Undirilgan pul summalarini taqsimlash va undiruvchi talablarini qanoatlantirishning navbati - Юриспруденция - Рефераты

Undirilgan pul summalarini taqsimlash va undiruvchi talablarini qanoatlantirishning navbati

Загружено в:

28.10.2023

Скачано:

0

Размер:

35.6826171875 KB

Undirilgan pul summalarini taqsimlash va undiruvchi talablarini qanoatlantirishning navbati Reja: 1.Qarzdordan undirilgan pul summalarini taqsimlash tartibi. 2.Undiruvchilarning talablarini qanoatlantirish navbati va undiruvlar. 3.Navbati haqida talabalarda tasavvurni hosil qilish va ko’nikmalarni shakllantirish.

Qarzdordan undirilgan pul summalarini taqsimlash tartibi Sud ijrochisi qarzdordan undirgan, shu jumladan uning mol-mulkini realizatsiya qilish yo’li bilan olgan pul summasidan ijro hujjatini ijro etish jarayonida qarzdorga solingan jarimalar to’lanadi, ijro harakatlarini amalga oshirish xarajatlari qoplanadi. Qolgan pul summasidan undiruvchining talablarini qanoatlantirish va qarzdordan undirilgan pul summasiga mutanosib ravishda ijro yig’imini qoplash uchun foydalaniladi. Undiruvchining barcha talablari qanoatlantirilgandan keyin qolgan pul summasi qarzdorga qaytariladi. Qarzdordan undirilgan pul summasi ijro hujjatlari bo’yicha barcha talablarni qanoatlantirish uchun yetarli bo’lmasa, bu summa undiruvchilar o’rtasida belgilangan tartibda navbat bo’yicha taqsimlanadi. Har bir keyingi navbatdagi talablar o’zidan oldingi navbat dagi talablar to’liq qondirilgandan keyin qanoatlantiriladi. Undirilgan summa bir navbatdagi barcha talablarni to’la qanoatlantirish uchun yetarli bo’lmasa, ular har bir undiruvchiga tegishli summaga mutanosib ravishda qanoatlantiriladi. “Sud hujjatlari va boshqa organlar hujjatlarini ijro etish to’g’risida”gi Qonunning 78-moddasida qarzdordan undirilgan pul summalarini taqsimlashning asosiy prinsiplari ko’rsatilgan. Sud ijrochisi qarzdordan undirgan shu jumladan uning mol-mulkining realizatsiya qilish yo’li bilan olgan pul summasidan: -ijro yig’imi undiriladi; - ijro hujjatini ijro etish jarayonida qarzdorga solingan jarimalar undiriladi; -qolgan pul summasidan undiruvchining talablarini qanoatlantirish va qarzdordan undirilgan pul summasiga mutanosib ravishda ijro yig’imini qoplash uchun foydalaniladi; - undiruvchining barcha talablari qanoatlantirilgandan keyin qolgan pul summasi qarzdorga qaytariladi.Masalan,Qarzdor Aliyevdan undiruvchi Nabiyev foydasiga 5000000 so’m zarar va davlat foydasiga 1000000 so’m davlat boji

undirish to’g’risida ijro xujjatida belgilangan. Mazkur ijro hujjatiga asosan xatlangan mol-mulkni realizatsiya qilish jarayonida sotuvdan kelib tushgan 2000000 so’m pul mablag’i sud ijrochilarining bankdagi depozit hisob raqamiga kelib tushgan.Shundan sud ijrochisi birinchi navbatda 1000000 so’m davlat bojini va ushbu davlat bojiga mutanosib ravishda 10000 so’m ijro yig’imini qoplaydi. Qolgan 990000 so’m pul mablag’i hisobidan 1% ya’ni 9900 so’m ijro yig’imi va 980100 so’m undiruvchi Nabiyev foydasiga taqsimlanadi. Undiruvchilarning talablarini qanoatlantirish navbati va undiruvlar navbati Undiruvchilar talablarini qondirish navbatini belgilash zaruriyati qarzdordan undirilgan pul summasi ijro hujjatlari bo’yicha barcha talablarni qanoatlantirish uchun yetarli bo’lmagan hollarda vujudga keladi. Sud ijrochisi “Sud hujjatlari va boshqa organlar hujjatlarini ijro etish to’g’risida”gi Qonunning 80 - moddasida bayon etilgan qoidalarni qo’llashdan oldin qarzdordan undirilgan pul summasining barcha ijro hujjatlari bo’yicha talablarni qanoatlantirish uchun yetarli emasligiga ishonch xosil qilishi kerak. “Sud hujjatlari va boshqa organlar hujjatlarini ijro etish to’g’risida”gi Qonunning 80-moddasida undiruvchilarning talablarini qondirish navbati batafsil tartibga solingan. Birinchi navbatda: budjetga va davlat maqsadli jamg’armalariga to’lovlar bo’yicha talablar; mehnatga oid munosabatlardan kelib chiqadigan talablar; alimentlar undirish bo’yicha talablar; mualliflik shartnomalari bo’yicha haqlarni to’lash bo’yicha talablar; hayotga yoki sog’liqqa yetkazilgan zararni qoplash bo’yicha talablar; advokatlar tomonidan ko’rsatilgan yuridik yordam haqini to’lash bo’yicha talablar qanoatlantiriladi. Ikkinchi navbatda: ijtimoiy sug’urta bo’yicha talablar; jinoyat yoki ma’muriy huquqbuzarlik oqibatida jismoniy va yuridik shaxslarning mol-mulkiga yetkazilgan zararni qoplash bo’yicha talablar qanoatlantiriladi. Uchinchi navbatda majburiy sug’urta organlarining talablari qanoatlantiriladi.

To’rtinchi navbatda kreditorlarning garov bilan ta’minlangan talablari qanoatlantiriladi. Beshinchi navbatda kreditorlarning garov bilan ta’minlanmagan talablari qanoatlantiriladi. Oltinchi navbatda qolgan barcha talablar qanoatlantiriladi. Qarzdorga bir necha talablar (ijro hujjatlari) bo’yicha solingan ijro yig’imlari ushbu moddaning birinchi - oltinchi qismlarida belgilangan tegishli talabni qanoatlantirish uchun mo’ljallangan ketma-ketlikka muvofiq undiriladi. Bunda qarzdorga nomulkiy xususiyatdagi ijro hujjatlari bo’yicha solingan ijro yig’imlari, shuningdek qonunda belgilangan muddatda realizatsiya qilinmagan mol-mulk mulkiy xususiyatdagi ijro hujjatlari bo’yicha undiruvchiga o’tkazilgan hollarda birinchi navbatdagi talablarga tenglashtiriladi. Har bir keyingi navbatdagi talablar o’zidan oldingi navbatdagi talablar to’liq qondirilgandan keyin qanoatlantiriladi. Undirilgan pul summasi bir navbatning barcha talablarni to’liq qanoatlantirish uchun yetarli bo’lmagan hollarda ular har bir undiruvchiga tegishli summaga mutanosib ravishda qanoatlantiriladi. Bu holatda sud ijrochisi har bir undiruvchiga to’lanishi lozim bo’lgan summalar bo’yicha hisob-kitob qilishi lozim. Masalan, Sud ijrochisi ish yurituviga bir navbatdagi uchta ijro hujjati kelib tushdi. Ulardan biri — 10000 so’mni, ikkinchisi — 20000 so’mni va uchinchisi — 30000 so’mni undirishga qaratilgan. Qarzdorning mol-mulkini realizatsiya qilishdan esa sud ijrochilari bo’limining depozit hisobvarag’iga faqat 30000 so’m kelib tushgan. Mazkur holatda undiruvning har bir so’miga 30000 : (10000 + 20000 + 30000) - 0,5 so’m to’g’ri keladi. Demak, birinchi ijro hujjati bo’yicha 10000 x 0,5 = 5000 so’m, ikkinchisi bo’yicha 20000 x 0,5 = 10000 so’m, uchinchisi bo’yicha 30000 x 0,5 = 15000 so’m beriladi.

1.Seminar savollari: 1. Qarzdordan undirilgan pul summasi qanday taqsimlanadi? 2. Undiruvchilarning talablarini qanoatlantirish navbatini izohlab bering. 3. Undiruvlar tartibini tushuntirib bering. 4. Undirilgan pul summasi bir navbatning barcha talablarni to’liq qanoatlantirish uchun yetarli bo’lmagan hollarda ular qanday taqsimlanadi? 5. Undirilgan pul summasini taqsimlash haqida nimalarni bilasiz? Kelib tushgan pul mablag’larini o’tkazish (berish) qanday muddatlarda amalga oshiriladi? 6. Sud ijrochisida undiruvchining bankdagi hisobvaraqlari haqida ma’lumotlar bo’lmagan taqdirda, u qanday ish tutadi? 7. Pul mablag’larini o’tkazish Sud departamenti organlari tomonidan qanday tartibda amalga oshiriladi? 8. Undiruvchilarning talablarini qanoatlantirish navbati qanday amalga oshiriladi? 9. Undirilgan summa birinchi navbatdagi barcha talablarni to’la qanoatlantirish uchun yetarli bo’lmasa, qanday yo’l tutiladi?

2.Mustaqil tayyorlanish uchun masalalar: Vazifa№1 Sud ijrochisifuqarolik ishlari bo’yicha Uchtepa tumanlararo sudining qarzdor Yuldashevdan undiruvchi Boyto’rayevga 8500000 so’m qarzni undirish to’g’risidagi ijro hujjati yuzasidan ijro ishi qo’zg’atdi. Ijro harakatlarini ixtiyoriy amalga oshirish uchun besh kun muddat berib, bu muddat o’tgach, qarzdorga jarima va ijro yig’imini to’lash majburiyatini yukladi. Qarzdor ijro yig’imini to’lashni rad etdi. Masalaning keyingi yechimini toping. Vazifa№2 Sud ijrochisi Jo’rayev2011 yilning 23 may kuni fuqarolik ishlari bo’yicha Uchtepa tumanlararo sudining 87-sonli, qarzdor Inamovdan undiruvchi Ismailovga 970000 so’m qarzni undirish to’g’risidagi ijro hujjati yuzasidan ijro ishi qo’zg’atgan. Ushbu ijro ishi bo’yicha qarzdor Inamovdan qancha miqdorda ijro yig’imi undiriladi? Masalaning yechimini toping. Vazifa№3 Sud ijrochisi Hasanov ijro ishi yuritishni qo’zg’atish to’g’risidagi qarorda ijro hujjatidagi talablarni ixtiyoriy ravishda bajarish uchun qarzdor Soipovga ijro ishi qo’zg’atilgan kundan e’tiboran 5 kunlik muddat belgiladi. Qarzdor Soipov bu muddatda ijro hujjatidagi talabni bajarmadi. Sud ijrochisining keyingi harakatini davom ettiring.

Vazifa№4 Sud ijrochisi qarzdorning matiz rusumli avtomobilini ijro xujjatidagi ko’rsatilgan qarzni undirish uchun xatladi va saqlash uchun saqlovchiga topshirdi. Saqlovchi saqlash xarajatlarini qanday qoplaydi. Vazifa №5 Sud ijrosining ish yurituviga qarzdordan bitta davlatga ikkita yuridik shaxslar foydasiga qarzni undirish xaqidagi ijro xujjatlari kelib tushdi. Kelib tushgan pul mablag’lari qanday tartibda taqsimlanadi. Vazifa №6 Qarzdor Valiyev vafot etganligi sababli sud ijrochisi Lochinov ijro ishini to’xtatib turish to’g’risida qaror chiqardi va bu haqda undiruvchi Jabborovni xabardor qildi. Undiruvchi Jabborov ijrochining harakatidan norozi bo’lib, katta sud ijrochisiga shikoyat qildi. Masalaga yuridik baho bering. Vazifa №7 Sud ijrochisi2011 yilning 15 yanvar kuni undiruvchi foydasiga 500000 so’m qarzni undirish to’g’risidagi ijro hujjati bo’yicha qarzdor G’ulomovga nisbatan ijro ishini qo’zg’atib, ixtiyoriy ijro uchun 5 kun muxlat bergan. Qarzdor G’ulomov tomonidan ijro hujjati ixtiyoriy bajarilmaganidan so’ng sud ijrochisi 2011 yilning 21 yanvar kuni qarzdorning uyiga majburiy ijroni ta’minlash uchun kelgan. Qarzdor eshikni ochmadi. Sud ijrochisining keyingi harakatlarini aytib bering

Vazifa №8 Qarzdor Tog’ayev olti oy ichida o’z mol – mulkini olib ketmaganligi sababli, sud ijrochisi Anvarov qarzdorni yozma ravishda ogohlantirib, unga tegishli bo’lgan mol – mulkni realizatsiya qilish uchun topshirib yubordi. Qarzdor Tog ’ ayev esa , sud ijrochining xarakatidan norozi bo ’ lib , Sud Departamentining hududiy boshkarmasiga shikoyat qildi . Sud ijrochisining xarakati qonuniymi?

Adabiyotlar 1. Qarzdor jismoniy shaxsga ish haqi yoki unga tenglashtirilgan to’lovlarni to’layotgan tashkilotlar yoki boshka shaxslar tomonidan ijro hujjatlarini ijro etish qoidalari .// "O’zbekiston Respublikasi qonun hujjatlari to’plami". 2009, № 28, 329-modda. 2. Ijro ishi yuritishga oid normativ-huquqiy hujjatlar va ichki buyruqlar to’plami. T., Adolat, 2010, 464- bet. 3. M.Q. O’razaliyev. Ijro ishi yuritish. O’quv qo’llanma. T., TDYUI, 2011,369- bet. 4. U.A. Tuxtasheva. Ijro ishi yuritish. Darslik. T., TDYUI, 2009, 308 -bet. 5. Ijro ishi yuritishga oid protsessual hujjatlar namunalari to’plami. T., Adolat, 2010, 512- bet 6. D. Habibullayev. Sud qarorilari ijrosi muammo va yechim. “Huquq va burch”.T., 2009 , № 10, 36-38-bet. 7. B.Yusupov. Sud hujjatini ijro etmaganlik uchun jinoiy javobgarlik muammolari.Monografiya. T.,2011,173-bet. 8. Qarzdor jismoniy shaxsga ish haqi yoki unga tenglashtirilgan to’lovlarni to’layotgan tashkilotlar yoki boshka shaxslar tomonidan ijro hujjatlarini ijro etish qoidalari.// "O’zbekiston Respublikasi qonun hujjatlari to’plami". 2009, № 28, 329-modda.

Похожие

Sud qarorlarining ijro etilishi

Ijro ishi yuritishdagi xarajatlar

Undiruvni qarzdor yuridik shaxsning mol-mulkiga qaratishning xususiyatlari. Qarzdor yuridik shaxsning mol-mulkini xatlash va realizatsiya qilish

Alimentlar undirish to`g`risidagi ishlarni ko`rishning protsessual xususiyatlari

Mehnatga oid nizoli ishlarni ijro etish xususiyatlari