiladigan kartochkalar, foizlarni qo’yish qaydnomalari, amal qilib turgan hamda arxivdagi pensiya varaqlarining hamda bir martali pensiya yoki boshqa nafaqa to’lash to’g’risidagi topshiriqnomalarning kartotekalari saqlanadi.

Buxgalteriya hisobiga tegishli barcha materiallar bankning arxiviga topshirilgunga qadar operatsion bo’limining tokchalar va temir javonlar bilan jixozlangan joriy arxivida saqlanishi shart. Mazkur joriy arxiv hujjatlarning but saqlanishi uchun javob beradigan shaxs qo’l ostida bo’ladi. Ombordan buxgalteriya va joriy arxivda saqlanayotgan hujjatlarga doir ma’lumotlar kassa hujjatlari bo’yicha javobgar xodim yoki joriy arxivni boshqaruvchi xodim huzurida, bosh buxgalter yoki uning muovini imzolangan talabnomalar asosida olinadi. Ma’lumot olish uchun ruhsat etilgan bank xodimi kassir yoki joriy arxivni boshqaruvchi xodim quzatuvida ishlashi lozim. Hujjatlar uchun javobgar shaxslar ma’lumot olishga ruxsat berilgan xodimlar hujjatlarga biron - bir o’zgartirish va tuzatishlar kiritilmasligini kuzatib turishlari shart. Ombor va joriy arxivdan kirim-chiqim hujjatlari bosh buxgalterning yozma ruxsati bo’yicha beriladi. Kun oxirida hujjatlar qaytarilishi lozim. Hujjatning asl nusxasi olinayotganda bu haqda ikki nusxada dalolatnoma yoki bayonnoma tuzilib, unga bank rahbari, uning muovini, bosh buxgalter va hujjatlarni talab qilgan tashkilot vakili imzo chekadi. Dalolatnomada qanday hujjat olinganligi, uning kimning talabi va kimning ruxsati bilan olinayotgani aniq ko’rsatiladi. Dalolatnomaning ikkinchi nusxasi hujjatni so’ragan tashkilot vakiliga topshiriladi. Hujjatning olingan asl nusxasi o’rniga bank bosh buxgalteri tasdiqlagan nusha, dalolatnomaning birinchi nusxasi va hujjatni olish haqidagi talabnoma qo’yiladi. Bu talabnomada asl hujjatni olgan shaxs imzosi ham bo’lishi lozim. Shu bilan birga hujjat olingani to’g’risida bosh buxgalter shu hujjat broshyuralangan muqova ustiga yozib qo’yib, o’z imzosini qo’yadi. Shunday qilib, ushbu paragrafda hujjatlar va ularning turlari, hujjatlarning aylanishi, mijozlarga xizmat ko’rsatish grafiklari, hujjatlarni saqlashga tayyorlash, ularni saqlash, bank tomonidan bajariladigan operatsiyalar bo’yicha bank ichki nazorati hamda turlari haqida fikr yuritdik.

Asosiy adabiyotlar 1. «O’zbekiston Respublikasi Markaziy banki to’g’risida»gi O’zbekiston Respublikasi Qonuni. 1995 y. 26 dekabr. 2. «Banklar va bank faoliyati to’g’risidagi»gi O’zbekiston Respublikasi Qonuni. 1996 y. 25 aprel. 3. O’zbekiston Respublikasi Prezidentining «Hisob-kitoblar mexanizmini takomillashtirish va respublika hamda mahalliy byudjetlarga to’lovlarning o’z vaqtida kelib tushishini rag’batlantirish chora-tadbirlari to’g’risida»gi Farmoni. 1998 y. 4 fevral. 4. O’zbekiston Respublikasi Markaziy bank buxgalteriya hisobining hisobvaraqlar rejasi. 5. O’zbekiston Respublikasi tijorat banklarining buxgalteriya hisobining hisobvaraqlar rejasi. 6. O’zbekiston Respublikasida «Naqd pulsiz hisob-kitoblarni tashkil qilish haqida»gi 60-sonli Nizom. 2002 y. 12 yanvar. 7. O’zbekiston Respublikasi banklarida ochiladigan bank hisobvaraqlari haqidagi 1-sonli yo’riqnoma. 2001 y. 6 oktyabr. 8. O’zbekiston Respublikasi banklarida buxgalteriya hisobi va hisoboti to’g’risidagi 61-sonli yo’riqnoma. 1997 y. 5 sentyabr. 9. Abdullaeva Sh.Z. «Pul, kredit va banklar» Toshkent 2000 y. 10.Abdullaeva Sh.Z, Navro’zova K.N. «Banklarda buxgalteriya hisobi asoslari» O’quv qo’llanma T. 2001 y. 11.Murugova I.A. Navro’zova K.N. «Osnova buxgalterskogo ucheta bankax» T. 2001 g.

Похожие

Kirim kassa operatsiyalari bo‘yicha hujjatlar aylanishi, hisobi va nazorati

Chiqim kassa operatsiyalari bo‘yicha hujjatlar aylanishi, hisobi va nazorati

Banklarda buxgalteriya hisobini tashkil qilish asoslar

Banklarda depozit operatsiyalari hisobining tashkil etilishi

Banklarda buxgalteriya hisobining mazmuni va uni tashkil etishning ahamiyati